໒. ທຸຕິຍປຓ຺ຓາສກໍ

(໖) ໑. ປຸຎ຺ຎາຠິສນ຺ທວຄ຺ໂຄ

໑. ປຐມປຸຎ຺ຎາຠິສນ຺ທສຸຕ຺ຕວຓ຺ຓນາ

໕໑. ທຸຕິຍສ຺ສ ປຐເມ ປຸຎ຺ຎາຠິສນ຺ທາຕິ ປຸຎ຺ຎສ຺ສ ອຠິສນ຺ທາ, ປຸຎ຺ຎປ຺ປຕ຺ຕິໂຍຕິ ອຕ຺ໂຖ. ກຸສລາຠິສນ຺ທາຕິ ຕສ຺ເສວ ເວວຈນໍ. ເຕ ປເນເຕ ສຸຂໍ ອາຫຣນ຺ຕີຕິ ສຸຂສ຺ສາຫາຣາ. ສຸຏ຺ຐຸ ອຄ຺ຄານໍ ຣູປາທີນໍ ທາຍກາຕິ ໂສວຄ຺ຄິກາ. ສຸໂຂ ເນສໍ ວິປາໂກຕິ ສຸຂວິປາກາ. ສຄ຺ເຄ ອຸປປຕ຺ຕິ ສຄ຺ໂຄ, ສຄ຺ຄາຍ ສໍວຕ຺ຕນ຺ຕີຕິ ສຄ຺ຄສໍວຕ຺ຕນິກາ. ຈີວຣໍ ປຣິຠຸຎ຺ຊມາໂນຕິ ຈີວຣຕ຺ຖາຍ ວຕ຺ຖໍ ລຠິຕ຺ວາ ສູຈິສຸຕ຺ຕາທີນໍ ອຠາເວນ ຕໍ ນິກ຺ຂິປນ຺ໂຕປິ ກໂຣນ຺ໂຕປິ ປາຣຸປນ຺ໂຕປິ ຊິຓ຺ຓກາເລ ປຈ຺ຈຕ຺ຖຣຓໍ ກໂຣນ຺ໂຕປິ ປຈ຺ຈຕ຺ຖຣິຕຸມ຺ປິ ອສກ຺ກຸເຓຍ຺ຍໍ ຠູມຕ຺ຖຣຓໍ ກໂຣນ຺ໂຕປິ ຠູມຕ຺ຖຣຓສ຺ສ ອນນຸຈ຺ຉວິກໍ ຜາເລຕ຺ວາ ປາທປຸຎ຺ຉນໍ ກໂຣນ຺ໂຕປິ ‘‘ປຣິຠຸຎ຺ຊມາໂນ’’ຕ຺ເວວ ວຸຈ຺ຈຕິ. ຍທາ ປນ ‘‘ປາທປຸຎ຺ຉນມ຺ປິ ນ ສກ຺ກາ ອິທ’’ນ຺ຕິ ສມ຺ມຊ຺ຊິຕ຺ວາ ຉຑ຺ຑິຕໍ ໂຫຕິ, ຕທາ ປຣິຠຸຎ຺ຊມາໂນ ນາມ ນ ໂຫຕິ. ອປ຺ປມາຓໍ ເຈໂຕສມາຘິນ຺ຕິ ອຣຫຕ຺ຕຜລສມາຘິໍ. ອປ຺ປມາໂຓ ຕສ຺ສ ປຸຎ຺ຎາຠິສນ຺ໂທຕິ ອິມິນາ ທາຍກສ຺ສ ປຸຎ຺ຎເຈຕນາຍ ອປ຺ປມາຓຕໍ ກເຖຕິ. ຕສ຺ສ ຫິ ‘‘ຂີຓາສໂວ ເມ ຈີວຣໍ ປຣິຠຸຎ຺ຊຕີ’’ຕິ ປຸນປ຺ປຸນໍ ອນຸສ຺ສຣຓວເສນ ປວຕ຺ຕາ ປຸຎ຺ຎເຈຕນາ ອປ຺ປມາຓາ ໂຫຕິ. ຕໍ ສນ຺ຘາເຍຕໍ ວຸຕ຺ຕໍ. ປິຓ຺ຑປາຕາທີສຸ ປນ ໂຍ ປິຓ຺ຑປາຕໍ ປຣິຠຸຎ຺ຊິຕ຺ວາ ສຕ຺ຕາຫມ຺ປິ ເຕເນວ ຍາເປຕິ, ອຎ຺ຎໍ ນ ປຣິຠຸຎ຺ຊຕິ, ໂສ ສຕ຺ຕາຫມ຺ປິ ຕໍເຍວ ປິຓ຺ຑປາຕໍ ປຣິຠຸຎ຺ຊມາໂນ ນາມ ໂຫຕິ. ເອກສ຺ມິໍ ປນ ເສນາສເນ ຣຕ຺ຕິຏ຺ຐານທິວາຏ຺ຐານາທີສຸ ຈງ຺ກມນ຺ໂຕປິ ຍາວ ຕໍ ເສນາສນໍ ປຫາຍ ອຎ຺ຎໍ ນ ຄຓ຺ຫາຕິ, ຕາວ ປຣິຠຸຎ຺ຊມາໂນ ນາມ ໂຫຕິ. ເອເກນ ປນ ເຠສຊ຺ເຊນ ພ຺ຍາຘິມ຺ຫິ ວູປສນ຺ເຕ ຍາວ ອຎ຺ຎໍ ເຠສຊ຺ຊໍ ນ ປຣິຠຸຎ຺ຊຕິ, ຕາວເທວ ປຣິຠຸຎ຺ຊມາໂນ ນາມ ໂຫຕິ.

ພຫຸເຠຣວນ຺ຕິ ພຫູຫິ ເຠຣວາຣມ຺ມເຓຫິ ສມນ຺ນາຄຕໍ. ຣຕນວຣານນ຺ຕິ ສຕ຺ຕນ຺ນມ຺ປິ ວຣຣຕນານໍ. ອາລຍນ຺ຕິ ນິວາສຏ຺ຐານໍ. ປຸຖູ ສວນ຺ຕີຕິ ພຫຸກາ ຫຸຕ຺ວາ ສນ຺ທມານາ. ເສສເມຕ຺ຖ ອຸຕ຺ຕານເມວ.

໒. ທຸຕິຍປຸຎ຺ຎາຠິສນ຺ທສຸຕ຺ຕວຓ຺ຓນາ

໕໒. ທຸຕິເຍ ອຣິຍກນ຺ເຕຫີຕິ ມຄ຺ຄຜລສມ຺ປຍຸຕ຺ເຕຫິ. ຕານິ ຫິ ອຣິຍານໍ ກນ຺ຕານິ ໂຫນ຺ຕິ ປິຍານິ ມນາປານິ. ເສສໍ ສຸຕ຺ຕນ຺ເຕ ຕາວ ຍໍ ວຕ຺ຕພ຺ພໍ ສິຍາ, ຕໍ ວິສຸທ຺ຘິມຄ຺ເຄ (ວິສຸທ຺ຘິ. ໑.໑໒໔ ອາທໂຍ) ວຸຕ຺ຕເມວ.

ຄາຖາສຸ ປນ ສທ຺ຘາຕິ ໂສຕາປນ຺ນສ຺ສ ສທ຺ຘາ ອຘິປ຺ເປຕາ. ສີລມ຺ປິ ໂສຕາປນ຺ນສ຺ສ ສີລເມວ. ອຸຊຸຠູຕຎ຺ຈ ທສ຺ສນນ຺ຕິ ກາຍວງ຺ກາທີນໍ ອຠາເວນ ຂີຓາສວສ຺ສ ທສ຺ສນໍ ອຸຊຸຠູຕທສ຺ສນໍ ນາມ. ອາຫູຕິ ກຖຍນ຺ຕິ. ປສາທນ຺ຕິ ພຸທ຺ຘຘມ຺ມສງ຺ເຆສຸ ປສາທໍ. ຘມ຺ມທສ຺ສນນ຺ຕິ ຈຕຸສຈ຺ຈຘມ຺ມທສ຺ສນໍ.

໓. ປຐມສໍວາສສຸຕ຺ຕວຓ຺ຓນາ

໕໓. ຕຕິເຍ ສມ຺ພຫຸລາປິ ໂຂ ຄຫປຕີ ຈ ຄຫປຕານິໂຍ ຈາຕິ ພຫຸກາ ຄຫປຕໂຍ ຈ ຄຫປຕານິໂຍ ຈ ອາວາຫວິວາຫກຣຓຕ຺ຖາຍ ຄຈ຺ຉນ຺ຕາ ຕເມວ ມຄ຺ຄໍ ປຏິປນ຺ນາ ໂຫນ຺ຕິ. ສໍວາສາຕິ ສຫວາສາ ເອກໂຕວາສາ. ຉໂວ ຉວາຍາຕິ ຄຸຓມຣເຓນ ມຕຕ຺ຕາ ຉໂວ ຄຸຓມຣເຓເນວ ມຕາຍ ຉວາຍ ສທ຺ຘິໍ. ເທວິຍາ ສທ຺ຘິນ຺ຕິ ຄຸເຓຫິ ເທວິຠູຕາຍ ສທ຺ຘິໍ. ທຸສ຺ສີໂລຕິ ນິສ຺ສີໂລ. ປາປຘມ຺ໂມຕິ ລາມກຘມ຺ໂມ. ອກ຺ໂກສກປຣິຠາສໂກຕິ ທສຫິ ອກ຺ໂກສວຕ຺ຖູຫິ ອກ຺ໂກສໂກ, ຠຍໍ ທສ຺ເສຕ຺ວາ ສນ຺ຕຊ຺ຊເນນ ປຣິຠາສໂກ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ກທຣິຍາຕິ ຖທ຺ຘມຈ຺ຉຣິໂນ. ຊານິປຕໂຍຕິ ຊຍມ຺ປຕິກາ. ວທຎ຺ຎູຕິ ຍາຈການໍ ວຈນສ຺ສ ອຕ຺ຖໍ ຊານນ຺ຕິ. ສຎ຺ຎຕາຕິ ສີລສໍຍເມນ ສມນ຺ນາຄຕາ. ຘມ຺ມຊີວິໂນຕິ ຘມ຺ເມ ຐຕ຺ວາ ຊີວິກໍ ກປ຺ເປນ຺ຕີຕິ ຘມ຺ມຊີວິໂນ. ອຕ຺ຖາສໍ ປຈຸຣາ ໂຫນ຺ຕີຕິ ວຑ຺ຒິສງ຺ຂາຕາ ອຕ຺ຖາ ເອເຕສໍ ພຫູ ໂຫນ຺ຕິ. ຜາສຸກໍ ອຸປຊາຍຕີຕິ ອຎ຺ຎມຎ຺ຎໍ ຜາສຸວິຫາໂຣ ຊາຍຕິ. ກາມກາມິໂນຕິ ກາເມ ກາມຍມານາ.

໔. ທຸຕິຍສໍວາສສຸຕ຺ຕວຓ຺ຓນາ

໕໔. ຈຕຸຕ຺ເຖ ກມ຺ມປຖວເສນ ເທສນາ ປວຕ຺ຕິຕາ. ເສສໍ ຕາທິສເມວ. ອິເມສຸ ປນ ທ຺ວີສຸປິ ສຸຕ຺ເຕສຸ ອຄາຣິກປຏິປທາ ກຖິຕາ. ໂສຕາປນ຺ນສກທາຄາມີນມ຺ປິ ວຏ຺ຏຕິ.

