໑໐. ທຸຕິຍສິກ຺ຂຕ຺ຕຍສຸຕ຺ຕວຓ຺ຓນາ

໙໑. ທສເມ ອາສວານໍ ຂຍາຕິ ເອຕ຺ຖ ອຣຫຕ຺ຕມຄ຺ໂຄ ອຘິປຎ຺ຎາສິກ຺ຂາ ນາມ. ຜລໍ ປນ ສິກ຺ຂິຕສິກ຺ຂສ຺ສ ອຸປ຺ປຊ຺ຊນໂຕ ສິກ຺ຂາຕິ ນ ວຕ຺ຕພ຺ພໍ.

ຍຖາ ປຸເຣ ຕຖາ ປຈ຺ຉາຕິ ຍຖາ ປຐມໍ ຕີສຸ ສິກ຺ຂາສຸ ສິກ຺ຂຕິ, ປຈ຺ຉາ ຕເຖວ ສິກ຺ຂຕີຕິ ອຕ຺ໂຖ. ທຸຕິຍປເທປິ ເອເສວ ນໂຍ. ຍຖາ ອໂຘ ຕຖາ ອຸທ຺ຘນ຺ຕິ ຍຖາ ເຫຏ຺ຐິມກາຍໍ ອສຸຠວເສນ ປສ຺ສຕິ, ອຸປຣິມກາຍມ຺ປິ ຕເຖວ ຜຣຕິ. ທຸຕິຍປເທປິ ເອເສວ ນໂຍ. ຍຖາ ທິວາ ຕຖາ ຣຕ຺ຕິນ຺ຕິ ຍຖາ ທິວາ ຕິສ຺ໂສ ສິກ຺ຂາ ສິກ຺ຂຕິ, ຣຕ຺ຕິມ຺ປິ ຕເຖວ ສິກ຺ຂຕີຕິ ອຕ຺ໂຖ. ອຠິຠຸຍ຺ຍ ທິສາ ສພ຺ພາຕິ ສພ຺ພາ ທິສາ ອາຣມ຺ມຓວເສນ ອຠິຠວິຕ຺ວາ. ອປ຺ປມາຓສມາຘິນາຕິ ອຣຫຕ຺ຕມຄ຺ຄສມາຘິນາ.

ເສກ຺ຂນ຺ຕິ ສິກ຺ຂມານໍ ສກຣຓີຍໍ. ປຏິປທນ຺ຕິ ປຏິປນ຺ນກໍ. ສໍສຸທ຺ຘຈາຣິຍນ຺ຕິ ສໍສຸທ຺ຘຈຣຓໍ ປຣິສຸທ຺ຘສີລໍ. ສມ຺ພຸທ຺ຘນ຺ຕິ ຈຕຸສຈ຺ຈພຸທ຺ຘໍ. ຘີຣໍ ປຏິປທນ຺ຕຄຸນ຺ຕິ ຂນ຺ຘຘີຣອາຍຕນຘີຣວເສນ ຘີຣໍ ຘິຕິສມ຺ປນ຺ນໍ ປຏິປຕ຺ຕິຍາ ອນ຺ຕໍ ຄຕໍ. ວິຎ຺ຎາຓສ຺ສາຕິ ຈຣິມກວິຎ຺ຎາຓສ຺ສ. ຕຓ຺ຫາກ຺ຂຍວິມຸຕ຺ຕິໂນຕິ ຕຓ຺ຫາກ຺ຂຍວິມຸຕ຺ຕິສງ຺ຂາຕາຍ ອຣຫຕ຺ຕຜລວິມຸຕ຺ຕິຍາ ສມນ຺ນາຄຕສ຺ສ. ປຊ຺ໂຊຕສ຺ເສວ ນິພ຺ພານນ຺ຕິ ປທີປນິພ຺ພານໍ ວິຍ. ວິໂມກ຺ໂຂ ໂຫຕິ ເຈຕໂສຕິ ຈິຕ຺ຕສ຺ສ ວິມຸຕ຺ຕິ ວິມຸຈ຺ຈນາ ອປ຺ປວຕ຺ຕິຠາໂວ ໂຫຕິ. ຕຓ຺ຫາກ຺ຂຍວິມຸຕ຺ຕິໂນ ຫິ ຂີຓາສວສ຺ສ ຈຣິມກວິຎ຺ຎາຓນິໂຣເຘນ ປຣິນິພ຺ພານໍ ວິຍ ເຈຕໂສ ວິໂມກ຺ໂຂ ໂຫຕິ, ນ ຄຕຏ຺ຐານໍ ປຎ຺ຎາຍຕິ, ອປຓ຺ຓຕ຺ຕິກຠາວູປຄໂມເຍວ ໂຫຕີຕິ ອຕ຺ໂຖ.