(໒໕) ໕. ອາປຕ຺ຕິຠຍວຄ຺ໂຄ

໑. ສງ຺ຆເຠທກສຸຕ຺ຕວຓ຺ຓນາ

໒໔໓. ປຎ຺ຈມສ຺ສ ປຐເມ ອປິ ນຸ ຕໍ, ອານນ຺ທ, ອຘິກຣຓນ຺ຕິ ວິວາທາຘິກຣຓາທີສຸ ອຎ຺ຎຕຣໍ ອຘິກຣຓໍ ຠິກ຺ຂຸສງ຺ຆສ຺ສ ອຸປ຺ປຊ຺ຊິ, ສຕ຺ຖາ ຕສ຺ສ ວູປສນ຺ຕຠາວໍ ປຸຈ຺ຉນ຺ໂຕ ເອວມາຫ. ກຸໂຕ ຕໍ, ຠນ຺ເຕຕິ, ຠນ຺ເຕ, ກຸໂຕ ກິນ຺ຕິ ເກນ ກາຣເຓນ ຕໍ ອຘິກຣຓໍ ວູປສມິສ຺ສຕີຕິ ວທຕິ. ເກວລກປ຺ປນ຺ຕິ ສກລໍ ສມນ຺ຕໂຕ. ສງ຺ຆເຠທາຍ ຐິໂຕຕິ ສງ຺ເຆນ ສທ຺ຘິໍ ວາທຕ຺ຖາຍ ກຖິຕໍ ປຏິກເຖນ຺ໂຕວ ຐິໂຕ. ຕຕ຺ຣາຍສ຺ມາຕິ ຕສ຺ມິໍ ເອວໍ ຐິເຕ ອາຍສ຺ມາ ອນຸຣຸທ຺ໂຘ. ນ ເອກວາຈິກມ຺ປິ ຠຓິຕພ຺ພໍ ມຎ຺ຎຕີຕິ ‘‘ມາ, ອາວຸໂສ, ສງ຺ເຆນ ສທ຺ຘິໍ ເອວໍ ອວຈາ’’ຕິ ເອກວຈນມ຺ປິ ວຕ຺ຕພ຺ພໍ ນ ມຎ຺ຎຕິ. ໂວຍຸຎ຺ຊຕີຕິ ອນຸຍຸຎ຺ຊຕິ ອນຸໂຍຄໍ ອາປຊ຺ຊຕິ. ອຕ຺ຖວເສຕິ ກາຣຓວເສ. ນາເສສ຺ສນ຺ຕີຕິ ອຸໂປສຖປ຺ປວາຣຓໍ ອຸປຄນ຺ຕຸໍ ອທຕ຺ວາ ນິກ຺ກຑ຺ຒິສ຺ສນ຺ຕິ. ເສສໍ ປາຬິວເສເນວ ເວທິຕພ຺ພໍ.

