໑. ຠຓ຺ຑຄາມວຄ຺ໂຄ

໑. ອນຸພຸທ຺ຘສຸຕ຺ຕວຓ຺ຓນາ

໑. ຈຕຸກ຺ກນິປາຕສ຺ສ ປຐເມ ອນນຸໂພຘາຕິ ອພຸຊ຺ຌເນນ ອຊານເນນ. ອປ຺ປຏິເວຘາຕິ ອປ຺ປຏິວິຊ຺ຌເນນ ອປຈ຺ຈກ຺ຂກິຣິຍາຍ. ທີຆມທ຺ຘານນ຺ຕິ ຈິຣກາລໍ. ສນ຺ຘາວິຕນ຺ຕິ ຠວໂຕ ຠວໍ ຄມນວເສນ ສນ຺ຘາວິຕໍ. ສໍສຣິຕນ຺ຕິ ປຸນປ຺ປຸນໍ ຄມນາຄມນວເສນ ສໍສຣິຕໍ. ມມຎ຺ເຈວ ຕຸມ຺ຫາກຎ຺ຈາຕິ ມຍາ ຈ ຕຸມ຺ເຫຫິ ຈ. ອຖ ວາ ສນ຺ຘາວິຕໍ ສໍສຣິຕນ຺ຕິ ສນ຺ຘາວນໍ ສໍສຣຓໍ ມມຎ຺ເຈວ ຕຸມ຺ຫາກຎ຺ຈ ອໂຫສີຕິ ເອວເມຕ຺ຖ ອຕ຺ໂຖ ເວທິຕພ຺ໂພ. ອຣິຍສ຺ສາຕິ ນິທ຺ໂທສສ຺ສ. ສີລໍ ສມາຘິ ປຎ຺ຎາຕິ ອິເມ ປນ ຕໂຍ ຘມ຺ມາ ມຄ຺ຄຜລສມ຺ປຍຸຕ຺ຕາວ ເວທິຕພ຺ພາ, ວິມຸຕ຺ຕິນາເມນ ຜລເມວ ນິທ຺ທິຏ຺ຐໍ. ຠວຕຓ຺ຫາຕິ ຠເວສຸ ຕຓ຺ຫາ. ຠວເນຕ຺ຕີຕິ ຠວຣຊ຺ຊຸ. ຕຓ຺ຫາຍ ເອວ ເອຕໍ ນາມໍ. ຕາຍ ຫິ ສຕ຺ຕາ ໂຄຓາ ວິຍ ຄີວາຍ ພນ຺ຘິຕ຺ວາ ຕໍ ຕໍ ຠວໍ ນີຍນ຺ຕິ, ຕສ຺ມາ ຠວເນຕ຺ຕີຕິ ວຸຈ຺ຈຕິ.

ອນຸຕ຺ຕຣາຕິ ໂລກຸຕ຺ຕຣາ. ທຸກ຺ຂສ຺ສນ຺ຕກໂຣຕິ ວຏ຺ຏທຸກ຺ຂສ຺ສ ອນ຺ຕກໂຣ. ຈກ຺ຂຸມາຕິ ປຎ຺ຈຫິ ຈກ຺ຂູຫິ ຈກ຺ຂຸມາ. ປຣິນິພ຺ພຸໂຕຕິ ກິເລສປຣິນິພ຺ພາເນນ ປຣິນິພ຺ພຸໂຕ. ອິທມສ຺ສ ໂພຘິມຓ຺ເຑ ປຐມປຣິນິພ຺ພານໍ, ປຈ຺ຉາ ປນ ຍມກສາລານມນ຺ຕເຣ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພຸໂຕຕິ ຍຖານຸສນ຺ຘິນາ ເທສນໍ ນິຏ຺ຐາເປສິ.

໒. ປປຕິຕສຸຕ຺ຕວຓ຺ຓນາ

໒. ທຸຕິເຍ ປປຕິໂຕຕິ ປຕິໂຕ ຈຸໂຕ. ອປ຺ປປຕິໂຕຕິ ອປຕິໂຕ ປຕິຏ຺ຐິໂຕ. ຕຕ຺ຖ ໂລກິຍມຫາຊໂນ ປຕິໂຕເຍວ ນາມ, ໂສຕາປນ຺ນາທໂຍ ກິເລສຸປ຺ປຕ຺ຕິກ຺ຂເຓ ປຕິຕາ ນາມ, ຂີຓາສໂວ ເອກນ຺ຕປຕິຏ຺ຐິໂຕ ນາມ.

ຈຸຕາ ປຕນ຺ຕີຕິ ເຍ ຈຸຕາ, ເຕ ປຕນ຺ຕິ ນາມ. ປຕິຕາຕິ ເຍ ປຕິຕາ, ເຕ ຈຸຕາ ນາມ. ຈຸຕຕ຺ຕາ ປຕິຕາ, ປຕິຕຕ຺ຕາ ຈຸຕາຕິ ອຕ຺ໂຖ. ຄິທ຺ຘາຕິ ຣາຄຣຕ຺ຕາ. ປຸນຣາຄຕາຕິ ປຸນ ຊາຕິໍ ປຸນ ຊຣໍ ປຸນ ພ຺ຍາຘິໍ ປຸນ ມຣຓໍ ອາຄຕາ ນາມ ໂຫນ຺ຕິ. ກຕໍ ກິຈ຺ຈນ຺ຕິ ຈຕູຫິ ມຄ຺ເຄຫິ ກຕ຺ຕພ຺ພກິຈ຺ຈໍ ກຕໍ. ຣຕໍ ຣມ຺ມນ຺ຕິ ຣມິຕພ຺ພຍຸຕ຺ຕເກ ຄຸຓຊາເຕ ຣມິຕໍ. ສຸເຂນານ຺ວາຄຕໍ ສຸຂນ຺ຕິ ສຸເຂນ ສຸຂໍ ອນຸອາຄຕໍ ສມ຺ປຕ຺ຕໍ. ມານຸສກສຸເຂນ ທິພ຺ພສຸຂໍ, ຌານສຸເຂນ ວິປສ຺ສນາສຸຂໍ, ວິປສ຺ສນາສຸເຂນ ມຄ຺ຄສຸຂໍ, ມຄ຺ຄສຸເຂນ ຜລສຸຂໍ, ຜລສຸເຂນ ນິພ຺ພານສຸຂໍ ສມ຺ປຕ຺ຕໍ ອຘິຄຕນ຺ຕິ ອຕ຺ໂຖ.

