(໑໓) ໓. ຠຍວຄ຺ໂຄ

໑. ອຕ຺ຕານຸວາທສຸຕ຺ຕວຓ຺ຓນາ

໑໒໑. ຕຕິຍສ຺ສ ປຐເມ ອຕ຺ຕານຸວາທຠຍນ຺ຕິ ອຕ຺ຕານໍ ອນຸວທນ຺ຕສ຺ສ ອຸປ຺ປຊ຺ຊນກຠຍໍ. ປຣານຸວາທຠຍນ຺ຕິ ປຣສ຺ສ ອນຸວາທໂຕ ອຸປ຺ປຊ຺ຊນກຠຍໍ. ທຓ຺ຑຠຍນ຺ຕິ ທ຺ວຕ຺ຕິໍສ ກມ຺ມກາຣຓາ ປຏິຈ຺ຈ ອຸປ຺ປຊ຺ຊນກຠຍໍ. ທຸຄ຺ຄຕິຠຍນ຺ຕິ ຈຕ຺ຕາໂຣ ອປາເຍ ປຏິຈ຺ຈ ອຸປ຺ປຊ຺ຊນກຠຍໍ. ອິທໍ ວຸຈ຺ຈຕິ, ຠິກ຺ຂເວ, ອຕ຺ຕານຸວາທຠຍນ຺ຕິອາທີສຸ ອຕ຺ຕານຸວາທຠຍໍ ຕາວ ປຈ຺ຈເວກ຺ຂນ຺ຕສ຺ສ ອຊ຺ຌຕ຺ຕໍ ຫິຣີ ສມຸຏ຺ຐາຕິ, ສາສ຺ສ ຕີສຸ ທ຺ວາເຣສຸ ສໍວຣໍ ຊເນຕິ, ຕີສຸ ທ຺ວາເຣສຸ ສໍວໂຣ ຈຕຸປາຣິສຸທ຺ຘິສີລໍ ໂຫຕິ. ໂສ ຕສ຺ມິໍ ສີເລ ປຕິຏ຺ຐາຍ ວິປສ຺ສນໍ ວຑ຺ເຒຕ຺ວາ ອຄ຺ຄຜເລ ປຕິຏ຺ຐາຕິ. ປຣານຸວາທຠຍໍ ປນ ປຈ຺ຈເວກ຺ຂນ຺ຕສ຺ສ ພຫິທ຺ຘາ ໂອຕ຺ຕປ຺ປໍ ສມຸຏ຺ຐາຕິ, ຕທສ຺ສ ຕີສຸ ທ຺ວາເຣສຸ ສໍວຣໍ ຊເນຕິ, ຕີສຸ ທ຺ວາເຣສຸ ສໍວໂຣ ຈຕຸປາຣິສຸທ຺ຘິສີລໍ ໂຫຕິ. ໂສ ຕສ຺ມິໍ ສີເລ ປຕິຏ຺ຐາຍ ວິປສ຺ສນໍ ວຑ຺ເຒຕ຺ວາ ອຄ຺ຄຜເລ ປຕິຏ຺ຐາຕິ. ທຸຄ຺ຄຕິຠຍໍ ປຈ຺ຈເວກ຺ຂນ຺ຕສ຺ສ ອຊ຺ຌຕ຺ຕໍ ຫິຣີ ສມຸຏ຺ຐາຕິ, ສາສ຺ສ ຕີສຸ ທ຺ວາເຣສຸ ສໍວຣໍ ຊເນຕິ, ຕີສຸ ທ຺ວາເຣສຸ ສໍວໂຣ ຈຕຸປາຣິສຸທ຺ຘິສີລໍ ໂຫຕິ. ໂສ ຕສ຺ມິໍ ສີເລ ປຕິຏ຺ຐາຍ ວິປສ຺ສນໍ ວຑ຺ເຒຕ຺ວາ ອຄ຺ຄຜເລ ປຕິຏ຺ຐາຕິ.

