໒. ທຸຕິຍປຓ຺ຓາສກໍ

(໖) ໑. ປຸຄ຺ຄລວຄ຺ຄວຓ຺ຓນາ

໕໓. ທຸຕິຍປຓ຺ຓາສກສ຺ສ ປຐເມ ຈກ຺ກວຕ຺ຕິນາ ສທ຺ຘິໍ ຄຫິຕຕ຺ຕາ ‘‘ໂລການຸກມ຺ປາຍາ’’ຕິ ນ ວຸຕ຺ຕໍ. ເອຕ຺ຖ ຈ ຈກ຺ກວຕ຺ຕິໂນ ອຸປ຺ປຕ຺ຕິຍາ ທ຺ເວ ສມ຺ປຕ຺ຕິໂຍ ລຠນ຺ຕິ, ພຸທ຺ຘານໍ ອຸປ຺ປຕ຺ຕິຍາ ຕິສ຺ໂສປິ.

໕໔. ທຸຕິເຍ ອຈ຺ຉຣິຍມນຸສ຺ສາຕິ ອາຈິຓ຺ຓມນຸສ຺ສາ ອພ຺ຠຸຕມນຸສ຺ສາ.

໕໕. ຕຕິເຍ ພຫຸໂນ ຊນສ຺ສ ອນຸຕປ຺ປາ ໂຫຕີຕິ ມຫາຊນສ຺ສ ອນຸຕາປກາຣີ ໂຫຕິ. ຕຕ຺ຖ ຈກ຺ກວຕ຺ຕິໂນ ກາລກິຣິຍາ ເອກຈກ຺ກວາເຬ ເທວມນຸສ຺ສານໍ ອນຸຕາປໍ ກໂຣຕິ, ຕຖາຄຕສ຺ສ ກາລກິຣິຍາ ທສສຸ ຈກ຺ກວາຬສຫສ຺ເສສຸ.

໕໖. ຈຕຸຕ຺ເຖ ຖູປາຣຫາຕິ ຖູປສ຺ສ ຍຸຕ຺ຕາ ອນຸຈ຺ຉວິກາ. ຈກ຺ກວຕ຺ຕິໂນ ຫິ ເຈຕິຍໍ ປຏິຊຄ຺ຄິຕ຺ວາ ທ຺ເວ ສມ຺ປຕ຺ຕິໂຍ ລຠນ຺ຕິ, ພຸທ຺ຘານໍ ເຈຕິຍໍ ປຏິຊຄ຺ຄິຕ຺ວາ ຕິສ຺ໂສປິ.

໕໗. ປຎ຺ຈເມ ພຸທ຺ຘາຕິ ອຕ຺ຕໂນ ອານຸຠາເວນ ຈຕ຺ຕາຣິ ສຈ຺ຈານິ ພຸທ຺ຘາ.

໕໘. ຉຏ຺ເຐ ຜລນ຺ຕິຍາຕິ ສທ຺ທໍ ກໂຣນ຺ຕິຍາ. ນ ສນ຺ຕສນ຺ຕີຕິ ນ ຠາຍນ຺ຕິ. ຕຕ຺ຖ ຂີຓາສໂວ ອຕ຺ຕໂນ ສກ຺ກາຍທິຏ຺ຐິຍາ ປຫີນຕ຺ຕາ ນ ຠາຍຕິ, ຫຕ຺ຖາຊານີໂຍ ສກ຺ກາຍທິຏ຺ຐິຍາ ພລວຕ຺ຕາຕິ. ສຕ຺ຕມຏ຺ຐເມສຸປິ ເອເສວ ນໂຍ.