໓. ປຐມຂຕສຸຕ຺ຕວຓ຺ຓນາ

໓. ຕຕິຍໍ ທຸກນິປາຕວຓ຺ຓນາຍໍ ວຸຕ຺ຕເມວ. ຄາຖາສຸ ປນ ນິນ຺ທິຍນ຺ຕິ ນິນ຺ທິຕພ຺ພຍຸຕ຺ຕກໍ. ນິນ຺ທຕີຕິ ຄຣຫຕິ. ປສໍສິໂຍຕິ ປສໍສິຕພ຺ພຍຸຕ຺ໂຕ. ວິຈິນາຕິ ມຸເຂນ ໂສ ກລິນ຺ຕິ ໂຍ ເອວໍ ປວຕ຺ໂຕ, ເຕນ ມຸເຂນ ກລິໍ ວິຈິນາຕິ ນາມ. ກລິນາ ເຕນ ສຸຂໍ ນ ວິນ຺ທຕີຕິ ເຕນ ຈ ກລິນາ ສຸຂໍ ນ ປຏິລຠຕິ. ສພ຺ພສ຺ສາປິ ສຫາປິ ອຕ຺ຕນາຕິ ສພ຺ເພນປິ ສເກນ ຘເນນ ເຈວ ອຕ຺ຕນາ ຈ ສທ຺ຘິໍ ໂຍ ປຣາຊໂຍ, ໂສ ອປ຺ປມຕ຺ຕໂກວ ກລີຕິ ອຕ຺ໂຖ. ໂຍ ສຸຄເຕສູຕິ ໂຍ ປນ ສມ຺ມຄ຺ຄເຕສຸ ປຸຄ຺ຄເລສຸ ຈິຕ຺ຕໍ ປທຸສ຺ເສຍ຺ຍ, ອຍໍ ຈິຕ຺ຕປໂທໂສວ ຕໂຕ ກລິໂຕ ມຫນ຺ຕຕໂຣ ກລິ. ອິທານິ ຕສ຺ສ ມຫນ຺ຕຕຣຠາວໍ ທສ຺ເສນ຺ໂຕ ສຕໍ ສຫສ຺ສານນ຺ຕິອາທິມາຫ. ຕຕ຺ຖ ສຕໍ ສຫສ຺ສານນ຺ຕິ ນິຣພ຺ພຸທຄຓນາຍ ສຕສຫສ຺ສໍ. ຉຕ຺ຕິໍສຕີຕິ ອປຣານິ ຈ ຉຕ຺ຕິໍສຕິ ນິຣພ຺ພຸທານິ. ປຎ຺ຈ ຈາຕິ ອພ຺ພຸທຄຓນາຍ ຈ ປຎ຺ຈ ອພ຺ພຸທານິ. ຍມຣິຍຄຣຫີຕິ ຍໍ ອຣິເຍ ຄຣຫນ຺ໂຕ ນິຣຍໍ ອຸປປຊ຺ຊຕິ, ຕຕ຺ຖ ເອຕ຺ຕກໍ ອາຍຸປ຺ປມາຓນ຺ຕິ.

໔. ທຸຕິຍຂຕສຸຕ຺ຕວຓ຺ຓນາ

໔. ຈຕຸຕ຺ເຖ ມາຕຣິ ປິຕຣິ ຈາຕິອາທີສຸ ມິຕ຺ຕວິນ຺ທໂກ ມາຕຣິ ມິຈ຺ຉາປຏິປນ຺ໂນ ນາມ, ອຊາຕສຕ຺ຕຸ ປິຕຣິ ມິຈ຺ຉາປຏິປນ຺ໂນ ນາມ, ເທວທຕ຺ໂຕ ຕຖາຄເຕ ມິຈ຺ຉາປຏິປນ຺ໂນ ນາມ, ໂກກາລິໂກ ຕຖາຄຕສາວເກ ມິຈ຺ຉາປຏິປນ຺ໂນ ນາມ. ພຫຸຎ຺ຈາຕິ ພຫຸກເມວ. ປສວຕີຕິ ປຏິລຠຕິ. ຕາຍາຕິ ຕາຍ ມິຈ຺ຉາປຏິປຕ຺ຕິສງ຺ຂາຕາຍ ອຘມ຺ມຈຣິຍາຍ. ເປຈ຺ຈາຕິ ອິໂຕ ຄນ຺ຕ຺ວາ. ອປາຍໍ ຄຈ຺ຉຕີຕິ ນິຣຍາທີສຸ ອຎ຺ຎຕຣສ຺ມິໍ ນິພ຺ພຕ຺ຕຕິ. ສຸກ຺ກປກ຺ເຂປິ ເອເສວ ນໂຍ.

໕. ອນຸໂສຕສຸຕ຺ຕວຓ຺ຓນາ

໕. ປຎ຺ຈເມ ອນຸໂສຕໍ ຄຈ຺ຉຕີຕິ ອນຸໂສຕຄາມີ. ກິເລສໂສຕສ຺ສ ປຈ຺ຈນີກປຏິປຕ຺ຕິຍາ ປຏິໂສຕໍ ຄຈ຺ຉຕີຕິ ປຏິໂສຕຄາມີ. ຐິຕຕ຺ໂຕຕິ ຐິຕສຠາໂວ. ຕິຓ຺ໂຓຕິ ໂອຆໍ ຕຣິຕ຺ວາ ຐິໂຕ. ປາຣງ຺ຄໂຕຕິ ປຣຕີຣໍ ຄໂຕ. ຖເລ ຕິຏ຺ຐຕີຕິ ນິພ຺ພານຖເລ ຕິຏ຺ຐຕິ. ພ຺ຣາຫ຺ມໂຓຕິ ເສຏ຺ໂຐ ນິທ຺ໂທໂສ. ອິຘາຕິ ອິມສ຺ມິໍ ໂລເກ. ກາເມ ຈ ປຏິເສວຕີຕິ ກິເລສກາເມຫິ ວຕ຺ຖຸກາເມ ປຏິເສວຕິ. ປາປຎ຺ຈ ກມ຺ມໍ ກໂຣຕີຕິ ປາປຎ຺ຈ ປາຓາຕິປາຕາທິກມ຺ມໍ ກໂຣຕິ. ປາປຎ຺ຈ ກມ຺ມໍ ນ ກໂຣຕີຕິ ປຎ຺ຈເວຣກມ຺ມໍ ນ ກໂຣຕິ. ອຍໍ ວຸຈ຺ຈຕິ, ຠິກ຺ຂເວ, ຐິຕຕ຺ໂຕຕິ ອຍໍ ອນາຄາມີ ປຸຄ຺ຄໂລ ຕສ຺ມາ ໂລກາ ປຸນ ປຏິສນ຺ຘິວເສນ ອນາຄມນໂຕ ຐິຕຕ຺ໂຕ ນາມ.

ຕຓ຺ຫາຘິປນ຺ນາຕິ ຕຓ຺ຫາຍ ອຘິປນ຺ນາ ອຊ຺ໂຌຕ຺ຖຏາ, ຕຓ຺ຫໍ ວາ ອຘິປນ຺ນາ ອຊ຺ໂຌຄາຬ຺ຫາ. ປຣິປຸຓ຺ຓເສໂຂຕິ ສິກ຺ຂາປາຣິປູຣິຍາ ຐິໂຕ. ອປຣິຫານຘມ຺ໂມຕິ ອປຣິຫີນສຠາໂວ. ເຈໂຕວສິປ຺ປຕ຺ໂຕຕິ ຈິຕ຺ຕວສີຠາວໍ ປຕ຺ໂຕ. ເອວຣູໂປ ຂີຓາສໂວ ໂຫຕິ, ອິຘ ປນ ອນາຄາມີ ກຖິໂຕ. ສມາຫິຕິນ຺ທ຺ຣິໂຍຕິ ສມາຫິຕຉຬິນ຺ທ຺ຣິໂຍ. ປໂຣປຣາຕິ ປໂຣວຣາ ອຸຕ຺ຕມລາມກາ, ກຸສລາກຸສລາຕິ ອຕ຺ໂຖ. ສເມຈ຺ຈາຕິ ຎາເຓນ ສມາຄນ຺ຕ຺ວາ. ວິຘູປິຕາຕິ ວິທ຺ຘໍສິຕາ ຌາປິຕາ ວາ. ວຸສິຕພ຺ຣຫ຺ມຈຣິໂຍຕິ ມຄ຺ຄພ຺ຣຫ຺ມຈຣິຍໍ ວສິຕ຺ວາ ຐິໂຕ. ໂລກນ຺ຕຄູຕິ ຕິວິຘສ຺ສາປິ ໂລກສ຺ສ ອນ຺ຕໍ ຄໂຕ. ປາຣຄໂຕຕິ ຉຫາກາເຣຫິ ປາຣຄໂຕ. ອິຘ ຂີຓາສໂວວ ກຖິໂຕ. ອິຕິ ສຸຕ຺ເຕປິ ຄາຖາສຸປິ ວຏ຺ຏວິວຏ຺ຏເມວ ກຖິຕໍ.

