໑. ພາລວຄ຺ໂຄ

໑. ຠຍສຸຕ຺ຕວຓ຺ຓນາ

໑. ຕິກນິປາຕສ຺ສ ປຐເມ ຠຍານີຕິອາທີສຸ ຠຍນ຺ຕິ ຈິຕ຺ຕຸຕ຺ຣາໂສ. ອຸປທ຺ທໂວຕິ ອເນກຄ຺ຄຕາກາໂຣ. ອຸປສຄ຺ໂຄຕິ ອຸປສຏ຺ຐາກາໂຣ ຕຕ຺ຖ ຕຕ຺ຖ ລຄ຺ຄນາກາໂຣ.

ເຕສໍ ເອວໍ ນານຕ຺ຕໍ ເວທິຕພ຺ພໍ – ປພ຺ພຕວິສມນິສ຺ສິຕາ ໂຈຣາ ຊນປທວາສີນໍ ເປເສນ຺ຕິ – ‘‘ມຍໍ ອສຸກທິວເສ ນາມ ຕຸມ຺ຫາກໍ ຄາມໍ ປຫຣິສ຺ສາມາ’’ຕິ. ເຕ ຕໍ ປວຕ຺ຕິໍ ສຸຕກາລໂຕ ປຏ຺ຐາຍ ຠຍໍ ສນ຺ຕາສໍ ອາປຊ຺ຊນ຺ຕິ. ອຍໍ ຈິຕ຺ຕຸຕ຺ຣາໂສ ນາມ. ‘‘ຍຖາ ໂນ ເຕ ໂຈຣາ ກຸປິຕາ ອນຕ຺ຖມ຺ປິ ອາວເຫຍ຺ຍຸ’’ນ຺ຕິ ຫຕ຺ຖສາຣໍ ຄເຫຕ຺ວາ ທ຺ວິປທຈຕຸປ຺ປເທຫິ ສທ຺ຘິໍ ອຣຎ຺ຎໍ ປວິສິຕ຺ວາ ຕຕ຺ຖ ຕຕ຺ຖ ຠູມິຍໍ ນິປຊ຺ຊນ຺ຕິ ຑໍສມກສາທີຫິ ຂຊ຺ຊມານາ, ຄຸມ຺ພນ຺ຕຣານິ ປວິສນ຺ຕາ ຂາຓຸກຓ຺ຏເກ ມທ຺ທນ຺ຕິ. ເຕສໍ ເອວໍ ວິຈຣນ຺ຕານໍ ວິກ຺ຂິຕ຺ຕຠາໂວ ອເນກຄ຺ຄຕາກາໂຣ ນາມ. ຕໂຕ ໂຈເຣສຸ ຍຖາວຸຕ຺ເຕ ທິວເສ ອນາຄຈ຺ຉນ຺ເຕສຸ ‘‘ຕຸຈ຺ຉກສາສນໍ ຠວິສ຺ສຕິ, ຄາມໍ ປວິສິສ຺ສາມາ’’ຕິ ສປຣິກ຺ຂາຣາ ຄາມໍ ປວິສນ຺ຕິ. ອຖ ເຕສໍ ປວິຏ຺ຐຠາວໍ ຎຕ຺ວາ ຄາມໍ ປຣິວາເຣຕ຺ວາ ທ຺ວາເຣ ອຄ຺ຄິໍ ທຕ຺ວາ ມນຸສ຺ເສ ຆາເຕຕ຺ວາ ໂຈຣາ ສພ຺ພໍ ວິຠວໍ ວິລຸມ຺ປິຕ຺ວາ ຄຈ຺ຉນ຺ຕິ. ເຕສຸ ຆາຕິຕາວເສສາ ອຄ຺ຄິໍ ນິພ຺ພາເປຕ຺ວາ ໂກຏ຺ຐກຈ຺ຉາຍາຠິຕ຺ຕິຈ຺ຉາຍາທີສຸ ຕຕ຺ຖ ຕຕ຺ຖ ລຄ຺ຄິຕ຺ວາ ນິສີທນ຺ຕິ ນຏ຺ຐໍ ອນຸໂສຈມານາ. ອຍໍ ອຸປສຏ຺ຐາກາໂຣ ລຄ຺ຄນາກາໂຣ ນາມ.