໖໑. ນວເມ ກິໍປຸຣິສາຕິ ກິນ຺ນຣາ. ມານຸສິໍ ວາຈໍ ນ ຠາສນ຺ຕີຕິ ມນຸສ຺ສກຖໍ ນ ກເຖນ຺ຕິ. ຘມ຺ມາໂສກສ຺ສ ກິຣ ເອກໍ ກິນ຺ນຣໍ ອາເນຕ຺ວາ ທສ຺ເສສຸໍ. ໂສ ‘‘ກຖາເປຖ ນ’’ນ຺ຕິ ອາຫ. ກິນ຺ນໂຣ ກເຖຕຸໍ ນ ອິຈ຺ຉຕິ. ເອໂກ ປຸຣິໂສ ‘‘ອຫເມຕໍ ກຖາເປສ຺ສາມີ’’ຕິ ເຫຏ຺ຐາປາສາທໍ ໂອຕາເຣຕ຺ວາ ທ຺ເວ ຂາຓຸເກ ໂກຏ຺ເຏຕ຺ວາ ອຸກ຺ຂລິໍ ອາໂຣເປສິ. ສາ ອຸຠໂຕປສ຺ເສຫິ ປຕຕິ. ຕໍ ທິສ຺ວາ ກິນ຺ນໂຣ ‘‘ກິໍ ອຎ຺ຎໍ ເອກໍ ຂາຓຸກໍ ໂກຏ຺ເຏຕຸໍ ນ ວຏ຺ຏຕີ’’ຕິ ເອຕ຺ຕກເມວ ອາຫ. ປຸນ ອປຣຠາເຄ ທ຺ເວ ກິນ຺ນເຣ ອາເນຕ຺ວາ ທສ຺ເສສຸໍ. ຣາຊາ ‘‘ກຖາເປຖ ເນ’’ຕິ ອາຫ. ເຕ ກເຖຕຸໍ ນ ອິຈ຺ຉິໍສຸ. ເອໂກ ປຸຣິໂສ ‘‘ອຫເມເຕ ກຖາເປສ຺ສາມີ’’ຕິ ເຕ ຄເຫຕ຺ວາ ອນ຺ຕຣາປຓໍ ອຄມາສິ. ຕຕ຺ເຖໂກ ອມ຺ພປກ຺ກຎ຺ຈ ມຈ຺ເຉ ຈ ອທ຺ທສ, ເອໂກ ກພິຏ຺ຐຜລຎ຺ຈ ອມ຺ພິລິກາຜລຎ຺ຈ. ຕຕ຺ຖ ປຸຣິໂມ ‘‘ມຫາວິສໍ ມນຸສ຺ສາ ຂາທນ຺ຕິ, ກຖໍ ເຕ ກິລາສິໂນ ນ ໂຫນ຺ຕີ’’ຕິ ອາຫ. ອິຕໂຣ ‘‘ກຖໍ ອິເມ ເອຕໍ ນິສ຺ສາຍ ກຸຏ຺ຐິໂນ ນ ໂຫນ຺ຕີ’’ຕິ ອາຫ. ເອວໍ ມານຸສິໍ ວາຈໍ ກເຖຕຸໍ ສກ຺ໂກນ຺ຕາປິ ທ຺ເວ ອຕ຺ເຖ ສມ຺ປສ຺ສມານາ ນ ກເຖນ຺ຕີຕິ.

໖໒. ທສເມ ອປ຺ປຏິວາໂນຕິ ອນຸກຓ຺ຐິໂຕ ອປຈ຺ໂຈສກ຺ກິໂຕ.