໒. ອູມິຠຍສຸຕ຺ຕວຓ຺ຓນາ

໑໒໒. ທຸຕິເຍ ອຸທໂກໂຣຫນ຺ຕສ຺ສາຕິ ອຸທກໍ ໂອຕຣນ຺ຕສ຺ສ. ປາຏິກງ຺ຂິຕພ຺ພານີຕິ ອິຈ຺ຉິຕພ຺ພານິ. ສຸສຸກາຠຍນ຺ຕິ ຈຓ຺ຑມຈ຺ຉຠຍໍ. ມຸຂາວຣຓໍ ມຎ຺ເຎ ກໂຣນ຺ຕີຕິ ມຸຂປິທຫນໍ ວິຍ ກໂຣນ຺ຕິ. ໂອທຣິກຕ຺ຕສ຺ສາຕິ ມໂຫທຣຕາຍ ມຫຄ຺ຆສຠາວສ຺ສ. ອຣກ຺ຂິເຕເນວ ກາເຍນາຕິອາທີສຸ ກາຍທ຺ວາເຣ ຕິວິຘສ຺ສ ສໍວຣສ຺ສ ອຠາວໂຕ ອຣກ຺ຂິເຕນ ກາເຍນ. ວຈີທ຺ວາເຣ ຈຕຸພ຺ພິຘສ຺ສ ສໍວຣສ຺ສ ອຠາວໂຕ ອຣກ຺ຂິຕາຍ ວາຈາຍ.

໓. ປຐມນານາກຣຓສຸຕ຺ຕວຓ຺ຓນາ

໑໒໓. ຕຕິເຍ ຕທສ຺ສາເທຕີຕິ ຕໍ ຌານໍ ສຸຂສ຺ສາເທນ ອສ຺ສາເທຕິ. ນິກາເມຕີຕິ ປຕ຺ເຖຕິ. ວິຕ຺ຕິໍ ອາປຊ຺ຊຕີຕິ ຕຸຏ຺ຐິໍ ອາປຊ຺ຊຕິ. ຕທຘິມຸຕ຺ໂຕຕິ ຕສ຺ມິໍ ອຘິມຸຕ຺ໂຕ, ຕໍ ວາ ອຘິມຸຕ຺ໂຕ. ຕພ຺ພຫຸລວິຫາຣີຕິ ເຕນ ຌາເນນ ພຫຸລໍ ວິຫຣນ຺ໂຕ. ສຫພ຺ຍຕໍ ອຸປປຊ຺ຊຕີຕິ ສຫຠາວໍ ຄຈ຺ຉຕິ, ຕຕ຺ຖ ນິພ຺ພຕ຺ຕຕີຕິ ອຕ຺ໂຖ. ກປ຺ໂປ ອາຍຸປ຺ປມາຓນ຺ຕິ ເອຕ຺ຖ ປຐມຊ຺ຌານໍ ອຕ຺ຖິ ຫີນໍ, ອຕ຺ຖິ ມຊ຺ຌິມໍ, ອຕ຺ຖິ ປຓີຕໍ. ຕຕ຺ຖ ຫີເນນ ອຸປ຺ປນ຺ນານໍ ກປ຺ປສ຺ສ ຕຕິໂຍ ໂກຏ຺ຐາໂສ ອາຍຸປ຺ປມາຓໍ, ມຊ຺ຌິເມນ ອຸປຑ຺ຒກປ຺ໂປ, ປຓີເຕນ ກປ຺ໂປ. ຕໍ ສນ຺ຘາເຍຕໍ ວຸຕ຺ຕໍ. ນິຣຍມ຺ປິ ຄຈ຺ຉຕີຕິ ນິຣຍຄມນີຍສ຺ສ ກມ຺ມສ຺ສ ອປ຺ປຫີນຕ຺ຕາ ອປຣາປຣໍ ຄຈ຺ຉຕິ, ນ ອນນ຺ຕຣເມວ. ຕສ຺ມິໍເຍວ ຠເວ ປຣິນິພ຺ພາຍຕີຕິ ຕສ຺ມິໍເຍວ ຣູປຠເວ ຐຕ຺ວາ ປຣິນິພ຺ພາຍຕິ, ນ ເຫຏ຺ຐາ ໂອຕຣຕິ. ຍທິທໍ ຄຕິຍາ ອຸປປຕ຺ຕິຍາ ສຕີຕິ ຍໍ ອິທໍ ຄຕິຍາ ຈ ອຸປປຕ຺ຕິຍາ ຈ ສຕິ ເສຂສ຺ສ ອຣິຍສາວກສ຺ສ ປຏິສນ຺ຘິວເສນ ເຫຏ຺ຐາ ອໂນຕຣິຕ຺ວາ ຕສ຺ມິໍເຍວ ຣູປຠເວ ອຸປຣິ ທຸຕິຍຕຕິຍາທີສຸ ອຎ຺ຎຕຣສ຺ມິໍ ພ຺ຣຫ຺ມໂລເກ ປຣິນິພ຺ພານໍ, ປຸຖຸຊ຺ຊນສ຺ສ ປນ ນິຣຍາທິຄມນໍ, ອິທໍ ນານາກຣຓນ຺ຕິ ອຕ຺ໂຖ.

