໕. ຘມ຺ມິກວຄ຺ໂຄ

໑. ນາຄສຸຕ຺ຕວຓ຺ຓນາ

໔໓. ປຎ຺ຈມສ຺ສ ປຐເມ ອາຍສ຺ມຕາ ອານນ຺ເທນ ສທ຺ຘິນ຺ຕິ ອິທໍ ‘‘ອາຍາມານນ຺ທາ’’ຕິ ເຖຣໍ ອາມນ຺ເຕຕ຺ວາ ຄຕຕ຺ຕາ ວຸຕ຺ຕໍ, ສຕ຺ຖາ ປນ ອນູເນຫິ ປຎ຺ຈຫິ ຠິກ຺ຂຸສເຕຫິ ປຣິວຸໂຕ ຕຕ຺ຖ ອຄມາສີຕິ ເວທິຕພ຺ໂພ. ເຕນຸປສງ຺ກມີຕິ ເຕເຫວ ປຎ຺ຈຫິ ຠິກ຺ຂຸສເຕຫິ ປຣິວຸໂຕ ອຸປສງ຺ກມິ. ປຣິສິຎ຺ຈິຕ຺ວາຕິ ໂວຫາຣວຈນເມຕໍ, ນ຺ຫາຍິຕ຺ວາຕິ ອຕ຺ໂຖ. ປຸພ຺ພາປຍມາໂນຕິ ຣຕ຺ຕທຸປຏ຺ຏໍ ນິວາເສຕ຺ວາ ອຸຕ຺ຕຣາສງ຺ຄຈີວຣໍ ທ຺ວີຫິ ຫຕ຺ເຖຫິ ຄເຫຕ຺ວາ ປຈ຺ຉິມໂລກຘາຕຸໍ ປິຏ຺ຐິໂຕ ກຕ຺ວາ ປຸຣຕ຺ຖິມໂລກຘາຕຸໍ ອຠິມຸໂຂ ໂວທກຠາເວນ ຄຕ຺ຕານິ ປຸພ຺ພສທິສານິ ກຸຣຸມາໂນ ອຏ຺ຐາສີຕິ ອຕ຺ໂຖ. ຠິກ຺ຂຸສງ຺ໂຆປິ ເຕນ ເຕນ ຐາເນນ ໂອຕຣິຕ຺ວາ ນ຺ຫຕ຺ວາ ປຈ຺ຈຸຕ຺ຕຣິຕ຺ວາ ສຕ຺ຖາຣໍເຍວ ປຣິວາເຣຕ຺ວາ ອຏ຺ຐາສິ. ອິຕິ ຕສ຺ມິໍ ສມເຍ ອາກາສໂຕ ປຕມານໍ ຣຕ຺ຕສຸວຓ຺ຓກຸຓ຺ຑລໍ ວິຍ ສູຣິໂຍ ປຈ຺ຉິມໂລກຘາຕຸໍ ປຏິປຊ຺ຊິ, ປຣິສຸທ຺ຘຣຊຕມຓ຺ຑໂລ ວິຍ ປາຈີນໂລກຘາຕຸໂຕ ຈນ຺ໂທ ອພ຺ຠຸຄ຺ຄຎ຺ຉິ, ມຊ຺ຌຏ຺ຐາເນປິ ປຎ຺ຈຠິກ຺ຂຸສຕປຣິວາໂຣ ສມ຺ມາສມ຺ພຸທ຺ໂຘ ຉພ຺ພຓ຺ຓພຸທ຺ຘຣສ຺ມິໂຍ ວິສ຺ສຊ຺ເຊຕ຺ວາ ປຸພ຺ພໂກຏ຺ຐກນທີຕີເຣ ໂລກໍ ອລງ຺ກຸຣຸມາໂນ ອຏ຺ຐາສິ.

ເຕນ ໂຂ ປນ ສມເຍນ…ເປ… ເສໂຕ ນາມ ນາໂຄຕິ ເສຕວຓ຺ຓຕາຍ ເອວໍ ລທ຺ຘນາໂມ ຫຕ຺ຖິນາໂຄ. ມຫາຕູຣິຍຕາຬິຕວາທິເຕນາຕິ ມຫນ຺ເຕນ ຕູຣິຍຕາຬິຕວາທິເຕນ. ຕຕ຺ຖ ປຐມໍ ສງ຺ຆຏ຺ຏນໍ ຕາຬິຕໍ ນາມ ໂຫຕິ, ຕໂຕ ປຣໍ ວາທິຕໍ. ຊໂນຕິ ຫຕ຺ຖິທສ຺ສນຕ຺ຖໍ ສນ຺ນິປຕິຕມຫາຊໂນ. ທິສ຺ວາ ເອວມາຫາຕິ ອງ຺ຄປຈ຺ຈງ຺ຄານິ ຆໍສິຕ຺ວາ ນ຺ຫາເປຕ຺ວາ ອຸຕ຺ຕາເຣຕ຺ວາ ພຫິຕີເຣ ຐເປຕ຺ວາ ຄຕ຺ຕານິ ໂວທການິ ກຕ຺ວາ ຫຕ຺ຖາລງ຺ກາເຣນ ອລງ຺ກຕໍ ຕໍ ມຫານາຄໍ ທິສ຺ວາ ອິທໍ ‘‘ອຠິຣູໂປ ວຕ, ໂຠ’’ຕິ ປສໍສາວຈນມາຫ. ກາຍຸປປນ຺ໂນຕິ ສຣີຣສມ຺ປຕ຺ຕິຍາ ອຸປປນ຺ໂນ, ປຣິປຸຓ຺ຓງ຺ຄປຈ຺ຈງ຺ໂຄຕິ ອຕ຺ໂຖ. ອາຍສ຺ມາ ອຸທາຍີຕິ ປຏິສມ຺ຠິທາປ຺ປຕ຺ໂຕ ກາຬຸທາຍິຕ຺ເຖໂຣ. ເອຕທໂວຈາຕິ ຕໍ ມຫາຊນໍ ຫຕ຺ຖິສ຺ສ ວຓ຺ຓໍ ຠຓນ຺ຕໍ ທິສ຺ວາ ‘‘ອຍໍ ຊໂນ ອເຫຕຸກປຏິສນ຺ຘິຍໍ ນິພ຺ພຕ຺ຕຫຕ຺ຖິໂນ ວຓ຺ຓໍ ກເຖຕິ, ນ ພຸທ຺ຘຫຕ຺ຖິສ຺ສ. ອຫໍ ທານິ ອິມິນາ ຫຕ຺ຖິນາເຄນ ອຸປມໍ ກຕ຺ວາ ພຸທ຺ຘນາຄສ຺ສ ວຓ຺ຓໍ ກເຖສ຺ສາມີ’’ຕິ ຈິນ຺ເຕຕ຺ວາ ເອຕໍ ‘‘ຫຕ຺ຖິເມວ ນຸ ໂຂ, ຠນ຺ເຕ’’ຕິອາທິວຈນໍ ອໂວຈ. ຕຕ຺ຖ ມຫນ຺ຕນ຺ຕິ ອາໂຣຫສມ຺ປນ຺ນໍ. ພ຺ຣຫນ຺ຕນ຺ຕິ ປຣິຓາຫສມ຺ປນ຺ນໍ. ເອວມາຫາຕິ ເອວໍ ວທຕິ. ອຖ ຠຄວາ ຍສ຺ມາ ອຍໍ ນາຄສທ຺ໂທ ຫຕ຺ຖິມ຺ຫິເຈວ ອສ຺ສໂຄຓອຸຣຄຣຸກ຺ຂມນຸສ຺ເສສຸ ຈາປິ ປວຕ຺ຕຕິ, ຕສ຺ມາ ຫຕ຺ຖິມ຺ປິ ໂຂຕິອາທິມາຫ.

ອາຄຸນ຺ຕິ ປາປກໍ ລາມກໍ ອກຸສລຘມ຺ມໍ. ຕມຫໍ ນາໂຄຕິ ພ຺ຣູມີຕິ ຕໍ ອຫໍ ອິເມຫິ ຕີຫິ ທ຺ວາເຣຫິ ທສນ຺ນໍ ອກຸສລກມ຺ມປຖານໍ ທ຺ວາທສນ຺ນຎ຺ຈ ອກຸສລຈິຕ຺ຕານໍ ອກຣຓໂຕ ນາໂຄຕິ ວທາມິ. ອຍຎ຺ຫິ ນ ອາຄຸໍ ກໂຣຕີຕິ ອິມິນາ ອຕ຺ເຖນ ນາໂຄ. ອິມາຫິ ຄາຖາຫິ ອນຸໂມທາມີຕິ ອິມາຫິ ຈຕຸສຏ຺ຐິປທາຫິ ໂສຬສຫິ ຄາຖາຫິ ອນຸໂມທາມິ ອຠິນນ຺ທາມິ.

ມນຸສ຺ສຠູຕນ຺ຕິ ເທວາທິຠາວໍ ອນຸປຄນ຺ຕ຺ວາ ມນຸສ຺ສເມວ ຠູຕໍ. ອຕ຺ຕທນ຺ຕນ຺ຕິ ອຕ຺ຕນາເຍວ ທນ຺ຕໍ, ນ ອຎ຺ເຎຫິ ທມຖໍ ອຸປນີຕໍ. ຠຄວາ ຫິ ອຕ຺ຕນາ ອຸປ຺ປາທິເຕເນວ ມຄ຺ຄທມເຖນ ຈກ຺ຂຸໂຕປິ ທນ຺ໂຕ, ໂສຕໂຕປິ, ຆານໂຕປິ, ຊິວ຺ຫາໂຕປິ, ກາຍໂຕປິ, ມນໂຕປີຕິ ອິເມສຸ ຉສຸ ຐາເນສຸ ທນ຺ໂຕ ສນ຺ໂຕ ນິພ຺ພຸໂຕ ປຣິນິພ຺ພຸໂຕ. ເຕນາຫ – ‘‘ອຕ຺ຕທນ຺ຕ’’ນ຺ຕິ. ສມາຫິຕນ຺ຕິ ທຸວິເຘນາປິ ສມາຘິນາ ສມາຫິຕໍ. ອິຣິຍມານນ຺ຕິ ວິຫຣມານໍ. ພ຺ຣຫ຺ມປເຖຕິ ເສຏ຺ຐປເຖ, ອມຕປເຖ, ນິພ຺ພານປເຖ. ຈິຕ຺ຕສ຺ສູປສເມ ຣຕນ຺ຕິ ປຐມຊ຺ຌາເນນ ປຎ຺ຈ ນີວຣຓານິ ວູປສເມຕ຺ວາ, ທຸຕິຍຊ຺ຌາເນນ ວິຕກ຺ກວິຈາເຣ, ຕຕິຍຊ຺ຌາເນນ ປີຕິໍ, ຈຕຸຕ຺ຖຊ຺ຌາເນນ ສຸຂທຸກ຺ຂໍ ວູປສເມຕ຺ວາ ຕສ຺ມິໍ ຈິຕ຺ຕສ຺ສູປສເມ ຣຕໍ ອຠິຣຕໍ.