໖໓. ເອກາທສເມ ອສນ຺ຕສນ຺ນິວາສນ຺ຕິ ອສປ຺ປຸຣິສານໍ ສນ຺ນິວາສໍ. ນ ວເທຍ຺ຍາຕິ ໂອວາເທນ ວາ ອນຸສາສນິຍາ ວາ ນ ວເທຍ຺ຍ, ມາ ວທຕູຕິ ອຕ຺ໂຖ. ເຖຣມ຺ປາຫໍ ນ ວເທຍ຺ຍນ຺ຕິ ອຫມ຺ປິ ເຖຣໍ ຠິກ຺ຂຸໍ ໂອວາທານຸສາສນິວເສນ ນ ວເທຍ຺ຍໍ. ອຫິຕານຸກມ຺ປີຕິ ອຫິຕໍ ອິຈ຺ຉມາໂນ. ໂນ ຫິຕານຸກມ຺ປີຕິ ຫິຕໍ ອນິຈ຺ຉມາໂນ. ໂນຕິ ນໍ ວເທຍ຺ຍນ຺ຕິ ‘‘ອຫໍ ຕວ ວຈນໍ ນ ກຣິສ຺ສ’’ນ຺ຕິ ນໍ ວເທຍ຺ຍໍ. ວິເຫເຐຍ຺ຍນ຺ຕິ ວຈນສ຺ສ ອກຣເຓນ ວິເຫເຐຍ຺ຍໍ. ປສ຺ສມ຺ປິສ຺ສ ນປ຺ປຏິກເຣຍ຺ຍນ຺ຕິ ປສ຺ສນ຺ໂຕປິ ຊານນ຺ໂຕປິ ອຫໍ ຕສ຺ສ ວຈນໍ ນ ກເຣຍ຺ຍໍ. ອິມິນາ ອຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ສຸກ຺ກປກ຺ເຂ ປນ ສາຘູຕິ ນໍ ວເທຍ຺ຍນ຺ຕິ ‘‘ສາຘຸ ຠທ຺ທກໍ ສຸກຖິຕໍ ຕຍາ’’ຕິ ຕສ຺ສ ກຖໍ ອຠິນນ຺ທນ຺ໂຕ ນໍ ວເທຍ຺ຍນ຺ຕິ ອຕ຺ໂຖ.

໖໔. ທ຺ວາທສເມ ອຸຠໂຕ ວຈີສໍສາໂຣຕິ ທ຺ວີສຸປິ ປກ຺ເຂສຸ ອຎ຺ຎມຎ຺ຎໍ ອກ຺ໂກສນປຈ຺ຈກ຺ໂກສນວເສນ ສໍສຣມານາ ວາຈາ ວຈີສໍສາໂຣ. ທິຏ຺ຐິປຬາໂສຕິ ທິຏ຺ຐິໍ ນິສ຺ສາຍ ອຸປ຺ປຊ຺ຊນໂກ ຍຸຄຄ຺ຄາຫລກ຺ຂໂຓ ປຬາໂສ ທິຏ຺ຐິປຬາໂສ ນາມ. ເຈຕໂສ ອາຆາໂຕຕິ ໂກໂປ. ໂສ ຫິ ຈິຕ຺ຕໍ ອາຆາເຕນ຺ໂຕ ອຸປ຺ປຊ຺ຊຕິ. ອປ຺ປຈ຺ຈໂຍຕິ ອຕຸຏ຺ຐາກາໂຣ, ໂທມນສ຺ສນ຺ຕິ ອຕ຺ໂຖ. ອນຠິຣທ຺ຘີຕິ ໂກໂປເຍວ. ໂສ ຫິ ອນຠິຣາຘນວເສນ ອນຠິຣທ຺ຘີຕິ ວຸຈ຺ຈຕິ. ອຊ຺ຌຕ຺ຕໍ ອວູປສນ຺ຕໍ ໂຫຕີຕິ ສພ຺ພມ຺ເປຕໍ ນິຍກຊ຺ຌຕ຺ຕສງ຺ຂາເຕ ອຕ຺ຕໂນ ຈິຕ຺ເຕ ຈ ສທ຺ຘິວິຫາຣິກອນ຺ເຕວາສິກສງ຺ຂາຕາຍ ອຕ຺ຕໂນ ປຣິສາຍ ຈ ອວູປສນ຺ຕໍ ໂຫຕິ. ຕສ຺ເມຕນ຺ຕິ ຕສ຺ມິໍ ເອຕໍ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ.

ປຸຄ຺ຄລວຄ຺ໂຄ ປຐໂມ.

(໗) ໒. ສຸຂວຄ຺ຄວຓ຺ຓນາ

໖໕. ທຸຕິຍສ຺ສ ປຐເມ ຄິຫິສຸຂນ຺ຕິ ຄິຫີນໍ ສພ຺ພກາມນິປ຺ຜຕ຺ຕິມູລກໍ ສຸຂໍ. ປພ຺ພຊິຕສຸຂນ຺ຕິ ປພ຺ພຊິຕານໍ ປພ຺ພຊ຺ຊາມູລກໍ ສຸຂໍ.