໕-໖. ສມຊີວີສຸຕ຺ຕທ຺ວຍວຓ຺ຓນາ

໕໕-໕໖. ປຎ຺ຈເມ ເຕນຸປສງ຺ກມີຕິ ກິມຕ຺ຖໍ ອຸປສງ຺ກມິ? ອນຸຄ຺ຄຓ຺ຫນຕ຺ຖໍ. ຕຖາຄໂຕ ຫິ ຕໍ ຣຏ຺ຐໍ ປາປຸຓນ຺ໂຕ ອິເມສໍເຍວ ທ຺ວິນ຺ນໍ ສງ຺ຄຓ຺ຫນຕ຺ຖາຍ ປາປຸຓາຕິ. ນກຸລປິຕາ ກິຣ ປຎ຺ຈ ຊາຕິສຕານິ ຕຖາຄຕສ຺ສ ປິຕາ ອໂຫສິ, ປຎ຺ຈ ຊາຕິສຕານິ ມຫາປິຕາ, ປຎ຺ຈ ຊາຕິສຕານິ ຈູຬປິຕາ. ນກຸລມາຕາປິ ປຎ຺ຈ ຊາຕິສຕານິ ຕຖາຄຕສ຺ສ ມາຕາ ອໂຫສິ, ປຎ຺ຈ ຊາຕິສຕານິ ມຫາມາຕາ, ປຎ຺ຈ ຊາຕິສຕານິ ຈູຬມາຕາ. ເຕ ສຕ຺ຖຸ ທິຏ຺ຐກາລໂຕ ປຏ຺ຐາຍ ປຸຕ຺ຕສິເນຫໍ ປຏິລຠິຕ຺ວາ ‘‘ຫນ຺ຕາຕ, ຫນ຺ຕາຕາ’’ຕິ ວຈ຺ຉກໍ ທິສ຺ວາ ວຈ຺ຉຄິທ຺ຘິນີ ຄາວີ ວິຍ ວິຣວມານາ ອຸປສງ຺ກມິຕ຺ວາ ປຐມທສ຺ສເນເນວ ໂສຕາປນ຺ນາ ຊາຕາ. ນິເວສເນ ປຎ຺ຈສຕານໍ ຠິກ຺ຂູນໍ ອາສນານິ ສທາ ປຎ຺ຎຕ຺ຕາເນວ ໂຫນ຺ຕິ. ອິຕິ ຠຄວາ ເຕສໍ ອນຸຄ຺ຄຓ຺ຫນຕ຺ຖາຍ ອຸປສງ຺ກມິ. ອຕິຈຣິຕາຕິ ອຕິກ຺ກມິຕາ. ອຠິສມ຺ປຣາຍຎ຺ຈາຕິ ປຣໂລເກ ຈ. ສມສທ຺ຘາຕິ ສທ຺ຘາຍ ສມາ ເອກສທິສາ. ສີລາທີສຸປິ ເອເສວ ນໂຍ. ຉຏ຺ຐໍ ເກວລໍ ຠິກ຺ຂູນໍ ເທສິຕໍ. ເສສເມຕ຺ຖ ຕາທິສເມວ.

໗. ສຸປ຺ປວາສາສຸຕ຺ຕວຓ຺ຓນາ

໕໗. ສຕ຺ຕເມ ປຊ຺ຊນິກນ຺ຕິ ຕສ຺ສ ນິຄມສ຺ສ ນາມໍ. ໂກລິຍານນ຺ຕິ ໂກລຣາຊກຸລານໍ. ອາຍຸໍ ໂຂ ປນ ທຕ຺ວາຕິ ອາຍຸທານໍ ທຕ຺ວາ. ອາຍຸສ຺ສ ຠາຄິນີ ໂຫຕີຕິ ອາຍຸຠາຄປຏິລາຠິນີ ໂຫຕິ, ອາຍຸໍ ວາ ຠຊນິກາ ໂຫຕິ, ອາຍຸປ຺ປຏິລາຠິນີຕິ ອຕ຺ໂຖ. ເສສປເທສຸປິ ເອເສວ ນໂຍ.

ຣສສາ ອຸເປຕນ຺ຕິ ຣເສນ ອຸເປຕໍ ຣສສມ຺ປນ຺ນໍ. ອຸຊ຺ຊຸຄເຕສູຕິ ກາຍວງ຺ກາທິຣຫິຕຕ຺ຕາ ອຸຊຸກເມວ ຄເຕສຸ ຂີຓາສເວສຸ. ຈຣຓູປປນ຺ເນສູຕິ ປຎ຺ຈທສຫິ ຈຣຓຘມ຺ເມຫິ ສມນ຺ນາຄເຕສຸ. ມຫຄ຺ຄເຕສູຕິ ມຫຕ຺ຕໍ ຄເຕສຸ. ຂີຓາສວານຎ຺ເຎເວຕໍ ນາມໍ. ປຸຎ຺ເຎນ ປຸຎ຺ຎໍ ສໍສນ຺ທມານາຕິ ປຸຎ຺ເຎນ ສທ຺ຘິໍ ປຸຎ຺ຎໍ ຆຏຍມານາ. ມຫປ຺ຜລາ ໂລກວິທູນ ວຓ຺ຓິຕາຕິ ເອວຣູປາ ທານສງ຺ຂາຕາ ທກ຺ຂິຓາ ຕິວິຘໂລກໍ ວິທິຕໍ ກຕ຺ວາ ຐິຕຕ຺ຕາ ໂລກວິທູນໍ ພຸທ຺ຘານໍ ວຓ຺ຓິຕາ, ພຸທ຺ເຘຫິ ປສຕ຺ຖາຕິ ອຕ຺ໂຖ. ຍຎ຺ຎມນຸສ຺ສຣນ຺ຕາຕິ ຍຎ຺ຎໍ ທານໍ ອນຸສ຺ສຣນ຺ຕາ. ເວທຊາຕາຕິ ຕຸຏ຺ຐິຊາຕາ.

໘. ສຸທຕ຺ຕສຸຕ຺ຕວຓ຺ຓນາ

໕໘. ອຏ຺ຐເມ ສຎ຺ຎຕານນ຺ຕິ ກາຍວາຈາຫິ ສໍຍຕານໍ. ປຣທຕ຺ຕໂຠຊິນນ຺ຕິ ປເຣຫິ ທິນ຺ນເມວ ຠຸຎ຺ຊິຕ຺ວາ ຍາເປນ຺ຕານໍ. ກາເລນາຕິ ຍຸຕ຺ຕປ຺ປຕ຺ຕກາເລນ. ສກ຺ກຈ຺ຈ ທທາຕີຕິ ສຫຕ຺ຖາ ສກ຺ກາຣໍ ກຕ຺ວາ ທທາຕິ. ຈຕ຺ຕາຣິ ຐານານິ ອນຸປ຺ປເວຈ຺ຉຕີຕິ ຈຕ຺ຕາຣິ ກາຣຓານິ ອນຸປ຺ປເວເສຕິ ທທາຕິ. ຍສວາ ໂຫຕີຕິ ມຫາປຣິວາໂຣ ໂຫຕິ. ນວມໍ ເກວລໍ ຠິກ຺ຂູນໍ ກຖິຕໍ. ເສສເມຕ຺ຖ ຕາທິສເມວ.

໑໐. ຄິຫິສາມີຈິສຸຕ຺ຕວຓ຺ຓນາ

໖໐. ທສເມ ຄິຫິສາມີຈິປຏິປທນ຺ຕິ ຄິຫີນໍ ອນຸຈ຺ຉວິກໍ ປຏິປຕ຺ຕິໍ. ປຈ຺ຈຸປຏ຺ຐິໂຕ ໂຫຕີຕິ ອຕິຫຣິຕ຺ວາ ທາຕຸກາມຕາຍ ປຕິອຸປຏ຺ຐິໂຕ ໂຫຕິ ອຸປຄໂຕ, ຠິກ຺ຂຸສງ຺ຆສ຺ສ ຈີວຣໍ ເທຕີຕິ ອຕ຺ໂຖ.

ອຸປຏ຺ຐິຕາຕິ ອຸປຏ຺ຐາຍໂກ. ເຕສໍ ທິວາ ຈ ຣຕ຺ໂຕ ຈາຕິ ເຍ ເອວໍ ຈຕູຫິ ປຈ຺ຈເຍຫິ ອຸປຏ຺ຐຫນ຺ຕິ, ເຕສໍ ທິວາ ຈ ຣຕ຺ຕິຎ຺ຈ ປຣິຈ຺ຈາຄວເສນ ຈ ອນຸສ຺ສຣຓວເສນ ຈ ສທາ ປຸຎ຺ຎໍ ປວຑ຺ຒຕິ. ສຄ຺ຄຎ຺ຈ ກມຕິຏ຺ຐານນ຺ຕິ ຕາທິໂສ ຈ ຠທ຺ທກໍ ກມ຺ມໍ ກຕ຺ວາ ສຄ຺ຄຏ຺ຐານໍ ອຸປຄຈ຺ຉຕິ. ອິເມສຸ ຈຕູສຸປິ ສຸຕ຺ເຕສຸ ອາຄາຣິຍປຏິປທາ ກຖິຕາ. ໂສຕາປນ຺ນສກທາຄາມີນມ຺ປິ ວຏ຺ຏຕິ.

ປຸຎ຺ຎາຠິສນ຺ທວຄ຺ໂຄ ປຐໂມ.

(໗) ໒. ປຕ຺ຕກມ຺ມວຄ຺ໂຄ

໑. ປຕ຺ຕກມ຺ມສຸຕ຺ຕວຓ຺ຓນາ

໖໑. ທຸຕິຍສ຺ສ ປຐເມ ອນິຏ຺ຐປຏິກ຺ເຂເປນ ອິຏ຺ຐາ. ມເນ ກມນ຺ຕິ ປວິສນ຺ຕີຕິ ກນ຺ຕາ. ມນໍ ອປ຺ປາຍນ຺ຕິ ປວຑ຺ເຒນ຺ຕີຕິ ມນາປາ. ທຸລ຺ລຠາຕິ ປຣມທຸລ຺ລຠາ. ໂຠຄາຕິ ຠຸຎ຺ຊິຕພ຺ພາ ຣູປາທໂຍ ວິສຍາ. ສຫຘມ຺ເມນາຕິ ຘມ຺ເມເນວ ສທ຺ຘິໍ ອຸປ຺ປຊ຺ຊນ຺ຕຸ, ມາ ຘມ຺ມູປຆາຕໍ ກຕ຺ວາ ອຘມ຺ເມນາຕິ. ອຖວາ ສຫຘມ຺ເມນາຕິ ສກາຣເຓນ, ເຕນ ເຕນ ເສນາປຕິເສຏ຺ຐິຏ຺ຐານາທິກາຣເຓນ ສທ຺ຘິໍເຍວ ອຸປ຺ປຊ຺ຊນ຺ຕູຕິ ອຕ຺ໂຖ. ຍໂສຕິ ປຣິວາຣສມ຺ປຕ຺ຕິ. ສຫ ຎາຕີຠີຕິ ຎາຕເກຫິ ສທ຺ຘິໍ. ສຫ ອຸປຊ຺ຌາເຍຫີຕິ ສຸຂທຸກ຺ເຂສຸ ອຸປນິຊ຺ຌາຍິຕພ຺ພຕ຺ຕາ ອຸປຊ຺ຌາຍສງ຺ຂາເຕຫິ ສນ຺ທິຏ຺ຐສມ຺ຠຕ຺ເຕຫິ ສທ຺ຘິໍ.

ອກິຈ຺ຈໍ ກໂຣຕີຕິ ອກາຕພ຺ພໍ ກໂຣຕິ. ກິຈ຺ຈໍ ອປຣາເຘຕີຕິ ກຕ຺ຕພ຺ພຍຸຕ຺ຕກໍ ກິຈ຺ຈໍ ອກໂຣນ຺ໂຕ ຕໍ ອປຣາເຘຕິ ນາມ. ຘໍສຕີຕິ ປຕຕິ ປຣິຫາຍຕິ. ອຠິຊ຺ຌາວິສມໂລຠນ຺ຕິ ອຠິຊ຺ຌາສງ຺ຂາຕໍ ວິສມໂລຠໍ. ປຊຫຕີຕິ ນຸທຕິ ນີຫຣຕິ. ມຫາປຎ຺ໂຎຕິ ມຫນ຺ຕປຎ຺ໂຎ. ປຸຖຸປຎ຺ໂຎຕິ ປຸຖຸລປຎ຺ໂຎ. ອາປາຕທໂສຕິ ຕໍ ຕໍ ອຕ຺ຖໍ ອາປາເຕຕິ ຕເມວ ປສ຺ສຕິ, ສຸຂຸມມ຺ປິສ຺ສ ອຕ຺ຖຊາຕໍ ອາປາຕໍ ອາຄຈ຺ຉຕິເຍວາຕິ ອຕ຺ໂຖ.

ອຸຏ຺ຐານວີຣິຍາຘິຄເຕຫີຕິ ອຸຏ຺ຐານສງ຺ຂາເຕນ ວີຣິເຍນ ອຘິຄເຕຫິ. ພາຫາພລປຣິຈິເຕຫີຕິ ພາຫາພເລນ ປຣິຈິເຕຫິ ວຑ຺ຒິເຕຫິ. ເສທາວກ຺ຂິຕ຺ເຕຫີຕິ ອວກ຺ຂິຕ຺ຕເສເທຫິ, ເສທໍ ມຸຎ຺ຈິຕ຺ວາ ວາຍາເມນ ປໂຍເຄນ ສມຘິຄເຕຫີຕິ ອຕ຺ໂຖ. ຘມ຺ມິເກຫີຕິ ຘມ຺ມຍຸຕ຺ເຕຫິ. ຘມ຺ມລທ຺ເຘຫີຕິ ທສກຸສລກມ຺ມປຖຘມ຺ເມ ອໂກເປຕ຺ວາ ລທ຺ເຘຫິ. ປຕ຺ຕກມ຺ມານີຕິ ຍຸຕ຺ຕກມ຺ມານິ ອນຸຈ຺ຉວິກກມ຺ມານິ. ສຸເຂຕີຕິ ສຸຂິຕໍ ກໂຣຕິ. ປີເຓຕີຕິ ປີຓິຕໍ ພລສມ຺ປນ຺ນໍ ກໂຣຕິ. ຐານຄຕໍ ໂຫຕີຕິ ກາຣຓຄຕໍ ໂຫຕິ. ກິໍ ປນ ຕນ຺ຕິ? ຈຕູສຸ ປຕ຺ຕກມ຺ເມສຸ ເອກໍ ໂຠເຄຫິ ກຕ຺ຕພ຺ພກມ຺ມໍ ໂຠຄຊາຕເມວ ຐານຄຕໍ. ປຕ຺ຕຄຕນ຺ຕິ ຍຸຕ຺ຕປ຺ປຕ຺ຕຏ຺ຐານຄຕໍ. ອາຍຕນໂສ ປຣິຠຸຕ຺ຕນ຺ຕິ ກາຣເຓເນວ ປຣິຠຸຕ຺ຕໍ ໂຠຄຊາຕໍ ໂຫຕິ.

