໕. ໂຣຫິຕສ຺ສວຄ຺ໂຄ

໑. ສມາຘິຠາວນາສຸຕ຺ຕວຓ຺ຓນາ

໔໑. ປຎ຺ຈມສ຺ສ ປຐເມ ຎາຓທສ຺ສນປ຺ປຏິລາຠາຍາຕິ ທິພ຺ພຈກ຺ຂຸຎາຓທສ຺ສນສ຺ສ ປຏິລາຠາຍ. ທິວາສຎ຺ຎໍ ອຘິຏ຺ຐາຕີຕິ ທິວາຕິ ເອວໍ ສຎ຺ຎໍ ອຘິຏ຺ຐາຕິ. ຍຖາ ທິວາ ຕຖາ ຣຕ຺ຕິນ຺ຕິ ຍຖາ ທິວາ ອາໂລກສຎ຺ຎາ ມນສິ ກຕາ, ຕເຖວ ຕໍ ຣຕ຺ຕິມ຺ປິ ມນສິ ກໂຣຕິ. ທຸຕິຍປເທປິ ເອເສວ ນໂຍ. ສປ຺ປຠາສນ຺ຕິ ທິພ຺ພຈກ຺ຂຸຎາໂຓຠາເສນ ສໂຫຠາສໍ. ກິຎ຺ຈາປິ ອາໂລກສທິສໍ ກຕໍ, ອຕ຺ໂຖ ປເນຕ຺ຖ ນ ເອວໍ ສລ຺ລກ຺ເຂຕພ຺ໂພ. ທິພ຺ພຈກ຺ຂຸຎາຓາໂລໂກ ຫິ ອິຘາຘິປ຺ເປໂຕ.

ວິທິຕາຕິ ປາກຏາ ຫຸຕ຺ວາ. ກຖໍ ປນ ເວທນາ ວິທິຕາ ອຸປ຺ປຊ຺ຊນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕີຕິ? ອິຘ ຠິກ຺ຂຸ ວຕ຺ຖຸໍ ປຣິຄ຺ຄຓ຺ຫາຕິ, ອາຣມ຺ມຓໍ ປຣິຄ຺ຄຓ຺ຫາຕິ. ຕສ຺ສ ປຣິຄ຺ຄຫິຕວຕ຺ຖາຣມ຺ມຓຕາຍ ຕາ ເວທນາ ‘‘ເອວໍ ອຸປ຺ປຊ຺ຊິຕ຺ວາ ເອວໍ ຐຕ຺ວາ ເອວໍ ນິຣຸຊ຺ຌນ຺ຕີ’’ຕິ ວິທິຕາ ອຸປ຺ປຊ຺ຊນ຺ຕິ, ວິທິຕາ ຕິຏ຺ຐນ຺ຕິ, ວິທິຕາ ອພ຺ຠຕ຺ຖໍ ຄຈ຺ຉນ຺ຕິ ນາມ. ສຎ຺ຎາວິຕກ຺ເກສຸປິ ເອເສວ ນໂຍ.

ອຸທຍພ຺ພຍານຸປສ຺ສີຕິ ອຸທຍຎ຺ຈ ວຍຎ຺ຈ ປສ຺ສນ຺ໂຕ. ອິຕິ ຣູປນ຺ຕິ ເອວໍ ຣູປໍ ເອຕ຺ຕກໍ ຣູປໍ ນ ອິໂຕ ປຣໍ ຣູປໍ ອຕ຺ຖີຕິ. ອິຕິ ຣູປສ຺ສ ສມຸທໂຍຕິ ເອວໍ ຣູປສ຺ສ ອຸປ຺ປາໂທ. ອຕ຺ຖງ຺ຄໂມຕິ ປນ ເຠໂທ ອຘິປ຺ເປໂຕ. ເວທນາທີສຸປິ ເອເສວ ນໂຍ. ອິທຎ຺ຈ ປນ ເມຕໍ, ຠິກ຺ຂເວ, ສນ຺ຘາຍ ຠາສິຕນ຺ຕິ, ຠິກ຺ຂເວ, ຍໍ ມຍາ ເອຕໍ ປຸຓ຺ຓກປຎ຺ເຫ ‘‘ສງ຺ຂາຍ ໂລກສ຺ມິ’’ນ຺ຕິອາທິ ຠາສິຕໍ, ຕໍ ອິທໍ ຜລສມາປຕ຺ຕິໍ ສນ຺ຘາຍ ຠາສິຕນ຺ຕິ ອຕ຺ໂຖ.

