(໑໑) ໑. ສມ຺ໂພຘວຄ຺ໂຄ

໑. ປຸພ຺ເພວສມ຺ໂພຘສຸຕ຺ຕວຓ຺ຓນາ

໑໐໔. ຕຕິຍສ຺ສ ປຐເມ ປຸພ຺ເພວ ສມ຺ໂພຘາຕິ ສມ຺ໂພຘິໂຕ ປຸພ຺ເພວ, ອຣິຍມຄ຺ຄປ຺ປຕ຺ຕິໂຕ ອປຣຠາເຄເຍວາຕິ ວຸຕ຺ຕໍ ໂຫຕິ. ອນຠິສມ຺ພຸທ຺ຘສ຺ສາຕິ ອປ຺ປຏິວິທ຺ຘຈຕຸສຈ຺ຈສ຺ສ. ໂພຘິສຕ຺ຕສ຺ເສວ ສໂຕຕິ ພຸຊ຺ຌນກສຕ຺ຕສ຺ເສວ ສໂຕ, ສມ຺ມາສມ຺ໂພຘິໍ ອຘິຄນ຺ຕຸໍ ອາຣຠນ຺ຕສ຺ເສວ ສໂຕ, ສມ຺ໂພຘິຍາ ວາ ສຕ຺ຕສ຺ເສວ ລຄ຺ຄສ຺ເສວ ສໂຕ. ທີປງ຺ກຣສ຺ສ ຫິ ຠຄວໂຕ ປາທມູເລ ອຏ຺ຐຘມ຺ມສໂມຘາເນນ ອຠິນີຫາຣສມິທ຺ຘິໂຕ ປຠຸຕິ ຕຖາຄໂຕ ສມ຺ມາສມ຺ໂພຘິໍ ສຕ຺ໂຕ ລຄ຺ໂຄ ‘‘ປຕ຺ຕພ຺ພາ ມຍາ ເອສາ’’ຕິ ຕທຘິຄມາຍ ປຣກ຺ກມໍ ອມຸຎ຺ຈນ຺ໂຕເຍວ ອາຄໂຕ, ຕສ຺ມາ ໂພຘິສຕ຺ໂຕຕິ ວຸຈ຺ຈຕິ. ໂກ ນຸ ໂຂຕິ ກຕໂມ ນຸ ໂຂ. ໂລໂກຕິ ສງ຺ຂາຣໂລໂກ. ອສ຺ສາໂທຕິ ມຘຸຣາກາໂຣ. ອາທີນໂວຕິ ອນຠິນນ຺ທິຕພ຺ພາກາໂຣ. ຕສ຺ສ ມຍ຺ຫນ຺ຕິ ຕສ຺ສ ເອວໍ ໂພຘິສຕ຺ຕສ຺ເສວ ສໂຕ ມຍ຺ຫໍ. ຉນ຺ທຣາຄວິນໂຍ ຉນ຺ທຣາຄປ຺ປຫານນ຺ຕິ ນິພ຺ພານໍ ອາຄມ຺ມ ອາຣພ຺ຠ ປຏິຈ຺ຈ ຉນ຺ທຣາໂຄ ວິນຍໍ ຄຈ຺ຉຕິ ປຫີຍຕິ, ຕສ຺ມາ ນິພ຺ພານໍ ‘‘ຉນ຺ທຣາຄວິນໂຍ ຉນ຺ທຣາຄປ຺ປຫານ’’ນ຺ຕິ ວຸຈ຺ຈຕິ. ອິທໍ ໂລກນິສ຺ສຣຓນ຺ຕິ ອິທໍ ນິພ຺ພານໍ ໂລກໂຕ ນິສ຺ສຏຕ຺ຕາ ໂລກນິສ຺ສຣຓນ຺ຕິ ວຸຈ຺ຈຕິ. ຍາວກີວນ຺ຕິ ຍຕ຺ຕກໍ ປມາຓໍ ກາລໍ. ອພ຺ຠຎ຺ຎາສິນ຺ຕິ ອຠິວິສິຏ຺ເຐນ ອຣິຍມຄ຺ຄຎາເຓນ ອຎ຺ຎາສິໍ. ຎາຓຎ຺ຈ ປນ ເມ ທສ຺ສນນ຺ຕິ ທ຺ວີຫິປິ ປເທຫິ ປຈ຺ຈເວກ຺ຂຓຎາຓໍ ວຸຕ຺ຕໍ. ເສສເມຕ຺ຖ ອຸຕ຺ຕານເມວາຕິ.

