໓. ວິນຍເປຍ຺ຍາລໍ

໒໐໑. ທ຺ເວເມ, ຠິກ຺ຂເວ, ອຕ຺ຖວເສ ປຏິຈ຺ຈາຕິ, ຠິກ຺ຂເວ, ທ຺ເວ ອຕ຺ເຖ ນິສ຺ສາຍ ທ຺ເວ ກາຣຓານິ ສນ຺ຘາຍ. ສິກ຺ຂາປທໍ ປຎ຺ຎຕ຺ຕນ຺ຕິ ສິກ຺ຂາໂກຏ຺ຐາໂສ ຐປິໂຕ. ສງ຺ຆສຸຏ຺ຐຸຕາຍາຕິ ສງ຺ຆສ຺ສ ສຸຏ຺ຐຸຠາວາຍ, ‘‘ສຸຏ຺ຐຸ, ຠນ຺ເຕ’’ຕິ ວຕ຺ວາ ສມ຺ປຏິຈ຺ຉນຕ຺ຖາຍາຕິ ອຕ຺ໂຖ. ສງ຺ຆຜາສຸຕາຍາຕິ ສງ຺ຆສ຺ສ ຜາສຸວິຫາຣຕ຺ຖາຍ. ທຸມ຺ມງ຺ກູນນ຺ຕິ ທຸສ຺ສີລານໍ. ເປສລານນ຺ຕິ ປີຍສີລານໍ. ທິຏ຺ຐຘມ຺ມິການໍ ອາສວານນ຺ຕິ ທິຏ຺ຐຘມ຺ເມ ອິມສ຺ມິໍເຍວ ອຕ຺ຕຠາເວ ວີຕິກ຺ກມປຈ຺ຈຍາ ປຏິລທ຺ຘພ຺ພານໍ ວຘພນ຺ຘນາທິທຸກ຺ຂຘມ຺ມສງ຺ຂາຕານໍ ອາສວານໍ. ສໍວຣາຍາຕິ ປິທຫນຕ຺ຖາຍ. ສມ຺ປຣາຍິການນ຺ຕິ ຕຖາຣູປານໍເຍວ ອປາຍທຸກ຺ຂສງ຺ຂາຕານໍ ສມ຺ປຣາເຍ ອຸປ຺ປຊ຺ຊນກອາສວານໍ. ປຏິຆາຕາຍາຕິ ປຏິເສຘນຕ຺ຖາຍ. ເວຣານນ຺ຕິ ອກຸສລເວຣານມ຺ປິ ປຸຄ຺ຄລເວຣານມ຺ປິ. ວຊ຺ຊານນ຺ຕິ ໂທສານໍ. ເຕ ເອວ ວາ ທຸກ຺ຂຘມ຺ມາ ວຊ຺ຊນີຍຕ຺ຕາ ອິຘ ວຊ຺ຊາຕິ ອຘິປ຺ເປຕາ. ຠຍານນ຺ຕິ ຈິຕ຺ຕຸຕ຺ຣາສຠຍານມ຺ປິ ຠຍເຫຕູນໍ ເຕສໍເຍວ ທຸກ຺ຂຘມ຺ມານມ຺ປິ. ອກຸສລານນ຺ຕິ ອກ຺ຂມຏ຺ເຐນ ອກຸສລສງ຺ຂາຕານໍ ທຸກ຺ຂຘມ຺ມານໍ. ຄິຫີນໍ ອນຸກມ຺ປາຍາຕິ ຄິຫີສຸ ອຸຊ຺ຌາຍນ຺ເຕສຸ ປຎ຺ຎຕ຺ຕສິກ຺ຂາປທໍ ຄິຫີນໍ ອນຸກມ຺ປາຍ ປຎ຺ຎຕ຺ຕໍ ນາມ. ປາປິຈ຺ຉານໍ ປກ຺ຂຸປຈ຺ເຉທາຍາຕິ ປາປິຈ຺ຉາ ປກ຺ຂໍ ນິສ຺ສາຍ ສງ຺ຆໍ ຠິນ຺ເທຍ຺ຍຸນ຺ຕິ ເຕສໍ ປກ຺ຂຸປຈ຺ເຉທນຕ຺ຖາຍ. ອປ຺ປສນ຺ນານໍ ປສາທາຍາຕິ ປຸພ຺ເພ ອປ຺ປສນ຺ນານມ຺ປິ ປຓ຺ຑິຕມນຸສ຺ສານໍ ສິກ຺ຂາປທປຎ຺ຎຕ຺ຕິສມ຺ປທໍ ທິສ຺ວາ ປສາທຸປ຺ປຕ຺ຕິອຕ຺ຖາຍ. ປສນ຺ນານໍ ຠິຍ຺ໂຍຠາວາຍາຕິ ປສນ຺ນານໍ ອຸປຣູປຣິປສາທຠາວາຍ. ສທ຺ຘມ຺ມຏ຺ຐິຕິຍາຕິ ສທ຺ຘມ຺ມສ຺ສ ຈິຣຏ຺ຐິຕຕ຺ຖໍ. ວິນຍານຸຄ຺ຄຫາຍາຕິ ປຎ຺ຈວິຘສ຺ສາປິ ວິນຍສ຺ສ ອນຸຄ຺ຄຓ຺ຫນຕ຺ຖາຍ.

