(໑໔) ໔. ປຸຄ຺ຄລວຄ຺ໂຄ

໑. ສໍໂຍຊນສຸຕ຺ຕວຓ຺ຓນາ

໑໓໑. ຈຕຸຕ຺ຖສ຺ສ ປຐເມ ອຸປປຕ຺ຕິປຏິລາຠິຍານີຕິ ເຍຫິ ອນນ຺ຕຣາ ອຸປປຕ຺ຕິໍ ປຏິລຠຕິ. ຠວປຏິລາຠິຍານີຕິ ອຸປປຕ຺ຕິຠວສ຺ສ ປຏິລາຠາຍ ປຈ຺ຈຍານິ. ສກທາຄາມິສ຺ສາຕິ ອິທໍ ອປ຺ປຫີນສໍໂຍຊເນສຸ ອຣິເຍສຸ ອຸຕ຺ຕມໂກຏິຍາ ຄຫິຕໍ. ຍສ຺ມາ ປນ ອນ຺ຕຣາປຣິນິພ຺ພາຍິສ຺ສ ອນ຺ຕຣາ ອຸປປຕ຺ຕິ ນຕ຺ຖິ, ຍໍ ປນ ໂສ ຕຕ຺ຖ ຌານໍ ສມາປຊ຺ຊຕິ, ຕໍ ກຸສລຕ຺ຕາ ‘‘ອຸປປຕ຺ຕິຠວສ຺ສ ປຈ຺ຈໂຍ’’ ເຕວ ສງ຺ຂ຺ຍໍ ຄຈ຺ຉຕິ. ຕສ຺ມາສ຺ສ ‘‘ອຸປປຕ຺ຕິປຏິລາຠິຍານິ ສໍໂຍຊນານິ ປຫີນານິ, ຠວປຏິລາຠິຍານິ ສໍໂຍຊນານິ ອປ຺ປຫີນານີ’’ຕິ ວຸຕ຺ຕໍ. ໂອຣມ຺ຠາຄິເຍສຸ ຈ ອປ຺ປຫີນໍ ອຸປາທາຍ ສກທາຄາມິສ຺ສ ອວິເສເສນ ‘‘ໂອຣມ຺ຠາຄິຍານິ ສໍໂຍຊນານິ ອປ຺ປຫີນານີ’’ຕິ ວຸຕ຺ຕໍ. ເສສເມຕ຺ຖ ອຸຕ຺ຕານເມວ.

໒. ປຏິຠານສຸຕ຺ຕວຓ຺ຓນາ

໑໓໒. ທຸຕິເຍ ຍຸຕ຺ຕປ຺ປຏິຠາໂນ ໂນ ມຸຕ຺ຕປ຺ປຏິຠາໂນຕິ ປຎ຺ຫໍ ກເຖນ຺ໂຕ ຍຸຕ຺ຕເມວ ກເຖຕິ, ສີຆໍ ປນ ນ ກເຖຕິ, ສຓິກເມວ ກເຖຕີຕິ ອຕ຺ໂຖ. ອິມິນາ ນເຍນ ສພ຺ພປທານິ ເວທິຕພ຺ພານິ.

