.ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ.

ອງ຺ຄຸຕ຺ຕຣນິກາເຍ

ຉກ຺ກນິປາຕ-ອຏ຺ຐກຖາ

໑. ປຐມປຓ຺ຓາສກໍ

໑. ອາຫຸເນຍ຺ຍວຄ຺ໂຄ

໑. ປຐມອາຫຸເນຍ຺ຍສຸຕ຺ຕວຓ຺ຓນາ

໑. ຉກ຺ກນິປາຕສ຺ສ ປຐເມ ອິຘ, ຠິກ຺ຂເວ, ຠິກ຺ຂູຕິ, ຠິກ຺ຂເວ, ອິມສ຺ມິໍ ສາສເນ ຠິກ຺ຂຸ. ເນວ ສຸມໂນ ໂຫຕິ ນ ທຸມ຺ມໂນຕິ ອິຏ຺ຐາຣມ຺ມເຓ ຣາຄສຫຄເຕນ ໂສມນສ຺ເສນ ສຸມໂນ ວາ ອນິຏ຺ຐາຣມ຺ມເຓ ໂທສສຫຄເຕນ ໂທມນສ຺ເສນ ທຸມ຺ມໂນ ວາ ນ ໂຫຕິ. ອຸເປກ຺ຂໂກ ວິຫຣຕິ ສໂຕ ສມ຺ປຊາໂນຕິ ມຊ຺ຌຕ຺ຕາຣມ຺ມເຓ ອສມເປກ຺ຂເນນ ອຎ຺ຎາຓຸເປກ຺ຂາຍ ອຸເປກ຺ຂກຠາວໍ ອນາປຊ຺ຊິຕ຺ວາ ສໂຕ ສມ຺ປຊາໂນ ຫຸຕ຺ວາ ອາຣມ຺ມເຓ ມຊ຺ຌຕ຺ໂຕ ວິຫຣຕິ. ອິມສ຺ມິໍ ສຸຕ຺ເຕ ຂີຓາສວສ຺ສ ສຕຕວິຫາໂຣ ກຖິໂຕ.

໒. ທຸຕິຍອາຫຸເນຍ຺ຍສຸຕ຺ຕວຓ຺ຓນາ

໒-໔. ທຸຕິເຍ ອເນກວິຫິຕໍ ອິທ຺ຘິວິຘນ຺ຕິອາທີນິ ວິສຸທ຺ຘິມຄ຺ເຄ ວຸຕ຺ຕາເນວ. ອາສວານໍ ຂຍາ ອນາສວນ຺ຕິ ອາສວານໍ ຂເຍນ ອນາສວໍ, ນ ຈກ຺ຂຸວິຎ຺ຎາຓາທີນໍ ວິຍ ອຠາເວນາຕິ. ອິມສ຺ມິໍ ສຸຕ຺ເຕ ຂີຓາສວສ຺ສ ອຠິຎ຺ຎາ ປຏິປາຏິຍາ ກຖິຕາ. ຕຕິຍຈຕຸຕ຺ເຖສຸ ຂີຓາສໂວ ກຖິໂຕ.

໕-໗. ອາຊານີຍສຸຕ຺ຕຕ຺ຕຍວຓ຺ຓນາ

໕-໗. ປຎ຺ຈເມ ອງ຺ເຄຫີຕິ ຄຸຓງ຺ເຄຫິ. ຂໂມຕິ ອຘິວາສໂກ. ຣູປານນ຺ຕິ ຣູປາຣມ຺ມຓານໍ. ວຓ຺ຓສມ຺ປນ຺ໂນຕິ ສຣີຣວຓ຺ເຓນ ສມ຺ປນ຺ໂນ. ຉຏ຺ເຐ ພລສມ຺ປນ຺ໂນຕິ ກາຍພເລນ ສມ຺ປນ຺ໂນ. ສຕ຺ຕເມ ຊວສມ຺ປນ຺ໂນຕິ ປທຊເວນ ສມ຺ປນ຺ໂນ.

໘-໙. ອນຸຕ຺ຕຣິຍສຸຕ຺ຕາທິວຓ຺ຓນາ

໘-໙. ອຏ຺ຐເມ ອນຸຕ຺ຕຣິຍານີຕິ ອຎ຺ເຎນ ອຸຕ຺ຕຣິຕເຣນ ຣຫິຕານິ ນິຣຸຕ຺ຕຣານິ. ທສ຺ສນານຸຕ຺ຕຣິຍນ຺ຕິ ຣູປທສ຺ສເນສຸ ອນຸຕ຺ຕຣໍ. ເອສ ນໂຍ ສພ຺ພປເທສຸ. ຫຕ຺ຖິຣຕນາທີນຎ຺ຫິ ທສ຺ສນໍ ນ ທສ຺ສນານຸຕ຺ຕຣິຍໍ, ນິວິຏ຺ຐສທ຺ຘສ຺ສ ປນ ນິວິຏ຺ຐເປມວເສນ ທສພລສ຺ສ ວາ ຠິກ຺ຂຸສງ຺ຆສ຺ສ ວາ ກສິຓອສຸຠນິມິຕ຺ຕາທີນໍ ວາ ອຎ຺ຎຕຣສ຺ສ ທສ຺ສນໍ ທສ຺ສນານຸຕ຺ຕຣິຍໍ ນາມ. ຂຕ຺ຕິຍາທີນໍ ຄຸຓກຖາສວນໍ ນ ສວນານຸຕ຺ຕຣິຍໍ, ນິວິຏ຺ຐສທ຺ຘສ຺ສ ປນ ນິວິຏ຺ຐເປມວເສນ ຕິຓ຺ຓໍ ວາ ຣຕນານໍ ຄຸຓກຖາສວນໍ ເຕປິຏກພຸທ຺ຘວຈນສວນໍ ວາ ສວນານຸຕ຺ຕຣິຍໍ ນາມ. ມຓິຣຕນາທີນໍ ລາໂຠ ນ ລາຠານຸຕ຺ຕຣິຍໍ, ສຕ຺ຕວິຘອຣິຍຘນລາໂຠ ປນ ລາຠານຸຕ຺ຕຣິຍໍ ນາມ. ຫຕ຺ຖິສິປ຺ປາທິສິກ຺ຂນໍ ນ ສິກ຺ຂານຸຕ຺ຕຣິຍໍ, ສິກ຺ຂາຕ຺ຕຍສ຺ສ ປູຣຓໍ ປນ ສິກ຺ຂານຸຕ຺ຕຣິຍໍ ນາມ. ຂຕ຺ຕິຍາທີນໍ ປາຣິຈຣິຍາ ນ ປາຣິຈຣິຍານຸຕ຺ຕຣິຍໍ, ຕິຓ຺ຓໍ ປນ ຣຕນານໍ ປາຣິຈຣິຍາ ປາຣິຈຣິຍານຸຕ຺ຕຣິຍໍ ນາມ. ຂຕ຺ຕິຍາທີນໍ ຄຸຓານຸສ຺ສຣຓໍ ນ ອນຸສ຺ສຕານຸຕ຺ຕຣິຍໍ, ຕິຓ຺ຓໍ ປນ ຣຕນານໍ ຄຸຓານຸສ຺ສຣຓໍ ອນຸສ຺ສຕານຸຕ຺ຕຣິຍໍ ນາມ. ອິຕິ ອິມານິ ຉ ອນຸຕ຺ຕຣິຍານິ ໂລກິຍໂລກຸຕ຺ຕຣານິ ກຖິຕານິ. ນວເມ ພຸທ຺ຘານຸສ຺ສຕີຕິ ພຸທ຺ຘຄຸຓາຣມ຺ມຓາ ສຕິ. ເສສປເທສຸປິ ເອເສວ ນໂຍ.

໑໐. ມຫານາມສຸຕ຺ຕວຓ຺ຓນາ

໑໐. ທສເມ ມຫານາໂມຕິ ທສພລສ຺ສ ຈູຬປິຕຸ ປຸຕ຺ໂຕ ເອໂກ ສກ຺ຍຣາຊາ. ເຍນ ຠຄວາ ເຕນຸປສງ຺ກມີຕິ ຠຸຕ຺ຕປາຕຣາໂສ ຫຸຕ຺ວາ ທາສປຣິຊນປຣິວຸໂຕ ຄນ຺ຘມາລາທີນິ ຄາຫາເປຕ຺ວາ ຍຕ຺ຖ ສຕ຺ຖາ, ຕຕ຺ຖ ອຄມາສິ. ອຣິຍຜລໍ ອສ຺ສ ອາຄຕນ຺ຕິ ອາຄຕຜໂລ. ສິກ຺ຂາຕ຺ຕຍສາສນໍ ເອເຕນ ວິຎ຺ຎາຕນ຺ຕິ ວິຎ຺ຎາຕສາສໂນ. ອິຕິ ອຍໍ ຣາຊາ ‘‘ໂສຕາປນ຺ນສ຺ສ ນິສ຺ສຍວິຫາຣໍ ປຸຈ຺ຉາມີ’’ຕິ ປຸຈ຺ຉນ຺ໂຕ ເອວມາຫ.

ເນວສ຺ສ ຣາຄປຣິຍຸຏ຺ຐິຕນ຺ຕິ ນ ອຸປ຺ປຊ຺ຊມາເນນ ຣາເຄນ ອຸຏ຺ຐຫິຕ຺ວາ ຄຫິຕໍ. ອຸຊຸຄຕນ຺ຕິ ພຸທ຺ຘານຸສ຺ສຕິກມ຺ມຏ຺ຐາເນ ອຸຊຸກເມວ ຄຕໍ. ຕຖາຄຕໍ ອາຣພ຺ຠາຕິ ຕຖາຄຕຄຸເຓ ອາຣພ຺ຠ. ອຕ຺ຖເວທນ຺ຕິ ອຏ຺ຐກຖໍ ນິສ຺ສາຍ ອຸປ຺ປນ຺ນໍ ປີຕິປາໂມຊ຺ຊໍ. ຘມ຺ມເວທນ຺ຕິ ປາຬິໍ ນິສ຺ສາຍ ອຸປ຺ປນ຺ນໍ ປີຕິປາໂມຊ຺ຊໍ. ຘມ຺ມູປສຎ຺ຫິຕນ຺ຕິ ປາຬິຎ຺ຈ ອຏ຺ຐກຖຎ຺ຈ ນິສ຺ສາຍ ອຸປ຺ປນ຺ນໍ. ປມຸທິຕສ຺ສາຕິ ທຸວິເຘນ ປາໂມຊ຺ເຊນ ປມຸທິຕສ຺ສ. ປີຕິ ຊາຍຕີຕິ ປຎ຺ຈວິຘາ ປີຕິ ນິພ຺ພຕ຺ຕຕິ. ກາໂຍ ປສ຺ສມ຺ຠຕີຕິ ນາມກາໂຍ ຈ ກຣຊກາໂຍ ຈ ທຣຖປຏິປ຺ປສ຺ສທ຺ຘິຍາ ປຏິປ຺ປສ຺ສມ຺ຠຕິ. ສຸຂນ຺ຕິ ກາຍິກເຈຕສິກສຸຂໍ. ສມາຘິຍຕີຕິ ອາຣມ຺ມເຓ ສມ຺ມາ ຐປິຕໍ ໂຫຕິ. ວິສມຄຕາຍ ປຊາຍາຕິ ຣາຄໂທສໂມຫວິສມຄເຕສຸ ສຕ຺ເຕສຸ. ສມປ຺ປຕ຺ໂຕຕິ ສມໍ ອຸປສມໍ ປຕ຺ໂຕ ຫຸຕ຺ວາ. ສພ຺ຍາປຊ຺ຌາຍາຕິ ສທຸກ຺ຂາຍ. ຘມ຺ມໂສຕໍ ສມາປນ຺ໂນຕິ ວິປສ຺ສນາສງ຺ຂາຕໍ ຘມ຺ມໂສຕໍ ສມາປນ຺ໂນ. ພຸທ຺ຘານຸສ຺ສຕິໍ ຠາເວຕີຕິ ພຸທ຺ຘານຸສ຺ສຕິກມ຺ມຏ຺ຐານໍ ພ຺ຣູເຫຕິ ວຑ຺ເຒຕິ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ອິຕິ ມຫານາໂມ ໂສຕາປນ຺ນສ຺ສ ນິສ຺ສຍວິຫາຣໍ ປຸຈ຺ຉິ. ສຕ຺ຖາປິສ຺ສ ຕເມວ ກເຖສິ. ເອວໍ ອິມສ຺ມິໍ ສຸຕ຺ເຕ ໂສຕາປນ຺ໂນວ ກຖິໂຕຕິ.

ອາຫຸເນຍ຺ຍວຄ຺ໂຄ ປຐໂມ.

໒. ສາຣຓີຍວຄ຺ໂຄ

໑. ປຐມສາຣຓີຍສຸຕ຺ຕວຓ຺ຓນາ

໑໑. ທຸຕິຍສ຺ສ ປຐເມ ສາຣຓີຍາຕິ ສຣິຕພ຺ພຍຸຕ຺ຕກາ. ເມຕ຺ຕໍ ກາຍກມ຺ມນ຺ຕິ ເມຕ຺ເຕນ ຈິຕ຺ເຕນ ກາຕພ຺ພໍ ກາຍກມ຺ມໍ. ວຈີກມ຺ມມໂນກມ຺ເມສຸປິ ເອເສວ ນໂຍ. ອິມານິ ຈ ປນ ຠິກ຺ຂູນໍ ວເສນ ອາຄຕານິ, ຄິຫີສຸປິ ລພ຺ຠນ຺ຕິ. ຠິກ຺ຂູນຎ຺ຫິ ເມຕ຺ເຕນ ຈິຕ຺ເຕນ ອາຠິສມາຈາຣິກຘມ຺ມປູຣຓໍ ເມຕ຺ຕໍ ກາຍກມ຺ມໍ ນາມ. ຄິຫີນໍ ເຈຕິຍວນ຺ທນຕ຺ຖາຍ ໂພຘິວນ຺ທນຕ຺ຖາຍ ສງ຺ຆນິມນ຺ຕນຕ຺ຖາຍ ຄມນໍ, ຄາມໍ ປິຓ຺ຑາຍ ປວິຏ຺ເຐ ຠິກ຺ຂູ ທິສ຺ວາ ປຈ຺ຈຸຄ຺ຄມນໍ, ປຕ຺ຕປຏິຄ຺ຄຫຓໍ, ອາສນປຎ຺ຎາປນໍ, ອນຸຄມນນ຺ຕິ ເອວມາທິກໍ ເມຕ຺ຕໍ ກາຍກມ຺ມໍ ນາມ.

ຠິກ຺ຂູນໍ ເມຕ຺ເຕນ ຈິຕ຺ເຕນ ອາຈາຣປຓ຺ຓຕ຺ຕິສິກ຺ຂາປນໍ, ກມ຺ມຏ຺ຐານກຖນໍ, ຘມ຺ມເທສນາ, ເຕປິຏກມ຺ປິ ພຸທ຺ຘວຈນໍ ເມຕ຺ຕໍ ວຈີກມ຺ມໍ ນາມ. ຄິຫີນໍ ‘‘ເຈຕິຍວນ຺ທນາຍ ຄຈ຺ຉາມ, ໂພຘິວນ຺ທນາຍ ຄຈ຺ຉາມ, ຘມ຺ມສ຺ສວນໍ ກຣິສ຺ສາມ, ທີປມາລາປຸປ຺ຜປູຊໍ ກຣິສ຺ສາມ, ຕີຓິ ສຸຈຣິຕານິ ສມາທາຍ ວຕ຺ຕິສ຺ສາມ, ສລາກຠຕ຺ຕາທີນິ ທສ຺ສາມ, ວສ຺ສາວາສິກໍ ທສ຺ສາມ, ອຊ຺ຊ ສງ຺ຆສ຺ສ ຈຕ຺ຕາໂຣ ປຈ຺ຈເຍ ທສ຺ສາມ, ສງ຺ຆໍ ນິມນ຺ເຕຕ຺ວາ ຂາທນີຍາທີນິ ສໍວິທຫຖ, ອາສນານິ ປຎ຺ຎາເປຖ, ປານີຍໍ ອຸປຏ຺ຐາເປຖ, ສງ຺ຆໍ ປຈ຺ຈຸຄ຺ຄນ຺ຕ຺ວາ ອາເນຖ, ປຎ຺ຎຕ຺ຕາສເນ ນິສີທາເປຕ຺ວາ ອຸສ຺ສາຫຊາຕາ ເວຍ຺ຍາວຈ຺ຈໍ ກໂຣຖາ’’ຕິອາທິວຈນກາເລ ເມຕ຺ຕໍ ວຈີກມ຺ມໍ ນາມ.

ຠິກ຺ຂູນໍ ປາໂຕວ ອຸຏ຺ຐາຍ ສຣີຣປຏິຊຄ຺ຄນໍ ເຈຕິຍງ຺ຄຓວຕ຺ຕາທີນິ ຈ ກຕ຺ວາ ວິວິຕ຺ຕາສເນ ນິສີທິຕ຺ວາ ‘‘ອິມສ຺ມິໍ ວິຫາເຣ ຠິກ຺ຂູ ສຸຂີ ໂຫນ຺ຕຸ ອເວຣາ ອພ຺ຍາປຊ຺ຌາ’’ຕິ ຈິນ຺ຕນໍ ເມຕ຺ຕໍ ມໂນກມ຺ມໍ ນາມ. ຄິຫີນໍ ‘‘ອຍ຺ຍາ ສຸຂີ ໂຫນ຺ຕຸ ອເວຣາ ອພ຺ຍາປຊ຺ຌາ’’ຕິ ຈິນ຺ຕນໍ ເມຕ຺ຕໍ ມໂນກມ຺ມໍ ນາມ.

ອາວິ ເຈວ ຣໂຫ ຈາຕິ ສມ຺ມຸຂາ ຈ ປຣມ຺ມຸຂາ ຈ. ຕຕ຺ຖ ນວການໍ ຈີວຣກມ຺ມາທີສຸ ສຫາຍຠາວຄມນໍ ສມ຺ມຸຂາ ເມຕ຺ຕໍ ກາຍກມ຺ມໍ ນາມ, ເຖຣານໍ ປນ ປາທໂຘວນທານາທິເຠທໍ ສພ຺ພມ຺ປິ ສາມີຈິກມ຺ມໍ ສມ຺ມຸຂາ ເມຕ຺ຕໍ ກາຍກມ຺ມໍ ນາມ. ອຸຠເຍຫິປິ ທຸນ຺ນິກ຺ຂິຕ຺ຕານໍ ທາຣຸຠຓ຺ຑາທີນໍ ເຕສຸ ອວຎ຺ຎໍ ອກຕ຺ວາ ອຕ຺ຕນາ ທຸນ຺ນິກ຺ຂິຕ຺ຕານໍ ວິຍ ປຏິສາມນໍ ປຣມ຺ມຸຂາ ເມຕ຺ຕໍ ກາຍກມ຺ມໍ ນາມ. ‘‘ເທວຕ຺ເຖໂຣ ຕິສ຺ສຕ຺ເຖໂຣ’’ຕິ ເອວໍ ປຄ຺ຄຍ຺ຫ ວຈນໍ ສມ຺ມຸຂາ ເມຕ຺ຕໍ ວຈີກມ຺ມໍ ນາມ. ວິຫາເຣ ອສນ຺ຕໍ ປນ ປຏິປຸຈ຺ຉນ຺ຕສ຺ສ ‘‘ກຫໍ ອມ຺ຫາກໍ ເທວຕ຺ເຖໂຣ, ກຫໍ ອມ຺ຫາກໍ ຕິສ຺ສຕ຺ເຖໂຣ, ກທາ ນຸ ໂຂ ອາຄມິສ຺ສຕີ’’ຕິ ເອວໍ ມມາຍນວຈນໍ ປຣມ຺ມຸຂາ ເມຕ຺ຕໍ ວຈີກມ຺ມໍ ນາມ. ເມຕ຺ຕາສິເນຫສິນິທ຺ຘານິ ປນ ນຍນານິ ອຸມ຺ມີເລຕ຺ວາ ປສນ຺ເນນ ມຸເຂນ ໂອໂລກນໍ ສມ຺ມຸຂາ ເມຕ຺ຕໍ ມໂນກມ຺ມໍ ນາມ. ‘‘ເທວຕ຺ເຖໂຣ ຕິສ຺ສຕ຺ເຖໂຣ ອໂຣໂຄ ໂຫຕຸ ອປ຺ປາພາໂຘ’’ຕິ ສມນ຺ນາຫຣຓໍ ປຣມ຺ມຸຂາ ເມຕ຺ຕໍ ມໂນກມ຺ມໍ ນາມ.

ລາຠາຕິ ຈີວຣາທໂຍ ລທ຺ຘປຈ຺ຈຍາ. ຘມ຺ມິກາຕິ ກຸຫນາທິເຠທໍ ມິຈ຺ຉາຊີວໍ ວຊ຺ເຊຕ຺ວາ ຘມ຺ເມນ ສເມນ ຠິກ຺ຂາຈຣິຍວຕ຺ເຕນ ອຸປ຺ປນ຺ນາ. ອນ຺ຕມໂສ ປຕ຺ຕປຣິຍາປນ຺ນມຕ຺ຕມ຺ປີຕິ ປຈ຺ຉິມໂກຏິຍາ ປຕ຺ຕປຣິຍາປນ຺ນໍ ປຕ຺ຕສ຺ສ ອນ຺ໂຕຄຕໍ ທ຺ວຕ຺ຕິກຏຈ຺ຉຸຠິກ຺ຂາມຕ຺ຕມ຺ປິ. ອປ຺ປຏິວິຠຕ຺ຕໂຠຄີຕິ ເອຕ຺ຖ ທ຺ເວ ປຏິວິຠຕ຺ຕານິ ນາມ ອາມິສປຏິວິຠຕ຺ຕໍ ປນ ປຸຄ຺ຄລປຏິວິຠຕ຺ຕຎ຺ຈ. ຕຕ຺ຖ ‘‘ເອຕ຺ຕກໍ ທສ຺ສາມິ, ເອຕ຺ຕກໍ ນ ທສ຺ສາມີ’’ຕິ ເອວໍ ຈິຕ຺ເຕນ ປຏິວິຠຊນໍ ອາມິສປຏິວິຠຕ຺ຕໍ ນາມ. ‘‘ອສຸກສ຺ສ ທສ຺ສາມິ, ອສຸກສ຺ສ ນ ທສ຺ສາມີ’’ຕິ ເອວໍ ຈິຕ຺ເຕນ ວິຠຊນໍ ປນ ປຸຄ຺ຄລປຏິວິຠຕ຺ຕໍ ນາມ. ຕທຸຠຍມ຺ປິ ອກຕ຺ວາ ໂຍ ອປ຺ປຏິວິຠຕ຺ຕໍ ຠຸຎ຺ຊຕິ, ອຍໍ ອປ຺ປຏິວິຠຕ຺ຕໂຠຄີ ນາມ. ສີລວນ຺ເຕຫິ ສພ຺ຣຫ຺ມຈາຣີຫິ ສາຘາຣຓໂຠຄີຕິ ເອຕ຺ຖ ສາຘາຣຓໂຠຄິໂນ ອິທໍ ລກ຺ຂຓໍ – ຍໍ ຍໍ ປຓີຕໍ ລຠຕິ, ຕໍ ຕໍ ເນວ ລາເຠນລາຠໍ-ນິຊິຄີສນຕາມຸເຂນ ຄິຫີນໍ ເທຕິ, ນ ອຕ຺ຕນາ ປຣິຠຸຎ຺ຊຕິ, ປຏິຄ຺ຄຓ຺ຫນ຺ໂຕ ຈ ‘‘ສງ຺ເຆນ ສາຘາຣຓໍ ໂຫຕູ’’ຕິ ຄເຫຕ຺ວາ ຆຓ຺ຏິໍ ປຫຣິຕ຺ວາ ປຣິຠຸຎ຺ຊິຕພ຺ພໍ ສງ຺ຆສນ຺ຕກໍ ວິຍ ປສ຺ສຕິ.

