໙. ຄນ຺ຘຊາຕສຸຕ຺ຕວຓ຺ຓນາ

໘໐. ນວເມ ເອຕທໂວຈາຕິ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ໂຕ ທສພລສ຺ສ ວຕ຺ຕໍ ທສ຺ເສຕ຺ວາ ອຕ຺ຕໂນ ທິວາວິຫາຣຏ຺ຐານໍ ຄນ຺ຕ຺ວາ ‘‘ອິມສ຺ມິໍ ໂລເກ ມູລຄນ຺ໂຘ ນາມ ອຕ຺ຖິ, ສາຣຄນ຺ໂຘ ນາມ ອຕ຺ຖິ, ປຸປ຺ຜຄນ຺ໂຘ ນາມ ອຕ຺ຖິ. ອິເມ ປນ ຕໂຍປິ ຄນ຺ຘາ ອນຸວາຕໍເຍວ ຄຈ຺ຉນ຺ຕິ, ນ ປຏິວາຕໍ. ອຕ຺ຖິ ນຸ ໂຂ ກິຎ຺ຈິ, ຍສ຺ສ ປຏິວາຕມ຺ປິ ຄນ຺ໂຘ ຄຈ຺ຉຕີ’’ຕິ ຈິນ຺ເຕຕ຺ວາ ອຏ຺ຐນ຺ນໍ ວຣານໍ ຄຫຓກາເລເຍວ ກງ຺ຂຸປ຺ປຕ຺ຕິສມເຍ ອຸປສງ຺ກມນວຣສ຺ສ ຄຫິຕຕ຺ຕາ ຕກ຺ຂຓໍເຍວ ທິວາຏ຺ຐານໂຕ ວຸຏ຺ຐາຍ ສຕ຺ຖຸ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ໂນ ອຸປ຺ປນ຺ນາຍ ກງ຺ຂາຍ ວິໂນທນຕ຺ຖໍ ເອຕໍ ‘‘ຕີຓິມານິ, ຠນ຺ເຕ’’ຕິອາທິວຈນໍ ອໂວຈ. ຕຕ຺ຖ ຄນ຺ຘຊາຕານີຕິ ຄນ຺ຘຊາຕິໂຍ. ມູລຄນ຺ໂຘຕິ ມູລວຕ຺ຖຸໂກ ຄນ຺ໂຘ, ຄນ຺ຘສມ຺ປນ຺ນໍ ວາ ມູລເມວ ມູລຄນ຺ໂຘ. ຕສ຺ສ ຫິ ຄນ຺ໂຘ ອນຸວາຕໍ ຄຈ຺ຉຕິ. ຄນ຺ຘສ຺ສ ປນ ຄນ຺ໂຘ ນາມ ນຕ຺ຖິ. ສາຣຄນ຺ຘປຸປ຺ຜຄນ຺ເຘສຸປິ ເອເສວ ນໂຍ. ອຕ຺ຖານນ຺ທ, ກິຎ຺ຈິ ຄນ຺ຘຊາຕນ຺ຕິ ເອຕ຺ຖ ສຣຓຄມນາທໂຍ ຄຸຓວຓ຺ຓຠາສນວເສນ ທິສາຄາມິຕາຍ ຄນ຺ຘສທິສຕ຺ຕາ ຄນ຺ຘາ, ເຕສໍ ວຕ຺ຖຸຠູໂຕ ປຸຄ຺ຄໂລ ຄນ຺ຘຊາຕໍ ນາມ. ຄນ຺ໂຘ ຄຈ຺ຉຕີຕິ ວຓ຺ຓຠາສນວເສນ ຄຈ຺ຉຕິ. ສີລວາຕິ ປຎ຺ຈສີເລນ ວາ ທສສີເລນ ວາ ສີລວາ. ກລ຺ຍາຓຘມ຺ໂມຕິ ເຕເນວ ສີລຘມ຺ເມນ ກລ຺ຍາຓຘມ຺ໂມ ສຸນ຺ທຣຘມ຺ໂມ. ວິຄຕມລມຈ຺ເຉເຣນາຕິອາທີນໍ ອຕ຺ໂຖ ວິສຸທ຺ຘິມຄ຺ເຄ (ວິສຸທ຺ຘິ. ໑.໑໖໐) ວິຕ຺ຖາຣິໂຕວ. ທິສາສູຕິ ຈຕູສຸ ທິສາສຸ ຈຕູສຸ ອນຸທິສາສຸ. ສມຓພ຺ຣາຫ຺ມຓາຕິ ສມິຕປາປພາຫິຕປາປາ ສມຓພ຺ຣາຫ຺ມຓາ.

ນ ປຸປ຺ຜຄນ຺ໂຘ ປຏິວາຕເມຕີຕິ ວສ຺ສິກປຸປ຺ຜາທີນໍ ຄນ຺ໂຘ ປຏິວາຕໍ ນ ຄຈ຺ຉຕິ. ນ ຈນ຺ທນໍ ຕຄຣມລ຺ລິກາ ວາຕິ ຈນ຺ທນຕຄຣມລ຺ລິການມ຺ປິ ຄນ຺ໂຘ ປຏິວາຕໍ ນ ຄຈ຺ຉຕີຕິ ອຕ຺ໂຖ. ເທວໂລເກປິ ຜຸຏສຸມນາ ນາມ ໂຫຕິ, ຕສ຺ສາ ປຸປ຺ຜິຕທິວເສ ຄນ຺ໂຘ ໂຍຊນສຕໍ ອຊ຺ໂຌຕ຺ຖຣຕິ. ໂສປິ ປຏິວາຕໍ ວິທຕ຺ຖິມຕ຺ຕມ຺ປິ ຣຕນມຕ຺ຕມ຺ປິ ຄນ຺ຕຸໍ ນ ສກ຺ໂກຕີຕິ ວທນ຺ຕິ. ສຕຎ຺ຈ ຄນ຺ໂຘ ປຏິວາຕເມຕີຕິ ສຕຎ຺ຈ ປຓ຺ຑິຕານໍ ພຸທ຺ຘປຈ຺ເຈກພຸທ຺ຘພຸທ຺ຘປຸຕ຺ຕານໍ ສີລາທິຄຸຓຄນ຺ໂຘ ປຏິວາຕໍ ຄຈ຺ຉຕິ. ສພ຺ພາ ທິສາ ສປ຺ປຸຣິໂສ ປວາຍຕີຕິ ສປ຺ປຸຣິໂສ ປຓ຺ຑິໂຕ ສີລາທິຄຸຓຄນ຺ເຘນ ສພ຺ພາ ທິສາ ປວາຍຕິ, ສພ຺ພາ ທິສາ ຄນ຺ເຘນ ອວຕ຺ຖຣຕີຕິ ອຕ຺ໂຖ.