໑໐. ປໍສຸໂຘວກສຸຕ຺ຕວຓ຺ຓນາ

໑໐໒. ທສເມ ໂຘວຕີຕິ ວິກ຺ຂາເລຕິ. ສນ຺ໂຘວຕີຕິ ສຸຏ຺ຐຸ ໂຘວຕິ, ປຸນປ຺ປຸນໍ ໂຘວຕິ. ນິທ຺ໂຘວຕີຕິ ນິຄ຺ຄຓ຺ຫິຕ຺ວາ ໂຘວຕິ. ອນິທ຺ຘນ຺ຕກສາວນ຺ຕິ ອນີຫຕໂທສໍ ອນປນີຕກສາວໍ. ປຠງ຺ຄູຕິ ປຠິຊ຺ຊນສຠາວໍ, ອຘິກຣຓີຍໍ ຐເປຕ຺ວາ ມຸຏ຺ຐິກາຍ ປຫຏມຕ຺ຕໍ ຠິຊ຺ຊຕິ. ປຏ຺ຏິກາຍາຕິ ສຸວຓ຺ຓປຏ຺ຏກາຍ. ຄີເວຍ຺ຍເກຕິ ຄີວາລງ຺ກາເຣ.

ອຘິຈິຕ຺ຕນ຺ຕິ ສມຖວິປສ຺ສນາຈິຕ຺ຕໍ. ອນຸຍຸຕ຺ຕສ຺ສາຕິ ຠາເວນ຺ຕສ຺ສ. ສເຈຕໂສຕິ ຈິຕ຺ຕສມ຺ປນ຺ໂນ. ທພ຺ພຊາຕິໂກຕິ ປຓ຺ຑິຕຊາຕິໂກ. ກາມວິຕກ຺ກາທີສຸ ກາເມ ອາຣພ຺ຠ ອຸປ຺ປນ຺ໂນ ວິຕກ຺ໂກ ກາມວິຕກ຺ໂກ. ພ຺ຍາປາທວິຫິໍສສມ຺ປຍຸຕ຺ຕາ ວິຕກ຺ກາ ພ຺ຍາປາທວິຫິໍສວິຕກ຺ກາ ນາມ. ຎາຕິວິຕກ຺ກາທີສຸ ‘‘ອມ຺ຫາກໍ ຎາຕກາ ພຫູ ປຸຎ຺ຎວນ຺ຕາ’’ຕິອາທິນາ ນເຍນ ຎາຕເກ ອາຣພ຺ຠ ອຸປ຺ປນ຺ໂນ ວິຕກ຺ໂກ ຎາຕິວິຕກ຺ໂກ. ‘‘ອສຸໂກ ຊນປໂທ ເຂໂມ ສຸຠິກ຺ໂຂ’’ຕິອາທິນາ ນເຍນ ຊນປທມາຣພ຺ຠ ອຸປ຺ປນ຺ໂນ ວິຕກ຺ໂກ ຊນປທວິຕກ຺ໂກ. ‘‘ອໂຫ ວຕ ມໍ ປເຣ ນ ອວຊາເນຍ຺ຍຸ’’ນ຺ຕິ ເອວໍ ອຸປ຺ປນ຺ໂນ ວິຕກ຺ໂກ ອນວຎ຺ຎຕ຺ຕິປຏິສໍຍຸຕ຺ໂຕ ວິຕກ຺ໂກ ນາມ. ຘມ຺ມວິຕກ຺ກາວສິສ຺ສນ຺ຕີຕິ ຘມ຺ມວິຕກ຺ກາ ນາມ ທສວິປສ຺ສນຸປກ຺ກິເລສວິຕກ຺ກາ. ໂສ ໂຫຕິ ສມາຘິ ນ ເຈວ ສນ຺ໂຕຕິ ໂສ ອວສິຏ຺ຐຘມ຺ມວິຕກ຺ໂກ ວິປສ຺ສນາສມາຘິ ອວູປສນ຺ຕກິເລສຕ຺ຕາ ສນ຺ໂຕ ນ ໂຫຕິ. ນ ປຓີໂຕຕິ ນ ອຕປ຺ປໂກ. ນປ຺ປຏິປ຺ປສ຺ສທ຺ຘິລທ຺ໂຘຕິ ນ ກິເລສປຏິປ຺ປສ຺ສທ຺ຘິຍາ ລທ຺ໂຘ. ນ ເອໂກທິຠາວາຘິຄໂຕຕິ ນ ເອກຄ຺ຄຠາວປ຺ປຕ຺ໂຕ. ສສງ຺ຂາຣນິຄ຺ຄຍ຺ຫວາຣິຕຄໂຕຕິ ສສງ຺ຂາເຣນ ສປ຺ປໂຍເຄນ ກິເລເສ ນິຄ຺ຄຓ຺ຫິຕ຺ວາ ວາເຣຕ຺ວາ ວາຣິໂຕ, ນ ກິເລສານໍ ຉິນ຺ນນ຺ເຕ ອຸປ຺ປນ຺ໂນ, ກິເລເສ ປນ ວາເຣຕ຺ວາ ອຸປ຺ປນ຺ໂນ.