ນມສ຺ສນ຺ຕີຕິ ກາເຍນ ນມສ຺ສນ຺ຕິ, ວາຈາຍ ນມສ຺ສນ຺ຕິ, ມນສາ ນມສ຺ສນ຺ຕິ, ຘມ຺ມານຸຘມ຺ມປຏິປຕ຺ຕິຍາ ນມສ຺ສນ຺ຕິ, ສກ຺ກໂຣນ຺ຕິ ຄຣຸໍ ກໂຣນ຺ຕິ. ສພ຺ພຘມ຺ມານປາຣຄຸນ຺ຕິ ສພ຺ເພສໍ ຂນ຺ຘາຍຕນຘາຕຸຘມ຺ມານໍ ອຠິຎ຺ຎາປາຣຄູ, ປຣິຎ຺ຎາປາຣຄູ, ປຫານປາຣຄູ, ຠາວນາປາຣຄູ, ສຈ຺ຉິກິຣິຍາປາຣຄູ, ສມາປຕ຺ຕິປາຣຄູຕິ ຉພ຺ພິເຘນ ປາຣຄມເນນ ປາຣຄຕໍ ປາຣປ຺ປຕ຺ຕໍ ມຕ຺ຖກປ຺ປຕ຺ຕໍ. ເທວາປິ ຕໍ ນມສ຺ສນ຺ຕີຕິ ທຸກ຺ຂປ຺ປຕ຺ຕາ ສຸພ຺ຣຫ຺ມເທວປຸຕ຺ຕາທໂຍ ສຸຂປ຺ປຕ຺ຕາ ຈ ສພ຺ເພວ ທສສຫສ຺ສຈກ຺ກວາຬວາສິໂນ ເທວາປິ ຕຸມ຺ເຫ ນມສ຺ສນ຺ຕິ. ອິຕິ ເມ ອຣຫໂຕ ສຸຕນ຺ຕິ ອິຕິ ມຍາ ຈຕູຫິ ກາຣເຓຫິ ອຣຫາຕິ ລທ຺ຘໂວຫາຣານໍ ຕຸມ຺ຫາກໍເຍວ ສນ຺ຕິເກ ສຸຕນ຺ຕິ ທີເປຕິ.

ສພ຺ພສໍໂຍຊນາຕີຕນ຺ຕິ ສພ຺ພານິ ທສວິຘສໍໂຍຊນານິ ອຕິກ຺ກນ຺ຕໍ. ວນາ ນິພ຺ພນມາຄຕນ຺ຕິ ກິເລສວນໂຕ ນິພ຺ພນໍ ກິເລສວນຣຫິຕໍ ນິພ຺ພານໍ ອາຄຕໍ ສມ຺ປຕ຺ຕໍ. ກາເມຫິ ເນກ຺ຂມ຺ມຣຕນ຺ຕິ ທຸວິເຘຫິ ກາເມຫິ ນິກ຺ຂນ຺ຕຕ຺ຕາ ປພ຺ພຊ຺ຊາ ອຏ຺ຐ ສມາປຕ຺ຕິໂຍ ຈຕ຺ຕາໂຣ ຈ ອຣິຍມຄ຺ຄາ ກາເມຫິ ເນກ຺ຂມ຺ມໍ ນາມ, ຕຕ຺ຖ ຣຕໍ ອຠິຣຕໍ. ມຸຕ຺ຕໍ ເສລາວ ກຎ຺ຈນນ຺ຕິ ເສລຘາຕຸໂຕ ມຸຕ຺ຕໍ ກຎ຺ຈນສທິສໍ.

ສພ຺ເພ ອຈ຺ຈຣຸຈີຕິ ສພ຺ພສຕ຺ເຕ ອຕິກ຺ກມິຕ຺ວາ ປວຕ຺ຕຣຸຈິ. ອຏ຺ຐມກຎ຺ຫິ ອຕິກ຺ກມິຕ຺ວາ ປວຕ຺ຕຣຸຈິຕາຍ ໂສຕາປນ຺ໂນ ອຈ຺ຈຣຸຈິ ນາມ, ໂສຕາປນ຺ນໍ ອຕິກ຺ກມິຕ຺ວາ ປວຕ຺ຕຣຸຈິຕາຍ ສກທາຄາມີ…ເປ… ຂີຓາສວໍ ອຕິກ຺ກມິຕ຺ວາ ປວຕ຺ຕຣຸຈິຕາຍ ປຈ຺ເຈກສມ຺ພຸທ຺ໂຘ, ປຈ຺ເຈກສມ຺ພຸທ຺ຘໍ ອຕິກ຺ກມິຕ຺ວາ ປວຕ຺ຕຣຸຈິຕາຍ ສມ຺ມາສມ຺ພຸທ຺ໂຘ ອຈ຺ຈຣຸຈິ ນາມ. ຫິມວາວຎ຺ເຎ ສິລຸຈ຺ຈເຍຕິ ຍຖາ ຫິມວາ ປພ຺ພຕຣາຊາ ອຎ຺ເຎ ປພ຺ພເຕ ອຕິໂຣຈຕິ, ເອວໍ ອຕິໂຣຈຕີຕິ ອຕ຺ໂຖ. ສຈ຺ຈນາໂມຕິ ຕຈ຺ຉນາໂມ ຠູຕນາໂມ ອາຄຸໍ ອກຣເຓເນວ ນາໂຄຕິ ເອວໍ ອວິຕຖນາໂມ.

ໂສຣຈ຺ຈນ຺ຕິ ສຸຈິສີລໍ. ອວິຫິໍສາຕິ ກຣຸຓາ ຈ ກຣຸຓາປຸພ຺ພຠາໂຄ ຈ. ປາທາ ນາຄສ຺ສ ເຕ ທຸເວຕິ ເຕ ພຸທ຺ຘນາຄສ຺ສ ທຸເວ ປຸຣິມປາທາ.

ຕໂປຕິ ຘຸຕສມາທານໍ. ພ຺ຣຫ຺ມຈຣິຍນ຺ຕິ ອຣິຍມຄ຺ຄສີລໍ. ຈຣຓາ ນາຄສ຺ສ ຕ຺ຍາປເຣຕິ ເຕ ພຸທ຺ຘນາຄສ຺ສ ອປເຣ ທ຺ເວ ປຈ຺ຉິມປາທາ. ສທ຺ຘາຫຕ຺ໂຖຕິ ສທ຺ຘາມຍາຍ ໂສຓ຺ຑາຍ ສມນ຺ນາຄໂຕ. ອຸເປກ຺ຂາເສຕທນ຺ຕວາຕິ ຉຬງ຺ຄຸເປກ຺ຂາມເຍຫິ ເສຕທນ຺ເຕຫິ ສມນ຺ນາຄໂຕ.

ສຕິ ຄີວາຕິ ຍຖາ ນາຄສ຺ສ ອງ຺ຄປຈ຺ຈງ຺ຄສ຺ມິໍ ສິຣາຊາລານໍ ຄີວາ ປຕິຏ຺ຐາ, ເອວໍ ພຸທ຺ຘນາຄສ຺ສ ໂສຣຈ຺ຈາທີນໍ ຘມ຺ມານໍ ສຕິ. ເຕນ ວຸຕ຺ຕໍ – ‘‘ສຕິ ຄີວາ’’ຕິ. ສິໂຣ ປຎ຺ຎາຕິ ຍຖາ ຫຕ຺ຖິນາຄສ຺ສ ສິໂຣ ອຸຕ຺ຕມງ຺ໂຄ, ເອວໍ ພຸທ຺ຘນາຄສ຺ສ ສພ຺ພຎ຺ຎຸຕຎາຓໍ. ເຕນ ຫິ ໂສ ສພ຺ພຘມ຺ເມ ຊານາຕິ. ເຕນ ວຸຕ຺ຕໍ – ‘‘ສິໂຣ ປຎ຺ຎາ’’ຕິ. ວີມໍສາ ຘມ຺ມຈິນ຺ຕນາຕິ ຍຖາ ຫຕ຺ຖິນາຄສ຺ສ ອຄ຺ຄໂສຓ຺ໂຑ ວີມໍສາ ນາມ ໂຫຕິ. ໂສ ຕາຍ ຖທ຺ຘມຸທຸກໍ ຂາທິຕພ຺ພາຂາທິຕພ຺ພຎ຺ຈ ວີມໍສຕິ, ຕໂຕ ປຫາຕພ຺ພໍ ປຊຫຕິ, ອາທາຕພ຺ພໍ ອາທິຍຕິ, ເອວເມວ ພຸທ຺ຘນາຄສ຺ສ ຘມ຺ມໂກຏ຺ຐາສປຣິຈ຺ເຉທກຎາຓສງ຺ຂາຕາ ຘມ຺ມຈິນ຺ຕນາ ວີມໍສາ. ເຕນ ຫິ ຎາເຓນ ໂສ ຠພ຺ພາຠພ຺ເພ ຊານາຕິ. ເຕນ ວຸຕ຺ຕໍ – ‘‘ວີມໍສາ ຘມ຺ມຈິນ຺ຕນາ’’ຕິ. ຘມ຺ມກຸຈ຺ຉິສມາຕໂປຕິ ຘມ຺ໂມ ວຸຈ຺ຈຕິ ຈຕຸຕ຺ຖຊ຺ຌານສມາຘິ, ກຸຈ຺ຉິເຍວ ສມາຕໂປ ກຸຈ຺ຉິສມາຕໂປ. ສມາຕໂປ ນາມ ສມາຕປນຏ຺ຐານໍ. ຘມ຺ໂມ ກຸຈ຺ຉິສມາຕໂປ ອສ຺ສາຕິ ຘມ຺ມກຸຈ຺ຉິສມາຕໂປ. ຈຕຸຕ຺ຖຊ຺ຌານສມາຘິສ຺ມິໍ ຐິຕສ຺ສ ຫິ ເຕ ເຕ ອິທ຺ຘິວິຘາທິຘມ຺ມາ ອິຊ຺ຌນ຺ຕິ, ຕສ຺ມາ ໂສ ກຸຈ຺ຉິສມາຕໂປຕິ ວຸຕ຺ໂຕ. ວິເວໂກຕິ ກາຍຈິຕ຺ຕອຸປຘິວິເວໂກ. ຍຖາ ນາຄສ຺ສ ວາລຘິ ມກ຺ຂິກາ ວາເຣຕິ, ເອວໍ ຕຖາຄຕສ຺ສ ວິເວໂກ ຄຫຏ຺ຐປພ຺ພຊິເຕ ວາເຣຕິ. ຕສ຺ມາ ໂສ ວາລຘີຕິ ວຸຕ຺ໂຕ.