ນຬາຄາຣາຕິ ນເຬຫິ ຉນ຺ນປຏິຈ຺ຉນ຺ນອຄາຣາ. ເສສສມ຺ຠາຣາ ປເນຕ຺ຖ ຣຸກ຺ຂມຍາ ໂຫນ຺ຕິ. ຕິຓາຄາເຣປິ ເອເສວ ນໂຍ. ກູຏາຄາຣານີຕິ ກູຏສງ຺ຄຫິຕານິ ອຄາຣານິ. ອຸລ຺ລິຕ຺ຕາວລິຕ຺ຕານີຕິ ອນ຺ໂຕ ຈ ພຫິ ຈ ລິຕ຺ຕານິ. ນິວາຕານີຕິ ນິວາຣິຕວາຕປ຺ປເວສານິ. ຜຸສິຕຄ຺ຄຬານີຕິ ເຉເກຫິ ວຑ຺ຒກີຫິ ກຕຕ຺ຕາ ປິຏ຺ຐສງ຺ຆາຏມ຺ຫິ ສຸຏ຺ຐຸ ຜຸສິຕກວາຏານິ. ປິຫິຕວາຕປານານີຕິ ຍຸຕ຺ຕວາຕປານານິ. ອິມິນາ ປທທ຺ວເຍນ ກວາຏວາຕປານານໍ ນິຈ຺ຈປິຫິຕຕໍ ອກເຖຕ຺ວາ ສມ຺ປຕ຺ຕິເຍວ ກຖິຕາ. ອິຈ຺ຉິຕິຈ຺ຉິຕກ຺ຂເຓ ປນ ຕານິ ປິຘີຍນ຺ຕິ ຈ ວິວຣີຍນ຺ຕິ ຈ.

ພາລໂຕ ອຸປ຺ປຊ຺ຊນ຺ຕີຕິ ພາລເມວ ນິສ຺ສາຍ ອຸປ຺ປຊ຺ຊນ຺ຕິ. ພາໂລ ຫິ ອປຓ຺ຑິຕປຸຣິໂສ ຣຊ຺ຊໍ ວາ ໂອປຣຊ຺ຊໍ ວາ ອຎ຺ຎໍ ວາ ປນ ມຫນ຺ຕໍ ຐານໍ ປຕ຺ເຖນ຺ໂຕ ກຕິປເຍ ອຕ຺ຕນາ ສທິເສ ວິຘວປຸຕ຺ເຕ ມຫາຘຸຕ຺ເຕ ຄເຫຕ຺ວາ ‘‘ເອຖ ອຫໍ ຕຸມ຺ເຫ ອິສ຺ສເຣ ກຣິສ຺ສາມີ’’ຕິ ປພ຺ພຕຄຫນາທີນິ ນິສ຺ສາຍ ອນ຺ຕມນ຺ເຕ ຄາເມ ປຫຣນ຺ໂຕ ທາມຣິກຠາວໍ ຊານາເປຕ຺ວາ ອນຸປຸພ຺ເພນ ນິຄເມປິ ຊນປເທປິ ປຫຣຕິ. ມນຸສ຺ສາ ເຄຫານິ ຉຑ຺ເຑຕ຺ວາ ເຂມຏ຺ຐານໍ ປຕ຺ຖຍມານາ ປກ຺ກມນ຺ຕິ. ເຕ ນິສ຺ສາຍ ວສນ຺ຕາ ຠິກ຺ຂູປິ ຠິກ຺ຂຸນິໂຍປິ ອຕ຺ຕໂນ ອຕ຺ຕໂນ ວສນຏ຺ຐານານິ ປຫາຍ ປກ຺ກມນ຺ຕິ. ຄຕຄຕຏ຺ຐາເນ ຠິກ຺ຂາປິ ເສນາສນມ຺ປິ ທຸລ຺ລຠໍ ໂຫຕິ. ເອວໍ ຈຕຸນ຺ນມ຺ປິ ປຣິສານໍ ຠຍໍ ອາຄຕເມວ ໂຫຕິ. ປພ຺ພຊ຺ຊິເຕສຸປິ ທ຺ເວ ພາລາ ຠິກ຺ຂູ ອຎ຺ຎມຎ຺ຎໍ ວິວາທໍ ປຏ຺ຐເປຕ຺ວາ ໂຈທນໍ ອາຣຠນ຺ຕິ. ອິຕິ ໂກສມ຺ພິວາສິການໍ ວິຍ ມຫາກລໂຫ ອຸປ຺ປຊ຺ຊຕິ. ຈຕຸນ຺ນໍ ປຣິສານໍ ຠຍໍ ອາຄຕເມວ ໂຫຕີຕິ ເອວໍ ຍານິ ການິຈິ ຠຍານິ ອຸປ຺ປຊ຺ຊນ຺ຕິ, ສພ຺ພານິ ຕານິ ພາລໂຕ ອຸປ຺ປຊ຺ຊນ຺ຕີຕິ ຍຖານຸສນ຺ຘິນາ ເທສນໍ ນິຏ຺ຐເປສິ.

