໓. ຕຕິຍປຓ຺ຓາສກໍ

(໑໑) ໑. ອາສາທຸປ຺ປຊຫວຄ຺ຄວຓ຺ຓນາ

໑໑໙. ຕຕິຍສ຺ສ ປຓ຺ຓາສກສ຺ສ ປຐເມ ອາສາຕິ ຕຓ຺ຫາ. ທຸປ຺ປຊຫາຕິ ທຸຈ຺ຈຊາ ທຸນ຺ນີຫຣາ. ລາຠາສາຍ ທຸປ຺ປຊຫຠາເວນ ສຕ຺ຕາ ທສປິ ວສ຺ສານິ ວີສຕິປິ ສຏ຺ຐິປິ ວສ຺ສານິ ‘‘ອຊ຺ຊ ລຠິສ຺ສາມ, ສ຺ເວ ລຠິສ຺ສາມາ’’ຕິ ຣາຊານໍ ອຸປຏ຺ຐຫນ຺ຕິ, ກສິກມ຺ມາທີນິ ກໂຣນ຺ຕິ, ອຸຠໂຕພ຺ຍູຬ຺ຫໍ ສງ຺ຄາມໍ ປກ຺ຂນ຺ທນ຺ຕິ, ອຊປຖສງ຺ກຸປຖາທໂຍ ປຏິປຊ຺ຊນ຺ຕິ, ນາວາຍ ມຫາສມຸທ຺ທໍ ປວິສນ຺ຕິ. ຊີວິຕາສາຍ ທຸປ຺ປຊຫຕ຺ຕາ ສມ຺ປຕ຺ເຕ ມຣຓກາເລປິ ວສ຺ສສຕຊີວິໍ ອຕ຺ຕານໍ ມຎ຺ຎນ຺ຕິ. ໂສ ກມ຺ມກມ຺ມນິມິຕ຺ຕາທີນິ ປສ຺ສນ຺ໂຕປິ ‘‘ທານໍ ເທຫິ ປູຊໍ, ກໂຣຫີ’’ຕິ ອນຸກມ຺ປເກຫິ ວຸຈ຺ຈມາໂນ ‘‘ນາຫໍ ມຣິສ຺ສາມິ, ຊີວິສ຺ສາມິ’’ຈ຺ເຈວ ອາສາຍ ກສ຺ສຈິ ວຈນໍ ນ ຄຓ຺ຫາຕິ.

໑໒໐. ທຸຕິເຍ ປຸພ຺ພກາຣີຕິ ປຐມໍ ອຸປກາຣສ຺ສ ກາຣໂກ. ກຕຎ຺ຎູກຕເວທີຕິ ເຕນ ກຕໍ ຎຕ຺ວາ ປຈ຺ຉາ ກາຣໂກ. ເຕສຸ ປຸພ຺ພກາຣີ ‘‘ອິຓໍ ເທມີ’’ຕິ ສຎ຺ຎໍ ກໂຣຕິ, ປຈ຺ຉາ ກາຣໂກ ‘‘ອິຓໍ ຊີຣາເປມີ’’ຕິ ສຎ຺ຎໍ ກໂຣຕິ.

໑໒໑. ຕຕິເຍ ຕິຕ຺ໂຕ ຈ ຕປ຺ເປຕາ ຈາຕິ ປຈ຺ເຈກພຸທ຺ໂຘ ຈ ຕຖາຄຕສາວໂກ ຈ ຂີຓາສໂວ ຕິຕ຺ໂຕ ນາມ, ຕຖາຄໂຕ ອຣຫໍ ສມ຺ມາສມ຺ພຸທ຺ໂຘ ຕິຕ຺ໂຕ ຈ ຕປ຺ເປຕາ ຈ.

໑໒໒. ຈຕຸຕ຺ເຖ ທຸຕ຺ຕປ຺ປຍາຕິ ທາຍເກນ ທຸຕ຺ຕປ຺ປຍາ ຕປ຺ເປຕຸໍ ນ ສຸກຣາ. ນິກ຺ຂິປຕີຕິ ນິທຫຕິ ນ ປຣິຠຸຎ຺ຊຕິ. ວິສ຺ສຊ຺ເຊຕີຕິ ປເຣສໍ ເທຕິ.