ຕຕ຺ຖ ສງ຺ຂາຍາຕິ ຎາເຓນ ຊານິຕ຺ວາ. ໂລກສ຺ມິນ຺ຕິ ສຕ຺ຕໂລເກ. ປໂຣປຣານີຕິ ອຸຈ຺ຈາວຈານິ ອຸຕ຺ຕມາຘມານິ. ອິຎ຺ຊິຕນ຺ຕິ ຈລິຕໍ. ນຕ຺ຖິ ກຸຫິຎ຺ຈິ ໂລເກຕິ ໂລກສ຺ມິໍ ກຕ຺ຖຈິ ເອກກ຺ຂນ຺ເຘປິ ເອກາຍຕເນປິ ເອກຘາຕຸຍາປິ ເອກາຣມ຺ມເຓປິ ນຕ຺ຖິ. ສນ຺ໂຕຕິ ປຈ຺ຈນີກກິເລສວູປສເມນ ສນ຺ໂຕ. ວິຘູໂມຕິ ໂກຘຘູເມນ ວິຄຕຘູໂມ. ເອວເມຕ຺ຖ ສຸຕ຺ຕນ຺ເຕ ມຄ຺ເຄກຄ຺ຄຕມ຺ປິ ກເຖຕ຺ວາ ຄາຖາຍ ຜລສມາປຕ຺ຕິເຍວ ກຖິຕາຕິ.

໒. ປຎ຺ຫພ຺ຍາກຣຓສຸຕ຺ຕວຓ຺ຓນາ

໔໒. ທຸຕິເຍ ໂຍ ຈ ເຕສໍ ຕຕ຺ຖ ຕຕ຺ຖ, ຊານາຕິ ອນຸຘມ຺ມຕນ຺ຕິ ໂຍ ເອເຕສໍ ປຎ຺ຫານໍ ຕສ຺ມິໍ ຕສ຺ມິໍ ຐາເນ ພ຺ຍາກຣຓໍ ຊານາຕິ. ຈຕຸປຎ຺ຫສ຺ສ ກຸສໂລ, ອາຫຸ ຠິກ຺ຂຸໍ ຕຖາວິຘນ຺ຕິ ຕຖາວິຘໍ ຠິກ຺ຂຸໍ ເຕສຸ ຈຕູສຸ ປຎ຺ເຫສຸ ກຸສໂລຕິ ເອວໍ ວທນ຺ຕິ. ທຸຣາສໂທ ທຸປ຺ປສໂຫຕິ ປເຣຫິ ຆຏ຺ເຏຕຸໍ ວາ ອຠິຠວິຕຸໍ ວາ ນ ສກ຺ກາ. ຄມ຺ຠີໂຣຕິ ສຕ຺ຕສີທນ຺ຕຣມຫາສມຸທ຺ໂທ ວິຍ ຄມ຺ຠີໂຣ. ທຸປ຺ປຘໍສິໂຍຕິ ທຸມ຺ໂມຈາປໂຍ, ຄຫິຕຄ຺ຄຫຓໍ ວິສ຺ສຊ຺ຊາເປຕຸໍ ນ ສກ຺ກາຕິ ອຕ຺ໂຖ. ອຕ຺ເຖ ອນຕ຺ເຖ ຈາຕິ ວຑ຺ຒິຍຎ຺ຈ ອວຑ຺ຒິຍຎ຺ຈ. ອຕ຺ຖາຠິສມຍາຕິ ອຕ຺ຖສມາຄເມນ. ຘີໂຣ ປຓ຺ຑິໂຕຕິ ປວຸຈ຺ຈຕີຕິ ຘິຕິສມ຺ປນ຺ໂນ ປຸຄ຺ຄໂລ ‘‘ປຓ຺ຑິໂຕ ອຍ’’ນ຺ຕິ ເອວໍ ປວຸຈ຺ຈຕິ.