ທ຺ເວ ກປ຺ປາຕິ ເອຕ຺ຖາປິ ທຸຕິຍຊ຺ຌານໍ ວຸຕ຺ຕນເຍເນວ ຕິວິຘໍ ໂຫຕິ. ຕຕ຺ຖ ປຓີຕຠາວເນນ ນິພ຺ພຕ຺ຕານໍ ອຏ຺ຐກປ຺ປາ ອາຍຸປ຺ປມາຓໍ, ມຊ຺ຌິເມນ ຈຕ຺ຕາໂຣ, ຫີເນນ ທ຺ເວ. ຕໍ ສນ຺ຘາເຍຕໍ ວຸຕ຺ຕໍ. ຈຕ຺ຕາໂຣ ກປ຺ປາຕິ ເອຕ຺ຖ ຍໍ ເຫຏ຺ຐາ ວຸຕ຺ຕໍ ‘‘ກປ຺ໂປ, ທ຺ເວ ກປ຺ປາ’’ຕິ, ຕມ຺ປິ ອາຫຣິຕ຺ວາ ອຕ຺ໂຖ ເວທິຕພ຺ໂພ. ກປ຺ໂປຕິ ຈ ຄຸຓສ຺ສປິ ນາມໍ, ຕສ຺ມາ ກປ຺ໂປ ທ຺ເວ ກປ຺ປາ ຈຕ຺ຕາໂຣ ກປ຺ປາຕິ ອຍເມຕ຺ຖ ອຕ຺ໂຖ ທຏ຺ຐພ຺ໂພ. ອິທໍ ວຸຕ຺ຕໍ ໂຫຕິ – ໂຍ ປຐມໍ ວຸຕ຺ໂຕ ກປ຺ໂປ, ໂສ ທ຺ເວ ວາເຣ ຄເຓຕ຺ວາ ເອເກນ ຄຸເຓນ ທ຺ເວ ກປ຺ປາ ໂຫນ຺ຕິ, ທຸຕິເຍນ ຈຕ຺ຕາໂຣ, ປຸນ ເຕ ຈຕ຺ຕາໂຣ ກປ຺ປາຕິ ອິເມຫິ ຈຕູຫິ ຄຸເຓຫິ ຄຸຓິຕາ ເອເກນ ຄຸເຓນ ອຏ຺ຐ ໂຫນ຺ຕິ, ທຸຕິເຍນ ໂສຬສ, ຕຕິເຍນ ທ຺ວຕ຺ຕິໍສ, ຈຕຸຕ຺ເຖນ ຈຕຸສຏ຺ຐີຕິ. ເອວມິຘ ປຓີຕຊ຺ຌານວເສນ ຈຕຸສຏ຺ຐິ ກປ຺ປາ ຄຫິຕາຕິ ເວທິຕພ຺ພາ. ປຎ຺ຈ ກປ຺ປສຕານີຕິ ອິທໍ ປຓີຕສ຺ເສວ ອຸປປຕ຺ຕິຊ຺ຌານສ຺ສ ວເສນ ວຸຕ຺ຕໍ. ເວຫປ຺ຜເລສຸ ວາ ປຐມຊ຺ຌານຠູມິອາທີສຸ ວິຍ ຕິຓ຺ຓໍ ພ຺ຣຫ຺ມໂລການໍ ອຠາວໂຕ ເອຕ຺ຕກເມວ ອາຍຸປ຺ປມາຓໍ. ຕສ຺ມາ ເອວໍ ວຸຕ຺ຕໍ.