໒. ອາປຕ຺ຕິຠຍສຸຕ຺ຕວຓ຺ຓນາ

໒໔໔. ທຸຕິເຍ ຂຸຣມຸຓ຺ຑໍ ກຣິຕ຺ວາຕິ ປຎ຺ຈ ສິຂຓ຺ຑເກ ຐເປຕ຺ວາ ຂຸເຣນ ມຸຓ຺ຑໍ ກຣິຕ຺ວາ. ຂຣສ຺ສເຣນາຕິ ກກ຺ຂຬສທ຺ເທນ. ປຓເວນາຕິ ວຊ຺ຌເຠຣິຍາ. ຖລຏ຺ຐສ຺ສາຕິ ເອກມນ຺ເຕ ຐິຕສ຺ສ. ສີສຈ຺ເຉຊ຺ຊນ຺ຕິ ສີສຈ຺ເຉທາຣຫໍ. ຍຕ຺ຣ ຫິ ນາມາຕິ ຍໍ ນາມ. ໂສ ວຕສ຺ສາຫນ຺ຕິ ໂສ ວຕ ອຫໍ ອສ຺ສໍ, ຍໍ ເອວຣູປໍ ປາປໍ ນ ກເຣຍ຺ຍນ຺ຕິ ອຕ຺ໂຖ. ຍຖາຘມ຺ມໍ ປຏິກຣິສ຺ສຕີຕິ ຘມ຺ມານຸຣູປໍ ປຏິກຣິສ຺ສຕິ, ສາມເຓຣຠູມິຍໍ ຐສ຺ສຕີຕິ ອຕ຺ໂຖ. ກາຬວຕ຺ຖໍ ປຣິຘາຍາຕິ ກາຬປິໂລຕິກໍ ນິວາເສຕ຺ວາ. ໂມສລ຺ລນ຺ຕິ ມຸສລາຠິປາຕາຣຫໍ. ຍຖາຘມ຺ມນ຺ຕິ ອິຘ ອາປຕ຺ຕິໂຕ ວຸຏ຺ຐາຍ ສຸທ຺ຘນ຺ເຕ ປຕິຏ຺ຐຫນ຺ໂຕ ຍຖາຘມ຺ມໍ ກໂຣຕິ ນາມ. ຠສ຺ມປຸຏນ຺ຕິ ຉາຣິກາຠຓ຺ຑິກໍ. ຄາຣຍ຺ຫໍ ຠສ຺ມປຸຏນ຺ຕິ ຄຣຫິຕພ຺ພຉາຣິກາປຸເຏນ ມຕ຺ຖເກ ອຠິຆາຕາຣຫໍ. ຍຖາຘມ຺ມນ຺ຕິ ອິຘ ອາປຕ຺ຕິໍ ເທເສນ຺ໂຕ ຍຖາຘມ຺ມໍ ປຏິກໂຣຕິ ນາມ. ອຸປວຊ຺ຊນ຺ຕິ ອຸປວາທາຣຫໍ. ປາຏິເທສນີເຍສູຕິ ປຏິເທເສຕພ຺ເພສຸ. ອິມິນາ ສພ຺ພາປິ ເສສາປຕ຺ຕິໂຍ ສງ຺ຄຫິຕາ. ອິມານິ ໂຂ, ຠິກ຺ຂເວ, ຈຕ຺ຕາຣິ ອາປຕ຺ຕິຠຍານີຕິ, ຠິກ຺ຂເວ, ອິມານິ ຈຕ຺ຕາຣິ ອາປຕ຺ຕິໍ ນິສ຺ສາຍ ອຸປ຺ປຊ຺ຊນກຠຍານິ ນາມາຕິ.

໓. ສິກ຺ຂານິສໍສສຸຕ຺ຕວຓ຺ຓນາ

໒໔໕. ຕຕິເຍ ສິກ຺ຂາ ອານິສໍສາ ເອຕ຺ຖາຕິ ສິກ຺ຂານິສໍສໍ. ປຎ຺ຎາ ອຸຕ຺ຕຣາ ເອຕ຺ຖາຕິ ປຎ຺ຎຸຕ຺ຕຣໍ. ວິມຸຕ຺ຕິ ສາໂຣ ເອຕ຺ຖາຕິ ວິມຸຕ຺ຕິສາຣໍ. ສຕິ ອາຘິປເຕຍ຺ຍາ ເອຕ຺ຖາຕິ ສຕາຘິປເຕຍ຺ຍໍ. ເອເຕສໍ ຫິ ສິກ຺ຂາທິສງ຺ຂາຕານໍ ອານິສໍສາທີນໍ ອຕ຺ຖາຍ ວຸສ຺ສຕີຕິ ວຸຕ຺ຕໍ ໂຫຕິ. ອາຠິສມາຈາຣິກາຕິ ອຸຕ຺ຕມສມາຈາຣິກາ. ວຕ຺ຕວເສນ ປຎ຺ຎຕ຺ຕສີລສ຺ເສຕໍ ອຘິວຈນໍ. ຕຖາ ຕຖາ ໂສ ຕສ຺ສາ ສິກ຺ຂາຍາຕິ ຕຖາ ຕຖາ ໂສ ສິກ຺ຂາກາໂມ ຠິກ຺ຂຸ ຕສ຺ມິໍ ສິກ຺ຂາປເທ.