ອິມໍ ປນ ສາຣຓີຍຘມ຺ມໍ ໂກ ປູເຣຕິ, ໂກ ນ ປູເຣຕິ? ທຸສ຺ສີໂລ ຕາວ ນ ປູເຣຕິ. ນ ຫິ ຕສ຺ສ ສນ຺ຕກໍ ສີລວນ຺ຕາ ຄຓ຺ຫນ຺ຕິ. ປຣິສຸທ຺ຘສີໂລ ປນ ວຕ຺ຕໍ ອຂຓ຺ເຑນ຺ໂຕ ປູເຣຕິ. ຕຕ຺ຣິທໍ ວຕ຺ຕໍ – ໂຍ ຫິ ໂອທິສ຺ສກໍ ກຕ຺ວາ ມາຕຸ ວາ ປິຕຸ ວາ ອາຈຣິຍຸປຊ຺ຌາຍາທີນໍ ວາ ເທຕິ, ໂສ ທາຕພ຺ພໍ ເທຕິ. ສາຣຓີຍຘມ຺ໂມ ປນສ຺ສ ນ ໂຫຕິ, ປລິໂພຘຊຄ຺ຄນໍ ນາມ ໂຫຕິ. ສາຣຓີຍຘມ຺ໂມ ຫິ ມຸຕ຺ຕປລິໂພຘສ຺ສ ວຏ຺ຏຕິ. ເຕນ ປນ ໂອທິສ຺ສກໍ ເທນ຺ເຕນ ຄິລານຄິລານຸປຏ຺ຐາກອາຄນ຺ຕຸກຄມິການຎ຺ເຈວ ນວປພ຺ພຊິຕສ຺ສ ຈ ສງ຺ຆາຏິປຕ຺ຕຄ຺ຄຫຓໍ ອຊານນ຺ຕສ຺ສ ທາຕພ຺ພໍ. ເອເຕສໍ ທຕ຺ວາ ອວເສສໍ ເຖຣາສນໂຕ ປຏ຺ຐາຍ ໂຖກໍ ໂຖກໍ ອທຕ຺ວາ ໂຍ ຍຕ຺ຕກໍ ຄຓ຺ຫາຕິ, ຕສ຺ສ ຕຕ຺ຕກໍ ທາຕພ຺ພໍ. ອວສິຏ຺ເຐ ອສຕິ ປຸນ ປິຓ຺ຑາຍ ຈຣິຕ຺ວາ ເຖຣາສນໂຕ ປຏ຺ຐາຍ ຍໍ ຍໍ ປຓີຕໍ, ຕໍ ຕໍ ທຕ຺ວາ ເສສໍ ຠຸຎ຺ຊິຕພ຺ພໍ. ‘‘ສີລວນ຺ເຕຫີ’’ຕິ ວຈນໂຕ ທຸສ຺ສີລສ຺ສ ອທາຕຸມ຺ປິ ວຏ຺ຏຕິ.

ອຍໍ ປນ ສາຣຓີຍຘມ຺ໂມ ສຸສິກ຺ຂິຕາຍ ປຣິສາຍ ສຸປູໂຣ ໂຫຕິ, ສຸສິກ຺ຂິຕາຍ ຫິ ປຣິສາຍ ໂຍ ອຎ຺ຎໂຕ ລຠຕິ, ໂສ ນ ຄຓ຺ຫາຕິ. ອຎ຺ຎໂຕ ອລຠນ຺ໂຕປິ ປມາຓຍຸຕ຺ຕເມວ ຄຓ຺ຫຕິ, ນ ອຕິເຣກໍ. ອຍໍ ປນ ສາຣຓີຍຘມ຺ໂມ ເອວໍ ປຸນປ຺ປຸນໍ ປິຓ຺ຑາຍ ຈຣິຕ຺ວາ ລທ຺ຘໍ ລທ຺ຘໍ ເທນ຺ຕສ຺ສາປິ ທ຺ວາທສຫິ ວສ຺ເສຫິ ປູເຣຕິ, ນ ຕໂຕ ໂອຣໍ. ສເຈ ຫິ ທ຺ວາທສເມ ວສ຺ເສ ສາຣຓີຍຘມ຺ມປູຣໂກ ປິຓ຺ຑປາຕປູຣໍ ປຕ຺ຕໍ ອາສນສາລາຍໍ ຐເປຕ຺ວາ ນ຺ຫາຍິຕຸໍ ຄຈ຺ຉຕິ, ສງ຺ຆຕ຺ເຖໂຣ ຈ ‘‘ກສ຺ເສໂສ ປຕ຺ໂຕ’’ຕິ ວຕ຺ວາ ‘‘ສາຣຓີຍຘມ຺ມປູຣກສ຺ສາ’’ຕິ ວຸຕ຺ເຕ ‘‘ອາຫຣຖ ນ’’ນ຺ຕິ ສພ຺ພໍ ປິຓ຺ຑປາຕໍ ວິຈາເຣຕ຺ວາວ ຠຸຎ຺ຊິຕ຺ວາ ຣິຕ຺ຕປຕ຺ຕໍ ຐເປຕິ. ອຖ ໂຂ ໂສ ຠິກ຺ຂຸ ຣິຕ຺ຕປຕ຺ຕໍ ທິສ຺ວາ ‘‘ມຍ຺ຫໍ ອເສເສຕ຺ວາວ ປຣິຠຸຎ຺ຊິໍສູ’’ຕິ ໂທມນສ຺ສໍ ອຸປ຺ປາເທຕິ, ສາຣຓີຍຘມ຺ໂມ ຠິຊ຺ຊຕິ, ປຸນ ທ຺ວາທສ ວສ຺ສານິ ປູເຣຕພ຺ໂພ ໂຫຕິ. ຕິຕ຺ຖິຍປຣິວາສສທິໂສ ເຫສ, ສກິໍ ຂຓ຺ເຑ ຊາເຕ ປຸນ ປູເຣຕພ຺ໂພວ. ໂຍ ປນ ‘‘ລາຠາ ວຕ ເມ, ສຸລທ຺ຘໍ ວຕ ເມ, ຍສ຺ສ ເມ ປຕ຺ຕຄຕໍ ອນາປຸຈ຺ຉາວ ສພ຺ຣຫ຺ມຈາຣີ ປຣິຠຸຎ຺ຊນ຺ຕີ’’ຕິ ໂສມນສ຺ສໍ ຊເນຕິ, ຕສ຺ສ ປຸຓ຺ໂຓ ນາມ ໂຫຕິ.

ເອວໍ ປູຣິຕສາຣຓີຍຘມ຺ມສ຺ສ ປນ ເນວ ອິສ຺ສາ ນ ມຈ຺ຉຣິຍໍ ໂຫຕິ, ມນຸສ຺ສານໍ ປິໂຍ ໂຫຕິ, ອມນຸສ຺ສານໍ ປິໂຍ ໂຫຕິ, ສຸລຠປຈ຺ຈໂຍ. ປຕ຺ຕຄຕມສ຺ສ ທິຍ຺ຍມານມ຺ປິ ນ ຂີຍຕິ, ຠາຊນີຍຠຓ຺ຑຏ຺ຐາເນ ອຄ຺ຄຠຓ຺ຑໍ ລຠຕິ, ຠເຍ ວາ ຉາຕເກ ວາ ປຕ຺ເຕ ເທວຕາ ອຸສ຺ສຸກ຺ກໍ ອາປຊ຺ຊນ຺ຕິ.

ຕຕ຺ຣິມານິ ວຕ຺ຖູນິ – ເສນຄິຣິວາສີ ຕິສ຺ສຕ຺ເຖໂຣ ກິຣ ມຫາຄິຣິຄາມໍ ອຸປນິສ຺ສາຍ ວສຕິ, ປຎ຺ຎາສ ມຫາເຖຣາ ນາຄທີປໍ ເຈຕິຍວນ຺ທນຕ຺ຖາຍ ຄຈ຺ຉນ຺ຕາ ຄິຣິຄາເມ ປິຓ຺ຑາຍ ຈຣິຕ຺ວາ ກິຎ຺ຈິ ອລທ຺ຘາ ນິກ຺ຂມິໍສຸ. ເຖໂຣ ປວິສນ຺ໂຕ ເຕ ທິສ຺ວາ ປຸຈ຺ຉິ – ‘‘ລທ຺ຘໍ, ຠນ຺ເຕ’’ຕິ? ວິຈຣິມ຺ຫາ, ອາວຸໂສຕິ. ໂສ ອລທ຺ຘຠາວໍ ຎຕ຺ວາ ອາຫ – ‘‘ຠນ຺ເຕ, ຍາວາຫໍ ອາຄຈ຺ຉາມິ, ຕາວ ອິເຘວ ໂຫຖາ’’ຕິ. ມຍໍ, ອາວຸໂສ, ປຎ຺ຎາສ ຊນາ ປຕ຺ຕເຕມນມຕ຺ຕມ຺ປິ ນ ລຠິມ຺ຫາຕິ. ຠນ຺ເຕ, ເນວາສິກາ ນາມ ປຏິພລາ ໂຫນ຺ຕິ, ອລຠນ຺ຕາປິ ຠິກ຺ຂາຈາຣມຄ຺ຄສຠາຄໍ ຊານນ຺ຕີຕິ. ເຖຣາ ອາຄເມສຸໍ. ເຖໂຣ ຄາມໍ ປາວິສິ. ຘຸຣເຄເຫເຍວ ມຫາອຸປາສິກາ ຂີຣຠຕ຺ຕໍ ສຊ຺ເຊຕ຺ວາ ເຖຣໍ ໂອໂລກຍມານາ ຐິຕາ ເຖຣສ຺ສ ທ຺ວາຣໍ ສມ຺ປຕ຺ຕສ຺ເສວ ປຕ຺ຕໍ ປູເຣຕ຺ວາ ອທາສິ. ໂສ ຕໍ ອາທາຍ ເຖຣານໍ ສນ຺ຕິກໍ ຄນ຺ຕ຺ວາ ‘‘ຄຓ຺ຫຖ, ຠນ຺ເຕ’’ຕິ ສງ຺ຆຕ຺ເຖຣໍ ອາຫ. ເຖໂຣ ‘‘ອມ຺ເຫຫິ ເອຕ຺ຕເກຫິ ກິຎ຺ຈິ ນ ລທ຺ຘໍ, ອຍໍ ສີຆເມວ ຄເຫຕ຺ວາ ອາຄໂຕ, ກິໍ ນຸ ໂຂ’’ຕິ ເສສານໍ ມຸຂໍ ໂອໂລເກສິ. ເຖໂຣ ໂອໂລກນາກາເຣເນວ ຎຕ຺ວາ, ‘‘ຠນ຺ເຕ, ຘມ຺ເມນ ສເມນ ລທ຺ໂຘ, ນິກ຺ກຸກ຺ກຸຈ຺ຈາ ຄຓ຺ຫຖາ’’ຕິ ອາທິໂຕ ປຏ຺ຐາຍ ສພ຺ເພສໍ ຍາວທຕ຺ຖໍ ທຕ຺ວາ ອຕ຺ຕນາປິ ຍາວທຕ຺ຖໍ ຠຸຎ຺ຊິ.

ອຖ ນໍ ຠຕ຺ຕກິຈ຺ຈາວສາເນ ເຖຣາ ປຸຈ຺ຉິໍສຸ – ‘‘ກທາ, ອາວຸໂສ, ໂລກຸຕ຺ຕຣຘມ຺ມໍ ປຏິວິຊ຺ຌີ’’ຕິ? ນຕ຺ຖິ ເມ, ຠນ຺ເຕ, ໂລກຸຕ຺ຕຣຘມ຺ໂມຕິ. ຌານລາຠີສິ, ອາວຸໂສຕິ. ເອຕມ຺ປິ, ຠນ຺ເຕ, ນຕ຺ຖີຕິ? ນນຸ, ອາວຸໂສ, ປາຏິຫາຣິຍນ຺ຕິ. ສາຣຓີຍຘມ຺ໂມ ເມ, ຠນ຺ເຕ, ປູຣິໂຕ, ຕສ຺ສ ເມ ປູຣິຕກາລໂຕ ປຏ຺ຐາຍ ສເຈປິ ຠິກ຺ຂຸສຕສຫສ຺ສໍ ໂຫຕິ, ປຕ຺ຕຄຕໍ ນ ຂີຍຕີຕິ. ສາຘຸ ສາຘຸ, ສປ຺ປຸຣິສ, ອນຸຈ຺ຉວິກມິທໍ ຕຸຍ຺ຫນ຺ຕິ. ອິທໍ ຕາວ ປຕ຺ຕຄຕໍ ນ ຂີຍຕີຕິ ເອຕ຺ຖ ວຕ຺ຖຸ.

ອຍເມວ ປນ ເຖໂຣ ເຈຕິຍປພ຺ພເຕ ຄິຣິຠຓ຺ຑມຫາປູຊາຍ ທານຏ຺ຐານໍ ຄນ຺ຕ຺ວາ ‘‘ອິມສ຺ມິໍ ທາເນ ກິໍ ວຣຠຓ຺ຑ’’ນ຺ຕິ ປຸຈ຺ຉິ. ທ຺ເວ ສາຏກາ, ຠນ຺ເຕຕິ. ເອເຕ ມຍ຺ຫໍ ປາປຸຓິສ຺ສນ຺ຕີຕິ? ຕໍ ສຸຕ຺ວາ ອມຈ຺ໂຈ ຣຎ຺ໂຎ ອາໂຣເຈສິ – ‘‘ເອໂກ ທຫໂຣ ເອວໍ ວທຕີ’’ຕິ. ‘‘ທຫຣສ຺ສ ເອວໍ ຈິຕ຺ຕໍ, ມຫາເຖຣານໍ ປນ ສຸຂຸມສາຏກາ ວຏ຺ຏນ຺ຕີ’’ຕິ ວຕ຺ວາ ‘‘ມຫາເຖຣານໍ ທສ຺ສາມີ’’ຕິ ຐເປສິ. ຕສ຺ສ ຠິກ຺ຂຸສງ຺ເຆ ປຏິປາຏິຍາ ຐິເຕ ເທນ຺ຕສ຺ສ ມຕ຺ຖເກ ຐປິຕາປິ ເຕ ສາຏກາ ຫຕ຺ຖໍ ນາໂຣຫນ຺ຕິ, ອຎ຺ເຎວ ອາໂຣຫນ຺ຕິ. ທຫຣສ຺ສ ທານກາເລ ປນ ຫຕ຺ຖໍ ອາຣຸຬ຺ຫາ. ໂສ ຕສ຺ສ ຫຕ຺ເຖ ຐເປຕ຺ວາ ອມຈ຺ຈສ຺ສ ມຸຂໍ ໂອໂລເກຕ຺ວາ ທຫຣໍ ນິສີທາເປຕ຺ວາ ທານໍ ທຕ຺ວາ ສງ຺ຆໍ ວິສ຺ສຊ຺ເຊຕ຺ວາ ທຫຣສ຺ສ ສນ຺ຕິເກ ນິສີທິຕ຺ວາ ‘‘ກທາ, ຠນ຺ເຕ, ອິມໍ ຘມ຺ມໍ ປຏິວິຊ຺ຌິຕ຺ຖາ’’ຕິ ອາຫ. ໂສ ປຣິຍາເຍນປິ ອສນ຺ຕໍ ອວທນ຺ໂຕ ‘‘ນຕ຺ຖິ ມຍ຺ຫໍ, ມຫາຣາຊ, ໂລກຸຕ຺ຕຣຘມ຺ໂມ’’ຕິ ອາຫ. ນນຸ, ຠນ຺ເຕ, ປຸພ຺ເພວ ອວຈຸຕ຺ຖາຕິ. ອາມ, ມຫາຣາຊ, ສາຣຓີຍຘມ຺ມປູຣໂກ ອຫໍ, ຕສ຺ສ ເມ ຘມ຺ມສ຺ສ ປູຣິຕກາລໂຕ ປຏ຺ຐາຍ ຠາຊນີຍຠຓ຺ຑຏ຺ຐາເນ ອຄ຺ຄຠຓ຺ຑໍ ປາປຸຓາຕີຕິ. ‘‘ສາຘຸ ສາຘຸ, ຠນ຺ເຕ, ອນຸຈ຺ຉວິກມິທໍ ຕຸມ຺ຫາກ’’ນ຺ຕິ ວຕ຺ວາ ປກ຺ກາມິ. ອິທໍ ຠາຊນີຍຠຓ຺ຑຏ຺ຐາເນ ອຄ຺ຄຠຓ຺ຑໍ ປາປຸຓາຕີຕິ ເອຕ຺ຖ ວຕ຺ຖຸ.

ພ຺ຣາຫ຺ມຓຕິສ຺ສຠເຍ ປນ ຠາຕຣຄາມວາສິໂນ ນາຄຕ຺ເຖຣິຍາ ອນາໂຣເຈຕ຺ວາວ ປລາຍິໍສຸ. ເຖຣີ ປຈ຺ຈູສສມເຍ ‘‘ອຕິວິຍ ອປ຺ປນິຄ຺ໂຆໂສ ຄາໂມ, ອຸປຘາເຣຖ ຕາວາ’’ຕິ ທຫຣຠິກ຺ຂຸນິໂຍ ອາຫ. ຕາ ຄນ຺ຕ຺ວາ ສພ຺ເພສໍ ຄຕຠາວໍ ຎຕ຺ວາ ອາຄມ຺ມ ເຖຣິຍາ ອາໂຣເຈສຸໍ. ສາ ສຸຕ຺ວາ ‘‘ມາ ຕຸມ຺ເຫ ເຕສໍ ຄຕຠາວໍ ຈິນ຺ຕຍິຕ຺ຖ, ອຕ຺ຕໂນ ອຸທ຺ເທສປຣິປຸຈ຺ຉາໂຍນິໂສມນສິກາເຣສຸເຍວ ໂຍຄໍ ກໂຣຖາ’’ຕິ ວຕ຺ວາ ຠິກ຺ຂາຈາຣເວລາຍໍ ປາຣຸປິຕ຺ວາ ອຕ຺ຕທ຺ວາທສມາ ຄາມທ຺ວາເຣ ນິຄ຺ໂຣຘຣຸກ຺ຂມູເລ ອຏ຺ຐາສິ. ຣຸກ຺ເຂ ອຘິວຕ຺ຖາ ເທວຕາ ທ຺ວາທສນ຺ນມ຺ປິ ຠິກ຺ຂຸນີນໍ ປິຓ຺ຑປາຕໍ ທຕ຺ວາ, ‘‘ອຍ຺ເຍ, ອຎ຺ຎຕ຺ຖ ມາ ຄຈ຺ຉຖ, ນິຈ຺ຈໍ ອິເຘວ ອາຄຈ຺ເຉຍ຺ຍາຖາ’’ຕິ ອາຫ. ເຖຣິຍາ ປນ ກນິຏ຺ຐຠາຕາ ນາຄຕ຺ເຖໂຣ ນາມ ອຕ຺ຖິ. ໂສ ‘‘ມຫນ຺ຕໍ ຠຍໍ, ນ ສກ຺ກາ ຍາເປຕຸໍ, ປຣຕີຣໍ ຄມິສ຺ສາມີ’’ຕິ ອຕ຺ຕທ຺ວາທສໂມວ ອຕ຺ຕໂນ ວສນຏ຺ຐານາ ນິກ຺ຂນ຺ໂຕ ‘‘ເຖຣິໍ ທິສ຺ວາ ຄມິສ຺ສາມີ’’ຕິ ຠາຕຣຄາມໍ ອາຄໂຕ. ເຖຣີ ‘‘ເຖຣາ ອາຄຕາ’’ຕິ ສຸຕ຺ວາ ເຕສໍ ສນ຺ຕິກໍ ຄນ຺ຕ຺ວາ ‘‘ກິໍ ອຍ຺ຍາ’’ຕິ ປຸຈ຺ຉິ. ໂສ ຕໍ ປວຕ຺ຕິໍ ອາໂຣເຈສິ. ສາ ‘‘ອຊ຺ຊ ເອກທິວສໍ ວິຫາເຣວ ວສິຕ຺ວາ ສ຺ເວ ຄມິສ຺ສຖາ’’ຕິ ອາຫ. ເຖຣາ ວິຫາຣໍ ອຄມິໍສຸ.

ເຖຣີ ປຸນທິວເສ ຣຸກ຺ຂມູເລ ປິຓ຺ຑາຍ ຈຣິຕ຺ວາ ເຖຣໍ ອຸປສງ຺ກມິຕ຺ວາ ‘‘ອິມໍ ປິຓ຺ຑປາຕໍ ປຣິຠຸຎ຺ຊຖາ’’ຕິ ອາຫ. ເຖໂຣ ‘‘ວຏ຺ຏິສ຺ສຕິ ເຖຣີ’’ຕິ ວຕ຺ວາ ຕຸຓ຺ຫີ ອຏ຺ຐາສິ. ຘມ຺ມິໂກ, ຕາຕ, ປິຓ຺ຑປາໂຕ, ກຸກ຺ກຸຈ຺ຈໍ ອກຕ຺ວາ ປຣິຠຸຎ຺ຊຖາຕິ. ວຏ຺ຏິສ຺ສຕິ ເຖຣີຕິ? ສາ ປຕ຺ຕໍ ຄເຫຕ຺ວາ ອາກາເສ ຂິປິ, ປຕ຺ໂຕ ອາກາເສ ອຏ຺ຐາສິ. ເຖໂຣ ‘‘ສຕ຺ຕຕາລມຕ຺ເຕ ຐິຕມ຺ປິ ຠິກ຺ຂຸນີຠຕ຺ຕເມວ ເຖຣີ’’ຕິ ວຕ຺ວາ ‘‘ຠຍໍ ນາມ ສພ຺ພກາລໍ ນ ໂຫຕິ, ຠເຍ ວູປສນ຺ເຕ ອຣິຍວໍສໍ ກຖຍມາໂນ, ‘ໂຠ ປິຓ຺ຑປາຕິກ, ຠິກ຺ຂຸນີຠຕ຺ຕໍ ຠຸຎ຺ຊິຕ຺ວາ ວີຕິນາມຍິຕ຺ຖາ’ຕິ ຈິຕ຺ເຕນ ອນຸວທິຍມາໂນ ສນ຺ຖມ຺ຠິຕຸໍ ນ ສກ຺ຂິສ຺ສາມິ, ອປ຺ປມຕ຺ຕາ ໂຫຖ ເຖຣິໂຍ’’ຕິ ມຄ຺ຄໍ ປຏິປຊ຺ຊິ.

ຣຸກ຺ຂເທວຕາປິ ‘‘ສເຈ ເຖໂຣ ເຖຣິຍາ ຫຕ຺ຖໂຕ ປິຓ຺ຑປາຕໍ ປຣິຠຸຎ຺ຊິສ຺ສຕິ, ນ ຕໍ ນິວຕ຺ເຕສ຺ສາມິ. ສເຈ ນ ປຣິຠຸຎ຺ຊິສ຺ສຕິ, ນິວຕ຺ເຕສ຺ສາມີ’’ຕິ ຈິນ຺ຕຍມານາ ຐຕ຺ວາ ເຖຣສ຺ສ ຄມນໍ ທິສ຺ວາ ຣຸກ຺ຂາ ໂອຣຸຍ຺ຫ ‘‘ປຕ຺ຕໍ, ຠນ຺ເຕ, ເທຖາ’’ຕິ ວຕ຺ວາ ປຕ຺ຕໍ ຄເຫຕ຺ວາ ເຖຣໍ ຣຸກ຺ຂມູລໍເຍວ ອາເນຕ຺ວາ ອາສນໍ ປຎ຺ຎາເປຕ຺ວາ ປິຓ຺ຑປາຕໍ ທຕ຺ວາ ກຕຠຕ຺ຕກິຈ຺ຈໍ ປຏິຎ຺ຎໍ ກາເຣຕ຺ວາ ທ຺ວາທສ ຠິກ຺ຂຸນິໂຍ ທ຺ວາທສ ຈ ຠິກ຺ຂູ ສຕ຺ຕ ວສ຺ສານິ ອຸປຏ຺ຐຫິ. ອິທໍ ເທວຕາ ອຸສ຺ສຸກ຺ກໍ ອາປຊ຺ຊນ຺ຕີຕິ ເອຕ຺ຖ ວຕ຺ຖຸ. ຕຕ຺ຣ ຫິ ເຖຣີ ສາຣຓີຍຘມ຺ມປູຣິກາ ອໂຫສິ.