໑໒໓. ປຎ຺ຈເມ ນ ວິສ຺ສຊ຺ເຊຕີຕິ ສພ຺ພໍເຍວ ປເຣສໍ ນ ເທຕິ, ອຕ຺ຕໂນ ປນ ຍາປນມຕ຺ຕໍ ຄເຫຕ຺ວາ ອວເສສໍ ເທຕິ.

໑໒໔. ຉຏ຺ເຐ ສຸຠນິມິຕ຺ຕນ຺ຕິ ອິຏ຺ຐາຣມ຺ມຓໍ.

໑໒໕. ສຕ຺ຕເມ ປຏິຆນິມິຕ຺ຕນ຺ຕິ ອນິຏ຺ຐນິມິຕ຺ຕໍ.

໑໒໖. ອຏ຺ຐເມ ປຣໂຕ ຈ ໂຆໂສຕິ ປຣສ຺ສ ສນ຺ຕິກາ ອສ຺ສທ຺ຘມ຺ມສວນໍ.

໑໒໗. ນວເມ ປຣໂຕ ຈ ໂຆໂສຕິ ປຣສ຺ສ ສນ຺ຕິກາ ສທ຺ຘມ຺ມສວນໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ອາສາທຸປ຺ປຊຫວຄ຺ໂຄ ປຐໂມ.

(໑໒) ໒. ອາຍາຈນວຄ຺ຄວຓ຺ຓນາ

໑໓໑. ທຸຕິຍສ຺ສ ປຐເມ ເອວໍ ສມ຺ມາ ອາຍາຈມາໂນ ອາຍາເຈຍ຺ຍາຕິ ສທ຺ໂຘ ຠິກ຺ຂຸ ອຸຏ຺ຐຫິຕ຺ວາ ‘‘ຍາທິໂສ ສາຣິປຸຕ຺ຕຕ຺ເຖໂຣ ປຎ຺ຎາຍ, ອຫມ຺ປິ ຕາທິໂສ ໂຫມິ. ຍາທິໂສ ມຫາໂມຄ຺ຄລ຺ລານຕ຺ເຖໂຣ ອິທ຺ຘິຍາ, ອຫມ຺ປິ ຕາທິໂສ ໂຫມີ’’ຕິ ເອວໍ ອາຍາຈນ຺ໂຕ ປິເຫນ຺ໂຕ ປຕ຺ເຖນ຺ໂຕ ຍໍ ອຕ຺ຖິ, ຕສ຺ເສວ ປຕ຺ຖິຕຕ຺ຕາ ສມ຺ມາ ປຕ຺ເຖຍ຺ຍ ນາມ. ອິໂຕ ອຸຕ຺ຕຣິ ປຕ຺ເຖນ຺ໂຕ ມິຈ຺ຉາ ປຕ຺ເຖຍ຺ຍ. ເອວຣູປາ ຫິ ປຕ຺ຖນາ ຍໍ ນຕ຺ຖິ, ຕສ຺ສ ປຕ຺ຖິຕຕ຺ຕາ ມິຈ຺ຉາປຕ຺ຖນາ ນາມ ໂຫຕິ. ກິໍ ກາຣຓາ? ເອສາ, ຠິກ຺ຂເວ, ຕຸລາ ເອຕໍ ປມາຓນ຺ຕິ ຍຖາ ຫິ ສຸວຓ຺ຓໍ ວາ ຫິຣຎ຺ຎໍ ວາ ຕຸເລນ຺ຕສ຺ສ ຕຸລາ ອິຈ຺ຉິຕພ຺ພາ, ຘຎ຺ຎໍ ມິນນ຺ຕສ຺ສ ມານນ຺ຕິ ຕຸລເນ ຕຸລາ, ມິນເນ ຈ ມານໍ ປມາຓໍ ໂຫຕິ, ເອວເມວ ມມ ສາວການໍ ຠິກ຺ຂູນໍ ເອສາ ຕຸລາ ເອຕໍ ປມາຓໍ ຍທິທໍ ສາຣິປຸຕ຺ຕໂມຄ຺ຄລ຺ລານາ. ເຕ ຄເຫຕ຺ວາ ‘‘ອຫມ຺ປິ ຎາເຓນ ວາ ອິທ຺ຘິຍາ ວາ ເອຕມ຺ປມາໂຓ ໂຫມີ’’ຕິ ອຕ຺ຕານໍ ຕຸເລຕຸໍ ວາ ປມາເຓຕຸໍ ວາ ສກ຺ກາ, ນ ອິໂຕ ອຎ຺ຎຖາ.