ອາທິພ຺ຣຫ຺ມຈຣິຍິກາຕິ ມຄ຺ຄພ຺ຣຫ຺ມຈຣິຍສ຺ສ ອາທິຠູຕານໍ ຈຕຸນ຺ນໍ ມຫາສີລານເມຕໍ ອຘິວຈນໍ. ສພ຺ພໂສຕິ ສພ຺ພາກາເຣນ. ຘມ຺ມາຕິ ຈຕຸສຈ຺ຈຘມ຺ມາ. ປຎ຺ຎາຍ ສມເວກ຺ຂິຕາ ໂຫນ຺ຕີຕິ ສຫວິປສ຺ສນາຍ ມຄ຺ຄປຎ຺ຎາຍ ສຸທິຏ຺ຐາ ໂຫນ຺ຕິ. ວິມຸຕ຺ຕິຍາ ຜຸສິຕາ ໂຫນ຺ຕີຕິ ອຣຫຕ຺ຕຜລວິມຸຕ຺ຕິຍາ ຎາຓຜສ຺ເສນ ຜຸຏ຺ຐາ ໂຫນ຺ຕິ. ອຊ຺ຌຕ຺ຕໍເຍວ ສຕິ ສູປຏ຺ຐິຕາ ໂຫຕີຕິ ນິຍກຊ຺ຌຕ຺ເຕເຍວ ສຕິ ສຸຏ຺ຐຸ ອຸປຏ຺ຐິຕາ ໂຫຕິ. ປຎ຺ຎາຍ ອນຸຄ຺ຄເຫສ຺ສາມີຕິ ວິປສ຺ສນາປຎ຺ຎາຍ ອນຸຄ຺ຄເຫສ຺ສາມິ. ປຎ຺ຎາຍ ສມເວກ຺ຂິສ຺ສາມີຕິ ອິຘາປິ ວິປສ຺ສນາປຎ຺ຎາ ອຘິປ຺ເປຕາ. ຜຸສິຕໍ ວາ ຘມ຺ມໍ ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີຕິ ເອຕ຺ຖ ປນ ມຄ຺ຄປຎ຺ຎາວ ອຘິປ຺ເປຕາ.

໔. ເສຍ຺ຍາສຸຕ຺ຕວຓ຺ຓນາ

໒໔໖. ຈຕຸຕ຺ເຖ ເປຕາຕິ ກາລກຕາ ວຸຈ຺ຈນ຺ຕິ. ອຸຕ຺ຕານາ ເສນ຺ຕີຕິ ເຕ ເຍຠຸຍ຺ເຍນ ອຸຕ຺ຕານກາວ ສຍນ຺ຕິ. ອຖ ວາ ເປຕ຺ຕິວິສເຍ ນິພ຺ພຕ຺ຕາ ເປຕາ ນາມ, ເຕ ອປ຺ປມໍສໂລຫິຕຕ຺ຕາ ອຏ຺ຐິສງ຺ຆາຕຊຏິຕາ ເອເກນ ປສ຺ເສນ ສຍິຕຸໍ ນ ສກ຺ໂກນ຺ຕິ, ອຸຕ຺ຕານາວ ເສນ຺ຕິ. ອນຕ຺ຕມໂນ ໂຫຕີຕິ ເຕຊຸສ຺ສທຕ຺ຕາ ສີໂຫ ມິຄຣາຊາ ທ຺ເວ ປຸຣິມປາເທ ເອກສ຺ມິໍ, ປຈ຺ຉິມປາເທ ເອກສ຺ມິໍ ຐາເນ ຐເປຕ຺ວາ ນງ຺ຄຸຏ຺ຐໍ ອນ຺ຕຣສຕ຺ຖິມ຺ຫິ ປກ຺ຂິປິຕ຺ວາ ປຸຣິມປາທປຈ຺ຉິມປາທນງ຺ຄຸຏ຺ຐານໍ ຐິໂຕກາສໍ ສລ຺ລກ຺ເຂຕ຺ວາ ທ຺ວິນ຺ນໍ ປຸຣິມປາທານໍ ມຕ຺ຖເກ ສີສໍ ຐເປຕ຺ວາ ສຍຕິ. ທິວສມ຺ປິ ສຍິຕ຺ວາ ປພຸຊ຺ຌມາໂນ ນ ອຸຕ຺ຕສນ຺ໂຕ ປພຸຊ຺ຌຕິ, ສີສໍ ປນ ອຸກ຺ຂິປິຕ຺ວາ ປຸຣິມປາທາທີນໍ ຐິໂຕກາສໍ ສລ຺ລກ຺ເຂຕ຺ວາ ສເຈ ກິຎ຺ຈິ ຐານໍ ວິຊຫິຕ຺ວາ ຐິຕໍ ໂຫຕິ, ‘‘ນຍິທໍ ຕຸຍ຺ຫໍ ຊາຕິຍາ, ນ ສູຣຠາວສ຺ສ ອນຸຣູປ’’ນ຺ຕິ ອນຕ຺ຕມໂນ ຫຸຕ຺ວາ ຕຕ຺ເຖວ ສຍຕິ, ນ ໂຄຈຣາຍ ປກ຺ກມຕິ. ອິທໍ ສນ຺ຘາຍ ວຸຕ຺ຕໍ – ‘‘ອນຕ຺ຕມໂນ ໂຫຕີ’’ຕິ. ອວິຊຫິຕ຺ວາ ຐິເຕ ປນ ‘‘ຕຸຍ຺ຫໍ ຊາຕິຍາ ຈ ສູຣຠາວສ຺ສ ຈ ອນຸຣູປມິທ’’ນ຺ຕິ ຫຏ຺ຐຕຸຏ຺ໂຐ ອຸຏ຺ຐາຍ ສີຫວິຊມ຺ຠນໍ ວິຊມ຺ຠິຕ຺ວາ ເກສຣຠາຣໍ ວິຘຸນິຕ຺ວາ ຕິກ຺ຂຕ຺ຕຸໍ ສີຫນາທໍ ນທິຕ຺ວາ ໂຄຈຣາຍ ປກ຺ກມຕິ. ເຕນ ວຸຕ຺ຕໍ – ‘‘ອຕ຺ຕມໂນ ໂຫຕີ’’ຕິ.