ປຣິໂຍຘາຍ ສໍວຕ຺ຕຕີຕິ ປິທຫິຕ຺ວາ ວຕ຺ຕຕິ. ຍຖາ ອຄ຺ຄິອາທີຫິ ອຸປ຺ປນ຺ນາສຸ ອາປທາສຸ, ເອວໍ ອາທິຕ຺ຕເຄຫນິພ຺ພາປນາທີນໍ ອຕ຺ຖາຍ ຘນປຣິຈ຺ຈາຄໍ ກຕ຺ວາ ຕາສໍ ອາປທານໍ ມຄ຺ຄໍ ປິທຫຕິ ນິວາເຣຕິ. ໂສຕ຺ຖິໍ ອຕ຺ຕານໍ ກໂຣຕີຕິ ນິຣຸປທ຺ທວໍ ເຂມໍ ອຕ຺ຕານໍ ກໂຣຕິ. ຎາຕິພລິນ຺ຕິ ຎາຕການໍ ພລິໍ. ອຕິຖິພລິນ຺ຕິ ອາຄນ຺ຕຸການໍ ພລິໍ. ປຸພ຺ພເປຕພລິນ຺ຕິ ປຣໂລກຄຕານໍ ຎາຕການໍ ພລິໍ. ຣາຊພລິນ຺ຕິ ຣຎ຺ໂຎ ກຕ຺ຕພ຺ພຍຸຕ຺ຕກໍ ຣາຊພລິໍ. ເທວຕາພລິນ຺ຕິ ເທວຕານໍ ກຕ຺ຕພ຺ພພລິໍ. ສພ຺ພເມຕໍ ເຕສໍ ເຕສໍ ຍຖານຸຈ຺ຉວິກວເສນ ທາຕພ຺ພທານສ຺ສ ອຘິວຈນໍ.

ຂນ຺ຕິໂສຣຈ຺ເຈ ນິວິຏ຺ຐາຕິ ອຘິວາສນກ຺ຂນ຺ຕິຍຎ຺ຈ ສຸສີລຕາຍ ຈ ນິວິຏ຺ຐາ. ເອກມຕ຺ຕານໍ ທເມນ຺ຕີຕິ ເອກໍ ອຕ຺ຕໂນວ ອຕ຺ຕຠາວໍ ອິນ຺ທ຺ຣິຍທເມນ ທເມນ຺ຕິ. ສເມນ຺ຕີຕິ ອຕ຺ຕໂນ ຈິຕ຺ຕໍ ກິເລສວູປສມເນນ ສເມນ຺ຕິ. ປຣິນິພ຺ພາເປນ຺ຕີຕິ ກິເລສປຣິນິພ຺ພາເນເນວ ປຣິນິພ຺ພາເປນ຺ຕິ. ອຸທ຺ຘຄ຺ຄິກນ຺ຕິອາທີສຸ ອຸປຣູປຣິຠູມີສຸ ຜລທານວເສນ ອຸທ຺ຘມຄ຺ຄມສ຺ສາຕິ ອຸທ຺ຘຄ຺ຄິກາ. ສຄ຺ຄສ຺ສ ຫິຕາຕິ ຕຕ຺ຣຸປປຕ຺ຕິຊນນໂຕ ໂສວຄ຺ຄິກາ. ນິພ຺ພຕ຺ຕນິພ຺ພຕ຺ຕຏ຺ຐາເນ ສຸໂຂວ ວິປາໂກ ອສ຺ສາຕິ ສຸຂວິປາກາ. ສຸຏ຺ຐຸ ອຄ຺ຄານໍ ທິພ຺ພວຓ຺ຓາທີນໍ ທສນ຺ນໍ ວິເສສານໍ ນິພ຺ພຕ຺ຕນໂຕ ສຄ຺ຄສໍວຕ຺ຕນິກາ, ເອວຣູປໍ ທກ຺ຂິຓໍ ປຕິຏ຺ຐາເປຕີຕິ ອຕ຺ໂຖ.

ອຣິຍຘມ຺ເມ ຐິໂຕຕິ ປຎ຺ຈສີລຘມ຺ເມ ປຕິຏ຺ຐິໂຕ. ເປຈ຺ຈ ສຄ຺ເຄ ປໂມທຕີຕິ ປຣໂລກໍ ຄນ຺ຕ຺ວາ ຍຕ຺ຖ ສຄ຺ເຄ ປຏິສນ຺ຘິໍ ຄຓ຺ຫາຕິ, ຕຕ຺ຖ ໂມທຕິ. ໂສຕາປນ຺ນສກທາຄາມິໂນ ວາ ໂຫນ຺ຕຸ ອນາຄາມີ ວາ, ສພ຺ເພສໍ ອຍໍ ປຏິປທາ ລພ຺ຠເຕວາຕິ.

໒. ອານຓ຺ຍສຸຕ຺ຕວຓ຺ຓນາ

໖໒. ທຸຕິເຍ ອຘິຄມນີຍານີຕິ ປຕ຺ຕພ຺ພານິ. ກາມໂຠຄິນາຕິ ວຕ຺ຖຸກາເມ ຈ ກິເລສກາເມ ຈ ປຣິຠຸຎ຺ຊນ຺ເຕນ. ອຕ຺ຖິສຸຂາທີສຸ ອຕ຺ຖີຕິ ອຸປ຺ປຊ຺ຊນກສຸຂໍ ອຕ຺ຖິສຸຂໍ ນາມ. ໂຠເຄ ປຣິຠຸຎ຺ຊນ຺ຕສ຺ສ ອຸປ຺ປຊ຺ຊນກສຸຂໍ ໂຠຄສຸຂໍ ນາມ. ອນໂຓສ຺ມີຕິ ອຸປ຺ປຊ຺ຊນກສຸຂໍ ອານຓ຺ຍສຸຂໍ ນາມ. ນິທ຺ໂທໂສ ອນວຊ຺ໂຊສ຺ມີຕິ ອຸປ຺ປຊ຺ຊນກສຸຂໍ ອນວຊ຺ຊສຸຂໍ ນາມ.

ຠຸຎ຺ຊນ຺ຕິ ຠຸຎ຺ຊມາໂນ. ປຎ຺ຎາ ວິປສ຺ສຕີຕິ ປຎ຺ຎາຍ ວິປສ຺ສຕິ. ອຸໂຠ ຠາເຄຕິ ທ຺ເວ ໂກຏ຺ຐາເສ, ເຫຏ຺ຐິມານິ ຕີຓິ ເອກໍ ໂກຏ຺ຐາສໍ, ອນວຊ຺ຊສຸຂໍ ເອກໍ ໂກຏ຺ຐາສນ຺ຕິ ເອວໍ ປຎ຺ຎາຍ ປສ຺ສມາໂນ ທ຺ເວ ໂກຏ຺ຐາເສ ຊານາຕີຕິ ອຕ຺ໂຖ. ອນວຊ຺ຊສຸຂສ຺ເສຕນ຺ຕິ ເອຕໍ ຕິວິຘມ຺ປິ ສຸຂໍ ອນວຊ຺ຊສຸຂສ຺ສ ໂສຬສິໍ ກລໍ ນາຄ຺ຆຕີຕິ.

໓. ພ຺ຣຫ຺ມສຸຕ຺ຕວຓ຺ຓນາ

໖໓. ຕຕິຍໍ ຕິກນິປາເຕ ວຓ຺ຓິຕເມວ. ສປຸພ຺ພເທວຕານີຕິ ປທມຕ຺ຕເມວ ເອຕ຺ຖ ວິເສໂສຕິ. ຈຕຸຕ຺ເຖ ສພ຺ພໍ ອຸຕ຺ຕານຕ຺ຖເມວ.

໕. ຣູປສຸຕ຺ຕວຓ຺ຓນາ

໖໕. ປຎ຺ຈເມ ຣູເປ ປມາຓໍ ຄເຫຕ຺ວາ ປສນ຺ໂນ ຣູປປ຺ປມາໂຓ ນາມ. ຣູປປ຺ປສນ຺ໂນຕິ ຕສ຺ເສວ ອຕ຺ຖວຈນໍ. ໂຆເສ ປມາຓໍ ຄເຫຕ຺ວາ ປສນ຺ໂນ ໂຆສປ຺ປມາໂຓ ນາມ. ຈີວຣລູຂປຕ຺ຕລູເຂສຸ ປມາຓໍ ຄເຫຕ຺ວາ ປສນ຺ໂນ ລູຂປ຺ປມາໂຓ ນາມ. ຘມ຺ເມ ປມາຓໍ ຄເຫຕ຺ວາ ປສນ຺ໂນ ຘມ຺ມປ຺ປມາໂຓ ນາມ. ອິຕຣານິ ເຕສໍເຍວ ອຕ຺ຖວຈນານິ. ສພ຺ພສຕ຺ເຕ ຈ ຕໂຍ ໂກຏ຺ຐາເສ ກຕ຺ວາ ທ຺ເວ ໂກຏ຺ຐາສາ ຣູປປ຺ປມາຓາ, ເອໂກ ນ ຣູປປ຺ປມາໂຓ. ປຎ຺ຈ ໂກຏ຺ຐາເສ ກຕ຺ວາ ຈຕ຺ຕາໂຣ ໂກຏ຺ຐາສາ ໂຆສປ຺ປມາຓາ, ເອໂກ ນ ໂຆສປ຺ປມາໂຓ. ທສ ໂກຏ຺ຐາເສ ກຕ຺ວາ ນວ ໂກຏ຺ຐາສາ ລູຂປ຺ປມາຓາ, ເອໂກ ນ ລູຂປ຺ປມາໂຓ. ສຕສຫສ຺ສໍ ໂກຏ຺ຐາເສ ກຕ຺ວາ ປນ ເອໂກ ໂກຏ຺ຐາໂສວ ຘມ຺ມປ຺ປມາໂຓ, ເສສາ ນ ຘມ຺ມປ຺ປມາຓາຕິ ເວທິຕພ຺ພາ.

ຣູເປ ປມາຓິໍສູຕິ ເຍ ຣູປໍ ທິສ຺ວາ ປສນ຺ນາ, ເຕ ຣູເປ ປມາຓິໍສຸ ນາມ, ປສີທິໍສູຕິ ອຕ຺ໂຖ. ໂຆເສນ ອນ຺ວຄູຕິ ໂຆເສນ ອນຸຄຕາ, ໂຆສປ຺ປມາຓໍ ຄເຫຕ຺ວາ ປສນ຺ນາຕິ ອຕ຺ໂຖ. ຉນ຺ທຣາຄວສູເປຕາຕິ ຉນ຺ທສ຺ສ ຈ ຣາຄສ຺ສ ຈ ວສໍ ອຸເປຕາ. ອຊ຺ຌຕ຺ຕຎ຺ຈ ນ ຊານາຕີຕິ ນິຍກຊ຺ຌຕ຺ເຕ ຕສ຺ສ ຄຸຓໍ ນ ຊານາຕິ. ພຫິທ຺ຘາ ຈ ນ ປສ຺ສຕີຕິ ພຫິທ຺ຘາປິສ຺ສ ປຏິປຕ຺ຕິໍ ນ ປສ຺ສຕິ. ສມນ຺ຕາວຣໂຓຕິ ສມນ຺ຕໂຕ ອາວາຣິໂຕ, ສມນ຺ຕາ ວາ ອາວຣຓມສ຺ສາຕິ ສມນ຺ຕາວຣໂຓ. ໂຆເສນ ວຸຍ຺ຫຕີຕິ ໂຆເສນ ນິຍຕິ, ນ ຄຸເຓນ. ອຊ຺ຌຕ຺ຕຎ຺ຈ ນ ຊານາຕິ, ພຫິທ຺ຘາ ຈ ວິປສ຺ສຕີຕິ ນິຍກຊ຺ຌຕ຺ເຕ ຄຸຓໍ ນ ຊານາຕິ, ພຫິທ຺ຘາ ປນສ຺ສ ປຏິປຕ຺ຕິໍ ປສ຺ສຕິ. ພຫິທ຺ຘາ ຜລທສ຺ສາວີຕິ ຕສ຺ສ ປເຣຫິ ກຕໍ ພຫິທ຺ຘາ ສກ຺ກາຣຜລໍ ປສ຺ສນ຺ໂຕ. ວິນີວຣຓທສ຺ສາວີຕິ ວິວຏທສ຺ສາວີ. ນ ໂສ ໂຆເສນ ວຸຍ຺ຫຕີຕິ ໂສ ໂຆເສນ ນ ນີຍຕິ.

