໑໑. ສງ຺ກວາສຸຕ຺ຕວຓ຺ຓນາ

໙໒. ເອກາທສເມ ສງ຺ກວາ ນາມ ໂກສລານໍ ນິຄໂມຕິ ສງ຺ກວາຕິ ເອວໍນາມໂກ ໂກສລຣຏ຺ເຐ ນິຄໂມ. ອາວາສິໂກຕິ ຠາຣຫາໂຣ ນເວ ອາວາເສ ສມຸຏ຺ຐາເປຕິ, ປຸຣາເຓ ປຏິຊຄ຺ຄຕິ. ສິກ຺ຂາປທປຏິສໍຍຸຕ຺ຕາຍາຕິ ສິກ຺ຂາສງ຺ຂາເຕຫິ ປເທຫິ ປຏິສໍຍຸຕ຺ຕາຍ, ຕີຫິ ສິກ຺ຂາຫິ ສມນ຺ນາຄຕາຍາຕິ ອຕ຺ໂຖ. ສນ຺ທສ຺ເສຕີຕິ ສມ຺ມຸເຂ ວິຍ ກຕ຺ວາ ທສ຺ເສຕິ. ສມາທເປຕີຕິ ຄຓ຺ຫາເປຕິ. ສມຸຕ຺ເຕເຊຕີຕິ ສມຸສ຺ສາເຫຕິ. ສມ຺ປຫໍເສຕີຕິ ປຏິລທ຺ຘຄຸເຓຫິ ວຓ຺ຓໍ ກເຖນ຺ໂຕ ໂວທາເປຕິ. ອຘິສລ຺ລິຂເຕຕິ ອຕິວິຍ ສລ຺ລິຂຕິ, ອຕິວິຍ ສລ຺ລິຂິຕໍ ກຕ຺ວາ ສຓ຺ຫໍ ສຓ຺ຫໍ ກເຖຕີຕິ ອຕ຺ໂຖ.

ອຈ຺ຈໂຍຕິ ອປຣາໂຘ. ມໍ ອຈ຺ຈຄມາຕິ ມໍ ອຕິກ຺ກມ຺ມ ອຘິຠວິຕ຺ວາ ປວຕ຺ໂຕ. ອຫຸເທວ ອກ຺ຂນ຺ຕີຕິ ອໂຫສິເຍວ ອນຘິວາສນາ. ອຫຸ ອປ຺ປຈ຺ຈໂຍຕິ ອໂຫສິ ອຕຸຏ຺ຐາກາໂຣ. ປຏິຄ຺ຄຓ຺ຫາຕູຕິ ຂມຕຸ. ອາຍຕິໍ ສໍວຣາຍາຕິ ອນາຄເຕ ສໍວຣຕ຺ຖາຍ, ປຸນ ເອວຣູປສ຺ສ ອປຣາຘສ຺ສ ໂທສສ຺ສ ຂລິຕສ຺ສ ວາ ອກຣຓຕ຺ຖາຍາຕິ ອຕ຺ໂຖ. ຕຄ຺ຆາຕິ ເອກໍເສນ. ຍຖາຘມ຺ມໍ ປຏິກໂຣສີຕິ ຍຖາ ຘມ຺ໂມ ຐິໂຕ, ຕຖາ ກໂຣສິ, ຂມາເປສີຕິ ວຸຕ຺ຕໍ ໂຫຕິ. ຕໍ ເຕ ມຍໍ ປຏິຄ຺ຄຓ຺ຫາມາຕິ ຕໍ ຕວ ອປຣາຘໍ ມຍໍ ຂມາມ. ວຸທ຺ຘິເຫສາ, ກສ຺ສປ, ອຣິຍສ຺ສ ວິນເຍຕິ ເອສາ ກສ຺ສປ ພຸທ຺ຘສ຺ສ ຠຄວໂຕ ສາສເນ ວຸທ຺ຘິ ນາມ. ກຕມາ? ຍາຍໍ ອຈ຺ຈຍໍ ອຈ຺ຈຍໂຕ ທິສ຺ວາ ຍຖາຘມ຺ມໍ ປຏິກຣິຕ຺ວາ ອາຍຕິໍ ສໍວຣາປຊ຺ຊນາ. ເທສນໍ ປນ ປຸຄ຺ຄລາຘິຏ຺ຐານໍ ກໂຣນ຺ໂຕ ‘‘ໂຍ ອຈ຺ຈຍໍ ອຈ຺ຈຍໂຕ ທິສ຺ວາ ຍຖາຘມ຺ມໍ ປຏິກໂຣຕິ, ອາຍຕິໍ ສໍວຣໍ ອາປຊ຺ຊຕີ’’ຕິ ອາຫ. ນ ສິກ຺ຂາກາໂມຕິ ຕິສ຺ໂສ ສິກ຺ຂາ ນ ກາເມຕິ ນ ປຕ຺ເຖຕິ ນ ປິເຫຕິ. ສິກ຺ຂາສມາທານສ຺ສາຕິ ສິກ຺ຂາປຣິປູຣຓສ຺ສ. ນ ວຓ຺ຓວາທີຕິ ຄຸຓໍ ນ ກເຖຕິ. ກາເລນາຕິ ຍຸຕ຺ຕປ຺ປຍຸຕ຺ຕກາເລນ. ເສສເມຕ຺ຖ ອຸຕ຺ຕານຕ຺ຖເມວາຕິ.

ສມຓວຄ຺ໂຄ ຈຕຸຕ຺ໂຖ.