໓-໔. ໂກຘຄຣຸສຸຕ຺ຕທ຺ວຍວຓ຺ຓນາ

໔໓-໔໔. ຕຕິເຍ ໂກຘຄຣຸ ນ ສທ຺ຘມ຺ມຄຣູຕິ ໂກຘໍ ຄາຣເວນ ຄຣຸໍ ກຕ຺ວາ ຄຓ຺ຫາຕິ, ນ ສທ຺ຘມ຺ມໍ, ສທ຺ຘມ຺ມໍ ປນ ອຄາຣເວນ ລາມກໍ ກຕ຺ວາ ຄຓ຺ຫາຕິ. ເສສປເທສຸປິ ເອເສວ ນໂຍ.

ວິຣູຫນ຺ຕີຕິ ວຑ຺ຒນ຺ຕິ, ສຎ຺ຊາຕມູລາຍ ວາ ສທ຺ຘາຍ ປຕິຏ຺ຐຫນ຺ຕິ ອຈລາ ຠວນ຺ຕິ. ຈຕຸຕ຺ເຖ ໂກຘຄຣຸຕາຕິ ໂກຘມ຺ຫິ ສຄາຣວຕາ. ເອສ ນໂຍ ສພ຺ພຕ຺ຖ.

໕. ໂຣຫິຕສ຺ສສຸຕ຺ຕວຓ຺ຓນາ

໔໕. ປຎ຺ຈເມ ຍຕ຺ຖາຕິ ຈກ຺ກວາຬໂລກສ຺ສ ເອໂກກາເສ ຠຸມ຺ມໍ. ນ ຈວຕິ ນ ອຸປປຊ຺ຊຕີຕິ ອິທໍ ອປຣາປຣໍ ຈຸຕິປຏິສນ຺ຘິວເສນ ຄຫິຕໍ. ຄມເນນາຕິ ປທຄມເນນ. ໂລກສ຺ສ ອນ຺ຕນ຺ຕິ ສຕ຺ຖາ ສງ຺ຂາຣໂລກສ຺ສ ອນ຺ຕໍ ສນ຺ຘາຍ ວທຕິ. ຎາເຕຍ຺ຍນ຺ຕິອາທີສຸ ຎາຕພ຺ພໍ ທຏ຺ຐພ຺ພໍ ປຕ຺ຕພ຺ພນ຺ຕິ ອຕ຺ໂຖ. ອິຕິ ເທວປຸຕ຺ເຕນ ຈກ຺ກວາຬໂລກສ຺ສ ອນ຺ໂຕ ປຸຈ຺ຉິໂຕ, ສຕ຺ຖາຣາ ສງ຺ຂາຣໂລກສ຺ສ ກຖິໂຕ. ໂສ ປນ ‘‘ອຕ຺ຕໂນ ປຎ຺ເຫນ ສທ຺ຘິໍ ສຕ຺ຖຸ ພ຺ຍາກຣຓໍ ສເມຕີ’’ຕິ ສຎ຺ຎາຍ ສມ຺ປຫໍສນ຺ໂຕ ອຈ຺ຉຣິຍນ຺ຕິອາທິມາຫ.