໖. ສຣາຄສຸຕ຺ຕວຓ຺ຓນາ

໖໖. ຉຏ຺ເຐ ໂມຫຊໍ ຈາປວິທ຺ທສູຕິ ໂມຫຊໍ ຈາປິ ອວິທ຺ທສູ ອປຓ຺ຑິຕາ. ສວິຆາຕນ຺ຕິ ສທຸກ຺ຂໍ. ທຸຂຸທ຺ຣຍນ຺ຕິ ອາຍຕິຎ຺ຈ ທຸກ຺ຂວຑ຺ຒິທາຍກໍ. ອຈກ຺ຂຸກາຕິ ປຎ຺ຎາຈກ຺ຂຸຣຫິຕາ. ຍຖາ ຘມ຺ມາ ຕຖາ ສນ຺ຕາຕິ ຍຖາ ຣາຄາທໂຍ ຘມ຺ມາ ຐິຕາ, ຕຖາ ສຠາວາວ ຫຸຕ຺ວາ. ນ ຕສ຺ເສວນ຺ຕິ ມຎ຺ຎເຣຕິ ມຍໍ ເອວໍສນ຺ຕາ ເອວໍສຠາວາຕິ ຕສ຺ສ ນ ມຎ຺ຎເຣ, ນ ມຎ຺ຎນ຺ຕີຕິ ອຕ຺ໂຖ. ອິມສ຺ມິໍ ສຸຕ຺ເຕປິ ຄາຖາສຸປິ ວຏ຺ຏເມວ ກຖິຕໍ.

໗. ອຫິຣາຊສຸຕ຺ຕວຓ຺ຓນາ

໖໗. ສຕ຺ຕເມ ອິມານິ ຈຕ຺ຕາຣິ ອຫິຣາຊກຸລານີຕິ ອິທໍ ທຏ຺ຐວິສາເນວ ສນ຺ຘາຍ ວຸຕ຺ຕໍ. ເຍ ຫິ ເກຈິ ທຏ຺ຐວິສາ, ສພ຺ເພເຕ ອິເມສໍ ຈຕຸນ຺ນໍ ອຫິຣາຊກຸລານໍ ອພ຺ຠນ຺ຕຣຄຕາວ ໂຫນ຺ຕິ. ອຕ຺ຕຄຸຕ຺ຕິຍາຕິ ອຕ຺ຕໂນ ຄຸຕ຺ຕຕ຺ຖາຍ. ອຕ຺ຕຣກ຺ຂາຍາຕິ ອຕ຺ຕໂນ ຣກ຺ຂຓຕ຺ຖາຍ. ອຕ຺ຕປຣິຕ຺ຕາຍາຕິ ອຕ຺ຕໂນ ປຣິຕ຺ຕາຓຕ຺ຖາຍ. ປຣິຕ຺ຕໍ ນາມ ອນຸຊານາມີຕິ ອຕ຺ໂຖ.

ອິທານິ ຍຖາ ຕໍ ປຣິຕ຺ຕໍ ກາຕພ຺ພໍ, ຕໍ ທສ຺ເສນ຺ໂຕ ວິຣູປກ຺ເຂຫິ ເມຕິອາທິມາຫ. ຕຕ຺ຖ ວິຣູປກ຺ເຂຫີຕິ ວິຣູປກ຺ຂນາຄກຸເລຫິ. ເສເສສຸປິ ເອເສວ ນໂຍ. ອປາທເກຫີຕິ ອປາທກສຕ຺ເຕຫິ. ເສເສສຸປິ ເອເສວ ນໂຍ. ສພ຺ເພ ສຕ຺ຕາຕິ ອິໂຕ ປຸພ຺ເພ ເອຕ຺ຕເກນ ຐາເນນ ໂອທິສ຺ສກເມຕ຺ຕໍ ກເຖຕ຺ວາ ອິທານິ ອໂນທິສ຺ສກເມຕ຺ຕໍ ກເຖຕຸໍ ອິທມາຣທ຺ຘໍ. ຕຕ຺ຖ ສຕ຺ຕາ ປາຓາ ຠູຕາຕິ ສພ຺ພາເນຕານິ ປຸຄ຺ຄລເວວຈນາເນວ. ຠທ຺ຣານິ ປສ຺ສນ຺ຕູຕິ ຠທ຺ຣານິ ອາຣມ຺ມຓານິ ປສ຺ສນ຺ຕຸ. ມາ ກຎ຺ຈິ ປາປມາຄມາຕິ ກຎ຺ຈິ ສຕ຺ຕໍ ປາປກໍ ລາມກໍ ມາ ອາຄຈ຺ຉຕຸ. ອປ຺ປມາໂຓ ພຸທ຺ໂຘຕິ ເອຕ຺ຖ ພຸທ຺ໂຘຕິ ພຸທ຺ຘຄຸຓາ ເວທິຕພ຺ພາ. ເຕ ຫິ ອປ຺ປມາຓາ ນາມ. ເສສປທທ຺ວເຍປິ ເອເສວ ນໂຍ. ປມາຓວນ຺ຕານີຕິ ຄຸຓປ຺ປມາເຓນ ຍຸຕ຺ຕານິ. ອຸຓ຺ຓນາຠີຕິ ໂລມສນາຠິໂກ ມກ຺ກຏໂກ. ສຣພູຕິ ຆຣໂຄລິກາ. ກຕາ ເມ ຣກ຺ຂາ, ກຕາ ເມ ປຣິຕ຺ຕາຕິ ມຍາ ເອຕ຺ຕກສ຺ສ ຊນສ຺ສ ຣກ຺ຂາ ຈ ປຣິຕ຺ຕາຓຎ຺ຈ ກຕໍ. ປຏິກ຺ກມນ຺ຕຸ ຠູຕານີຕິ ສພ຺ເພປິ ເມ ກຕປຣິຕ຺ຕາຓາ ສຕ຺ຕາ ອປຄຈ຺ຉນ຺ຕຸ, ມາ ມໍ ວິເຫຐຍິໍສູຕິ ອຕ຺ໂຖ.

໘. ເທວທຕ຺ຕສຸຕ຺ຕວຓ຺ຓນາ

໖໘. ອຏ຺ຐເມ ອຈິຣປກ຺ກນ຺ເຕ ເທວທຕ຺ເຕຕິ ສງ຺ຆໍ ຠິນ຺ທິຕ຺ວາ ນຈິຣປກ຺ກນ຺ເຕ. ປຣາຠວາຍາຕິ ອວຑ຺ຒິຍາ ວິນາສາຍ. ອສ຺ສຕຣີຕິ ວຬວາຍ ກຸຈ຺ຉິສ຺ມິໍ ຄທ຺ຣຠສ຺ສ ຊາຕາ. ອຕ຺ຕວຘາຍ ຄພ຺ຠໍ ຄຓ຺ຫາຕີຕິ ຕໍ ອສ຺ເສນ ສທ຺ຘິໍ ສມ຺ປໂຍເຊນ຺ຕິ, ສາ ຄພ຺ຠໍ ຄຓ຺ຫິຕ຺ວາ ກາເລ ສມ຺ປຕ຺ເຕ ວິຊາຍິຕຸໍ ນສກ຺ໂກນ຺ຕີ ປາເທຫິ ຠູມິໍ ປຫຣນ຺ຕີ ຕິຏ຺ຐຕິ. ອຖສ຺ສາ ຈຕ຺ຕາໂຣ ປາເທ ຈຕູສຸ ຂາຓູສຸ ພນ຺ຘິຕ຺ວາ ກຸຈ຺ຉິໍ ຜາເລຕ຺ວາ ໂປຕກໍ ນີຫຣນ຺ຕິ. ສາ ຕຕ຺ເຖວ ມຣຕິ. ເຕເນຕໍ ວຸຕ຺ຕໍ.

໙. ປຘານສຸຕ຺ຕວຓ຺ຓນາ

໖໙. ນວເມ ກິເລສານໍ ສໍວຣຕ຺ຖາຍ ປເວສນທ຺ວາຣໍ ປິທຫນຕ຺ຖາຍ ປຘານໍ ສໍວຣປ຺ປຘານໍ, ປຊຫນຕ຺ຖາຍ ປຘານໍ ປຫານປ຺ປຘານໍ, ກຸສລານໍ ຘມ຺ມານໍ ພ຺ຣູຫນຕ຺ຖາຍ ວຑ຺ຒນຕ຺ຖາຍ ປຘານໍ ຠາວນາປ຺ປຘານໍ, ເຕສໍເຍວ ອນຸຣກ຺ຂຓຕ຺ຖາຍ ປຘານໍ ອນຸຣກ຺ຂຓາປ຺ປຘານໍ.

໑໐. ອຘມ຺ມິກສຸຕ຺ຕວຓ຺ຓນາ

໗໐. ທສເມ ອຘມ຺ມິກາ ໂຫນ຺ຕີຕິ ໂປຣາຓກຣາຊູຫິ ຐປິຕໍ ທສຠາຄພລິຎ຺ເຈວ ອປຣາຘານຸຣູປຎ຺ຈ ທຓ຺ຑໍ ອຄ຺ຄເຫຕ຺ວາ ອຕິເຣກພລິໂນ ເຈວ ອຕິເຣກທຓ຺ຑສ຺ສ ຈ ຄຫເຓນ ອຘມ຺ມິກາ. ຣາຊາຍຸຕ຺ຕາຕິ ຣຎ຺ໂຎ ຊນປເທສຸ ກິຈ຺ຈສໍວິຘາຍກາ ອາຍຸຕ຺ຕກປຸຣິສາ. ພ຺ຣາຫ຺ມຓຄຫປຕິກາຕິ ອນ຺ໂຕນຄຣວາສິໂນ ພ຺ຣາຫ຺ມຓຄຫປຕໂຍ. ເນຄມຊານປທາຕິ ນິຄມວາສິໂນ ເຈວ ຊນປທວາສິໂນ ຈ. ວິສມນ຺ຕິ ວິສມາ ຫຸຕ຺ວາ, ອສມເຍນ ວາຍນ຺ຕີຕິ ອຕ຺ໂຖ. ວິສມາຕິ ນ ສມາ, ອຕິຖທ຺ຘາ ວາ ອຕິມຸທຸກາ ວາຕິ ອຕ຺ໂຖ. ອປຎ຺ຊສາຕິ ມຄ຺ຄໂຕ ອປຄຕາ, ອຸມ຺ມຄ຺ຄຄາມິໂນ ຫຸຕ຺ວາ ວາຍນ຺ຕີຕິ ອຕ຺ໂຖ. ເທວຕາ ປຣິກຸປິຕາ ຠວນ຺ຕີຕິ ວາເຕສຸ ຫິ ວິສເມສຸ ອປຎ຺ຊເສສຸ ວາຍນ຺ເຕສຸ ຣຸກ຺ຂາ ຠິຊ຺ຊນ຺ຕິ, ວິມານານິ ຠິຊ຺ຊນ຺ຕິ. ຕສ຺ມາ ເທວຕາ ປຣິກຸປິຕາ ຠວນ຺ຕິ, ຕາ ເທວສ຺ສ ສມ຺ມາ ວສ຺ສິຕຸໍ ນ ເທນ຺ຕິ. ເຕນ ວຸຕ຺ຕໍ ເທໂວ ນ ສມ຺ມາ ຘາຣໍ ອນຸປ຺ປເວຈ຺ຉຕີຕິ. ວິສມປາການິ ສສ຺ສານິ ຠວນ຺ຕີຕິ ເອກສ຺ມິໍ ຐາເນ ຄພ຺ຠີນິ ໂຫນ຺ຕິ, ເອກສ຺ມິໍ ສຎ຺ຊາຕຂີຣານິ, ເອກໍ ຐານໍ ປຈ຺ຈຕີຕິ ເອວໍ ວິສມໍ ປາການິ ສສ຺ສານິ ຠວນ຺ຕິ.