໔. ທຸຕິຍນານາກຣຓສຸຕ຺ຕວຓ຺ຓນາ

໑໒໔. ຈຕຸຕ຺ເຖ ຣູປເມວ ຣູປຄຕໍ. ເສສປເທສຸປິ ເອເສວ ນໂຍ. ອນິຈ຺ຈໂຕຕິອາທີສຸ ຫຸຕ຺ວາ ອຠາວຏ຺ເຐນ ອນິຈ຺ຈໂຕ, ອາພາຘຏ຺ເຐນ ໂຣຄໂຕ, ອນ຺ໂຕ ປທຸສ຺ສນຏ຺ເຐນ ຄຓ຺ຑໂຕ, ອນຸປວິຏ຺ຐຏ຺ເຐນ ສລ຺ລໂຕ, ສທຸກ຺ຂຏ຺ເຐນ ອຆໂຕ, ສມ຺ປີຬນຏ຺ເຐນ ອາພາຘໂຕ, ອວິເຘຍ຺ຍຏ຺ເຐນ ປຣໂຕ, ປລຸຊ຺ຊນຏ຺ເຐນ ປໂລກໂຕ, ນິສ຺ສຕ຺ຕຏ຺ເຐນ ສຸຎ຺ຎໂຕ, ອວສວຕ຺ຕນຏ຺ເຐນ ອນຕ຺ຕໂຕ. ເອຕ຺ຖ ຈ ‘‘ອນິຈ຺ຈໂຕ ປໂລກໂຕ’’ຕິ ທ຺ວີຫິ ປເທຫິ ອນິຈ຺ຈລກ຺ຂຓໍ ກຖິຕໍ, ‘‘ສຸຎ຺ຎໂຕ ອນຕ຺ຕໂຕ’’ຕິ ທ຺ວີຫິ ອນຕ຺ຕລກ຺ຂຓໍ, ເສເສຫິ ທຸກ຺ຂລກ຺ຂຓໍ ກຖິຕນ຺ຕິ ເວທິຕພ຺ພໍ. ສມນຸປສ຺ສຕີຕິ ຎາເຓນ ປສ຺ສຕິ. ເອວໍ ປຎ຺ຈກ຺ຂນ຺ເຘ ຕິລກ຺ຂຓໍ ອາໂຣເປຕ຺ວາ ປສ຺ສນ຺ໂຕ ຕໂຍ ມຄ຺ເຄ ຕີຓິ ຜລານິ ສຈ຺ຉິກໂຣຕິ. ສຸທ຺ຘາວາສານໍ ເທວານໍ ສຫພ຺ຍຕໍ ອຸປປຊ຺ຊຕີຕິ ຕຕ຺ຖ ຐິໂຕ ຈຕຸຕ຺ຖຊ຺ຌານໍ ຠາເວຕ຺ວາ ອຸປປຊ຺ຊຕິ.

໕-໖. ເມຕ຺ຕາສຸຕ຺ຕທ຺ວຍວຓ຺ຓນາ

໑໒໕-໑໒໖. ປຎ຺ຈເມ ປຐມຊ຺ຌານວເສນ ເມຕ຺ຕາ, ທຸຕິຍາທິວເສນ ກຣຸຓາທໂຍ ທສ຺ສິຕາ. ຉຏ຺ຐໍ ຈຕຸຕ຺ເຖ ວຸຕ຺ຕນເຍເນວ ເວທິຕພ຺ພໍ.

