໓. ສິກ຺ຂານິສໍສສຸຕ຺ຕວຓ຺ຓນາ

໒໔໕. ຕຕິເຍ ສິກ຺ຂາ ອານິສໍສາ ເອຕ຺ຖາຕິ ສິກ຺ຂານິສໍສໍ. ປຎ຺ຎາ ອຸຕ຺ຕຣາ ເອຕ຺ຖາຕິ ປຎ຺ຎຸຕ຺ຕຣໍ. ວິມຸຕ຺ຕິ ສາໂຣ ເອຕ຺ຖາຕິ ວິມຸຕ຺ຕິສາຣໍ. ສຕິ ອາຘິປເຕຍ຺ຍາ ເອຕ຺ຖາຕິ ສຕາຘິປເຕຍ຺ຍໍ. ເອເຕສໍ ຫິ ສິກ຺ຂາທິສງ຺ຂາຕານໍ ອານິສໍສາທີນໍ ອຕ຺ຖາຍ ວຸສ຺ສຕີຕິ ວຸຕ຺ຕໍ ໂຫຕິ. ອາຠິສມາຈາຣິກາຕິ ອຸຕ຺ຕມສມາຈາຣິກາ. ວຕ຺ຕວເສນ ປຎ຺ຎຕ຺ຕສີລສ຺ເສຕໍ ອຘິວຈນໍ. ຕຖາ ຕຖາ ໂສ ຕສ຺ສາ ສິກ຺ຂາຍາຕິ ຕຖາ ຕຖາ ໂສ ສິກ຺ຂາກາໂມ ຠິກ຺ຂຸ ຕສ຺ມິໍ ສິກ຺ຂາປເທ.

ອາທິພ຺ຣຫ຺ມຈຣິຍິກາຕິ ມຄ຺ຄພ຺ຣຫ຺ມຈຣິຍສ຺ສ ອາທິຠູຕານໍ ຈຕຸນ຺ນໍ ມຫາສີລານເມຕໍ ອຘິວຈນໍ. ສພ຺ພໂສຕິ ສພ຺ພາກາເຣນ. ຘມ຺ມາຕິ ຈຕຸສຈ຺ຈຘມ຺ມາ. ປຎ຺ຎາຍ ສມເວກ຺ຂິຕາ ໂຫນ຺ຕີຕິ ສຫວິປສ຺ສນາຍ ມຄ຺ຄປຎ຺ຎາຍ ສຸທິຏ຺ຐາ ໂຫນ຺ຕິ. ວິມຸຕ຺ຕິຍາ ຜຸສິຕາ ໂຫນ຺ຕີຕິ ອຣຫຕ຺ຕຜລວິມຸຕ຺ຕິຍາ ຎາຓຜສ຺ເສນ ຜຸຏ຺ຐາ ໂຫນ຺ຕິ. ອຊ຺ຌຕ຺ຕໍເຍວ ສຕິ ສູປຏ຺ຐິຕາ ໂຫຕີຕິ ນິຍກຊ຺ຌຕ຺ເຕເຍວ ສຕິ ສຸຏ຺ຐຸ ອຸປຏ຺ຐິຕາ ໂຫຕິ. ປຎ຺ຎາຍ ອນຸຄ຺ຄເຫສ຺ສາມີຕິ ວິປສ຺ສນາປຎ຺ຎາຍ ອນຸຄ຺ຄເຫສ຺ສາມິ. ປຎ຺ຎາຍ ສມເວກ຺ຂິສ຺ສາມີຕິ ອິຘາປິ ວິປສ຺ສນາປຎ຺ຎາ ອຘິປ຺ເປຕາ. ຜຸສິຕໍ ວາ ຘມ຺ມໍ ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີຕິ ເອຕ຺ຖ ປນ ມຄ຺ຄປຎ຺ຎາວ ອຘິປ຺ເປຕາ.