໖. ອປ຺ປສ຺ສຸຕສຸຕ຺ຕວຓ຺ຓນາ

໖. ຉຏ຺ເຐ ອນຸປປນ຺ໂນຕິ ອນຸປາຄໂຕ. ສຸຕ຺ຕນ຺ຕິອາທີສຸ ອຸຠໂຕວິຠງ຺ຄນິທ຺ເທສຂນ຺ຘກປຣິວາຣສຸຕ຺ຕນິປາຕມງ຺ຄລສຸຕ຺ຕຣຕນສຸຕ຺ຕ- ນາຬກສຸຕ຺ຕຕຸວຏກສຸຕ຺ຕານິ, ອຎ຺ຎມ຺ປິ ຈ ສຸຕ຺ຕນາມກໍ ຕຖາຄຕວຈນໍ ສຸຕ຺ຕນ຺ຕິ ເວທິຕພ຺ພໍ. ສພ຺ພມ຺ປິ ສຄາຖກໍ ສຸຕ຺ຕໍ ເຄຍ຺ຍນ຺ຕິ ເວທິຕພ຺ພໍ, ວິເສເສນ ສໍຍຸຕ຺ຕເກ ສກໂລປິ ສຄາຖາວຄ຺ໂຄ. ສກລມ຺ປິ ອຠິຘມ຺ມປິຏກໍ, ນິຄ຺ຄາຖກສຸຕ຺ຕໍ, ຍຎ຺ຈ ອຎ຺ຎມ຺ປິ ອຏ຺ຐຫິ ອງ຺ເຄຫິ ອສງ຺ຄຫິຕໍ ພຸທ຺ຘວຈນໍ, ຕໍ ເວຍ຺ຍາກຣຓນ຺ຕິ ເວທິຕພ຺ພໍ. ຘມ຺ມປທ-ເຖຣຄາຖາ-ເຖຣິຄາຖາ ສຸຕ຺ຕນິປາເຕ ໂນສຸຕ຺ຕນາມິກາ ສຸທ຺ຘິກຄາຖາ ຈ ຄາຖາຕິ ເວທິຕພ຺ພາ. ໂສມນສ຺ສຎາຓມຍິກຄາຖາປຏິສໍຍຸຕ຺ຕາ ທ຺ເວອສີຕິ ສຸຕ຺ຕນ຺ຕາ ອຸທານນ຺ຕິ ເວທິຕພ຺ພາ. ‘‘ວຸຕ຺ຕຎ຺ເຫຕໍ ຠຄວຕາ’’ຕິອາທິນຍປ຺ປວຕ຺ຕາ ທສຸຕ຺ຕຣສຕສຸຕ຺ຕນ຺ຕາ ອິຕິວຸຕ຺ຕກນ຺ຕິ ເວທິຕພ຺ພາ. ອປຓ຺ຓກຊາຕກາທີນິ ປຎ຺ຎາສາຘິການິ ປຎ຺ຈ ຊາຕກສຕານິ ຊາຕກນ຺ຕິ ເວທິຕພ຺ພານິ. ‘‘ຈຕ຺ຕາໂຣເມ, ຠິກ຺ຂເວ, ອຈ຺ຉຣິຍາ ອພ຺ຠຸຕາ ຘມ຺ມາ ອານນ຺ເທ’’ຕິອາທິນຍປ຺ປວຕ຺ຕາ ສພ຺ເພປິ ອຈ຺ຉຣິຍອພ຺ຠຸຕຘມ຺ມປຏິສໍຍຸຕ຺ຕາ ສຸຕ຺ຕນ຺ຕາ ອພ຺ຠຸຕຘມ຺ມນ຺ຕິ ເວທິຕພ຺ພາ. ຈູຬເວທລ຺ລມຫາເວທລ຺ລສມ຺ມາທິຏ຺ຐິສກ຺ກປຎ຺ຫສງ຺ຂາຣຠາຊນິຍມຫາປຸຓ຺ຓມສຸຕ຺ຕາທໂຍ ສພ຺ເພປິ ເວທຎ຺ຈ ຕຸຏ຺ຐິຎ຺ຈ ລທ຺ຘາ ລທ຺ຘາ ປຸຈ຺ຉິຕາ ສຸຕ຺ຕນ຺ຕາ ເວທລ຺ລນ຺ຕິ ເວທິຕພ຺ພາ. ນ ອຕ຺ຖມຎ຺ຎາຍ ນ ຘມ຺ມມຎ຺ຎາຍາຕິ ອຏ຺ຐກຖຎ຺ຈ ປາຬິຎ຺ຈ ອຊານິຕ຺ວາ. ຘມ຺ມານຸຘມ຺ມປ຺ປຏິປນ຺ໂນຕິ ນວໂລກຸຕ຺ຕຣຘມ຺ມສ຺ສ ອນຸຣູປຘມ຺ມໍ ສຫສີລໍ ປຸພ຺ພຠາຄປຏິປທໍ ນ ປຏິປນ຺ໂນ ໂຫຕິ. ອິມິນາ ອຸປາເຍນ ສພ຺ພວາເຣສຸ ອຕ຺ໂຖ ເວທິຕພ຺ໂພ. ປຐມວາເຣ ປເນຕ຺ຖ ອປ຺ປສ຺ສຸຕທຸສ຺ສີໂລ ກຖິໂຕ, ທຸຕິເຍ ອປ຺ປສ຺ສຸຕຂີຓາສໂວ, ຕຕິເຍ ພຫຸສ຺ສຸຕທຸສ຺ສີໂລ, ຈຕຸຕ຺ເຖ ພຫຸສ຺ສຸຕຂີຓາສໂວ.

