໑໐. ສມຓສຸຕ຺ຕວຓ຺ຓນາ

໒໔໑. ທສເມ ອິເຘວາຕິ ອິມສ຺ມິໍເຍວ ສາສເນ. ອຍໍ ປນ ນິຍໂມ ເສສປເທສຸປິ ເວທິຕພ຺ໂພ. ທຸຕິຍາທໂຍປິ ຫິ ສມຓາ ອິເຘວ, ນ ອຎ຺ຎຕ຺ຖ. ສຸຎ຺ຎາຕິ ຣິຕ຺ຕາ ຕຸຈ຺ຉາ. ປຣປ຺ປວາທາຕິ ຈຕ຺ຕາໂຣ ສສ຺ສຕວາທາ, ຈຕ຺ຕາໂຣ ເອກຈ຺ຈສສ຺ສຕິກາ, ຈຕ຺ຕາໂຣ ອນ຺ຕານນ຺ຕິກາ, ຈຕ຺ຕາໂຣ ອມຣາວິກ຺ເຂປິກາ, ທ຺ເວ ອຘິຈ຺ຈສມຸປ຺ປນ຺ນິກາ, ໂສຬສ ສຎ຺ຎິວາທາ, ອຏ຺ຐ ອສຎ຺ຎິວາທາ, ອຏ຺ຐ ເນວສຎ຺ຎິນາສຎ຺ຎິວາທາ, ສຕ຺ຕ ອຸຈ຺ເຉທວາທາ, ປຎ຺ຈ ທິຏ຺ຐຘມ຺ມນິພ຺ພານວາທາຕິ ອິເມ ສພ຺ເພປິ ພ຺ຣຫ຺ມຊາເລ ອາຄຕທ຺ວາສຏ຺ຐິທິຏ຺ຐິໂຍ ອິໂຕ ພາຫິຣານໍ ປເຣສໍ ປວາທາ ປຣປ຺ປວາທາ ນາມ. ເຕ ສພ຺ເພປິ ອິເມຫິ ຈຕູຫິ ຜລຏ຺ຐກສມເຓຫິ ສຸຎ຺ຎາ. ນ ຫິ ເຕ ເອຕ຺ຖ ສນ຺ຕິ. ນ ເກວລຎ຺ຈ ເອເຕເຫວ ສຸຎ຺ຎາ, ຈຕູຫິ ປນ ມຄ຺ຄຏ຺ຐກສມເຓຫິປິ, ຈຕຸນ຺ນໍ ມຄ຺ຄານໍ ອຕ຺ຖາຍ ອາຣທ຺ຘວິປສ຺ສເກຫິປີຕິ ທ຺ວາທສຫິປິ ສມເຓຫິ ສຸຎ຺ຎາ ເອວ. ອິທເມວ ອຕ຺ຖໍ ສນ຺ຘາຍ ຠຄວຕາ ມຫາປຣິນິພ຺ພາເນ (ທີ. ນິ. ໒.໒໑໔) ວຸຕ຺ຕໍ –

‘‘ເອກູນຕິໍໂສ ວຍສາ ສຸຠທ຺ທ,

ຍໍ ປພ຺ພຊິໍ ກິໍກຸສລານຸເອສີ;

ວສ຺ສານິ ປຎ຺ຎາສ ສມາຘິການິ,

ຍໂຕ ອຫໍ ປພ຺ພຊິໂຕ ສຸຠທ຺ທ;

ຎາຍສ຺ສ ຘມ຺ມສ຺ສ ປເທສວຕ຺ຕີ,

ອິໂຕ ພຫິທ຺ຘາ ສມໂຓປິ ນຕ຺ຖິ’’.

‘‘ທຸຕິໂຍປິ ສມໂຓ ນຕ຺ຖິ, ຕຕິໂຍປິ ສມໂຓ ນຕ຺ຖິ, ຈຕຸຕ຺ໂຖປິ ສມໂຓ ນຕ຺ຖິ, ສຸຎ຺ຎາ ປຣປ຺ປວາທາ ສມເຓຫິ ອຎ຺ເຎຫີ’’ຕິ. ເອຕ຺ຖ ຫິ ປເທສວຕ຺ຕີຕິ ອາຣທ຺ຘວິປສ຺ສໂກ ອຘິປ຺ເປໂຕ. ຕສ຺ມາ ໂສຕາປຕ຺ຕິມຄ຺ຄສ຺ສ ອາຣທ຺ຘວິປສ຺ສກໍ ມຄ຺ຄຏ຺ຐໍ ຜລຏ຺ຐນ຺ຕິ ຕໂຍປິ ເອກໂຕ ກຕ຺ວາ ‘‘ສມໂຓປິ ນຕ຺ຖີ’’ຕິ ອາຫ, ສກທາຄາມິມຄ຺ຄສ຺ສ ອາຣທ຺ຘວິປສ຺ສກໍ ມຄ຺ຄຏ຺ຐໍ ຜລຏ຺ຐນ຺ຕິ ຕໂຍປິ ເອກໂຕ ກຕ຺ວາ ‘‘ທຸຕິໂຍປິ ສມໂຓ ນຕ຺ຖີ’’ຕິ ອາຫ. ອິຕເຣສຸປິ ທ຺ວີສຸ ເອເສວ ນໂຍ. ເອກາທສມໍ ອຸຕ຺ຕານຕ຺ຖເມວາຕິ.

ກມ຺ມວຄ຺ໂຄ ຈຕຸຕ຺ໂຖ.