໒. ຈຣວຄ຺ໂຄ

໑. ຈຣສຸຕ຺ຕວຓ຺ຓນາ

໑໑. ທຸຕິຍສ຺ສ ປຐເມ ອຘິວາເສຕີຕິ ຈິຕ຺ຕໍ ອຘິໂຣເປຕ຺ວາ ວາເສຕິ. ນປ຺ປຊຫຕີຕິ ນ ປຣິຈ຺ຈຊຕິ. ນ ວິໂນເທຕີຕິ ນ ນີຫຣຕິ. ນ ພ຺ຍນ຺ຕີກໂຣຕີຕິ ນ ວິຄຕນ຺ຕໍ ປຣິຈ຺ຉິນ຺ນປຣິວຏຸມໍ ກໂຣຕິ. ນ ອນຠາວໍ ຄເມຕີຕິ ນ ອນຸອຠາວໍ ອວຑ຺ຒິໍ ວິນາສໍ ຄເມຕິ. ຈຣມ຺ປີຕິ ຈຣນ຺ໂຕປິ. ອນາຕາປີຕິ ນິພ຺ພີຣິໂຍ. ອໂນຕ຺ຕາປີຕິ ອຸປວາທຠຍຣຫິໂຕ. ສຕຕນ຺ຕິ ນິຈ຺ຈໍ. ສມິຕນ຺ຕິ ນິຣນ຺ຕຣໍ. ເອວໍ ສພ຺ພຕ຺ຖ ອຕ຺ຖໍ ຎຕ຺ວາ ສຸກ຺ກປກ຺ເຂ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ.

ຄາຖາສຸ ເຄຫນິສ຺ສິຕນ຺ຕິ ກິເລສນິສ຺ສິຕໍ. ໂມຫເນຍ຺ເຍສູຕິ ໂມຫຊນເກສຸ ອາຣມ຺ມເຓສຸ. ອຠພ຺ໂພຕິ ອຠາຊນຠູໂຕ. ຜຸຏ຺ຐຸໍ ສມ຺ໂພຘິມຸຕ຺ຕມນ຺ຕິ ອຣຫຕ຺ຕມຄ຺ຄສງ຺ຂາຕໍ ອຸຕ຺ຕມຎາຓໍ ຜຸສິຕຸໍ.

໒. ສີລສຸຕ຺ຕວຓ຺ຓນາ

໑໒. ທຸຕິເຍ ສມ຺ປນ຺ນສີລາຕິ ປຣິປຸຓ຺ຓສີລາ. ສມ຺ປນ຺ນປາຕິໂມກ຺ຂາຕິ ປຣິປຸຓ຺ຓປາຕິໂມກ຺ຂາ. ປາຕິໂມກ຺ຂສໍວຣສໍວຸຕາຕິ ປາຕິໂມກ຺ຂສໍວຣສີເລນ ສໍວຸຕາ ປິຫິຕາ ອຸເປຕາ ຫຸຕ຺ວາ ວິຫຣຖ. ອາຈາຣໂຄຈຣສມ຺ປນ຺ນາຕິ ອາຈາເຣນ ຈ ໂຄຈເຣນ ຈ ສມ຺ປນ຺ນາ ສມຸປາຄຕາ ຠວຖ. ອຓຸມຕ຺ເຕສຸ ວຊ຺ເຊສູຕິ ອຓຸປ຺ປມາເຓສຸ ໂທເສສຸ. ຠຍທສ຺ສາວິໂນຕິ ຕານິ ອຓຸມຕ຺ຕານິ ວຊ຺ຊານິ ຠຍໂຕ ທສ຺ສນສີລາ. ສມາທາຍ ສິກ຺ຂຖ ສິກ຺ຂາປເທສູຕິ ສພ຺ພສິກ຺ຂາໂກຏ຺ຐາເສສຸ ສມາທາຕພ຺ພໍ ສມາທາຍ ຄເຫຕ຺ວາ ສິກ຺ຂຖ. ‘‘ສມ຺ປນ຺ນສີລານໍ…ເປ… ສິກ຺ຂາປເທສູ’’ຕິ ເອຕ຺ຕເກນ ຘມ຺ມກ຺ຂາເນນ ສິກ຺ຂຕ຺ຕເຍ ສມາທາເປຕ຺ວາ ເຈວ ປຏິລທ຺ຘຄຸເຓສຸ ຈ ວຓ຺ຓໍ ກເຖຕ຺ວາ ອິທານິ ອຸຕ຺ຕຣິ ກາຕພ຺ພໍ ທສ຺ເສນ຺ໂຕ ກິມສ຺ສາຕິອາທິມາຫ. ຕຕ຺ຖ ກິມສ຺ສາຕິ ກິໍ ຠເວຍ຺ຍ.