໗. ປຐມຕຖາຄຕອຈ຺ຉຣິຍສຸຕ຺ຕວຓ຺ຓນາ

໑໒໗. ສຕ຺ຕເມ ປາຕຸຠາວາຕິ ປາຕຸຠາເວນ. ກຸຈ຺ຉິໍ ໂອກ຺ກມຕີຕິ ເອຕ຺ຖ ກຸຈ຺ຉິໍ ໂອກ຺ກນ຺ໂຕ ໂຫຕີຕິ ອຕ຺ໂຖ. ໂອກ຺ກນ຺ເຕ ຫິ ຕສ຺ມິໍ ເອວໍ ໂຫຕິ, ນ ໂອກ຺ກມມາເນ. ອປ຺ປມາໂຓຕິ ວຸຑ຺ຒິປ຺ປມາໂຓ, ວິປຸໂລຕິ ອຕ຺ໂຖ. ອຸຬາໂຣຕິ ຕສ຺ເສວ ເວວຈນໍ. ເທວານໍ ເທວານຸຠາວນ຺ຕິ ເອຕ຺ຖ ເທວານໍ ອຍມານຸຠາໂວ – ນິວຕ຺ຖວຕ຺ຖສ຺ສ ປຠາ ທ຺ວາທສ ໂຍຊນານິ ຜຣຕິ, ຕຖາ ສຣີຣສ຺ສ, ຕຖາ ວິມານສ຺ສ, ຕໍ ອຕິກ຺ກມິຕ຺ວາຕິ ອຕ຺ໂຖ. ໂລກນ຺ຕຣິກາຕິ ຕິຓ຺ຓໍ ຕິຓ຺ຓໍ ຈກ຺ກວາຬານໍ ອນ຺ຕຣາ ເອເກໂກ ໂລກນ຺ຕຣິໂກ ໂຫຕິ, ຕິຓ຺ຓໍ ສກຏຈກ຺ການໍ ປຕ຺ຕານໍ ວາ ອຎ຺ຎມຎ຺ຎໍ ອາຫຈ຺ຈ ຐປິຕານໍ ມຊ຺ເຌ ໂອກາໂສ ວິຍ. ໂສ ປນ ໂລກນ຺ຕຣິກນິຣໂຍ ປຣິມາຓໂຕ ອຏ຺ຐໂຍຊນສຫສ຺ສປ຺ປມາໂຓ ໂຫຕິ. ອຆາຕິ ນິຈ຺ຈວິວຏາ. ອສໍວຸຕາຕິ ເຫຏ຺ຐາປິ ອປ຺ປຕິຏ຺ຐາ. ອນ຺ຘກາຣາຕິ ຕມຠູຕາ. ອນ຺ຘກາຣຕິມິສາຕິ ຈກ຺ຂຸວິຎ຺ຎາຓຸປ຺ປຕ຺ຕິນິວາຣຓໂຕ ອນ຺ຘຠາວກຣຓຕິມິສາຍ ສມນ຺ນາຄຕາ. ຕຕ຺ຖ ກິຣ ຈກ຺ຂຸວິຎ຺ຎາຓໍ ນ ຊາຍຕິ. ເອວໍມຫິທ຺ຘິການນ຺ຕິ ຈນ຺ທິມສູຣິຍາ ກິຣ ເອກປ຺ປຫາເຣເນວ ຕີສຸ ທີເປສຸ ປຎ຺ຎາຍນ຺ຕິ, ເອວໍມຫິທ຺ຘິກາ. ເອເກກາຍ ທິສາຍ ນວ ນວ ໂຍຊນສຕສຫສ຺ສານິ ອນ຺ຘກາຣໍ ວິຘມິຕ຺ວາ ອາໂລກໍ ທສ຺ເສນ຺ຕິ, ເອວໍມຫານຸຠາວາ. ອາຠາ ນານຸໂຠນ຺ຕີຕິ ປຠາ ນປ຺ປໂຫນ຺ຕິ. ເຕ ກິຣ ຈກ຺ກວາຬປພ຺ພຕສ຺ສ ເວມຊ຺ເຌນ ຈຣນ຺ຕິ ຈກ຺ກວາຬປພ຺ພຕຎ຺ຈ ອຕິກ຺ກມິຕ຺ວາ ໂລກນ຺ຕຣນິຣຍາ. ຕສ຺ມາ ເຕສໍ ຕຕ຺ຖ ອາຠາ ນປ຺ປໂຫນ຺ຕິ.