ອຂຓ຺ຑານີຕິອາທີສຸ ຍສ຺ສ ສຕ຺ຕສຸ ອາປຕ຺ຕິກ຺ຂນ຺ເຘສຸ ອາທິມ຺ຫິ ວາ ອນ຺ເຕ ວາ ສິກ຺ຂາປທໍ ຠິນ຺ນໍ ໂຫຕິ, ຕສ຺ສ ສີລໍ ປຣິຍນ຺ເຕ ຉິນ຺ນສາຏໂກ ວິຍ ຂຓ຺ຑໍ ນາມ. ຍສ຺ສ ປນ ເວມຊ຺ເຌ ຠິນ຺ນໍ, ຕສ຺ສ ຉິທ຺ທສາຏໂກ ວິຍ ຉິທ຺ທໍ ນາມ ໂຫຕິ. ຍສ຺ສ ປຏິປາຏິຍາ ທ຺ເວ ຕີຓິ ຠິນ຺ນານິ, ຕສ຺ສ ປິຏ຺ຐິຍໍ ວາ ກຸຈ຺ຉິຍໍ ວາ ອຸຏ຺ຐິເຕນ ວິສຠາຄວຓ຺ເຓນ ກາຬຣຕ຺ຕາທີນໍ ອຎ຺ຎຕຣວຓ຺ຓາ ຄາວີ ວິຍ ສພລໍ ນາມ ໂຫຕິ. ຍສ຺ສ ອນ຺ຕຣນ຺ຕຣາ ຠິນ຺ນານິ, ຕສ຺ສ ອນ຺ຕຣນ຺ຕຣາ ວິສຠາຄພິນ຺ທຸວິຈິຕ຺ຣາ ຄາວີ ວິຍ ກມ຺ມາສໍ ນາມ ໂຫຕິ. ຍສ຺ສ ປນ ສພ຺ເພນ ສພ຺ພໍ ອຠິນ຺ນານິ, ຕສ຺ສ ຕານິ ສີລານິ ອຂຓ຺ຑານິ ອຈ຺ຉິທ຺ທານິ ອສພລານິ ອກມ຺ມາສານິ ນາມ ໂຫນ຺ຕິ. ຕານິ ປເນຕານິ ຕຓ຺ຫາທາສພ຺ຍໂຕ ໂມເຈຕ຺ວາ ຠຸຊິສ຺ສຠາວກຣຓໂຕ ຠຸຊິສ຺ສານິ, ພຸທ຺ຘາທີຫິ ວິຎ຺ຎູຫິ ປສຕ຺ຖຕ຺ຕາ ວິຎ຺ຎຸປ຺ປສຕ຺ຖານິ, ຕຓ຺ຫາທິຏ຺ຐີຫິ ອປຣາມຏ຺ຐຕ຺ຕາ ‘‘ອິທໍ ນາມ ຕ຺ວໍ ອາປນ຺ນປຸພ຺ໂພ’’ຕິ ເກນຈິ ປຣາມຏ຺ຐຸໍ ອສກ຺ກຸເຓຍ຺ຍຕ຺ຕາ ຈ ອປຣາມຏ຺ຐານິ, ອຸປຈາຣສມາຘິໍ ອປ຺ປນາສມາຘິໍ ວາ ສໍວຕ຺ຕຍນ຺ຕີຕິ ສມາຘິສໍວຕ຺ຕນິການີຕິ ວຸຈ຺ຈນ຺ຕິ.

ສີລສາມຎ຺ຎຄໂຕ ວິຫຣຕີຕິ ເຕສຸ ເຕສຸ ທິສາຠາເຄສຸ ວິຫຣນ຺ເຕຫິ ຠິກ຺ຂູຫິ ສທ຺ຘິໍ ສມານຠາວູປຄຕສີໂລ ວິຫຣຕິ. ໂສຕາປນ຺ນາທີນຎ຺ຫິ ສີລໍ ສມຸທ຺ທນ຺ຕເຣປິ ເທວໂລເກປິ ວສນ຺ຕານໍ ອຎ຺ເຎສໍ ໂສຕາປນ຺ນາທີນໍ ສີເລນ ສມານເມວ ໂຫຕິ, ນຕ຺ຖິ ມຄ຺ຄສີເລ ນານຕ຺ຕໍ. ຕໍ ສນ຺ຘາເຍຕໍ ວຸຕ຺ຕໍ.

ຍາຍໍ ທິຏ຺ຐີຕິ ມຄ຺ຄສມ຺ປຍຸຕ຺ຕາ ສມ຺ມາທິຏ຺ຐິ. ອຣິຍາຕິ ນິທ຺ໂທສາ. ນິຍ຺ຍາຕີຕິ ນິຍ຺ຍານິກາ. ຕກ຺ກຣສ຺ສາຕິ ໂຍ ຕຖາກາຣີ ໂຫຕິ. ທຸກ຺ຂກ຺ຂຍາຍາຕິ ສພ຺ພທຸກ຺ຂກ຺ຂຍຕ຺ຖໍ. ທິຏ຺ຐິສາມຎ຺ຎຄໂຕຕິ ສມານທິຏ຺ຐິຠາວໍ ອຸປຄໂຕ ຫຸຕ຺ວາ ວິຫຣຕີຕິ.

໒. ທຸຕິຍສາຣຓີຍສຸຕ຺ຕວຓ຺ຓນາ

໑໒. ທຸຕິເຍ ໂຍ ເຕ ຘມ຺ເມ ປູເຣຕິ, ຕໍ ສພ຺ຣຫ຺ມຈາຣີນໍ ປິຍໍ ກໂຣນ຺ຕີຕິ ປິຍກຣຓາ. ຄຣຸໍ ກໂຣນ຺ຕີຕິ ຄຣຸກຣຓາ. ສງ຺ຄຫາຍາຕິ ສງ຺ຄຓ຺ຫນຕ຺ຖາຍ. ອວິວາທາຍາຕິ ອວິວທນຕ຺ຖາຍ. ສາມຄ຺ຄິຍາຕິ ສມຄ຺ຄຠາວຕ຺ຖາຍ. ເອກີຠາວາຍາຕິ ເອກຠາວຕ຺ຖາຍ ນິນ຺ນານາກຣຓາຍ. ສໍວຕ຺ຕນ຺ຕີຕິ ວຕ຺ຕນ຺ຕິ ປວຕ຺ຕນ຺ຕິ.

໓. ນິສ຺ສາຣຓີຍສຸຕ຺ຕວຓ຺ຓນາ

໑໓. ຕຕິເຍ ນິສ຺ສາຣຓີຍາ ຘາຕຸໂຍຕິ ນິສ຺ສຣຓຘາຕຸໂຍວ. ເມຕ຺ຕາ ຫິ ໂຂ ເມ ເຈໂຕວິມຸຕ຺ຕີຕິ ເອຕ຺ຖ ປຈ຺ຈນີກຘມ຺ເມຫິ ວິມຸຕ຺ຕຕ຺ຕາ ຕິກຈຕຸກ຺ກຊ຺ຌານິກາ ເມຕ຺ຕາວ ເມຕ຺ຕາເຈໂຕວິມຸຕ຺ຕິ ນາມ. ຠາວິຕາຕິ ວຑ຺ຒິຕາ. ພຫຸລີກຕາຕິ ປຸນປ຺ປຸນໍ ກຕາ. ຍານີກຕາຕິ ຍຸຕ຺ຕຍານສທິສາ ກຕາ. ວຕ຺ຖຸກຕາຕິ ປຕິຏ຺ຐາ ກຕາ. ອນຸຏ຺ຐິຕາຕິ ອຘິຏ຺ຐິຕາ. ປຣິຈິຕາຕິ ສມນ຺ຕໂຕ ຈິຕາ ອາຈິຕາ ອຸປຈິຕາ. ສຸສມາຣທ຺ຘາຕິ ສຸປ຺ປຄຸຓກຣເຓນ ສຸຏ຺ຐຸ ສມາຣທ຺ຘາ. ປຣິຍາທາຍ ຕິຏ຺ຐຕີຕິ ປຣິຍາທິຍິຕ຺ວາ ຄເຫຕ຺ວາ ຕິຏ຺ຐຕິ. ມາ ເຫວນ຺ຕິສ຺ສ ວຈນີໂຍຕິ ຍສ຺ມາ ອຠູຕພ຺ຍາກຣຓໍ ພ຺ຍາກໂຣຕິ, ຕສ຺ມາ ‘‘ມາ ເອວໍ ຠຓີ’’ຕິ ວຕ຺ຕພ຺ໂພ. ຍທິທໍ ເມຕ຺ຕາເຈໂຕວິມຸຕ຺ຕີຕິ ຍາ ອຍໍ ເມຕ຺ຕາເຈໂຕວິມຸຕ຺ຕິ, ອິທໍ ນິສ຺ສຣຓໍ ພ຺ຍາປາທສ຺ສ, ພ຺ຍາປາທໂຕ ນິສ຺ສຏາຕິ ອຕ຺ໂຖ. ໂຍ ປນ ເມຕ຺ຕາຍ ຕິກຈຕຸກ຺ກຊ຺ຌານໂຕ ວຸຏ຺ຐິໂຕ ສງ຺ຂາເຣ ສມ຺ມສິຕ຺ວາ ຕຕິຍມຄ຺ຄໍ ປຕ຺ວາ ‘‘ປຸນ ພ຺ຍາປາໂທ ນຕ຺ຖີ’’ຕິ ຕຕິຍຜເລນ ນິພ຺ພານໍ ປສ຺ສຕິ, ຕສ຺ສ ຈິຕ຺ຕໍ ອຈ຺ຈນ຺ຕນິສ຺ສຣຓໍ ພ຺ຍາປາທສ຺ສ. ເອເຕນຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ອນິມິຕ຺ຕາເຈໂຕວິມຸຕ຺ຕີຕິ ພລວວິປສ຺ສນາ. ທີຆຠາຓກາ ປນ ອຣຫຕ຺ຕຜລສມາປຕ຺ຕີຕິ ວທນ຺ຕິ. ສາ ຫິ ຣາຄນິມິຕ຺ຕາທີນຎ຺ເຈວ ຣູປນິມິຕ຺ຕາທີນຎ຺ຈ ນິຈ຺ຈນິມິຕ຺ຕາທີນຎ຺ຈ ອຠາວາ ອນິມິຕ຺ຕາຕິ ວຸຕ຺ຕາ. ນິມິຕ຺ຕານຸສາຣີຕິ ວຸຕ຺ຕປ຺ປເຠທໍ ນິມິຕ຺ຕໍ ອນຸສຣຓສຠາວໍ.

ອສ຺ມີຕິ ອສ຺ມິມາໂນ. ອຍມຫມສ຺ມີຕິ ປຎ຺ຈສຸ ຂນ຺ເຘສຸ ອຍໍ ນາມ ອຫໍ ອສ຺ມີຕິ. ເອຕ຺ຕາວຕາ ອຣຫຕ຺ຕໍ ພ຺ຍາກຕໍ ໂຫຕິ. ວິຈິກິຈ຺ຉາກຖໍກຖາສລ຺ລນ຺ຕິ ວິຈິກິຈ຺ຉາຠູຕໍ ກຖໍກຖາສລ຺ລໍ. ມາ ເຫວນ຺ຕິສ຺ສ ວຈນີໂຍຕິ ສເຈ ເຕ ປຐມມຄ຺ຄວຊ຺ຌາ ວິຈິກິຈ຺ຉາ ອຸປ຺ປຊ຺ຊຕິ, ອຣຫຕ຺ຕພ຺ຍາກຣຓໍ ມິຈ຺ຉາ ໂຫຕິ, ຕສ຺ມາ ‘‘ມາ ອຠູຕໍ ຄຓ຺ຫີ’’ຕິ ວາເຣຕພ຺ໂພ. ອສ຺ມີຕິ ມານສມຸຄ຺ຆາໂຕຕິ ອຣຫຕ຺ຕມຄ຺ໂຄ. ອຣຫຕ຺ຕມຄ຺ຄຜລວເສນ ຫິ ນິພ຺ພາເນ ທິຏ຺ເຐ ປຸນ ອສ຺ມິມາໂນ ນຕ຺ຖີຕິ ອຣຫຕ຺ຕມຄ຺ໂຄ ‘‘ອສ຺ມີຕິ ມານສມຸຄ຺ຆາໂຕ’’ຕິ ວຸຕ຺ໂຕ. ອິຕິ ອິມສ຺ມິໍ ສຸຕ຺ເຕ ອຠູຕພ຺ຍາກຣຓໍ ນາມ ກຖິຕໍ.

໔. ຠທ຺ທກສຸຕ຺ຕວຓ຺ຓນາ

໑໔. ຈຕຸຕ຺ເຖ ນ ຠທ຺ທກນ຺ຕິ ນ ລທ຺ຘກໍ. ຕຕ຺ຖ ໂຍ ຫິ ຠີຕຠີໂຕ ມຣຕິ, ຕສ຺ສ ນ ຠທ຺ທກໍ ມຣຓໍ ໂຫຕິ. ໂຍ ອປາເຍ ປຏິສນ຺ຘິໍ ຄຓ຺ຫາຕິ, ຕສ຺ສ ນ ຠທ຺ທິກາ ກາລກິຣິຍາ ໂຫຕິ. ກມ຺ມາຣາໂມຕິອາທີສຸ ອາຣມຓໍ ອາຣາໂມ, ອຠິຣຕີຕິ ອຕ຺ໂຖ. ວິຫາຣກຣຓາທິມ຺ຫິ ນວກມ຺ເມ ອາຣາໂມ ອສ຺ສາຕິ ກມ຺ມາຣາໂມ. ຕສ຺ມິໍເຍວ ກມ຺ເມ ຣໂຕຕິ ກມ຺ມຣໂຕ. ຕເທວ ກມ຺ມາຣາມຕໍ ປຸນປ຺ປຸນໍ ຍຸຕ຺ໂຕຕິ ອນຸຍຸຕ຺ໂຕ. ເອສ ນໂຍ ສພ຺ພຕ຺ຖ. ເອຕ຺ຖ ຈ ຠສ຺ສນ຺ຕິ ອາລາປສລ຺ລາໂປ. ນິທ຺ທາຕິ ໂສປ຺ປໍ. ສງ຺ຄຓິກາຕິ ຄຓສງ຺ຄຓິກາ. ສາ ‘‘ເອກສ຺ສ ທຸຕິໂຍ ໂຫຕິ, ທ຺ວິນ຺ນໍ ໂຫຕິ ຕຕິຍໂກ’’ຕິອາທິນາ ນເຍນ ເວທິຕພ຺ພາ. ສໍສຄ຺ໂຄຕິ ທສ຺ສນສວນສມຸລ຺ລາປສມ຺ໂຠຄກາຍສໍສຄ຺ຄວເສນ ປວຕ຺ໂຕ ສໍສຏ຺ຐຠາໂວ. ປປຎ຺ໂຈຕິ ຕຓ຺ຫາທິຏ຺ຐິມານວເສນ ປວຕ຺ໂຕ ມທນາກາຣສຓ຺ຐິໂຕ ກິເລສປປຎ຺ໂຈ. ສກ຺ກາຍນ຺ຕິ ເຕຠູມກວຏ຺ຏໍ. ສມ຺ມາ ທຸກ຺ຂສ຺ສ ອນ຺ຕກິຣິຍາຍາຕິ ເຫຕຸນາ ນເຍນ ສກລວຏ຺ຏທຸກ຺ຂສ຺ສ ປຣິວຏຸມປຣິຈ຺ເຉທກຣຓຕ຺ຖໍ. ມໂຄຕິ ມຄສທິໂສ. ນິປ຺ປປຎ຺ຈປເທຕິ ນິພ຺ພານປເທ. ອາຣາຘຍີຕິ ປຣິປູຣຍິ ຕໍ ສມ຺ປາເທສີຕິ.

໕. ອນຸຕປ຺ປິຍສຸຕ຺ຕວຓ຺ຓນາ

໑໕. ປຎ຺ຈເມ ອນຸຕປ຺ປາຕິ ອນຸໂສຈິຕພ຺ພາ ອນຸຕາປກາຣີ. ອິເມສຸ ທ຺ວີສຸປິ ສຸຕ຺ເຕສຸ ຄາຖາສຸ ຈ ວຏ຺ຏວິວຏ຺ຏໍ ກຖິຕໍ.

໖. ນກຸລປິຕຸສຸຕ຺ຕວຓ຺ຓນາ

໑໖. ຉຏ຺ເຐ ພາຬ຺ຫຄິລາໂນຕິ ອຘິມຕ຺ຕຄິລາໂນ. ເອຕທໂວຈາຕິ ສາມິກສ຺ສ ເຠສຊ຺ຊໍ ກຕ຺ວາ ພ຺ຍາຘິໍ ວູປສເມຕຸໍ ອສກ຺ໂກນ຺ຕີ ອິທານິ ສີຫນາທໍ ນທິຕ຺ວາ ສຈ຺ຈກິຣິຍາຍ ພ຺ຍາຘິໍ ວູປສເມຕຸໍ ສນ຺ຕິເກ ນິສີທິຕ຺ວາ ເອຕໍ ‘‘ມາ ໂຂ ຕ຺ວ’’ນ຺ຕິອາທິວຈນໍ ອໂວຈ. ສາເປກ຺ໂຂຕິ ສຕຓ຺ໂຫ. ນ ນກຸລມາຕາຕິ ເອຕ຺ຖ ນ-ກາໂຣ ນ ສກ຺ຂຕີຕິ ເອວໍ ປຣປເທນ ໂຍເຊຕພ຺ໂພ. ສນ຺ຖຣິຕຸນ຺ຕິ ນິຈ຺ຉິທ຺ທໍ ກາຕຸໍ, ສຓ຺ຐເປຕຸນ຺ຕິ ອຕ຺ໂຖ. ເວຓິໍ ໂອລິຂິຕຸນ຺ຕິ ເອຬກໂລມານິ ກປ຺ເປຕ຺ວາ ວິຊເຏຕ຺ວາ ເວຓິໍ ກາຕຸໍ.

ອຎ຺ຎໍ ຆຣໍ ຄມິສ຺ສຕີຕິ ອຎ຺ຎໍ ສາມິກໍ ຄຓ຺ຫິສ຺ສຕິ. ໂສຬສ ວສ຺ສານິ ຄຫຏ຺ຐກໍ ພ຺ຣຫ຺ມຈຣິຍໍ ສມາຈິຓ຺ຓນ຺ຕິ ອິໂຕ ໂສຬສວສ຺ສມຕ຺ຖເກ ຄຫຏ຺ຐພ຺ຣຫ຺ມຈຣິຍວາໂສ ສມາຈິຓ຺ໂຓ. ທສ຺ສນກາມຕຣາຕິ ອຕິເຣເກນ ທສ຺ສນກາມາ. ອິເມຫິ ຕີຫິ ອງ຺ເຄຫິ ສີຫນາທໍ ນທິຕ຺ວາ ‘‘ອິມິນາ ສຈ຺ເຈນ ຕວ ສຣີເຣ ພ຺ຍາຘິ ຜາສຸ ໂຫຕູ’’ຕິ ສຈ຺ຈກິຣິຍໍ ອກາສິ.

ອິທານິ ຠຄວນ຺ຕໍ ສກ຺ຂິໍ ກຕ຺ວາ ອຕ຺ຕໂນ ສີລາທິຄຸເຓຫິປິ ສຈ຺ຈກິຣິຍໍ ກາຕຸໍ ສິຍາ ໂຂ ປນ ເຕຕິອາທິມາຫ. ຕຕ຺ຖ ປຣິປູຣກາຣິນີຕິ ສມຕ຺ຕກາຣິນີ. ເຈໂຕສມຖສ຺ສາຕິ ສມາຘິກມ຺ມຏ຺ຐານສ຺ສ. ໂອຄາຘປ຺ປຕ຺ຕາຕິ ໂອຄາຘໍ ອນຸປ຺ປເວສໍ ປຕ຺ຕາ. ປຕິຄາຘປ຺ປຕ຺ຕາຕິ ປຕິຄາຘໍ ປຕິຏ຺ຐໍ ປຕ຺ຕາ. ອສ຺ສາສປ຺ປຕ຺ຕາຕິ ອສ຺ສາສໍ ອວສ຺ສຍໍ ປຕ຺ຕາ. ເວສາຣຊ຺ຊປ຺ປຕ຺ຕາຕິ ໂສມນສ຺ສຎາຓໍ ປຕ຺ຕາ. ອປຣປ຺ປຈ຺ຈຍາຕິ ປຣປ຺ປຈ຺ຈໂຍ ວຸຈ຺ຈຕິ ປຣສທ຺ຘາ ປຣປຕ຺ຕິຍາຍນາ, ຕາຍ ວິຣຫິຕາຕິ ອຕ຺ໂຖ. ອິເມຫິ ຕີຫິ ອງ຺ເຄຫິ ອຕ຺ຕໂນ ຄຸເຓ ອາຣພ຺ຠ ສຈ຺ຈກິຣິຍໍ ອກາສິ. ຄິລານາ ວຸຏ຺ຐິໂຕຕິ ຄິລາໂນ ຫຸຕ຺ວາ ວຸຏ຺ຐິໂຕ. ຍາວຕາຕິ ຍຕ຺ຕິກາໂຍ. ຕາສໍ ອຎ຺ຎຕຣາຕິ ຕາສໍ ອນ຺ຕເຣ ເອກາ. ອນຸກມ຺ປິກາຕິ ຫິຕານຸກມ຺ປິກາ. ໂອວາທິກາຕິ ໂອວາທທາຍິກາ. ອນຸສາສິກາຕິ ອນຸສິຏ຺ຐິທາຍິກາ.

໗. ໂສປ຺ປສຸຕ຺ຕວຓ຺ຓນາ

໑໗. ສຕ຺ຕເມ ປຏິສລ຺ລານາ ວຸຏ຺ຐິໂຕຕິ ເອກີຠາວາຍ ຘມ຺ມນິຊ຺ຌານກ຺ຂນ຺ຕິໂຕ ຜລສມາປຕ຺ຕິວິຫາຣໂຕ ວຸຏ຺ຐິໂຕ. ຍຖາວິຫາຣນ຺ຕິ ອຕ຺ຕໂນ ອຕ຺ຕໂນ ວສນວິຫາຣໍ. ນວາຕິ ປພ຺ພຊ຺ຊາຍ ນວກາ. ເຕ ປຎ຺ຈສຕມຕ຺ຕາ ອເຫສຸໍ. ກາກຈ຺ຉມານາຕິ ກາກສທ຺ທໍ ກໂຣນ຺ຕາ ທນ຺ເຕ ຂາທນ຺ຕາ. ເຖຣາຕິ ຖິຣຠາວໍ ປຕ຺ຕາ. ເຕນ ໂນຕິ ເຕນ ນຸ. ເສຍ຺ຍສຸຂາທີນິ ເຫຏ຺ຐາ ວຸຕ຺ຕຕ຺ຖາເນວ. ຣຏ຺ຐິໂກຕິ ໂຍ ຣຏ຺ຐໍ ຠຸຎ຺ຊຕິ. ເປຕ຺ຕຓິໂກຕິ ໂຍ ປິຕຣາ ຠຸຕ຺ຕານຸຠຸຕ຺ຕໍ ຠຸຎ຺ຊຕິ. ເສນາປຕິໂກຕິ ເສນາຍ ເຊຏ຺ຐໂກ. ຄາມຄາມຓິໂກຕິ ຄາມໂຠຊໂກ. ປູຄຄາມຓິໂກຕິ ຄຓເຊຏ຺ຐໂກ. ອວິປສ຺ສໂກ ກຸສລານໍ ຘມ຺ມານນ຺ຕິ ກຸສລານໍ ຘມ຺ມານໍ ອເນສໂກ ອຄເວສໂກ ຫຸຕ຺ວາ. ໂພຘິປກ຺ຂິຍານໍ ຘມ຺ມານນ຺ຕິ ສຕ຺ຕຕິໍສາຍ ໂພຘິປກ຺ຂິຍຘມ຺ມານໍ.

໘. ມຈ຺ຉພນ຺ຘສຸຕ຺ຕວຓ຺ຓນາ

໑໘. ອຏ຺ຐເມ ມຈ຺ຉິກນ຺ຕິ ມຈ຺ຉຆາຕກໍ. ຫຕ຺ຖິນາ ຍາຕີຕິ ຫຕ຺ຖິຍາຍີ. ປຣໂຕປິ ເອເສວ ນໂຍ. ວຊ຺ເຌຕິ ວຘິຕພ຺ເພ. ວຘາຍນີເຕຕິ ວຘາຍ ອຸປນີເຕ. ປາປເກນ ມນສາຕິ ລາມເກນ ວຘກຈິຕ຺ເຕນ. ປາຬິຍໍ ປນ ວຘາຍຸປນີເຕຕິ ລິຂນ຺ຕິ. ມາຄວິໂກຕິ ມິຄຆາຕໂກ. ໂກ ປນ ວາໂທ ມນຸສ຺ສຠູຕນ຺ຕິ ໂຍ ມນຸສ຺ສຠູຕໍ ປາປເກນ ມນສາ ອນຸເປກ຺ຂຕິ, ຕສ຺ສ ສມ຺ປຕ຺ຕິຍາ ອຠາເວ ກິເມວ ວຕ຺ຕພ຺ພໍ. ອິທໍ ປາປກສ຺ສ ກມ຺ມຸໂນ ອນິຏ຺ຐຜລຠາວໍ ທສ຺ເສຕຸໍ ວຸຕ຺ຕໍ. ເຍສໍ ປນ ຕາທິສໍ ກມ຺ມໍ ກໂຣນ຺ຕານມ຺ປິ ຍສປຏິລາໂຠ ໂຫຕິ, ເຕສໍ ຕໍ ອກຸສລໍ ນິສ຺ສາຍ ກຸສລໍ ວິປຈ຺ຈຕີຕິ ເວທິຕພ຺ພໍ. ເຕນ ປນສ຺ສ ອກຸສລກມ຺ເມນ ອຸປຫຕຕ຺ຕາ ວິປາໂກ ນ ຈິຣຏ຺ຐິຕິໂກ ໂຫຕິ. ອິມສ຺ມິໍ ສຸຕ຺ເຕ ອກຸສລປກ຺ໂຂວ ກຖິໂຕ.