ຍຕໍ ຈເຣຕິ ຍຖາ ຈຣນ຺ໂຕ ຍໂຕ ໂຫຕິ ສໍຍໂຕ, ເອວໍ ຈເຣຍ຺ຍ. ເອສ ນໂຍ ສພ຺ພຕ຺ຖ. ອຈ຺ເຉຕິ ນິສີເທຍ຺ຍ. ຍຕເມນໍ ປສາຣເຍຕິ ຍໍ ອງ຺ຄປຈ຺ຈງ຺ຄໍ ປສາເຣຍ຺ຍ, ຕໍ ຍຕໍ ສໍຍຕເມວ ກຕ຺ວາ ປສາເຣຍ຺ຍ. ອຸທ຺ຘນ຺ຕິ ອຸປຣິ. ຕິຣິຍນ຺ຕິ ມຊ຺ຌໍ. ອປາຈີນນ຺ຕິ ອໂຘ. ເອຕ຺ຕາວຕາ ອຕີຕາ ປຈ຺ຈຸປ຺ປນ຺ນາ ອນາຄຕາ ຈ ປຎ຺ຈກ຺ຂນ຺ຘາ ກຖິຕາ. ຍາວຕາຕິ ປຣິຈ຺ເຉທວຈນໍ. ຊຄໂຕ ຄຕີຕິ ໂລກສ຺ສ ນິປ຺ຜຕ຺ຕິ. ສມເວກ຺ຂິຕາ ຈ ຘມ຺ມານໍ, ຂນ຺ຘານໍ ອຸທຍພ຺ພຍນ຺ຕິ ເອເຕສໍ ສພ຺ພໂລເກ ອຕີຕາທິເຠທານໍ ປຎ຺ຈກ຺ຂນ຺ຘຘມ຺ມານໍ ອຸທຍຎ຺ຈ ວຍຎ຺ຈ ສມເວກ຺ຂິຕາ. ‘‘ປຎ຺ຈກ຺ຂນ຺ຘານໍ ອຸທຍໍ ປສ຺ສນ຺ໂຕ ປຎ຺ຈວີສຕິ ລກ຺ຂຓານິ ປສ຺ສຕິ, ວຍໍ ປສ຺ສນ຺ໂຕ ປຎ຺ຈວີສຕິ ລກ຺ຂຓານິ ປສ຺ສຕີ’’ຕິ ວຸຕ຺ເຕຫິ ສມປຎ຺ຎາສາຍ ລກ຺ຂເຓຫິ ສມ຺ມາ ອເວກ຺ຂິຕາ ໂຫຕິ. ເຈໂຕສມຖສາມີຈິນ຺ຕິ ຈິຕ຺ຕສມຖສ຺ສ ອນຸຈ຺ຉວິກໍ ປຏິປທໍ. ສິກ຺ຂມານນ຺ຕິ ປຏິປຊ຺ຊມານໍ, ປູຣຍມານນ຺ຕິ ອຕ຺ໂຖ. ປຫິຕຕ຺ໂຕຕິ ເປສິຕຕ຺ໂຕ. ອາຫູຕິ ກຖຍນ຺ຕິ. ເສສເມຕ຺ຖ ອຸຕ຺ຕານເມວ. ອິມສ຺ມິໍ ປນ ສຸຕ຺ເຕ ສີລໍ ມິສ຺ສກໍ ກເຖຕ຺ວາ ຄາຖາສຸ ຂີຓາສໂວ ກຖິໂຕ.