໒. ລກ຺ຂຓສຸຕ຺ຕວຓ຺ຓນາ

໒. ທຸຕິເຍ ກາຍທ຺ວາຣາທິປວຕ຺ຕໍ ກມ຺ມໍ ລກ຺ຂຓໍ ສຎ຺ຊານນກາຣຓໍ ອສ຺ສາຕິ ກມ຺ມລກ຺ຂໂຓ. ອປທານໂສຠນີ ປຎ຺ຎາຕິ ຍາ ປຎ຺ຎາ ນາມ ອປທາເນນ ໂສຠຕິ, ພາລາ ຈ ປຓ຺ຑິຕາ ຈ ອຕ຺ຕໂນ ອຕ຺ຕໂນ ຈຣິເຕເນວ ປາກຏາ ໂຫນ຺ຕີຕິ ອຕ຺ໂຖ. ພາເລນ ຫິ ຄຕມຄ຺ໂຄ ຣຸກ຺ຂຄຈ຺ຉຄາມນິຄມາທີນິ ຌາເປຕ຺ວາ ຄຈ຺ຉນ຺ຕສ຺ສ ອິນ຺ທຄ຺ຄິໂນ ຄຕມຄ຺ໂຄ ວິຍ ໂຫຕິ, ຌາມຏ຺ຐານມຕ຺ຕເມວ ອງ຺ຄາຣມສິຉາຣິກາສມາກຸລໍ ປຎ຺ຎາຍຕິ. ປຓ຺ຑິເຕນ ຄຕມຄ຺ໂຄ ກຸໂສພ຺ຠາທໂຍ ປູເຣຕ຺ວາ ວິວິຘສສ຺ສສມ຺ປທໍ ອາວຫມາເນນ ຈຕຸທີປິກເມເຆນ ຄຕມຄ຺ໂຄ ວິຍ ໂຫຕິ. ຍຖາ ເຕນ ຄຕມຄ຺ເຄ ອຸທກປູຣານິ ເຈວ ວິວິຘສສ຺ສຜລາຜລານິ ຈ ຕານິ ຕານິ ຐານານິ ປຎ຺ຎາຍນ຺ຕິ, ເອວໍ ປຓ຺ຑິເຕນ ຄຕມຄ຺ເຄ ສມ຺ປຕ຺ຕິໂຍວ ປຎ຺ຎາຍນ຺ຕິ ໂນ ວິປຕ຺ຕິໂຍຕິ. ເສສເມຕ຺ຖ ອຸຕ຺ຕານຕ຺ຖເມວ.

໓. ຈິນ຺ຕີສຸຕ຺ຕວຓ຺ຓນາ

໓. ຕຕິເຍ ພາລລກ຺ຂຓານີຕິ ‘‘ພາໂລ ອຍ’’ນ຺ຕິ ເອເຕຫິ ລກ຺ຂີຍຕິ ຎາຍຕີຕິ ພາລລກ຺ຂຓານິ. ຕາເນວສ຺ສ ສຎ຺ຊານນກາຣຓານີຕິ ພາລນິມິຕ຺ຕານິ. ພາລາປທານານີຕິ ພາລສ຺ສ ອປທານານິ. ທຸຈ຺ຈິນ຺ຕິຕຈິນ຺ຕີຕິ ຈິນ຺ຕຍນ຺ໂຕ ອຠິຊ຺ຌາພ຺ຍາປາທມິຈ຺ຉາທສ຺ສນວເສນ ທຸຈ຺ຈິນ຺ຕິຕເມວ ຈິນ຺ເຕຕິ. ທຸພ຺ຠາສິຕຠາສີຕິ ຠາສມາໂນປິ ມຸສາວາທາທິເຠທໍ ທຸພ຺ຠາສິຕເມວ ຠາສຕິ. ທຸກ຺ກຏກມ຺ມກາຣີຕິ ກໂຣນ຺ໂຕປິ ປາຓາຕິປາຕາທິວເສນ ທຸກ຺ກຏກມ຺ມເມວ ກໂຣຕິ. ປຓ຺ຑິຕລກ຺ຂຓານີຕິອາທິ ວຸຕ຺ຕານຸສາເຣເນວ ເວທິຕພ຺ພໍ. ສຸຈິນ຺ຕິຕຈິນ຺ຕີຕິອາທີນິ ເຈຕ຺ຖ ມໂນສຸຈຣິຕາທີນໍ ວເສນ ໂຍເຊຕພ຺ພານິ.