ສີເລສຸ ອສມາຫິໂຕຕິ ສີເລສຸ ອປຣິປູຣກາຣີ. ສີລໂຕ ຈ ສຸເຕນ ຈາຕິ ສີລຠາເຄນ ຈ ສຸຕຠາເຄນ ຈ ‘‘ອຍໍ ທຸສ຺ສີໂລ ອປ຺ປສ຺ສຸໂຕ’’ຕິ ເອວໍ ຕໍ ຄຣຫນ຺ຕີຕິ ອຕ຺ໂຖ. ຕສ຺ສ ສມ຺ປຊ຺ຊເຕ ສຸຕນ຺ຕິ ຕສ຺ສ ປຸຄ຺ຄລສ຺ສ ຍສ຺ມາ ເຕນ ສຸເຕນ ສຸຕກິຈ຺ຈໍ ກຕໍ, ຕສ຺ມາ ຕສ຺ສ ສຸຕໍ ສມ຺ປຊ຺ຊຕິ ນາມ. ນາສ຺ສ ສມ຺ປຊ຺ຊເຕຕິ ສຸຕກິຈ຺ຈສ຺ສ ອກຕຕ຺ຕາ ນ ສມ຺ປຊ຺ຊຕິ. ຘມ຺ມຘຣນ຺ຕິ ສຸຕຘມ຺ມານໍ ອາຘາຣຠູຕໍ. ສປ຺ປຎ຺ຎນ຺ຕິ ສຸປຎ຺ຎໍ. ເນກ຺ຂໍ ຊມ຺ໂພນທສ຺ເສວາຕິ ຊມ຺ພຸນທໍ ວຸຈ຺ຈຕິ ຊາຕິສຸວຓ຺ຓໍ, ຕສ຺ສ ຊມ຺ພຸນທສ຺ສ ເນກ຺ຂໍ ວິຍ, ປຎ຺ຈສຸວຓ຺ຓປຣິມາຓໍ ສຸວຓ຺ຓຆຏິກໍ ວິຍາຕິ ອຕ຺ໂຖ.

໗. ໂສຠນສຸຕ຺ຕວຓ຺ຓນາ

໗. ສຕ຺ຕເມ ວິຍຕ຺ຕາຕິ ປຎ຺ຎາເວຍ຺ຍຕ຺ຕິເຍນ ສມນ຺ນາຄຕາ. ວິນີຕາຕິ ວິນຍໍ ອຸເປຕາ ສຸວິນີຕາ. ວິສາຣທາຕິ ເວສາຣຊ຺ເຊນ ໂສມນສ຺ສສຫຄເຕນ ຎາເຓນ ສມນ຺ນາຄຕາ. ຘມ຺ມຘຣາຕິ ສຸຕຘມ຺ມານໍ ອາຘາຣຠູຕາ. ຠິກ຺ຂຸ ຈ ສີລສມ຺ປນ຺ໂນຕິ ຄາຖາຍ ກິຎ຺ຈາປິ ເອເກກສ຺ເສວ ເອເກໂກ ຄຸໂຓ ກຖິໂຕ, ສພ຺ເພສໍ ປນ ສພ຺ເພປິ ວຏ຺ຏນ຺ຕີຕິ.

໘. ເວສາຣຊ຺ຊສຸຕ຺ຕວຓ຺ຓນາ

໘. ອຏ຺ຐເມ ເວສາຣຊ຺ຊານີຕິ ເອຕ຺ຖ ສາຣຊ຺ຊປຏິປກ຺ໂຂ ເວສາຣຊ຺ຊໍ, ຈຕູສຸ ຐາເນສຸ ສາຣຊ຺ຊາຠາວໍ ປຈ຺ຈເວກ຺ຂນ຺ຕສ຺ສ ອຸປ຺ປນ຺ນໂສມນສ຺ສມຍຎາຓສ຺ເສຕໍ ນາມໍ. ອາສຠໍ ຐານນ຺ຕິ ເສຏ຺ຐຏ຺ຐານໍ ອຸຕ຺ຕມຏ຺ຐານໍ. ອາສຠາ ວາ ປຸພ຺ພພຸທ຺ຘາ, ເຕສໍ ຐານນ຺ຕິ ອຕ຺ໂຖ. ອປິຈ ຄວສຕເຊຏ຺ຐໂກ ອຸສໂຠ, ຄວສຫສ຺ສເຊຏ຺ຐໂກ ວສໂຠ. ວຊສຕເຊຏ຺ຐໂກ ວາ ອຸສໂຠ, ວຊສຫສ຺ສເຊຏ຺ຐໂກ ວສໂຠ, ສພ຺ພຄວເສຏ຺ໂຐ ສພ຺ພປຣິສ຺ສຍສໂຫ ເສໂຕ ປາສາທິໂກ ມຫາຠາຣວໂຫ ອສນິສຕສທ຺ເທຫິປິ ອສມ຺ປກມ຺ປິໂຍ ນິສໂຠ, ໂສ ອິຘ ອຸສໂຠຕິ ອຘິປ຺ເປໂຕ. ອິທມ຺ປິ ຫິ ຕສ຺ສ ປຣິຍາຍວຈນໍ. ອຸສຠສ຺ສ ອິທນ຺ຕິ ອາສຠໍ. ຐານນ຺ຕິ ຈຕູຫິ ປາເທຫິ ປຖວິໍ ອຸປ຺ປີເຬຕ຺ວາ ວວຕ຺ຖານໍ. ອິທໍ ປນ ອາສຠໍ ວິຍາຕິ ອາສຠໍ. ຍເຖວ ຫິ ນິສຠສງ຺ຂາໂຕ ອຸສໂຠ ຈຕູຫິ ປາເທຫິ ປຖວິໍ ອຸປ຺ປີເຬຕ຺ວາ ອຈລຏ຺ຐາເນນ ຕິຏ຺ຐຕິ, ເອວໍ ຕຖາຄໂຕປິ ຈຕູຫິ ເວສາຣຊ຺ຊປາເທຫິ ອຏ຺ຐປຣິສປຖວິໍ ອຸປ຺ປີເຬຕ຺ວາ ສເທວເກ ໂລເກ ເກນຈິ ປຈ຺ຈຕ຺ຖິເກນ ປຈ຺ຈາມິຕ຺ເຕນ ອກມ຺ປິໂຍ ອຈລຏ຺ຐາເນນ ຕິຏ຺ຐຕິ. ເອວໍ ຕິຏ຺ຐມາໂນວ ຕໍ ອາສຠໍ ຐານໍ ປຏິຊານາຕິ ອຸປຄຈ຺ຉຕິ ນ ປຈ຺ຈກ຺ຂາຕິ, ອຕ຺ຕນິ ອາໂຣເປຕິ. ເຕນ ວຸຕ຺ຕໍ ‘‘ອາສຠໍ ຐານໍ ປຏິຊານາຕີ’’ຕິ.

ປຣິສາສູຕິ ອຏ຺ຐສຸ ປຣິສາສຸ. ສີຫນາທໍ ນທຕີຕິ ເສຏ຺ຐນາທໍ ອຠີຕນາທໍ ນທຕິ, ສີຫນາທສທິສໍ ວາ ນາທໍ ນທຕິ. ອຍມຕ຺ໂຖ ສີຫນາທສຸຕ຺ເຕນ ທສ຺ເສຕພ຺ໂພ. ຍຖາ ວາ ສີໂຫ ສຫນໂຕ ຈ ຫນນໂຕ ຈ ສີໂຫຕິ ວຸຈ຺ຈຕິ, ເອວໍ ຕຖາຄໂຕ ໂລກຘມ຺ມານໍ ສຫນໂຕ ປຣປ຺ປວາທານຎ຺ຈ ຫນນໂຕ ສີໂຫຕິ ວຸຈ຺ຈຕິ. ເອວໍ ວຸຕ຺ຕສ຺ສ ສີຫສ຺ສ ນາທໍ ສີຫນາທໍ. ຕຕ຺ຖ ຍຖາ ສີໂຫ ສີຫພເລນ ສມນ຺ນາຄໂຕ ສພ຺ພຕ຺ຖ ວິສາຣໂທ ວິຄຕໂລມຫໍໂສ ສີຫນາທໍ ນທຕິ, ເອວໍ ຕຖາຄຕສີໂຫປິ ຕຖາຄຕພເລຫິ ສມນ຺ນາຄໂຕ ອຏ຺ຐສຸ ປຣິສາສຸ ວິສາຣໂທ ວິຄຕໂລມຫໍໂສ ‘‘ອິຕິ ຣູປ’’ນ຺ຕິອາທິນາ ນເຍນ ນານາວິຘເທສນາວິລາສສມ຺ປນ຺ນໍ ສີຫນາທໍ ນທຕິ. ເຕນ ວຸຕ຺ຕໍ ‘‘ປຣິສາສຸ ສີຫນາທໍ ນທຕີ’’ຕິ.