ທຬ຺ຫຘມ຺ມາຕິ ທຬ຺ຫຘນຸ ອຸຕ຺ຕມປ຺ປມາເຓນ ຘນຸນາ ສມນ຺ນາຄໂຕ. ຘນຸຄ຺ຄໂຫຕິ ຘນຸອາຈຣິໂຍ. ສິກ຺ຂິໂຕຕິ ທ຺ວາທສ ວສ຺ສານິ ຘນຸສິປ຺ປໍ ສິກ຺ຂິໂຕ. ກຕຫຕ຺ໂຖຕິ ອຸສຠປ຺ປມາເຓປິ ວາລຄ຺ຄໍ ວິຊ຺ຌິຕຸໍ ສມຕ຺ຖຠາເວນ ກຕຫຕ຺ໂຖ. ກຕູປາສໂນຕິ ກຕສຣກ຺ເຂໂປ ທສ຺ສິຕສິປ຺ໂປ. ອສເນນາຕິ ກຓ຺ເຑນ. ອຕິປາເຕຍ຺ຍາຕິ ອຕິກ຺ກເມຍ຺ຍ. ຍາວຕາ ໂສ ຕາລຈ຺ຉາທິໍ ອຕິກ຺ກເມຍ຺ຍ, ຕາວຕາ ກາເລນ ເອກໍ ຈກ຺ກວາຬໍ ອຕິກ຺ກມາມີຕິ ອຕ຺ຕໂນ ຊວສມ຺ປຕ຺ຕິໍ ທສ຺ເສຕິ.

ປຸຣຕ຺ຖິມາ ສມຸທ຺ທາ ປຈ຺ຉິໂມຕິ ຍຖາ ປຸຣຕ຺ຖິມາ ສມຸທ຺ທາ ປຈ຺ຉິມສມຸທ຺ໂທ ທູເຣ, ເອວໍ ເມ ທູເຣ ປທວີຕິຫາໂຣ ອໂຫສີຕິ ວທຕິ. ໂສ ກິຣ ປາຈີນຈກ຺ກວາຬມຸຂວຏ຺ຏິຍໍ ຐິໂຕ ປາທໍ ປສາເຣຕ຺ວາ ປຈ຺ຉິມຈກ຺ກວາຬມຸຂວຏ຺ຏິໍ ອຕິກ຺ກມຕິ, ປຸນ ທຸຕິຍປາທໍ ປສາເຣຕ຺ວາ ປຣຈກ຺ກວາຬມຸຂວຏ຺ຏິໍ ອຕິກ຺ກມຕິ. ອິຈ຺ຉາຄຕນ຺ຕິ ອິຈ຺ຉາ ເອວ. ອຎ຺ຎຕ຺ເຣວາຕິ ນິປ຺ປປຎ຺ຈຕໍ ທສ຺ເສຕິ. ຠິກ຺ຂາຈາຣກາເລ ກິເຣສ ນາຄລຕາທນ຺ຕກຏ຺ຐໍ ຂາທິຕ຺ວາ ອໂນຕຕ຺ເຕ ມຸຂໍ ໂຘວິຕ຺ວາ ກາເລ ສມ຺ປຕ຺ເຕ ອຸຕ຺ຕຣກຸຣຸມ຺ຫິ ປິຓ຺ຑາຍ ຈຣິຕ຺ວາ ຈກ຺ກວາຬມຸຂວຏ຺ຏິຍໍ ນິສິນ຺ໂນ ຠຕ຺ຕກິຈ຺ຈໍ ກໂຣຕິ, ຕຕ຺ຖ ມຸຫຸຕ຺ຕໍ ວິສ຺ສມິຕ຺ວາ ປຸນ ຊວຕິ. ວສ຺ສສຕາຍຸໂກຕິ ຕທາ ທີຆາຍຸກກາໂລ ໂຫຕິ, ອຍໍ ປນ ວສ຺ສສຕາວສິຏ຺ເຐ ອາຍຸມ຺ຫິ ຄມນໍ ອາຣຠິ. ວສ຺ສສຕຊີວີຕິ ຕໍ ວສ຺ສສຕໍ ອນນ຺ຕຣາເຍນ ຊີວນ຺ໂຕ. ອນ຺ຕຣາເຍວ ກາລງ຺ກໂຕຕິ ຈກ຺ກວາຬໂລກສ຺ສ ອນ຺ຕໍ ອປ຺ປຕ຺ວາ ອນ຺ຕຣາວ ມໂຕ. ໂສ ປນ ຕຕ຺ຖ ກາລໍ ກຕ຺ວາປິ ອາຄນ຺ຕ຺ວາ ອິມສ຺ມິໍເຍວ ຈກ຺ກວາເຬ ນິພ຺ພຕ຺ຕິ.

