໔. ປສາທສຸຕ຺ຕວຓ຺ຓນາ

໓໔. ຈຕຸຕ຺ເຖ ອຄ຺ເຄສຸ ປສາທາ, ອຄ຺ຄາ ວາ ປສາທາຕິ ອຄ຺ຄປ຺ປສາທາ. ຍາວຕາຕິ ຍຕ຺ຕກາ. ອປທາຕິ ນິປ຺ປທາ ອຫິມຈ຺ຉາທໂຍ. ທ຺ວິປທາຕິ ມນຸສ຺ສປກ຺ຂິອາທໂຍ. ຈຕຸປ຺ປທາຕິ ຫຕ຺ຖິອສ຺ສາທໂຍ. ພຫຸປ຺ປທາຕິ ສຕປທິອາທໂຍ. ເນວສຎ຺ຎິນາສຎ຺ຎິໂນຕິ ຠວຄ຺ເຄ ນິພ຺ພຕ຺ຕສຕ຺ຕາ. ອຄ຺ຄມກ຺ຂາຍຕີຕິ ຄຸເຓຫິ ອຄ຺ໂຄ ອຸຕ຺ຕໂມ ເສຏ຺ໂຐຕິ ອກ຺ຂາຍຕິ. ອສງ຺ຂຕາຕິ ນິພ຺ພານເມວ ຄເຫຕ຺ວາ ວຸຕ຺ຕໍ. ວິຣາໂຄຕິອາທີນິ ນິພ຺ພານສ຺ເສວ ນາມານິ. ຕຎ຺ຫິ ອາຄມ຺ມ ສພ຺ພກິເລສາ ວິຣຊ຺ຊນ຺ຕິ, ສພ຺ເພ ຣາຄມທາທໂຍ ມທາ ນິມ຺ມທາ ໂຫນ຺ຕິ, ອຠາວໍ ຄຈ຺ຉນ຺ຕິ, ສພ຺ພາ ປິປາສາ ວິນຍໍ ອຸເປນ຺ຕິ, ສພ຺ເພ ອາລຍາ ສມຸຄ຺ຆາຕໍ ຄຈ຺ຉນ຺ຕິ, ວຏ຺ຏານິ ອຸປຈ຺ຉິຊ຺ຊນ຺ຕິ, ຕຓ຺ຫາ ຂີຍນ຺ຕິ, ວຏ຺ຏທຸກ຺ຂາ ນິຣຸຊ຺ຌນ຺ຕິ, ສພ຺ເພ ປຣິຬາຫາ ນິພ຺ພາຍນ຺ຕິ. ຕສ຺ມາ ເອຕານິ ນາມານິ ລຠຕິ. ເສສເມຕ຺ຖ ອຸຕ຺ຕານຕ຺ຖເມວາຕິ.