ສມໍ ນກ຺ຂຕ຺ຕານິ ຕາຣກຣູປານິ ປຣິວຕ຺ຕນ຺ຕີຕິ ຍຖາ ກຕ຺ຕິກປຸຓ຺ຓມາ ກຕ຺ຕິກນກ຺ຂຕ຺ຕເມວ ລຠຕິ, ມິຄສິຣປຸຓ຺ຓມາ ມິຄສິຣນກ຺ຂຕ຺ຕເມວາຕິ ເອວໍ ຕສ຺ມິໍ ຕສ຺ມິໍ ມາເສ ສາ ສາ ປຸຓ຺ຓມາ ຕໍ ຕໍ ນກ຺ຂຕ຺ຕເມວ ລຠຕິ, ຕຖາ ສມ຺ມາ ປຣິວຕ຺ຕນ຺ຕິ. ສມໍ ວາຕາ ວາຍນ຺ຕີຕິ ອວິສມາ ຫຸຕ຺ວາ ສມຍສ຺ມິໍເຍວ ວາຍນ຺ຕິ, ຉ ມາເສ ອຸຕ຺ຕຣາ ວາຕາ, ຉ ມາເສທກ຺ຂິຓາຕິ ເອວໍ ເຕສໍ ເຕສໍ ຊນປທານໍ ອນຸຣູເປ ສມເຍ ວາຍນ຺ຕິ. ສມາຕິ ສມປ຺ປວຕ຺ຕິໂນ ນາຕິຖທ຺ຘາ ນາຕິມຸທູ. ປຎ຺ຊສາຕິ ມຄ຺ຄປ຺ປຏິປນ຺ນາ, ມຄ຺ເຄເນວ ວາຍນ຺ຕິ, ໂນ ອມຄ຺ເຄນາຕິ ອຕ຺ໂຖ.

ຊິມ຺ຫໍ ຄຈ຺ຉຕີຕິ ກຸຏິລໍ ຄຈ຺ຉຕິ, ອຕິຕ຺ຖໍ ຄຓ຺ຫາຕິ. ເນຕ຺ເຕ ຊິມ຺ຫໍ ຄເຕ ສຕີຕິ ນຍຕີຕິ ເນຕ຺ຕາ. ຕສ຺ມິໍ ເນຕ຺ເຕ ຊິມ຺ຫໍ ຄເຕ ກຸຏິລໍ ຄນ຺ຕ຺ວາ ອຕິຕ຺ຖໍ ຄຓ຺ຫນ຺ເຕ ອິຕຣາປິ ອຕິຕ຺ຖເມວ ຄຓ຺ຫນ຺ຕີຕິ ອຕ຺ໂຖ. ເນເຕຕິປິ ປາໂຐ. ທຸກ຺ຂໍ ເສຕີຕິ ທຸກ຺ຂໍ ສຍຕິ, ທຸກ຺ຂິຕໍ ໂຫຕີຕິ ອຕ຺ໂຖ.

ປຕ຺ຕກມ຺ມວຄ຺ໂຄ ທຸຕິໂຍ.

(໘) ໓. ອປຓ຺ຓກວຄ຺ໂຄ

໑. ປຘານສຸຕ຺ຕວຓ຺ຓນາ

໗໑. ຕຕິຍວຄ຺ຄສ຺ສ ປຐເມ ອປຓ຺ຓກປ຺ປຏິປທນ຺ຕິ ອວິຣທ຺ຘປ຺ປຏິປທໍ. ໂຍນິ ຈສ຺ສ ອາຣທ຺ຘາ ໂຫຕີຕິ ກາຣຓຎ຺ຈສ຺ສ ປຣິປຸຓ຺ຓໍ ໂຫຕິ. ອາສວານໍ ຂຍາຍາຕິ ອຣຫຕ຺ຕຕ຺ຖາຍ. ທຸຕິຍໍ ອຸຕ຺ຕານເມວ.

໓. ສປ຺ປຸຣິສສຸຕ຺ຕວຓ຺ຓນາ

໗໓. ຕຕິເຍ ອວຓ຺ໂຓຕິ ອຄຸໂຓ. ປາຕຸ ກໂຣຕີຕິ ກເຖຕິ, ປາກຏໍ ກໂຣຕິ. ປຎ຺ຫາຠິນີໂຕຕິ ປຎ຺ຫຕ຺ຖາຍ ອຠິນີໂຕ. ອຫາເປຕ຺ວາ ອລມ຺ພິຕ຺ວາຕິ ອປຣິຫີນໍ ອລມ຺ພິຕໍ ກຕ຺ວາ. ເອຕ຺ຖ ຈ ອສປ຺ປຸຣິໂສ ປາປິຈ຺ຉຕາຍ ອຕ຺ຕໂນ ອວຓ຺ຓໍ ຉາເທຕິ, ສປ຺ປຸຣິໂສ ລຊ຺ຊິຕາຍ ອຕ຺ຕໂນ ວຓ຺ຓໍ. ອິທານິ ຍສ຺ມາ ອສປ຺ປຸຣິໂສ ຫິໂຣຕ຺ຕປ຺ປຣຫິໂຕ ສໍວາເສນ ອວຊານາຕິ, ສປ຺ປຸຣິໂສ ປນ ຫິໂຣຕ຺ຕປ຺ປສມນ຺ນາຄໂຕ ສໍວາເສນາປິ ນາວຊານາຕິ. ຕສ຺ມາ ອສປ຺ປຸຣິສຠາວສາຘກໍ ອຘຸນາຄຕວຘຸໂກປມ຺ມໍ ທສ຺ເສຕຸໍ ເສຍ຺ຍຖາປິ, ຠິກ຺ຂເວ, ວຘຸກາຕິອາທິມາຫ. ຕຕ຺ຖ ວຘຸກາຕິ ສຸຓິສາ. ຕິພ຺ພນ຺ຕິ ພຫລໍ. ເສສເມຕ຺ຖ ອຸຕ຺ຕານຕ຺ຖເມວາຕິ.

໔-໕. ອຄ຺ຄສຸຕ຺ຕທ຺ວຍວຓ຺ຓນາ

໗໔-໗໕. ຈຕຸຕ຺ເຖ ສີລຄ຺ຄນ຺ຕິ ອຄ຺ຄປ຺ປຕ຺ຕໍ ອຸຕ຺ຕມສີລໍ. ເອເສວ ນໂຍ ສພ຺ພຕ຺ຖ. ປຎ຺ຈເມ ຣູປຄ຺ຄນ຺ຕິ ຍໍ ຣູປໍ ສມ຺ມສິຕ຺ວາ ອຣຫຕ຺ຕໍ ປາປຸຓາຕິ, ອິທໍ ຣູປຄ຺ຄໍ ນາມ. ເສເສສຸປິ ເອເສວ ນໂຍ. ຠວຄ຺ຄນ຺ຕິ ເອຕ຺ຖ ປນ ຍສ຺ມິໍ ອຕ຺ຕຠາເວ ຐິໂຕ ອຣຫຕ຺ຕໍ ປາປຸຓາຕິ, ເອຕໍ ຠວຄ຺ຄໍ ນາມາຕິ.

໖. ກຸສິນາຣສຸຕ຺ຕວຓ຺ຓນາ

໗໖. ຉຏ຺ເຐ ອຸປວຕ຺ຕເນຕິ ປາຈີນຄຕາຍ ສາລປນ຺ຕິຍາ ອຸຕ຺ຕເຣນ ນິວຕ຺ຕິຕ຺ວາ ຐິຕາຍ ເວມຊ຺ຌຏ຺ຐາເນ. ອນ຺ຕເຣນ ຍມກສາລານນ຺ຕິ ທ຺ວິນ຺ນໍ ສາລຣຸກ຺ຂານໍ ອນ຺ຕເຣ. ກງ຺ຂາຕິ ທ຺ເວຬ຺ຫກໍ. ວິມຕີຕິ ວິນິຈ຺ຉິຕຸໍ ອສມຕ຺ຖຕາ. ‘‘ພຸທ຺ໂຘ ນຸ ໂຂ ນ ພຸທ຺ໂຘ ນຸ ໂຂ, ຘມ຺ໂມ ນຸ ໂຂ ນ ຘມ຺ໂມ ນຸ ໂຂ, ສງ຺ໂຆ ນຸ ໂຂ ນ ສງ຺ໂຆ ນຸ ໂຂ, ມຄ຺ໂຄ ນຸ ໂຂ ນ ມຄ຺ໂຄ ນຸ ໂຂ, ປຏິປທາ ນຸ ໂຂ ນ ປຏິປທາ ນຸ ໂຂ’’ຕິ ຍສ຺ສ ສໍສໂຍ ອຸປ຺ປຊ຺ເຊຍ຺ຍ, ຕໍ ໂວ ວທາມິ ປຸຈ຺ຉຖ, ຠິກ຺ຂເວຕິ ອຍເມຕ຺ຖ ສງ຺ເຂປຕ຺ໂຖ. ສຕ຺ຖຸຄາຣເວນປິ ນ ປຸຈ຺ເຉຍ຺ຍາຖາຕິ ‘‘ມຍໍ ສຕ຺ຖຸ ສນ຺ຕິເກ ປພ຺ພຊິມ຺ຫ, ຈຕ຺ຕາໂຣ ປຈ຺ຈຍາປິ ໂນ ສຕ຺ຖຸ ສນ຺ຕກາວ. ເຕ ມຍໍ ເອຕ຺ຕກໍ ກາລໍ ກງ຺ຂໍ ອກຕ຺ວາ ນ ອຣຫາມ ອຊ຺ຊ ປຈ຺ຉິເມ ກາເລ ກງ຺ຂໍ ກາຕຸ’’ນ຺ຕິ ສເຈ ເອວໍ ສຕ຺ຖຣິ ຄາຣເວນ ນ ປຸຈ຺ຉຖ. ສຫາຍໂກປິ, ຠິກ຺ຂເວ, ສຫາຍກສ຺ສ ອາໂຣເຈຕູຕິ ຕຸມ຺ຫາກໍ ໂຍ ຍສ຺ສ ຠິກ຺ຂຸສ຺ສ ສນ຺ທິຏ຺ໂຐ ສມ຺ຠຕ຺ໂຕ, ໂສ ຕສ຺ສ ອາໂຣເຈຕຸ, ອຫໍ ເອກສ຺ສ ຠິກ຺ຂຸສ຺ສ ກເຖສ຺ສາມິ, ຕສ຺ສ ກຖໍ ສຸຕ຺ວາ ສພ຺ເພ ນິກ຺ກງ຺ຂາ ຠວຖາຕິ ທສ຺ເສຕິ. ເອວໍ ປສນ຺ໂນຕິ ເອວໍ ສທ຺ທຫາມິ ອຫນ຺ຕິ ອຕ຺ໂຖ. ຎາຓເມວາຕິ ນິກ຺ກງ຺ຂຠາວປຈ຺ຈກ຺ຂກຣຓຎາຓໍເຍວ ເອຕ຺ຖ ຕຖາຄຕສ຺ສ, ນ ສທ຺ຘາມຕ຺ຕນ຺ຕິ ອຕ຺ໂຖ. ອິເມສຎ຺ຫິ, ອານນ຺ທາຕິ ອິເມສໍ ອນ຺ໂຕສາຓິຍໍ ນິສິນ຺ນານໍ ປຎ຺ຈນ຺ນໍ ຠິກ຺ຂຸສຕານໍ. ໂຍ ປຈ຺ຉິມໂກຕິ ໂຍ ຄຸຓວເສນ ປຈ຺ຉິມໂກ, ອານນ຺ທຕ຺ເຖຣໍເຍວ ສນ຺ຘາຍາຫ.

໗. ອຈິນ຺ເຕຍ຺ຍສຸຕ຺ຕວຓ຺ຓນາ

໗໗. ສຕ຺ຕເມ ອຈິນ຺ເຕຍ຺ຍານີຕິ ຈິນ຺ເຕຕຸໍ ອຍຸຕ຺ຕານິ. ນ ຈິນ຺ເຕຕພ຺ພານີຕິ ອຈິນ຺ເຕຍ຺ຍຕ຺ຕາເຍວ ນ ຈິນ຺ເຕຕພ຺ພານິ. ຍານິ ຈິນ຺ເຕນ຺ໂຕຕິ ຍານິ ກາຣຓານິ ຈິນ຺ເຕນ຺ໂຕ. ອຸມ຺ມາທສ຺ສາຕິ ອຸມ຺ມຕ຺ຕກຠາວສ຺ສ. ວິຆາຕສ຺ສາຕິ ທຸກ຺ຂສ຺ສ. ພຸທ຺ຘວິສໂຍຕິ ພຸທ຺ຘານໍ ວິສໂຍ, ສພ຺ພຎ຺ຎຸຕຎ຺ຎາຓາທີນໍ ພຸທ຺ຘຄຸຓານໍ ປວຕ຺ຕິ ຈ ອານຸຠາໂວ ຈ. ຌານວິສໂຍຕິ ອຠິຎ຺ຎາຌານວິສໂຍ. ກມ຺ມວິປາໂກຕິ ທິຏ຺ຐຘມ຺ມເວທນີຍາທີນໍ ກມ຺ມານໍ ວິປາໂກ. ໂລກຈິນ຺ຕາຕິ ‘‘ເກນ ນຸ ໂຂ ຈນ຺ທິມສູຣິຍາ ກຕາ, ເກນ ມຫາປຖວີ, ເກນ ມຫາສມຸທ຺ໂທ, ເກນ ສຕ຺ຕາ ອຸປ຺ປາທິຕາ, ເກນ ປພ຺ພຕາ, ເກນ ອມ຺ພຕາລນາຬິເກຣາທໂຍ’’ຕິ ເອວຣູປາ ໂລກຈິນ຺ຕາ.

