(໑໒) ໒. ອາປາຍິກວຄ຺ໂຄ

໑. ອາປາຍິກສຸຕ຺ຕວຓ຺ຓນາ

໑໑໔. ທຸຕິຍສ຺ສ ປຐເມ ອປາຍໍ ຄຈ຺ຉິສ຺ສນ຺ຕີຕິ ອາປາຍິກາ. ນິຣຍໍ ຄຈ຺ຉິສ຺ສນ຺ຕີຕິ ເນຣຍິກາ. ອິທມປ຺ປຫາຍາຕິ ອິທໍ ພ຺ຣຫ຺ມຈາຣິປຏິຎ຺ຎຕາທິໍ ປາປຘມ຺ມຕ຺ຕຍໍ ອວິຊຫິຕ຺ວາ. ພ຺ຣຫ຺ມຈາຣິປຏິຎ຺ໂຎຕິ ພ຺ຣຫ຺ມຈາຣິປຏິຣູປໂກ, ເຕສໍ ວາ ອາກປ຺ປໍ ອວິຊຫເນນ ‘‘ອຫມ຺ປິ ພ຺ຣຫ຺ມຈາຣີ’’ຕິ ເອວໍປຏິຎ຺ໂຎ. ອນຸທ຺ຘໍເສຕີຕິ ອກ຺ໂກສຕິ ປຣິຠາສຕິ ໂຈເທຕິ. ນຕ຺ຖິ ກາເມສຸ ໂທໂສຕິ ກິເລສກາເມນ ວຕ຺ຖຸກາເມ ເສວນ຺ຕສ຺ສ ນຕ຺ຖິ ໂທໂສ. ປາຕພ຺ຍຕນ຺ຕິ ປິວິຕພ຺ພຕໍ ປຣິຠຸຎ຺ຊິຕພ຺ພຕໍ ນິຣາສງ຺ເກນ ຈິຕ຺ເຕນ ປິປາສິຕສ຺ສ ປານີຍປິວນສທິສໍ ປຣິຠຸຎ຺ຊິຕພ຺ພຕໍ. ອິມສ຺ມິໍ ສຸຕ຺ເຕ ວຏ຺ຏເມວ ກຖິຕໍ.

໒. ທຸລ຺ລຠສຸຕ຺ຕວຓ຺ຓນາ

໑໑໕. ທຸຕິເຍ ກຕຎ຺ຎູ ກຕເວທີຕິ ‘‘ອິມິນາ ມຍ຺ຫໍ ກຕ’’ນ຺ຕິ ເຕນ ກຕກມ຺ມໍ ຎຕ຺ວາ ວິທິຕໍ ປາກຏໍ ກຕ຺ວາ ປຏິກຣຓກປຸຄ຺ຄໂລ.

໓. ອປ຺ປເມຍ຺ຍສຸຕ຺ຕວຓ຺ຓນາ

໑໑໖. ຕຕິເຍ ສຸເຂນ ເມຕພ຺ໂພຕິ ສຸປ຺ປເມຍ຺ໂຍ. ທຸກ຺ເຂນ ເມຕພ຺ໂພຕິ ທຸປ຺ປເມຍ຺ໂຍ. ປເມຕຸໍ ນ ສກ຺ໂກຕີຕິ ອປ຺ປເມຍ຺ໂຍ. ອຸນ຺ນໂຬຕິ ອຸຄ຺ຄຕນໂຬ, ຕຸຈ຺ຉມານໍ ອຸກ຺ຂິປິຕ຺ວາ ຐິໂຕຕິ ອຕ຺ໂຖ. ຈປໂລຕິ ປຕ຺ຕມຓ຺ຑນາທິນາ ຈາປລ຺ເລນ ສມນ຺ນາຄໂຕ. ມຸຂໂຣຕິ ມຸຂຂໂຣ. ວິກິຓ຺ຓວາໂຈຕິ ອສຎ຺ຎຕວຈໂນ. ອສມາຫິໂຕຕິ ຈິຕ຺ເຕກຄ຺ຄຕາຣຫິໂຕ. ວິພ຺ຠນ຺ຕຈິຕ຺ໂຕຕິ ຠນ຺ຕຈິຕ຺ໂຕ ຠນ຺ຕຄາວິຠນ຺ຕມິຄສປ຺ປຏິຠາໂຄ. ປາກຕິນ຺ທ຺ຣິໂຍຕິ ວິວຏິນ຺ທ຺ຣິໂຍ. ເສສເມຕ຺ຖ ອຸຕ຺ຕານເມວາຕິ.

