໒. ທຸຕິຍອຸຣຸເວລສຸຕ຺ຕວຓ຺ຓນາ

໒໒. ທຸຕິເຍ ສມ຺ພຫຸລາຕິ ພຫຸກາ. ພ຺ຣາຫ຺ມຓາຕິ ຫຸຫຸກ຺ກຊາຕິເກນ ພ຺ຣາຫ຺ມເຓນ ສທ຺ຘິໍ ອາຄຕາ ພ຺ຣາຫ຺ມຓາ. ຊິຓ຺ຓາຕິ ຊຣາຊິຓ຺ຓາ. ວຸຑ຺ຒາຕິ ວໂຍວຸທ຺ຘາ. ມຫລ຺ລກາຕິ ຊາຕິມຫລ຺ລກາ. ອທ຺ຘຄຕາຕິ ຕໂຍ ວເຍ ອທ຺ເຘ ອຕິກ຺ກນ຺ຕາ. ສຸຕເມຕນ຺ຕິ ອມ຺ເຫຫິ ສຸຕໍ ເອຕໍ. ຕຍິທໍ ໂຠ, ໂຄຕມ, ຕເຖວາຕິ ໂຠ, ໂຄຕມ, ເອຕໍ ອມ຺ເຫຫິ ສຸຕກາຣຓໍ ຕຖາ ເອວ. ຕຍິທໍ ໂຠ, ໂຄຕມ, ນ ສມ຺ປນ຺ນເມວາຕິ ຕໍ ເອຕໍ ອຠິວາທນາທິອກຣຓໍ ອນນຸຈ຺ຉວິກເມວ.

ອກາລວາທີຕິອາທີສຸ ອກາເລ ວທຕີຕິ ອກາລວາທີ. ອສຠາວໍ ວທຕີຕິ ອຠູຕວາທີ. ອນຕ຺ຖໍ ວທຕິ, ໂນ ອຕ຺ຖນ຺ຕິ ອນຕ຺ຖວາທີ. ອຘມ຺ມໍ ວທຕິ, ໂນ ຘມ຺ມນ຺ຕິ ອຘມ຺ມວາທີ. ອວິນຍໍ ວທຕິ, ໂນ ວິນຍນ຺ຕິ ອວິນຍວາທີ. ອນິຘານວຕິໍ ວາຈໍ ຠາສິຕາຕິ ນ ຫທເຍ ນິເຘຕພ຺ພຍຸຕ຺ຕກໍ ວາຈໍ ຠາສິຕາ. ອກາເລນາຕິ ກເຖຕຸໍ ອຍຸຕ຺ຕກາເລນ. ອນປເທສນ຺ຕິ ອປເທສຣຫິຕໍ, ສາປເທສໍ ສກາຣຓໍ ກຕ຺ວາ ນ ກເຖຕິ. ອປຣິຍນ຺ຕວຕິນ຺ຕິ ປຣິຍນ຺ຕຣຫິຕໍ, ນ ປຣິຈ຺ເຉທໍ ທສ຺ເສຕ຺ວາ ກເຖຕິ. ອນຕ຺ຖສໍຫິຕນ຺ຕິ ນ ໂລກິຍໂລກຸຕ຺ຕຣອຕ຺ຖນິສ຺ສິຕໍ ກຕ຺ວາ ກເຖຕິ. ພາໂລ ເຖໂຣຕ຺ເວວ ສງ຺ຂໍ ຄຈ຺ຉຕີຕິ ອນ຺ຘພາໂລ ເຖໂຣຕິ ສງ຺ຂໍ ຄຈ຺ຉຕິ.

ກາລວາທີຕິອາທີນິ ວຸຕ຺ຕປຏິປກ຺ຂວເສນ ເວທິຕພ຺ພານິ. ປຓ຺ຑິໂຕ ເຖໂຣຕ຺ເວວ ສງ຺ຂໍ ຄຈ຺ຉຕີຕິ ປຓ຺ຑິຈ຺ເຈນ ສມນ຺ນາຄຕຕ຺ຕາ ປຓ຺ຑິໂຕ, ຖິຣຠາວປ຺ປຕ຺ຕິຍາ ເຖໂຣຕິ ສງ຺ຂໍ ຄຈ຺ຉຕິ.