ເຍປິ ຕຕ຺ຖ ສຕ຺ຕາຕິ ເຍປິ ຕສ຺ມິໍ ໂລກນ຺ຕຣມຫານິຣເຍ ສຕ຺ຕາ ອຸປປນ຺ນາ. ກິໍ ປນ ກມ຺ມໍ ກຕ຺ວາ ຕຕ຺ຖ ອຸປ຺ປຊ຺ຊນ຺ຕີຕິ? ຠາຣິຍໍ ທາຣຸຓໍ ມາຕາປິຕູນໍ ຘມ຺ມິກສມຓພ຺ຣາຫ຺ມຓານຎ຺ຈ ອຸປຣິ ອປຣາຘໍ, ອຎ຺ຎຎ຺ຈ ທິວເສ ທິວເສ ປາຓວຘາທິສາຫສິກກມ຺ມໍ ກຕ຺ວາ ອຸປ຺ປຊ຺ຊນ຺ຕິ ຕມ຺ພປຓ຺ຓິທີເປ ອຠຍໂຈຣນາຄໂຈຣາທໂຍ ວິຍ. ເຕສໍ ອຕ຺ຕຠາໂວ ຕິຄາວຸຕິໂກ ໂຫຕິ, ວຄ຺ຄຸລີນໍ ວິຍ ທີຆນຂາ ໂຫນ຺ຕິ. ເຕ ຣຸກ຺ເຂ ວຄ຺ຄຸລິໂຍ ວິຍ ນເຂຫິ ຈກ຺ກວາຬປພ຺ພຕປາເທ ລຄ຺ຄນ຺ຕິ. ຍທາ ສໍສປ຺ປນ຺ຕາ ອຎ຺ຎມຎ຺ຎສ຺ສ ຫຕ຺ຖປາສຄຕາ ໂຫນ຺ຕິ, ອຖ ‘‘ຠກ຺ໂຂ ໂນ ລທ຺ໂຘ’’ຕິ ມຎ຺ຎມານາ ຕຕ຺ຖ ພ຺ຍາວຏາ ວິປຣິວຕ຺ຕິຕ຺ວາ ໂລກສນ຺ຘາຣກອຸທເກ ປຕນ຺ຕິ, ວາເຕ ປຫຣນ຺ເຕປິ ມຘຸກຜລານິ ວິຍ ຉິຊ຺ຊິຕ຺ວາ ອຸທເກ ປຕນ຺ຕິ, ປຕິຕມຕ຺ຕາວ ອຈ຺ຈນ຺ຕຂາເຣ ອຸທເກ ປິຏ຺ຐປິຓ຺ຑິ ວິຍ ວິລີຍນ຺ຕິ. ອຎ຺ເຎປິ ກິຣ ໂຠ ສນ຺ຕິ ສຕ຺ຕາຕິ ໂຠ ຍຖາ ມຍໍ ມຫາທຸກ຺ຂໍ ອນຸຠວາມ, ເອວໍ ອຎ຺ເຎປິ ກິຣ ສຕ຺ຕາ ອິທໍ ທຸກ຺ຂໍ ອນຸຠວນຕ຺ຖາຍ ອິຘູປປນ຺ນາຕິ ຕໍທິວສໍ ປສ຺ສນ຺ຕິ. ອຍໍ ປນ ໂອຠາໂສ ເອກຍາຄຸປານມຕ຺ຕມ຺ປິ ນ ຕິຏ຺ຐຕິ. ຍາວຕາ ນິທ຺ທາຍິຕ຺ວາ ປພຸທ຺ໂຘ ອາຣມ຺ມຓໍ ວິຠາເວຕິ, ຕຕ຺ຕກໍ ກາລໍ ໂຫຕິ. ທີຆຠາຓກາ ປນ ‘‘ອຈ຺ຉຣາສງ຺ຆາຕມຕ຺ຕເມວ ວິຊ຺ຊຸໂອຠາໂສ ວິຍ ນິຈ຺ຉຣິຕ຺ວາ ກິໍ ອິທນ຺ຕິ ຠຓນ຺ຕານໍເຍວ ອນ຺ຕຣຘາຍຕີ’’ຕິ ວທນ຺ຕິ.