໔. ອາເນຎ຺ຊສຸຕ຺ຕວຓ຺ຓນາ

໑໑໗. ຈຕຸຕ຺ເຖ ຕທສ຺ສາເທຕີຕິ ຕໍ ຌານໍ ອສ຺ສາເທຕິ. ຕໍ ນິກາເມຕີຕິ ຕເທວ ປຕ຺ເຖຕິ. ເຕນ ຈ ວິຕ຺ຕິໍ ອາປຊ຺ຊຕີຕິ ເຕນ ຌາເນນ ຕຸຏ຺ຐິໍ ອາປຊ຺ຊຕິ. ຕຕ຺ຣ ຐິໂຕຕິ ຕສ຺ມິໍ ຌາເນ ຐິໂຕ. ຕທຘິມຸຕ຺ໂຕຕິ ຕຕ຺ເຖວ ອຘິມຸຕ຺ໂຕ. ຕພ຺ພຫຸລວິຫາຣີຕິ ເຕນ ພຫຸລໍ ວິຫຣນ຺ໂຕ. ສຫພ຺ຍຕໍ ອຸປປຊ຺ຊຕີຕິ ສຫຠາວໍ ອຸປປຊ຺ຊຕິ, ຕສ຺ມິໍ ເທວໂລເກ ນິພ຺ພຕ຺ຕຕີຕິ ອຕ຺ໂຖ. ນິຣຍມ຺ປິ ຄຈ຺ຉຕີຕິອາທິ ນິຣຍາທີຫິ ອວິປ຺ປມຸຕ຺ຕຕ຺ຕາ ອປຣປຣິຍາຍວເສນ ຕຕ຺ຖ ຄມນໍ ສນ຺ຘາຍ ວຸຕ຺ຕໍ. ນ ຫິ ຕສ຺ສ ອຸປຈາຣຊ຺ຌານໂຕ ພລວຕຣໍ ອກຸສລໍ ອຕ຺ຖິ, ເຍນ ອນນ຺ຕຣໍ ອປາເຍ ນິພ຺ພຕ຺ເຕຍ຺ຍ. ຠຄວໂຕ ປນ ສາວໂກຕິ ໂສຕາປນ຺ນສກທາຄາມິອນາຄາມີນໍ ອຎ຺ຎຕໂຣ. ຕສ຺ມິໍເຍວ ຠເວຕິ ຕຕ຺ເຖວ ອຣູປຠເວ. ປຣິນິພ຺ພາຍຕີຕິ ອປ຺ປຈ຺ຈຍປຣິນິພ຺ພາເນນ ປຣິນິພ຺ພາຍຕິ. ອຘິປ຺ປຍາໂສຕິ ອຘິກປ຺ປໂຍໂຄ. ເສສເມຕ຺ຖ ວຸຕ຺ຕນເຍເນວ ເວທິຕພ຺ພໍ. ອິມສ຺ມິໍ ປນ ສຸຕ຺ເຕ ປຸຖຸຊ຺ຊນສ຺ສ ອຸປປຕ຺ຕິຊ຺ຌານໍ ກຖິຕໍ, ອຣິຍສາວກສ຺ສ ຕເທວ ອຸປປຕ຺ຕິຊ຺ຌານຎ຺ຈ ວິປສ຺ສນາປາທກຊ຺ຌານຎ຺ຈ ກຖິຕໍ.