໖໖. ທຸຕິເຍ ກາມສຸຂນ຺ຕິ ກາເມ ອາຣພ຺ຠ ອຸປ຺ປຊ຺ຊນກສຸຂໍ. ເນກ຺ຂມ຺ມສຸຂນ຺ຕິ ເນກ຺ຂມ຺ມໍ ວຸຈ຺ຈຕິ ປພ຺ພຊ຺ຊາ, ຕໍ ອາຣພ຺ຠ ອຸປ຺ປຊ຺ຊນກສຸຂໍ.

໖໗. ຕຕິເຍ ອຸປຘິສຸຂນ຺ຕິ ເຕຠູມກສຸຂໍ. ນິຣຸປຘິສຸຂນ຺ຕິ ໂລກຸຕ຺ຕຣສຸຂໍ.

໖໘. ຈຕຸຕ຺ເຖ ສາສວສຸຂນ຺ຕິ ອາສວານໍ ປຈ຺ຈຍຠູຕໍ ວຏ຺ຏສຸຂໍ. ອນາສວສຸຂນ຺ຕິ ເຕສໍ ອປຈ຺ຈຍຠູຕໍ ວິວຏ຺ຏສຸຂໍ.

໖໙. ປຎ຺ຈເມ ສາມິສນ຺ຕິ ສໍກິເລສໍ ວຏ຺ຏຄາມິສຸຂໍ. ນິຣາມິສນ຺ຕິ ນິກ຺ກິເລສໍ ວິວຏ຺ຏຄາມິສຸຂໍ.

໗໐. ຉຏ຺ເຐ ອຣິຍສຸຂນ຺ຕິ ອປຸຖຸຊ຺ຊນສຸຂໍ. ອນຣິຍສຸຂນ຺ຕິ ປຸຖຸຊ຺ຊນສຸຂໍ.

໗໑. ສຕ຺ຕເມ ກາຍິກນ຺ຕິ ກາຍວິຎ຺ຎາຓສຫຊາຕໍ. ເຈຕສິກນ຺ຕິ ມໂນທ຺ວາຣິກສຸຂໍ. ຕໍ ໂລກິຍໂລກຸຕ຺ຕຣມິສ຺ສກໍ ກຖິຕໍ.

໗໒. ອຏ຺ຐເມ ສປ຺ປີຕິກນ຺ຕິ ປຐມທຸຕິຍຊ຺ຌານສຸຂໍ. ນິປ຺ປີຕິກນ຺ຕິ ຕຕິຍຈຕຸຕ຺ຖຊ຺ຌານສຸຂໍ. ຕຕ຺ຖ ໂລກິຍສປ຺ປີຕິກໂຕ ໂລກິຍນິປ຺ປີຕິກໍ, ໂລກຸຕ຺ຕຣສປ຺ປີຕິກໂຕ ຈ ໂລກຸຕ຺ຕຣນິປ຺ປີຕິກໍ ອຄ຺ຄນ຺ຕິ ເອວໍ ຠຸມ຺ມນ຺ຕຣໍ ອຠິນ຺ທິຕ຺ວາ ອຄ຺ຄຠາໂວ ເວທິຕພ຺ໂພ.

໗໓. ນວເມ ສາຕສຸຂນ຺ຕິ ຕີສຸ ຌາເນສຸ ສຸຂໍ. ອຸເປກ຺ຂາສຸຂນ຺ຕິ ຈຕຸຕ຺ຖຊ຺ຌານສຸຂໍ.

໗໔. ທສເມ ສມາຘິສຸຂນ຺ຕິ ອປ຺ປນໍ ວາ ອຸປຈາຣໍ ວາ ປຕ຺ຕສຸຂໍ. ອສມາຘິສຸຂນ຺ຕິ ຕທຸຠຍໍ ອປ຺ປຕ຺ຕສຸຂໍ.