໑໓໒. ທຸຕິຍາທີສຸປິ ເອເສວ ນໂຍ. ອິທໍ ປເນຕ຺ຖ ວິເສສມຕ຺ຕໍ – ເຂມາ ຈ ຠິກ຺ຂຸນີ ອຸປ຺ປລວຓ຺ຓາ ຈາຕິ ເອຕາສຸ ຫິ ເຂມາ ປຎ຺ຎາຍ ອຄ຺ຄາ, ອຸປ຺ປລວຓ຺ຓາ ອິທ຺ຘິຍາ. ຕສ຺ມາ ‘‘ປຎ຺ຎາຍ ວາ ອິທ຺ຘິຍາ ວາ ເອຕາທິສີ ໂຫມີ’’ຕິ ສມ຺ມາ ອາຍາຈມານາ ອາຍາເຈຍ຺ຍ. ຕຖາ ຈິຕ຺ໂຕ ຄຫປຕິ ປຎ຺ຎາຍ ອຄ຺ໂຄ, ຫຕ຺ຖໂກ ຣາຊກຸມາໂຣ ມຫິທ຺ຘິກຕາຍ. ຕສ຺ມາ ‘‘ປຎ຺ຎາຍ ວາ ອິທ຺ຘິຍາ ວາ ເອທິໂສ ໂຫມີ’’ຕິ ສມ຺ມາ ອາຍາຈມາໂນ ອາຍາເຈຍ຺ຍ. ຂຸຊ຺ຊຸຕ຺ຕຣາປິ ມຫາປຎ຺ຎຕາຍ ອຄ຺ຄາ, ນນ຺ທມາຕາ ມຫິທ຺ຘິກຕາຍ. ຕສ຺ມາ ‘‘ປຎ຺ຎາຍ ວາ ອິທ຺ຘິຍາ ວາ ເອຕາທິສີ ໂຫມີ’’ຕິ ສມ຺ມາ ອາຍາຈມານາ ອາຍາເຈຍ຺ຍ.