໘. ທກ຺ຂິຓສຸຕ຺ຕວຓ຺ຓນາ

໗໘. ອຏ຺ຐເມ ທກ຺ຂິຓາວິສຸທ຺ຘິໂຍຕິ ທານສງ຺ຂາຕາຍ ທກ຺ຂິຓາຍ ວິສຸຊ຺ຌນກາຣຓານິ. ທາຍກໂຕ ວິສຸຊ຺ຌຕີຕິ ມຫປ຺ຜລຠາເວນ ວິສຸຊ຺ຌຕິ, ມຫປ຺ຜລາ ໂຫຕີຕິ ອຕ຺ໂຖ. ກລ຺ຍາຓຘມ຺ໂມຕິ ສຸຈິຘມ຺ໂມ. ປາປຘມ຺ໂມຕິ ລາມກຘມ຺ໂມ. ທາຍກໂຕ ວິສຸຊ຺ຌຕີຕິ ເອຕ຺ຖ ເວສ຺ສນ຺ຕຣມຫາຣາຊາ ກເຖຕພ຺ໂພ. ໂສ ຫິ ຊູຊກພ຺ຣາຫ຺ມຓສ຺ສ ທາຣເກ ທຕ຺ວາ ມຫາປຖວິໍ ກມ຺ເປສິ. ປຏິຄ຺ຄາຫກໂຕ ວິສຸຊ຺ຌຕີຕິ ເອຕ຺ຖ ກລ຺ຍາຓີນທີມຸຂທ຺ວາຣວາສີ ເກວຏ຺ໂຏ ກເຖຕພ຺ໂພ. ໂສ ກິຣ ທີຆສຸມຕ຺ເຖຣສ຺ສ ຕິກ຺ຂຕ຺ຕຸໍ ປິຓ຺ຑປາຕໍ ທຕ຺ວາ ມຣຓມຎ຺ເຈ ນິປນ຺ໂນ ‘‘ອຍ຺ຍສ຺ສ ມໍ ທີຆສຸມຕ຺ເຖຣສ຺ສ ທິນ຺ນປິຓ຺ຑປາໂຕ ອຸທ຺ຘຣຕີ’’ຕິ ອາຫ. ເນວ ທາຍກໂຕຕິ ເອຕ຺ຖ ວຑ຺ຒມານວາສີ ລຸທ຺ທໂກ ກເຖຕພ຺ໂພ. ໂສ ກິຣ ເປຕທກ຺ຂິຓໍ ເທນ຺ໂຕ ເອກສ຺ສ ທຸສ຺ສີລສ຺ເສວ ຕໂຍ ວາເຣ ອທາສິ. ຕຕິຍວາເຣ ‘‘ອມນຸສ຺ໂສ ທຸສ຺ສີໂລ ມໍ ວິລຸມ຺ປຕີ’’ຕິ ວິຣວິ. ເອກສ຺ສ ສີລວໂຕ ຠິກ຺ຂຸໂນ ທຕ຺ວາ ປາປິຕກາເລເຍວສ຺ສ ປາປຸຓິ. ທາຍກໂຕ ເຈວ ວິສຸຊ຺ຌຕິ ປຏິຄ຺ຄາຫກໂຕ ຈາຕິ ເອຕ຺ຖ ອສທິສທານໍ ກເຖຕພ຺ພນ຺ຕິ.

໙. ວຓິຊ຺ຊສຸຕ຺ຕວຓ຺ຓນາ

໗໙. ນວເມ ຕາທິສາ ວາຕິ ຕໍສທິສາວ ຕໍສຣິກ຺ຂກາວ. ເຉທຄາມິນີ ໂຫຕີຕິ ເຉທໍ ຄຈ຺ຉຕິ. ຍໍ ປຕ຺ຖິຕໍ, ຕໍ ສພ຺ພໍ ນສ຺ສຕີຕິ ອຕ຺ໂຖ. ນ ຍຖາຘິປ຺ປາຍາ ໂຫຕີຕິ ຍຖາຊ຺ຌາສຍາ ນ ໂຫຕິ. ປຣາຘິປ຺ປາຍາ ໂຫຕີຕິ ປຣຊ຺ຌາສຍາ ອຊ຺ຌາສຍໂຕ ອຘິກຕຣຜລາ ໂຫຕິ. ສມຓໍ ວາ ພ຺ຣາຫ຺ມຓໍ ວາຕິ ເອຕ຺ຖ ສມິຕປາປພາຫິຕປາປຕາຫິ ສມຓພ຺ຣາຫ຺ມຓຕາ ເວທິຕພ຺ພາ. ວທຕຸ, ຠນ຺ເຕ, ປຈ຺ຈເຍນາຕິ, ຠນ຺ເຕ, ຈຕຸພ຺ພິເຘນ ຈີວຣາທິນາ ປຈ຺ຈເຍນ ວເທຍ຺ຍາສີຕິ ເອວໍ ປວາເຣຕິ ນິມນ຺ເຕຕິ. ເຍນ ປວາເຣຕີຕິ ປຣິຈ຺ຉິນ຺ທິຕ຺ວາ ຍຕ຺ຕເກນ ປວາເຣຕິ. ຕໍ ນ ເທຕີຕິ ຕໍ ສພ຺ພໂສວ ນ ເທຕິ. ນ ຍຖາຘິປ຺ປາຍໍ ເທຕີຕິ ຍຖາ ຕສ຺ສ ອຊ຺ຌາສໂຍ, ເອວໍ ທາຕຸໍ ນ ສກ຺ໂກຕິ, ຫາເປຕ຺ວາ ອປ຺ປກໍ ເທຕິ. ຍຖາຘິປ຺ປາຍໍ ເທຕີຕິ ຍຕ຺ຕກໍ ໂສ ອິຈ຺ຉຕິ, ຕຕ຺ຕກເມວ ເທຕິ. ປຣາຘິປ຺ປາຍໍ ເທຕີຕິ ອປ຺ປກໍ ປວາເຣຕ຺ວາ ອວຕ຺ຖຣິຕ຺ວາ ພຫຸໍ ເທຕິ.

໑໐. ກມ຺ໂພຊສຸຕ຺ຕວຓ຺ຓນາ

໘໐. ທສເມ ເນວ ສຠາຍໍ ນິສີທຕີຕິ ວິນິຈ຺ຉຍກຣຓຕ຺ຖໍ ວິນິຈ຺ຉຍສຠາຍໍ ເນວ ນິສີທຕິ. ນ ກມ຺ມນ຺ຕໍ ປໂຍເຊຕີຕິ ກສິວຓິຊ຺ຊາທິມຫາກມ຺ມນ຺ຕໍ ນປ຺ປໂຍເຊຕິ. ນ ກມ຺ໂພຊໍ ຄຈ຺ຉຕີຕິ ໂຠເຄ ສມ຺ຠຣຓຕ຺ຖາຍ ກມ຺ໂພຊຣຏ຺ຐໍ ນ ຄຈ຺ຉຕິ. ເທສນາມຕ຺ຕເມວ ເຈຕໍ, ຍໍ ກິຎ຺ຈິ ຕິໂຣຣຏ຺ຐໍ ນ ຄຈ຺ຉຕີຕິ ອຕ຺ໂຖ. ໂກຘໂນຕິອາທີສຸ ໂກຘນຕາຍ ໂກຘປຣິຍຸຏ຺ຐິໂຕ ອຕ຺ຖານຕ຺ຖໍ ນ ຊານາຕິ, ອິສ຺ສຸກິຕາຍ ປຣສມ຺ປຕ຺ຕິໍ ນ ສຫຕິ, ມຈ຺ຉຣິຕາຍ ຘນໍ ທຕ຺ວາ ກິຈ຺ຈໍ ກາຕຸໍ ນ ສກ຺ໂກຕິ, ນິປ຺ປຎ຺ຎຕາຍ ກິຈ຺ຈໍ ສໍວິຘາຕຸໍ ນ ສກ຺ໂກຕິ. ຕສ຺ມາ ເອຕານິ ສຠານິສີທນາທີນິ ນ ກໂຣຕີຕິ.

ອປຓ຺ຓກວຄ຺ໂຄ ຕຕິໂຍ.

(໙) ໔. ມຈລວຄ຺ໂຄ

໑-໕. ປາຓາຕິປາຕາທິສຸຕ຺ຕປຎ຺ຈກວຓ຺ຓນາ

໘໑-໘໕. ຈຕຸຕ຺ຖສ຺ສ ປຐມາທີນິ ອຸຕ຺ຕານຕ຺ຖາເນວ. ປຎ຺ຈເມ ‘‘ນີເຈ ກຸເລ ປຈ຺ຈາຊາໂຕ’’ຕິອາທິເກນ ຕເມນ ຍຸຕ຺ໂຕຕິ ຕໂມ. ກາຍທຸຈ຺ຈຣິຕາທີຫິ ປຸນ ນິຣຍຕມູປຄມນໂຕ ຕມປຣາຍໂຓ. ອິຕິ ອຸຠເຍນປິ ຂນ຺ຘຕໂມວ ກຖິໂຕ ໂຫຕິ. ‘‘ອຑ຺ເຒ ກຸເລ ປຈ຺ຈາຊາໂຕ’’ຕິອາທິເກນ ໂຊຕິນາ ຍຸຕ຺ຕໂຕ ໂຊຕິ, ອາໂລກຠູໂຕຕິ ວຸຕ຺ຕໍ ໂຫຕິ. ກາຍສຸຈຣິຕາທີຫິ ປຸນ ສຄ຺ຄຸປ຺ປຕ຺ຕິໂຊຕິຠາວູປຄມນໂຕ ໂຊຕິປຣາຍໂຓ. ອິມິນາ ນເຍນ ອິຕເຣປິ ທ຺ເວ ເວທິຕພ຺ພາ.

ເວນກຸເລຕິ ວິລີວກາຣກຸເລ. ເນສາທກຸເລຕິ ມິຄລຸທ຺ທກາທີນໍ ກຸເລ. ຣຖກາຣກຸເລຕິ ຈມ຺ມກາຣກຸເລ. ປຸກ຺ກຸສກຸເລຕິ ປຸປ຺ຜຉຑ຺ຑກກຸເລ. ກສິຣວຸຕ຺ຕິເກຕິ ທຸກ຺ຂວຸຕ຺ຕິເກ. ທຸພ຺ພຓ຺ໂຓຕິ ປໍສຸປິສາຈໂກ ວິຍ ຌາມຂາຓຸວຓ຺ໂຓ. ທຸທ຺ທສິໂກຕິ ວິຊາຕມາຕຸຍາປິ ອມນາປທສ຺ສໂນ. ໂອໂກຏິມໂກຕິ ລກຸຓ຺ຑໂກ. ກາໂຓຕິ ເອກຈ຺ຉິກາໂຓ ວາ ອຸຠຍຈ຺ຉິກາໂຓ ວາ. ກຸຓີຕິ ເອກຫຕ຺ຖກຸຓີ ວາ ອຸຠຍຫຕ຺ຖກຸຓີ ວາ. ຂຎ຺ໂຊຕິ ເອກປາທຂຎ຺ໂຊ ວາ ອຸຠຍປາທຂຎ຺ໂຊ ວາ. ປກ຺ຂຫໂຕຕິ ຫຕປກ຺ໂຂ ປີຐສປ຺ປີ. ປທີເປຍ຺ຍສ຺ສາຕິ ເຕລກປລ຺ລາທິໂນ ທີປອຸປກຣຓສ຺ສ. ເອວໍ ໂຂ, ຠິກ຺ຂເວຕິ ເອຕ຺ຖ ເອໂກ ປຸຄ຺ຄໂລ ພຫິທ຺ຘາ ອາໂລກໍ ອທິສ຺ວາ ມາຕຸ ກຸຈ຺ຉິມ຺ຫິເຍວ ກາລໍ ກຕ຺ວາ ອປາເຍສຸ ນິພ຺ພຕ຺ຕນ຺ໂຕ ສກລມ຺ປິ ກປ຺ປໍ ສໍສຣຕິ. ໂສປິ ຕໂມຕມປຣາຍໂຓວ. ໂສ ປນ ກຸຫກປຸຄ຺ຄໂລ ຠເວຍ຺ຍ. ກຸຫກສ຺ສ ຫິ ເອວຣູປາ ນິປ຺ຜຕ຺ຕິ ໂຫຕີຕິ ວຸຕ຺ຕໍ.