໗໕. ເອກາທສເມ ສປ຺ປີຕິກາຣມ຺ມຓນ຺ຕິ ສປ຺ປີຕິກໍ ຌານທ຺ວຍໍ ປຈ຺ຈເວກ຺ຂນ຺ຕສ຺ສ ອຸປ຺ປນ຺ນສຸຂໍ. ນິປ຺ປີຕິກາຣມ຺ມເຓປິ ເອເສວ ນໂຍ. ທ຺ວາທສເມປິ ອິມິນາວ ອຸປາເຍນ ອຕ຺ໂຖ ເວທິຕພ຺ໂພ.

໗໗. ເຕຣສເມ ຣູປາຣມ຺ມຓນ຺ຕິ ຣູປາວຈຣຈຕຸຕ຺ຖຊ຺ຌານາຣມ຺ມຓໍ, ຍໍກິຎ຺ຈິ ຣູປໍ ອາຣພ຺ຠ ອຸປ຺ປຊ຺ຊນກໍ ວາ. ອຣູປາຣມ຺ມຓນ຺ຕິ ອຣູປາວຈຣຊ຺ຌານາຣມ຺ມຓໍ, ຍໍກິຎ຺ຈິ ອຣູປໍ ອາຣພ຺ຠ ອຸປ຺ປຊ຺ຊນກໍ ວາຕິ.

ສຸຂວຄ຺ໂຄ ທຸຕິໂຍ.

(໘) ໓. ສນິມິຕ຺ຕວຄ຺ຄວຓ຺ຓນາ

໗໘-໗໙. ຕຕິຍສ຺ສ ປຐເມ ສນິມິຕ຺ຕາຕິ ສກາຣຓາ. ທຸຕິຍາທີສຸປິ ເອເສວ ນໂຍ. ນິທານໍ ເຫຕຸ ສງ຺ຂາໂຣ ປຈ຺ຈໂຍ ຣູປນ຺ຕິ ສພ຺ພານິປິ ຫິ ເອຕານິ ກາຣຓເວວຈນາເນວ.

໘໔. ສຕ຺ຕເມ ສເວທນາຕິ ປຈ຺ຈຍຠູຕາຍ ສມ຺ປຍຸຕ຺ຕເວທນາຍ ສຕິເຍວ ອຸປ຺ປຊ຺ຊນ຺ຕິ, ນາສຕີຕິ ອຕ຺ໂຖ. ອຏ຺ຐມນວເມສຸປິ ເອເສວ ນໂຍ.

໘໗. ທສເມ ສງ຺ຂຕາຣມ຺ມຓາຕິ ປຈ຺ຈຍນິພ຺ພຕ຺ຕໍ ສງ຺ຂຕຘມ຺ມໍ ອາຣມ຺ມຓໍ ກຕ຺ວາວ ອຸປ຺ປຊ຺ຊນ຺ຕິ. ໂນ ອສງ຺ຂຕາຣມ຺ມຓາຕິ ອສງ຺ຂຕໍ ປນ ນິພ຺ພານໍ ອາຣພ຺ຠ ນ ອຸປ຺ປຊ຺ຊນ຺ຕິ. ນ ໂຫນ຺ຕີຕິ ມຄ຺ຄກ຺ຂເຓ ນ ໂຫນ຺ຕິ ນາມ, ຜເລ ປຕ຺ເຕ ນາເຫສຸນ຺ຕິ. ເອວເມເຕສຸ ທສສຸປິ ຐາເນສຸ ຍາວ ອຣຫຕ຺ຕາ ເທສນາ ເທສິຕາຕິ.

ສນິມິຕ຺ຕວຄ຺ໂຄ ຕຕິໂຍ.

(໙) ໔. ຘມ຺ມວຄ຺ຄວຓ຺ຓນາ

໘໘. ຈຕຸຕ຺ຖສ຺ສ ປຐເມ ເຈໂຕວິມຸຕ຺ຕີຕິ ຜລສມາຘິ. ປຎ຺ຎາວິມຸຕ຺ຕີຕິ ຜລປຎ຺ຎາ.