ຌາຍີຕິ ທຸວິເຘນ ຌາເນນ ຌາຍີ. ອສ຺ສາສຣໂຕຕິ ນາຄສ຺ສ ຫິ ອສ຺ສາສປສ຺ສາສາ ວິຍ ພຸທ຺ຘນາຄສ຺ສ ຜລສມາປຕ຺ຕິ, ຕຕ຺ຖ ຣໂຕ, ອສ຺ສາສປສ຺ສາເສຫິ ວິຍ ຕາຍ ວິນາ ນ ວຕ຺ຕຕີຕິ ອຕ຺ໂຖ. ສພ຺ພຕ຺ຖ ສໍວຸໂຕຕິ ສພ຺ພທ຺ວາເຣສຸ ສໍວຸໂຕ. ອນວຊ຺ຊານີຕິ ສມ຺ມາອາຊີເວນ ອຸປ຺ປນ຺ນໂຠຊນານິ. ສາວຊ຺ຊານີຕິ ປຎ຺ຈວິຘມິຈ຺ຉາຊີວວເສນ ອຸປ຺ປນ຺ນໂຠຊນານິ.

ອຓຸໍຖູລນ຺ຕິ ຂຸທ຺ທກຎ຺ຈ ມຫນ຺ຕຎ຺ຈ. ສພ຺ພໍ ເຉຕ຺ວານ ພນ຺ຘນນ຺ຕິ ສພ຺ພໍ ທສວິຘມ຺ປິ ສໍໂຍຊນໍ ຉິນ຺ທິຕ຺ວານ. ນຸປລິປ຺ປຕິ ໂລເກນາຕິ ໂລເກນ ສທ຺ຘິໍ ຕຓ຺ຫາມານທິຏ຺ຐິເລເປຫິ ນ ລິປ຺ປຕິ. ມຫາຄິນີຕິ ມຫາອຄ຺ຄິ. ວິຎ຺ຎູຫິ ເທສິຕາຕິ ອິຘ ປຏິສມ຺ຠິທາປ຺ປຕ຺ໂຕ ກາຬຸທາຍິຕ຺ເຖໂຣວ ວິຎ຺ຎູ ປຓ຺ຑິໂຕ, ເຕນ ເທສິຕາຕິ ອຕ຺ໂຖ. ວິຎ຺ຎສ຺ສນ຺ຕິ ມຫານາຄາ, ນາຄໍ ນາເຄນ ເທສິຕນ຺ຕິ ອຸທາຍິຕ຺ເຖຣນາເຄນ ເທສິຕໍ ພຸທ຺ຘນາຄໍ ອິຕເຣ ຂີຓາສວາ ນາຄາ ວິຊານິສ຺ສນ຺ຕິ.

ສຣີຣໍ ວິຊຫໍ ນາໂຄ, ປຣິນິພ຺ພິສ຺ສຕີຕິ ໂພຘິປລ຺ລງ຺ເກ ກິເລສປຣິນິພ຺ພາເນນ ປຣິນິພ຺ພຸໂຕ, ຍມກສາລນ຺ຕເຣ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພາຍິສ຺ສຕິ. ເອວໍ ປຏິສມ຺ຠິທາປ຺ປຕ຺ໂຕ ອຸທາຍິຕ຺ເຖໂຣ ໂສຬສຫິ ຄາຖາຫິ ຈຕຸສຏ຺ຐິຍາ ປເທຫິ ທສພລສ຺ສ ວຓ຺ຓໍ ກເຖນ຺ໂຕ ເທສນໍ ນິຏ຺ຐາເປສິ. ຠຄວາ ອນຸໂມທິ. ເທສນາວສາເນ ຈຕຸຣາສີຕິປາຓສຫສ຺ສານິ ອມຕປານໍ ປິວິໍສູຕິ.

໒. ມິຄສາລາສຸຕ຺ຕວຓ຺ຓນາ

໔໔. ທຸຕິເຍ ກຖໍ ກຖໍ ນາມາຕິ ເກນ ເກນ ກາຣເຓນ. ອຎ຺ເຎຍ຺ໂຍຕິ ອາຊານິຕພ຺ໂພ. ຍຕ຺ຣ ຫິ ນາມາຕິ ຍສ຺ມິໍ ນາມ ຘມ຺ເມ. ສມສມຄຕິກາຕິ ສມຠາເວເນວ ສມຄຕິກາ. ຠວິສ຺ສນ຺ຕີຕິ ຊາຕາ. ສກທາຄາມິປຕ຺ໂຕ ຕຸສິຕໍ ກາຍໍ ອຸປປນ຺ໂນຕິ ສກທາຄາມິປຸຄ຺ຄໂລ ຫຸຕ຺ວາ ຕຸສິຕຠວເນເຍວ ນິພ຺ພຕ຺ໂຕ. ກຖໍ ກຖໍ ນາມາຕິ ເກນ ເກນ ນຸ ໂຂ ກາຣເຓນ, ກິໍ ນຸ ໂຂ ຊານິຕ຺ວາ ເທສິໂຕ, ອຸທາຫຸ ອຊານິຕ຺ວາຕິ. ເຖໂຣ ກາຣຓໍ ອຊານນ຺ໂຕ ເອວໍ ໂຂ ປເນຕໍ ຠຄິນິ ຠຄວຕາ ພ຺ຍາກຕນ຺ຕິ ອາຫ.

ອມ຺ມກາ ອມ຺ມກປຎ຺ຎາຕິ ອິຕ຺ຖີ ຫຸຕ຺ວາ ອິຕ຺ຖິສຎ຺ຎາຍ ເອວ ສມນ຺ນາຄຕາ. ເກ ຈ ປຸຣິສປຸຄ຺ຄລປໂຣປຣິຍຎາເຓຕິ ເອຕ຺ຖ ປຸຣິສປຸຄ຺ຄລປໂຣປຣິຍຎາຓໍ ວຸຈ຺ຈຕິ ປຸຣິສປຸຄ຺ຄລານໍ ຕິກ຺ຂມຸທຸວເສນ ອິນ຺ທ຺ຣິຍປໂຣປຣິຍຎາຓໍ. ຕສ຺ມາ ກາ ຈ ພາລາ ມິຄສາລາ, ເກ ຈ ປຸຣິສປຸຄ຺ຄລານໍ ອິນ຺ທ຺ຣິຍປໂຣປຣິຍຎາເຓ ອປ຺ປຏິຫຕວິສຍາ ສມ຺ມາສມ຺ພຸທ຺ຘາ, ອຸຠຍເມຕໍ ທູເຣ ສຸວິທູເຣຕິ ອຍເມຕ຺ຖ ສງ຺ເຂໂປ.

ອິທານິ ມິຄສາລາຍ ອຕ຺ຕໂນ ທູຣຠາວໍ ທສ຺ເສນ຺ໂຕ ຉຍິເມ, ອານນ຺ທາຕິອາທິມາຫ. ໂສຣໂຕ ໂຫຕີຕິ ປາປໂຕ ສຸຏ຺ຐຸ ໂອຣໂຕ ວິຣໂຕ ໂຫຕິ. ສຸຣໂຕຕິປິ ປາໂຐ. ອຠິນນ຺ທນ຺ຕິ ສພ຺ຣຫ຺ມຈາຣີ ເອກຕ຺ຕວາເສນາຕິ ເຕນ ສທ຺ຘິໍ ເອກໂຕວາເສນ ສພ຺ຣຫ຺ມຈາຣີ ອຠິນນ຺ທນ຺ຕິ ຕຸສ຺ສນ຺ຕິ. ເອກນ຺ຕວາເສນາຕິປິ ປາໂຐ, ສຕຕວາເສນາຕິ ອຕ຺ໂຖ. ສວເນນປິ ອກຕໍ ໂຫຕີຕິ ໂສຕພ຺ພຍຸຕ຺ຕກໍ ອສຸຕໍ ໂຫຕິ. ພາຫຸສຈ຺ເຈນປິ ອກຕໍ ໂຫຕີຕິ ເອຕ຺ຖ ພາຫຸສຈ຺ຈໍ ວຸຈ຺ຈຕິ ວີຣິຍໍ, ວີຣິເຍນ ກຕ຺ຕພ຺ພຍຸຕ຺ຕກໍ ອກຕໍ ໂຫຕີຕິ ອຕ຺ໂຖ. ທິຏ຺ຐິຍາປິ ອປ຺ປຏິວິທ຺ຘໍ ໂຫຕີຕິ ທິຏ຺ຐິຍາ ປຏິວິຊ຺ຌິຕພ຺ພໍ ອປ຺ປຏິວິທ຺ຘໍ ໂຫຕິ. ສາມາຍິກມ຺ປິ ວິມຸຕ຺ຕິໍ ນ ລຠຕີຕິ ກາລານຸກາລໍ ຘມ຺ມສ຺ສວນໍ ນິສ຺ສາຍ ປີຕິປາໂມຊ຺ຊໍ ນ ລຠຕິ. ຫານຄາມີເຍວ ໂຫຕີຕິ ປຣິຫານິເມວ ຄຈ຺ຉຕິ.