໙. ປຐມມຣຓສ຺ສຕິສຸຕ຺ຕວຓ຺ຓນາ

໑໙. ນວເມ ນາຕິເກຕິ ເອວໍນາມເກ ຄາເມ. ຄິຎ຺ຊກາວສເຖຕິ ອິຏ຺ຐກາມເຍ ປາສາເທ. ອມໂຕຄຘາຕິ ນິພ຺ພາໂນຄຘາ, ນິພ຺ພານປຕິຏ຺ຐາຕິ ອຕ຺ໂຖ. ຠາເວຖ ໂນຕິ ຠາເວຖ ນຸ. ມຣຓສ຺ສຕິນ຺ຕິ ມຣຓສ຺ສຕິກມ຺ມຏ຺ຐານໍ. ອໂຫ ວຕາຕິ ປຕ຺ຖນຕ຺ເຖ ນິປາໂຕ. ພຫຸໍ ວຕ ເມ ກຕໍ ອສ຺ສາຕິ ຕຸມ຺ຫາກໍ ສາສເນ ມມ ກິຈ຺ຈໍ ພຫຸ ກຕໍ ອສ຺ສ. ຕທນ຺ຕຣນ຺ຕິ ຕໍ ອນ຺ຕຣໍ ຂຓໍ ໂອກາສໍ. ອສ຺ສສິຕ຺ວາ ວາ ປສ຺ສສາມີຕິ ເອຕ຺ຖ ອສ຺ສາໂສ ວຸຈ຺ຈຕິ ອນ຺ໂຕ ປວິສນວາໂຕ, ປສ຺ສາໂສ ພຫິ ນິກ຺ຂມນວາໂຕ. ອິຕິ ອຍໍ ຠິກ຺ຂຸ ຍາວ ອນ຺ໂຕ ປວິຏ຺ຐວາໂຕ ພຫິ ນິກ຺ຂມຕິ, ພຫິ ນິກ຺ຂນ຺ໂຕ ວາໂຕ ອນ຺ໂຕ ປວິສຕິ, ຕາວ ຊີວິຕໍ ປຕ຺ເຖນ຺ໂຕ ເອວມາຫ. ທນ຺ຘນ຺ຕິ ມນ຺ທໍ ຄຣຸກໍ ອສີຆປ຺ປວຕ຺ຕໍ. ອາສວານໍ ຂຍາຍາຕິ ອຣຫຕ຺ຕຜລຕ຺ຖາຍ. ອິມສ຺ມິໍ ສຸຕ຺ເຕ ມຣຓສ຺ສຕິ ອຣຫຕ຺ຕໍ ປາເປຕ຺ວາ ກຖິຕາຕິ.

໑໐. ທຸຕິຍມຣຓສ຺ສຕິສຸຕ຺ຕວຓ຺ຓນາ

໒໐. ທສເມ ປຕິຄຕາຍາຕິ ປຏິປນ຺ນາຍ. ອິຕິ ປຏິສຎ຺ຈິກ຺ຂຕີຕິ ເອວໍ ປຈ຺ຈເວກ຺ຂຕິ. ໂສ ມມສ຺ສ ອນ຺ຕຣາໂຍຕິ ເອຕ຺ຖ ຕິວິໂຘ ອນ຺ຕຣາໂຍ ຊີວິຕນ຺ຕຣາໂຍ, ສມຓຘມ຺ມນ຺ຕຣາໂຍ, ປຸຖຸຊ຺ຊນກາລກິຣິຍໍ ກໂຣນ຺ຕສ຺ສ ສຄ຺ຄນ຺ຕຣາໂຍ ເຈວ ມຄ຺ຄນ຺ຕຣາໂຍ ຈາຕິ. ຕໍ ສພ຺ພມ຺ປິ ສນ຺ຘາເຍວມາຫ. ພ຺ຍາປຊ຺ເຊຍ຺ຍາຕິ ອຊິຓ຺ຓກາທິວເສນ ວິປຊ຺ເຊຍ຺ຍ. ອຘິມຕ຺ໂຕຕິ ພລວາ. ຉນ຺ໂທຕິ ກຕ຺ຕຸກມ຺ຍຕາຉນ຺ໂທ. ວາຍາໂມຕິ ປໂຍຄວີຣິຍໍ. ອຸສ຺ສາໂຫຕິ ອຸສ຺ສາປນວີຣິຍໍ. ອຸສ຺ໂສຬ຺ຫີຕິ ສມ຺ປາທນວີຣິຍໍ. ອປ຺ປຏິວານີຕິ ອນຸກ຺ກຓ຺ຐນາ ອປ຺ປຏິສງ຺ຆຣຓາ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສາຣຓີຍວຄ຺ໂຄ ທຸຕິໂຍ.

໓. ອນຸຕ຺ຕຣິຍວຄ຺ໂຄ

໑-໒. ສາມກສຸຕ຺ຕາທິວຓ຺ຓນາ

໒໑-໒໒. ຕຕິຍສ຺ສ ປຐເມ ສາມຄາມເກຕິ ສາມການໍ ອຸສ຺ສນ຺ນຕ຺ຕາ ເອວໍລທ຺ຘນາເມ ຄາມເກ. ໂປກ຺ຂຣຓິຍາຍນ຺ຕິ ໂປກ຺ຂຣຓິຍານາມເກ ວິຫາເຣ. ອຠິກ຺ກນ຺ຕາຍ ຣຕ຺ຕິຍາຕິ ຣຕ຺ຕິຍາ ປຐມຍາມໍ ອຕິກ຺ກມ຺ມ ມຊ຺ຌິມຍາເມ ສມ຺ປຕ຺ເຕ. ອຠິກ຺ກນ຺ຕວຓ຺ຓາຕິ ອຠິກ຺ກນ຺ຕອຕິມນາປວຓ຺ຓາ. ເກວລກປ຺ປນ຺ຕິ ສກລກປ຺ປໍ. ໂປກ຺ຂຣຓິຍໍ ໂອຠາເສຕ຺ວາຕິ ໂປກ຺ຂຣຓິຍານາມກໍ ມຫາວິຫາຣໍ ອຕ຺ຕໂນ ໂອຠາເສນ ຜຣິຕ຺ວາ. ສມນຸຎ຺ໂຎຕິ ສມານອນຸຎ຺ໂຎ ສມານຈິຕ຺ໂຕ. ໂທວຈສ຺ສຕາຕິ ທຸພ຺ພຈຠາໂວ. ປາປມິຕ຺ຕຕາຕິ ລາມກມິຕ຺ຕຕາ. ອິມສ຺ມິໍ ສຸຕ຺ເຕ ປຣິຫານິຍຘມ຺ມາວ ກຖິຕາ. ທຸຕິເຍ ອປຣິຫານິຍຘມ຺ມາ ໂລກຸຕ຺ຕຣມິສ຺ສກາ ກຖິຕາ.

໓. ຠຍສຸຕ຺ຕວຓ຺ຓນາ

໒໓. ຕຕິເຍ ກາມຣາຄຣຕ຺ຕາຍນ຺ຕິ ກາມຣາຄຣຕ຺ໂຕ ອຍໍ. ຉນ຺ທຣາຄວິນິພທ຺ໂຘຕິ ຉນ຺ທຣາເຄນ ວິນິພທ຺ໂຘ. ຠຍາຕິ ຈິຕ຺ຕຸຕ຺ຣາສຠຍາ. ປງ຺ກາຕິ ກິເລສປງ຺ກໂຕ. ສງ຺ໂຄ ປງ຺ໂກ ຈ ອຸຠຍນ຺ຕິ ສງ຺ໂຄ ຈ ປງ຺ໂກ ຈ ອິທມ຺ປິ ອຸຠຍໍ. ເອເຕ ກາມາ ປວຸຈ຺ຈນ຺ຕິ, ຍຕ຺ຖ ສຕ຺ໂຕ ປຸຖຸຊ຺ຊໂນຕິ ຍສ຺ມິໍ ສງ຺ເຄ ຈ ປງ຺ເກ ຈ ປຸຖຸຊ຺ຊໂນ ສຕ຺ໂຕ ລຄ຺ໂຄ ລຄ຺ຄິໂຕ ປລິພຸທ຺ໂຘ. ອຸປາທາເນຕິ ຈຕຸພ຺ພິເຘ ອຸປາທາເນ. ຊາຕິມຣຓສມ຺ຠເວຕິ ຊາຕິຍາ ຈ ມຣຓສ຺ສ ຈ ສມ຺ຠເວ ປຈ຺ຈຍຠູເຕ. ອນຸປາທາ ວິມຸຈ຺ຈນ຺ຕີຕິ ອນຸປາທິຍິຕ຺ວາ ວິມຸຈ຺ຈນ຺ຕິ. ຊາຕິມຣຓສງ຺ຂເຍຕິ ຊາຕິມຣຓານໍ ສງ຺ຂຍສງ຺ຂາເຕ ນິພ຺ພາເນ, ນິພ຺ພານາຣມ຺ມຓາຍ ວິມຸຕ຺ຕິຍາ ວິມຸຈ຺ຈນ຺ຕີຕິ ອຕ຺ໂຖ. ອິມສ຺ມິໍ ຐາເນ ວິວຏ຺ເຏຕ຺ວາ ອຣຫຕ຺ຕເມວ ປຕ຺ໂຕ ເອສ ຠິກ຺ຂຸ. ອິທານິ ຕໍ ຂີຓາສວໍ ໂຖເມນ຺ໂຕ ເຕ ເຂມປ຺ປຕ຺ຕາຕິອາທິມາຫ. ຕຕ຺ຖ ເຂມປ຺ປຕ຺ຕາຕິ ເຂມຠາວໍ ປຕ຺ຕາ. ສຸຂິໂນຕິ ໂລກຸຕ຺ຕຣສຸເຂນ ສຸຂິຕາ. ທິຏ຺ຐຘມ຺ມາຠິນິພ຺ພຸຕາຕິ ອພ຺ຠນ຺ຕເຣ ກິເລສາຠາເວນ ທິຏ຺ຐຘມ຺ເມເຍວ ອຠິນິພ຺ພຸຕາ. ອິມສ຺ມິໍ ສຸຕ຺ເຕ ວຏ຺ຏເມວ ກເຖຕ຺ວາ ຄາຖາສຸ ວຏ຺ຏວິວຏໍ ກຖິຕໍ.

໔. ຫິມວນ຺ຕສຸຕ຺ຕວຓ຺ຓນາ

໒໔. ຈຕຸຕ຺ເຖ ປທາເລຍ຺ຍາຕິ ຠິນ຺ເທຍ຺ຍ. ຉວາຍາຕິ ລາມິກາຍ. ສມາຘິສ຺ສ ສມາປຕ຺ຕິກຸສໂລ ໂຫຕີຕິ ອາຫາຣສປ຺ປາຍອຸຕຸສປ຺ປາຍານິ ປຣິຄ຺ຄເຫຕ຺ວາ ສມາຘິໍ ສມາປຊ຺ຊິຕຸໍ ກຸສໂລ ໂຫຕິ ເຉໂກ ສມຕ຺ໂຖ ປຏິພໂລ. ສມາຘິສ຺ສ ຐິຕິກຸສໂລຕິ ສມາຘິສ຺ສ ຐິຕິຍໍ ກຸສໂລ, ສມາຘິໍ ຐເປຕຸໍ ສກ຺ໂກຕີຕິ ອຕ຺ໂຖ. ສມາຘິສ຺ສ ວຸຏ຺ຐານກຸສໂລຕິ ສມາຘິສ຺ສ ວຸຏ຺ຐາເນ ກຸສໂລ, ຍຖາປຣິຈ຺ເຉເທນ ວຸຏ຺ຐາຕຸໍ ສກ຺ໂກຕີຕິ ອຕ຺ໂຖ. ສມາຘິສ຺ສ ກລ຺ລິຕກຸສໂລຕິ ສມາຘິສ຺ສ ກລ຺ລຕາຍ ກຸສໂລ, ສມາຘິຈິຕ຺ຕໍ ຫາເສຕຸໍ ກລ຺ລໍ ກາຕຸໍ ສກ຺ໂກຕີຕິ ອຕ຺ໂຖ. ສມາຘິສ຺ສ ໂຄຈຣກຸສໂລຕິ ສມາຘິສ຺ສ ອສປ຺ປາເຍ ອນຸປກາຣເກ ຘມ຺ເມ ວຊ຺ເຊຕ຺ວາ ສປ຺ປາເຍ ອຸປກາຣເກ ເສວນ຺ໂຕປິ, ‘‘ອຍໍ ສມາຘິນິມິຕ຺ຕາຣມ຺ມໂຓ ອຍໍ ລກ຺ຂຓາຣມ຺ມໂຓ’’ຕິ ຊານນ຺ໂຕປິ ສມາຘິສ຺ສ ໂຄຈຣກຸສໂລ ນາມ ໂຫຕິ. ສມາຘິສ຺ສ ອຠິນີຫາຣກຸສໂລຕິ ອຸປຣິອຸປຣິສມາປຕ຺ຕິສມາປຊ຺ຊນຕ຺ຖາຍ ປຐມຊ຺ຌານາທິສມາຘິໍ ອຠິນີຫຣິຕຸໍ ສກ຺ໂກນ຺ໂຕ ສມາຘິສ຺ສ ອຠິນີຫາຣກຸສໂລ ນາມ ໂຫຕິ. ໂສ ປຐມຊ຺ຌານາ ວຸຏ຺ຐາຍ ທຸຕິຍໍ ສມາປຊ຺ຊຕິ, ທຸຕິຍຊ຺ຌານາ…ເປ… ຕຕິຍຊ຺ຌານາ ວຸຏ຺ຐາຍ ຈຕຸຕ຺ຖໍ ສມາປຊ຺ຊຕີຕິ.

໕. ອນຸສ຺ສຕິຏ຺ຐານສຸຕ຺ຕວຓ຺ຓນາ

໒໕. ປຎ຺ຈເມ ອນຸສ຺ສຕິຏ຺ຐານານີຕິ ອນຸສ຺ສຕິກາຣຓານິ. ອິຕິປິ ໂສ ຠຄວາຕິອາທີນິ ວິສຸທ຺ຘິມຄ຺ເຄ (ວິສຸທ຺ຘິ. ໑.໑໒໓ ອາທໂຍ) ວິຕ຺ຖາຣິຕາເນວ. ອິທມ຺ປິ ໂຂ, ຠິກ຺ຂເວ, ອາຣມ຺ມຓໍ ກຣິຕ຺ວາຕິ ອິທໍ ພຸທ຺ຘານຸສ຺ສຕິກມ຺ມຏ຺ຐານໍ ອາຣມ຺ມຓໍ ກຣິຕ຺ວາ. ວິສຸຊ຺ຌນ຺ຕີຕິ ປຣມວິສຸທ຺ຘິໍ ນິພ຺ພານໍ ປາປຸຓນ຺ຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວ. ອິມສ຺ມິໍ ປນ ສຸຕ຺ເຕ ຉ ອນຸສ຺ສຕິຏ຺ຐານານິ ມິສ຺ສການິ ກຖິຕານີຕິ ເວທິຕພ຺ພານິ.

໖. ມຫາກຈ຺ຈານສຸຕ຺ຕວຓ຺ຓນາ

໒໖. ຉຏ຺ເຐ ສມ຺ພາເຘຕິ ປຎ຺ຈກາມຄຸຓສມ຺ພາເຘ. ໂອກາສາຘິຄໂມຕິ ເອຕ຺ຖ ໂອກາສາ ວຸຈ຺ຈນ຺ຕິ ຉ ອນຸສ຺ສຕິຏ຺ຐານານິ, ເຕສໍ ອຘິຄໂມ. ວິສຸທ຺ຘິຍາຕິ ວິສຸຊ຺ຌນຕ຺ຖາຍ. ໂສກປຣິເທວານໍ ສມຕິກ຺ກມາຍາຕິ ໂສການຎ຺ຈ ປຣິເທວານຎ຺ຈ ສມຕິກ຺ກມຕ຺ຖາຍ. ອຕ຺ຖງ຺ຄມາຍາຕິ ອຕ຺ຖໍ ຄມນຕ຺ຖາຍ. ຎາຍສ຺ສ ອຘິຄມາຍາຕິ ສຫວິປສ຺ສນກສ຺ສ ມຄ຺ຄສ຺ສ ອຘິຄມນຕ຺ຖາຍ. ນິພ຺ພານສ຺ສ ສຈ຺ຉິກິຣິຍາຍາຕິ ອປຈ຺ຈຍປຣິນິພ຺ພານສ຺ສ ປຈ຺ຈກ຺ຂກິຣິຍຕ຺ຖາຍ.

ສພ຺ພໂສຕິ ສພ຺ພາກາເຣນ. ອາກາສສເມນາຕິ ອລຄ຺ຄນຏ຺ເຐນ ເຈວ ອປລິພຸທ຺ຘຏ຺ເຐນ ຈ ອາກາສສທິເສນ. ວິປຸເລນາຕິ ນ ປຣິຕ຺ຕເກນ. ມຫຄ຺ຄເຕນາຕິ ມຫນ຺ຕຠາວໍ ຄເຕນ, ມຫນ຺ເຕຫິ ວາ ອຣິຍສາວເກຫິ ຄເຕນ, ປຏິປນ຺ເນນາຕິ ອຕ຺ໂຖ. ອປ຺ປມາເຓນາຕິ ຜຣຓອປ຺ປມາຓຕາຍ ອປ຺ປມາເຓນ. ອເວເຣນາຕິ ອກຸສລເວຣປຸຄ຺ຄລເວຣຣຫິເຕນ. ອພ຺ຍາປຊ຺ເຌນາຕິ ໂກຘທຸກ຺ຂວຊ຺ຊິເຕນ. ສພ຺ພເມຕໍ ພຸທ຺ຘານຸສ຺ສຕິຈິຕ຺ຕເມວ ສນ຺ຘາຍ ວຸຕ຺ຕໍ. ປຣໂຕປິ ເອເສວ ນໂຍ. ວິສຸທ຺ຘິຘມ຺ມາຕິ ວິສຸຊ຺ຌນສຠາວາ. ອິມສ຺ມິມ຺ປິ ສຸຕ຺ເຕ ຉ ອນຸສ຺ສຕິຏ຺ຐານານິ ມິສ຺ສກາເນວ ກຖິຕານີຕິ.

໗. ປຐມສມຍສຸຕ຺ຕວຓ຺ຓນາ

໒໗. ສຕ຺ຕເມ ມໂນຠາວນີຍສ຺ສາຕິ ເອຕ຺ຖ ມນໍ ຠາເວຕິ ວຑ຺ເຒຕີຕິ ມໂນຠາວນີໂຍ. ທສ຺ສນາຍາຕິ ທສ຺ສນຕ຺ຖໍ. ນິສ຺ສຣຓນ຺ຕິ ນິຄ຺ຄມນໍ ວູປສມນໍ. ຘມ຺ມໍ ເທເສຕີຕິ ກາມຣາຄປ຺ປຊຫນຕ຺ຖາຍ ອສຸຠກມ຺ມຏ຺ຐານໍ ກເຖຕິ. ທຸຕິຍວາຣາທີສຸ ພ຺ຍາປາທປ຺ປຫານາຍ ເມຕ຺ຕາກມ຺ມຏ຺ຐານໍ, ຖິນມິທ຺ຘປ຺ປຫານາຍ ຖິນມິທ຺ຘວິໂນທນກມ຺ມຏ຺ຐານໍ, ອາໂລກສຎ຺ຎໍ ວາ ວີຣິຍາຣມ຺ຠວຕ຺ຖຸອາທີນໍ ວາ ອຎ຺ຎຕຣໍ, ອຸທ຺ຘຈ຺ຈກຸກ຺ກຸຈ຺ຈປ຺ປຫານາຍ ສມຖກມ຺ມຏ຺ຐານໍ, ວິຈິກິຈ຺ຉາປຫານາຍ ຕິຓ຺ຓໍ ຣຕນານໍ ຄຸຓກຖໍ ກເຖນ຺ໂຕ ຘມ຺ມໍ ເທເສຕີຕິ ເວທິຕພ຺ໂພ. ອາຄມ຺ມາຕິ ອາຣພ຺ຠ. ມນສິກໂຣໂຕຕິ ອາຣມ຺ມຓວເສນ ຈິຕ຺ເຕ ກໂຣນ຺ຕສ຺ສ. ອນນ຺ຕຣາ ອາສວານໍ ຂໂຍ ໂຫຕີຕິ ອນນ຺ຕຣາເຍນ ອາສວານໍ ຂໂຍ ໂຫຕິ.

໘. ທຸຕິຍສມຍສຸຕ຺ຕວຓ຺ຓນາ

໒໘. ອຏ຺ຐເມ ມຓ຺ຑລມາເຬຕິ ໂຠຊນສາລາຍ. ຈາຣິຕ຺ຕກິລມໂຖຕິ ປິຓ຺ຑປາຕຈຣິຍາຍ ອຸປ຺ປນ຺ນກິລມໂຖ. ຠຕ຺ຕກິລມໂຖຕິ ຠຕ຺ຕທຣໂຖ. ວິຫາຣປຈ຺ຉາຍາຍນ຺ຕິ ວິຫາຣປຈ຺ຈນ຺ເຕ ຉາຍາຍ. ຍເທວສ຺ສ ທິວາ ສມາຘິນິມິຕ຺ຕໍ ມນສິກຕໍ ໂຫຕີຕິ ຍໍ ເອວ ຕສ຺ສ ຕໂຕ ປຸຣິມທິວສຠາເຄ ສມຖນິມິຕ຺ຕໍ ຈິຕ຺ເຕ ກຕໍ ໂຫຕິ. ຕເທວສ຺ສ ຕສ຺ມິໍ ສມເຍ ສມຸທາຈຣຕີຕິ ຕໍເຍວ ເອຕສ຺ສ ຕສ຺ມິໍ ສມເຍ ທິວາວິຫາເຣ ນິສິນ຺ນສ຺ສ ມໂນທ຺ວາເຣ ສຎ຺ຈຣຕິ. ໂອຊຏ຺ຐາຍີຕິ ໂອຊາຍ ຐິໂຕ ປຕິຏ຺ຐິໂຕ. ຜາສຸກສ຺ສ ໂຫຕີຕິ ຜາສຸກໍ ອສ຺ສ ໂຫຕິ. ສມ຺ມຸຂາຕິ ກເຖນ຺ຕສ຺ສ ສມ຺ມຸຂຏ຺ຐາເນ. ສຸຕນ຺ຕິ ໂສເຕນ ສຸຕໍ. ປຏິຄ຺ຄຫິຕນ຺ຕິ ຈິຕ຺ເຕນ ປຏິຄ຺ຄຫິຕໍ.

໙. ອຸທາຍີສຸຕ຺ຕວຓ຺ຓນາ

໒໙. ນວເມ ອຸທາຍິນ຺ຕິ ລາຬຸທາຍິຕ຺ເຖຣໍ. ສຸໂຓມຫໍ, ອາວຸໂສຕິ, ອາວຸໂສ, ນາຫໍ ພຘິໂຣ, ສຸຓາມິ ຠຄວໂຕ ວຈນໍ, ປຎ຺ຫໍ ປນ ອຸປປຣິກ຺ຂາມີຕິ. ອຘິຈິຕ຺ຕນ຺ຕິ ສມາຘິວິປສ຺ສນາຈິຕ຺ຕໍ. ອິທໍ, ຠນ຺ເຕ, ອນຸສ຺ສຕິຏ຺ຐານນ຺ຕິ ອິທໍ ຌານຕ຺ຕຍສງ຺ຂາຕໍ ອນຸສ຺ສຕິກາຣຓໍ. ທິຏ຺ຐຘມ຺ມສຸຂວິຫາຣາຍ ສໍວຕ຺ຕຕີຕິ ອິມສ຺ມິໍເຍວ ອຕ຺ຕຠາເວ ສຸຂວິຫາຣຕ຺ຖາຍ ປວຕ຺ຕຕິ. ອາໂລກສຎ຺ຎນ຺ຕິ ອາໂລກນິມິຕ຺ເຕ ອຸປ຺ປນ຺ນສຎ຺ຎໍ. ທິວາ ສຎ຺ຎໍ ອຘິຏ຺ຐາຕີຕິ ທິວາຕິ ສຎ຺ຎໍ ຐເປຕິ. ຍຖາ ທິວາ ຕຖາ ຣຕ຺ຕິນ຺ຕິ ຍຖາເນນ ທິວາ ອາໂລກສຎ຺ຎາ ມນສິກຕາ, ຣຕ຺ຕິມ຺ປິ ຕເຖວ ຕໍ ມນສິ ກໂຣຕິ. ຍຖາ ຣຕ຺ຕິໍ ຕຖາ ທິວາຕິ ຍຖາ ວາເນນ ຣຕ຺ຕິໍ ອາໂລກສຎ຺ຎາ ມນສິກຕາ, ທິວາປິ ຕໍ ຕເຖວ ມນສິ ກໂຣຕິ. ວິວເຏນາຕິ ປາກເຏນ. ອປຣິໂຍນທ຺ເຘນາຕິ ນີວຣເຓຫິ ອໂນນທ຺ເຘນ. ສປ຺ປຠາສໍ ຈິຕ຺ຕໍ ຠາເວຕີຕິ ທິພ຺ພຈກ຺ຂຸຎາຓຕ຺ຖາຍ ສໂຫຠາສກໍ ຈິຕ຺ຕໍ ພ຺ຣູເຫຕິ ວຑ຺ເຒຕິ. ຍໍ ປນ ‘‘ອາໂລກສຎ຺ຎໍ ມນສິ ກໂຣຕີ’’ຕິ ວຸຕ຺ຕໍ, ຕໍ ຖິນມິທ຺ຘວິໂນທນາໂລກສຎ຺ຎໍ ສນ຺ຘາຍ ວຸຕ຺ຕໍ, ນ ທິພ຺ພຈກ຺ຂຸຎາຓາໂລກນ຺ຕິ ເວທິຕພ຺ພໍ. ຎາຓທສ຺ສນປ຺ປຏິລາຠາຍາຕິ ທິພ຺ພຈກ຺ຂຸສງ຺ຂາຕສ຺ສ ຎາຓທສ຺ສນສ຺ສ ປຏິລາຠາຍ.