໘໙. ທຸຕິເຍ ປຄ຺ຄາໂຫຕິ ວີຣິຍໍ. ອວິກ຺ເຂໂປຕິ ຈິຕ຺ເຕກຄ຺ຄຕາ.

໙໐. ຕຕິເຍ ນາມນ຺ຕິ ຈຕ຺ຕາໂຣ ອຣູປກ຺ຂນ຺ຘາ. ຣູປນ຺ຕິ ຣູປກ຺ຂນ຺ໂຘ. ອິຕິ ອິມສ຺ມິໍ ສຸຕ຺ເຕ ຘມ຺ມໂກຏ຺ຐາສປຣິຈ຺ເຉທຎາຓໍ ນາມ ກຖິຕໍ.

໙໑. ຈຕຸຕ຺ເຖ ວິຊ຺ຊາຕິ ຜລຎາຓໍ. ວິມຸຕ຺ຕີຕິ ຕໍສມ຺ປຍຸຕ຺ຕາ ເສສຘມ຺ມາ.

໙໒. ປຎ຺ຈເມ ຠວທິຏ຺ຐີຕິ ສສ຺ສຕທິຏ຺ຐິ. ວິຠວທິຏ຺ຐີຕິ ອຸຈ຺ເຉທທິຏ຺ຐິ. ຉຏ຺ຐສຕ຺ຕມານິ ອຸຕ຺ຕານຕ຺ຖາເນວ.

໙໕. ອຏ຺ຐເມ ໂທວຈສ຺ສຕາຕິ ທຸພ຺ພຈຠາໂວ. ປາປມິຕ຺ຕຕາຕິ ປາປມິຕ຺ຕເສວນຠາໂວ. ນວມໍ ວຸຕ຺ຕວິປຣິຍາເຍນ ເວທິຕພ຺ພໍ.

໙໗. ທສເມ ຘາຕຸກຸສລຕາຕິ ອຏ຺ຐາຣສ ຘາຕຸໂຍ ຘາຕູຕິ ຊານນໍ. ມນສິກາຣກຸສລຕາຕິ ຕາສໍເຍວ ຘາຕູນໍ ອນິຈ຺ຈາທິວເສນ ລກ຺ຂຓຕ຺ຕຍໍ ອາໂຣເປຕ຺ວາ ຊານນໍ.

໙໘. ເອກາທສເມ ອາປຕ຺ຕິກຸສລຕາຕິ ປຎ຺ຈນ຺ນຎ຺ຈ ສຕ຺ຕນ຺ນຎ຺ຈ ອາປຕ຺ຕິກ຺ຂນ຺ຘານໍ ຊານນໍ. ອາປຕ຺ຕິວຸຏ຺ຐານກຸສລຕາຕິ ເທສນາຍ ວາ ກມ຺ມວາຈາຍ ວາ ອາປຕ຺ຕີຫິ ວຸຏ຺ຐານຊານນນ຺ຕິ.

ຘມ຺ມວຄ຺ໂຄ ຈຕຸຕ຺ໂຖ.

(໑໐) ໕. ພາລວຄ຺ຄວຓ຺ຓນາ

໙໙. ປຎ຺ຈມສ຺ສ ປຐເມ ອນາຄຕໍ ຠາຣໍ ວຫຕີຕິ ‘‘ສມ຺ມຊ຺ຊນີ ປທີໂປ ຈ, ອຸທກໍ ອາສເນນ ຈ, ຉນ຺ທປາຣິສຸທ຺ຘິອຸຕຸກ຺ຂານໍ, ຠິກ຺ຂຸຄຓນາ ຈ ໂອວາໂທ, ປາຕິໂມກ຺ຂໍ ເຖຣຠາໂຣຕິ ວຸຈ຺ຈຕີ’’ຕິ ອິມໍ ທສວິຘໍ ເຖຣຠາຣໍ ນວໂກ ຫຸຕ຺ວາ ເຖເຣນ ອນຊ຺ຌິຏ຺ໂຐ ກໂຣນ຺ໂຕ ອນາຄຕໍ ຠາຣໍ ວຫຕິ ນາມ. ອາຄຕໍ ຠາຣໍ ນ ວຫຕີຕິ ເຖໂຣ ສມາໂນ ຕເມວ ທສວິຘໍ ຠາຣໍ ອຕ຺ຕນາ ວາ ອກໂຣນ຺ໂຕ ປຣໍ ວາ ອສມາທເປນ຺ໂຕ ອາຄຕໍ ຠາຣໍ ນ ວຫຕິ ນາມ. ທຸຕິຍສຸຕ຺ເຕປິ ອິມິນາວ ນເຍນ ອຕ຺ໂຖ ເວທິຕພ຺ໂພ.