ປມາຓິກາຕິ ປຸຄ຺ຄເລສຸ ປມາຓຄ຺ຄາຫກາ. ປມິນນ຺ຕີຕິ ປເມຕຸໍ ຕຸເລຕຸໍ ອາຣຠນ຺ຕິ. ເອໂກ ຫີໂນຕິ ເອໂກ ຄຸເຓຫິ ຫີໂນ. ເອໂກ ປຓີໂຕຕິ ເອໂກ ຄຸເຓຫິ ປຓີໂຕ. ຕໍ ຫີຕິ ຕໍ ປມາຓກຣຓໍ.

ອຠິກ຺ກນ຺ຕຕໂຣຕິ ສຸນ຺ທຣຕໂຣ. ປຓີຕຕໂຣຕິ ອຸຕ຺ຕມຕໂຣ. ຘມ຺ມໂສໂຕ ນິພ຺ພຫຕີຕິ ສູຣໍ ຫຸຕ຺ວາ ປວຕ຺ຕມານວິປສ຺ສນາຎາຓໍ ນິພ຺ພຫຕິ, ອຣິຍຠູມິໍ ສມ຺ປາເປຕິ. ຕທນ຺ຕຣໍ ໂກ ຊາເນຍ຺ຍາຕິ ຕໍ ອນ຺ຕຣໍ ຕໍ ກາຣຓໍ ອຎ຺ຎຕ຺ຣ ຕຖາຄເຕນ ໂກ ຊາເນຍ຺ຍາຕິ ອຕ຺ໂຖ.

ໂກຘມາໂນຕິ ໂກໂຘ ຈ ມາໂນ ຈ. ໂລຠຘມ຺ມາຕິ ໂລໂຠເຍວ. ວຈີສງ຺ຂາຣາຕິ ອາລາປສລ຺ລາປວເສນ ວຈນາເນວ. ໂຍ ວາ ປນສ຺ສ ມາທິໂສຕິ ໂຍ ວາ ປນ ອຎ຺ໂຎປິ ມຍາ ສທິໂສ ສມ຺ມາສມ຺ພຸທ຺ໂຘເຍວ ອສ຺ສ, ໂສ ປຸຄ຺ຄເລສຸ ປມາຓໍ ຄຓ຺ເຫຍ຺ຍາຕິ ອຕ຺ໂຖ. ຂຎ຺ຎຕີຕິ ຄຸຓຂຓນໍ ປາປຸຓາຕິ. ອິເມ ໂຂ, ອານນ຺ທ, ຉ ປຸຄ຺ຄລາຕິ ທ຺ເວ ໂສຣຕາ, ທ຺ເວ ອຘິຄຕໂກຘມານໂລຠຘມ຺ມາ, ທ຺ເວ ອຘິຄຕໂກຘມານວຈີສງ຺ຂາຣາຕິ ອິເມ ຉ ປຸຄ຺ຄລາ. ຄຕິນ຺ຕິ ຎາຓຄຕິໍ. ເອກງ຺ຄຫີນາຕິ ເອເກເກນ ຄຸຓງ຺ເຄນ ຫີນາ. ປູຣໂຓ ສີເລນ ວິເສສີ ອໂຫສິ, ອິສິທຕ຺ໂຕ ປຎ຺ຎາຍ. ປູຣຓສ຺ສ ສີລໍ ອິສິທຕ຺ຕສ຺ສ ປຎ຺ຎາຐາເນ ຐິຕໍ, ອິສິທຕ຺ຕສ຺ສ ປຎ຺ຎາ ປູຣຓສ຺ສ ສີລຏ຺ຐາເນ ຐິຕາຕິ.

໓. ອິຓສຸຕ຺ຕວຓ຺ຓນາ

໔໕. ຕຕິເຍ ທາລິທ຺ທິຍນ຺ຕິ ທລິທ຺ທຠາໂວ. ກາມໂຠຄິໂນຕິ ກາເມ ຠຸຎ຺ຊນກສຕ຺ຕສ຺ສ. ອສ຺ສໂກຕິ ອຕ຺ຕໂນ ສນ຺ຕເກນ ຣຫິໂຕ. ອນາຬ຺ຫິໂກຕິ ນ ອຑ຺ໂຒ. ອິຓໍ ອາທິຍຕີຕິ ຊີວິຕຸໍ ອສກ຺ໂກນ຺ໂຕ ອິຓໍ ອາທິຍຕິ. ວຑ຺ຒິໍ ປຏິສ຺ສຸຓາຕີຕິ ທາຕຸໍ ອສກ຺ໂກນ຺ໂຕ ວຑ຺ຒິໍ ທສ຺ສາມີຕິ ປຏິຊານາຕິ. ອນຸຈຣນ຺ຕິປິ ນນ຺ຕິ ປຣິສມຊ຺ຌຄຓມຊ຺ຌາທີສຸ ອາຕປຐປນປໍສຸໂອກິຣຓາທີຫິ ວິປ຺ປກາຣໍ ປາເປນ຺ໂຕ ປຈ຺ຉໂຕ ປຈ຺ຉໂຕ ອນຸພນ຺ຘນ຺ຕິ. ສທ຺ຘາ ນຕ຺ຖີຕິ ໂອກປ຺ປນກສທ຺ຘາມຕ຺ຕກມ຺ປິ ນຕ຺ຖິ. ຫິຣີ ນຕ຺ຖີຕິ ຫິຣີຍນາກາຣມຕ຺ຕກມ຺ປິ ນຕ຺ຖິ. ໂອຕ຺ຕປ຺ປໍ ນຕ຺ຖີຕິ ຠາຍນາກາຣມຕ຺ຕກມ຺ປິ ນຕ຺ຖິ. ວີຣິຍໍ ນຕ຺ຖີຕິ ກາຍິກວີຣິຍມຕ຺ຕກມ຺ປິ ນຕ຺ຖິ. ປຎ຺ຎາ ນຕ຺ຖີຕິ ກມ຺ມສ຺ສກຕປຎ຺ຎາມຕ຺ຕກມ຺ປິ ນຕ຺ຖິ. ອິຓາທານສ຺ມິໍ ວທາມີຕິ ອິຓຄ຺ຄຫຓໍ ວທາມິ. ມາ ມໍ ຊຎ຺ຎູຕິ ມາ ມໍ ຊານາຕຸ.

ທາລິທ຺ທິຍໍ ທຸກ຺ຂນ຺ຕິ ຘນທລິທ຺ທຠາໂວ ທຸກ຺ຂໍ. ກາມລາຠາຠິຊປ຺ປິນນ຺ຕິ ກາມລາຠໍ ປຕ຺ເຖນ຺ຕານໍ. ປາປກມ຺ມວິນິພ຺ພໂຍຕິ ປາປກມ຺ມວຑ຺ຒໂກ. ສໍສປ຺ປຕີຕິ ປຣິປ຺ຜນ຺ທຕິ. ຊານນ຺ຕິ ຊານນ຺ໂຕ. ຍສ຺ສ ວິປ຺ປຏິສາຣຊາຕິ ເຍ ອສ຺ສ ວິປ຺ປຏິສາຣໂຕ ຊາຕາ. ໂຍນິມຎ຺ຎຕຣນ຺ຕິ ເອກໍ ຕິຣຈ຺ຉານໂຍນິໍ. ທທໍ ຈິຕ຺ຕໍ ປສາທຍນ຺ຕິ ຈິຕ຺ຕໍ ປສາເທນ຺ໂຕ ທທມາໂນ.

ກຏຄ຺ຄາໂຫຕິ ຊຍຄ຺ຄາໂຫ, ອນປຣາຘຄ຺ຄາໂຫ ໂຫຕິ. ຆຣເມສິໂນຕິ ຆຣາວາສໍ ປຣິເຍສນ຺ຕສ຺ສ ວສມານສ຺ສ ວາ. ຈາໂຄ ປຸຎ຺ຎໍ ປວຑ຺ຒຕີຕິ ຈາໂຄຕິ ສງ຺ຂໍ ຄຕໍ ປຸຎ຺ຎໍ ວຑ຺ຒຕິ. ຈາຄາ ປຸຎ຺ຎນ຺ຕິ ວາ ປາໂຐ. ປຕິຏ຺ຐິຕາຕິ ປຕິຏ຺ຐິຕສທ຺ຘາ ນາມ ໂສຕາປນ຺ນສ຺ສ ສທ຺ຘາ. ຫິຣິມໂນຕິ ຫິຣິສມ຺ປຍຸຕ຺ຕຈິຕ຺ໂຕ. ນິຣາມິສໍ ສຸຂນ຺ຕິ ຕີຓິ ຌານານິ ນິສ຺ສາຍ ອຸປ຺ປຊ຺ຊນກສຸຂໍ. ອຸເປກ຺ຂນ຺ຕິ ຈຕຸຕ຺ຖຊ຺ຌານຸເປກ຺ຂໍ. ອາຣທ຺ຘວີຣິໂຍຕິ ປຣິປຸຓ຺ຓປຄ຺ຄຫິຕວີຣິໂຍ. ຌານານິ ອຸປສມ຺ປຊ຺ຊາຕິ ຈຕ຺ຕາຣິ ຌານານິ ປຕ຺ວາ. ເອໂກທິ ນິປໂກ ສໂຕຕິ ເອກຄ຺ຄຈິຕ຺ໂຕ ກມ຺ມສ຺ສກຕຎາຓສຕີຫິ ຈ ສມນ຺ນາຄໂຕ.