໕. ວິປຕ຺ຕິສມ຺ປທາສຸຕ຺ຕວຓ຺ຓນາ

໑໑໘. ປຎ຺ຈເມ ສີລວິປຕ຺ຕີຕິ ສີລສ຺ສ ວິປນ຺ນາກາໂຣ. ເສສທ຺ວເຍປິ ເອເສວ ນໂຍ. ນຕ຺ຖິ ທິນ຺ນນ຺ຕິ ທິນ຺ນສ຺ສ ຜລາຠາວໍ ສນ຺ຘາຍ ວທຕິ. ຍິຏ຺ຐໍ ວຸຈ຺ຈຕິ ມຫາໂຍໂຄ. ຫຸຕນ຺ຕິ ປເຫຓກສກ຺ກາໂຣ ອຘິປ຺ເປໂຕ. ຕມ຺ປິ ອຸຠຍໍ ຜລາຠາວເມວ ສນ຺ຘາຍ ປຏິກ຺ຂິປຕິ. ສຸກຕທຸກ຺ກຏານນ຺ຕິ ສຸກຕທຸກ຺ກຕານໍ, ກຸສລາກຸສລານນ຺ຕິ ອຕ຺ໂຖ. ຜລໍ ວິປາໂກຕິ ຍໍ ຜລນ຺ຕິ ວາ ວິປາໂກຕິ ວາ ວຸຈ຺ຈຕິ, ຕໍ ນຕ຺ຖີຕິ ວທຕິ. ນຕ຺ຖິ ອຍໍ ໂລໂກຕິ ປຣໂລເກ ຐິຕສ຺ສ ອຍໍ ໂລໂກ ນຕ຺ຖິ, ນຕ຺ຖິ ປໂຣ ໂລໂກຕິ ອິຘ ໂລເກ ຐິຕສ຺ສາປິ ປຣໂລໂກ ນຕ຺ຖິ, ສພ຺ເພ ຕຕ຺ຖ ຕຕ຺ເຖວ ອຸຈ຺ຉິຊ຺ຊນ຺ຕີຕິ ທສ຺ເສຕິ. ນຕ຺ຖິ ມາຕາ ນຕ຺ຖິ ປິຕາຕິ ເຕສຸ ສມ຺ມາປຏິປຕ຺ຕິມິຈ຺ຉາປຏິປຕ຺ຕີນໍ ຜລາຠາວວເສນ ວທຕິ. ນຕ຺ຖິ ສຕ຺ຕາ ໂອປປາຕິກາຕິ ຈວິຕ຺ວາ ອຸປ຺ປຊ຺ຊນກສຕ຺ຕາ ນາມ ນຕ຺ຖີຕິ ວທຕິ. ສມ຺ປທາຕິ ປາຣິປູຣິໂຍ. ສີລສມ຺ປທາຕິ ສີລສ຺ສ ປຣິປຸຓ຺ຓອເວກລ຺ລຠາໂວ. ເສສທ຺ວເຍປິ ເອເສວ ນໂຍ. ອຕ຺ຖິ ທິນ຺ນນ຺ຕິອາທິ ວຸຕ຺ຕປຏິປກ຺ຂນເຍນ ຄເຫຕພ຺ພໍ.

໖. ອປຓ຺ຓກສຸຕ຺ຕວຓ຺ຓນາ

໑໑໙. ຉຏ຺ເຐ ອປຓ຺ຓໂກ ມຓີຕິ ຉຫິ ຕເລຫິ ສມນ຺ນາຄໂຕ ປາສໂກ. ສຸຄຕິໍ ສຄ຺ຄນ຺ຕິ ຈາຕຸມຫາຣາຊິກາທີສຸ ອຎ຺ຎຕຣໍ ສຄ຺ຄໍ ໂລກໍ. ອິມສ຺ມິໍ ສຸຕ຺ເຕ ສີລຎ຺ຈ ສມ຺ມາທິຏ຺ຐິ ຈາຕິ ອຸຠຍມ຺ປິ ມິສ຺ສກໍ ກຖິຕໍ. ສຕ຺ຕມໍ ອຸຕ຺ຕານເມວ.

໘. ປຐມໂສເຈຍ຺ຍສຸຕ຺ຕວຓ຺ຓນາ

໑໒໑. ອຏ຺ຐເມ ໂສເຈຍ຺ຍານີຕິ ສຸຈິຠາວາ. ກາຍໂສເຈຍ຺ຍນ຺ຕິ ກາຍທ຺ວາເຣ ສຸຈິຠາໂວ. ເສສທ຺ວເຍປິ ເອເສວ ນໂຍ. ອິເມສຸ ປນ ປຏິປາຏິຍາ ຈຕູສຸ ສຸຕ຺ເຕສຸ ອຄາຣິກປຏິປທາ ກຖິຕາ. ໂສຕາປນ຺ນສກທາຄາມີນມ຺ປິ ວຏ຺ຏຕິ.