ອປ຺ປຕ຺ວາຕິ ສງ຺ຂາຣໂລກສ຺ສ ອນ຺ຕໍ ອປ຺ປຕ຺ວາ. ທຸກ຺ຂສ຺ສາຕິ ວຏ຺ຏທຸກ຺ຂສ຺ສ. ອນ຺ຕກິຣິຍນ຺ຕິ ປຣິຍນ຺ຕກຣຓໍ. ກເຬວເຣຕິ ອຕ຺ຕຠາເວ. ສສຎ຺ຎິມ຺ຫິ ສມນເກຕິ ສສຎ຺ເຎ ສຈິຕ຺ຕເກ. ໂລກນ຺ຕິ ທຸກ຺ຂສຈ຺ຈໍ. ໂລກສມຸທຍນ຺ຕິ ສມຸທຍສຈ຺ຈໍ. ໂລກນິໂຣຘນ຺ຕິ ນິໂຣຘສຈ຺ຈໍ. ປຏິປທນ຺ຕິ ມຄ຺ຄສຈ຺ຈໍ. ອິຕິ ‘‘ນາຫໍ, ອາວຸໂສ, ອິມານິ ຈຕ຺ຕາຣິ ສຈ຺ຈານິ ຕິຓກຏ຺ຐາທີສຸ ປຎ຺ຎເປມິ, ອິມສ຺ມິໍ ປນ ຈຕຸມຫາຠູຕິເກ ກາຍສ຺ມິໍເຍວ ປຎ຺ຎເປມີ’’ຕິ ທສ຺ເສຕິ. ສມິຕາວີຕິ ສມິຕປາໂປ. ນາສີສຕີຕິ ນ ປຕ຺ເຖຕິ. ຉຏ຺ຐໍ ອຸຕ຺ຕານຕ຺ຖເມວາຕິ.

໗. ສຸວິທູຣສຸຕ຺ຕວຓ຺ຓນາ

໔໗. ສຕ຺ຕເມ ສຸວິທູຣວິທູຣານີຕິ ເກນຈິ ປຣິຍາເຍນ ອນາສນ຺ນານິ ຫຸຕ຺ວາ ສຸວິທູຣາເນວ ວິທູຣານິ. ນຠຎ຺ຈ, ຠິກ຺ຂເວ, ປຖວີ ຈາຕິ ອາກາສຎ຺ຈ ມຫາປຖວີ ຈ. ຕຕ຺ຖ ກິຎ຺ຈາປິ ປຖວິໂຕ ອາກາສໍ ນາມ ນ ທູເຣ, ທ຺ວງ຺ຄຸລມຕ຺ເຕປິ ໂຫຕິ. ອຎ຺ຎມຎ຺ຎໍ ອລຄ຺ຄນຏ຺ເຐນ ປນ ‘‘ສຸວິທູຣວິທູເຣ’’ຕິ ວຸຕ຺ຕໍ. ເວໂຣຈໂນຕິ ສູຣິໂຍ. ສຕຎ຺ຈ, ຠິກ຺ຂເວ, ຘມ຺ໂມຕິ ຈຕຸສຕິປຏ຺ຐານາທິເຠໂທ ສຕ຺ຕຕິໍສໂພຘິປກ຺ຂິຍຘມ຺ໂມ. ອສຕຎ຺ຈ ຘມ຺ໂມຕິ ທ຺ວາສຏ຺ຐິທິຏ຺ຐິຄຕເຠໂທ ອສ຺ສທ຺ຘມ຺ໂມ.