ພ຺ຣຫ຺ມຈກ຺ກໍ ປວຕ຺ເຕຕີຕິ ເອຕ຺ຖ ພ຺ຣຫ຺ມນ຺ຕິ ເສຏ຺ຐໍ ອຸຕ຺ຕມໍ ວິສຸທ຺ຘໍ. ຈກ຺ກສທ຺ໂທ ປນາຍໍ –

‘‘ສມ຺ປຕ຺ຕິຍໍ ລກ຺ຂເຓ ຈ, ຣຖງ຺ເຄ ອິຣິຍາປເຖ;

ທາເນ ຣຕນຘມ຺ມູຣ-ຈກ຺ກາທີສຸ ຈ ທິສ຺ສຕິ;

ຘມ຺ມຈກ຺ເກ ອິຘ ມໂຕ, ຕຎ຺ຈ ທ຺ເວຘາ ວິຠາວເຍ’’.

‘‘ຈຕ຺ຕາຣິມານິ, ຠິກ຺ຂເວ, ຈກ຺ການິ, ເຍຫິ ສມນ຺ນາຄຕານໍ ເທວມນຸສ຺ສານ’’ນ຺ຕິອາທີສຸ (ອ. ນິ. ໔.໓໑) ຫິ ອຍໍ ສມ຺ປຕ຺ຕິຍໍ ທິສ຺ສຕິ. ‘‘ປາທຕເລສຸ ຈກ຺ການິ ຊາຕານີ’’ຕິ (ທີ. ນິ. ໒.໓໕) ເອຕ຺ຖ ລກ຺ຂເຓ. ‘‘ຈກ຺ກໍວ ວຫໂຕ ປທ’’ນ຺ຕິ (ຘ. ປ. ໑) ເອຕ຺ຖ ຣຖງ຺ເຄ. ‘‘ຈຕຸຈກ຺ກໍ ນວທ຺ວາຣ’’ນ຺ຕິ (ສໍ. ນິ. ໑.໒໙) ເອຕ຺ຖ ອິຣິຍາປເຖ. ‘‘ທທໍ ຠຸຎ຺ຊ ມາ ຈ ປມາໂທ, ຈກ຺ກໍ ວຕ຺ຕຍ ສພ຺ພປາຓິນ’’ນ຺ຕິ (ຊາ. ໑.໗.໑໔໙) ເອຕ຺ຖ ທາເນ. ‘‘ທິພ຺ພໍ ຈກ຺ກຣຕນໍ ປາຕຸຣໂຫສີ’’ຕິ (ທີ. ນິ. ໒.໒໔໓; ມ. ນິ. ໓.໒໕໖) ເອຕ຺ຖ ຣຕນຈກ຺ເກ. ‘‘ມຍາ ປວຕ຺ຕິຕໍ ຈກ຺ກ’’ນ຺ຕິ (ສຸ. ນິ. ໕໖໒) ເອຕ຺ຖ ຘມ຺ມຈກ຺ເກ. ‘‘ອິຈ຺ຉາຫຕສ຺ສ ໂປສສ຺ສ, ຈກ຺ກໍ ຠມຕິ ມຕ຺ຖເກ’’ຕິ (ຊາ. ໑.໑.໑໐໔; ໑.໕.໑໐໓) ເອຕ຺ຖ ອຸຣຈກ຺ເກ. ‘‘ຂຸຣປຣິຍນ຺ເຕນ ເຈປິ ຈກ຺ເກນາ’’ຕິ (ທີ. ນິ. ໑.໑໖໖) ເອຕ຺ຖ ປຫຣຓຈກ຺ເກ. ‘‘ອສນິວິຈກ຺ກ’’ນ຺ຕິ (ທີ. ນິ. ໓.໖໑; ສໍ. ນິ. ໒.໑໖໒) ເອຕ຺ຖ ອສນິມຓ຺ຑເລ. ອິຘ ປນາຍໍ ຘມ຺ມຈກ຺ເກ ມໂຕ.

ຕໍ ປເນຕໍ ຘມ຺ມຈກ຺ກໍ ທຸວິຘໍ ໂຫຕິ ປຏິເວຘຎາຓຎ຺ຈ ເທສນາຎາຓຎ຺ຈ. ຕຕ຺ຖ ປຎ຺ຎາປຠາວິຕໍ ອຕ຺ຕໂນ ອຣິຍຜລາວຫໍ ປຏິເວຘຎາຓໍ, ກຣຸຓາປຠາວິຕໍ ສາວການໍ ອຣິຍຜລາວຫໍ ເທສນາຎາຓໍ. ຕຕ຺ຖ ປຏິເວຘຎາຓໍ ອຸປ຺ປຊ຺ຊມານໍ ອຸປ຺ປນ຺ນນ຺ຕິ ທຸວິຘໍ. ຕຎ຺ຫິ ອຠິນິກ຺ຂມນໂຕ ຍາວ ອຣຫຕ຺ຕມຄ຺ຄາ ອຸປ຺ປຊ຺ຊມານໍ, ຜລກ຺ຂເຓ ອຸປ຺ປນ຺ນໍ ນາມ. ຕຸສິຕຠວນໂຕ ວາ ຍາວ ມຫາໂພຘິປລ຺ລງ຺ເກ ອຣຫຕ຺ຕມຄ຺ຄາ ອຸປ຺ປຊ຺ຊມານໍ, ຜລກ຺ຂເຓ ອຸປ຺ປນ຺ນໍ ນາມ. ທີປງ຺ກຣໂຕ ປຏ຺ຐາຍ ວາ ຍາວ ໂພຘິປລ຺ລງ຺ເກ ອຣຫຕ຺ຕມຄ຺ຄາ ອຸປ຺ປຊ຺ຊມານໍ, ຜລກ຺ຂເຓ ອຸປ຺ປນ຺ນໍ ນາມ. ເທສນາຎາຓມ຺ປິ ປວຕ຺ຕມານໍ ປວຕ຺ຕນ຺ຕິ ທຸວິຘໍ. ຕຎ຺ຫິ ຍາວ ອຎ຺ຎາສິໂກຓ຺ຑຎ຺ຎສ຺ສ ໂສຕາປຕ຺ຕິມຄ຺ຄາ ປວຕ຺ຕມານໍ, ຜລກ຺ຂເຓ ປວຕ຺ຕໍ ນາມ. ເຕສຸ ປຏິເວຘຎາຓໍ ໂລກຸຕ຺ຕຣໍ, ເທສນາຎາຓໍ ໂລກິຍໍ. ອຸຠຍມ຺ປິ ປເນຕໍ ອຎ຺ເຎຫິ ອສາຘາຣຓໍ, ພຸທ຺ຘານໍເຍວ ໂອຣສຎາຓໍ.