ເອວໍ ຎຕ຺ວາ ຍຖາຠູຕນ຺ຕິ ເອວໍ ເອຕ຺ຕກໍ ກາຣຓໍ ຍຖາສຠາວໍ ຊານິຕ຺ວາ. ສພ຺ພສໍໂຍຊນກ຺ຂເຍຕິ ນິພ຺ພາເນ. ສພ຺ພໂສຕິ ສພ຺ພາກາເຣນ. ອນຸປາທາຍາຕິ ອຄ຺ຄເຫຕ຺ວາ. ສມ຺ມາ ຈິຕ຺ຕໍ ວິມຸຈ຺ຈຕີຕິ ອິທໍ ວຸຕ຺ຕໍ ໂຫຕິ – ສພ຺ພສໍໂຍຊນກ຺ຂຍສງ຺ຂາເຕ ນິພ຺ພາເນ ສພ຺ພໂສ ອນຸປາທິຍິຕ຺ວາ ສມ຺ມາ ເຫຕຸນາ ນເຍນ ມຄ຺ຄຈິຕ຺ຕໍ ວິມຸຈ຺ຈຕິ. ‘‘ເອຕໍ ຎຕ຺ວາ ຍຖາຠູຕໍ, ສພ຺ພສໍໂຍຊນກ຺ຂຍ’’ນ຺ຕິປິ ປາຬິຍໍ ລິຂິຕໍ, ຕສ຺ສ ເອຕໍ ສພ຺ພສໍໂຍຊນກ຺ຂຍສງ຺ຂາຕໍ ນິພ຺ພານໍ ຍຖາຠູຕໍ ຎຕ຺ວາຕິ ອຕ຺ໂຖ. ປຸຣິມປຈ຺ຉິເມຫິ ປນ ສທ຺ຘິໍ ນ ຆຏີຍຕິ.

ຕສ຺ສ ສມ຺ມາ ວິມຸຕ຺ຕສ຺ສາຕິ ຕສ຺ສ ສມ຺ມາ ວິມຸຕ຺ຕສ຺ສ ຂີຓາສວສ຺ສ. ຎາຓໍ ໂຫຕີຕິ ປຈ຺ຈເວກ຺ຂຓຎາຓໍ ໂຫຕິ. ຕາທິໂນຕິ ຕໍສຓ຺ຐິຕສ຺ສ. ອກຸປ຺ປາຕິ ອກຸປ຺ປາຣມ຺ມຓຕ຺ຕາ ກຸປ຺ປກາຣຓານໍ ກິເລສານຎ຺ຈ ອຠາເວນ ອກຸປ຺ປາ. ວິມຸຕ຺ຕີຕິ ມຄ຺ຄວິມຸຕ຺ຕິປິ ຜລວິມຸຕ຺ຕິປິ. ຠວສໍໂຍຊນກ຺ຂເຍຕິ ຠວສໍໂຍຊນກ຺ຂຍສງ຺ຂາເຕ ນິພ຺ພາເນ ຠວສໍໂຍຊນານຎ຺ຈ ຂຍນ຺ເຕ ອຸປ຺ປນ຺ນາ. ເອຕໍ ໂຂ ປຣມໍ ຎາຓນ຺ຕິ ເອຕໍ ມຄ຺ຄຜລຎາຓໍ ປຣມຎາຓໍ ນາມ. ສຸຂມນຸຕ຺ຕຣນ຺ຕິ ເອຕເທວ ມຄ຺ຄຜລສຸຂໍ ອນຸຕ຺ຕຣໍ ສຸຂໍ ນາມ. ອາຓຓ຺ຍມຸຕ຺ຕມນ຺ຕິ ສພ຺ເພສໍ ອຓຓານໍ ຂີຓາສໂວ ອຸຕ຺ຕມອຓໂຓ, ຕສ຺ມາ ອຣຫຕ຺ຕຜລໍ ອາຓຓ຺ຍມຸຕ຺ຕມນ຺ຕິ ອຣຫຕ຺ຕຜເລນ ເທສນາຍ ກູຏໍ ຄຓ຺ຫິ. ອິມສ຺ມິຎ຺ຈ ສຸຕ຺ເຕ ວຏ຺ຏເມວ ກເຖຕ຺ວາ ຄາຖາສຸ ວຏ຺ຏວິວຏ຺ຏໍ ກຖິຕນ຺ຕິ.

໔. ມຫາຈຸນ຺ທສຸຕ຺ຕວຓ຺ຓນາ

໔໖. ຈຕຸຕ຺ເຖ ເຈຕີສູຕິ ເຈຕິຣຏ຺ເຐ. ສຍໍຊາຕິຍນ຺ຕິ ເອວໍນາມເກ ນິຄເມ. ມຫາຈຸນ຺ໂທຕິ ຘມ຺ມເສນາປຕິສ຺ສ ກນິຏ຺ຐຠາຕິໂກ. ຘມ຺ເມ ໂຍໂຄ ອນຸໂຍໂຄ ເອເຕສນ຺ຕິ ຘມ຺ມໂຍຄາ. ຘມ຺ມກຖິການໍ ເອຕໍ ນາມໍ. ຌາຍນ຺ຕີຕິ ຌາຍີ. ອປສາເທນ຺ຕີຕິ ຆຏ຺ເຏນ຺ຕິ ຫິໍສນ຺ຕິ. ຌາຍນ຺ຕີຕິ ຈິນ຺ເຕນ຺ຕິ. ປຊ຺ຌາຍນ຺ຕີຕິອາທີນິ ອຸປສຄ຺ຄວເສນ ວຑ຺ຒິຕານິ. ກິມິເມ ຌາຍນ຺ຕີຕິ ກິໍ ນາມ ອິເມ ຌາຍນ຺ຕິ. ກິນ຺ຕິເມ ຌາຍນ຺ຕີຕິ ກິມຕ຺ຖໍ ອິເມ ຌາຍນ຺ຕິ. ກຖໍ ອິເມ ຌາຍນ຺ຕີຕິ ເກນ ກາຣເຓນ ອິເມ ຌາຍນ຺ຕິ. ອມຕໍ ຘາຕຸໍ ກາເຍນ ຜຸສິຕ຺ວາ ວິຫຣນ຺ຕີຕິ ມຣຓວິຣຫິຕໍ ນິພ຺ພານຘາຕຸໍ ສນ຺ຘາຍ ກມ຺ມຏ຺ຐານໍ ຄເຫຕ຺ວາ ວິຫຣນ຺ຕາ ອນຸກ຺ກເມນ ຕໍ ນາມກາເຍນ ຜຸສິຕ຺ວາ ວິຫຣນ຺ຕິ. ຄມ຺ຠີຣໍ ອຕ຺ຖປທນ຺ຕິ ຄຸຬ຺ຫໍ ປຏິຈ຺ຉນ຺ນໍ ຂນ຺ຘຘາຕຸອາຍຕນາທິອຕ຺ຖໍ. ປຎ຺ຎາຍ ອຕິວິຊ຺ຌ ປສ຺ສນ຺ຕີຕິ ສຫວິປສ຺ສນາຍ ມຄ຺ຄປຎ຺ຎາຍ ປຏິວິຊ຺ຌິຕ຺ວາ ປສ຺ສນ຺ຕິ. ອິມສ຺ມິໍ ປນຕ຺ເຖ ສມ຺ມສນປຏິເວຘປຎ຺ຎາປິ ອຸຄ຺ຄຫປຣິປຸຈ຺ຉາປຎ຺ຎາປິ ວຏ຺ຏຕິເຍວາຕິ.

໕-໖. ສນ຺ທິຏ຺ຐິກສຸຕ຺ຕທ຺ວຍວຓ຺ຓນາ

໔໗-໔໘. ປຎ຺ຈເມ ສນ຺ຕໍ ວາ ອຊ຺ຌຕ຺ຕນ຺ຕິ ນິຍກຊ຺ຌຕ຺ເຕ ວິຊ຺ຊມານໍ. ໂລໂຠຕິອາທີຫິ ຕີຓິ ອກຸສລມູລານິ ທສ຺ສິຕານິ. ໂລຠຘມ຺ມາຕິອາທີຫິ ຕໍສມ຺ປຍຸຕ຺ຕກາ ຘມ຺ມາ. ຉຏ຺ເຐ ກາຍສນ຺ໂທສນ຺ຕິ ກາຍທ຺ວາຣສ຺ສ ທຸສ຺ສນາກາຣໍ. ເສສທ຺ວເຍປິ ເອເສວ ນໂຍ. ອິເມສຸ ທ຺ວີສຸ ສຸຕ຺ເຕສຸ ປຈ຺ຈເວກ຺ຂຓາວ ກຖິຕາ.

໗. ເຂມສຸຕ຺ຕວຓ຺ຓນາ

໔໙. ສຕ຺ຕເມ ວຸສິຕວາຕິ ວຸຕ຺ຖພ຺ຣຫ຺ມຈຣິຍວາໂສ. ກຕກຣຓີໂຍຕິ ຈຕູຫິ ມຄ຺ເຄຫິ ກຕ຺ຕພ຺ພໍ ກຕ຺ວາ ຐິໂຕ. ໂອຫິຕຠາໂຣຕິ ຂນ຺ຘຠາຣໍ ກິເລສຠາຣໍ ອຠິສງ຺ຂາຣຠາຣຎ຺ຈ ໂອຕາເຣຕ຺ວາ ຐິໂຕ. ອນຸປ຺ປຕ຺ຕສທຕ຺ໂຖຕິ ສທຕ຺ໂຖ ວຸຈ຺ຈຕິ ອຣຫຕ຺ຕໍ, ຕໍ ປຕ຺ໂຕຕິ ອຕ຺ໂຖ. ປຣິກ຺ຂີຓຠວສໍໂຍຊໂນຕິ ຂີຓຠວພນ຺ຘໂນ. ສມ຺ມທຎ຺ຎາ ວິມຸຕ຺ໂຕຕິ ສມ຺ມາ ເຫຕຸນາ ກາຣເຓນ ຊານິຕ຺ວາ ວິມຸຕ຺ໂຕ. ຕສ຺ສ ນ ເອວໍ ໂຫຕິ ອຕ຺ຖິ ເມ ເສຍ຺ໂຍຕິ ວາຕິອາທີຫິ ເສຍ຺ຍສ຺ສ ເສຍ຺ໂຍຫມສ຺ມີຕິ ມານາທໂຍ ຕໂຍ ມານາ ປຏິກ຺ຂິຕ຺ຕາ. ນ ຫິ ຂີຓາສວສ຺ສ ‘‘ອຕ຺ຖິ ມຍ຺ຫໍ ເສຍ຺ໂຍ, ອຕ຺ຖິ ສທິໂສ, ອຕ຺ຖິ ຫີໂນ’’ຕິ ມາໂນ ໂຫຕິ. ນຕ຺ຖິ ເມ ເສຍ຺ໂຍຕິອາທີຫິປິ ເຕເຍວ ປຏິກ຺ຂິຕ຺ຕາ. ນ ຫິ ຂີຓາສວສ຺ສ ‘‘ອຫເມວ ເສຍ຺ໂຍ, ອຫໍ ສທິໂສ, ອຫໍ ຫີໂນ, ອຎ຺ເຎ ເສຍ຺ຍາທໂຍ ນຕ຺ຖີ’’ຕິ ເອວໍ ມາໂນ ໂຫຕິ.