໓. ປຘານສຸຕ຺ຕວຓ຺ຓນາ

໑໓. ຕຕິເຍ ສມ຺ມປ຺ປຘານານີຕິ ສຸນ຺ທຣປຘານານິ ອຸຕ຺ຕມວີຣິຍານິ. ສມ຺ມປ຺ປຘານາຕິ ປຣິປຸຓ຺ຓວີຣິຍາ. ມາຣເຘຍ຺ຍາຠິຠູຕາຕິ ເຕຠູມກວຏ຺ຏສງ຺ຂາຕໍ ມາຣເຘຍ຺ຍໍ ອຠິຠວິຕ຺ວາ ສມຕິກ຺ກມິຕ຺ວາ ຐິຕາ. ເຕ ອສິຕາຕິ ເຕ ຂີຓາສວາ ອນິສ຺ສິຕາ ນາມ. ຊາຕິມຣຓຠຍສ຺ສາຕິ ຊາຕິຎ຺ຈ ມຣຓຎ຺ຈ ປຏິຈ຺ຈ ອຸປ຺ປຊ຺ຊນກຠຍສ຺ສ, ຊາຕິມຣຓສງ຺ຂາຕສ຺ເສວ ວາ ຠຍສ຺ສ. ປາຣຄູຕິ ປາຣງ຺ຄຕາ. ເຕ ຕຸສິຕາຕິ ເຕ ຂີຓາສວາ ຕຸຏ຺ຐາ ນາມ. ເຊຕ຺ວາ ມາຣໍ ສວາຫິນິນ຺ຕິ ສເສນກໍ ມາຣໍ ຊິນິຕ຺ວາ ຐິຕາ. ເຕ ອເນຊາຕິ ເຕ ຂີຓາສວາ ຕຓ຺ຫາສງ຺ຂາຕາຍ ເອຊາຍ ອເນຊາ ນິຈ຺ຈລາ ນາມ. ນມຸຈິພລນ຺ຕິ ມາຣພລໍ. ອຸປາຕິວຕ຺ຕາຕິ ອຕິກ຺ກນ຺ຕາ. ເຕ ສຸຂິຕາຕິ ເຕ ຂີຓາສວາ ໂລກຸຕ຺ຕຣສຸເຂນ ສຸຂິຕາ ນາມ. ເຕເນວາຫ –

‘‘ສຸຂິຕາ ວຕ ອຣຫນ຺ໂຕ, ຕຓ຺ຫາ ເນສໍ ນ ວິຊ຺ຊຕິ;

ອສ຺ມິມາໂນ ສມຸຈ຺ຉິນ຺ໂນ, ໂມຫຊາລໍ ປທາລິຕ’’ນ຺ຕິ. (ສໍ. ນິ. ໓.໗໖);

໔. ສໍວຣສຸຕ຺ຕວຓ຺ຓນາ

໑໔. ຈຕຸຕ຺ເຖ ປຘານານີຕິ ວີຣິຍານິ. ສໍວຣປ຺ປຘານນ຺ຕິ ຈກ຺ຂາທີນິ ສໍວຣນ຺ຕສ຺ສ ອຸປ຺ປນ຺ນວີຣິຍໍ. ປຫານປ຺ປຘານນ຺ຕິ ກາມວິຕກ຺ກາທໂຍ ປຊຫນ຺ຕສ຺ສ ອຸປ຺ປນ຺ນວີຣິຍໍ. ຠາວນາປ຺ປຘານນ຺ຕິ ສມ຺ໂພຊ຺ຌງ຺ເຄ ຠາເວນ຺ຕສ຺ສ ອຸປ຺ປນ຺ນວີຣິຍໍ. ອນຸຣກ຺ຂຓາປ຺ປຘານນ຺ຕິ ສມາຘິນິມິຕ຺ຕໍ ອນຸຣກ຺ຂນ຺ຕສ຺ສ ອຸປ຺ປນ຺ນວີຣິຍໍ.