ອິມເມວ ກາຍນ຺ຕິອາທີສຸ ຍໍ ວຕ຺ຕພ຺ພໍ ສິຍາ, ຕໍ ສພ຺ພໍ ສພ຺ພາກາເຣນ ວິຕ຺ຖາຣໂຕ ວິສຸທ຺ຘິມຄ຺ເຄ ກາຍຄຕາສຕິກມ຺ມຏ຺ຐາເນ ວຸຕ຺ຕໍ. ກາມຣາຄປ຺ປຫານາຍາຕິ ປຎ຺ຈກາມຄຸຓິກສ຺ສ ຣາຄສ຺ສ ປຫານຕ຺ຖາຍ. ເສຍ຺ຍຖາປິ ປສ຺ເສຍ຺ຍາຕິ ຍຖາ ປສ຺ເສຍ຺ຍ. ສຣີຣນ຺ຕິ ມຕສຣີຣໍ. ສິວຖິກາຍ ຉຑ຺ຑິຕນ຺ຕິ ສຸສາເນ ອປວິທ຺ຘໍ. ເອກາຫໍ ມຕສ຺ສ ອສ຺ສາຕິ ເອກາຫມຕໍ. ທ຺ວີຫໍ ມຕສ຺ສ ອສ຺ສາຕິ ທ຺ວີຫມຕໍ. ຕີຫໍ ມຕສ຺ສ ອສ຺ສາຕິ ຕີຫມຕໍ. ຠສ຺ຕາ ວິຍ ວາຍຸນາ ອຸທ຺ຘໍ ຊີວິຕປຣິຍາທານາ ຍຖານຸກ຺ກມໍ ສມຸຄ຺ຄເຕນ ສູນຠາເວນ ຘຸມາຕຕ຺ຕາ ອຸທ຺ຘຸມາຕໍ, ອຸທ຺ຘຸມາຕເມວ ອຸທ຺ຘຸມາຕກໍ. ປຏິກູລຕ຺ຕາ ວາ ກຸຈ຺ຉິຕໍ ອຸທ຺ຘຸມາຕນ຺ຕິ ອຸທ຺ຘຸມາຕກໍ. ວິນີລໍ ວຸຈ຺ຈຕິ ວິປຣິຠິນ຺ນວຓ຺ຓໍ, ວິນີລເມວ ວິນີລກໍ. ປຏິກູລຕ຺ຕາ ວາ ກຸຈ຺ຉິຕໍ ວິນີລນ຺ຕິ ວິນີລກໍ. ມໍສຸສ຺ສທຏ຺ຐາເນສຸ ຣຕ຺ຕວຓ຺ຓສ຺ສ ປຸພ຺ພສນ຺ນິຈຍຏ຺ຐາເນສຸ ເສຕວຓ຺ຓສ຺ສ ເຍຠຸຍ຺ເຍນ ຈ ນີລວຓ຺ຓສ຺ສ ນີລຏ຺ຐາເນ ນີລສາຏກປາຣຸຕສ຺ເສວ ຉວສຣີຣສ຺ເສຕໍ ອຘິວຈນໍ. ປຣິຠິນ຺ນຏ຺ຐາເນຫິ ນວຫິ ວາ ວຓມຸເຂຫິ ວິສ຺ສນ຺ທມານໍ ປຸພ຺ພໍ ວິປຸພ຺ພໍ, ວິປຸພ຺ພເມວ ວິປຸພ຺ພກໍ. ປຏິກູລຕ຺ຕາ ວາ ກຸຈ຺ຉິຕໍ ວິປຸພ຺ພນ຺ຕິ ວິປຸພ຺ພກໍ. ວິປຸພ຺ພກໍ ຊາຕໍ ຕຖາຠາວໍ ຄຕນ຺ຕິ ວິປຸພ຺ພກຊາຕໍ.

ໂສ ອິມເມວ ກາຍນ຺ຕິ ໂສ ຠິກ຺ຂຸ ອິມໍ ອຕ຺ຕໂນ ກາຍໍ ເຕນ ກາເຍນ ສທ຺ຘິໍ ຎາເຓນ ອຸປສໍຫຣຕິ ອຸປເນຕິ. ກຖໍ? ອຍມ຺ປິ ໂຂ ກາໂຍ ເອວໍຘມ຺ໂມ ເອວໍຠາວີ ເອວໍອນຕີໂຕຕິ. ອິທໍ ວຸຕ຺ຕໍ ໂຫຕິ – ອາຍຸ ອຸສ຺ມາ ວິຎ຺ຎາຓນ຺ຕິ ອິເມສໍ ຕິຓ຺ຓໍ ຘມ຺ມານໍ ອຕ຺ຖິຕາຍ ອຍໍ ກາໂຍ ຐານຄມນາທິຂໂມ ໂຫຕິ, ອິເມສໍ ປນ ວິຄມາ ອຍມ຺ປິ ເອວໍຘມ຺ໂມ ເອວໍປູຕິກສຠາໂວເຍວາຕິ. ເອວໍຠາວີຕິ ເອວເມວໍ ອຸທ຺ຘຸມາຕາທິເຠໂທ ຠວິສ຺ສຕິ. ເອວໍ ອນຕີໂຕຕິ ເອວໍ ອຸທ຺ຘຸມາຕາທິຠາວໍ ອນຕິກ຺ກນ຺ໂຕ.

ຂຊ຺ຊມານນ຺ຕິ ອຸທຣາທີສຸ ນິສີທິຕ຺ວາ ອຸທຣມໍສໂອຏ຺ຐມໍສອກ຺ຂິກມໍສາທີນິ ລຸຎ຺ຈິຕ຺ວາ ລຸຎ຺ຈິຕ຺ວາ ຂາທິຍມານໍ. ສມໍສໂລຫິຕນ຺ຕິ ເສສາວເສສມໍສໂລຫິຕຍຸຕ຺ຕໍ. ນິມ຺ມໍສໂລຫິຕມກ຺ຂິຕນ຺ຕິ ມໍເສ ຂີເຓປິ ໂລຫິຕໍ ນ ສຸສ຺ສຕິ, ຕໍ ສນ຺ຘາຍ ວຸຕ຺ຕໍ – ‘‘ນິມ຺ມໍສໂລຫິຕມກ຺ຂິຕ’’ນ຺ຕິ. ອຎ຺ເຎນາຕິ ອຎ຺ເຎນ ທິສາຠາເຄນ. ຫຕ຺ຖຏ຺ຐິກນ຺ຕິ ຈຕຸສຏ຺ຐິເຠທມ຺ປິ ຫຕ຺ຖຏ຺ຐິກໍ ປາຏິເຍກ຺ກໍ ປາຏິເຍກ຺ກໍ ວິປ຺ປກິຓ຺ຓໍ. ປາທຏ຺ຐິກາທີສຸປິ ເອເສວ ນໂຍ. ເຕໂຣວສ຺ສິການີຕິ ອຕິກ຺ກນ຺ຕສໍວຈ຺ຉຣານິ. ປູຕີນີຕິ ອພ຺ໂຠກາເສ ຐິຕານິ ວາຕາຕປວຸຏ຺ຐິສມ຺ຜສ຺ເສນ ເຕໂຣວສ຺ສິກາເນວ ປູຕີນິ ໂຫນ຺ຕິ, ອນ຺ໂຕຠູມິຄຕານິ ປນ ຈິຣຕຣໍ ຕິຏ຺ຐນ຺ຕິ. ຈຸຓ຺ຓກຊາຕານີຕິ ຈຸຓ຺ຓວິຈຸຓ຺ຓໍ ຫຸຕ຺ວາ ວິປ຺ປກິຓ຺ຓານິ. ສພ຺ພຕ຺ຖ ໂສ ອິມເມວາຕິ ວຸຕ຺ຕນເຍນ ຂຊ຺ຊມານາທີນໍ ວເສນ ໂຍຊນາ ກາຕພ຺ພາ. ອສ຺ມິມານສມຸຄ຺ຆາຕາຍາຕິ ອສ຺ມີຕິ ປວຕ຺ຕສ຺ສ ນວວິຘສ຺ສ ມານສ຺ສ ສມຸຄ຺ຆາຕຕ຺ຖາຍ. ອເນກຘາຕຸປຏິເວຘາຍາຕິ ອເນກຘາຕູນໍ ປຏິວິຊ຺ຌນຕ຺ຖາຍ. ສໂຕວ ອຠິກ຺ກມຕີຕິ ຄຈ຺ຉນ຺ໂຕ ສຕິປຎ຺ຎາຫິ ສມນ຺ນາຄໂຕວ ຄຈ຺ຉຕິ. ສໂຕວ ປຏິກ຺ກມຕີຕິ ປຏິນິວຕ຺ຕນ຺ໂຕປິ ສຕິປຎ຺ຎາຫິ ສມນ຺ນາຄໂຕວ ນິວຕ຺ຕຕິ. ເສສປເທສຸປິ ເອເສວ ນໂຍ. ສຕິສມ຺ປຊຎ຺ຎາຍາຕິ ສຕິຍາ ຈ ຎາຓສ຺ສ ຈ ອຕ຺ຖາຍ. ອິຕິ ອິມສ຺ມິໍ ສຸຕ຺ເຕ ສຕິຎາຓານິ ມິສ຺ສການິ ກຖິຕານີຕິ.

໑໐. ອນຸຕ຺ຕຣິຍສຸຕ຺ຕວຓ຺ຓນາ

໓໐. ທສເມ ອຸຈ຺ຈາວຈນ຺ຕິ ຍໍ ກິຎ຺ຈິ ມຫນ຺ຕຂຸທ຺ທກໍ, ອຸຈ຺ຈນີຈໍ ວາ. ຫີນນ຺ຕິ ນິຫີນໍ. ຄມ຺ມນ຺ຕິ ຄາມວາສິການໍ ທສ຺ສນໍ. ໂປຖຸຊ຺ຊນິກນ຺ຕິ ປຸຖຸຊ຺ຊນານໍ ສນ຺ຕກໍ. ອນຣິຍນ຺ຕິ ນ ອຣິຍໍ ນ ອຸຕ຺ຕມໍ ນ ປຣິສຸທ຺ຘໍ. ອນຕ຺ຖສໍຫິຕນ຺ຕິ ນ ອຕ຺ຖສນ຺ນິສ຺ສິຕໍ. ນ ນິພ຺ພິທາຍາຕິ ນ ວຏ຺ເຏ ນິພ຺ພິນ຺ທນຕ຺ຖາຍ. ນ ວິຣາຄາຍາຕິ ນ ຣາຄາທີນໍ ວິຣຊ຺ຊນຕ຺ຖາຍ. ນ ນິໂຣຘາຍາຕິ ນ ຣາຄາທີນໍ ອປ຺ປວຕ຺ຕິນິໂຣຘາຍ. ນ ອຸປສມາຍາຕິ ນ ຣາຄາທີນໍ ວູປສມນຕ຺ຖາຍ. ນ ອຠິຎ຺ຎາຍາຕິ ນ ອຠິຊານນຕ຺ຖາຍ. ນ ສມ຺ໂພຘາຍາຕິ ນ ສມ຺ໂພຘິສງ຺ຂາຕສ຺ສ ຈຕຸມຄ຺ຄຎາຓສ຺ສ ປຏິວິຊ຺ຌນຕ຺ຖາຍ. ນ ນິພ຺ພານາຍາຕິ ນ ນິພ຺ພານສ຺ສ ສຈ຺ຉິກິຣິຍາຍ.

ນິວິຏ຺ຐສທ຺ໂຘຕິ ປຕິຏ຺ຐິຕສທ຺ໂຘ. ນິວິຏ຺ຐເປໂມຕິ ປຕິຏ຺ຐິຕເປໂມ. ເອກນ຺ຕຄໂຕຕິ ເອກນ຺ຕໍ ຄໂຕ, ອຈລປ຺ປຕ຺ໂຕຕິ ອຕ຺ໂຖ. ອຠິປ຺ປສນ຺ໂນຕິ ອຕິວິຍ ປສນ຺ໂນ. ເອຕທານຸຕ຺ຕຣິຍນ຺ຕິ ເອຕໍ ອນຸຕ຺ຕຣໍ. ຫຕ຺ຖິສ຺ມິມ຺ປິ ສິກ຺ຂຕີຕິ ຫຕ຺ຖິນິມິຕ຺ຕໍ ສິກ຺ຂິຕພ຺ພໍ ຫຕ຺ຖິສິປ຺ປໍ ສິກ຺ຂຕິ. ເສສປເທສຸປິ ເອເສວ ນໂຍ. ອຸຈ຺ຈາວຈນ຺ຕິ ມຫນ຺ຕຂຸທ຺ທກໍ ສິປ຺ປໍ ສິກ຺ຂຕິ.

ອຸປຏ຺ຐິຕາ ປາຣິຈຣິເຍຕິ ປາຣິຈຣິຍາຍ ປຈ຺ຈຸປຏ຺ຐິຕາ. ຠາວຍນ຺ຕິ ອນຸສ຺ສຕິນ຺ຕິ ອນຸຕ຺ຕຣໍ ອນຸສ຺ສຕິໍ ຠາເວນ຺ຕິ. ວິເວກປ຺ປຏິສໍຍຸຕ຺ຕນ຺ຕິ ນິພ຺ພານນິສ຺ສິຕໍ ກຕ຺ວາ. ເຂມນ຺ຕິ ນິຣຸປທ຺ທວໍ. ອມຕຄາມິນນ຺ຕິ ນິພ຺ພານຄາມິນໍ, ອຣິຍມຄ຺ຄໍ ຠາເວນ຺ຕີຕິ ອຕ຺ໂຖ. ອປ຺ປມາເທ ປໂມທິຕາຕິ ສຕິຍາ ອວິປ຺ປວາສສງ຺ຂາເຕ ອປ຺ປມາເທ ອາໂມທິຕາ ປໂມທິຕາ. ນິປກາຕິ ເນປກ຺ເກນ ສມນ຺ນາຄຕາ. ສີລສໍວຸຕາຕິ ສີເລນ ສໍວຸຕາ ປິຫິຕາ. ເຕ ເວ ກາເລນ ປຈ຺ເຈນ຺ຕີຕິ ເຕ ເວ ຍຸຕ຺ຕປ຺ປຍຸຕ຺ຕກາເລ ຊານນ຺ຕິ. ຍຕ຺ຖ ທຸກ຺ຂໍ ນິຣຸຊ຺ຌຕີຕິ ຍສ຺ມິໍ ຐາເນ ສກລໍ ວຏ຺ຏທຸກ຺ຂໍ ນິຣຸຊ຺ຌຕິ, ຕໍ ອມຕໍ ມຫານິພ຺ພານໍ ເຕ ຠິກ຺ຂູ ຊານນ຺ຕີຕິ. ອິມສ຺ມິໍ ສຸຕ຺ເຕ ຉ ອນຸຕ຺ຕຣິຍານິ ມິສ຺ສການິ ກຖິຕານີຕິ.

ອນຸຕ຺ຕຣິຍວຄ຺ໂຄ ຕຕິໂຍ.

໔. ເທວຕາວຄ຺ໂຄ

໑. ເສຂສຸຕ຺ຕວຓ຺ຓນາ

໓໑. ຈຕຸຕ຺ຖສ຺ສ ປຐເມ ເສຂສ຺ສາຕິ ສຕ຺ຕວິຘສ຺ສ ເສຂສ຺ສ. ປຸຖຸຊ຺ຊເນ ປນ ວຕ຺ຕພ຺ພເມວ ນຕ຺ຖິ. ປຣິຫານາຍາຕິ ອຸປຣູປຣິຄຸຓປຣິຫານາຍ.

໒-໓. ອປຣິຫານສຸຕ຺ຕທ຺ວຍວຓ຺ຓນາ

໓໒-໓໓. ທຸຕິເຍ ສຕ຺ຖຸຄາຣວຕາຕິ ສຕ຺ຖຣິ ຄຣຸຠາໂວ. ຘມ຺ມຄາຣວຕາຕິ ນວວິເຘ ໂລກຸຕ຺ຕຣຘມ຺ເມ ຄຣຸຠາໂວ. ສງ຺ຆຄາຣວຕາຕິ ສງ຺ເຆ ຄຣຸຠາໂວ. ສິກ຺ຂາຄາຣວຕາຕິ ຕີສຸ ສິກ຺ຂາສຸ ຄຣຸຠາໂວ. ອປ຺ປມາທຄາຣວຕາຕິ ອປ຺ປມາເທ ຄຣຸຠາໂວ. ປຏິສນ຺ຖາຣຄາຣວຕາຕິ ຘມ຺ມາມິສວເສນ ທຸວິເຘ ປຏິສນ຺ຖາເຣ ຄຣຸຠາໂວ. ສຕ຺ຖາ ຄຣຸ ອສ຺ສາຕິ ສຕ຺ຖຸຄຣຸ. ຘມ຺ໂມ ຄຣຸ ອສ຺ສາຕິ ຘມ຺ມຄຣຸ. ຕິພ຺ພຄາຣໂວຕິ ພຫລຄາຣໂວ. ປຏິສນ຺ຖາເຣ ຄາຣໂວ ອສ຺ສາຕິ ປຏິສນ຺ຖາຣຄາຣໂວ. ຕຕິເຍ ສປ຺ປຕິສ຺ໂສຕິ ສເຊຏ຺ຐໂກ ສຄາຣໂວ. ຫິໂຣຕ຺ຕປ຺ປໍ ປເນຕ຺ຖ ມິສ຺ສກໍ ກຖິຕໍ.

໔. ມຫາໂມຄ຺ຄລ຺ລານສຸຕ຺ຕວຓ຺ຓນາ

໓໔. ຈຕຸຕ຺ເຖ ຕິສ຺ໂສ ນາມ ຠິກ຺ຂູຕິ ເຖຣສ຺ເສວ ສທ຺ຘິວິຫາຣິໂກ. ມຫິທ຺ຘິໂກ ມຫານຸຠາໂວຕິ ອິຊ຺ຌນຏ຺ເຐນ ມຫຕີ ອິທ຺ຘິ ອສ຺ສາຕິ ມຫິທ຺ຘິໂກ. ອນຸຜຣຓຏ຺ເຐນ ມຫາ ອານຸຠາໂວ ອສ຺ສາຕິ ມຫານຸຠາໂວ. ຈິຣສ຺ສໍ ໂຂ, ມາຣິສ ໂມຄ຺ຄລ຺ລານ, ອິມໍ ປຣິຍາຍມກາສີຕິ ເອວຣູປໍ ໂລເກ ປກຕິຍາ ປິຍສມຸທາຫາຣວຈນໍ ໂຫຕິ. ໂລກິຍາ ຫິ ຈິຣສ຺ສໍ ອາຄຕມ຺ປິ ອນາຄຕປຸພ຺ພມ຺ປິ ມນາປຊາຕິຍໍ ອາຄຕໍ ທິສ຺ວາ ‘‘ກຸໂຕ ຠວໍ ອາຄໂຕ, ຈິຣສ຺ສໍ ຠວໍ ອາຄໂຕ, ກຖໍ ເຕ ອິຘາຄມນມຄ຺ໂຄ ຎາໂຕ, ກິໍ ມຄ຺ຄມູຬ຺ໂຫສີ’’ຕິອາທີນິ ວທນ຺ຕິ. ອຍໍ ປນ ອາຄຕປຸພ຺ພຕ຺ຕາເຍວ ເອວມາຫ. ເຖໂຣ ຫິ ກາເລນ ກາລໍ ພ຺ຣຫ຺ມໂລກໍ ຄຈ຺ຉຕິເຍວ. ຕຕ຺ຖ ປຣິຍາຍມກາສີຕິ ວາຣໍ ອກາສິ. ຍທິທໍ ອິຘາຄມນາຍາຕິ ໂຍ ອຍໍ ອິຘາຄມນາຍ ວາໂຣ, ຕໍ ຈິຣສ຺ສໍ ອກາສີຕິ ວຸຕ຺ຕໍ ໂຫຕິ. ອິທມາສນໍ ປຎ຺ຎຕ຺ຕນ຺ຕິ ມຫາຣຫໍ ພ຺ຣຫ຺ມປລ຺ລງ຺ກໍ ປຎ຺ຎາເປຕ຺ວາ ເອວມາຫ. ອເວຈ຺ຈປ຺ປສາເທນາຕິ ອຘິຄເຕນ ອຈເລນ ມຄ຺ຄປ຺ປສາເທນ. ອິມສ຺ມິໍ ສຸຕ຺ເຕ ໂສຕາປຕ຺ຕິມຄ຺ຄຎາຓໍ ກຖິຕໍ.

໕. ວິຊ຺ຊາຠາຄິຍສຸຕ຺ຕວຓ຺ຓນາ

໓໕. ປຎ຺ຈເມ ວິຊ຺ຊາຠາຄິຍາຕິ ວິຊ຺ຊາໂກຏ຺ຐາສິກາ. ອນິຈ຺ຈສຎ຺ຎາຕິ ອນິຈ຺ຈານຸປສ຺ສນາຎາເຓ ອຸປ຺ປນ຺ນສຎ຺ຎາ. ອນິຈ຺ເຈ ທຸກ຺ຂສຎ຺ຎາຕິ ທຸກ຺ຂານຸປສ຺ສນາຎາເຓ ອຸປ຺ປນ຺ນສຎ຺ຎາ. ທຸກ຺ເຂ ອນຕ຺ຕສຎ຺ຎາຕິ ອນຕ຺ຕານຸປສ຺ສນາຎາເຓ ອຸປ຺ປນ຺ນສຎ຺ຎາ. ປຫານສຎ຺ຎາຕິ ປຫານານຸປສ຺ສນາຎາເຓ ອຸປ຺ປນ຺ນສຎ຺ຎາ. ວິຣາຄສຎ຺ຎາຕິ ວິຣາຄານຸປສ຺ສນາຎາເຓ ອຸປ຺ປນ຺ນສຎ຺ຎາ. ນິໂຣຘສຎ຺ຎາຕິ ນິໂຣຘານຸປສ຺ສນາຎາເຓ ອຸປ຺ປນ຺ນສຎ຺ຎາ.