໓. ອຸຄ຺ຆຏິຕຎ຺ຎູສຸຕ຺ຕວຓ຺ຓນາ

໑໓໓. ຕຕິເຍ ຈຕຸນ຺ນມ຺ປິ ປຸຄ຺ຄລານໍ ອິມິນາ ສຸຕ຺ເຕນ ວິເສໂສ ເວທິຕພ຺ໂພ –

‘‘ກຕໂມ ຈ ປຸຄ຺ຄໂລ ອຸຄ຺ຆຏິຕຎ຺ຎູ, ຍສ຺ສ ປຸຄ຺ຄລສ຺ສ ສຫ ອຸທາຫຏເວລາຍ ຘມ຺ມາຠິສມໂຍ ໂຫຕິ, ອຍໍ ວຸຈ຺ຈຕິ ປຸຄ຺ຄໂລ ອຸຄ຺ຆຏິຕຎ຺ຎູ. ກຕໂມ ຈ ປຸຄ຺ຄໂລ ວິປຎ຺ຈິຕຎ຺ຎູ, ຍສ຺ສ ປຸຄ຺ຄລສ຺ສ ວິຕ຺ຖາເຣນ ອຕ຺ເຖ ວິຠຊິຍມາເນ ຘມ຺ມາຠິສມໂຍ ໂຫຕິ, ອຍໍ ວຸຈ຺ຈຕິ ປຸຄ຺ຄໂລ ວິປຎ຺ຈິຕຎ຺ຎູ. ກຕໂມ ຈ ປຸຄ຺ຄໂລ ເນຍ຺ໂຍ, ຍສ຺ສ ປຸຄ຺ຄລສ຺ສ ອຸທ຺ເທສໂຕ ປຣິປຸຈ຺ຉໂຕ ໂຍນິໂສມນສິກໂຣໂຕ ກລ຺ຍາຓມິຕ຺ເຕ ເສວໂຕ ຠຊໂຕ ປຍິຣຸປາສໂຕ ອນຸປຸພ຺ເພນ ຘມ຺ມາຠິສມໂຍ ໂຫຕິ, ອຍໍ ວຸຈ຺ຈຕິ ປຸຄ຺ຄໂລ ເນຍ຺ໂຍ. ກຕໂມ ຈ ປຸຄ຺ຄໂລ ປທປຣໂມ, ຍສ຺ສ ປຸຄ຺ຄລສ຺ສ ພຫຸມ຺ປິ ສຸຓໂຕ ພຫຸມ຺ປິ ຠຓໂຕ ພຫຸມ຺ປິ ຘາຣຍໂຕ ພຫຸມ຺ປິ ວາຈຍໂຕ ນ ຕາຍ ຊາຕິຍາ ຘມ຺ມາຠິສມໂຍ ໂຫຕິ, ອຍໍ ວຸຈ຺ຈຕິ ປຸຄ຺ຄໂລ ປທປຣໂມ’’ຕິ (ປຸ. ປ. ໑໔໘-໑໕໑).

໔. ອຸຏ຺ຐານຜລສຸຕ຺ຕວຓ຺ຓນາ

໑໓໔. ຈຕຸຕ຺ເຖ ອຸຏ຺ຐານວີຣິເຍເນວ ທິວສໍ ວີຕິນາເມຕ຺ວາ ຕສ຺ສ ນິສ຺ສນ຺ທຜລມຕ຺ຕໍ ກິຎ຺ຈິເທວ ລຠິຕ຺ວາ ຊີວິກໍ ກປ຺ເປຕິ, ຕໍ ປນ ອຸຏ຺ຐານໍ ອາຄມ຺ມ ກິຎ຺ຈິ ປຸຎ຺ຎຜລໍ ນປ຺ປຏິລຠຕິ, ອຍໍ ອຸຏ຺ຐານຜລູປຊີວີ ນ ກມ຺ມຜລູປຊີວີ ນາມ. ຈາຕຸມຫາຣາຊິເກ ປນ ເທເວ ອາທິໍ ກຕ຺ວາ ສພ຺ເພປິ ເທວາ ອຸຏ຺ຐານວີຣິເຍນ ວິນາ ປຸຎ຺ຎຜລສ຺ເສວ ອຸປຊີວນໂຕ ກມ຺ມຜລູປຊີວິໂນ ນ ອຸຏ຺ຐານຜລູປຊີວິໂນ ນາມ. ຣາຊຣາຊມຫາມຕ຺ຕາທໂຍ ອຸຏ຺ຐານຜລູປຊີວິໂນ ຈ ກມ຺ມຜລູປຊີວິໂນ ຈ. ເນຣຍິກສຕ຺ຕາ ເນວ ອຸຏ຺ຐານຜລູປຊີວິໂນ ນ ກມ຺ມຜລູປຊີວິໂນ. ອິມສ຺ມິໍ ສຸຕ຺ເຕ ປຸຎ຺ຎຜລເມວ ກມ຺ມຜລນ຺ຕິ ອຘິປ຺ເປຕໍ, ຕຎ຺ຈ ເຕສໍ ນຕ຺ຖິ.