ສມ຺ມາສມ຺ພຸທ຺ຘສ຺ສ ເຕ ປຏິຊານໂຕຕິ ‘‘ອຫໍ ສມ຺ມາສມ຺ພຸທ຺ໂຘ, ສພ຺ເພ ຘມ຺ມາ ມຍາ ອຠິສມ຺ພຸທ຺ຘາ’’ຕິ ເອວໍ ປຏິຊານໂຕ ຕວ. ອນຠິສມ຺ພຸທ຺ຘາຕິ ອິເມ ນາມ ຘມ຺ມາ ຕຍາ ອນຠິສມ຺ພຸທ຺ຘາ. ຕຕ຺ຣ ວຕາຕິ ເຕສຸ ‘‘ອນຠິສມ຺ພຸທ຺ຘາ’’ຕິ ເອວໍ ທສ຺ສິຕຘມ຺ເມສຸ. ສຫຘມ຺ເມນາຕິ ສເຫຕຸນາ ສກາຣເຓນ ວຈເນນ. ນິມິຕ຺ຕເມຕນ຺ຕິ ເອຕ຺ຖ ປຸຄ຺ຄໂລປິ ຘມ຺ໂມປິ ນິມິຕ຺ຕນ຺ຕິ ອຘິປ຺ເປໂຕ. ຕໍ ປຸຄ຺ຄລໍ ນ ປສ຺ສາມິ, ໂຍ ມໍ ປຏິໂຈເທສ຺ສຕິ. ຕໍ ຘມ຺ມໍ ນ ປສ຺ສາມິ, ຍໍ ທສ຺ເສຕ຺ວາ ‘‘ອຍໍ ນາມ ຘມ຺ໂມ ຕຍາ ອນຠິສມ຺ພຸທ຺ໂຘ’’ຕິ ມໍ ປຏິໂຈເທສ຺ສຕີຕິ ອຍເມຕ຺ຖ ອຕ຺ໂຖ. ເຂມປ຺ປຕ຺ໂຕຕິ ເຂມໍ ປຕ຺ໂຕ. ເສສປທທ຺ວຍໍ ອິມສ຺ເສວ ເວວຈນໍ. ສພ຺ພມ຺ເປຕໍ ເວສາຣຊ຺ຊຎາຓເມວ ສນ຺ຘາຍ ວຸຕ຺ຕໍ. ທສພລສ຺ສ ຫິ ‘‘ອຍໍ ນາມ ຘມ຺ໂມ ຕຍາ ອນຠິສມ຺ພຸທ຺ໂຘ’’ຕິ ໂຈທກໍ ປຸຄ຺ຄລໍ ວາ ໂຈທນາກາຣຓໍ ອນຠິສມ຺ພຸທ຺ຘຘມ຺ມໍ ວາ ອປສ຺ສໂຕ ‘‘ສຠາວພຸທ຺ໂຘເຍວ ວຕ ສມາໂນ ອຫໍ ພຸທ຺ໂຘສ຺ມີຕິ ວທາມີ’’ຕິ ປຈ຺ຈເວກ຺ຂນ຺ຕສ຺ສ ພລວຕຣໍ ໂສມນສ຺ສໍ ອຸປ຺ປຊ຺ຊຕິ, ເຕນ ສມ຺ປຍຸຕ຺ຕໍ ຎາຓໍ ເວສາຣຊ຺ຊໍ ນາມ. ຕໍ ສນ຺ຘາຍ ‘‘ເຂມປ຺ປຕ຺ໂຕ’’ຕິອາທິມາຫ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ອນ຺ຕຣາຍິກາ ຘມ຺ມາຕິ ເອຕ຺ຖ ປນ ອນ຺ຕຣາຍໍ ກໂຣນ຺ຕີຕິ ອນ຺ຕຣາຍິກາ. ເຕ ອຕ຺ຖໂຕ ສຎ຺ຈິຈ຺ຈ ວີຕິກ຺ກນ຺ຕາ ສຕ຺ຕ ອາປຕ຺ຕິກ຺ຂນ຺ຘາ. ສຎ຺ຈິຈ຺ຈ ວີຕິກ຺ກນ຺ຕໍ ຫິ ອນ຺ຕມໂສ ທຸກ຺ກຏທຸພ຺ຠາສິຕມ຺ປິ ມຄ຺ຄຜລານໍ ອນ຺ຕຣາຍໍ ກໂຣຕິ. ອິຘ ປນ ເມຖຸນຘມ຺ໂມ ອຘິປ຺ເປໂຕ. ເມຖຸນໍ ເສວໂຕ ຫິ ຍສ຺ສ ກສ຺ສຈິ ນິສ຺ສໍສຍເມວ ມຄ຺ຄຜລານໍ ອນ຺ຕຣາໂຍ ໂຫຕິ.

ຍສ຺ສ ໂຂ ປນ ເຕ ອຕ຺ຖາຍາຕິ ຣາຄກ຺ຂຍາທີສຸ ຍສ຺ສ ອຕ຺ຖາຍ. ຘມ຺ໂມ ເທສິໂຕຕິ ອສຸຠຠາວນາທິຘມ຺ໂມ ກຖິໂຕ. ຕຕ຺ຣ ວຕ ມນ຺ຕິ ຕສ຺ມິໍ ອນິຍ຺ຍານິກຘມ຺ເມ ມໍ. ເສສໍ ວຸຕ຺ຕນເຍເນວ ເວທິຕພ຺ພໍ.

ວາທປຖາຕິ ວາທາເຍວ. ປຸຖູຕິ ພຫູ. ສິຕາຕິ ອຸປນິພທ຺ຘາ ອຠິສງ຺ຂຕາ. ອຖ ວາ ປຸຖຸສ຺ສິຕາຕິ ປຸຖຸຠາວໍ ສິຕາ ອຸປຄຕາ, ປຸຖູຫິ ວາ ສິຕາຕິປິ ປຸຖຸສ຺ສິຕາ. ຍໍ ນິສ຺ສິຕາຕິ ເອຕຣຫິປິ ຍໍ ວາທປຖໍ ນິສ຺ສິຕາ. ນ ເຕ ຠວນ຺ຕີຕິ ເຕ ວາທປຖາ ນ ຠວນ຺ຕິ ຠິຊ຺ຊນ຺ຕິ ວິນສ຺ສນ຺ຕິ. ຘມ຺ມຈກ຺ກນ຺ຕິ ເທສນາຎາຓສ຺ສປິ ປຏິເວຘຎາຓສ຺ສປິ ເອຕໍ ນາມໍ. ເຕສຸ ເທສນາຎາຓໍ ໂລກິຍໍ, ປຏິເວຘຎາຓໍ ໂລກຸຕ຺ຕຣໍ. ເກວລີຕິ ສກລຄຸຓສມນ຺ນາຄໂຕ. ຕາທິສນ຺ຕິ ຕຖາວິຘໍ.