໖. ວິວາທມູລສຸຕ຺ຕວຓ຺ຓນາ

໓໖. ຉຏ຺ເຐ ວິວາທມູລານີຕິ ວິວາທສ຺ສ ມູລານິ. ໂກຘໂນຕິ ກຸຊ຺ຌນລກ຺ຂເຓນ ໂກເຘນ ສມນ຺ນາຄໂຕ. ອຸປນາຫີຕິ ເວຣອປ຺ປຏິນິສ຺ສຄ຺ຄລກ຺ຂເຓນ ອຸປນາເຫນ ສມນ຺ນາຄໂຕ. ອຫິຕາຍ ທຸກ຺ຂາຍ ເທວມນຸສ຺ສານນ຺ຕິ ທ຺ວິນ຺ນໍ ຠິກ຺ຂູນໍ ວິວາໂທ ກຖໍ ເທວມນຸສ຺ສານໍ ອຫິຕາຍ ທຸກ຺ຂາຍ ສໍວຕ຺ຕຕິ? ໂກສມ຺ພກກ຺ຂນ຺ຘເກ ວິຍ ທ຺ວີສຸ ຠິກ຺ຂູສຸ ວິວາທໍ ອາປນ຺ເນສຸ ຕສ຺ມິໍ ວິຫາເຣ ເຕສໍ ອນ຺ເຕວາສິກາ ວິວທນ຺ຕິ, ເຕສໍ ໂອວາທໍ ຄຓ຺ຫນ຺ໂຕ ຠິກ຺ຂຸນິສງ຺ໂຆ ວິວທຕິ. ຕໂຕ ເຕສໍ ອຸປຏ຺ຐາກາ ວິວທນ຺ຕິ, ອຖ ມນຸສ຺ສານໍ ອາຣກ຺ຂເທວຕາ ທ຺ເວ ໂກຏ຺ຐາສາ ໂຫນ຺ຕິ. ຕຖາ ຘມ຺ມວາທີນໍ ອາຣກ຺ຂເທວຕາ ຘມ຺ມວາທິນິໂຍ ໂຫນ຺ຕິ, ອຘມ຺ມວາທີນໍ ອຘມ຺ມວາທິນິໂຍ. ຕໂຕ ອາຣກ຺ຂເທວຕານໍ ມິຕ຺ຕາ ຠຸມ຺ມເທວຕາ ຠິຊ຺ຊນ຺ຕິ. ເອວໍ ປຣມ຺ປຣາຍ ຍາວ ພ຺ຣຫ຺ມໂລກາ ຐເປຕ຺ວາ ອຣິຍສາວເກ ສພ຺ເພ ເທວມນຸສ຺ສາ ທ຺ເວ ໂກຏ຺ຐາສາ ໂຫນ຺ຕິ. ຘມ຺ມວາທີຫິ ປນ ອຘມ຺ມວາທິໂນວ ພຫຸຕຣາ ໂຫນ຺ຕິ. ຕໂຕ ຍໍ ພຫຸເກຫິ ຄຫິຕໍ, ຕໍ ຄຈ຺ຉນ຺ຕິ. ຘມ຺ມໍ ວິສ຺ສຊ຺ເຊຕ຺ວາ ພຫຸຕຣາວ ອຘມ຺ມໍ ຄຓ຺ຫນ຺ຕິ. ເຕ ອຘມ຺ມໍ ປຸຣກ຺ຂຕ຺ວາ ວິຫຣນ຺ຕາ ອປາເຍ ນິພ຺ພຕ຺ຕນ຺ຕິ. ເອວໍ ທ຺ວິນ຺ນໍ ຠິກ຺ຂູນໍ ວິວາໂທ ເທວມນຸສ຺ສານໍ ອຫິຕາຍ ທຸກ຺ຂາຍ ໂຫຕິ. ອຊ຺ຌຕ຺ຕໍ ວາຕິ ຕຸມ຺ຫາກໍ ອພ຺ຠນ຺ຕຣປຣິສາຍ. ພຫິທ຺ຘາຕິ ປເຣສໍ ປຣິສາຍ.

ມກ຺ຂີຕິ ປເຣສໍ ຄຸຓມກ຺ຂນລກ຺ຂເຓນ ມກ຺ເຂນ ສມນ຺ນາຄໂຕ. ປຬາສີຕິ ຍຸຄຄ຺ຄາຫລກ຺ຂເຓນ ປຬາເສນ ສມນ຺ນາຄໂຕ. ອິສ຺ສຸກີຕິ ປຣສ຺ສ ສກ຺ກາຣາທີນິ ອິສ຺ສາຍນລກ຺ຂຓາຍ ອິສ຺ສາຍ ສມນ຺ນາຄໂຕ. ມຈ຺ຉຣີຕິ ອາວາສມຈ຺ຉຣິຍາທີຫິ ສມນ຺ນາຄໂຕ. ສໂຐຕິ ເກຣາຏິໂກ. ມາຍາວີຕິ ກຕປຏິຈ຺ຉາທໂກ. ປາປິຈ຺ໂຉຕິ ອສນ຺ຕສມ຺ຠາວນິຈ຺ຉໂກ ທຸສ຺ສີໂລ. ມິຈ຺ຉາທິຏ຺ຐີຕິ ນຕ຺ຖິກວາທີ, ອເຫຕຸວາທີ, ອກິຣິຍວາທີ. ສນ຺ທິຏ຺ຐິປຣາມາສີຕິ ສຍໍ ທິຏ຺ຐເມວ ປຣາມສຕິ. ອາຘານຄ຺ຄາຫີຕິ ທຬ຺ຫຄ຺ຄາຫີ. ທຸປ຺ປຏິນິສ຺ສຄ຺ຄີຕິ ນ ສກ຺ກາ ໂຫຕິ ຄຫິຕໍ ວິສ຺ສຊ຺ຊາເປຕຸໍ. ອິມສ຺ມິໍ ສຸຕ຺ເຕ ວຏ຺ຏເມວ ກຖິຕໍ.

໗. ທານສຸຕ຺ຕວຓ຺ຓນາ

໓໗. ສຕ຺ຕເມ ເວຬຸກຓ຺ຑກີຕິ ເວຬຸກຓ຺ຑກນຄຣວາສິນີ. ຉຬງ຺ຄສມນ຺ນາຄຕນ຺ຕິ ຉຫິ ຄຸຓງ຺ເຄຫິ ສມນ຺ນາຄຕໍ. ທກ຺ຂິຓໍ ປຕິຏ຺ຐາເປຕີຕິ ທານໍ ເທຕິ. ປຸພ຺ເພວ ທານາ ສຸມໂນຕິ ທານໍ ທສ຺ສາມີຕິ ມາສຑ຺ຒມາສໂຕ ປຏ຺ຐາຍ ໂສມນສ຺ສປ຺ປຕ຺ໂຕ ໂຫຕິ. ເອຕ຺ຖ ຫິ ປຸພ຺ເພເຈຕນາ ທສ຺ສາມີຕິ ຈິຕ຺ຕຸປ຺ປາທກາລໂຕ ປຏ຺ຐາຍ ‘‘ອິໂຕ ອຸຏ຺ຐິເຕນ ທານໍ ທສ຺ສາມີ’’ຕິ ເຂຕ຺ຕຄ຺ຄຫຓໍ ອາທິໍ ກຕ຺ວາ ຈິນ຺ເຕນ຺ຕສ຺ສ ລພ຺ຠຕິ. ທທໍ ຈິຕ຺ຕໍ ປສາເທຕີຕິ ເອວໍ ວຸຕ຺ຕາ ມຸຎ຺ຈເຈຕນາ ປນ ທານກາເລເຍວ ລພ຺ຠຕິ. ທຕ຺ວາ ອຕ຺ຕມໂນ ໂຫຕີຕິ ອຍໍ ປນ ອປຣເຈຕນາ ອປຣາປຣໍ ອນຸສ຺ສຣນ຺ຕສ຺ສ ລພ຺ຠຕິ. ວີຕຣາຄາຕິ ວິຄຕຣາຄາ ຂີຓາສວາ. ຣາຄວິນຍາຍ ວາ ປຏິປນ຺ນາຕິ ຣາຄວິນຍປຏິປທໍ ປຏິປນ຺ນາ. ອຸກ຺ກຏ຺ຐເທສນາ ເຈສາ, ນ ເກວລໍ ປນ ຂີຓາສວານໍ, ອນາຄາມິ-ສກທາຄາມິ-ໂສຕາປນ຺ນານມ຺ປິ ອນ຺ຕມໂສ ຕທຫຸປພ຺ພຊິຕສ຺ສ ຠຓ຺ຑຄາຫກສາມເຓຣສ຺ສາປິ ທິນ຺ນາ ທກ຺ຂິຓາ ຉຬງ຺ຄສມນ຺ນາຄຕາວ ໂຫຕິ. ໂສປິ ຫິ ໂສຕາປຕ຺ຕິມຄ຺ຄຕ຺ຖເມວ ປພ຺ພຊິໂຕ.

ຍຎ຺ຎສ຺ສ ສມ຺ປທາຕິ ທານສ຺ສ ປຣິປຸຓ຺ຓຕາ. ສຎ຺ຎຕາຕິ ສີລສຎ຺ຎເມນ ສຎ຺ຎຕາ. ສຍໍ ອາຈມຍິຕ຺ວານາຕິ ອຕ຺ຕນາວ ຫຕ຺ຖປາເທ ໂຘວິຕ຺ວາ ມຸຂໍ ວິກ຺ຂາເລຕ຺ວາ. ສເກຫິ ປາຓິຠີຕິ ອຕ຺ຕໂນ ຫຕ຺ເຖຫິ. ສເຍຫີຕິປິ ປາໂຐ. ສທ຺ໂຘຕິ ຣຕນຕ຺ຕຍຄຸເຓ ສທ຺ທຫນ຺ໂຕ. ມຸຕ຺ເຕນ ເຈຕສາຕິ ລາຠມຈ຺ຉຣິຍາທີຫິ ວິມຸຕ຺ເຕນ ຈິຕ຺ເຕນ. ອພ຺ຍາປຊ຺ຌໍ ສຸຂໍ ໂລກນ຺ຕິ ນິທ຺ທຸກ຺ຂໍ ອຸຬາຣສຸຂໂສມນສ຺ສໍ ເທວໂລກໍ.

໘. ອຕ຺ຕກາຣີສຸຕ຺ຕວຓ຺ຓນາ

໓໘. ອຏ຺ຐເມ ອທ຺ທສໍ ວາ ອສ຺ໂສສິໍ ວາຕິ ອກ຺ຂີນິ ອຸມ຺ມີເລຕ຺ວາ ມາ ອທ຺ທສໍ, ອສຸກສ຺ມິໍ ນາມ ຐາເນ ວສຕີຕິ ມາ ອສ຺ໂສສິໍ, ກເຖນ຺ຕສ຺ສ ວາ ວຈນໍ ມາ ອສ຺ໂສສິໍ. ກຖຎ຺ຫິ ນາມາຕິ ເກນ ນາມ ກາຣເຓນ. ອາຣມ຺ຠຘາຕູຕິ ອາຣຠນວເສນ ປວຕ຺ຕວີຣິຍໍ. ນິກ຺ກມຘາຕູຕິ ໂກສຊ຺ຊໂຕ ນິກ຺ຂມນສຠາວໍ ວີຣິຍໍ. ປຣກ຺ກມຘາຕູຕິ ປຣກ຺ກມສຠາໂວ. ຖາມຘາຕູຕິ ຖາມສຠາໂວ. ຐິຕິຘາຕູຕິ ຐິຕິສຠາໂວ. ອຸປກ຺ກມຘາຕູຕິ ອຸປກ຺ກມສຠາໂວ. ສພ຺ພໍ ເຈຕໍ ເຕນ ເຕນາກາເຣນ ປວຕ຺ຕສ຺ສ ວີຣິຍສ຺ເສວ ນາມໍ.

໙-໑໐. ນິທານສຸຕ຺ຕາທິວຓ຺ຓນາ

໓໙-໔໐. ນວເມ ກມ຺ມານນ຺ຕິ ວຏ຺ຏຄາມິກມ຺ມານໍ. ສມຸທຍາຍາຕິ ປິຓ຺ຑກຣຓຕ຺ຖາຍ. ນິທານນ຺ຕິ ປຈ຺ຈໂຍ. ໂລຠເຊນາຕິ ໂລຠໂຕ ຊາເຕນ. ນ ປຎ຺ຎາຍນ຺ຕີຕິ ‘‘ເອວຣູເປນ ກມ຺ເມນ ນິພ຺ພຕ຺ຕາ’’ຕິ ນ ທິສ຺ສນ຺ຕິ. ສຸກ຺ກປກ຺ເຂ ກມ຺ມານນ຺ຕິ ວິວຏ຺ຏຄາມິກມ຺ມານໍ. ອິຕິ ອິມສ຺ມິໍ ສຸຕ຺ເຕ ວຏ຺ຏວິວຏ຺ຏໍ ກຖິຕໍ. ທສເມ ນິຈຸລວເນຕິ ມຫາມຸຈລິນ຺ທວເນ. ສທ຺ຘມ຺ໂມຕິ ສາສນສທ຺ຘມ຺ໂມ.

໑໑. ທາຣຸກ຺ຂນ຺ຘສຸຕ຺ຕວຓ຺ຓນາ

໔໑. ເອກາທສເມ ເຈໂຕວສິປ຺ປຕ຺ໂຕຕິ ຈິຕ຺ຕວສິຠາວໍ ປຕ຺ໂຕ. ປຖວີຕ຺ເວວ ອຘິມຸຈ຺ເຈຍ຺ຍາຕິ ຖທ຺ຘາກາຣໍ ປຖວີຘາຕູຕິ ສລ຺ລກ຺ເຂຍ຺ຍ. ຍໍ ນິສ຺ສາຍາຕິ ຍໍ ວິຊ຺ຊມານໍ ຖທ຺ຘາກາຣໍ ປຖວີຘາຕຸໍ ນິສ຺ສາຍ ອມຸໍ ທາຣຸກ຺ຂນ຺ຘໍ ປຖວີຕ຺ເວວ ອຘິມຸຈ຺ເຈຍ຺ຍ, ສາ ເອຕ຺ຖ ປຖວີຘາຕຸ ອຕ຺ຖີຕິ. ອິມິນາ ນເຍນ ເສສປທານິປິ ເວທິຕພ຺ພານິ. ຍເຖວ ຫິ ຕສ຺ມິໍ ຖທ຺ຘາກາຣາ ປຖວີຘາຕຸ ອຕ຺ຖິ, ເອວໍ ຍູສາກາຣາ ອາໂປຘາຕຸ, ອຸຓ຺ຫາກາຣາ ເຕໂຊຘາຕຸ, ວິຕ຺ຖມ຺ຠນາກາຣາ ວາໂຍຘາຕຸ, ຣຕ຺ຕວຓ຺ຓມ຺ຫິ ສາເຣ ປທຸມປຸປ຺ຜວຓ຺ຓາ ສຸຠຘາຕຸ, ປູຕິຠູເຕ ຈຸຓ຺ເຓ ເຈວ ເຜຄ຺ຄຸປປຏິກາສຸ ຈ ອມນຸຎ຺ຎວຓ຺ຓາ ອສຸຠຘາຕຸ, ຕໍ ນິສ຺ສາຍ ອມຸໍ ທາຣຸກ຺ຂນ຺ຘໍ ອສຸຠນ຺ຕ຺ເວວ ອຘິມຸຈ຺ເຈຍ຺ຍ ສລ຺ລກ຺ເຂຍ຺ຍາຕິ. ອິມສ຺ມິໍ ສຸຕ຺ເຕ ມິສ຺ສກວິຫາໂຣ ນາມ ກຖິໂຕ.

໑໒. ນາຄິຕສຸຕ຺ຕວຓ຺ຓນາ

໔໒. ທ຺ວາທສເມ ຄາມນ຺ຕວິຫາຣິນ຺ຕິ ຄາມນ຺ຕເສນາສນວາສິໍ. ສມາຫິຕໍ ນິສິນ຺ນນ຺ຕິ ຕສ຺ມິໍ ຄາມນ຺ຕເສນາສເນ ສມາຘິໍ ອປ຺ເປຕ຺ວາ ນິສິນ຺ນໍ. ອິທານິມນ຺ຕິ ອິທານິ ອິມໍ. ສມາຘິມ຺ຫາ ຈາເວສ຺ສຕີຕິ ສມາຘິໂຕ ອຸຏ຺ຐາເປສ຺ສຕິ. ນ ອຕ຺ຕມໂນ ໂຫມີຕິ ນ ສກມໂນ ໂຫມິ. ປຈລາຍມານນ຺ຕິ ນິທ຺ທາຍມານໍ. ເອກຕ຺ຕນ຺ຕິ ເອກສຠາວໍ, ເອກຄ຺ຄຕາຠູຕໍ ອຣຎ຺ຎສຎ຺ຎໍເຍວ ຈິຕ຺ເຕ ກຣິສ຺ສຕີຕິ ອຕ຺ໂຖ. ອນຸຣກ຺ຂິສ຺ສຕີຕິ ອນຸຄ຺ຄຓ຺ຫິສ຺ສຕິ. ອວິມຸຕ຺ຕໍ ວາ ຈິຕ຺ຕໍ ວິໂມເຈສ຺ສຕີຕິ ອຎ຺ຎສ຺ມິໍ ກາເລ ອວິມຸຕ຺ຕໍ ຈິຕ຺ຕໍ ອິທານິ ປຎ຺ຈຫິ ວິມຸຕ຺ຕີຫິ ວິໂມຈຍິສ຺ສຕິ. ຣິຎ຺ຈຕີຕິ ວຊ຺ເຊຕິ ວິສ຺ສຊ຺ເຊຕິ. ປຏິປຓາເມຕ຺ວາຕິ ປນຸທິຕ຺ວາ ວິສ຺ສຊ຺ເຊຕ຺ວາ. ອຸຈ຺ຈາຣປສ຺ສາວກມ຺ມາຍາຕິ ອຸຈ຺ຈາຣປສ຺ສາວກຣຓຕ຺ຖາຍ. ອິມິນາ ເອຕ຺ຕເກນ ຐາເນນ ສຕ຺ຖາຣາ ອຣຎ຺ຎເສນາສນສ຺ສ ວຓ຺ໂຓ ກຖິໂຕ. ສຸຕ຺ຕສ຺ສ ປນ ປຐມໂກຏ຺ຐາເສ ຍໍ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕເມວາຕິ.

ເທວຕາວຄ຺ໂຄ ຈຕຸຕ຺ໂຖ.

໕. ຘມ຺ມິກວຄ຺ໂຄ

໑. ນາຄສຸຕ຺ຕວຓ຺ຓນາ

໔໓. ປຎ຺ຈມສ຺ສ ປຐເມ ອາຍສ຺ມຕາ ອານນ຺ເທນ ສທ຺ຘິນ຺ຕິ ອິທໍ ‘‘ອາຍາມານນ຺ທາ’’ຕິ ເຖຣໍ ອາມນ຺ເຕຕ຺ວາ ຄຕຕ຺ຕາ ວຸຕ຺ຕໍ, ສຕ຺ຖາ ປນ ອນູເນຫິ ປຎ຺ຈຫິ ຠິກ຺ຂຸສເຕຫິ ປຣິວຸໂຕ ຕຕ຺ຖ ອຄມາສີຕິ ເວທິຕພ຺ໂພ. ເຕນຸປສງ຺ກມີຕິ ເຕເຫວ ປຎ຺ຈຫິ ຠິກ຺ຂຸສເຕຫິ ປຣິວຸໂຕ ອຸປສງ຺ກມິ. ປຣິສິຎ຺ຈິຕ຺ວາຕິ ໂວຫາຣວຈນເມຕໍ, ນ຺ຫາຍິຕ຺ວາຕິ ອຕ຺ໂຖ. ປຸພ຺ພາປຍມາໂນຕິ ຣຕ຺ຕທຸປຏ຺ຏໍ ນິວາເສຕ຺ວາ ອຸຕ຺ຕຣາສງ຺ຄຈີວຣໍ ທ຺ວີຫິ ຫຕ຺ເຖຫິ ຄເຫຕ຺ວາ ປຈ຺ຉິມໂລກຘາຕຸໍ ປິຏ຺ຐິໂຕ ກຕ຺ວາ ປຸຣຕ຺ຖິມໂລກຘາຕຸໍ ອຠິມຸໂຂ ໂວທກຠາເວນ ຄຕ຺ຕານິ ປຸພ຺ພສທິສານິ ກຸຣຸມາໂນ ອຏ຺ຐາສີຕິ ອຕ຺ໂຖ. ຠິກ຺ຂຸສງ຺ໂຆປິ ເຕນ ເຕນ ຐາເນນ ໂອຕຣິຕ຺ວາ ນ຺ຫຕ຺ວາ ປຈ຺ຈຸຕ຺ຕຣິຕ຺ວາ ສຕ຺ຖາຣໍເຍວ ປຣິວາເຣຕ຺ວາ ອຏ຺ຐາສິ. ອິຕິ ຕສ຺ມິໍ ສມເຍ ອາກາສໂຕ ປຕມານໍ ຣຕ຺ຕສຸວຓ຺ຓກຸຓ຺ຑລໍ ວິຍ ສູຣິໂຍ ປຈ຺ຉິມໂລກຘາຕຸໍ ປຏິປຊ຺ຊິ, ປຣິສຸທ຺ຘຣຊຕມຓ຺ຑໂລ ວິຍ ປາຈີນໂລກຘາຕຸໂຕ ຈນ຺ໂທ ອພ຺ຠຸຄ຺ຄຎ຺ຉິ, ມຊ຺ຌຏ຺ຐາເນປິ ປຎ຺ຈຠິກ຺ຂຸສຕປຣິວາໂຣ ສມ຺ມາສມ຺ພຸທ຺ໂຘ ຉພ຺ພຓ຺ຓພຸທ຺ຘຣສ຺ມິໂຍ ວິສ຺ສຊ຺ເຊຕ຺ວາ ປຸພ຺ພໂກຏ຺ຐກນທີຕີເຣ ໂລກໍ ອລງ຺ກຸຣຸມາໂນ ອຏ຺ຐາສິ.

ເຕນ ໂຂ ປນ ສມເຍນ…ເປ… ເສໂຕ ນາມ ນາໂຄຕິ ເສຕວຓ຺ຓຕາຍ ເອວໍ ລທ຺ຘນາໂມ ຫຕ຺ຖິນາໂຄ. ມຫາຕູຣິຍຕາຬິຕວາທິເຕນາຕິ ມຫນ຺ເຕນ ຕູຣິຍຕາຬິຕວາທິເຕນ. ຕຕ຺ຖ ປຐມໍ ສງ຺ຆຏ຺ຏນໍ ຕາຬິຕໍ ນາມ ໂຫຕິ, ຕໂຕ ປຣໍ ວາທິຕໍ. ຊໂນຕິ ຫຕ຺ຖິທສ຺ສນຕ຺ຖໍ ສນ຺ນິປຕິຕມຫາຊໂນ. ທິສ຺ວາ ເອວມາຫາຕິ ອງ຺ຄປຈ຺ຈງ຺ຄານິ ຆໍສິຕ຺ວາ ນ຺ຫາເປຕ຺ວາ ອຸຕ຺ຕາເຣຕ຺ວາ ພຫິຕີເຣ ຐເປຕ຺ວາ ຄຕ຺ຕານິ ໂວທການິ ກຕ຺ວາ ຫຕ຺ຖາລງ຺ກາເຣນ ອລງ຺ກຕໍ ຕໍ ມຫານາຄໍ ທິສ຺ວາ ອິທໍ ‘‘ອຠິຣູໂປ ວຕ, ໂຠ’’ຕິ ປສໍສາວຈນມາຫ. ກາຍຸປປນ຺ໂນຕິ ສຣີຣສມ຺ປຕ຺ຕິຍາ ອຸປປນ຺ໂນ, ປຣິປຸຓ຺ຓງ຺ຄປຈ຺ຈງ຺ໂຄຕິ ອຕ຺ໂຖ. ອາຍສ຺ມາ ອຸທາຍີຕິ ປຏິສມ຺ຠິທາປ຺ປຕ຺ໂຕ ກາຬຸທາຍິຕ຺ເຖໂຣ. ເອຕທໂວຈາຕິ ຕໍ ມຫາຊນໍ ຫຕ຺ຖິສ຺ສ ວຓ຺ຓໍ ຠຓນ຺ຕໍ ທິສ຺ວາ ‘‘ອຍໍ ຊໂນ ອເຫຕຸກປຏິສນ຺ຘິຍໍ ນິພ຺ພຕ຺ຕຫຕ຺ຖິໂນ ວຓ຺ຓໍ ກເຖຕິ, ນ ພຸທ຺ຘຫຕ຺ຖິສ຺ສ. ອຫໍ ທານິ ອິມິນາ ຫຕ຺ຖິນາເຄນ ອຸປມໍ ກຕ຺ວາ ພຸທ຺ຘນາຄສ຺ສ ວຓ຺ຓໍ ກເຖສ຺ສາມີ’’ຕິ ຈິນ຺ເຕຕ຺ວາ ເອຕໍ ‘‘ຫຕ຺ຖິເມວ ນຸ ໂຂ, ຠນ຺ເຕ’’ຕິອາທິວຈນໍ ອໂວຈ. ຕຕ຺ຖ ມຫນ຺ຕນ຺ຕິ ອາໂຣຫສມ຺ປນ຺ນໍ. ພ຺ຣຫນ຺ຕນ຺ຕິ ປຣິຓາຫສມ຺ປນ຺ນໍ. ເອວມາຫາຕິ ເອວໍ ວທຕິ. ອຖ ຠຄວາ ຍສ຺ມາ ອຍໍ ນາຄສທ຺ໂທ ຫຕ຺ຖິມ຺ຫິເຈວ ອສ຺ສໂຄຓອຸຣຄຣຸກ຺ຂມນຸສ຺ເສສຸ ຈາປິ ປວຕ຺ຕຕິ, ຕສ຺ມາ ຫຕ຺ຖິມ຺ປິ ໂຂຕິອາທິມາຫ.

ອາຄຸນ຺ຕິ ປາປກໍ ລາມກໍ ອກຸສລຘມ຺ມໍ. ຕມຫໍ ນາໂຄຕິ ພ຺ຣູມີຕິ ຕໍ ອຫໍ ອິເມຫິ ຕີຫິ ທ຺ວາເຣຫິ ທສນ຺ນໍ ອກຸສລກມ຺ມປຖານໍ ທ຺ວາທສນ຺ນຎ຺ຈ ອກຸສລຈິຕ຺ຕານໍ ອກຣຓໂຕ ນາໂຄຕິ ວທາມິ. ອຍຎ຺ຫິ ນ ອາຄຸໍ ກໂຣຕີຕິ ອິມິນາ ອຕ຺ເຖນ ນາໂຄ. ອິມາຫິ ຄາຖາຫິ ອນຸໂມທາມີຕິ ອິມາຫິ ຈຕຸສຏ຺ຐິປທາຫິ ໂສຬສຫິ ຄາຖາຫິ ອນຸໂມທາມິ ອຠິນນ຺ທາມິ.