ວິເວກນິສ຺ສິຕນ຺ຕິອາທີສຸ ວິເວໂກ, ວິຣາໂຄ, ນິໂຣໂຘຕິ ຕີຓິປິ ນິພ຺ພານສ຺ສ ນາມານິ. ນິພ຺ພານໍ ຫິ ອຸປຘິວິເວກຕ຺ຕາ ວິເວໂກ, ຕໍ ອາຄມ຺ມ ຣາຄາທໂຍ ວິຣຊ຺ຊນ຺ຕີຕິ ວິຣາໂຄ, ນິຣຸຊ຺ຌນ຺ຕີຕິ ນິໂຣໂຘ. ຕສ຺ມາ ວິເວກນິສ຺ສິຕນ຺ຕິອາທີສຸ ອາຣມ຺ມຓວເສນ ວາ ອຘິຄນ຺ຕພ຺ພວເສນ ວາ ນິພ຺ພານນິສ຺ສິຕນ຺ຕິ ອຕ຺ໂຖ.

ໂວສ຺ສຄ຺ຄປຣິຓາມິນ຺ຕິ ເອຕ຺ຖ ທ຺ເວ ໂວສ຺ສຄ຺ຄາ – ປຣິຈ຺ຈາຄໂວສ຺ສຄ຺ໂຄ ຈ ປກ຺ຂນ຺ທນໂວສ຺ສຄ຺ໂຄ ຈ. ຕຕ຺ຖ ວິປສ຺ສນາ ຕທງ຺ຄວເສນ ກິເລເສ ຈ ຂນ຺ເຘ ຈ ຣາຄໍ ປຣິຈ຺ຈຊຕີຕິ ປຣິຈ຺ຈາຄໂວສ຺ສຄ຺ໂຄ. ມຄ຺ໂຄ ອາຣມ຺ມຓວເສນ ນິພ຺ພານໍ ປກ຺ຂນ຺ທຕີຕິ ປກ຺ຂນ຺ທນໂວສ຺ສຄ຺ໂຄ. ຕສ຺ມາ ໂວສ຺ສຄ຺ຄປຣິຓາມິນ຺ຕິ ຍຖາ ຠາວິຍມາໂນ ສຕິສມ຺ໂພຊ຺ຌງ຺ໂຄ ໂວສ຺ສຄ຺ຄຕ຺ຖາຍ ປຣິຓມຕິ, ວິປສ຺ສນາຠາວຎ຺ຈ ມຄ຺ຄຠາວຎ຺ຈ ປາປຸຓາຕິ, ເອວໍ ຕໍ ຠາເວຕີຕິ ອຍເມຕ຺ຖ ອຕ຺ໂຖ. ເສສປເທສຸປິ ເອເສວ ນໂຍ. ຠທ຺ທກນ຺ຕິ ລທ຺ຘກໍ. ສມາຘິນິມິຕ຺ຕໍ ວຸຈ຺ຈຕິ ອຏ຺ຐິກສຎ຺ຎາທິວເສນ ອຘິຄໂຕ ສມາຘິເຍວ. ອນຸຣກ຺ຂຕີຕິ ສມາຘິປາຣິປນ຺ຖິກຘມ຺ເມ ຣາຄໂທສໂມເຫ ໂສເຘນ຺ໂຕ ຣກ຺ຂຕິ. ເອຕ຺ຖ ຈ ອຏ຺ຐິກສຎ຺ຎາທິກາ ປຎ຺ເຈວ ສຎ຺ຎາ ວຸຕ຺ຕາ, ອິມສ຺ມິໍ ປນ ຐາເນ ທສປິ ອສຸຠານິ ວິຕ຺ຖາເຣຕ຺ວາ ກເຖຕພ຺ພານິ. ເຕສໍ ວິຕ຺ຖາໂຣ ວິສຸທ຺ຘິມຄ຺ເຄ (ວິສຸທ຺ຘິ. ໑.໑໐໒ ອາທໂຍ) ວຸຕ຺ໂຕເຍວ. ຄາຖາຍ ສໍວຣາທິນິປ຺ຜາທກໍ ວີຣິຍເມວ ວຸຕ຺ຕໍ. ຂຍໍ ທຸກ຺ຂສ຺ສ ປາປຸເຓຕິ ທຸກ຺ຂກ຺ຂຍສງ຺ຂາຕໍ ອຣຫຕ຺ຕໍ ປາປຸເຓຍ຺ຍາຕິ.

