໗. ສຸປ຺ປວາສາສຸຕ຺ຕວຓ຺ຓນາ

໕໗. ສຕ຺ຕເມ ປຊ຺ຊນິກນ຺ຕິ ຕສ຺ສ ນິຄມສ຺ສ ນາມໍ. ໂກລິຍານນ຺ຕິ ໂກລຣາຊກຸລານໍ. ອາຍຸໍ ໂຂ ປນ ທຕ຺ວາຕິ ອາຍຸທານໍ ທຕ຺ວາ. ອາຍຸສ຺ສ ຠາຄິນີ ໂຫຕີຕິ ອາຍຸຠາຄປຏິລາຠິນີ ໂຫຕິ, ອາຍຸໍ ວາ ຠຊນິກາ ໂຫຕິ, ອາຍຸປ຺ປຏິລາຠິນີຕິ ອຕ຺ໂຖ. ເສສປເທສຸປິ ເອເສວ ນໂຍ.

ຣສສາ ອຸເປຕນ຺ຕິ ຣເສນ ອຸເປຕໍ ຣສສມ຺ປນ຺ນໍ. ອຸຊ຺ຊຸຄເຕສູຕິ ກາຍວງ຺ກາທິຣຫິຕຕ຺ຕາ ອຸຊຸກເມວ ຄເຕສຸ ຂີຓາສເວສຸ. ຈຣຓູປປນ຺ເນສູຕິ ປຎ຺ຈທສຫິ ຈຣຓຘມ຺ເມຫິ ສມນ຺ນາຄເຕສຸ. ມຫຄ຺ຄເຕສູຕິ ມຫຕ຺ຕໍ ຄເຕສຸ. ຂີຓາສວານຎ຺ເຎເວຕໍ ນາມໍ. ປຸຎ຺ເຎນ ປຸຎ຺ຎໍ ສໍສນ຺ທມານາຕິ ປຸຎ຺ເຎນ ສທ຺ຘິໍ ປຸຎ຺ຎໍ ຆຏຍມານາ. ມຫປ຺ຜລາ ໂລກວິທູນ ວຓ຺ຓິຕາຕິ ເອວຣູປາ ທານສງ຺ຂາຕາ ທກ຺ຂິຓາ ຕິວິຘໂລກໍ ວິທິຕໍ ກຕ຺ວາ ຐິຕຕ຺ຕາ ໂລກວິທູນໍ ພຸທ຺ຘານໍ ວຓ຺ຓິຕາ, ພຸທ຺ເຘຫິ ປສຕ຺ຖາຕິ ອຕ຺ໂຖ. ຍຎ຺ຎມນຸສ຺ສຣນ຺ຕາຕິ ຍຎ຺ຎໍ ທານໍ ອນຸສ຺ສຣນ຺ຕາ. ເວທຊາຕາຕິ ຕຸຏ຺ຐິຊາຕາ.