໔. ອຈ຺ຈຍສຸຕ຺ຕວຓ຺ຓນາ

໔. ຈຕຸຕ຺ເຖ ອຈ຺ຈຍໍ ອຈ຺ຈຍໂຕ ນ ປສ຺ສຕີຕິ ອຕ຺ຕໂນ ອປຣາຘໍ ອປຣາຘໂຕ ນ ປສ຺ສຕິ. ອຈ຺ຈຍໂຕ ທິສ຺ວາ ຍຖາຘມ຺ມໍ ນປ຺ປຏິກໂຣຕີຕິ ‘‘ອປຣທ຺ຘໍ ມຍາ’’ຕິ ຎຕ຺ວາປິ ໂຍ ຘມ຺ໂມ, ຕໍ ນ ກໂຣຕິ, ທຓ຺ຑກມ຺ມໍ ອາຫຣິຕ຺ວາ ອຈ຺ຈຍໍ ນ ເທເສຕິ ນກ຺ຂມາເປຕິ. ອຈ຺ຈຍໍ ເທເສນ຺ຕສ຺ສ ຍຖາຘມ຺ມໍ ນປ຺ປຏິຄ຺ຄຓ຺ຫາຕີຕິ ປຣສ຺ສ ‘‘ວິຣທ຺ຘໍ ມຍາ’’ຕິ ຎຕ຺ວາ ທຓ຺ຑກມ຺ມໍ ອາຫຣິຕ຺ວາ ຂມາເປນ຺ຕສ຺ສ ນກ຺ຂມຕິ. ສຸກ຺ກປກ຺ໂຂ ວຸຕ຺ຕປຏິປກ຺ຂໂຕ ເວທິຕພ຺ໂພ.

໕. ອໂຍນິໂສສຸຕ຺ຕວຓ຺ຓນາ

໕. ປຎ຺ຈເມ ອໂຍນິໂສ ປຎ຺ຫໍ ກຕ຺ຕາ ໂຫຕີຕິ ‘‘ກຕິ ນຸ ໂຂ, ອຸທາຍິ, ອນຸສ຺ສຕິຏ຺ຐານານີ’’ຕິ ວຸຕ຺ເຕ ‘‘ປຸພ຺ເພນິວາໂສ ອນຸສ຺ສຕິຏ຺ຐານໍ ຠວິສ຺ສຕີ’’ຕິ ຈິນ຺ເຕຕ຺ວາ ລາຬຸທາຍິຕ຺ເຖໂຣ ວິຍ ອນຸປາຍຈິນ຺ຕາຍ ອປຎ຺ຫເມວ ປຎ຺ຫນ຺ຕິ ກຕ຺ຕາ ໂຫຕິ. ອໂຍນິໂສ ປຎ຺ຫໍ ວິສ຺ສຊ຺ເຊຕາ ໂຫຕີຕິ ເອວໍ ຈິນ຺ຕິຕໍ ປນ ປຎ຺ຫໍ ວິສ຺ສຊ຺ເຊນ຺ໂຕປິ ‘‘ອິຘ, ຠນ຺ເຕ, ຠິກ຺ຂຸ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ. ເສຍ຺ຍຖິທໍ, ເອກມ຺ປິ ຊາຕິ’’ນ຺ຕິອາທິນາ ນເຍນ ໂສເຍວ ເຖໂຣ ວິຍ ອໂຍນິໂສ ວິສ຺ສຊ຺ເຊຕາ ໂຫຕິ, ອປຎ຺ຫເມວ ປຎ຺ຫນ຺ຕິ ກເຖຕິ. ປຣິມຓ຺ຑເລຫິ ປທພ຺ຍຎ຺ຊເນຫີຕິ ເອຕ຺ຖ ປທເມວ ອຕ຺ຖສ຺ສ ພ຺ຍຎ຺ຊນໂຕ ປທພ຺ຍຎ຺ຊນໍ. ຕໍ ອກ຺ຂຣປາຣິປູຣິໍ ກຕ຺ວາ ທສວິຘໍ ພ຺ຍຎ຺ຊນພຸທ຺ຘິໍ ອປຣິຫາເປຕ຺ວາ ວຸຕ຺ຕໍ ປຣິມຓ຺ຑລໍ ນາມ ໂຫຕິ, ເອວຣູເປຫິ ປທພ຺ຍຎ຺ຊເນຫີຕິ ອຕ຺ໂຖ. ສິລິຏ຺ເຐຫີຕິ ປທສິລິຏ຺ຐຕາຍ ສິລິຏ຺ເຐຫິ. ອຸປຄເຕຫີຕິ ອຕ຺ຖຎ຺ຈ ກາຣຓຎ຺ຈ ອຸປຄເຕຫິ. ນາພ຺ຠນຸໂມທິຕາຕິ ເອວໍ ໂຍນິໂສ ສພ຺ພໍ ກາຣຓສມ຺ປນ຺ນໍ ກຕ຺ວາປິ ວິສ຺ສຊ຺ຊິຕໍ ປຣສ຺ສ ປຎ຺ຫໍ ນາຠິນຸໂມທຕິ ນາຠິນນ຺ທຕິ ສາຣິປຸຕ຺ຕຕ຺ເຖຣສ຺ສ ປຎ຺ຫໍ ລາຬຸທາຍິຕ຺ເຖໂຣ ວິຍ. ຍຖາຫ –