໙. ຕຓ຺ຫຸປ຺ປາທສຸຕ຺ຕວຓ຺ຓນາ

໙. ນວເມ ອຸປ຺ປຊ຺ຊຕິ ເອເຕສູຕິ ອຸປ຺ປາທາ. ກາ ອຸປ຺ປຊ຺ຊຕິ? ຕຓ຺ຫາ. ຕຓ຺ຫາຍ ອຸປ຺ປາທາ ຕຓ຺ຫຸປ຺ປາທາ, ຕຓ຺ຫາວຕ຺ຖູນິ ຕຓ຺ຫາກາຣຓານີຕິ ອຕ຺ໂຖ. ຈີວຣເຫຕູຕິ ‘‘ກຕ຺ຖ ມນາປໍ ຈີວຣໍ ລຠິສ຺ສາມີ’’ຕິ ຈີວຣກາຣຓາ ອຸປ຺ປຊ຺ຊຕິ. ອິຕິຠວາຠວເຫຕູຕິ ເອຕ຺ຖ ອິຕີຕິ ນິທສ຺ສນຕ຺ເຖ ນິປາໂຕ. ຍຖາ ຈີວຣາທິເຫຕຸ, ເອວໍ ຠວາຠວເຫຕຸປີຕິ ອຕ຺ໂຖ. ຠວາຠໂວຕິ ເຈຕ຺ຖ ປຓີຕຕຣານິ ສປ຺ປິນວນີຕາທີນິ ອຘິປ຺ເປຕານິ. ສມ຺ປຕ຺ຕິຠເວສຸ ປຓີຕຕຣປຓີຕຕມຠໂວຕິປິ ວທນ຺ຕິເຍວ.

ຕຓ຺ຫາທຸຕິໂຍຕິ ອຍຎ຺ຫິ ສຕ຺ໂຕ ອນມຕຄ຺ເຄ ສໍສາຣວຏ຺ເຏ ສໍສຣນ຺ໂຕ ນ ເອກໂກວ ສໍສຣຕິ, ຕຓ຺ຫໍ ປນ ທຸຕິຍິກໍ ລຠນ຺ໂຕວ ສໍສຣຕິ. ເຕນ ວຸຕ຺ຕໍ ‘‘ຕຓ຺ຫາທຸຕິໂຍ’’ຕິ. ອິຕ຺ຖຠາວຎ຺ຎຖາຠາວນ຺ຕິ ເອຕ຺ຖ ອິຕ຺ຖຠາໂວ ນາມ ອຍໍ ອຕ຺ຕຠາໂວ, ອຎ຺ຎຖາຠາໂວ ນາມ ອນາຄຕຕ຺ຕຠາໂວ. ເອວຣູໂປ ວາ ອຎ຺ໂຎປິ ອຕ຺ຕຠາໂວ ອິຕ຺ຖຠາໂວ ນາມ, ນ ເອວຣູໂປ ອຎ຺ຎຖາຠາໂວ ນາມ. ຕໍ ອິຕ຺ຖຠາວຎ຺ຎຖາຠາວໍ. ສໍສາຣນ຺ຕິ ຂນ຺ຘຘາຕຸອາຍຕນານໍ ປຏິປາຏິໍ. ນາຕິວຕ຺ຕຕີຕິ ນາຕິກ຺ກມຕິ. ເອວມາທີນວໍ ຎຕ຺ວາຕິ ເອວໍ ອຕີຕານາຄຕປຈ຺ຈຸປ຺ປນ຺ເນສຸ ຂນ຺ເຘສຸ ອາທີນວໍ ຊານິຕ຺ວາ. ຕຓ຺ຫໍ ທຸກ຺ຂສ຺ສ ສມ຺ຠວນ຺ຕິ ຕຓ຺ຫໍ ຈ ‘‘ອຍໍ ວຏ຺ຏທຸກ຺ຂສມ຺ຠູໂຕ ສຠາໂວ ກາຣຓ’’ນ຺ຕິ ເອວໍ ຊານິຕ຺ວາ. ເອຕ຺ຕາວຕາ ອິມສ຺ສ ຠິກ຺ຂຸໂນ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປຕ຺ຕຠາໂວ ທສ຺ສິໂຕ. ອິທານິ ຕໍ ຂີຓາສວໍ ໂຖເມນ຺ໂຕ ວີຕຕຓ຺ໂຫຕິອາທິມາຫ. ຕຕ຺ຖ ອນາທາໂນຕິ ນິຄ຺ຄຫໂຓ. ສໂຕ ຠິກ຺ຂຸ ປຣິພ຺ພເຊຕິ ສຕິສມ຺ປຊຎ຺ເຎ ເວປຸລ຺ລປ຺ປຕ຺ໂຕ ຂີຓາສໂວ ຠິກ຺ຂຸ ສໂຕ ສມ຺ປຊາໂນ ຈເຣຍ຺ຍ ວິຫເຣຍ຺ຍາຕິ ອຕ຺ໂຖ. ອິຕິ ສຸຕ຺ຕນ຺ເຕ ວຏ຺ຏໍ ກເຖຕ຺ວາ ຄາຖາສຸ ວຏ຺ຏວິວຏ຺ຏໍ ກຖິຕນ຺ຕິ.

໑໐. ໂຍຄສຸຕ຺ຕວຓ຺ຓນາ

໑໐. ທສເມ ວຏ຺ຏສ຺ມິໍ ໂຍເຊນ຺ຕີຕິ ໂຍຄາ. ກາມໂຍໂຄຕິອາທີສຸ ປຎ຺ຈກາມຄຸຓິໂກ ຣາໂຄ ກາມໂຍໂຄ. ຣູປາຣູປຠເວສຸ ຉນ຺ທຣາໂຄ ຠວໂຍໂຄ, ຕຖາ ຌານນິກນ຺ຕິ. ສສ຺ສຕທິຏ຺ຐິສຫຄໂຕ ຈ ຣາໂຄ ທ຺ວາສຏ຺ຐິ ທິຏ຺ຐິໂຍ ຈ ທິຏ຺ຐິໂຍໂຄ. ຈຕູສຸ ສຈ຺ເຈສຸ ອຎ຺ຎາຓໍ ອວິຊ຺ຊາໂຍໂຄ. ກາເມສຸ ວາ ໂຍເຊຕີຕິ ກາມໂຍໂຄ. ຠເວສຸ ໂຍເຊຕີຕິ ຠວໂຍໂຄ. ທິຏ຺ຐີສຸ ໂຍເຊຕີຕິ ທິຏ຺ຐິໂຍໂຄ. ອວິຊ຺ຊາຍ ໂຍເຊຕີຕິ ອວິຊ຺ຊາໂຍໂຄຕິ ເຫຏ຺ຐາ ວຸຕ຺ຕຘມ຺ມານໍເຍເວຕໍ ອຘິວຈນໍ.