໒໐໒-໒໓໐. ປາຕິໂມກ຺ຂໍ ປຎ຺ຎຕ຺ຕນ຺ຕິ ຠິກ຺ຂຸປາຕິໂມກ຺ຂໍ ຠິກ຺ຂຸນິປາຕິໂມກ຺ຂນ຺ຕິ ທຸວິຘໍ ປາຕິໂມກ຺ຂໍ ປຎ຺ຎຕ຺ຕໍ. ປາຕິໂມກ຺ຂຸທ຺ເທໂສຕິ ຠິກ຺ຂູນໍ ປຎ຺ຈ, ຠິກ຺ຂຸນີນໍ ຈຕ຺ຕາໂຣຕິ ນວ ປາຕິໂມກ຺ຂຸທ຺ເທສາ ປຎ຺ຎຕ຺ຕາ. ປາຕິໂມກ຺ຂຏ຺ຐປນນ຺ຕິ ອຸໂປສຖຏ຺ຐປນໍ. ປວາຣຓາ ປຎ຺ຎຕ຺ຕາຕິ ຈາຕຸທ຺ທສິກາ ປນ຺ນຣສິກາຕິ ທ຺ເວ ປວາຣຓາ ປຎ຺ຎຕ຺ຕາ. ປວາຣຓຏ຺ຐປນໍ ປຎ຺ຎຕ຺ຕນ຺ຕິ ສາປຕ຺ຕິກສ຺ສ ຠິກ຺ຂຸໂນ ປວາຣຓາ ອຸຕ຺ຕິຍາ ວຕ຺ຕມານາຍ ປວາຣຓຏ຺ຐປນໍ ປຎ຺ຎຕ຺ຕໍ. ຕຊ຺ຊນີຍກມ຺ມາທີສຸ ຠິກ຺ຂູ ວາຈາສຕ຺ຕີຫິ ວິຕຸທນ຺ຕານໍ ປຓ຺ຑຸກໂລຫິຕການໍ ຠິກ຺ຂູນໍ ຕຊ຺ຊນີຍກມ຺ມໍ (ຈູຬວ. ໑ ອາທໂຍ) ປຎ຺ຎຕ຺ຕໍ. ພາລສ຺ສ ອພ຺ຍຕ຺ຕສ຺ສ ເສຍ຺ຍສກສ຺ສ ຠິກ຺ຂຸໂນ ນິຍສ຺ສກມ຺ມໍ ປຎ຺ຎຕ຺ຕໍ. ກຸລທູສເກ ອສ຺ສຊິປຸນພ຺ພສຸເກ ຠິກ຺ຂູ ອາຣພ຺ຠ ປພ຺ພາຊນີຍກມ຺ມໍ (ຈູຬວ. ໒໑ ອາທໂຍ) ປຎ຺ຎຕ຺ຕໍ. ຄິຫີນໍ ອກ຺ໂກສກສ຺ສ ສຸຘມ຺ມຕ຺ເຖຣສ຺ສ ປຏິສາຣຓີຍກມ຺ມໍ (ຈູຬວ. ໓໓ ອາທໂຍ) ປຎ຺ຎຕ຺ຕໍ. ອາປຕ຺ຕິຍາ ອທສ຺ສນາທີສຸ ອຸກ຺ເຂປນີຍກມ຺ມໍ ປຎ຺ຎຕ຺ຕໍ. ຄຣຸກາປຕ຺ຕິໍ ອາປນ຺ນສ຺ສ ປຏິຈ຺ຉນ຺ນາຍ ອາປຕ຺ຕິຍາ ປຣິວາສທານໍ ປຎ຺ຎຕ຺ຕໍ. ປຣິວາເສ ອນ຺ຕຣາປຕ຺ຕິໍ ອາປນ຺ນສ຺ສ ມູລາຍ ປຏິກສ຺ສນໍ ປຎ຺ຎຕ຺ຕໍ. ປຏິຈ຺ຉນ຺ນາຍປິ ອປ຺ປຏິຈ຺ຉນ຺ນາຍປິ ອາປຕ຺ຕິຍາ ມານຕ຺ຕທານໍ ປຎ຺ຎຕ຺ຕໍ. ຈິຓ຺ຓມານຕ຺ຕສ຺ສ ອພ຺ຠານໍ ປຎ຺ຎຕ຺ຕໍ. ສມ຺ມາ ວຕ຺ຕນ຺ຕສ຺ສ ໂອສາຣຓີຍໍ ປຎ຺ຎຕ຺ຕໍ. ອສມ຺ມາວຕ຺ຕນາທີສຸ ນິສ຺ສາຣຓີຍໍ ປຎ຺ຎຕ຺ຕໍ.