ມນຸສ຺ສຠູຕນ຺ຕິ ເທວາທິຠາວໍ ອນຸປຄນ຺ຕ຺ວາ ມນຸສ຺ສເມວ ຠູຕໍ. ອຕ຺ຕທນ຺ຕນ຺ຕິ ອຕ຺ຕນາເຍວ ທນ຺ຕໍ, ນ ອຎ຺ເຎຫິ ທມຖໍ ອຸປນີຕໍ. ຠຄວາ ຫິ ອຕ຺ຕນາ ອຸປ຺ປາທິເຕເນວ ມຄ຺ຄທມເຖນ ຈກ຺ຂຸໂຕປິ ທນ຺ໂຕ, ໂສຕໂຕປິ, ຆານໂຕປິ, ຊິວ຺ຫາໂຕປິ, ກາຍໂຕປິ, ມນໂຕປີຕິ ອິເມສຸ ຉສຸ ຐາເນສຸ ທນ຺ໂຕ ສນ຺ໂຕ ນິພ຺ພຸໂຕ ປຣິນິພ຺ພຸໂຕ. ເຕນາຫ – ‘‘ອຕ຺ຕທນ຺ຕ’’ນ຺ຕິ. ສມາຫິຕນ຺ຕິ ທຸວິເຘນາປິ ສມາຘິນາ ສມາຫິຕໍ. ອິຣິຍມານນ຺ຕິ ວິຫຣມານໍ. ພ຺ຣຫ຺ມປເຖຕິ ເສຏ຺ຐປເຖ, ອມຕປເຖ, ນິພ຺ພານປເຖ. ຈິຕ຺ຕສ຺ສູປສເມ ຣຕນ຺ຕິ ປຐມຊ຺ຌາເນນ ປຎ຺ຈ ນີວຣຓານິ ວູປສເມຕ຺ວາ, ທຸຕິຍຊ຺ຌາເນນ ວິຕກ຺ກວິຈາເຣ, ຕຕິຍຊ຺ຌາເນນ ປີຕິໍ, ຈຕຸຕ຺ຖຊ຺ຌາເນນ ສຸຂທຸກ຺ຂໍ ວູປສເມຕ຺ວາ ຕສ຺ມິໍ ຈິຕ຺ຕສ຺ສູປສເມ ຣຕໍ ອຠິຣຕໍ.

ນມສ຺ສນ຺ຕີຕິ ກາເຍນ ນມສ຺ສນ຺ຕິ, ວາຈາຍ ນມສ຺ສນ຺ຕິ, ມນສາ ນມສ຺ສນ຺ຕິ, ຘມ຺ມານຸຘມ຺ມປຏິປຕ຺ຕິຍາ ນມສ຺ສນ຺ຕິ, ສກ຺ກໂຣນ຺ຕິ ຄຣຸໍ ກໂຣນ຺ຕິ. ສພ຺ພຘມ຺ມານປາຣຄຸນ຺ຕິ ສພ຺ເພສໍ ຂນ຺ຘາຍຕນຘາຕຸຘມ຺ມານໍ ອຠິຎ຺ຎາປາຣຄູ, ປຣິຎ຺ຎາປາຣຄູ, ປຫານປາຣຄູ, ຠາວນາປາຣຄູ, ສຈ຺ຉິກິຣິຍາປາຣຄູ, ສມາປຕ຺ຕິປາຣຄູຕິ ຉພ຺ພິເຘນ ປາຣຄມເນນ ປາຣຄຕໍ ປາຣປ຺ປຕ຺ຕໍ ມຕ຺ຖກປ຺ປຕ຺ຕໍ. ເທວາປິ ຕໍ ນມສ຺ສນ຺ຕີຕິ ທຸກ຺ຂປ຺ປຕ຺ຕາ ສຸພ຺ຣຫ຺ມເທວປຸຕ຺ຕາທໂຍ ສຸຂປ຺ປຕ຺ຕາ ຈ ສພ຺ເພວ ທສສຫສ຺ສຈກ຺ກວາຬວາສິໂນ ເທວາປິ ຕຸມ຺ເຫ ນມສ຺ສນ຺ຕິ. ອິຕິ ເມ ອຣຫໂຕ ສຸຕນ຺ຕິ ອິຕິ ມຍາ ຈຕູຫິ ກາຣເຓຫິ ອຣຫາຕິ ລທ຺ຘໂວຫາຣານໍ ຕຸມ຺ຫາກໍເຍວ ສນ຺ຕິເກ ສຸຕນ຺ຕິ ທີເປຕິ.

ສພ຺ພສໍໂຍຊນາຕີຕນ຺ຕິ ສພ຺ພານິ ທສວິຘສໍໂຍຊນານິ ອຕິກ຺ກນ຺ຕໍ. ວນາ ນິພ຺ພນມາຄຕນ຺ຕິ ກິເລສວນໂຕ ນິພ຺ພນໍ ກິເລສວນຣຫິຕໍ ນິພ຺ພານໍ ອາຄຕໍ ສມ຺ປຕ຺ຕໍ. ກາເມຫິ ເນກ຺ຂມ຺ມຣຕນ຺ຕິ ທຸວິເຘຫິ ກາເມຫິ ນິກ຺ຂນ຺ຕຕ຺ຕາ ປພ຺ພຊ຺ຊາ ອຏ຺ຐ ສມາປຕ຺ຕິໂຍ ຈຕ຺ຕາໂຣ ຈ ອຣິຍມຄ຺ຄາ ກາເມຫິ ເນກ຺ຂມ຺ມໍ ນາມ, ຕຕ຺ຖ ຣຕໍ ອຠິຣຕໍ. ມຸຕ຺ຕໍ ເສລາວ ກຎ຺ຈນນ຺ຕິ ເສລຘາຕຸໂຕ ມຸຕ຺ຕໍ ກຎ຺ຈນສທິສໍ.

ສພ຺ເພ ອຈ຺ຈຣຸຈີຕິ ສພ຺ພສຕ຺ເຕ ອຕິກ຺ກມິຕ຺ວາ ປວຕ຺ຕຣຸຈິ. ອຏ຺ຐມກຎ຺ຫິ ອຕິກ຺ກມິຕ຺ວາ ປວຕ຺ຕຣຸຈິຕາຍ ໂສຕາປນ຺ໂນ ອຈ຺ຈຣຸຈິ ນາມ, ໂສຕາປນ຺ນໍ ອຕິກ຺ກມິຕ຺ວາ ປວຕ຺ຕຣຸຈິຕາຍ ສກທາຄາມີ…ເປ… ຂີຓາສວໍ ອຕິກ຺ກມິຕ຺ວາ ປວຕ຺ຕຣຸຈິຕາຍ ປຈ຺ເຈກສມ຺ພຸທ຺ໂຘ, ປຈ຺ເຈກສມ຺ພຸທ຺ຘໍ ອຕິກ຺ກມິຕ຺ວາ ປວຕ຺ຕຣຸຈິຕາຍ ສມ຺ມາສມ຺ພຸທ຺ໂຘ ອຈ຺ຈຣຸຈິ ນາມ. ຫິມວາວຎ຺ເຎ ສິລຸຈ຺ຈເຍຕິ ຍຖາ ຫິມວາ ປພ຺ພຕຣາຊາ ອຎ຺ເຎ ປພ຺ພເຕ ອຕິໂຣຈຕິ, ເອວໍ ອຕິໂຣຈຕີຕິ ອຕ຺ໂຖ. ສຈ຺ຈນາໂມຕິ ຕຈ຺ຉນາໂມ ຠູຕນາໂມ ອາຄຸໍ ອກຣເຓເນວ ນາໂຄຕິ ເອວໍ ອວິຕຖນາໂມ.

ໂສຣຈ຺ຈນ຺ຕິ ສຸຈິສີລໍ. ອວິຫິໍສາຕິ ກຣຸຓາ ຈ ກຣຸຓາປຸພ຺ພຠາໂຄ ຈ. ປາທາ ນາຄສ຺ສ ເຕ ທຸເວຕິ ເຕ ພຸທ຺ຘນາຄສ຺ສ ທຸເວ ປຸຣິມປາທາ.

ຕໂປຕິ ຘຸຕສມາທານໍ. ພ຺ຣຫ຺ມຈຣິຍນ຺ຕິ ອຣິຍມຄ຺ຄສີລໍ. ຈຣຓາ ນາຄສ຺ສ ຕ຺ຍາປເຣຕິ ເຕ ພຸທ຺ຘນາຄສ຺ສ ອປເຣ ທ຺ເວ ປຈ຺ຉິມປາທາ. ສທ຺ຘາຫຕ຺ໂຖຕິ ສທ຺ຘາມຍາຍ ໂສຓ຺ຑາຍ ສມນ຺ນາຄໂຕ. ອຸເປກ຺ຂາເສຕທນ຺ຕວາຕິ ຉຬງ຺ຄຸເປກ຺ຂາມເຍຫິ ເສຕທນ຺ເຕຫິ ສມນ຺ນາຄໂຕ.

ສຕິ ຄີວາຕິ ຍຖາ ນາຄສ຺ສ ອງ຺ຄປຈ຺ຈງ຺ຄສ຺ມິໍ ສິຣາຊາລານໍ ຄີວາ ປຕິຏ຺ຐາ, ເອວໍ ພຸທ຺ຘນາຄສ຺ສ ໂສຣຈ຺ຈາທີນໍ ຘມ຺ມານໍ ສຕິ. ເຕນ ວຸຕ຺ຕໍ – ‘‘ສຕິ ຄີວາ’’ຕິ. ສິໂຣ ປຎ຺ຎາຕິ ຍຖາ ຫຕ຺ຖິນາຄສ຺ສ ສິໂຣ ອຸຕ຺ຕມງ຺ໂຄ, ເອວໍ ພຸທ຺ຘນາຄສ຺ສ ສພ຺ພຎ຺ຎຸຕຎາຓໍ. ເຕນ ຫິ ໂສ ສພ຺ພຘມ຺ເມ ຊານາຕິ. ເຕນ ວຸຕ຺ຕໍ – ‘‘ສິໂຣ ປຎ຺ຎາ’’ຕິ. ວີມໍສາ ຘມ຺ມຈິນ຺ຕນາຕິ ຍຖາ ຫຕ຺ຖິນາຄສ຺ສ ອຄ຺ຄໂສຓ຺ໂຑ ວີມໍສາ ນາມ ໂຫຕິ. ໂສ ຕາຍ ຖທ຺ຘມຸທຸກໍ ຂາທິຕພ຺ພາຂາທິຕພ຺ພຎ຺ຈ ວີມໍສຕິ, ຕໂຕ ປຫາຕພ຺ພໍ ປຊຫຕິ, ອາທາຕພ຺ພໍ ອາທິຍຕິ, ເອວເມວ ພຸທ຺ຘນາຄສ຺ສ ຘມ຺ມໂກຏ຺ຐາສປຣິຈ຺ເຉທກຎາຓສງ຺ຂາຕາ ຘມ຺ມຈິນ຺ຕນາ ວີມໍສາ. ເຕນ ຫິ ຎາເຓນ ໂສ ຠພ຺ພາຠພ຺ເພ ຊານາຕິ. ເຕນ ວຸຕ຺ຕໍ – ‘‘ວີມໍສາ ຘມ຺ມຈິນ຺ຕນາ’’ຕິ. ຘມ຺ມກຸຈ຺ຉິສມາຕໂປຕິ ຘມ຺ໂມ ວຸຈ຺ຈຕິ ຈຕຸຕ຺ຖຊ຺ຌານສມາຘິ, ກຸຈ຺ຉິເຍວ ສມາຕໂປ ກຸຈ຺ຉິສມາຕໂປ. ສມາຕໂປ ນາມ ສມາຕປນຏ຺ຐານໍ. ຘມ຺ໂມ ກຸຈ຺ຉິສມາຕໂປ ອສ຺ສາຕິ ຘມ຺ມກຸຈ຺ຉິສມາຕໂປ. ຈຕຸຕ຺ຖຊ຺ຌານສມາຘິສ຺ມິໍ ຐິຕສ຺ສ ຫິ ເຕ ເຕ ອິທ຺ຘິວິຘາທິຘມ຺ມາ ອິຊ຺ຌນ຺ຕິ, ຕສ຺ມາ ໂສ ກຸຈ຺ຉິສມາຕໂປຕິ ວຸຕ຺ໂຕ. ວິເວໂກຕິ ກາຍຈິຕ຺ຕອຸປຘິວິເວໂກ. ຍຖາ ນາຄສ຺ສ ວາລຘິ ມກ຺ຂິກາ ວາເຣຕິ, ເອວໍ ຕຖາຄຕສ຺ສ ວິເວໂກ ຄຫຏ຺ຐປພ຺ພຊິເຕ ວາເຣຕິ. ຕສ຺ມາ ໂສ ວາລຘີຕິ ວຸຕ຺ໂຕ.

ຌາຍີຕິ ທຸວິເຘນ ຌາເນນ ຌາຍີ. ອສ຺ສາສຣໂຕຕິ ນາຄສ຺ສ ຫິ ອສ຺ສາສປສ຺ສາສາ ວິຍ ພຸທ຺ຘນາຄສ຺ສ ຜລສມາປຕ຺ຕິ, ຕຕ຺ຖ ຣໂຕ, ອສ຺ສາສປສ຺ສາເສຫິ ວິຍ ຕາຍ ວິນາ ນ ວຕ຺ຕຕີຕິ ອຕ຺ໂຖ. ສພ຺ພຕ຺ຖ ສໍວຸໂຕຕິ ສພ຺ພທ຺ວາເຣສຸ ສໍວຸໂຕ. ອນວຊ຺ຊານີຕິ ສມ຺ມາອາຊີເວນ ອຸປ຺ປນ຺ນໂຠຊນານິ. ສາວຊ຺ຊານີຕິ ປຎ຺ຈວິຘມິຈ຺ຉາຊີວວເສນ ອຸປ຺ປນ຺ນໂຠຊນານິ.

ອຓຸໍຖູລນ຺ຕິ ຂຸທ຺ທກຎ຺ຈ ມຫນ຺ຕຎ຺ຈ. ສພ຺ພໍ ເຉຕ຺ວານ ພນ຺ຘນນ຺ຕິ ສພ຺ພໍ ທສວິຘມ຺ປິ ສໍໂຍຊນໍ ຉິນ຺ທິຕ຺ວານ. ນຸປລິປ຺ປຕິ ໂລເກນາຕິ ໂລເກນ ສທ຺ຘິໍ ຕຓ຺ຫາມານທິຏ຺ຐິເລເປຫິ ນ ລິປ຺ປຕິ. ມຫາຄິນີຕິ ມຫາອຄ຺ຄິ. ວິຎ຺ຎູຫິ ເທສິຕາຕິ ອິຘ ປຏິສມ຺ຠິທາປ຺ປຕ຺ໂຕ ກາຬຸທາຍິຕ຺ເຖໂຣວ ວິຎ຺ຎູ ປຓ຺ຑິໂຕ, ເຕນ ເທສິຕາຕິ ອຕ຺ໂຖ. ວິຎ຺ຎສ຺ສນ຺ຕິ ມຫານາຄາ, ນາຄໍ ນາເຄນ ເທສິຕນ຺ຕິ ອຸທາຍິຕ຺ເຖຣນາເຄນ ເທສິຕໍ ພຸທ຺ຘນາຄໍ ອິຕເຣ ຂີຓາສວາ ນາຄາ ວິຊານິສ຺ສນ຺ຕິ.

ສຣີຣໍ ວິຊຫໍ ນາໂຄ, ປຣິນິພ຺ພິສ຺ສຕີຕິ ໂພຘິປລ຺ລງ຺ເກ ກິເລສປຣິນິພ຺ພາເນນ ປຣິນິພ຺ພຸໂຕ, ຍມກສາລນ຺ຕເຣ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພາຍິສ຺ສຕິ. ເອວໍ ປຏິສມ຺ຠິທາປ຺ປຕ຺ໂຕ ອຸທາຍິຕ຺ເຖໂຣ ໂສຬສຫິ ຄາຖາຫິ ຈຕຸສຏ຺ຐິຍາ ປເທຫິ ທສພລສ຺ສ ວຓ຺ຓໍ ກເຖນ຺ໂຕ ເທສນໍ ນິຏ຺ຐາເປສິ. ຠຄວາ ອນຸໂມທິ. ເທສນາວສາເນ ຈຕຸຣາສີຕິປາຓສຫສ຺ສານິ ອມຕປານໍ ປິວິໍສູຕິ.

໒. ມິຄສາລາສຸຕ຺ຕວຓ຺ຓນາ

໔໔. ທຸຕິເຍ ກຖໍ ກຖໍ ນາມາຕິ ເກນ ເກນ ກາຣເຓນ. ອຎ຺ເຎຍ຺ໂຍຕິ ອາຊານິຕພ຺ໂພ. ຍຕ຺ຣ ຫິ ນາມາຕິ ຍສ຺ມິໍ ນາມ ຘມ຺ເມ. ສມສມຄຕິກາຕິ ສມຠາເວເນວ ສມຄຕິກາ. ຠວິສ຺ສນ຺ຕີຕິ ຊາຕາ. ສກທາຄາມິປຕ຺ໂຕ ຕຸສິຕໍ ກາຍໍ ອຸປປນ຺ໂນຕິ ສກທາຄາມິປຸຄ຺ຄໂລ ຫຸຕ຺ວາ ຕຸສິຕຠວເນເຍວ ນິພ຺ພຕ຺ໂຕ. ກຖໍ ກຖໍ ນາມາຕິ ເກນ ເກນ ນຸ ໂຂ ກາຣເຓນ, ກິໍ ນຸ ໂຂ ຊານິຕ຺ວາ ເທສິໂຕ, ອຸທາຫຸ ອຊານິຕ຺ວາຕິ. ເຖໂຣ ກາຣຓໍ ອຊານນ຺ໂຕ ເອວໍ ໂຂ ປເນຕໍ ຠຄິນິ ຠຄວຕາ ພ຺ຍາກຕນ຺ຕິ ອາຫ.

ອມ຺ມກາ ອມ຺ມກປຎ຺ຎາຕິ ອິຕ຺ຖີ ຫຸຕ຺ວາ ອິຕ຺ຖິສຎ຺ຎາຍ ເອວ ສມນ຺ນາຄຕາ. ເກ ຈ ປຸຣິສປຸຄ຺ຄລປໂຣປຣິຍຎາເຓຕິ ເອຕ຺ຖ ປຸຣິສປຸຄ຺ຄລປໂຣປຣິຍຎາຓໍ ວຸຈ຺ຈຕິ ປຸຣິສປຸຄ຺ຄລານໍ ຕິກ຺ຂມຸທຸວເສນ ອິນ຺ທ຺ຣິຍປໂຣປຣິຍຎາຓໍ. ຕສ຺ມາ ກາ ຈ ພາລາ ມິຄສາລາ, ເກ ຈ ປຸຣິສປຸຄ຺ຄລານໍ ອິນ຺ທ຺ຣິຍປໂຣປຣິຍຎາເຓ ອປ຺ປຏິຫຕວິສຍາ ສມ຺ມາສມ຺ພຸທ຺ຘາ, ອຸຠຍເມຕໍ ທູເຣ ສຸວິທູເຣຕິ ອຍເມຕ຺ຖ ສງ຺ເຂໂປ.

ອິທານິ ມິຄສາລາຍ ອຕ຺ຕໂນ ທູຣຠາວໍ ທສ຺ເສນ຺ໂຕ ຉຍິເມ, ອານນ຺ທາຕິອາທິມາຫ. ໂສຣໂຕ ໂຫຕີຕິ ປາປໂຕ ສຸຏ຺ຐຸ ໂອຣໂຕ ວິຣໂຕ ໂຫຕິ. ສຸຣໂຕຕິປິ ປາໂຐ. ອຠິນນ຺ທນ຺ຕິ ສພ຺ຣຫ຺ມຈາຣີ ເອກຕ຺ຕວາເສນາຕິ ເຕນ ສທ຺ຘິໍ ເອກໂຕວາເສນ ສພ຺ຣຫ຺ມຈາຣີ ອຠິນນ຺ທນ຺ຕິ ຕຸສ຺ສນ຺ຕິ. ເອກນ຺ຕວາເສນາຕິປິ ປາໂຐ, ສຕຕວາເສນາຕິ ອຕ຺ໂຖ. ສວເນນປິ ອກຕໍ ໂຫຕີຕິ ໂສຕພ຺ພຍຸຕ຺ຕກໍ ອສຸຕໍ ໂຫຕິ. ພາຫຸສຈ຺ເຈນປິ ອກຕໍ ໂຫຕີຕິ ເອຕ຺ຖ ພາຫຸສຈ຺ຈໍ ວຸຈ຺ຈຕິ ວີຣິຍໍ, ວີຣິເຍນ ກຕ຺ຕພ຺ພຍຸຕ຺ຕກໍ ອກຕໍ ໂຫຕີຕິ ອຕ຺ໂຖ. ທິຏ຺ຐິຍາປິ ອປ຺ປຏິວິທ຺ຘໍ ໂຫຕີຕິ ທິຏ຺ຐິຍາ ປຏິວິຊ຺ຌິຕພ຺ພໍ ອປ຺ປຏິວິທ຺ຘໍ ໂຫຕິ. ສາມາຍິກມ຺ປິ ວິມຸຕ຺ຕິໍ ນ ລຠຕີຕິ ກາລານຸກາລໍ ຘມ຺ມສ຺ສວນໍ ນິສ຺ສາຍ ປີຕິປາໂມຊ຺ຊໍ ນ ລຠຕິ. ຫານຄາມີເຍວ ໂຫຕີຕິ ປຣິຫານິເມວ ຄຈ຺ຉຕິ.

ປມາຓິກາຕິ ປຸຄ຺ຄເລສຸ ປມາຓຄ຺ຄາຫກາ. ປມິນນ຺ຕີຕິ ປເມຕຸໍ ຕຸເລຕຸໍ ອາຣຠນ຺ຕິ. ເອໂກ ຫີໂນຕິ ເອໂກ ຄຸເຓຫິ ຫີໂນ. ເອໂກ ປຓີໂຕຕິ ເອໂກ ຄຸເຓຫິ ປຓີໂຕ. ຕໍ ຫີຕິ ຕໍ ປມາຓກຣຓໍ.

ອຠິກ຺ກນ຺ຕຕໂຣຕິ ສຸນ຺ທຣຕໂຣ. ປຓີຕຕໂຣຕິ ອຸຕ຺ຕມຕໂຣ. ຘມ຺ມໂສໂຕ ນິພ຺ພຫຕີຕິ ສູຣໍ ຫຸຕ຺ວາ ປວຕ຺ຕມານວິປສ຺ສນາຎາຓໍ ນິພ຺ພຫຕິ, ອຣິຍຠູມິໍ ສມ຺ປາເປຕິ. ຕທນ຺ຕຣໍ ໂກ ຊາເນຍ຺ຍາຕິ ຕໍ ອນ຺ຕຣໍ ຕໍ ກາຣຓໍ ອຎ຺ຎຕ຺ຣ ຕຖາຄເຕນ ໂກ ຊາເນຍ຺ຍາຕິ ອຕ຺ໂຖ.

ໂກຘມາໂນຕິ ໂກໂຘ ຈ ມາໂນ ຈ. ໂລຠຘມ຺ມາຕິ ໂລໂຠເຍວ. ວຈີສງ຺ຂາຣາຕິ ອາລາປສລ຺ລາປວເສນ ວຈນາເນວ. ໂຍ ວາ ປນສ຺ສ ມາທິໂສຕິ ໂຍ ວາ ປນ ອຎ຺ໂຎປິ ມຍາ ສທິໂສ ສມ຺ມາສມ຺ພຸທ຺ໂຘເຍວ ອສ຺ສ, ໂສ ປຸຄ຺ຄເລສຸ ປມາຓໍ ຄຓ຺ເຫຍ຺ຍາຕິ ອຕ຺ໂຖ. ຂຎ຺ຎຕີຕິ ຄຸຓຂຓນໍ ປາປຸຓາຕິ. ອິເມ ໂຂ, ອານນ຺ທ, ຉ ປຸຄ຺ຄລາຕິ ທ຺ເວ ໂສຣຕາ, ທ຺ເວ ອຘິຄຕໂກຘມານໂລຠຘມ຺ມາ, ທ຺ເວ ອຘິຄຕໂກຘມານວຈີສງ຺ຂາຣາຕິ ອິເມ ຉ ປຸຄ຺ຄລາ. ຄຕິນ຺ຕິ ຎາຓຄຕິໍ. ເອກງ຺ຄຫີນາຕິ ເອເກເກນ ຄຸຓງ຺ເຄນ ຫີນາ. ປູຣໂຓ ສີເລນ ວິເສສີ ອໂຫສິ, ອິສິທຕ຺ໂຕ ປຎ຺ຎາຍ. ປູຣຓສ຺ສ ສີລໍ ອິສິທຕ຺ຕສ຺ສ ປຎ຺ຎາຐາເນ ຐິຕໍ, ອິສິທຕ຺ຕສ຺ສ ປຎ຺ຎາ ປູຣຓສ຺ສ ສີລຏ຺ຐາເນ ຐິຕາຕິ.