ປຠງ຺ກໂຣຕິ ອາໂລກກໂຣ. ອພ຺ຍາຍິໂກ ໂຫຕີຕິ ອວິຄຈ຺ຉນສຠາໂວ ໂຫຕິ. ສຕໍ ສມາຄໂມຕິ ປຓ຺ຑິຕານໍ ມິຕ຺ຕສນ຺ຖວວເສນ ສມາຄໂມ. ຍາວາປິ ຕິຏ຺ເຐຍ຺ຍາຕິ ຍຕ຺ຕກໍ ອທ຺ຘານໍ ຕິຏ຺ເຐຍ຺ຍ. ຕເຖວ ໂຫຕີຕິ ຕາທິໂສວ ໂຫຕິ, ປກຕິໍ ນ ຊຫຕິ. ຂິປ຺ປໍ ຫິ ເວຕີຕິ ສີຆໍ ວິຄຈ຺ຉຕິ.

໘. ວິສາຂສຸຕ຺ຕວຓ຺ຓນາ

໔໘. ອຏ຺ຐເມ ປຎ຺ຈາລປຸຕ຺ໂຕຕິ ປຎ຺ຈາລພ຺ຣາຫ຺ມຓິຍາ ປຸຕ຺ໂຕ. ໂປຣິຍາ ວາຈາຍາຕິ ປຣິປຸຓ຺ຓວາຈາຍ. ວິສ຺ສຏ຺ຐາຍາຕິ ອປລິພຸທ຺ຘາຍ. ອເນລຄລາຍາຕິ ນິທ຺ໂທສາຍ ເຈວ ອຄຬິຕາຍ ຈ ອປຕິຕປທພ຺ຍຎ຺ຊນາຍ. ປຣິຍາປນ຺ນາຍາຕິ ວິວຏ຺ຏປຣິຍາປນ຺ນາຍ. ອນິສ຺ສິຕາຍາຕິ ວຏ຺ຏໍ ອນິສ຺ສິຕາຍ. ວິວຏ຺ຏນິສ຺ສິຕເມວ ກຕ຺ວາ ກເຖຕິ, ວຏ຺ຏນິສ຺ສິຕໍ ກຕ຺ວາ ນ ກເຖຕີຕິ ອຍເມຕ຺ຖ ອຘິປ຺ປາໂຍ.

ນາຠາສມານນ຺ຕິ ນ ອກເຖນ຺ຕໍ. ອມຕໍ ປທນ຺ຕິ ນິພ຺ພານປທໍ. ຠາສເຍຕິ ໂອຠາເສຍ຺ຍ. ໂຊຕເຍຕິ ຕສ຺ເສວ ເວວຈນໍ. ປຄ຺ຄຓ຺ເຫ ອິສິນໍ ຘຊນ຺ຕິ ອພ຺ຠຸຄ຺ຄຕຏ຺ເຐນ ນວໂລກຸຕ຺ຕຣຘມ຺ໂມ ອິສີນໍ ຘໂຊ ນາມ ວຸຈ຺ຈຕິ, ຕເມວ ປຄ຺ຄຓ຺ເຫຍ຺ຍ ອຸກ຺ຂິເປຍ຺ຍ, ອຸຈ຺ຈໍ ກຕ຺ວາ ກເຖຍ຺ຍາຕິ ອຕ຺ໂຖ. ນວໂລກຸຕ຺ຕຣຘມ຺ມທີປກໍ ສຸຠາສິຕໍ ຘໂຊ ເອເຕສນ຺ຕິ ສຸຠາສິຕຘຊາ. ອິສໂຍຕິ ພຸທ຺ຘາທໂຍ ອຣິຍາ. ຘມ຺ໂມ ຫິ ອິສິນໍ ຘໂຊຕິ ເຫຏ຺ຐາ ວຸຕ຺ຕນເຍເນວ ໂລກຸຕ຺ຕຣຘມ຺ໂມ ອິສີນໍ ຘໂຊ ນາມາຕິ.