ອິທານິ ເຕ ວິຕ຺ຖາເຣຕ຺ວາ ທສ຺ເສນ຺ໂຕ ກຕໂມ ຈ, ຠິກ຺ຂເວຕິອາທິມາຫ. ຕຕ຺ຖ ສມຸທຍນ຺ຕິ ອຸປ຺ປຕ຺ຕິໍ. ອຕ຺ຖງ຺ຄມນ຺ຕິ ເຠທໍ. ອສ຺ສາທນ຺ຕິ ມຘຸຣຠາວໍ. ອາທີນວນ຺ຕິ ອມຘຸຣຠາວໍ ໂທສໍ. ນິສ຺ສຣຓນ຺ຕິ ນິສ຺ສຏຠາວໍ. ກາເມສູຕິ ວຕ຺ຖຸກາເມສຸ. ກາມຣາໂຄຕິ ກາເມ ອາຣພ຺ຠ ອຸປ຺ປນ຺ນຣາໂຄ. ເສສປເທສຸປິ ເອເສວ ນໂຍ. ອນຸເສຕີຕິ ນິພ຺ພຕ຺ຕຕິ. ອຍໍ ວຸຈ຺ຈຕິ, ຠິກ຺ຂເວ, ກາມໂຍໂຄຕິ, ຠິກ຺ຂເວ, ອິທໍ ກາເມສຸ ໂຍຊນກາຣຓໍ ພນ຺ຘນກາຣຓໍ ວຸຈ຺ຈຕີຕິ ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ຜສ຺ສາຍຕນານນ຺ຕິ ຈກ຺ຂາທີນໍ ຈກ຺ຂຸສມ຺ຜສ຺ສາທິກາຣຓານໍ. ອວິຊ຺ຊາ ອຎ຺ຎາຓນ຺ຕິ ຎາຓປຏິປກ຺ຂຠາເວນ ອຎ຺ຎາຓສງ຺ຂາຕາ ອວິຊ຺ຊາ. ອິຕິ ກາມໂຍໂຄຕິ ເອຕ຺ຖ ອິຕິ ສທ຺ໂທ ຈຕູຫິປິ ໂຍເຄຫິ ສທ຺ຘິໍ ໂຍເຊຕພ຺ໂພ ‘‘ເອວໍ ກາມໂຍໂຄ, ເອວໍ ຠວໂຍໂຄ’’ຕິ. ສໍຍຸຕ຺ໂຕຕິ ປຣິວາຣິໂຕ. ປາປເກຫີຕິ ລາມເກຫິ. ອກຸສເລຫີຕິ ອໂກສລ຺ລສມ຺ຠູເຕຫິ. ສໍກິເລສິເກຫີຕິ ສໍກິເລສນເກຫິ, ປສນ຺ນສ຺ສ ຈິຕ຺ຕສ຺ສ ປສນ຺ນຠາວທູສເກຫີຕິ ອຕ຺ໂຖ. ໂປໂນພ຺ຠວິເກຫີຕິ ປຸນພ຺ຠວນິພ຺ພຕ຺ຕເກຫິ. ສທເຣຫີຕິ ສທຣເຖຫິ. ທຸກ຺ຂວິປາເກຫີຕິ ວິປາກກາເລ ທຸກ຺ຂຸປ຺ປາທເກຫິ. ອາຍຕິໍ ຊາຕິຊຣາມຣຓິເກຫີຕິ ອນາຄເຕ ປຸນປ຺ປຸນໍ ຊາຕິຊຣາມຣຓນິພ຺ພຕ຺ຕເກຫິ. ຕສ຺ມາ ອໂຍຄກ຺ເຂມີຕິ ວຸຈ຺ຈຕີຕິ ຍສ຺ມາ ອປ຺ປຫີນໂຍໂຄ ປຸຄ຺ຄໂລ ເອເຕຫິ ຘມ຺ເມຫິ ສມ຺ປຍຸຕ຺ໂຕ ໂຫຕິ, ຕສ຺ມາ ຈຕູຫິ ໂຍເຄຫິ ເຂມໍ ນິພ຺ພານໍ ອນຘິຄຕຕ຺ຕາ ນ ໂຍຄກ຺ເຂມີຕິ ວຸຈ຺ຈຕິ.

ວິສໍໂຍໂຄຕິ ວິສໍໂຍຊນກາຣຓານິ. ກາມໂຍຄວິສໍໂຍໂຄຕິ ກາມໂຍຄໂຕ ວິສໍໂຍຊນກາຣຓໍ. ເສສປເທສຸປິ ເອເສວ ນໂຍ. ຕຕ຺ຖ ອສຸຠຊ຺ຌານໍ ກາມໂຍຄວິສໍໂຍໂຄ, ຕໍ ປາທກໍ ກຕ຺ວາ ອຘິຄໂຕ ອນາຄາມິມຄ຺ໂຄ ເອກນ຺ເຕເນວ ກາມໂຍຄວິສໍໂຍໂຄ ນາມ. ອຣຫຕ຺ຕມຄ຺ໂຄ ຠວໂຍຄວິສໍໂຍໂຄ ນາມ, ໂສຕາປຕ຺ຕິມຄ຺ໂຄ ທິຏ຺ຐິໂຍຄວິສໍໂຍໂຄ ນາມ, ອຣຫຕ຺ຕມຄ຺ໂຄ ອວິຊ຺ຊາໂຍຄວິສໍໂຍໂຄ ນາມ. ອິທານິ ເຕ ວິຕ຺ຖາຣວເສນ ທສ຺ເສນ຺ໂຕ ກຕໂມ ຈ, ຠິກ຺ຂເວຕິອາທິມາຫ. ຕສ຺ສຕ຺ໂຖ ວຸຕ຺ຕນເຍເນວ ເວທິຕພ຺ໂພ.

ຠວໂຍເຄນ ຈູຠຍນ຺ຕິ ຠວໂຍເຄນ ຈ ສໍຍຸຕ຺ຕາ, ກິຎ຺ຈິ ຠິຍ຺ໂຍ ອຸຠເຍນາປິ ສມ຺ປຍຸຕ຺ຕາ, ເຍນ ເກນຈິ ໂຍເຄນ ສມນ຺ນາຄຕາຕິ ອຕ຺ໂຖ. ປຸຣກ຺ຂຕາຕິ ປຸຣໂຕ ກຕາ, ປຣິວາຣິຕາ ວາ. ກາເມ ປຣິຎ຺ຎາຍາຕິ ທຸວິເຘປິ ກາເມ ປຣິຊານິຕ຺ວາ. ຠວໂຍຄຎ຺ຈ ສພ຺ພໂສຕິ ຠວໂຍຄຎ຺ຈ ສພ຺ພເມວ ປຣິຊານິຕ຺ວາ. ສມູຫຈ຺ຈາຕິ ສມູຫນິຕ຺ວາ. ວິຣາຊຍນ຺ຕິ ວິຣາເຊນ຺ໂຕ, ວິຣາເຊຕ຺ວາ ວາ. ‘‘ວິຣາເຊນ຺ໂຕ’’ຕິ ຫິ ວຸຕ຺ເຕ ມຄ຺ໂຄ ກຖິໂຕ ໂຫຕິ, ‘‘ວິຣາເຊຕ຺ວາ’’ຕິ ວຸຕ຺ເຕ ຜລໍ. ມຸນີຕິ ຂີຓາສວມຸນິ. ອິຕິ ອິມສ຺ມິໍ ສຸຕ຺ເຕປິ ຄາຖາສຸປິ ວຏ຺ຏວິວຏ຺ຏເມວ ກຖິຕນ຺ຕິ.

ຠຓ຺ຑຄາມວຄ຺ໂຄ ປຐໂມ.