ເອຕ຺ຖ ຈ ‘‘ນີເຈ ກຸເລ’’ຕິອາທີຫິ ອາຄມນວິປຕ຺ຕິ ເຈວ ປຈ຺ຈຸປ຺ປນ຺ນປຈ຺ຈຍວິປຕ຺ຕິ ຈ ທສ຺ສິຕາ. ‘‘ທລິທ຺ເທ’’ຕິອາທີຫິ ປວຕ຺ຕປຈ຺ຈຍວິປຕ຺ຕິ, ‘‘ກສິຣວຸຕ຺ຕິເກ’’ຕິອາທີຫິ ອາຊີວຸປາຍວິປຕ຺ຕິ, ‘‘ທຸພ຺ພຓ຺ໂຓ’’ຕິອາທີຫິ ອຕ຺ຕຠາວວິປຕ຺ຕິ, ‘‘ພຫ຺ວາພາໂຘ’’ຕິອາທີຫິ ທຸກ຺ຂກາຣຓສມາໂຍໂຄ, ‘‘ນ ລາຠີ’’ຕິອາທີຫິ ສຸຂກາຣຓວິປຕ຺ຕິ ເຈວ ອຸປໂຠຄວິປຕ຺ຕິ ຈ, ‘‘ກາເຍນ ທຸຈ຺ຈຣິຕ’’ນ຺ຕິອາທີຫິ ຕມປຣາຍຓຠາວສ຺ສ ກາຣຓສມາໂຍໂຄ, ‘‘ກາຍສ຺ສ ເຠທາ’’ຕິອາທີຫິ ສມ຺ປຣາຍິກຕມູປຄໂມ. ສຸກ຺ກປກ຺ໂຂ ວຸຕ຺ຕປຏິປກ຺ຂນເຍນ ເວທິຕພ຺ໂພ.

໖. ໂອຓໂຕຓຕສຸຕ຺ຕວຓ຺ຓນາ

໘໖. ຉຏ຺ເຐ ໂອຓໂຕຓໂຕຕິ ອິທານິ ນີຈໂກ ອາຍຕິມ຺ປິ ນີຈໂກ ຠວິສ຺ສຕິ. ໂອຓຕຸຓ຺ຓໂຕຕິ ອິທານິ ນີໂຈ ອາຍຕິໍ ອຸຈ຺ໂຈ ຠວິສ຺ສຕິ. ອຸຓ຺ຓໂຕຓໂຕຕິ ອິທານິ ອຸຈ຺ໂຈ ອາຍຕິໍ ນີໂຈ ຠວິສ຺ສຕິ. ອຸຓ຺ຓຕຸຓ຺ຓໂຕຕິ ອິທານິ ອຸຈ຺ໂຈ ອາຍຕິມ຺ປິ ອຸຈ຺ໂຈ ຠວິສ຺ສຕິ. ວິຕ຺ຖາໂຣ ປນ ເນສໍ ປຸຣິມສຸຕ຺ຕນເຍເນວ ເວທິຕພ຺ໂພ.

໗. ປຸຕ຺ຕສຸຕ຺ຕວຓ຺ຓນາ

໘໗. ສຕ຺ຕເມ ສມຓມຈໂລຕິ ສມຓອຈໂລ, ມກາໂຣ ປທສນ຺ຘິກໂຣ, ນິຈ຺ຈລສມໂຓຕິ ອຕ຺ໂຖ. ອິມິນາ ສຕ຺ຕວິຘມ຺ປິ ເສຂໍ ທສ຺ເສຕິ. ໂສ ຫິ ສາສເນ ມູລຊາຕາຍ ສທ຺ຘາຍ ປຕິຏ຺ຐິຕຕ຺ຕາ ອຈໂລ ນາມ. ສມຓປຸຓ຺ຑຣີໂກຕິ ປຸຓ຺ຑຣີກສທິໂສ ສມໂຓ. ປຸຓ຺ຑຣີກໍ ນາມ ອູນສຕປຕ຺ຕໍ ສໂຣຣຸຫໍ. ອິມິນາ ສຸກ຺ຂວິປສ຺ສກຂີຓາສວໍ ທສ຺ເສຕິ. ໂສ ຫິ ຌານາຠິຎ຺ຎານໍ ອຠາເວນ ອປຣິປຸຓ຺ຓຄຸຓຕ຺ຕາ ສມຓປຸຓ຺ຑຣີໂກ ນາມ ໂຫຕິ. ສມຓປທຸໂມຕິ ປທຸມສທິໂສ ສມໂຓ. ປທຸມໍ ນາມ ປຣິປຸຓ຺ຓສຕປຕ຺ຕໍ ສໂຣຣຸຫໍ. ອິມິນາ ອຸຠໂຕຠາຄວິມຸຕ຺ຕໍ ຂີຓາສວໍ ທສ຺ເສຕິ. ໂສ ຫິ ຌານາຠິຎ຺ຎານໍ ຠາເວນ ປຣິປຸຓ຺ຓຄຸຓຕ຺ຕາ ສມຓປທຸໂມ ນາມ ໂຫຕິ. ສມເຓສຸ ສມຓສຸຂຸມາໂລຕິ ສພ຺ເພສຸປິ ເອເຕສຸ ສມເຓສຸ ສຸຂຸມາລສມໂຓ ມຸທຸຈິຕ຺ຕສຣີໂຣ ກາຍິກເຈຕສິກທຸກ຺ຂຣຫິໂຕ ເອກນ຺ຕສຸຂີ. ເອເຕນ ອຕ຺ຕານຎ຺ເຈວ ອຕ຺ຕສທິເສ ຈ ທສ຺ເສຕິ.

ເອວໍ ມາຕິກໍ ນິກ຺ຂິປິຕ຺ວາ ອິທານິ ປຏິປາຏິຍາ ວິຠຊນ຺ໂຕ ກຖຎ຺ຈ, ຠິກ຺ຂເວຕິອາທິມາຫ. ຕຕ຺ຖ ເສໂຂຕິ ສຕ຺ຕວິໂຘປິ ເສໂຂ. ປາຏິປໂທຕິ ປຏິປນ຺ນໂກ. ອນຸຕ຺ຕຣໍ ໂຍຄກ຺ເຂມໍ ປຕ຺ຖຍມາໂນ ວິຫຣຕີຕິ ອຣຫຕ຺ຕໍ ປຕ຺ຖຍນ຺ໂຕ ວິຫຣຕິ. ມຸທ຺ຘາວສິຕ຺ຕສ຺ສາຕິ ມຸທ຺ຘນິ ອວສິຕ຺ຕສ຺ສ, ກຕາຠິເສກສ຺ສາຕິ ອຕ຺ໂຖ. ອາຠິເສໂກຕິ ອຠິເສກໍ ກາຕຸໍ ຍຸຕ຺ໂຕ. ອນຠິສິຕ຺ໂຕຕິ ນ ຕາວ ອຠິສິຕ຺ໂຕ. ມຈລປ຺ປຕ຺ໂຕຕິ ຣຎ຺ໂຎ ຂຕ຺ຕິຍສ຺ສ ມຸທ຺ຘາວສິຕ຺ຕສ຺ສ ປຸຕ຺ຕຠາເວນ ເຈວ ປຸຕ຺ເຕສຸ ເຊຏ຺ຐກຠາເວນ ຈ ນ ຕາວ ອຠິສິຕ຺ຕຠາເວນ ຈ ອຠິເສກປ຺ປຕ຺ຕິອຕ຺ຖາຍ ອຈລປ຺ປຕ຺ໂຕ ນິຈ຺ຈລປຕ຺ໂຕ. ມກາໂຣ ນິປາຕມຕ຺ຕໍ. ກາເຍນ ຜຸສິຕ຺ວາຕິ ນາມກາເຍນ ຜຸສິຕ຺ວາ.

ຍາຈິໂຕວ ພຫຸລໍ ຈີວຣໍ ປຣິຠຸຎ຺ຊຕີຕິ ‘‘ອິທໍ, ຠນ຺ເຕ, ປຣິຠຸຎ຺ຊຖາ’’ຕິ ເອວໍ ທາຍເກຫິ ຍາຈມາເນເຫວ ອຸປນີຕໍ ຈີວຣໍ ພຫຸໍ ປຣິຠຸຎ຺ຊຕິ, ກິຎ຺ຈິເທວ ອຍາຈິຕໍ, ພາກຸລຕ຺ເຖໂຣ ວິຍ. ປິຓ຺ຑປາຕໍ ຂທິຣວນມຄ຺ເຄ ສີວລິຕ຺ເຖໂຣ ວິຍ. ເສນາສນໍ ອຏ຺ຐກນາຄຣສຸຕ຺ເຕ (ມ. ນິ. ໒.໑໗ ອາທໂຍ; ອ. ນິ. ໑໑.໑໖ ອາທໂຍ) ອານນ຺ທຕ຺ເຖໂຣ ວິຍ. ຄິລານປຈ຺ຈຍໍ ປິລິນ຺ທວຈ຺ຉເຖໂຣ ວິຍ. ຕ຺ຍສ຺ສາຕິ ເຕ ອສ຺ສ. ມນາເປເນວາຕິ ມນໍ ອລ຺ລີຍນເກນ. ສມຸທາຈຣນ຺ຕີຕິ ກຕ຺ຕພ຺ພກິຈ຺ຈານິ ກໂຣນ຺ຕິ ປວຕ຺ຕນ຺ຕິ ວາ. ອຸປຫາຣໍ ອຸປຫຣນ຺ຕີຕິ ກາຍິກເຈຕສິກອຸປຫາຣໍ ອຸປຫຣນ຺ຕິ ອຸປນີຍນ຺ຕິ. ສນ຺ນິປາຕິການີຕິ ຕິຓ຺ຓມ຺ປິ ສນ຺ນິປາເຕນ ນິພ຺ພຕ຺ຕານິ. ອຸຕຸປຣິຓາມຊານີຕິ ອຸຕຸປຣິຓາມໂຕ ອຕິສີຕອຕິອຸຓ຺ຫອຸຕຸໂຕ ຊາຕານິ. ວິສມປຣິຫາຣຊານີຕິ ອຈ຺ຈາສນອຕິຏ຺ຐານາທິກາ ວິສມປຣິຫາຣໂຕ ຊາຕານິ. ໂອປກ຺ກມິການີຕິ ວຘພນ຺ຘນາທິອຸປກ຺ກເມນ ນິພ຺ພຕ຺ຕານິ. ກມ຺ມວິປາກຊານີຕິ ວິນາປິ ອິເມຫິ ກາຣເຓຫິ ເກວລໍ ປຸພ຺ເພ ກຕກມ຺ມວິປາກວເສເນວ ຊາຕານິ. ຈຕຸນ຺ນໍ ຌານານນ຺ຕິ ເອຕ຺ຖ ຂີຓາສວານມ຺ປິ ພຸທ຺ຘານມ຺ປິ ກິຣິຍຊ຺ຌານາເນວ ອຘິປ຺ເປຕານິ. ເສສໍ ອຸຕ຺ຕານຕ຺ຖເມວາຕິ.

໘. ສໍໂຍຊນສຸຕ຺ຕວຓ຺ຓນາ

໘໘. ອຏ຺ຐເມ ສາສເນ ລທ຺ຘປ຺ປຕິຏ຺ຐຕ຺ຕາ ໂສຕາປນ຺ໂນວ ສມຓມຈໂລຕິ ວຸຕ຺ໂຕ, ນາຕິພຫຸຄຸຓຕ຺ຕາ ນ ພຫຸປຕ຺ຕໍ ວິຍ ສໂຣຣຸຫໍ ສກທາຄາມີ ສມຓປຸຓ຺ຑຣີໂກຕິ, ຕໂຕ ພຫຸຕຣຄຸຓຕ຺ຕາ ສຕປຕ຺ຕໍ ວິຍ ສໂຣຣຸຫໍ ອນາຄາມີ ສມຓປທຸໂມຕິ, ຖທ຺ຘຠາວກຣານໍ ກິເລສານໍ ສພ຺ພໂສ ສມຸຈ຺ຉິນ຺ນຕ຺ຕາ ມຸທຸຠາວປ຺ປຕ຺ໂຕ ຂີຓາສໂວ ສມຓສຸຂຸມາໂລຕິ.

໙. ສມ຺ມາທິຏ຺ຐິສຸຕ຺ຕວຓ຺ຓນາ

໘໙. ນວເມ ສມ຺ມາທິຏ຺ຐິໂກຕິອາທີຫິ ອຏ຺ຐງ຺ຄິກມຄ຺ຄວເສນ ປຐມສຸຕ຺ເຕ ວິຍ ສຕ຺ຕ ເສຂາ ຄຫິຕາ. ທຸຕິຍວາເຣ ທສງ຺ຄິກມຄ຺ຄວເສນ ວາ ອຣຫຕ຺ຕຜລຎາຓອຣຫຕ຺ຕຜລວິມຸຕ຺ຕີຫິ ສທ຺ຘິໍ, ອຏ຺ຐງ຺ຄິກມຄ຺ຄວເສນ ວາ ສຸກ຺ຂວິປສ຺ສກຂີຓາສໂວ ກຖິໂຕ, ຕຕິຍວາເຣ ອຸຠໂຕຠາຄວິມຸຕ຺ໂຕ, ຈຕຸຕ຺ຖວາເຣ ຕຖາຄໂຕ ຈ ຕຖາຄຕສທິສຂີຓາສໂວ ຈາຕິ. ອິຕິ ອິທໍ ສຸຕ຺ຕໍ ປຐມສຸຕ຺ເຕ ກຖິຕປຸຄ຺ຄລານໍ ວເສເນວ ກຖິຕໍ, ເທສນາມຕ຺ຕເມວ ປເນຕ຺ຖ ນານນ຺ຕິ.