ອຈິຣປກ຺ກນ຺ເຕສູຕິ ອຣຫຕ຺ຕໍ ພ຺ຍາກຣິຕ຺ວາ ອຈິຣໍເຍວ ປກ຺ກນ຺ເຕສຸ. ອຎ຺ຎໍ ພ຺ຍາກໂຣນ຺ຕີຕິ ອຣຫຕ຺ຕໍ ກເຖນ຺ຕິ. ຫສມານກາ ມຎ຺ເຎ ອຎ຺ຎໍ ພ຺ຍາກໂຣນ຺ຕີຕິ ຫສມານາ ວິຍ ກເຖນ຺ຕິ. ວິຆາຕໍ ອາປຊ຺ຊນ຺ຕີຕິ ທຸກ຺ຂໍ ອາປຊ຺ຊນ຺ຕິ.

ນ ອຸສ຺ເສສຸ ນ ໂອເມສຸ, ສມຕ຺ເຕ ໂນປນີຍເຣຕິ ເອຕ຺ຖ ອຸສ຺ສາຕິ ອຸສ຺ສິຕຕາ ເສຍ຺ຍປຸຄ຺ຄລາ. ໂອມາຕິ ຫີນາ. ສມຕ຺ໂຕຕິ ສທິໂສ. ອິຕິ ອິເມສຸ ຕີສຸປິ ເສຍ຺ຍຫີນສທິເສສຸ ຂີຓາສວາ ມາເນນ ນ ອຸປນີຍເຣ, ນ ອຸປເນນ຺ຕິ, ນ ອຸປຄຈ຺ຉນ຺ຕີຕິ ອຕ຺ໂຖ. ຂີຓາ ຊາຕີຕິ ຂີຓາ ເຕສໍ ຊາຕິ. ວຸສິຕໍ ພ຺ຣຫ຺ມຈຣິຍນ຺ຕິ ວຸຕ຺ຖໍ ມຄ຺ຄພ຺ຣຫ຺ມຈຣິຍໍ. ຈຣນ຺ຕິ ສໍໂຍຊນວິປ຺ປມຸຕ຺ຕາຕິ ສພ຺ພສໍໂຍຊເນຫິ ວິມຸຕ຺ຕາ ຫຸຕ຺ວາ ຈຣນ຺ຕິ. ສຸຕ຺ເຕປິ ຄາຖາຍມ຺ປິ ຂີຓາສໂວ ກຖິໂຕ.

໘. ອິນ຺ທ຺ຣິຍສໍວຣສຸຕ຺ຕວຓ຺ຓນາ

໕໐. ອຏ຺ຐເມ ຫຕູປນິສໍ ໂຫຕີຕິ ຫຕູປນິສ຺ສຍໍ ໂຫຕິ. ສີລວິປນ຺ນສ຺ສາຕິ ວິປນ຺ນສີລສ຺ສ. ຍຖາຠູຕຎາຓທສ຺ສນນ຺ຕິ ຕຣຸຓວິປສ຺ສນາຎາຓໍ. ນິພ຺ພິທາວິຣາໂຄຕິ ເອຕ຺ຖ ນິພ຺ພິທາ ພລວວິປສ຺ສນາ, ວິຣາໂຄ ອຣິຍມຄ຺ໂຄ. ວິມຸຕ຺ຕິຎາຓທສ຺ສນນ຺ຕິ ເອຕ຺ຖ ວິມຸຕ຺ຕີຕິ ອຣຫຕ຺ຕຜລໍ, ຎາຓທສ຺ສນນ຺ຕິ ປຈ຺ຈເວກ຺ຂຓຎາຓໍ. ອຸປນິສ຺ສຍສມ຺ປນ຺ນໍ ໂຫຕີຕິ ສມ຺ປນ຺ນອຸປນິສ຺ສຍໍ ໂຫຕິ. ອິມສ຺ມິໍ ສຸຕ຺ເຕ ສີລານຸຣກ຺ຂຓອິນ຺ທ຺ຣິຍສໍວໂຣ ກຖິໂຕ.

໙. ອານນ຺ທສຸຕ຺ຕວຓ຺ຓນາ

໕໑. ນວເມ ກິຕ຺ຕາວຕາຕິ ກິຕ຺ຕເກນ. ອສ຺ສຸຕຎ຺ເຈວາຕິ ອຎ຺ຎສ຺ມິໍ ກາເລ ອສ຺ສຸຕປຸພ຺ພໍ. ນ ສມ຺ໂມສໍ ຄຈ຺ຉນ຺ຕີຕິ ວິນາສໍ ນ ຄຈ຺ຉນ຺ຕິ. ເຈຕໂສ ສມ຺ຜຸຏ຺ຐປຸພ຺ພາຕິ ຈິຕ຺ເຕນ ຜຸສິຕປຸພ຺ພາ. ສມຸທາຈຣນ຺ຕີຕິ ມໂນທ຺ວາເຣ ຈຣນ຺ຕິ. ອວິຎ຺ຎາຕຎ຺ຈ ວິຊານາຕີຕິ ອຎ຺ຎສ຺ມິໍ ກາເລ ອວິຎ຺ຎາຕກາຣຓໍ ຊານາຕິ. ປຣິຍາປຸຓາຕີຕິ ວຬຎ຺ເຊຕິ ກເຖຕິ. ເທເສຕີຕິ ປກາເສຕິ. ປຣໍ ວາເຈຕີຕິ ປຣໍ ອຸຄ຺ຄຓ຺ຫາເປຕິ.

ອາຄຕາຄມາຕິ ທີຆາທີສຸ ໂຍ ໂກຈິ ອາຄໂມ ອາຄໂຕ ເອເຕສນ຺ຕິ ອາຄຕາຄມາ. ຘມ຺ມຘຣາຕິ ສຸຕ຺ຕນ຺ຕປິຏກຘຣາ. ວິນຍຘຣາຕິ ວິນຍປິຏກຘຣາ. ມາຕິກາຘຣາຕິ ທ຺ເວປາຕິໂມກ຺ຂຘຣາ. ປຣິປຸຈ຺ຉຕີຕິ ອນຸສນ຺ຘິປຸພ຺ພາປຣໍ ປຸຈ຺ຉຕິ. ປຣິປຎ຺ຫຕີຕິ ອິທຎ຺ຈິທຎ຺ຈ ປຸຈ຺ຉິສ຺ສາມີຕິ ປຣິຕຸລຕິ ປຣິຈ຺ຉິນ຺ທຕິ. ອິທໍ, ຠນ຺ເຕ, ກຖນ຺ຕິ, ຠນ຺ເຕ, ອິທໍ ອນຸສນ຺ຘິປຸພ຺ພາປຣໍ ກຖໍ ໂຫຕີຕິ ປຸຈ຺ຉຕິ. ອິມສ຺ສ ກ຺ວຕ຺ໂຖຕິ ອິມສ຺ສ ຠາສິຕສ຺ສ ໂກ ອຕ຺ໂຖຕິ ປຸຈ຺ຉຕິ. ອວິວຏນ຺ຕິ ອວິວຣິຕໍ. ວິວຣນ຺ຕີຕິ ປາກຏໍ ກໂຣນ຺ຕິ. ກງ຺ຂາຐານິເຍສູຕິ ກງ຺ຂາຍ ກາຣຓຠູເຕສຸ. ຕຕ຺ຖ ຍສ຺ມິໍ ຘມ຺ເມ ກງ຺ຂາ ອຸປ຺ປຊ຺ຊຕິ, ສ຺ເວວ ກງ຺ຂາຐານິໂຍ ນາມາຕິ ເວທິຕພ຺ໂພ.