໙. ວິປລ຺ລາສສຸຕ຺ຕວຓ຺ຓນາ

໔໙. ນວເມ ສຎ຺ຎາວິປລ຺ລາສາຕິ ສຎ຺ຎາຍ ວິປລ຺ລຕ຺ຖຠາວາ, ຈຕສ຺ໂສ ວິປຣີຕສຎ຺ຎາໂຍຕິ ອຕ຺ໂຖ. ເສສປທທ຺ວເຍປິ ເອເສວ ນໂຍ. ອນິຈ຺ເຈ, ຠິກ຺ຂເວ, ນິຈ຺ຈນ຺ຕິ ສຎ຺ຎາວິປລ຺ລາໂສຕິ ອນິຈ຺ເຈ ວຕ຺ຖຸສ຺ມິໍ ‘‘ນິຈ຺ຈໍ ອິທ’’ນ຺ຕິ ເອວໍ ຄເຫຕ຺ວາ ອຸປ຺ປຊ຺ຊນກສຎ຺ຎາ, ສຎ຺ຎາວິປລ຺ລາໂສຕິ ອຕ຺ໂຖ. ອິມິນາ ນເຍນ ສພ຺ພປເທສຸ ອຕ຺ໂຖ ເວທິຕພ຺ໂພ.

ອນຕ຺ຕນິ ຈ ອຕ຺ຕາຕິ ອນຕ຺ຕນິ ‘‘ອຕ຺ຕາ’’ຕິ ເອວໍສຎ຺ຎິໂນຕິ ອຕ຺ໂຖ. ມິຈ຺ຉາທິຏ຺ຐິຫຕາຕິ ນ ເກວລໍ ສຎ຺ຎິໂນວ, ສຎ຺ຎາຍ ວິຍ ອຸປ຺ປຊ຺ຊມານາຍ ມິຈ຺ຉາທິຏ຺ຐິຍາປິ ຫຕາ. ຂິຕ຺ຕຈິຕ຺ຕາຕິ ເຕ ສຎ຺ຎາທິຏ຺ຐິໂຍ ວິຍ ອຸປ຺ປຊ຺ຊມາເນນ ຂິຕ຺ເຕນ ຈິຕ຺ເຕນ ສມນ຺ນາຄຕາ. ວິສຎ຺ຎິໂນຕິ ເທສນາມຕ຺ຕເມຕໍ, ວິປຣີຕສຎ຺ຎາຈິຕ຺ຕທິຏ຺ຐິໂນຕິ ອຕ຺ໂຖ. ເຕ ໂຍຄຍຸຕ຺ຕາ ມາຣສ຺ສາຕິ ເຕ ມາຣສ຺ສ ໂຍເຄ ຍຸຕ຺ຕາ ນາມ ໂຫນ຺ຕິ. ອໂຍຄກ຺ເຂມິໂນຕິ ຈຕູຫິ ໂຍເຄຫິ ເຂມໍ ນິພ຺ພານໍ ອປ຺ປຕ຺ຕາ. ສຕ຺ຕາຕິ ປຸຄ຺ຄລາ. ພຸທ຺ຘາຕິ ຈຕຸສຈ຺ຈພຸທ຺ຘາ. ອິມໍ ຘມ຺ມນ຺ຕິ ຈຕຸສຈ຺ຈຘມ຺ມໍ. ສຈິຕ຺ຕໍ ປຈ຺ຈລທ຺ຘາຕິ ສກໍ ຈິຕ຺ຕໍ ປຏິລຠິຕ຺ວາ. ອນິຈ຺ຈໂຕ ທກ຺ຂຸນ຺ຕິ ອນິຈ຺ຈຠາເວນ ອທ຺ທສໍສຸ. ອສຸຠຕທ຺ທສຸນ຺ຕິ ອສຸຠໍ ອສຸຠໂຕເຍວ ອທ຺ທສໍສຸ. ສມ຺ມາທິຏ຺ຐິສມາທານາຕິ ຄຫິຕສມ຺ມາທສ຺ສນາ. ສພ຺ພໍ ທຸກ຺ຂໍ ອຸປຈ຺ຈຄຸນ຺ຕິ ສກລໍ ວຏ຺ຏທຸກ຺ຂໍ ສມຕິກ຺ກນ຺ຕາ.