ພຫຸສ຺ສຸໂຕ ໂຫຕີຕິ ພຫຸໍ ອສ຺ສ ສຸຕໍ ໂຫຕິ, ນວງ຺ຄໍ ສຕ຺ຖຸສາສນໍ ປາຬິອນຸສນ຺ຘິປຸພ຺ພາປຣວເສນ ອຸຄ຺ຄຫິຕໍ ໂຫຕີຕິ ອຕ຺ໂຖ. ສຸຕຘໂຣຕິ ສຸຕສ຺ສ ອາຘາຣຠູໂຕ. ຍສ຺ສ ຫິ ອິໂຕ ຄຫິຕໍ ອິໂຕ ປລາຍຕິ, ຉິທ຺ທຆເຏ ອຸທກໍ ວິຍ ນ ຕິຏ຺ຐຕິ, ປຣິສມຊ຺ເຌ ເອກສຸຕ຺ຕໍ ວາ ຊາຕກໍ ວາ ກເຖຕຸໍ ວາ ວາເຈຕຸໍ ວາ ນ ສກ຺ໂກຕິ, ອຍໍ ນ ສຸຕຘໂຣ ນາມ. ຍສ຺ສ ປນ ອຸຄ຺ຄຫິຕໍ ພຸທ຺ຘວຈນໍ ອຸຄ຺ຄຫິຕກາລສທິສເມວ ໂຫຕິ, ທສປິ ວີສຕິປິ ວສ຺ສານິ ສຊ຺ຌາຍໍ ອກໂຣນ຺ຕສ຺ສ ເນວ ນສ຺ສຕິ, ອຍໍ ສຸຕຘໂຣ ນາມ. ສຸຕສນ຺ນິຈໂຍຕິ ສຸຕສ຺ສ ສນ຺ນິຈຍຠູໂຕ. ຍສ຺ສ ຫິ ສຸຕໍ ຫທຍມຎ຺ຊູສາຍ ສນ຺ນິຈິຕໍ ສິລາຍ ເລຂາ ວິຍ ສຸວຓ຺ຓປຕ຺ເຕ ປກ຺ຂິຕ຺ຕສີຫວສາ ວິຍ ຈ ຕິຏ຺ຐຕິ, ອຍໍ ສຸຕສນ຺ນິຈໂຍ ນາມ. ຘາຕາຕິ ຘາຕາ ປຄຸຓາ. ເອກຈ຺ຈສ຺ສ ຫິ ອຸຄ຺ຄຫິຕພຸທ຺ຘວຈນໍ ຘາຕໍ ປຄຸຓໍ ນິຈ຺ຈລິກໍ ນ ໂຫຕິ, ‘‘ອສຸກໍ ສຸຕ຺ຕໍ ວາ ຊາຕກໍ ວາ ກເຖຫີ’’ຕິ ວຸຕ຺ເຕ ‘‘ສຊ຺ຌາຍິຕ຺ວາ ສໍສນ຺ທິຕ຺ວາ ສມນຸຄ຺ຄາຫິຕ຺ວາ ຊານິສ຺ສາມີ’’ຕິ ວທຕິ. ເອກຈ຺ຈສ຺ສ ຘາຕໍ ປຄຸຓໍ ຠວງ຺ຄໂສຕສທິສໍ ໂຫຕິ, ‘‘ອສຸກໍ ສຸຕ຺ຕໍ ວາ ຊາຕກໍ ວາ ກເຖຫີ’’ຕິ ວຸຕ຺ເຕ ອຸທ຺ຘຣິຕ຺ວາ ຕເມວ ກເຖຕິ. ຕໍ ສນ຺ຘາຍ ວຸຕ຺ຕໍ ‘‘ຘາຕາ’’ຕິ. ວຈສາ ປຣິຈິຕາຕິ ສຸຕ຺ຕທສກ-ວຄ຺ຄທສກປຓ຺ຓາສທສກວເສນ ວາຈາຍ ສຊ຺ຌາຍິຕາ. ມນສານຸເປກ຺ຂິຕາຕິ ຈິຕ຺ເຕນ ອນຸເປກ຺ຂິຕາ. ຍສ຺ສ ວາຈາຍ ສຊ຺ຌາຍິຕໍ ພຸທ຺ຘວຈນໍ ມນສາ ຈິນ຺ເຕນ຺ຕສ຺ສ ຕຕ຺ຖ ຕຕ຺ຖ ປາກຏໍ ໂຫຕິ, ມຫາທີປໍ ຊາເລຕ຺ວາ ຐິຕສ຺ສ ຣູປຄຕໍ ວິຍ ປຎ຺ຎາຍຕິ, ຕໍ ສນ຺ຘາເຍຕໍ ວຸຕ຺ຕໍ. ທິຏ຺ຐິຍາ ສຸປ຺ປຏິວິທ຺ຘາຕິ ອຕ຺ຖໂຕ ຈ ກາຣຓໂຕ ຈ ປຎ຺ຎາຍ ສຸປ຺ປຏິວິທ຺ຘາ.