໑໐. ຂຕ຺ຕິຍສຸຕ຺ຕວຓ຺ຓນາ

໕໒. ທສເມ ໂຠຄາຘິປ຺ປາຍາຕິ ໂຠຄສໍຫຣຓຕ຺ຖໍ ຐປິຕາຘິປ຺ປາຍາ ປວຕ຺ຕອຊ຺ຌາສຍາ. ປຎ຺ຎູປວິຈາຣາຕິ ປຎ຺ຎວນ຺ໂຕ ຠເວຍ຺ຍາມາຕິ ເອວໍ ປຎ຺ຎຕ຺ຖາຍ ປວຕ຺ຕູປວິຈາຣາ. ອຍເມວ ເນສໍ ວິຈາໂຣ ຈິຕ຺ເຕ ອຸປວິຈຣຕິ. ພລາຘິຏ຺ຐານາຕິ ພລກາຍາຘິຏ຺ຐານາ. ພລກາຍຎ຺ຫິ ລທ຺ຘາ ເຕ ລທ຺ຘປຕິຏ຺ຐາ ນາມ ໂຫນ຺ຕິ. ປຖວິຠິນິເວສາຕິ ປຖວິສາມິໂນ ຠວິສ຺ສາມາຕິ ເອວໍ ປຖວິອຕ຺ຖາຍ ກຕຈິຕ຺ຕາຠິນິເວສາ. ອິສ຺ສຣິຍປຣິໂຍສານາຕິ ຣຊ຺ຊາຠິເສກປຣິໂຍສານາ. ອຠິເສກຎ຺ຫິ ປຕ຺ວາ ເຕ ປຣິໂຍສານປ຺ປຕ຺ຕາ ນາມ ໂຫນ຺ຕິ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ເສສປເທສຸ ປເນຕ຺ຖ ອຍມຘິປ຺ປາໂຍ – ພ຺ຣາຫ຺ມຓາ ຕາວ ມນ຺ເຕ ລຠິຕ຺ວາ ລທ຺ຘປຕິຏ຺ຐາ ນາມ ໂຫນ຺ຕິ, ຄຫປຕິກາ ຍໍກິຎ຺ຈິ ສິປ຺ປໍ, ອິຕ຺ຖີ ກຸລທາຍຊ຺ຊສາມິກໍ ປຸຕ຺ຕໍ, ໂຈຣາ ຍໍກິຎ຺ຈິ ອາວຸຘສຕ຺ຖໍ, ສມຓາ ສີລປຣິປຸຓ຺ຓາ ລທ຺ຘປຕິຏ຺ຐາ ນາມ ໂຫນ຺ຕິ. ຕສ຺ມາ ມນ຺ຕາຘິຏ຺ຐານາຕິອາທີນິ ວຸຕ຺ຕານິ.

ພ຺ຣາຫ຺ມຓານຎ຺ຈ ‘‘ຍຎ຺ຎໍ ຍຊິສ຺ສາມາ’’ຕິ ຈິຕ຺ຕໍ ອຠິນິວິສຕິ, ພ຺ຣຫ຺ມໂລເກ ປຕ຺ເຕ ປຣິໂຍສານປ຺ປຕ຺ຕາ ນາມ ໂຫນ຺ຕິ. ຕສ຺ມາ ເຕ ຍຎ຺ຎາຠິນິເວສາ ພ຺ຣຫ຺ມໂລກປຣິໂຍສານາຕິ ວຸຕ຺ຕາ. ກມ຺ມນ຺ຕກຣຓຕ຺ຖາຍ ມໂນ ເອເຕສໍ ອຠິນິວິສຕີຕິ ກມ຺ມນ຺ຕາຠິນິເວສາ. ກມ຺ເມ ນິຏ຺ຐິເຕ ປຣິໂຍສານປ຺ປຕ຺ຕາ ນາມ ໂຫນ຺ຕີຕິ ນິຏ຺ຐິຕກມ຺ມນ຺ຕປຣິໂຍສານາ.

ປຸຣິສາຘິປ຺ປາຍາຕິ ປຸຣິເສສຸ ປວຕ຺ຕອຊ຺ຌາສຍາ. ອລງ຺ກາຣຕ຺ຖາຍ ມໂນ ອຸປວິຈຣຕິ ເອຕິສ຺ສາຕິ ອລງ຺ກາຣູປວິຈາຣາ. ອສປຕ຺ຕີ ຫຸຕ຺ວາ ເອກິກາວ ຆເຣ ວເສຍ຺ຍນ຺ຕິ ເອວມສ຺ສາ ຈິຕ຺ຕໍ ອຠິນິວິສຕີຕິ ອສປຕ຺ຕີຠິນິເວສາ. ຆຣາວາສິສ຺ສຣິເຍ ລທ຺ເຘ ປຣິໂຍສານປ຺ປຕ຺ຕາ ນາມ ໂຫນ຺ຕີຕິ ອິສ຺ສຣິຍປຣິໂຍສານາ.

ປຣຠຓ຺ຑສ຺ສ ອາທາເນ ອຘິປ຺ປາໂຍ ເອເຕສນ຺ຕິ ອາທານາຘິປ຺ປາຍາ. ຄຫເນ ນິລີຍນຏ຺ຐາເນ ເອເຕສໍ ມໂນ ອຸປວິຈຣຕີຕິ ຄຫນູປວິຈາຣາ. ອນ຺ຘກາຣຕ຺ຖາຍ ເອເຕສໍ ຈິຕ຺ຕໍ ອຠິນິວິສຕີຕິ ອນ຺ຘກາຣາຠິນິເວສາ. ອທສ຺ສນປ຺ປຕ຺ຕາ ປຣິໂຍສານປ຺ປຕ຺ຕາ ໂຫນ຺ຕີຕິ ອທສ຺ສນປຣິໂຍສານາ.

ອຘິວາສນກ຺ຂນ຺ຕິຍຎ຺ຈ ສຸຈິຠາວສີເລ ຈ ອຘິປ຺ປາໂຍ ເອເຕສນ຺ຕິ ຂນ຺ຕິໂສຣຈ຺ຈາຘິປ຺ປາຍາ. ອກິຎ຺ຈນຠາເວ ນິຄ຺ຄຫຓຠາເວ ຈິຕ຺ຕໍ ເອເຕສໍ ອຠິນິວິສຕີຕິ ອາກິຎ຺ຈຎ຺ຎາຠິນິເວສາ. ນິພ຺ພານປ຺ປຕ຺ຕາ ປຣິໂຍສານປ຺ປຕ຺ຕາ ໂຫນ຺ຕີຕິ ນິພ຺ພານປຣິໂຍສານາ.

໑໑. ອປ຺ປມາທສຸຕ຺ຕວຓ຺ຓນາ

໕໓. ເອກາທສເມ ສມຘິຄ຺ຄຍ຺ຫາຕິ ສຸຏ຺ຐຸ ຄຓ຺ຫິຕ຺ວາ. ຊງ຺ຄລານໍ ປາຓານນ຺ຕິ ປຖວີຕລຈາຣີນໍ ສປາທກປາຓານໍ. ປທຊາຕານີຕິ ປທານິ. ສໂມຘານໍ ຄຈ຺ຉນ຺ຕີຕິ ໂອຘານໍ ອຸປນິກ຺ເຂປໍ ຄຈ຺ຉນ຺ຕິ. ອຄ຺ຄມກ຺ຂາຍຕີຕິ ເສຏ຺ຐໍ ອກ຺ຂາຍຕິ. ປພ຺ພຊລາຍໂກຕິ ປພ຺ພຊຕິຓຈ຺ເຉທໂກ. ໂອຘຸນາຕີຕິ ເຫຏ຺ຐາ ມຸຂໍ ຘຸນາຕິ. ນິຘຸນາຕີຕິ ອຸໂຠຫິ ປສ຺ເສຫິ ຘຸນາຕິ. ນິຈ຺ຉາເທຕີຕິ ພາຫາຍ ວາ ປຫຣຕິ, ຣຸກ຺ເຂ ວາ ປຫຣຕິ. ອມ຺ພປິຓ຺ຑິຍາຕິ ອມ຺ພຜລປິຓ຺ຑິຍາ. ວຓ຺ຏູປນິພນ຺ຘນານີຕິ ວຓ຺ເຏ ອຸປນິພນ຺ຘນານິ, ວຓ຺ເຏ ວາ ປຕິຏ຺ຐິຕານິ. ຕທນ຺ວຍານິ ຠວນ຺ຕີຕິ ວຓ຺ຏານຸວຕ຺ຕການິ ຠວນ຺ຕິ, ອມ຺ພປິຓ຺ຑິທຓ຺ຑການຸວຕ຺ຕການິ ຠວນ຺ຕີຕິປິ ອຕ຺ໂຖ. ຂຸທ຺ທຣາຊາໂນຕິ ຂຸທ຺ທກຣາຊາໂນ, ປກຕິຣາຊາໂນ ວາ.

໑໒. ຘມ຺ມິກສຸຕ຺ຕວຓ຺ຓນາ

໕໔. ທ຺ວາທສເມ ສພ຺ພໂສຕິ ສພ຺ເພສຸ. ສຕ຺ຕສຸ ວິຫາເຣສູຕິ ສຕ຺ຕສຸ ປຣິເວເຓສຸ. ປຣິຠາສຕີຕິ ປຣິຠວຕິ ຠຍໍ ອຸປທໍເສຕິ. ວິຫິໍສຕີຕິ ວິເຫເຐຕິ. ວິຕຸທຕີຕິ ວິຊ຺ຌຕິ. ໂຣເສຕິ ວາຈາຍາຕິ ວາຈາຍ ຆຏ຺ເຏຕິ. ປກ຺ກມນ຺ຕີຕິ ທິສາ ປກ຺ກມນ຺ຕິ. ນ ສຓ຺ຐຫນ຺ຕີຕິ ນປ຺ປຕິຏ຺ຐຫນ຺ຕິ. ຣິຎ຺ຈນ຺ຕີຕິ ຉຑ຺ເຑນ຺ຕິ ວິສ຺ສຊ຺ເຊນ຺ຕິ. ປພ຺ພາເຊຍ຺ຍາມາຕິ ນີຫເຣຍ຺ຍາມ. ຫນ຺ທາຕິ ວວສ຺ສຄ຺ຄຕ຺ເຖ ນິປາໂຕ. ອລນ຺ຕິ ຍຸຕ຺ຕເມຕໍ, ຍໍ ຕໍ ປພ຺ພາເຊຍ຺ຍຸນ຺ຕິ ອຕ຺ໂຖ. ກິໍ ເຕ ອິມິນາຕິ ກິໍ ຕວ ອິມິນາ ຊາຕິຠູມິຍໍ ວາເສນ. ຕີຣທສ຺ສິໍ ສກຸຓນ຺ຕິ ທິສາກາກໍ. ມຸຎ຺ຈນ຺ຕີຕິ ທິສາທສ຺ສນຕ຺ຖໍ ວິສ຺ສຊ຺ເຊນ຺ຕິ. ສາມນ຺ຕາຕິ ອວິທູເຣ. ສມນ຺ຕາຕິປິ ປາໂຐ, ສມນ຺ຕໂຕຕິ ອຕ຺ໂຖ. ອຠິນິເວໂສຕິ ປຕ຺ຖຣິຕ຺ວາ ຐິຕສາຂານໍ ນິເວໂສ. ມູລສນ຺ຕານການນ຺ຕິ ມູລານໍ ນິເວໂສ.