໒. ປຐມອສ຺ສາທສຸຕ຺ຕວຓ຺ຓນາ

໑໐໕. ທຸຕິເຍ ອສ຺ສາທປຣິເຍສນໍ ອຈຣິນ຺ຕິ ອສ຺ສາທປຣິເຍສນຕ຺ຖາຍ ອຈຣິໍ. ກຸໂຕ ປຏ຺ຐາຍາຕິ? ສຸເມຘກາລໂຕ ປຏ຺ຐາຍ. ປຎ຺ຎາຍາຕິ ສຫວິປສ຺ສນາຍ ມຄ຺ຄປຎ຺ຎາຍ. ສຸທິຏ຺ໂຐຕິ ສຸປ຺ປຏິວິທ຺ໂຘ. ອິມິນາ ອຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ຕຕິຍໍ ສພ຺ພຕ຺ຖ ອຸຕ຺ຕານເມວ.

໔. ສມຓພ຺ຣາຫ຺ມຓສຸຕ຺ຕວຓ຺ຓນາ

໑໐໗. ຈຕຸຕ຺ເຖ ສາມຎ຺ຎຕ຺ຖນ຺ຕິ ຈຕຸພ຺ພິຘໍ ອຣິຍຜລໍ. ອິຕຣໍ ຕສ຺ເສວ ເວວຈນໍ. ສາມຎ຺ຎຕ຺ເຖນ ວາ ຈຕ຺ຕາໂຣ ມຄ຺ຄາ, ພ຺ຣຫ຺ມຎ຺ຎຕ຺ເຖນ ຈຕ຺ຕາຣິ ຜລານິ. ອິເມສຸ ປນ ຈຕູສຸປິ ສຸຕ຺ເຕສຸ ຂນ຺ຘໂລໂກວ ກຖິໂຕ.

໕. ຣຸຓ຺ຓສຸຕ຺ຕວຓ຺ຓນາ

໑໐໘. ປຎ຺ຈມໍ ອຕ຺ຖຸປ຺ປຕ຺ຕິຍາ ນິກ຺ຂິຕ຺ຕໍ. ກຕຣາຍ ອຕ຺ຖຸປ຺ປຕ຺ຕິຍາ? ຉພ຺ພຄ຺ຄິຍານໍ ອນາຈາເຣ. ເຕ ກິຣ ຄາຍນ຺ຕາ ນຈ຺ຈນ຺ຕາ ຫສນ຺ຕາ ວິຈຣິໍສຸ. ຠິກ຺ຂູ ທສພລສ຺ສ ອາໂຣຈຍິໍສຸ. ສຕ຺ຖາ ເຕ ປກ຺ໂກສາເປຕ຺ວາ ເຕສໍ ໂອວາທຕ຺ຖາຍ ອິທໍ ສຸຕ຺ຕໍ ອາຣຠິ. ຕຕ຺ຖ ຣຸຓ຺ຓນ຺ຕິ ໂຣທິຕໍ. ອຸມ຺ມຕ຺ຕກນ຺ຕິ ອຸມ຺ມຕ຺ຕກກິຣິຍາ. ໂກມາຣກນ຺ຕິ ກຸມາຣເກຫິ ກຕ຺ຕພ຺ພກິຈ຺ຈໍ. ທນ຺ຕວິທໍສກຫສິຕນ຺ຕິ ທນ຺ເຕ ທສ຺ເສຕ຺ວາ ປາຓິໍ ປຫຣນ຺ຕານໍ ມຫາສທ຺ເທນ ຫສິຕໍ. ເສຕຸຆາໂຕ ຄີເຕຕິ ຄີເຕ ໂວ ປຈ຺ຈຍຆາໂຕ ໂຫຕຸ, ສເຫຕຸກໍ ຄີຕໍ ປຊຫຖາຕິ ທີເປຕິ. ນຈ຺ເຈປິ ເອເສວ ນໂຍ. ອລນ຺ຕິ ຍຸຕ຺ຕໍ. ຘມ຺ມປ຺ປໂມທິຕານໍ ສຕນ຺ຕິ ເອຕ຺ຖ ຘມ຺ໂມ ວຸຈ຺ຈຕິ ກາຣຓໍ, ເກນຈິເທວ ກາຣເຓນ ປມຸທິຕານໍ ສນ຺ຕານໍ. ສິຕໍ ສິຕມຕ຺ຕາຍາຕິ ຕສ຺ມິໍ ສິຕກາຣເຓ ສຕິ ຍໍ ສິຕໍ ກໂຣຖ, ຕໍ ໂວ ສິຕມຕ຺ຕາຍ ອຄ຺ຄທນ຺ເຕ ທສ຺ເສຕ຺ວາ ປຫຏ຺ຐາກາຣມຕ຺ຕທສ຺ສນາຍເຍວ ຍຸຕ຺ຕນ຺ຕິ ວຸຕ຺ຕໍ ໂຫຕິ.