໑໐. ອຸປກ຺ກິເລສສຸຕ຺ຕວຓ຺ຓນາ

໕໐. ທສເມ ອຸປກ຺ກິເລສາຕິ ວິໂຣຈິຕຸໍ ອທຕ຺ວາ ອຸປກ຺ກິລິຏ຺ຐຠາວກຣເຓນ ອຸປກ຺ກິເລສາ. ມຫິກາຕິ ຫິມໍ. ຘູໂມ ຣໂຊຕິ ຘູໂມ ຈ ຣໂຊ ຈ. ຣາຫູຕິ ປຸຣິມາ ຕໂຍ ອສມ຺ປຕ຺ຕອຸປກ຺ກິເລສາ, ຣາຫຸ ປນ ສມ຺ປຕ຺ຕອຸປກ຺ກິເລສວເສນ ກຖິໂຕຕິ ເວທິຕພ຺ໂພ. ສມຓພ຺ຣາຫ຺ມຓາ ນ ຕປນ຺ຕິ ນ ຠາສນ຺ຕິ ນ ວິໂຣຈນ຺ຕີຕິ ຄຸຓປ຺ປຕາເປນ ນ ຕປນ຺ຕິ, ຄຸໂຓຠາເສນ ນ ຠາສນ຺ຕິ, ຄຸຓວິໂຣຈເນນ ນ ວິໂຣຈນ຺ຕິ. ສຸຣາເມຣຍປານາ ອປ຺ປຏິວິຣຕາຕິ ປຎ຺ຈວິຘາຍ ສຸຣາຍ ຈຕຸພ຺ພິຘສ຺ສ ເມຣຍສ຺ສ ຈ ປານໂຕ ອວິຣຕາ.

ອວິຊ຺ຊານິວຸຕາຕິ ອວິຊ຺ຊາຍ ນິວາຣິຕາ ປິຫິຕາ. ປິຍຣູປາຠິນນ຺ທິໂນຕິ ປິຍຣູປໍ ສາຕຣູປໍ ອຠິນນ຺ທມານາ ຕຸສ຺ສມານາ. ສາທິຍນ຺ຕີຕິ ຄຓ຺ຫນ຺ຕິ. ອວິທ຺ທສູຕິ ອນ຺ຘພາລາ. ສເນຕ຺ຕິກາຕິ ຕຓ຺ຫາໂຍຕ຺ເຕເນວ ສໂຍຕ຺ຕາ. ກຏສິນ຺ຕິ ອຕ຺ຕຠາວໍ. ໂຆຣນ຺ຕິ ກກ຺ຂຬໍ. ອິມສ຺ມິໍ ສຸຕ຺ເຕປິ ຄາຖາສຸປິ ວຏ຺ຏເມວ ກຖິຕນ຺ຕິ.

ໂຣຫິຕສ຺ສວຄ຺ໂຄ ປຎ຺ຈໂມ.