໙. ທຸຕິຍໂສເຈຍ຺ຍສຸຕ຺ຕວຓ຺ຓນາ

໑໒໒. ນວເມ ອຊ຺ຌຕ຺ຕນ຺ຕິ ນິຍກຊ຺ຌຕ຺ຕໍ. ກາມຈ຺ຉນ຺ທນ຺ຕິ ກາມຈ຺ຉນ຺ທນີວຣຓໍ. ພ຺ຍາປາທາທີສຸປິ ເອເສວ ນໂຍ. ເສສເມຕ຺ຖ ເຫຏ຺ຐາ ວຸຕ຺ຕນຍເມວ. ຄາຖາຍ ປນ ກາຍສຸຈິນ຺ຕິ ກາຍທ຺ວາເຣ ສຸຈິໍ, ກາເຍນ ວາ ສຸຈິໍ. ເສສທ຺ວເຍປິ ເອເສວ ນໂຍ. ນິນ຺ຫາຕປາປກນ຺ຕິ ສພ຺ເພ ປາເປ ນິນ຺ຫາເປຕ຺ວາ ໂຘວິຕ຺ວາ ຐິຕໍ. ອິມິນາ ສຸຕ຺ເຕນປິ ຄາຖາຍປິ ຂີຓາສໂວວ ກຖິໂຕຕິ.

໑໐. ໂມເນຍ຺ຍສຸຕ຺ຕວຓ຺ຓນາ

໑໒໓. ທສເມ ໂມເນຍ຺ຍານີຕິ ມຸນິຠາວາ. ກາຍໂມເນຍ຺ຍນ຺ຕິ ກາຍທ຺ວາເຣ ມຸນິຠາໂວ ສາຘຸຠາໂວ ປຓ຺ຑິຕຠາໂວ. ເສສທ຺ວເຍປິ ເອເສວ ນໂຍ. ອິທໍ ວຸຈ຺ຈຕິ, ຠິກ຺ຂເວ, ກາຍໂມເນຍ຺ຍນ຺ຕິ ອິທໍ ຕິວິຘກາຍທຸຈ຺ຈຣິຕປ຺ປຫານໍ ກາຍໂມເນຍ຺ຍໍ ນາມ. ອປິຈ ຕິວິຘໍ ກາຍສຸຈຣິຕມ຺ປິ ກາຍໂມເນຍ຺ຍໍ, ຕຖາ ກາຍາຣມ຺ມຓໍ ຎາຓໍ ກາຍໂມເນຍ຺ຍໍ, ກາຍປຣິຎ຺ຎາ ກາຍໂມເນຍ຺ຍໍ, ປຣິຎ຺ຎາສຫຄໂຕ ມຄ຺ໂຄ ກາຍໂມເນຍ຺ຍໍ, ກາເຍ ຉນ຺ທຣາຄສ຺ສ ປຫານໍ ກາຍໂມເນຍ຺ຍໍ, ກາຍສງ຺ຂາຣນິໂຣໂຘ ຈຕຸຕ຺ຖຊ຺ຌານສມາປຕ຺ຕິ ກາຍໂມເນຍ຺ຍໍ. ວຈີໂມເນຍ຺ເຍປິ ເອເສວ ນໂຍ.

ອຍໍ ປເນຕ຺ຖ ວິເສໂສ – ຍຖາ ອິຘ ຈຕຸຕ຺ຖຊ຺ຌານສມາປຕ຺ຕິ, ເອວໍ ຕຕ຺ຖ ວຈີສງ຺ຂາຣນິໂຣໂຘ ທຸຕິຍຊ຺ຌານສມາປຕ຺ຕິ ວຈີໂມເນຍ຺ຍນ຺ຕິ ເວທິຕພ຺ພາ. ມໂນໂມເນຍ຺ຍມ຺ປິ ອິມິນາວ ນເຍນ ອຕ຺ຖໍ ຎຕ຺ວາ ຈິຕ຺ຕສງ຺ຂາຣນິໂຣໂຘ ສຎ຺ຎາເວທຍິຕນິໂຣຘສມາປຕ຺ຕິ ມໂນໂມເນຍ຺ຍນ຺ຕິ ເວທິຕພ຺ພາ. ກາຍມຸນິນ຺ຕິ ກາຍທ຺ວາເຣ ມຸນິໍ ອຸຕ຺ຕມໍ ປຣິສຸທ຺ຘໍ, ກາເຍນ ວາ ມຸນິໍ. ເສສທ຺ວເຍປິ ເອເສວ ນໂຍ. ສພ຺ພປ຺ປຫາຍິນນ຺ຕິ ຂີຓາສວໍ. ຂີຓາສໂວ ຫິ ສພ຺ພປ຺ປຫາຍີ ນາມາຕິ.

ອາປາຍິກວຄ຺ໂຄ ທຸຕິໂຍ.