໖. ອຕິຕ຺ຕິສຸຕ຺ຕວຓ຺ຓນາ

໑໐໙. ຉຏ຺ເຐ ໂສປ຺ປສ຺ສາຕິ ນິທ຺ທາຍ. ປຏິເສວນາຍ ນຕ຺ຖິ ຕິຕ຺ຕີຕິ ຍຖາ ຍຖາ ປຏິເສວຕິ, ຕຖາ ຕຖາ ຣຸຈ຺ຈຕິເຍວາຕິ ຕິຕ຺ຕິ ນາມ ນຕ຺ຖິ. ເສສປທທ຺ວເຍປິ ເອເສວ ນໂຍ. ສເຈ ຫິ ມຫາສມຸທ຺ເທ ອຸທກໍ ສຸຣາ ຠເວຍ຺ຍ, ສຸຣາໂສຓ຺ໂຑ ຈ ມຈ຺ໂຉ ຫຸຕ຺ວາ ນິພ຺ພຕ຺ເຕຍ຺ຍ, ຕສ຺ສ ຕຕ຺ຖ ຈຣນ຺ຕສ຺ສປິ ສຍນ຺ຕສ຺ສປິ ຕິຕ຺ຕິ ນາມ ນ ຠເວຍ຺ຍ. ອິມສ຺ມິໍ ສຸຕ຺ເຕ ວຏ຺ຏເມວ ກຖິຕໍ.

໗. ອຣກ຺ຂິຕສຸຕ຺ຕວຓ຺ຓນາ

໑໑໐. ສຕ຺ຕເມ ອວສ຺ສຸຕໍ ໂຫຕີຕິ ຕິນ຺ຕໍ ໂຫຕິ. ນ ຠທ຺ທກໍ ມຣຓໍ ໂຫຕີຕິ ອປາເຍ ປຏິສນ຺ຘິປຈ຺ຈຍຕາຍ ນ ລທ຺ຘກໍ ໂຫຕິ. ກາລກິຣິຍາຕິ ຕສ຺ເສວ ເວວຈນໍ. ສຸກ຺ກປກ຺ເຂ ສຄ຺ເຄ ປຏິສນ຺ຘິປຈ຺ຈຍຕາຍ ຠທ຺ທກໍ ໂຫຕິ ລທ຺ຘກໍ. ຕໍ ປນ ເອກນ຺ເຕນ ໂສຕາປນ຺ນາທີນໍ ຕິຓ຺ຓໍ ອຣິຍສາວການໍເຍວ ວຏ຺ຏຕິ. ເສສເມຕ຺ຖ ອຸຕ຺ຕານເມວາຕິ.

໘. ພ຺ຍາປນ຺ນສຸຕ຺ຕວຓ຺ຓນາ

໑໑໑. ອຏ຺ຐເມ ພ຺ຍາປນ຺ນນ຺ຕິ ປກຕິຠາວໍ ຊຫິຕ຺ວາ ຐິຕໍ. ເສສໍ ປຸຣິມສຸຕ຺ເຕ ວຸຕ຺ຕນຍເມວ.