໕. ສາວຊ຺ຊສຸຕ຺ຕວຓ຺ຓນາ

໑໓໕. ປຎ຺ຈເມ ປຐໂມ ອນ຺ຘພາລປຸຖຸຊ຺ຊໂນ, ທຸຕິໂຍ ອນ຺ຕຣນ຺ຕຣາ ກຸສລກາຣໂກ ໂລກິຍປຸຖຸຊ຺ຊໂນ, ຕຕິໂຍ ໂສຕາປນ຺ໂນ, ສກທາຄາມິອນາຄາມິໂນປິ ເອເຕເນວ ສງ຺ຄຫິຕາ. ຈຕຸຕ຺ໂຖ ຂີຓາສໂວ. ໂສ ຫິ ເອກນ຺ເຕເນວ ອນວຊ຺ໂຊ.

໖-໗. ສີລສຸຕ຺ຕາທິວຓ຺ຓນາ

໑໓໖-໑໓໗. ຉຏ຺ເຐ ປຐໂມ ໂລກິຍມຫາຊໂນ, ທຸຕິໂຍ ສຸກ຺ຂວິປສ຺ສໂກ ໂສຕາປນ຺ໂນ ຈ ສກທາຄາມີ ຈ, ຕຕິໂຍ ອນາຄາມີ. ໂສ ຫິ ຍສ຺ມາ ຕງ຺ຂຓິກມ຺ປິ ອຸປປຕ຺ຕິນິມິຕ຺ຕກໍ ຌານໍ ປຏິລຠຕິເຍວ, ຕສ຺ມາ ສຸກ຺ຂວິປສ຺ສໂກປິ ສມາຘິສ຺ມິໍ ປຣິປູຣກາຣີເຍວ. ຈຕຸຕ຺ໂຖ ຂີຓາສໂວເຍວ. ໂສ ຫິ ສພ຺ເພສໍ ສີລາທິປຈ຺ຈນີການໍ ປຫີນຕ຺ຕາ ສພ຺ພຕ຺ຖ ປຣິປູຣກາຣີ ນາມ. ສຕ຺ຕເມປິ ຉຏ຺ເຐ ວຸຕ຺ຕນເຍເນວ ປຸຄ຺ຄລປຣິຈ຺ເຉໂທ ເວທິຕພ຺ໂພ.

໘. ນິກຏ຺ຐສຸຕ຺ຕວຓ຺ຓນາ

໑໓໘. ອຏ຺ຐເມ ນິກຏ຺ຐກາໂຍຕິ ນິຄ຺ຄຕກາໂຍ. ອນິກຏ຺ຐຈິຕ຺ໂຕຕິ ອນຸປວິຏ຺ຐຈິຕ຺ໂຕ. ກາເຍເນວ ຄາມໂຕ ນິກ຺ຂນ຺ໂຕ, ຈິຕ຺ເຕນ ອຣຎ຺ເຎ ວສນ຺ໂຕປິ ຄາມເມວ ປວິຏ຺ໂຐຕິ ວຸຕ຺ຕໍ ໂຫຕິ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

໙. ຘມ຺ມກຖິກສຸຕ຺ຕວຓ຺ຓນາ

໑໓໙. ນວເມ ອສຫິຕນ຺ຕິ ອຕ຺ເຖນ ອສໍຍຸຕ຺ຕໍ. ນ ກຸສລາ ໂຫຕີຕິ ນ ເຉກາ ໂຫຕິ. ສຫິຕາສຫິຕສ຺ສາຕິ ອຕ຺ຖນິສ຺ສິຕສ຺ສ ວາ ອນິສ຺ສິຕສ຺ສ ວາ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ.

໑໐. ວາທີສຸຕ຺ຕວຓ຺ຓນາ

໑໔໐. ທສເມ ອຕ຺ຖໂຕ ປຣິຍາທານໍ ຄຈ຺ຉຕີຕິ ອຏ຺ຐກຖໍ ປຸຈ຺ຉິໂຕ ປຣິຍາທານໍ ປຣິກ຺ຂຍໍ ຄຈ຺ຉຕິ, ກເຖຕຸໍ ນ ສກ຺ໂກຕິ. ໂນ ພ຺ຍຎ຺ຊນໂຕຕິ ພ຺ຍຎ຺ຊນໍ ປນສ຺ສ ປວຕ຺ຕຕິ ນ ປຣິຍາທິຍຕິ. ເອເສວ ນໂຍ ສພ຺ພຕ຺ຖາຕິ.

ປຸຄ຺ຄລວຄ຺ໂຄ ຈຕຸຕ຺ໂຖ.