໕. ຖູປາຣຫສຸຕ຺ຕວຓ຺ຓນາ

໒໔໗. ປຎ຺ຈເມ ຣາຊາ ຈກ຺ກວຕ຺ຕີຕິ ເອຕ຺ຖ ກສ຺ມາ ຠຄວາ ອຄາຣມຊ຺ເຌ ວສິຕ຺ວາ ກາລກຕສ຺ສ ຣຎ຺ໂຎ ຖູປກຣຓໍ ອນຸຊານາຕິ, ນ ສີລວໂຕ ປຸຖຸຊ຺ຊນຠິກ຺ຂຸສ຺ສາຕິ? ອນຈ຺ຉຣິຍຕ຺ຕາ. ປຸຖຸຊ຺ຊນຠິກ຺ຂູນຎ຺ຫິ ຖູເປ ອນຸຎ຺ຎາຍມາເນ ຕມ຺ພປຓ຺ຓິທີເປ ຕາວ ຖູປານໍ ໂອກາໂສ ນ ຠເວຍ຺ຍ, ຕຖາ ອຎ຺ເຎສຸ ຐາເນສຸ. ຕສ຺ມາ ‘‘ອນຈ຺ຉຣິຍາ ເຕ ຠວິສ຺ສນ຺ຕີ’’ຕິ ນານຸຊານາຕິ. ຈກ຺ກວຕ຺ຕີ ຣາຊາ ເອໂກວ ນິພ຺ພຕ຺ຕຕິ, ເຕນສ຺ສ ຖູໂປ ອຈ຺ຉຣິໂຍ ໂຫຕິ. ປຸຖຸຊ຺ຊນສີລວໂຕ ປນ ປຣິນິພ຺ພຸຕຠິກ຺ຂຸໂນ ວິຍ ມຫນ຺ຕມ຺ປິ ສກ຺ກາຣໍ ກາຕຸໍ ວຏ຺ຏຕິເຍວ. ຉຏ຺ຐສຕ຺ຕມານິ ອຸຕ຺ຕານຕ຺ຖາເນວ.

໘. ປຐມໂວຫາຣສຸຕ຺ຕວຓ຺ຓນາ

໒໕໐. ອຏ຺ຐເມ ອນຣິຍໂວຫາຣາຕິ ອນຣິຍານໍ ກຖາ. ເສເສສຸປິ ເອເສວ ນໂຍ.

ອາປຕ຺ຕິຠຍວຄ຺ໂຄ ປຎ຺ຈໂມ.