໕. ປຎ຺ຎຕ຺ຕິສຸຕ຺ຕວຓ຺ຓນາ

໑໕. ປຎ຺ຈເມ ອຄ຺ຄປຎ຺ຎຕ຺ຕິໂຍຕິ ອຸຕ຺ຕມປຎ຺ຎຕ຺ຕິໂຍ. ອຕ຺ຕຠາວີນນ຺ຕິ ອຕ຺ຕຠາວວນ຺ຕານໍ. ຍທິທໍ ຣາຫຸ ອສຸຣິນ຺ໂທຕິ ໂຍ ເອສ ຣາຫຸ ອສຸຣິນ຺ໂທ ອຍໍ ອຄ຺ໂຄຕິ. ເອຕ຺ຖ ຣາຫຸ ກິຣ ອສຸຣິນ຺ໂທ ຈຕ຺ຕາຣິ ໂຍຊນສຫສ຺ສານິ ອຏ຺ຐ ຈ ໂຍຊນສຕານິ ອຸຈ຺ໂຈ, ພາຫນ຺ຕຣມສ຺ສ ທ຺ວາທສໂຍຊນສຕານິ, ຫຕ຺ຖຕລປາທຕລານໍ ປຸຖຸລຕາ ຕີຓິ ໂຍຊນສຕານິ. ອງ຺ຄຸລິປພ຺ພານິ ປຓ຺ຓາສ ໂຍຊນານິ, ຠມຸກນ຺ຕຣໍ ປຓ຺ຓາສໂຍຊນໍ, ນລາຏໍ ຕິໂຍຊນສຕໍ, ສີສໍ ນວໂຍຊນສຕໍ. ກາມໂຠຄີນໍ ຍທິທໍ ຣາຊາ ມນ຺ຘາຕາຕິ ໂຍ ເອສ ຣາຊາ ມນ຺ຘາຕາ ນາມ, ອຍໍ ທິພ຺ເພປິ ມານຸສເກປິ ກາເມ ປຣິຠຸຎ຺ຊນການໍ ສຕ຺ຕານໍ ອຄ຺ໂຄ ນາມ. ເອສ ຫິ ອສງ຺ເຂຍ຺ຍາຍຸເກສຸ ມນຸສ຺ເສສຸ ນິພ຺ພຕ຺ຕິຕ຺ວາ ອິຈ຺ຉິຕິຈ຺ຉິຕກ຺ຂເຓ ຫິຣຎ຺ຎວສ຺ສໍ ວສ຺ສາເປນ຺ໂຕ ມານຸສເກ ກາເມ ທີຆຣຕ຺ຕໍ ປຣິຠຸຎ຺ຊິ. ເທວໂລເກ ປນ ຍາວ ຉຕ຺ຕິໍສາຍ ອິນ຺ທານໍ ອາຍຸປ຺ປມາຓໍ, ຕາວ ປຓີເຕ ກາເມ ປຣິຠຸຎ຺ຊີຕິ ກາມໂຠຄີນໍ ອຄ຺ໂຄ ນາມ ຊາໂຕ. ອາຘິປເຕຍ຺ຍານນ຺ຕິ ອຘິປຕິຏ຺ຐານໍ ເຊຏ຺ຐກຏ຺ຐານໍ ກໂຣນ຺ຕານໍ. ຕຖາຄໂຕ ອຄ຺ຄມກ຺ຂາຍຕີຕິ ໂລກິຍໂລກຸຕ຺ຕເຣຫິ ຄຸເຓຫິ ຕຖາຄໂຕ ອຄ຺ໂຄ ເສຏ຺ໂຐ ອຸຕ຺ຕໂມ ອກ຺ຂາຍຕິ.