‘‘ອຏ຺ຐານໍ ໂຂ ເອຕໍ, ອາວຸໂສ ສາຣິປຸຕ຺ຕ, ອນວກາໂສ, ຍໍ ໂສ ອຕິກ຺ກມ຺ເມວ ກພຬີກາຣາຫາຣຠກ຺ຂານໍ ເທວານໍ ສຫພ຺ຍຕໍ ອຎ຺ຎຕຣໍ ມໂນມຍໍ ກາຍໍ ອຸປປນ຺ໂນ ສຎ຺ຎາເວທຍິຕນິໂຣຘໍ ສມາປຊ຺ເຊຍ຺ຍາປິ ວຸຏ຺ຐເຫຍ຺ຍາປິ, ນຕ຺ເຖຕໍ ຐານ’’ນ຺ຕິ (ອ. ນິ. ໕.໑໖໖).

ໂຍນິໂສ ປຎ຺ຫໍ ກຕ຺ຕາຕິອາທີສຸ ອານນ຺ທຕ຺ເຖໂຣ ວິຍ ໂຍນິໂສວ ປຎ຺ຫໍ ຈິນ຺ເຕຕ຺ວາ ໂຍນິໂສ ວິສ຺ສຊ຺ຊິຕາ ໂຫຕິ. ເຖໂຣ ຫິ ‘‘ກຕິ ນຸ ໂຂ, ອານນ຺ທ, ອນຸສ຺ສຕິຏ຺ຐານານີ’’ຕິ ປຸຈ຺ຉິໂຕ ‘‘ອຍໍ ປຎ຺ໂຫ ຠວິສ຺ສຕີ’’ຕິ ໂຍນິໂສ ຈິນ຺ເຕຕ຺ວາ ໂຍນິໂສ ວິສ຺ສຊ຺ເຊນ຺ໂຕ ອາຫ – ‘‘ອິຘ, ຠນ຺ເຕ, ຠິກ຺ຂຸ ວິວິຈ຺ເຈວ ກາເມຫິ…ເປ… ຈຕຸຕ຺ຖຊ຺ຌານໍ ອຸປສມ຺ປຊ຺ຊ ວິຫຣຕິ. ອິທໍ, ຠນ຺ເຕ, ອນຸສ຺ສຕິຏ຺ຐານໍ ເອວໍຠາວິຕໍ ເອວໍພຫຸລີກຕໍ ທິຏ຺ຐຘມ຺ມສຸຂວິຫາຣາຍ ສໍວຕ຺ຕຕີ’’ຕິ. ອພ຺ຠນຸໂມທິຕາ ໂຫຕີຕິ ຕຖາຄໂຕ ວິຍ ໂຍນິໂສ ອພ຺ຠນຸໂມທິຕາ ໂຫຕິ. ຕຖາຄໂຕ ຫິ ອານນ຺ທຕ຺ເຖເຣນ ປຎ຺ເຫ ວິສ຺ສຊ຺ຊິເຕ ‘‘ສາຘຸ ສາຘຸ, ອານນ຺ທ, ເຕນ ຫິ ຕ຺ວໍ, ອານນ຺ທ, ອິມມ຺ປິ ຉຏ຺ຐໍ ອນຸສ຺ສຕິຏ຺ຐານໍ ຘາເຣຫິ. ອິຘານນ຺ທ, ຠິກ຺ຂຸ ສໂຕວ ອຠິກ຺ກມຕິ ສໂຕວ ປຏິກ຺ກມຕີ’’ຕິອາທິມາຫ. ຉຏ຺ຐາທີນິ ອຸຕ຺ຕານຕ຺ຖາເນວ.

໙. ຂຕສຸຕ຺ຕວຓ຺ຓນາ

໙. ນວເມ ສຸກ຺ກປກ຺ໂຂ ປຸພ຺ພຠາເຄ ທສຫິປິ ກຸສລກມ຺ມປເຖຫິ ປຣິຈ຺ຉິນ຺ໂນ, ອຸປຣິ ຍາວ ອຣຫຕ຺ຕມຄ຺ຄາ ລພ຺ຠຕິ. ພຫຸຎ຺ຈ ປຸຎ຺ຎໍ ປສວຕີຕິ ເອຕ຺ຖ ໂລກິຍໂລກຸຕ຺ຕຣມິສ຺ສກປຸຎ຺ຎໍ ກຖິຕໍ.

໑໐. ມລສຸຕ຺ຕວຓ຺ຓນາ

໑໐. ທສເມ ທຸສ຺ສີລຠາໂວ ທຸສ຺ສີລ຺ຍໍ, ທຸສ຺ສີລ຺ຍເມວ ມລໍ ທຸສ຺ສີລ຺ຍມລໍ. ເກນຏ຺ເຐນ ມລນ຺ຕິ? ອນຸທຫນຏ຺ເຐນ ທຸຄ຺ຄນ຺ຘຏ຺ເຐນ ກິລິຏ຺ຐກຣຓຏ຺ເຐນ ຈ. ຕຎ຺ຫິ ນິຣຍາທີສຸ ອປາເຍສຸ ອນຸທຫຕີຕິ ອນຸທຫນຏ຺ເຐນປິ ມລໍ. ເຕນ ສມນ຺ນາຄໂຕ ປຸຄ຺ຄໂລ ມາຕາປິຕູນມ຺ປິ ສນ຺ຕິເກ ຠິກ຺ຂຸສງ຺ຆສ຺ສາປິ ອນ຺ຕເຣ ໂພຘິເຈຕິຍຏ຺ຐາເນສຸປິ ຊິຄຸຈ຺ຉນີໂຍ ໂຫຕິ, ສພ຺ພທິສາສຸ ຈສ຺ສ ‘‘ເອວຣູປໍ ກິຣ ເຕນ ປາປກມ຺ມໍ ກຕ’’ນ຺ຕິ ອວຓ຺ຓຄນ຺ໂຘ ວາຍຕີຕິ ທຸຄ຺ຄນ຺ຘຏ຺ເຐນປິ ມລໍ. ເຕນ ຈ ສມນ຺ນາຄໂຕ ປຸຄ຺ຄໂລ ຄຕຄຕຏ຺ຐາເນ ອຸປຕາປຎ຺ເຈວ ລຠຕິ, ກາຍກມ຺ມາທີນິ ຈສ຺ສ ອສຸຈີນິ ໂຫນ຺ຕິ ອປຠສ຺ສຣານີຕິ ກິລິຏ຺ຐກຣຓຏ຺ເຐນປິ ມລໍ. ອປິຈ ຕໍ ເທວມນຸສ຺ສສມ຺ປຕ຺ຕິໂຍ ເຈວ ນິພ຺ພານສມ຺ປຕ຺ຕິຎ຺ຈ ມິລາເປຕີຕິ ມິລາປນຏ຺ເຐນປິ ມລນ຺ຕິ ເວທິຕພ຺ພໍ. ອິສ຺ສາມລມຈ຺ເຉຣມເລສຸປິ ເອເສວ ນໂຍ.

ພາລວຄ຺ໂຄ ປຐໂມ.