ເອຫິຠິກ຺ຂູປສມ຺ປທາ ສຣຓຄມນູປສມ຺ປທາ ໂອວາທູປສມ຺ປທາ ປຎ຺ຫາພ຺ຍາກຣຓູປສມ຺ປທາ ຎຕ຺ຕິຈຕຸຕ຺ຖກມ຺ມູປສມ຺ປທາ ຄຣຸຘມ຺ມູປສມ຺ປທາ ອຸຠໂຕສງ຺ເຆ ອຸປສມ຺ປທາ ທູເຕນ ອຸປສມ຺ປທາຕິ ອຏ຺ຐວິຘາ ອຸປສມ຺ປທາ ປຎ຺ຎຕ຺ຕາ. ຎຕ຺ຕິກມ຺ມໍ ນວ ຐານານິ ຄຈ຺ຉຕີຕິ ເອວໍ ນວຏ຺ຐານິກໍ ຎຕ຺ຕິກມ຺ມໍ ປຎ຺ຎຕ຺ຕໍ. ຎຕ຺ຕິທຸຕິຍກມ຺ມໍ ສຕ຺ຕ ຐານານິ ຄຈ຺ຉຕີຕິ ເອວໍ ສຕ຺ຕຏ຺ຐານິກເມວ ຎຕ຺ຕິທຸຕິຍກມ຺ມໍ ປຎ຺ຎຕ຺ຕໍ. ຎຕ຺ຕິຈຕຸຕ຺ຖກມ຺ມໍ ສຕ຺ຕ ຐານານິ ຄຈ຺ຉຕີຕິ ເອວໍ ສຕ຺ຕຏ຺ຐານິກເມວ ຎຕ຺ຕິຈຕຸຕ຺ຖກມ຺ມໍ ປຎ຺ຎຕ຺ຕໍ. ປຐມປາຣາຊິກາທີນໍ ປຐມປຎ຺ຎຕ຺ຕິ ອປຎ຺ຎຕ຺ເຕ ປຎ຺ຎຕ຺ຕໍ. ເຕສໍເຍວ ອນຸປຎ຺ຎຕ຺ຕິ ປຎ຺ຎຕ຺ເຕ ອນຸປຎ຺ຎຕ຺ຕໍ. ຘມ຺ມສມ຺ມຸຂຕາ ວິນຍສມ຺ມຸຂຕາ ສງ຺ຆສມ຺ມຸຂຕາ ປຸຄ຺ຄລສມ຺ມຸຂຕາຕິ ອິມສ຺ສ ຈຕຸພ຺ພິຘສ຺ສ ສມ຺ມຸຂີຠາວສ຺ສ ວເສນ ສມ຺ມຸຂາວິນໂຍ ປຎ຺ຎຕ຺ໂຕ. ສຕິເວປຸລ຺ລປ຺ປຕ຺ຕສ຺ສ ຂີຓາສວສ຺ສ ອໂຈທນຕ຺ຖາຍ ສຕິວິນໂຍ ປຎ຺ຎຕ຺ໂຕ. ອຸມ຺ມຕ຺ຕກສ຺ສ ຠິກ຺ຂຸໂນ ອມູຬ຺ຫວິນໂຍ ປຎ຺ຎຕ຺ໂຕ. ອປ຺ປຏິຎ຺ຎາຍ ຈຸທິຕກສ຺ສ ອາປຕ຺ຕິຍາ ອຕຣຓຕ຺ຖໍ ປຏິຎ຺ຎາຕກຣຓໍ ປຎ຺ຎຕ຺ຕໍ. ພຫຸຕຣານໍ ຘມ຺ມວາທີນໍ ລທ຺ຘິໍ ຄເຫຕ຺ວາ ອຘິກຣຓວູປສມນຕ຺ຖໍ. ເຍຠຸຍ຺ຍສິກາ ປຎ຺ຎຕ຺ຕາ. ປາປຸສ຺ສນ຺ນສ຺ສ ປຸຄ຺ຄລສ຺ສ ນິຄ຺ຄຓ຺ຫນຕ຺ຖໍ ຕສ຺ສປາປິຍສິກາ ປຎ຺ຎຕ຺ຕາ. ຠຓ຺ຑນາທິວເສນ ພຫຸໍ ອສ຺ສາມຓກໍ ກຕ຺ວາ ອາປຕ຺ຕິໍ ອາປນ຺ນານໍ ຠິກ຺ຂູນໍ ຐເປຕ຺ວາ ຖຸລ຺ລວຊ຺ຊໍ ຐເປຕ຺ວາ ຄິຫິປຏິສໍຍຸຕ຺ຕຎ຺ຈ ອວເສສາປຕ຺ຕີນໍ ວູປສມນຕ຺ຖາຍ ຕິຓວຕ຺ຖາຣໂກ ປຎ຺ຎຕ຺ໂຕ.

ວິນຍເປຍ຺ຍາລໍ ນິຏ຺ຐິຕໍ.