ອິທ຺ຘິຍາ ຍສສາ ຊລນ຺ຕິ ທິພ຺ພສມ຺ປຕ຺ຕິສມິທ຺ຘິຍາ ຈ ປຣິວາຣສງ຺ຂາເຕນ ຍສສາ ຈ ຊລນ຺ຕານໍ. ອຸທ຺ຘໍ ຕິຣິຍໍ ອປາຈີນນ຺ຕິ ອຸປຣິ ຈ ມຊ຺ເຌ ຈ ເຫຏ຺ຐາ ຈ. ຍາວຕາ ຊຄໂຕ ຄຕີຕິ ຍຕ຺ຕກາ ໂລກນິປ຺ຜຕ຺ຕິ.

໖. ໂສຂຸມ຺ມສຸຕ຺ຕວຓ຺ຓນາ

໑໖. ຉຏ຺ເຐ ໂສຂຸມ຺ມານີຕິ ສຸຂຸມລກ຺ຂຓປຏິວິຊ຺ຌນການິ ຎາຓານິ. ຣູປໂສຂຸມ຺ເມນ ສມນ຺ນາຄໂຕ ໂຫຕີຕິ ຣູເປ ສຓ຺ຫສຸຂຸມລກ຺ຂຓປຣິຄ຺ຄາຫເກນ ຎາເຓນ ສມນ຺ນາຄໂຕ ໂຫຕິ. ປຣເມນາຕິ ອຸຕ຺ຕເມນ. ເຕນ ຈ ຣູປໂສຂຸມ຺ເມນາຕິ ເຕນ ຍາວ ອນຸໂລມຠາວໍ ປຕ຺ເຕນ ສຸຂຸມລກ຺ຂຓປຣິຄ຺ຄາຫກຎາເຓນ. ນ ສມນຸປສ຺ສຕີຕິ ນຕ຺ຖິຠາເວເນວ ນ ປສ຺ສຕິ. ນ ປຕ຺ເຖຕີຕິ ນຕ຺ຖິຠາເວເນວ ນ ປຕ຺ເຖຕິ. ເວທນາໂສຂຸມ຺ມາທີສຸປິ ເອເສວ ນໂຍ.