໘. ທຸຕິຍຕຖາຄຕອຈ຺ຉຣິຍສຸຕ຺ຕວຓ຺ຓນາ

໑໒໘. ອຏ຺ຐເມ ຕຓ຺ຫາທິຏ຺ຐີຫິ ອລ຺ລີຍິຕພ຺ພຏ຺ເຐນ ອາລໂຍຕິ ປຎ຺ຈ ກາມຄຸຓາ, ສກລເມວ ວາ ວຏ຺ຏໍ. ອາຣມນ຺ຕິ ເອຕ຺ຖາຕິ ອາຣາໂມ, ອາລໂຍ ອາຣາໂມ ເອຕິສ຺ສາຕິ ອາລຍາຣາມາ. ອາລເຍ ຣຕາຕິ ອາລຍຣຕາ. ອາລເຍ ສມ຺ມຸທິຕາຕິ ອາລຍສມ຺ມຸທິຕາ. ອນາລເຍ ຘມ຺ເມຕິ ອາລຍປຏິປກ຺ເຂ ວິວຏ຺ຏູປນິສ຺ສິເຕ ອຣິຍຘມ຺ເມ. ສຸສ຺ສູສຕີຕິ ໂສຕຸກາໂມ ໂຫຕິ. ໂສຕໍ ໂອທຫຕີຕິ ໂສຕໍ ຐເປຕິ. ອຎ຺ຎາ ຈິຕ຺ຕໍ ອຸປຏ຺ຐເປຕີຕິ ອາຊານນຕ຺ຖາຍ ຈິຕ຺ຕໍ ປຈ຺ຈຸປຏ຺ຐເປຕິ. ມາໂນຕິ ມຎ຺ຎນາ, ມຎ຺ຎິຕພ຺ພຏ຺ເຐນ ວາ ສກລໍ ວຏ຺ຏເມວ. ມານວິນເຍ ຘມ຺ເມຕິ ມານວິນຍຘມ຺ເມ. ອຸປສມປຏິປກ຺ໂຂ ອນຸປສໂມ, ອນຸປສນ຺ຕຏ຺ເຐນ ວາ ວຏ຺ຏເມວ ອນຸປສໂມ ນາມ. ໂອປສມິເກຕິ ອຸປສມກເຣ ວິວຏ຺ຏູປນິສ຺ສິເຕ. ອວິຊ຺ຊາຍ ຄຕາ ສມນ຺ນາຄຕາຕິ ອວິຊ຺ຊາຄຕາ. ອວິຊ຺ຊຓ຺ຑໂກເສນ ປຣິໂຍນທ຺ຘຕ຺ຕາ ອຓ຺ຑໍ ວິຍ ຠູຕາຕິ ອຓ຺ຑຠູຕາ. ສມນ຺ຕໂຕ ໂອນທ຺ຘາຕິ ປຣິໂຍນທ຺ຘາ. ອວິຊ຺ຊາວິນເຍຕິ ອວິຊ຺ຊາວິນໂຍ ວຸຈ຺ຈຕິ ອຣຫຕ຺ຕໍ, ຕໍນິສ຺ສິເຕ ຘມ຺ເມ ເທສິຍມາເນຕິ ອຕ຺ໂຖ. ອິຕິ ອິມສ຺ມິໍ ສຸຕ຺ເຕ ຈຕູສຸ ຐາເນສຸ ວຏ຺ຏໍ, ຈຕູສຸ ວິວຏ຺ຏໍ ກຖິຕໍ.

໙. ອານນ຺ທອຈ຺ຉຣິຍສຸຕ຺ຕວຓ຺ຓນາ

໑໒໙. ນວເມ ຠິກ຺ຂຸປຣິສາ ອານນ຺ທໍ ທສ຺ສນາຍາຕິ ເຍ ຠຄວນ຺ຕໍ ປສ຺ສິຕຸກາມາ ເຖຣໍ ອຸປສງ຺ກມນ຺ຕິ, ເຍ ວາ ‘‘ອາຍສ຺ມາ ກິຣານນ຺ໂທ ສມນ຺ຕປາສາທິໂກ ອຠິຣູໂປ ທສ຺ສນີໂຍ ພຫຸສ຺ສຸໂຕ ສງ຺ຆໂສຠໂນ’’ຕິ ເຖຣສ຺ສ ຄຸເຓ ສຸຕ຺ວາ ອາຄຈ຺ຉນ຺ຕິ, ເຕ ສນ຺ຘາຍ ‘‘ຠິກ຺ຂຸປຣິສາ ອານນ຺ທໍ ທສ຺ສນາຍ ອຸປສງ຺ກມຕີ’’ຕິ ວຸຕ຺ຕໍ. ເອສ ນໂຍ ສພ຺ພຕ຺ຖ. ອຕ຺ຕມນາຕິ ‘‘ສວເນນ ໂນ ທສ຺ສນໍ ສເມຕີ’’ຕິ ສກມນາ ຕຸຏ຺ຐຈິຕ຺ຕາ. ຘມ຺ມນ຺ຕິ ‘‘ກຈ຺ຈິ, ອາວຸໂສ, ຂມນີຍໍ, ກຈ຺ຈິ ຍາປນີຍໍ, ກຈ຺ຈິ ໂຍນິໂສມນສິກາຣກມ຺ມໍ ກໂຣຖ, ອາຈຣິຍຸປຊ຺ຌາຍວຕ຺ຕໍ ປູເຣຖາ’’ຕິ ເອວຣູປໍ ປຏິສນ຺ຖາຣຘມ຺ມໍ. ຕຕ຺ຖ ຠິກ຺ຂຸນີສຸ ‘‘ກຈ຺ຈິ, ຠຄິນິໂຍ, ອຏ຺ຐ ຄຣຸຘມ຺ເມ ສມາທາຍ ວຕ຺ຕຖາ’’ຕິ ອິທມ຺ປິ ນານາກຣຓໍ ໂຫຕິ. ອຸປາສເກສຸ ‘‘ສ຺ວາຄຕໍ, ອຸປາສກ, ນ ເຕ ກິຎ຺ຈິ ສີສໍ ວາ ອງ຺ຄໍ ວາ ຣຸຊ຺ຊຕິ, ອໂຣຄາ ເຕ ປຸຕ຺ຕຠາຕໂຣ’’ຕິ ນ ເອວໍ ປຏິສນ຺ຖາຣໍ ກໂຣຕິ, ເອວໍ ປນ ກໂຣຕິ – ‘‘ກຖໍ, ອຸປາສກາ, ຕີຓິ ສຣຓານິ ປຎ຺ຈ ສີລານິ ຣກ຺ຂຖ, ມາສສ຺ສ ອຏ຺ຐ ອຸໂປສເຖ ກໂຣຖ, ມາຕາປິຕູນໍ ອຸປຏ຺ຐານວຕ຺ຕໍ ປູເຣຖ, ຘມ຺ມິກສມຓພ຺ຣາຫ຺ມເຓ ປຏິຊຄ຺ຄຖາ’’ຕິ. ອຸປາສິກາສຸປິ ເອເສວ ນໂຍ.