ອາຠິເຈຕສິການນ຺ຕິ ອຠິເຈໂຕຕິ ອຠິກ຺ກນ຺ຕໍ ວິສຸທ຺ຘໍ ຈິຕ຺ຕໍ ວຸຈ຺ຈຕິ, ອຘິຈິຕ຺ຕໍ ວາ, ອຠິເຈຕສິ ຊາຕານິ ອາຠິເຈຕສິການິ, ອຠິເຈໂຕສນ຺ນິສ຺ສິຕານີຕິ ວາ ອາຠິເຈຕສິການິ. ທິຏ຺ຐຘມ຺ມສຸຂວິຫາຣານນ຺ຕິ ທິຏ຺ຐຘມ຺ເມ ສຸຂວິຫາຣານໍ. ທິຏ຺ຐຘມ຺ໂມຕິ ປຈ຺ຈກ຺ໂຂ ອຕ຺ຕຠາໂວ ວຸຈ຺ຈຕິ, ຕຕ຺ຖ ສຸຂວິຫາຣຠູຕານນ຺ຕິ ອຕ຺ໂຖ. ຣູປາວຈຣຊ຺ຌານານເມຕໍ ອຘິວຈນໍ. ຕານິ ຫິ ອປ຺ເປຕ຺ວາ ນິສິນ຺ນາ ຌາຍິໂນ ອິມສ຺ມິໍເຍວ ອຕ຺ຕຠາເວ ອສໍກິລິຏ຺ຐເນກ຺ຂມ຺ມສຸຂໍ ວິນ຺ທນ຺ຕິ, ຕສ຺ມາ ‘‘ທິຏ຺ຐຘມ຺ມສຸຂວິຫາຣານີ’’ຕິ ວຸຈ຺ຈຕິ. ນິກາມລາຠີຕິ ນິກາເມນ ລາຠີ, ອຕ຺ຕໂນ ອິຈ຺ຉາວເສນ ລາຠີ, ອິຈ຺ຉິຕິຈ຺ຉິຕກ຺ຂເຓ ສມາປຊ຺ຊິຕຸໍ ສມຕ຺ໂຖຕິ ວຸຕ຺ຕໍ ໂຫຕິ. ອກິຈ຺ຉລາຠີຕິ ສຸເຂເນວ ປຈ຺ຈນີກຘມ຺ເມ ວິກ຺ຂມ຺ເຠຕ຺ວາ ສມາປຊ຺ຊິຕຸໍ ສມຕ຺ໂຖຕິ ວຸຕ຺ຕໍ ໂຫຕິ. ອກສິຣລາຠີຕິ ອກສິຣານໍ ລາຠີ ວິປຸລານໍ, ຍຖາປຣິຈ຺ເຉເທນ ວຸຏ຺ຐາຕຸໍ ສມຕ຺ໂຖຕິ ວຸຕ຺ຕໍ ໂຫຕິ. ເອກຈ຺ໂຈ ຫິ ລາຠີເຍວ ໂຫຕິ, ນ ປນ ອິຈ຺ຉິຕິຈ຺ຉິຕກ຺ຂເຓ ສກ຺ໂກຕິ ສມາປຊ຺ຊິຕຸໍ. ເອກຈ຺ໂຈ ສກ຺ໂກຕິ ຕຖາສມາປຊ຺ຊິຕຸໍ, ປາຣິປນ຺ຖິເກ ຈ ປນ ກິຈ຺ເຉນ ວິກ຺ຂມ຺ເຠຕິ. ເອກຈ຺ໂຈ ຕຖາ ຈ ສມາປຊ຺ຊຕິ, ປາຣິປນ຺ຖິເກ ຈ ອກິຈ຺ເຉເນວ ວິກ຺ຂມ຺ເຠຕິ, ນ ສກ຺ໂກຕິ ນາຬິກຍນ຺ຕໍ ວິຍ ຍຖາປຣິຈ຺ເຉເທເຍວ ວຸຏ຺ຐາຕຸໍ. ຍສ຺ສ ປນ ອຍໍ ຕິວິຘາປິ ສມ຺ປທາ ອຕ຺ຖິ, ໂສ ‘‘ອກິຈ຺ຉລາຠີ ອກສິຣລາຠີ’’ຕິ ວຸຈ຺ຈຕິ. ອາສວານໍ ຂຍາຕິອາທີນິ ວຸຕ຺ຕຕ຺ຖາເນວ. ເອວມິຘ ສີລມ຺ປິ ພາຫຸສຈ຺ຈມ຺ປິ ຂີຓາສວສ຺ເສວ ສີລໍ ພາຫຸສຈ຺ຈຎ຺ຈ, ຌານານິປິ ຂີຓາສວສ຺ເສວ ວຬຎ຺ຊນກຊ຺ຌານານິ ກຖິຕານິ. ‘‘ອາສວານໍ ຂຍາ’’ຕິອາທີຫິ ປນ ອຣຫຕ຺ຕໍ ກຖິຕໍ. ຜເລນ ເຈຕ຺ຖ ມຄ຺ຄກິຈ຺ຈໍ ປກາສິຕນ຺ຕິ ເວທິຕພ຺ພໍ.

ອຸທ຺ຘເຕນາຕິ ອຸທ຺ຘຈ຺ຈສຫຄເຕນ. ສມ຺ຜນ຺ຕິ ປລາປກຖໍ. ອສມາຫິຕສງ຺ກປ຺ໂປຕິ ອຏ຺ຐປິຕສງ຺ກປ຺ໂປ. ມໂຄຕິ ມຄສທິໂສ. ອາຣາຕິ ທູເຣ. ຖາວເຣຍ຺ຍມ຺ຫາຕິ ຖາວຣຠາວໂຕ. ປາປທິຏ຺ຐີຕິ ລາມກທິຏ຺ຐິ. ອນາທໂຣຕິ ອາທຣຣຫິໂຕ. ສຸຕວາຕິ ສຸເຕນ ອຸປຄໂຕ. ປຏິຠານວາຕິ ທຸວິເຘນ ປຏິຠາເນນ ສມນ຺ນາຄໂຕ. ປຎ຺ຎາຍຕ຺ຖໍ ວິປສ຺ສຕີຕິ ສຫວິປສ຺ສນາຍ ມຄ຺ຄປຎ຺ຎາຍ ຈຕຸນ຺ນໍ ສຈ຺ຈານໍ ອຕ຺ຖໍ ວິນິວິຊ຺ຌິຕ຺ວາ ປສ຺ສຕິ. ປາຣຄູ ສພ຺ພຘມ຺ມານນ຺ຕິ ສພ຺ເພສໍ ຂນ຺ຘາທິຘມ຺ມານໍ ປາຣໍ ຄໂຕ, ອຠິຎ຺ຎາປາຣຄູ, ປຣິຎ຺ຎາປາຣຄູ, ປຫານປາຣຄູ, ຠາວນາປາຣຄູ, ສຈ຺ຉິກິຣິຍາປາຣຄູ, ສມາປຕ຺ຕິປາຣຄູຕິ ເອວໍ ຉພ຺ພິເຘນ ປາຣຄມເນນ ສພ຺ພຘມ຺ມານໍ ປາຣໍ ປຣິໂຍສານໍ ຄໂຕ. ອຂິໂລຕິ ຣາຄຂິລາທິວິຣຫິໂຕ. ປຏິຠານວາຕິ ທຸວິເຘເນວ ປຏິຠາເນນ ສມນ຺ນາຄໂຕ. ພ຺ຣຫ຺ມຈຣິຍສ຺ສ ເກວລີຕິ ສກລພ຺ຣຫ຺ມຈຣິໂຍ. ເສສເມຕ຺ຖ ອຸຕ຺ຕານເມວາຕິ.