໑. ປຐມທ຺ເວພ຺ຣາຫ຺ມຓສຸຕ຺ຕວຓ຺ຓນາ

໕໒. ພ຺ຣາຫ຺ມຓວຄ຺ຄສ຺ສ ປຐເມ ຊິຓ຺ຓາຕິ ຊຣາຊິຓ຺ຓາ. ວຸທ຺ຘາຕິ ວໂຍວຸທ຺ຘາ. ມຫລ຺ລກາຕິ ຊາຕິມຫລ຺ລກາ. ອທ຺ຘຄຕາຕິ ຕໂຍ ອທ຺ເຘ ອຕິກ຺ກນ຺ຕາ. ວໂຍອນຸປ຺ປຕ຺ຕາຕິ ຕຕິຍໍ ວຍໍ ອນຸປ຺ປຕ຺ຕາ. ເຍນ ຠຄວາ ເຕນຸປສງ຺ກມິໍສູຕິ ປຸຕ຺ຕທາເຣ ອຕ຺ຕໂນ ວຈນໍ ອກໂຣນ຺ເຕ ທິສ຺ວາ ‘‘ສມຓສ຺ສ ໂຄຕມສ຺ສ ສນ຺ຕິກໍ ຄນ຺ຕ຺ວາ ນິຍ຺ຍານິກມຄ຺ຄໍ ຄເວສິສ຺ສາມາ’’ຕິ ຈິນ຺ເຕຕ຺ວາ ອຸປສງ຺ກມິໍສຸ. ມຍມສ຺ສຸ, ໂຠ ໂຄຕມ, ພ຺ຣາຫ຺ມຓາຕິ; ໂຠ ໂຄຕມ, ມຍໍ ພ຺ຣາຫ຺ມຓາ ນ ຂຕ຺ຕິຍາ ນາມຈ຺ຈາ ນ ຄຫປຕິກາຕິ ພ຺ຣາຫ຺ມຓຠາວໍ ຊານາເປຕ຺ວາ ຊິຓ຺ຓາຕິອາທິມາຫໍສຸ. ອກຕຠີຣຸຕ຺ຕາຓາຕິ ອກຕຠຍປຣິຕ຺ຕາຓາ. ອວສ຺ສຍຠູຕໍ ປຕິຏ຺ຐາກມ຺ມໍ ອມ຺ເຫຫິ ນ ກຕນ຺ຕິ ທສ຺ເສນ຺ຕິ. ຕຄ຺ຆາຕິ ເອກໍສຕ຺ເຖ ນິປາໂຕ, ສມ຺ປຏິຈ຺ຉນຕ຺ເຖ ວາ. ເອກນ຺ເຕນ ຕຸມ຺ເຫ ເອວຣູປາ, ອຫມ຺ປິ ໂຂ ເອຕໍ ສມ຺ປຏິຈ຺ຉາມີຕິ ຈ ທສ຺ເສຕິ. ອຸປນີຍຕີຕິ ອຸປສໍຫຣີຍຕິ. ອຍໍ ຫິ ຊາຕິຍາ ຊຣໍ ອຸປນີຍຕິ, ຊຣາຍ ພ຺ຍາຘິໍ, ພ຺ຍາຘິນາ ມຣຓໍ, ມຣເຓນ ປຸນ ຊາຕິໍ. ເຕນ ວຸຕ຺ຕໍ – ‘‘ອຸປນີຍຕີ’’ຕິ.

ອິທານິ ຍສ຺ມາ ເຕ ພ຺ຣາຫ຺ມຓາ ມຫລ຺ລກຕ຺ຕາ ປພ຺ພຊິຕ຺ວາປິ ວຕ຺ຕໍ ປູເຣຕຸໍ ນ ສກ຺ຂິສ຺ສນ຺ຕິ, ຕສ຺ມາ ເນ ປຎ຺ຈສຸ ສີເລສຸ ປຕິຏ຺ຐາເປນ຺ໂຕ ຠຄວາ ໂຍຘ ກາເຍນ ສໍຍໂມຕິອາທິມາຫ. ຕຕ຺ຖ ກາເຍນ ສໍຍໂມຕິ ກາຍທ຺ວາເຣນ ສໍວໂຣ. ເສເສສຸປິ ເອເສວ ນໂຍ. ຕໍ ຕສ຺ສ ເປຕສ຺ສາຕິ ຕໍ ປຸຎ຺ຎໍ ຕສ຺ສ ປຣໂລກໍ ຄຕສ຺ສ ຕາຍນຏ຺ເຐນ ຕາຓໍ, ນິລີຍນຏ຺ເຐນ ເລຓໍ, ປຕິຏ຺ຐານຏ຺ເຐນ ທີໂປ, ອວສ຺ສຍນຏ຺ເຐນ ສຣຓໍ, ອຸຕ຺ຕມຄຕິວເສນ ປຣາຍຓຎ຺ຈ ໂຫຕີຕິ ທສ຺ເສຕິ. ຄາຖາ ອຸຕ຺ຕານຕ຺ຖາເຍວ. ເອວໍ ເຕ ພ຺ຣາຫ຺ມຓາ ຕຖາຄເຕນ ປຎ຺ຈສຸ ສີເລສຸ ສມາທປິຕາ ຍາວຊີວໍ ປຎ຺ຈ ສີລານິ ຣກ຺ຂິຕ຺ວາ ສຄ຺ເຄ ນິພ຺ພຕ຺ຕິໍສຸ.