໑໐. ຈກ຺ກວຕ຺ຕິອຈ຺ຉຣິຍສຸຕ຺ຕວຓ຺ຓນາ

໑໓໐. ທສເມ ຂຕ຺ຕິຍປຣິສາຕິ ອຠິສິຕ຺ຕາ ອນຠິສິຕ຺ຕາ ຈ ຂຕ຺ຕິຍາ. ເຕ ຫິ ກິຣ ‘‘ຣາຊາ ຈກ຺ກວຕ຺ຕີ ນາມ ອຠິຣູໂປ ປາສາທິໂກ ໂຫຕິ, ອາກາເສນ ວິຈຣນ຺ໂຕ ຣຊ຺ຊໍ ອນຸສາສຕິ, ຘມ຺ມິໂກ ຘມ຺ມຣາຊາ’’ຕິ ຕສ຺ສ ຄຸຓກຖໍ ສຸຕ຺ວາ ສວເນນ ທສ຺ສນມ຺ຫິ ສເມນ຺ເຕ ອຕ຺ຕມນາ ໂຫນ຺ຕິ. ຠາສຕີຕິ ‘‘ກຖໍ, ຕາຕາ, ຣາຊຘມ຺ມໍ ປູເຣຖ, ປເວຓິໍ ຣກ຺ຂຖາ’’ຕິ ປຏິສນ຺ຖາຣໍ ກໂຣຕິ. ພ຺ຣາຫ຺ມເຓສຸ ປນ ‘‘ກຖຎ຺ຈ, ອາຈຣິຍາ, ມນ຺ເຕ ວາເຈຖ, ອນ຺ເຕວາສິກາ ມນ຺ເຕ ຄຓ຺ຫນ຺ຕິ, ທກ຺ຂິຓໍ ວາ ວຕ຺ຖານິ ວາ ສີລໍ ວາ ລຠຖາ’’ຕິ ເອວໍ ປຏິສນ຺ຖາຣໍ ກໂຣຕິ. ຄຫປຕີສຸ ‘‘ກຖໍ, ຕາຕາ, ນ ໂວ ຣາຊກຸລໂຕ ທຓ຺ເຑນ ວາ ພນ຺ຘເນນ ວາ ປີຬາ ອຕ຺ຖິ, ສມ຺ມາ ເທໂວ ຘາຣໍ ອນຸປ຺ປເວຈ຺ຉຕິ, ສສ຺ສານິ ສມ຺ປຊ຺ຊນ຺ຕີ’’ຕິ ເອວໍ ປຏິສນ຺ຖາຣໍ ກໂຣຕິ. ສມເຓສຸ ‘‘ກຖໍ, ຠນ຺ເຕ, ກຈ຺ຈິ ປພ຺ພຊິຕປຣິກ຺ຂາຣາ ສຸລຠາ, ສມຓຘມ຺ເມ ນປ຺ປມຊ຺ຊຖາ’’ຕິ ເອວໍ ປຏິສນ຺ຖາຣໍ ກໂຣຕີຕິ.

ຠຍວຄ຺ໂຄ ຕຕິໂຍ.