ຣູປໂສຂຸມ຺ມຕໍ ຎຕ຺ວາຕິ ຣູປກ຺ຂນ຺ຘສ຺ສ ສຓ຺ຫສຸຂຸມລກ຺ຂຓປຣິຄ຺ຄາຫເກນ ຎາເຓນ ສຸຂຸມຕໍ ຊານິຕ຺ວາ. ເວທນານຎ຺ຈ ສມ຺ຠວນ຺ຕິ ເວທນາກ຺ຂນ຺ຘສ຺ສ ຈ ປຠວໍ ຊານິຕ຺ວາ. ສຎ຺ຎາ ຍໂຕ ສມຸເທຕີຕິ ຍສ຺ມາ ກາຣຓາ ສຎ຺ຎາກ຺ຂນ຺ໂຘ ສມຸເທຕິ ນິພ຺ພຕ຺ຕຕິ, ຕຎ຺ຈ ຊານິຕ຺ວາ. ອຕ຺ຖໍ ຄຈ຺ຉຕິ ຍຕ຺ຖ ຈາຕິ ຍສ຺ມິໍ ຐາເນ ນິຣຸຊ຺ຌຕິ, ຕຎ຺ຈ ຊານິຕ຺ວາ. ສງ຺ຂາເຣ ປຣໂຕ ຎຕ຺ວາຕິ ສງ຺ຂາຣກ຺ຂນ຺ຘໍ ອນິຈ຺ຈຕາຍ ລຸຊ຺ຊນຠາເວນ ປຣໂຕ ຊານິຕ຺ວາ. ອິມິນາ ຫິ ປເທນ ອນິຈ຺ຈານຸປສ຺ສນາ ກຖິຕາ. ທຸກ຺ຂໂຕ ໂນ ຈ ອຕ຺ຕໂຕຕິ ອິມິນາ ທຸກ຺ຂານຕ຺ຕານຸປສ຺ສນາ. ສນ຺ໂຕຕິ ກິເລສສນ຺ຕຕາຍ ສນ຺ໂຕ. ສນ຺ຕິປເທ ຣໂຕຕິ ນິພ຺ພາເນ ຣໂຕ. ອິຕິ ສຸຕ຺ຕນ຺ເຕ ຈຕູສຸ ຐາເນສຸ ວິປສ຺ສນາວ ກຖິຕາ, ຄາຖາສຸ ໂລກຸຕ຺ຕຣຘມ຺ໂມປີຕິ.

໗. ປຐມອຄຕິສຸຕ຺ຕວຓ຺ຓນາ

໑໗-໑໙. ສຕ຺ຕເມ ອຄຕິຄມນານີຕິ ນຄຕິຄມນານິ. ຉນ຺ທາຄຕິໍ ຄຈ຺ຉຕີຕິ ຉນ຺ເທນ ອຄຕິໍ ຄຈ຺ຉຕິ, ອກຕ຺ຕພ຺ພໍ ກໂຣຕິ. ເສເສສຸປິ ເອເສວ ນໂຍ. ຉນ຺ທາ ໂທສາ ຠຍາ ໂມຫາຕິ ຉນ຺ເທນ, ໂທເສນ, ຠເຍນ, ໂມເຫນ. ອຕິວຕ຺ຕຕີຕິ ອຕິກ຺ກມຕິ. ອຏ຺ຐມໍ ອຸຕ຺ຕານເມວ. ນວເມ ຕຖາພຸຊ຺ຌນການໍ ວເສນ ທ຺ວີຫິປິ ນເຍຫິ ກຖິຕໍ.

໑໐. ຠຕ຺ຕຸທ຺ເທສກສຸຕ຺ຕວຓ຺ຓນາ

໒໐. ທສເມ ຠຕ຺ຕຸທ຺ເທສໂກຕິ ສລາກຠຕ຺ຕາທີນໍ ອຸທ຺ເທສໂກ. ກາເມສຸ ອສໍຍຕາຕິ ວຕ຺ຖຸກາເມສຸ ກິເລສກາເມຫິ ອສໍຍຕາ. ປຣິສາກສໂຏ ຈ ປເນສ ວຸຈ຺ຈຕີຕິ ອຍຎ຺ຈ ປນ ໂສ ເອວຣູປາ ປຣິສາກຈວໂຣ ນາມ ວຸຈ຺ຈຕີຕິ ອຕ຺ໂຖ. ສມເຓນາຕິ ພຸທ຺ຘສມເຓນ. ປຣິສາຍ ມຓ຺ໂຑ ຈ ປເນສ ວຸຈ຺ຈຕີຕິ ອຍໍ ເອວຣູປາ ປຣິສາ ວິປ຺ປສນ຺ເນນ ປຣິສາມຓ຺ໂຑຕິ ວຸຈ຺ຈຕີຕິ.

ຈຣວຄ຺ໂຄ ທຸຕິໂຍ.