໑໐໑. ຕຕິເຍ ອກປ຺ປິເຍ ກປ຺ປິຍສຎ຺ຎີຕິ ອກປ຺ປິເຍ ສີຫມໍສາທິມ຺ຫິ ‘‘ກປ຺ປິຍໍ ອິທ’’ນ຺ຕິ ເອວໍສຎ຺ຎີ. ກປ຺ປິເຍ ອກປ຺ປິຍສຎ຺ຎີຕິ ກຸມ຺ຠີລມໍສພິຬາຣມໍສາທິມ຺ຫິ ກປ຺ປິເຍ ‘‘ອກປ຺ປິຍໍ ອິທ’’ນ຺ຕິ ເອວໍສຎ຺ຎີ. ຈຕຸຕ຺ຖໍ ວຸຕ຺ຕນເຍເນວ ເວທິຕພ຺ພໍ.

໑໐໓. ປຎ຺ຈເມ ອນາປຕ຺ຕິຍາ ອາປຕ຺ຕິສຎ຺ຎີຕິ ອາປຸຈ຺ຉິຕ຺ວາ ຠຓ຺ຑກໍ ໂຘວນ຺ຕສ຺ສ, ປຕ຺ຕໍ ປຈນ຺ຕສ຺ສ, ເກເສ ຉິນ຺ທນ຺ຕສ຺ສ, ຄາມໍ ປວິສນ຺ຕສ຺ສາຕິອາທີສຸ ອນາປຕ຺ຕິ, ຕຕ຺ຖ ‘‘ອາປຕ຺ຕິ ອຍ’’ນ຺ຕິ ເອວໍສຎ຺ຎີ. ອາປຕ຺ຕິຍາ ອນາປຕ຺ຕິສຎ຺ຎີຕິ ເຕສຎ຺ເຎວ ວຕ຺ຖູນໍ ອນາປຸຈ຺ຉາກຣເຓ ອາປຕ຺ຕິ, ຕຕ຺ຖ ‘‘ອນາປຕ຺ຕີ’’ຕິ ເອວໍສຎ຺ຎີ. ຉຏ຺ເຐປິ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ສຕ຺ຕມາທີນິ ອຸຕ຺ຕານຕ຺ຖາເນວ.

໑໐໙. ເອກາທສເມ ອາສວາຕິ ກິເລສາ. ນ ກຸກ຺ກຸຈ຺ຈາຍິຕພ຺ພນ຺ຕິ ສງ຺ຆໂຠຄສ຺ສ ອປຏ຺ຐປນໍ ອວິຈາຣຓໍ ນ ກຸກ຺ກຸຈ຺ຈາຍິຕພ຺ພໍ ນາມ, ຕໍ ກຸກ຺ກຸຈ຺ຈາຍຕິ. ກຸກ຺ກຸຈ຺ຈາຍິຕພ຺ພນ຺ຕິ ຕສ຺ເສວ ປຏ຺ຐປນໍ ວິຈາຣຓໍ, ຕໍ ນ ກຸກ຺ກຸຈ຺ຈາຍຕິ. ທ຺ວາທສມາທີນິ ເຫຏ຺ຐາ ວຸຕ຺ຕນເຍເນວ ເວທິຕພ຺ພານີຕິ.

ພາລວຄ຺ໂຄ ປຎ຺ຈໂມ.

ທຸຕິຍປຓ຺ຓາສກໍ ນິຏ຺ຐິຕໍ.