ໂຫຕິ ໂສ, ຠິກ຺ຂເວ, ສມໂຍຕິ ເອຕ຺ຖ ສມໂຍ ນາມ ອຸຕຸສປ຺ປາຍໍ ອາຫາຣສປ຺ປາຍໍ ເສນາສນສປ຺ປາຍໍ ປຸຄ຺ຄລສປ຺ປາຍໍ ຘມ຺ມສ຺ສວນສປ຺ປາຍນ຺ຕິ ອິເມສໍ ປຎ຺ຈນ຺ນໍ ສປ຺ປາຍານໍ ປຏິລາຠກາໂລ. ຍໍ ຕໍ ຈິຕ຺ຕນ຺ຕິ ຍສ຺ມິໍ ສມເຍ ຕໍ ວິປສ຺ສນາຈິຕ຺ຕໍ. ອຊ຺ຌຕ຺ຕໍເຍວ ສນ຺ຕິຏ຺ຐຕີຕິ ອຕ຺ຕນິເຍວ ຕິຏ຺ຐຕິ. ນິຍກຊ຺ຌຕ຺ຕຎ຺ຫິ ອິຘ ອຊ຺ຌຕ຺ຕໍ ນາມ. ໂຄຈຣຊ຺ຌຕ຺ຕມ຺ປິ ວຏ຺ຏຕິ. ປຸຖຸຕ຺ຕາຣມ຺ມຓໍ ປຫາຍ ເອກສ຺ມິໍ ນິພ຺ພານໂຄຈເຣເຍວ ຕິຏ຺ຐຕີຕິ ວຸຕ຺ຕໍ ໂຫຕິ. ສນ຺ນິສີທຕີຕິ ສຸຏ຺ຐຸ ນິສີທຕິ. ເອໂກທິ ໂຫຕີຕິ ເອກຄ຺ຄໍ ໂຫຕິ. ສມາຘິຍຕີຕິ ສມ຺ມາ ອາຘິຍຕິ. ສນ຺ໂຕຕິອາທີສຸ ປຈ຺ຈນີກກິເລສວູປສເມນ ສນ຺ໂຕ. ອຕປ຺ປກຏ຺ເຐນ ປຓີໂຕ. ກິເລສປຏິປ຺ປສ຺ສທ຺ຘິຍາ ລທ຺ຘຕ຺ຕາ ປຏິປ຺ປສ຺ສທ຺ຘລທ຺ໂຘ. ເອກຄ຺ຄຠາວໍ ຄຕຕ຺ຕາ ເອໂກທິຠາວາຘິຄໂຕ. ກິເລສານໍ ຉິນ຺ນນ຺ເຕ ອຸປ຺ປນ຺ນຕ຺ຕາ ນ ສປ຺ປໂຍເຄນ ກິເລເສ ນິຄ຺ຄຓ຺ຫິຕ຺ວາ ວາເຣຕ຺ວາ ວາຣິໂຕຕິ ນ ສສງ຺ຂາຣນິຄ຺ຄຍ຺ຫວາຣິຕຄໂຕ. ເອຕ຺ຕາວຕາ ອຍໍ ຠິກ຺ຂຸ ວິວຏ຺ເຏຕ຺ວາ ອຣຫຕ຺ຕໍ ປຕ຺ໂຕ ນາມ ໂຫຕິ.

ອິທານິ ຂີຓາສວສ຺ສ ສໂຕ ອຠິຎ຺ຎາປຏິປທໍ ທສ຺ເສນ຺ໂຕ ຍສ຺ສ ຍສ຺ສ ຈາຕິອາທິມາຫ. ຕຕ຺ຖ ອຠິຎ຺ຎາ ສຈ຺ຉິກຣຓີຍສ຺ສາຕິ ອຠິຊານິຕ຺ວາ ປຈ຺ຈກ຺ຂໍ ກາຕພ຺ພສ຺ສ. ສຕິ ສຕິອາຍຕເນຕິ ປຸພ຺ພເຫຕຸສງ຺ຂາເຕ ເຈວ ອິທານິ ຈ ປຏິລທ຺ຘພ຺ເພ ອຠິຎ຺ຎາປາທກຊ຺ຌານາທິເຠເທ ຈ ສຕິ ສຕິກາຣເຓ. ວິຕ຺ຖາຣໂຕ ປນ ອຍໍ ອຠິຎ຺ຎາກຖາ ວິສຸທ຺ຘິມຄ຺ເຄ (ວິສຸທ຺ຘິ. ໒.໓໖໕ ອາທໂຍ) ວຸຕ຺ຕນເຍເນວ ເວທິຕພ຺ພາ. ອາສວານໍ ຂຍາຕິອາທິ ເຈຕ຺ຖ ຜລສມາປຕ຺ຕິວເສນ ວຸຕ຺ຕນ຺ຕິ ເວທິຕພ຺ພໍ.