໑໑. ນິມິຕ຺ຕສຸຕ຺ຕວຓ຺ຓນາ

໑໐໓. ເອກາທສເມປິ ອຘິຈິຕ຺ຕໍ ສມຖວິປສ຺ສນາຈິຕ຺ຕເມວ. ຕີຓິ ນິມິຕ຺ຕານີຕິ ຕີຓິ ກາຣຓານິ. ກາເລນ ກາລນ຺ຕິ ກາເລ ກາເລ, ຍຸຕ຺ຕກາເລຕິ ອຕ຺ໂຖ. ກາເລນ ກາລໍ ສມາຘິນິມິຕ຺ຕໍ ມນສິກາຕພ຺ພນ຺ຕິອາທີສຸ ຕໍ ຕໍ ກາລໍ ສລ຺ລກ຺ເຂຕ຺ວາ ເອກຄ຺ຄຕາຍ ຍຸຕ຺ຕກາເລ ເອກຄ຺ຄຕາ ມນສິກາຕພ຺ພາ. ເອກຄ຺ຄຕາ ຫິ ອິຘ ສມາຘິນິມິຕ຺ຕນ຺ຕິ ວຸຕ຺ຕາ. ຕຕ຺ຣ ວຈນຕ຺ໂຖ – ສມາຘິເຍວ ນິມິຕ຺ຕໍ ສມາຘິນິມິຕ຺ຕໍ. ເສສປທທ຺ວເຍປິ ເອເສວ ນໂຍ. ປຄ຺ຄໂຫຕິ ປນ ວີຣິຍສ຺ສ ນາມໍ, ອຸເປກ຺ຂາຕິ ມຊ຺ຌຕ຺ຕຠາວສ຺ສ. ຕສ຺ມາ ວີຣິຍສ຺ສ ຍຸຕ຺ຕກາເລ ວີຣິຍໍ ມນສິກາຕພ຺ພໍ, ມຊ຺ຌຕ຺ຕຠາວສ຺ສ ຍຸຕ຺ຕກາເລ ມຊ຺ຌຕ຺ຕຠາເວ ຐາຕພ຺ພນ຺ຕິ. ຐານໍ ຕໍ ຈິຕ຺ຕໍ ໂກສຊ຺ຊາຍ ສໍວຕ຺ເຕຍ຺ຍາຕິ ກາຣຓໍ ວິຊ຺ຊຕິ ເຍນ ຕໍ ຈິຕ຺ຕໍ ໂກສຊ຺ຊຠາເວ ຕິຏ຺ເຐຍ຺ຍ. ອິຕເຣສຸປິ ເອເສວ ນໂຍ. ອຸເປກ຺ຂານິມິຕ຺ຕໍເຍວ ມນສິ ກເຣຍ຺ຍາຕິ ເອຕ຺ຖ ຈ ຎາຓຊວໍ ອຸເປກ຺ເຂຍ຺ຍາຕິ ອຍມຕ຺ໂຖ. ອາສວານໍ ຂຍາຍາຕິ ອຣຫຕ຺ຕຜລຕ຺ຖາຍ.

ອຸກ຺ກໍ ພນ຺ເຘຍ຺ຍາຕິ ອງ຺ຄາຣກປລ຺ລໍ ສຊ຺ເຊຍ຺ຍ. ອາລິມ຺ເປຍ຺ຍາຕິ ຕຕ຺ຖ ອງ຺ຄາເຣ ປກ຺ຂິປິຕ຺ວາ ອຄ຺ຄິໍ ທຕ຺ວາ ນາຬິກາຍ ຘມນ຺ໂຕ ອຄ຺ຄິໍ ຄາຫາເປຍ຺ຍ. ອຸກ຺ກາມຸເຂ ປກ຺ຂິເປຍ຺ຍາຕິ ອງ຺ຄາເຣ ວິຍູຫິຕ຺ວາ ອງ຺ຄາຣມຕ຺ຖເກ ວາ ຐເປຍ຺ຍ, ມູສາຍ ວາ ປກ຺ຂິເປຍ຺ຍ. ອຊ຺ຌຸເປກ຺ຂຕີຕິ ປກ຺ກາປກ຺ກຠາວໍ ອຸປຘາເຣຕິ.

ສມ຺ມາ ສມາຘິຍຕິ ອາສວານໍ ຂຍາຍາຕິ ອຣຫຕ຺ຕຜລຕ຺ຖາຍ ສມ຺ມາ ຐປີຍຕິ. ເອຕ຺ຕາວຕາ ຫິ ວິປສ຺ສນໍ ວຑ຺ເຒຕ຺ວາ ອຣຫຕ຺ຕປ຺ປຕ຺ໂຕ ຠິກ຺ຂຸ ທສ຺ສິໂຕ. ອິທານິ ຕສ຺ສ ຂີຓາສວສ຺ສ ອຠິຎ຺ຎາຍ ປຏິປທໍ ທສ຺ເສນ຺ໂຕ ຍສ຺ສ ຍສ຺ສ ຈາຕິອາທິມາຫ. ຕໍ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ.

ໂລຓກປລ຺ລວຄ຺ໂຄ ປຎ຺ຈໂມ.