໓. ອິຓສຸຕ຺ຕວຓ຺ຓນາ

໔໕. ຕຕິເຍ ທາລິທ຺ທິຍນ຺ຕິ ທລິທ຺ທຠາໂວ. ກາມໂຠຄິໂນຕິ ກາເມ ຠຸຎ຺ຊນກສຕ຺ຕສ຺ສ. ອສ຺ສໂກຕິ ອຕ຺ຕໂນ ສນ຺ຕເກນ ຣຫິໂຕ. ອນາຬ຺ຫິໂກຕິ ນ ອຑ຺ໂຒ. ອິຓໍ ອາທິຍຕີຕິ ຊີວິຕຸໍ ອສກ຺ໂກນ຺ໂຕ ອິຓໍ ອາທິຍຕິ. ວຑ຺ຒິໍ ປຏິສ຺ສຸຓາຕີຕິ ທາຕຸໍ ອສກ຺ໂກນ຺ໂຕ ວຑ຺ຒິໍ ທສ຺ສາມີຕິ ປຏິຊານາຕິ. ອນຸຈຣນ຺ຕິປິ ນນ຺ຕິ ປຣິສມຊ຺ຌຄຓມຊ຺ຌາທີສຸ ອາຕປຐປນປໍສຸໂອກິຣຓາທີຫິ ວິປ຺ປກາຣໍ ປາເປນ຺ໂຕ ປຈ຺ຉໂຕ ປຈ຺ຉໂຕ ອນຸພນ຺ຘນ຺ຕິ. ສທ຺ຘາ ນຕ຺ຖີຕິ ໂອກປ຺ປນກສທ຺ຘາມຕ຺ຕກມ຺ປິ ນຕ຺ຖິ. ຫິຣີ ນຕ຺ຖີຕິ ຫິຣີຍນາກາຣມຕ຺ຕກມ຺ປິ ນຕ຺ຖິ. ໂອຕ຺ຕປ຺ປໍ ນຕ຺ຖີຕິ ຠາຍນາກາຣມຕ຺ຕກມ຺ປິ ນຕ຺ຖິ. ວີຣິຍໍ ນຕ຺ຖີຕິ ກາຍິກວີຣິຍມຕ຺ຕກມ຺ປິ ນຕ຺ຖິ. ປຎ຺ຎາ ນຕ຺ຖີຕິ ກມ຺ມສ຺ສກຕປຎ຺ຎາມຕ຺ຕກມ຺ປິ ນຕ຺ຖິ. ອິຓາທານສ຺ມິໍ ວທາມີຕິ ອິຓຄ຺ຄຫຓໍ ວທາມິ. ມາ ມໍ ຊຎ຺ຎູຕິ ມາ ມໍ ຊານາຕຸ.

ທາລິທ຺ທິຍໍ ທຸກ຺ຂນ຺ຕິ ຘນທລິທ຺ທຠາໂວ ທຸກ຺ຂໍ. ກາມລາຠາຠິຊປ຺ປິນນ຺ຕິ ກາມລາຠໍ ປຕ຺ເຖນ຺ຕານໍ. ປາປກມ຺ມວິນິພ຺ພໂຍຕິ ປາປກມ຺ມວຑ຺ຒໂກ. ສໍສປ຺ປຕີຕິ ປຣິປ຺ຜນ຺ທຕິ. ຊານນ຺ຕິ ຊານນ຺ໂຕ. ຍສ຺ສ ວິປ຺ປຏິສາຣຊາຕິ ເຍ ອສ຺ສ ວິປ຺ປຏິສາຣໂຕ ຊາຕາ. ໂຍນິມຎ຺ຎຕຣນ຺ຕິ ເອກໍ ຕິຣຈ຺ຉານໂຍນິໍ. ທທໍ ຈິຕ຺ຕໍ ປສາທຍນ຺ຕິ ຈິຕ຺ຕໍ ປສາເທນ຺ໂຕ ທທມາໂນ.

ກຏຄ຺ຄາໂຫຕິ ຊຍຄ຺ຄາໂຫ, ອນປຣາຘຄ຺ຄາໂຫ ໂຫຕິ. ຆຣເມສິໂນຕິ ຆຣາວາສໍ ປຣິເຍສນ຺ຕສ຺ສ ວສມານສ຺ສ ວາ. ຈາໂຄ ປຸຎ຺ຎໍ ປວຑ຺ຒຕີຕິ ຈາໂຄຕິ ສງ຺ຂໍ ຄຕໍ ປຸຎ຺ຎໍ ວຑ຺ຒຕິ. ຈາຄາ ປຸຎ຺ຎນ຺ຕິ ວາ ປາໂຐ. ປຕິຏ຺ຐິຕາຕິ ປຕິຏ຺ຐິຕສທ຺ຘາ ນາມ ໂສຕາປນ຺ນສ຺ສ ສທ຺ຘາ. ຫິຣິມໂນຕິ ຫິຣິສມ຺ປຍຸຕ຺ຕຈິຕ຺ໂຕ. ນິຣາມິສໍ ສຸຂນ຺ຕິ ຕີຓິ ຌານານິ ນິສ຺ສາຍ ອຸປ຺ປຊ຺ຊນກສຸຂໍ. ອຸເປກ຺ຂນ຺ຕິ ຈຕຸຕ຺ຖຊ຺ຌານຸເປກ຺ຂໍ. ອາຣທ຺ຘວີຣິໂຍຕິ ປຣິປຸຓ຺ຓປຄ຺ຄຫິຕວີຣິໂຍ. ຌານານິ ອຸປສມ຺ປຊ຺ຊາຕິ ຈຕ຺ຕາຣິ ຌານານິ ປຕ຺ວາ. ເອໂກທິ ນິປໂກ ສໂຕຕິ ເອກຄ຺ຄຈິຕ຺ໂຕ ກມ຺ມສ຺ສກຕຎາຓສຕີຫິ ຈ ສມນ຺ນາຄໂຕ.

ເອວໍ ຎຕ຺ວາ ຍຖາຠູຕນ຺ຕິ ເອວໍ ເອຕ຺ຕກໍ ກາຣຓໍ ຍຖາສຠາວໍ ຊານິຕ຺ວາ. ສພ຺ພສໍໂຍຊນກ຺ຂເຍຕິ ນິພ຺ພາເນ. ສພ຺ພໂສຕິ ສພ຺ພາກາເຣນ. ອນຸປາທາຍາຕິ ອຄ຺ຄເຫຕ຺ວາ. ສມ຺ມາ ຈິຕ຺ຕໍ ວິມຸຈ຺ຈຕີຕິ ອິທໍ ວຸຕ຺ຕໍ ໂຫຕິ – ສພ຺ພສໍໂຍຊນກ຺ຂຍສງ຺ຂາເຕ ນິພ຺ພາເນ ສພ຺ພໂສ ອນຸປາທິຍິຕ຺ວາ ສມ຺ມາ ເຫຕຸນາ ນເຍນ ມຄ຺ຄຈິຕ຺ຕໍ ວິມຸຈ຺ຈຕິ. ‘‘ເອຕໍ ຎຕ຺ວາ ຍຖາຠູຕໍ, ສພ຺ພສໍໂຍຊນກ຺ຂຍ’’ນ຺ຕິປິ ປາຬິຍໍ ລິຂິຕໍ, ຕສ຺ສ ເອຕໍ ສພ຺ພສໍໂຍຊນກ຺ຂຍສງ຺ຂາຕໍ ນິພ຺ພານໍ ຍຖາຠູຕໍ ຎຕ຺ວາຕິ ອຕ຺ໂຖ. ປຸຣິມປຈ຺ຉິເມຫິ ປນ ສທ຺ຘິໍ ນ ຆຏີຍຕິ.

ຕສ຺ສ ສມ຺ມາ ວິມຸຕ຺ຕສ຺ສາຕິ ຕສ຺ສ ສມ຺ມາ ວິມຸຕ຺ຕສ຺ສ ຂີຓາສວສ຺ສ. ຎາຓໍ ໂຫຕີຕິ ປຈ຺ຈເວກ຺ຂຓຎາຓໍ ໂຫຕິ. ຕາທິໂນຕິ ຕໍສຓ຺ຐິຕສ຺ສ. ອກຸປ຺ປາຕິ ອກຸປ຺ປາຣມ຺ມຓຕ຺ຕາ ກຸປ຺ປກາຣຓານໍ ກິເລສານຎ຺ຈ ອຠາເວນ ອກຸປ຺ປາ. ວິມຸຕ຺ຕີຕິ ມຄ຺ຄວິມຸຕ຺ຕິປິ ຜລວິມຸຕ຺ຕິປິ. ຠວສໍໂຍຊນກ຺ຂເຍຕິ ຠວສໍໂຍຊນກ຺ຂຍສງ຺ຂາເຕ ນິພ຺ພາເນ ຠວສໍໂຍຊນານຎ຺ຈ ຂຍນ຺ເຕ ອຸປ຺ປນ຺ນາ. ເອຕໍ ໂຂ ປຣມໍ ຎາຓນ຺ຕິ ເອຕໍ ມຄ຺ຄຜລຎາຓໍ ປຣມຎາຓໍ ນາມ. ສຸຂມນຸຕ຺ຕຣນ຺ຕິ ເອຕເທວ ມຄ຺ຄຜລສຸຂໍ ອນຸຕ຺ຕຣໍ ສຸຂໍ ນາມ. ອາຓຓ຺ຍມຸຕ຺ຕມນ຺ຕິ ສພ຺ເພສໍ ອຓຓານໍ ຂີຓາສໂວ ອຸຕ຺ຕມອຓໂຓ, ຕສ຺ມາ ອຣຫຕ຺ຕຜລໍ ອາຓຓ຺ຍມຸຕ຺ຕມນ຺ຕິ ອຣຫຕ຺ຕຜເລນ ເທສນາຍ ກູຏໍ ຄຓ຺ຫິ. ອິມສ຺ມິຎ຺ຈ ສຸຕ຺ເຕ ວຏ຺ຏເມວ ກເຖຕ຺ວາ ຄາຖາສຸ ວຏ຺ຏວິວຏ຺ຏໍ ກຖິຕນ຺ຕິ.

໔. ມຫາຈຸນ຺ທສຸຕ຺ຕວຓ຺ຓນາ

໔໖. ຈຕຸຕ຺ເຖ ເຈຕີສູຕິ ເຈຕິຣຏ຺ເຐ. ສຍໍຊາຕິຍນ຺ຕິ ເອວໍນາມເກ ນິຄເມ. ມຫາຈຸນ຺ໂທຕິ ຘມ຺ມເສນາປຕິສ຺ສ ກນິຏ຺ຐຠາຕິໂກ. ຘມ຺ເມ ໂຍໂຄ ອນຸໂຍໂຄ ເອເຕສນ຺ຕິ ຘມ຺ມໂຍຄາ. ຘມ຺ມກຖິການໍ ເອຕໍ ນາມໍ. ຌາຍນ຺ຕີຕິ ຌາຍີ. ອປສາເທນ຺ຕີຕິ ຆຏ຺ເຏນ຺ຕິ ຫິໍສນ຺ຕິ. ຌາຍນ຺ຕີຕິ ຈິນ຺ເຕນ຺ຕິ. ປຊ຺ຌາຍນ຺ຕີຕິອາທີນິ ອຸປສຄ຺ຄວເສນ ວຑ຺ຒິຕານິ. ກິມິເມ ຌາຍນ຺ຕີຕິ ກິໍ ນາມ ອິເມ ຌາຍນ຺ຕິ. ກິນ຺ຕິເມ ຌາຍນ຺ຕີຕິ ກິມຕ຺ຖໍ ອິເມ ຌາຍນ຺ຕິ. ກຖໍ ອິເມ ຌາຍນ຺ຕີຕິ ເກນ ກາຣເຓນ ອິເມ ຌາຍນ຺ຕິ. ອມຕໍ ຘາຕຸໍ ກາເຍນ ຜຸສິຕ຺ວາ ວິຫຣນ຺ຕີຕິ ມຣຓວິຣຫິຕໍ ນິພ຺ພານຘາຕຸໍ ສນ຺ຘາຍ ກມ຺ມຏ຺ຐານໍ ຄເຫຕ຺ວາ ວິຫຣນ຺ຕາ ອນຸກ຺ກເມນ ຕໍ ນາມກາເຍນ ຜຸສິຕ຺ວາ ວິຫຣນ຺ຕິ. ຄມ຺ຠີຣໍ ອຕ຺ຖປທນ຺ຕິ ຄຸຬ຺ຫໍ ປຏິຈ຺ຉນ຺ນໍ ຂນ຺ຘຘາຕຸອາຍຕນາທິອຕ຺ຖໍ. ປຎ຺ຎາຍ ອຕິວິຊ຺ຌ ປສ຺ສນ຺ຕີຕິ ສຫວິປສ຺ສນາຍ ມຄ຺ຄປຎ຺ຎາຍ ປຏິວິຊ຺ຌິຕ຺ວາ ປສ຺ສນ຺ຕິ. ອິມສ຺ມິໍ ປນຕ຺ເຖ ສມ຺ມສນປຏິເວຘປຎ຺ຎາປິ ອຸຄ຺ຄຫປຣິປຸຈ຺ຉາປຎ຺ຎາປິ ວຏ຺ຏຕິເຍວາຕິ.

໕-໖. ສນ຺ທິຏ຺ຐິກສຸຕ຺ຕທ຺ວຍວຓ຺ຓນາ

໔໗-໔໘. ປຎ຺ຈເມ ສນ຺ຕໍ ວາ ອຊ຺ຌຕ຺ຕນ຺ຕິ ນິຍກຊ຺ຌຕ຺ເຕ ວິຊ຺ຊມານໍ. ໂລໂຠຕິອາທີຫິ ຕີຓິ ອກຸສລມູລານິ ທສ຺ສິຕານິ. ໂລຠຘມ຺ມາຕິອາທີຫິ ຕໍສມ຺ປຍຸຕ຺ຕກາ ຘມ຺ມາ. ຉຏ຺ເຐ ກາຍສນ຺ໂທສນ຺ຕິ ກາຍທ຺ວາຣສ຺ສ ທຸສ຺ສນາກາຣໍ. ເສສທ຺ວເຍປິ ເອເສວ ນໂຍ. ອິເມສຸ ທ຺ວີສຸ ສຸຕ຺ເຕສຸ ປຈ຺ຈເວກ຺ຂຓາວ ກຖິຕາ.

໗. ເຂມສຸຕ຺ຕວຓ຺ຓນາ

໔໙. ສຕ຺ຕເມ ວຸສິຕວາຕິ ວຸຕ຺ຖພ຺ຣຫ຺ມຈຣິຍວາໂສ. ກຕກຣຓີໂຍຕິ ຈຕູຫິ ມຄ຺ເຄຫິ ກຕ຺ຕພ຺ພໍ ກຕ຺ວາ ຐິໂຕ. ໂອຫິຕຠາໂຣຕິ ຂນ຺ຘຠາຣໍ ກິເລສຠາຣໍ ອຠິສງ຺ຂາຣຠາຣຎ຺ຈ ໂອຕາເຣຕ຺ວາ ຐິໂຕ. ອນຸປ຺ປຕ຺ຕສທຕ຺ໂຖຕິ ສທຕ຺ໂຖ ວຸຈ຺ຈຕິ ອຣຫຕ຺ຕໍ, ຕໍ ປຕ຺ໂຕຕິ ອຕ຺ໂຖ. ປຣິກ຺ຂີຓຠວສໍໂຍຊໂນຕິ ຂີຓຠວພນ຺ຘໂນ. ສມ຺ມທຎ຺ຎາ ວິມຸຕ຺ໂຕຕິ ສມ຺ມາ ເຫຕຸນາ ກາຣເຓນ ຊານິຕ຺ວາ ວິມຸຕ຺ໂຕ. ຕສ຺ສ ນ ເອວໍ ໂຫຕິ ອຕ຺ຖິ ເມ ເສຍ຺ໂຍຕິ ວາຕິອາທີຫິ ເສຍ຺ຍສ຺ສ ເສຍ຺ໂຍຫມສ຺ມີຕິ ມານາທໂຍ ຕໂຍ ມານາ ປຏິກ຺ຂິຕ຺ຕາ. ນ ຫິ ຂີຓາສວສ຺ສ ‘‘ອຕ຺ຖິ ມຍ຺ຫໍ ເສຍ຺ໂຍ, ອຕ຺ຖິ ສທິໂສ, ອຕ຺ຖິ ຫີໂນ’’ຕິ ມາໂນ ໂຫຕິ. ນຕ຺ຖິ ເມ ເສຍ຺ໂຍຕິອາທີຫິປິ ເຕເຍວ ປຏິກ຺ຂິຕ຺ຕາ. ນ ຫິ ຂີຓາສວສ຺ສ ‘‘ອຫເມວ ເສຍ຺ໂຍ, ອຫໍ ສທິໂສ, ອຫໍ ຫີໂນ, ອຎ຺ເຎ ເສຍ຺ຍາທໂຍ ນຕ຺ຖີ’’ຕິ ເອວໍ ມາໂນ ໂຫຕິ.

ອຈິຣປກ຺ກນ຺ເຕສູຕິ ອຣຫຕ຺ຕໍ ພ຺ຍາກຣິຕ຺ວາ ອຈິຣໍເຍວ ປກ຺ກນ຺ເຕສຸ. ອຎ຺ຎໍ ພ຺ຍາກໂຣນ຺ຕີຕິ ອຣຫຕ຺ຕໍ ກເຖນ຺ຕິ. ຫສມານກາ ມຎ຺ເຎ ອຎ຺ຎໍ ພ຺ຍາກໂຣນ຺ຕີຕິ ຫສມານາ ວິຍ ກເຖນ຺ຕິ. ວິຆາຕໍ ອາປຊ຺ຊນ຺ຕີຕິ ທຸກ຺ຂໍ ອາປຊ຺ຊນ຺ຕິ.

ນ ອຸສ຺ເສສຸ ນ ໂອເມສຸ, ສມຕ຺ເຕ ໂນປນີຍເຣຕິ ເອຕ຺ຖ ອຸສ຺ສາຕິ ອຸສ຺ສິຕຕາ ເສຍ຺ຍປຸຄ຺ຄລາ. ໂອມາຕິ ຫີນາ. ສມຕ຺ໂຕຕິ ສທິໂສ. ອິຕິ ອິເມສຸ ຕີສຸປິ ເສຍ຺ຍຫີນສທິເສສຸ ຂີຓາສວາ ມາເນນ ນ ອຸປນີຍເຣ, ນ ອຸປເນນ຺ຕິ, ນ ອຸປຄຈ຺ຉນ຺ຕີຕິ ອຕ຺ໂຖ. ຂີຓາ ຊາຕີຕິ ຂີຓາ ເຕສໍ ຊາຕິ. ວຸສິຕໍ ພ຺ຣຫ຺ມຈຣິຍນ຺ຕິ ວຸຕ຺ຖໍ ມຄ຺ຄພ຺ຣຫ຺ມຈຣິຍໍ. ຈຣນ຺ຕິ ສໍໂຍຊນວິປ຺ປມຸຕ຺ຕາຕິ ສພ຺ພສໍໂຍຊເນຫິ ວິມຸຕ຺ຕາ ຫຸຕ຺ວາ ຈຣນ຺ຕິ. ສຸຕ຺ເຕປິ ຄາຖາຍມ຺ປິ ຂີຓາສໂວ ກຖິໂຕ.

໘. ອິນ຺ທ຺ຣິຍສໍວຣສຸຕ຺ຕວຓ຺ຓນາ

໕໐. ອຏ຺ຐເມ ຫຕູປນິສໍ ໂຫຕີຕິ ຫຕູປນິສ຺ສຍໍ ໂຫຕິ. ສີລວິປນ຺ນສ຺ສາຕິ ວິປນ຺ນສີລສ຺ສ. ຍຖາຠູຕຎາຓທສ຺ສນນ຺ຕິ ຕຣຸຓວິປສ຺ສນາຎາຓໍ. ນິພ຺ພິທາວິຣາໂຄຕິ ເອຕ຺ຖ ນິພ຺ພິທາ ພລວວິປສ຺ສນາ, ວິຣາໂຄ ອຣິຍມຄ຺ໂຄ. ວິມຸຕ຺ຕິຎາຓທສ຺ສນນ຺ຕິ ເອຕ຺ຖ ວິມຸຕ຺ຕີຕິ ອຣຫຕ຺ຕຜລໍ, ຎາຓທສ຺ສນນ຺ຕິ ປຈ຺ຈເວກ຺ຂຓຎາຓໍ. ອຸປນິສ຺ສຍສມ຺ປນ຺ນໍ ໂຫຕີຕິ ສມ຺ປນ຺ນອຸປນິສ຺ສຍໍ ໂຫຕິ. ອິມສ຺ມິໍ ສຸຕ຺ເຕ ສີລານຸຣກ຺ຂຓອິນ຺ທ຺ຣິຍສໍວໂຣ ກຖິໂຕ.

໙. ອານນ຺ທສຸຕ຺ຕວຓ຺ຓນາ

໕໑. ນວເມ ກິຕ຺ຕາວຕາຕິ ກິຕ຺ຕເກນ. ອສ຺ສຸຕຎ຺ເຈວາຕິ ອຎ຺ຎສ຺ມິໍ ກາເລ ອສ຺ສຸຕປຸພ຺ພໍ. ນ ສມ຺ໂມສໍ ຄຈ຺ຉນ຺ຕີຕິ ວິນາສໍ ນ ຄຈ຺ຉນ຺ຕິ. ເຈຕໂສ ສມ຺ຜຸຏ຺ຐປຸພ຺ພາຕິ ຈິຕ຺ເຕນ ຜຸສິຕປຸພ຺ພາ. ສມຸທາຈຣນ຺ຕີຕິ ມໂນທ຺ວາເຣ ຈຣນ຺ຕິ. ອວິຎ຺ຎາຕຎ຺ຈ ວິຊານາຕີຕິ ອຎ຺ຎສ຺ມິໍ ກາເລ ອວິຎ຺ຎາຕກາຣຓໍ ຊານາຕິ. ປຣິຍາປຸຓາຕີຕິ ວຬຎ຺ເຊຕິ ກເຖຕິ. ເທເສຕີຕິ ປກາເສຕິ. ປຣໍ ວາເຈຕີຕິ ປຣໍ ອຸຄ຺ຄຓ຺ຫາເປຕິ.

ອາຄຕາຄມາຕິ ທີຆາທີສຸ ໂຍ ໂກຈິ ອາຄໂມ ອາຄໂຕ ເອເຕສນ຺ຕິ ອາຄຕາຄມາ. ຘມ຺ມຘຣາຕິ ສຸຕ຺ຕນ຺ຕປິຏກຘຣາ. ວິນຍຘຣາຕິ ວິນຍປິຏກຘຣາ. ມາຕິກາຘຣາຕິ ທ຺ເວປາຕິໂມກ຺ຂຘຣາ. ປຣິປຸຈ຺ຉຕີຕິ ອນຸສນ຺ຘິປຸພ຺ພາປຣໍ ປຸຈ຺ຉຕິ. ປຣິປຎ຺ຫຕີຕິ ອິທຎ຺ຈິທຎ຺ຈ ປຸຈ຺ຉິສ຺ສາມີຕິ ປຣິຕຸລຕິ ປຣິຈ຺ຉິນ຺ທຕິ. ອິທໍ, ຠນ຺ເຕ, ກຖນ຺ຕິ, ຠນ຺ເຕ, ອິທໍ ອນຸສນ຺ຘິປຸພ຺ພາປຣໍ ກຖໍ ໂຫຕີຕິ ປຸຈ຺ຉຕິ. ອິມສ຺ສ ກ຺ວຕ຺ໂຖຕິ ອິມສ຺ສ ຠາສິຕສ຺ສ ໂກ ອຕ຺ໂຖຕິ ປຸຈ຺ຉຕິ. ອວິວຏນ຺ຕິ ອວິວຣິຕໍ. ວິວຣນ຺ຕີຕິ ປາກຏໍ ກໂຣນ຺ຕິ. ກງ຺ຂາຐານິເຍສູຕິ ກງ຺ຂາຍ ກາຣຓຠູເຕສຸ. ຕຕ຺ຖ ຍສ຺ມິໍ ຘມ຺ເມ ກງ຺ຂາ ອຸປ຺ປຊ຺ຊຕິ, ສ຺ເວວ ກງ຺ຂາຐານິໂຍ ນາມາຕິ ເວທິຕພ຺ໂພ.