໙. ປຐມນິທານສຸຕ຺ຕວຓ຺ຓນາ

໑໑໒. ນວເມ ນິທານານີຕິ ກາຣຓານິ. ກມ຺ມານໍ ສມຸທຍາຍາຕິ ວຏ຺ຏຄາມິກມ຺ມານໍ ປິຓ຺ຑກຣຓຕ຺ຖາຍ. ໂລຠປກຕນ຺ຕິ ໂລເຠນ ປກຕໍ. ສາວຊ຺ຊນ຺ຕິ ສໂທສໍ. ຕໍ ກມ຺ມໍ ກມ຺ມສມຸທຍາຍ ສໍວຕ຺ຕຕີຕິ ຕໍ ກມ຺ມໍ ອຎ຺ເຎສມ຺ປິ ວຏ຺ຏຄາມິກມ຺ມານໍ ສມຸທຍາຍ ປິຓ຺ຑກຣຓຕ຺ຖາຍ ສໍວຕ຺ຕຕິ. ນ ຕໍ ກມ຺ມໍ ກມ຺ມນິໂຣຘາຍາຕິ ຕໍ ປນ ກມ຺ມໍ ວຏ຺ຏຄາມິກມ຺ມານໍ ນິໂຣຘຕ຺ຖາຍ ນ ສໍວຕ຺ຕຕິ. ສຸກ຺ກປກ຺ເຂ ກມ຺ມານໍ ສມຸທຍາຍາຕິ ວິວຏ຺ຏຄາມິກມ຺ມານໍ ສມຸທຍຕ຺ຖາຍ. ອິມິນາ ນເຍນ ສພ຺ພໍ ອຕ຺ຖໂຕ ເວທິຕພ຺ພໍ.

໑໐. ທຸຕິຍນິທານສຸຕ຺ຕວຓ຺ຓນາ

໑໑໓. ທສເມ ກມ຺ມານນ຺ຕິ ວຏ຺ຏຄາມິກມ຺ມານເມວ. ຉນ຺ທຣາຄຏ຺ຐານິເຍຕິ ຉນ຺ທຣາຄສ຺ສ ກາຣຓຠູເຕ. ອາຣພ຺ຠາຕິ ອາຄມ຺ມ ສນ຺ຘາຍ ປຏິຈ຺ຈ. ຉນ຺ໂທຕິ ຕຓ຺ຫາຉນ຺ໂທ. ໂຍ ເຈຕໂສ ສາຣາໂຄຕິ ໂຍ ຈິຕ຺ຕສ຺ສ ຣາໂຄ ຣຊ຺ຊນາ ຣຊ຺ຊິຕຕ຺ຕໍ, ເອຕມຫໍ ສໍໂຍຊນໍ ວທາມິ, ພນ຺ຘນໍ ວທາມີຕິ ອຕ຺ໂຖ. ສຸກ຺ກປກ຺ເຂ ກມ຺ມານນ຺ຕິ ວິວຏ຺ຏຄາມິກມ຺ມານໍ. ຕທຠິນິວຕ຺ເຕຕີຕິ ຕໍ ອຠິນິວຕ຺ເຕຕິ. ຍທາ ວາ ເຕນ ວິປາໂກ ຎາໂຕ ໂຫຕິ ວິທິໂຕ, ຕທາ ເຕ ເຈວ ຘມ຺ເມ ຕຎ຺ຈ ວິປາກໍ ອຠິນິວຕ຺ເຕຕິ. ອິມິນາ ຈ ປເທນ ວິປສ຺ສນາ ກຖິຕາ, ຕທຠິນິວຕ຺ເຕຕ຺ວາຕິ ອິມິນາ ມຄ຺ໂຄ. ເຈຕສາ ອຠິນິວິຊ຺ຌິຕ຺ວາຕິ ອິມິນາ ຈ ມຄ຺ໂຄວ. ປຎ຺ຎາຍ ອຕິວິຊ຺ຌ ປສ຺ສຕີຕິ ສຫ ວິປສ຺ສນາຍ ມຄ຺ຄປຎ຺ຎາຍ ນິພ຺ພິຊ຺ຌິຕ຺ວາ ປສ຺ສຕິ. ເອວໍ ສພ຺ພຕ຺ຖ ອຕ຺ໂຖ ເວທິຕພ຺ໂພ. ອິມສ຺ມິໍ ປນ ສຸຕ຺ເຕ ວຏ຺ຏວິວຏ຺ຏໍ ກຖິຕນ຺ຕິ.

ສມ຺ໂພຘວຄ຺ໂຄ ປຐໂມ.