ອາຬ຺ຫກຖາລິກາຕິ ຕຓ຺ຑຸລາຬ຺ຫກສ຺ສ ຠຕ຺ຕປຈນຖາລິກາ. ຂຸທ຺ທໍ ມຘຸນ຺ຕິ ຂຸທ຺ທມກ຺ຂິກາຫິ ກຕໍ ທຓ຺ຑກມຘຸໍ. ອເນລກນ຺ຕິ ນິທ຺ໂທສໍ. ນ ຈ ສຸທໍ ອຎ຺ຎມຎ຺ຎສ຺ສ ຜລານິ ຫິໍສນ຺ຕີຕິ ອຎ຺ຎມຎ຺ຎສ຺ສ ໂກຏ຺ຐາເສ ຜລານິ ນ ຫິໍສນ຺ຕິ. ອຕ຺ຕໂນ ໂກຏ຺ຐາເສຫິ ມູລໍ ວາ ຕຈໍ ວາ ປຕ຺ຕໍ ວາ ຉິນ຺ທນ຺ໂຕ ນາມ ນຕ຺ຖິ, ອຕ຺ຕໂນ ອຕ຺ຕໂນ ສາຂາຍ ເຫຏ຺ຐາ ປຕິຕາເນວ ປຣິຠຸຎ຺ຊນ຺ຕິ. ອຎ຺ຎສ຺ສ ໂກຏ຺ຐາສໂຕ ອຎ຺ຎສ ໂກຏ຺ຐາສໍ ປຣິວຕ຺ຕິຕ຺ວາ ຄຕມ຺ປິ ‘‘ນ ອມ຺ຫາກໍ ສາຂາຍ ຜລ’’ນ຺ຕິ ຎຕ຺ວາ ໂນ ຂາທນ຺ຕິ. ຍາວທຕ຺ຖໍ ຠກ຺ຂິຕ຺ວາຕິ ກຓ຺ຐປ຺ປມາເຓນ ຂາທິຕ຺ວາ. ສາຂໍ ຠຎ຺ຊິຕ຺ວາຕິ ຉຕ຺ຕປ຺ປມາຓມຕ຺ຕໍ ຉິນ຺ທິຕ຺ວາ ຉາຍໍ ກຕ຺ວາ ປກ຺ກາມິ. ຍຕ຺ຣ ຫິ ນາມາຕິ ໂຍ ຫິ ນາມ. ປກ຺ກມິສ຺ສຕີຕິ ປກ຺ກນ຺ໂຕ. ນາທາສີຕິ ເທວຕາຍ ອານຸຠາເວນ ຜລເມວ ນ ຄຓ຺ຫິ. ເອວຎ຺ຫິ ສາ ອຘິຏ຺ຐາສິ.

ເຕນຸປສງ຺ກມີຕິ ຊນປທວາສີຫິ ຄນ຺ຕ຺ວາ, ‘‘ມຫາຣາຊ, ຣຸກ຺ໂຂ ຜລໍ ນ ຄຓ຺ຫິ, ອມ຺ຫາກໍ ນຸ ໂຂ ໂທໂສ ຕຸມ຺ຫາກ’’ນ຺ຕິ ວຸຕ຺ເຕ ‘‘ເນວ ມຍ຺ຫໍ ໂທໂສ ອຕ຺ຖິ, ນ ຊານປທານໍ, ອມ຺ຫາກໍ ວິຊິເຕ ອຘມ຺ໂມ ນາມ ນ ວຕ຺ຕຕິ, ເກນ ນຸ ໂຂ ກາຣເຓນ ຣຸກ຺ໂຂ ນ ຜລິໂຕ, ສກ຺ກໍ ອຸປສງ຺ກມິຕ຺ວາ ປຸຈ຺ຉິສ຺ສາມີ’’ຕິ ຈິນ຺ເຕຕ຺ວາ ເຍນ ສກ຺ໂກ ເທວານມິນ຺ໂທ ເຕນຸປສງ຺ກມິ. ປວຕ຺ເຕສີຕິ ປຣິວຕ຺ເຕສິ. ອຸມ຺ມູລມກາສີຕິ ອຸທ຺ຘໍມູລໍ ອກາສິ. ອປິ ນຸ ຕ຺ວນ຺ຕິ ອປິ ນຸ ຕວ. ອຏ຺ຐິຕາເຍວາຕິ ອຏ຺ຐິຕາຍ ເອວ. ສຈ຺ຉວີນີຕິ ສມານຈ຺ຉວີນິ ປກຕິຏ຺ຐາເນ ຐິຕານິ. ນ ປຈ຺ຈກ຺ໂກສຕີຕິ ນປ຺ປຏິກ຺ໂກສຕິ. ໂຣສນ຺ຕນ຺ຕິ ຆຏ຺ເຏນ຺ຕໍ. ຠຓ຺ຑນ຺ຕນ຺ຕິ ປຫຣນ຺ຕໍ.

ສຸເນຕ຺ໂຕຕິ ເນຕ຺ຕາ ວຸຈ຺ຈນ຺ຕິ ອກ຺ຂີນິ, ເຕສໍ ສຸນ຺ທຣຕາຍ ສຸເນຕ຺ໂຕ. ຕິຕ຺ຖກໂຣຕິ ສຸຄຕິໂອຄາຫນຕິຕ຺ຖສ຺ສ ກາຣໂກ. ວີຕຣາໂຄຕິ ວິກ຺ຂມ຺ຠນວເສນ ວິຄຕຣາໂຄ. ປສວຕີຕິ ປຏິລຠຕິ. ທິຏ຺ຐິສມ຺ປນ຺ນນ຺ຕິ ທສ຺ສນສມ຺ປນ຺ນໍ, ໂສຕາປນ຺ນນ຺ຕິ ອຕ຺ໂຖ. ຂນ຺ຕິນ຺ຕິ ອຕ຺ຕໂນ ຄຸຓຂຓນໍ. ຍຖາມໍ ສພ຺ຣຫ຺ມຈາຣີສູຕິ ຍຖາ ອິມໍ ສພ຺ຣຫ຺ມຈາຣີສຸ ອກ຺ໂກສນປຣິຠາສນໍ, ອຎ຺ຎໍ ເອວຣູປໍ ຄຸຓຂນ຺ຕິໍ ນ ວທາມີຕິ ອຕ຺ໂຖ. ນ ໂນ ສມສພ຺ຣຫ຺ມຈາຣີສູຕິ ເອຕ຺ຖ ສມຊໂນ ນາມ ສກຊໂນ ວຸຈ຺ຈຕິ. ຕສ຺ມາ ນ ໂນ ສເກສຸ ສມານພ຺ຣຫ຺ມຈາຣີສຸ ຈິຕ຺ຕານິ ປທຸຏ຺ຐານິ ຠວິສ຺ສນ຺ຕີຕິ ອຍເມຕ຺ຖ ອຕ຺ໂຖ.

ໂຊຕິປາໂລ ຈ ໂຄວິນ຺ໂທຕິ ນາເມນ ໂຊຕິປາໂລ ຐາເນນ ມຫາໂຄວິນ຺ໂທ. ສຕ຺ຕປຸໂຣຫິໂຕຕິ ເຣຓຸອາທີນໍ ສຕ຺ຕນ຺ນໍ ຣາຊູນໍ ປຸໂຣຫິໂຕ. ອຫິໍສກາ ອຕີຕໍເສຕິ ເອເຕ ຉ ສຕ຺ຖາໂຣ ອຕີຕໍເສ ອຫິໍສກາ ອເຫສຸໍ. ນິຣາມຄນ຺ຘາຕິ ໂກຘາມຄນ຺ເຘນ ນິຣາມຄນ຺ຘາ. ກຣຸເຓວິມຸຕ຺ຕາຕິ ກຣຸຓຊ຺ຌາເນ ອຘິມຸຕ຺ຕາ, ກຣຸຓາຍ ຈ ກຣຸຓາປຸພ຺ພຠາເຄ ຈ ຐິຕາ. ເຍເຕຕິ ເອເຕ, ອຍເມວ ວາ ປາໂຐ. ນ ສາຘຸຣູປໍ ອາສີເທຕິ ສາຘຸສຠາວໍ ນ ຆຏ຺ເຏຍ຺ຍ. ທິຏ຺ຐິຏ຺ຐານປ຺ປຫາຍິນນ຺ຕິ ທ຺ວາສຏ຺ຐິທິຏ຺ຐິຄຕປ຺ປຫາຍິນໍ. ສຕ຺ຕໂມຕິ ອຣຫຕ຺ຕໂຕ ປຏ຺ຐາຍ ສຕ຺ຕໂມ. ອວີຕຣາໂຄຕິ ອວິຄຕຣາໂຄ. ເອເຕນ ອນາຄາມິຠາວໍ ປຏິກ຺ຂິປຕິ. ປຎ຺ຈິນ຺ທ຺ຣິຍາ ມຸທູຕິ ປຎ຺ຈ ວິປສ຺ສນິນ຺ທ຺ຣິຍານິ ມຸທູນິ. ຕສ຺ສ ຫິ ຕານິ ສກທາຄາມິໍ ອຸປາທາຍ ມຸທູນິ ນາມ ໂຫນ຺ຕິ. ວິປສ຺ສນາຕິ ສງ຺ຂາຣປຣິຄ຺ຄຫຎາຓໍ. ປຸພ຺ເພວ ອຸປຫຎ຺ຎຕີຕິ ປຐມຕຣຎ຺ເຎວ ອຸປຫຎ຺ຎຕິ. ອກ຺ຂໂຕຕິ ຄຸຓຂຓເນນ ອກ຺ຂໂຕ ອນຸປຫໂຕ ຫຸຕ຺ວາ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ຘມ຺ມິກວຄ຺ໂຄ ປຎ຺ຈໂມ.