໑໐. ຂນ຺ຘສຸຕ຺ຕວຓ຺ຓນາ

໙໐. ທສເມ ປຐມວາເຣ ອຣຫຕ຺ຕຕ຺ຖາຍ ປໂຍຄໍ ອນາຣຠິຕ຺ວາ ຐິໂຕ ປມາທວິຫາຣີ ເສຂປຸຄ຺ຄໂລ ກຖິໂຕ. ທຸຕິຍວາເຣ ອນຸປ຺ປາທິຕຊ຺ຌາໂນ ອາຣທ຺ຘວິປສ຺ສໂກ ອປ຺ປມາທວິຫາຣີ ເສຂປຸຄ຺ຄໂລ ກຖິໂຕ. ຕຕິຍວາເຣ ອາຣທ຺ຘວິປສ຺ສໂກ ອປ຺ປມາທວິຫາຣີ ອຏ຺ຐວິໂມກ຺ຂລາຠີ ເສຂປຸຄ຺ຄໂລ ກຖິໂຕ, ຈຕຸຕ຺ຖວາເຣ ປຣມສຸຂຸມາລຂີຓາສໂວຕິ.

ມຈລວຄ຺ໂຄ ຈຕຸຕ຺ໂຖ.

(໑໐) ໕. ອສຸຣວຄ຺ໂຄ

໑. ອສຸຣສຸຕ຺ຕວຓ຺ຓນາ

໙໑. ປຎ຺ຈມສ຺ສ ປຐເມ ອສຸໂຣຕິ ອສຸຣສທິໂສ ພີຠຈ຺ໂຉ. ເທໂວຕິ ເທວສທິໂສ ຄຸຓວເສນ ອຠິຣູໂປ ປາສາທິໂກ.

໒. ປຐມສມາຘິສຸຕ຺ຕວຓ຺ຓນາ

໙໒. ທຸຕິເຍ ອຊ຺ຌຕ຺ຕໍ ເຈໂຕສມຖສ຺ສາຕິ ນິຍກຊ຺ຌຕ຺ເຕ ອປ຺ປນາຈິຕ຺ຕສມາຘິສ຺ສ. ອຘິປຎ຺ຎາຘມ຺ມວິປສ຺ສນາຍາຕິ ສງ຺ຂາຣປຣິຄ຺ຄາຫກວິປສ຺ສນາຎາຓສ຺ສ. ຕຎ຺ຫິ ອຘິປຎ຺ຎາສງ຺ຂາຕຎ຺ຈ, ປຎ຺ຈກ຺ຂນ຺ຘສງ຺ຂາເຕສຸ ຈ ຘມ຺ເມສຸ ວິປສ຺ສນາຠູຕໍ, ຕສ຺ມາ ‘‘ອຘິປຎ຺ຎາຘມ຺ມວິປສ຺ສນາ’’ຕິ ວຸຈ຺ຈຕີຕິ.

໓. ທຸຕິຍສມາຘິສຸຕ຺ຕວຓ຺ຓນາ

໙໓. ຕຕິເຍ ໂຍໂຄ ກຣຓີໂຍຕິ ຍຸຕ຺ຕປ຺ປຍຸຕ຺ຕຕາ ກຕ຺ຕພ຺ພາ. ຉນ຺ໂທຕິ ກຕ຺ຕຸກມ຺ຍຕາຉນ຺ໂທ. ວາຍາໂມຕິ ປໂຍໂຄ. ອຸສ຺ສາໂຫຕິ ຕໂຕ ອຘິມຕ຺ຕຕຣໍ ວີຣິຍໍ. ອຸສ຺ໂສຬ຺ຫີຕິ ປງ຺ກລຄ຺ຄສກຏອຸທ຺ຘຣຓສທິສໍ ມຫາວີຣິຍໍ. ອປ຺ປຏິວານີຕິ ອນິວຕ຺ຕນຕາ.

໔. ຕຕິຍສມາຘິສຸຕ຺ຕວຓ຺ຓນາ

໙໔. ຈຕຸຕ຺ເຖ ເອວໍ ໂຂ, ອາວຸໂສ, ສງ຺ຂາຣາ ທຏ຺ຐພ຺ພາຕິອາທີສຸ, ອາວຸໂສ, ສງ຺ຂາຣາ ນາມ ອນິຈ຺ຈໂຕ ທຏ຺ຐພ຺ພາ, ອນິຈ຺ຈໂຕ ສມ຺ມສິຕພ຺ພາ, ອນິຈ຺ຈໂຕ ປສ຺ສິຕພ຺ພາ. ຕຖາ ທຸກ຺ຂໂຕ, ອນຕ຺ຕໂຕຕິ ເອວໍ ອຕ຺ໂຖ ທຏ຺ຐພ຺ໂພ. ເອວໍ ໂຂ, ອາວຸໂສ, ຈິຕ຺ຕໍ ສຓ຺ຐເປຕພ຺ພນ຺ຕິອາທີສຸປິ ປຐມຊ຺ຌານວເສນ, ອາວຸໂສ, ຈິຕ຺ຕໍ ສຓ຺ຐເປຕພ຺ພໍ ປຐມຊ຺ຌານວເສນ ສນ຺ນິສາເທຕພ຺ພໍ, ປຐມຊ຺ຌານວເສນ ເອໂກທິ ກາຕພ຺ພໍ, ປຐມຊ຺ຌານວເສນ ສມາທຫິຕພ຺ພໍ. ຕຖາ ທຸຕິຍຊ຺ຌານາທິວເສນາຕິ ເອວໍ ອຕ຺ໂຖ ທຏ຺ຐພ຺ໂພ. ອິເມສຸ ຕີສຸປິ ສຸຕ຺ເຕສຸ ສມຖວິປສ຺ສນາ ໂລກິຍໂລກຸຕ຺ຕຣາວ ກຖິຕາ.

໕. ຉວາລາຕສຸຕ຺ຕວຓ຺ຓນາ

໙໕. ປຎ຺ຈເມ ຉວາລາຕນ຺ຕິ ສຸສາເນ ອລາຕໍ. ມຊ຺ເຌ ຄູຖຄຕນ຺ຕິ ມຊ຺ຌຏ຺ຐາເນ ຄູຖມກ຺ຂິຕໍ. ເນວ ຄາເມ ກຏ຺ຐຕ຺ຖໍ ຜຣຕີຕິ ກູຏໂຄປານສິຖມ຺ຠໂສປານາທີນໍ ອຕ຺ຖາຍ ອນຸປເນຍ຺ຍຕາຍ ຄາເມ ນ ກຏ຺ຐຕ຺ຖໍ ສາເຘຕິ, ເຂຕ຺ຕກຸຏິປາທໍ ວາ ມຎ຺ຈປາທໍ ວາ ກາຕຸໍ ອນຸປເນຍ຺ຍຕາຍ ນ ອຣຎ຺ເຎ ກຏ຺ຐຕ຺ຖໍ ສາເຘຕິ. ທ຺ວີສຸ ໂກຏີສຸ ຄຍ຺ຫມານໍ ຫຕ຺ຖໍ ຑຫຕິ, ມຊ຺ເຌ ຄຍ຺ຫມານໍ ຄູເຖນ ມກ຺ເຂຕິ. ຕຖູປມນ຺ຕິ ຕໍສຣິກ຺ຂກໍ. ອຠິກ຺ກນ຺ຕຕໂຣຕິ ສຸນ຺ທຣຕໂຣ. ປຓີຕຕໂຣຕິ ອຸຕ຺ຕມຕໂຣ. ຄວາ ຂີຣນ຺ຕິ ຄາວິໂຕ ຂີຣໍ. ຂີຣມ຺ຫາ ທຘີຕິອາທີສຸ ປຣໍ ປຣໍ ປຸຣິມໂຕ ປຸຣິມໂຕ ອຄ຺ຄໍ, ສປ຺ປິມຓ຺ໂຑ ປນ ເຕສຸ ສພ຺ເພສຸປິ ອຄ຺ຄເມວ. ອຄ຺ໂຄຕິອາທີສຸ ຄຸເຓຫິ ອຄ຺ໂຄ ເຈວ ເສຏ຺ໂຐ ຈ ປມຸໂຂ ຈ ອຸຕ຺ຕໂມ ຈ ປວໂຣ ຈາຕິ ເວທິຕພ຺ໂພ. ຉວາລາຕູປມາຍ ນ ທຸສ຺ສີໂລ ປຸຄ຺ຄໂລ ກຖິໂຕ, ອປ຺ປສ຺ສຸໂຕ ປນ ວິສ຺ສຏ຺ຐກມ຺ມນ຺ໂຕ ໂຄຓສທິໂສ ປຸຄ຺ຄໂລ ກຖິໂຕຕິ ເວທິຕພ຺ໂພ. ຉຏ຺ເຐ ສພ຺ພໍ ອຸຕ຺ຕານຕ຺ຖເມວ.

໗. ຂິປ຺ປນິສນ຺ຕິສຸຕ຺ຕວຓ຺ຓນາ

໙໗. ສຕ຺ຕເມ ຂິປ຺ປນິສນ຺ຕີຕິ ຂິປ຺ປນິສາມໂນ ສີຆໍ ຊານິຕຸໍ ສມຕ຺ໂຖ. ສຸຕານຎ຺ຈ ຘມ຺ມານນ຺ຕິ ສຸຕປ຺ປຄຸຓານໍ ຕນ຺ຕິຘມ຺ມານໍ. ອຕ຺ຖູປປຣິກ຺ຂີຕິ ອຕ຺ຖໍ ອຸປປຣິກ຺ຂໂກ. ອຕ຺ຖມຎ຺ຎາຍ ຘມ຺ມມຎ຺ຎາຍາຕິ ອຏ຺ຐກຖຎ຺ຈ ປາຬິຎ຺ຈ ຊານິຕ຺ວາ. ຘມ຺ມານຸຘມ຺ມປ຺ປຏິປນ຺ໂນ ໂຫຕີຕິ ນວໂລກຸຕ຺ຕຣຘມ຺ມານໍ ອນຸຣູປຘມ຺ມຠູຕໍ ສສີລກໍ ປຸພ຺ພຠາຄປ຺ປຏິປທໍ ປຏິປນ຺ໂນ ໂຫຕິ. ໂນ ຈ ກລ຺ຍາຓວາໂຈຕິ ນ ສຸນ຺ທຣວຈໂນ. ນ ກລ຺ຍາຓວາກ຺ກຣໂຓຕິ ນ ສຸນ຺ທຣວຈນໂຆໂສ ໂຫຕິ. ໂປຣິຍາຕິອາທີຫິ ສທ຺ຘິໍ ໂນ-ກາໂຣ ໂຍເຊຕພ຺ໂພເຍວ. ຄຸຓປຣິປຸຓ຺ຓາຍ ອປລິພຸທ຺ຘາຍ ອໂທສາຍ ອຄຬິຕປທພ຺ຍຎ຺ຊນາຍ ອຕ຺ຖໍ ວິຎ຺ຎາເປຕຸໍ ສມຕ຺ຖາຍ ວາຈາຍ ສມນ຺ນາຄໂຕ ນ ໂຫຕີຕິ ອຕ຺ໂຖ. ອິມິນາ ອຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

໘. ອຕ຺ຕຫິຕສຸຕ຺ຕວຓ຺ຓນາ

໙໘-໙໙. ອຏ຺ຐມໍ ປຸຄ຺ຄລຊ຺ຌາສຍວເສນາປິ ທສພລສ຺ສ ເທສນາຎາຓວິລາເສນາປິ ກຖິຕໍ, ນວມໍ ປຎ຺ຈເວຣວເສນ.

໑໐. ໂປຕລິຍສຸຕ຺ຕວຓ຺ຓນາ

໑໐໐. ທສເມ ກາເລນາຕິ ຍຸຕ຺ຕປ຺ປຕ຺ຕກາເລນ. ຂມຕີຕິ ຣຸຈ຺ຈຕິ. ຍທິທໍ ຕຕ຺ຖ ຕຕ຺ຖ ກາລຎ຺ຎຸຕາຕິ ຍາ ເອສາ ຕຕ຺ຖ ຕຕ຺ຖ ກາລໍ ຊານນາ. ຕໍ ຕໍ ກາລໍ ຎຕ຺ວາ ຫິ ອວຓ຺ຓາຣຫສ຺ສ ອວຓ຺ຓກຖນໍ ວຓ຺ຓາຣຫສ຺ສ ຈ ວຓ຺ຓກຖນໍ ປຓ຺ຑິຕານໍ ປກຕີຕິ ທສ຺ເສຕິ.

ອສຸຣວຄ຺ໂຄ ປຎ຺ຈໂມ.

ທຸຕິຍປຓ຺ຓາສກໍ ນິຏ຺ຐິຕໍ.