໑໓໕. ປຎ຺ຈເມ ຂຕນ຺ຕິ ຄຸຓານໍ ຂຕຕ຺ຕາ ຂຕໍ. ອຸປຫຕນ຺ຕິ ຄຸຓານໍ ອຸປຫຕຕ຺ຕາ ອຸປຫຕໍ, ຉິນ຺ນຄຸຓໍ ນຏ຺ຐຄຸຓນ຺ຕິ ອຕ຺ໂຖ. ອຕ຺ຕານໍ ປຣິຫຣຕີຕິ ນິຄ຺ຄຸຓໍ ອຕ຺ຕານໍ ຊຄ຺ຄຕິ ໂຄປາຍຕິ. ສາວຊ຺ໂຊຕິ ສໂທໂສ. ສານຸວຊ຺ໂຊຕິ ສອຸປວາໂທ. ປສວຕີຕິ ປຏິລຠຕິ. ອນນຸວິຈ຺ຈາຕິ ອຊານິຕ຺ວາ ອວິນິຈ຺ຉິນິຕ຺ວາ. ອປຣິໂຍຄາເຫຕ຺ວາຕິ ອນນຸປວິສິຕ຺ວາ. ອວຓ຺ຓາຣຫສ຺ສາຕິ ອວຓ຺ຓຍຸຕ຺ຕສ຺ສ ມິຈ຺ຉາປຏິປນ຺ນສ຺ສ ຕິຕ຺ຖິຍສ຺ສ ວາ ຕິຕ຺ຖິຍສາວກສ຺ສ ວາ. ວຓ຺ຓໍ ຠາສຕີຕິ ‘‘ສຸປ຺ປຏິປນ຺ໂນ ເອສ ສມ຺ມາປຏິປນ຺ໂນ’’ຕິ ຄຸຓໍ ກເຖຕິ. ວຓ຺ຓາຣຫສ຺ສາຕິ ພຸທ຺ຘາທີສຸ ອຎ຺ຎຕຣສ຺ສ ສມ຺ມາປຏິປນ຺ນສ຺ສ. ອວຓ຺ຓໍ ຠາສຕີຕິ ‘‘ທຸປ຺ປຏິປນ຺ໂນ ເອສ ມິຈ຺ຉາປຏິປນ຺ໂນ’’ຕິ ອຄຸຓໍ ກເຖຕິ. ອວຓ຺ຓາຣຫສ຺ສ ອວຓ຺ຓໍ ຠາສຕີຕິ ອິເຘກຈ຺ໂຈ ປຸຄ຺ຄໂລ ທຸປ຺ປຏິປນ຺ນານໍ ມິຈ຺ຉາປຏິປນ຺ນານໍ ຕິຕ຺ຖິຍານໍ ຕິຕ຺ຖິຍສາວການໍ ‘‘ອິຕິປິ ທຸປ຺ປຏິປນ຺ນາ ອິຕິປິ ມິຈ຺ຉາປຏິປນ຺ນາ’’ຕິ ອວຓ຺ຓໍ ຠາສຕິ. ວຓ຺ຓາຣຫສ຺ສ ວຓ຺ຓໍ ຠາສຕີຕິ ສຸປ຺ປຏິປນ຺ນານໍ ສມ຺ມາປຏິປນ຺ນານໍ ພຸທ຺ຘານໍ ພຸທ຺ຘສາວການໍ ‘‘ອິຕິປິ ສຸປ຺ປຏິປນ຺ນາ ອິຕິປິ ສມ຺ມາປຏິປນ຺ນາ’’ຕິ ວຓ຺ຓໍ ຠາສຕິ.

໑໓໖. ຉຏ຺ເຐ ອປ຺ປສາທນີເຍ ຐາເນຕິ ອປ຺ປສາທກາຣເຓ. ປສາທໍ ອຸປທໍເສຕີຕິ ທຸປ຺ປຏິປທາຍ ມິຈ຺ຉາປຏິປທາຍ ‘‘ອຍໍ ສຸປ຺ປຏິປທາ ສມ຺ມາປຏິປທາ’’ຕິ ປສາທໍ ຊເນຕິ. ປສາທນີເຍ ຐາເນ ອປ຺ປສາທນ຺ຕິ ສຸປ຺ປຏິປທາຍ ສມ຺ມາປຏິປທາຍ ‘‘ອຍໍ ທຸປ຺ປຏິປທາ ມິຈ຺ຉາປຏິປທາ’’ຕິ ອປ຺ປສາທໍ ຊເນຕີຕິ. ເສສເມຕ຺ຖ ອຸຕ຺ຕານເມວ.

໑໓໗. ສຕ຺ຕເມ ທ຺ວີສູຕິ ທ຺ວີສຸ ໂອກາເສສຸ ທ຺ວີສຸ ກາຣເຓສຸ. ມິຈ຺ຉາປຏິປຊ຺ຊມາໂນຕິ ມິຈ຺ຉາປຏິປຕ຺ຕິໍ ປຏິປຊ຺ຊມາໂນ. ມາຕຣິ ຈ ປິຕຣິ ຈາຕິ ມິຕ຺ຕວິນ຺ທໂກ ວິຍ ມາຕຣິ, ອຊາຕສຕ຺ຕຸ ວິຍ ປິຕຣິ. ສຸກ຺ກປກ຺ໂຂ ວຸຕ຺ຕນເຍເນວ ເວທິຕພ຺ໂພ.

໑໓໘. ອຏ຺ຐເມ ຕຖາຄເຕ ຈ ຕຖາຄຕສາວເກ ຈາຕິ ເທວທຕ຺ໂຕ ວິຍ ຕຖາຄເຕ, ໂກກາລິໂກ ວິຍ ຈ ຕຖາຄຕສາວເກ. ສຸກ຺ກປກ຺ເຂ ອານນ຺ທຕ຺ເຖໂຣ ວິຍ ຕຖາຄເຕ, ນນ຺ທໂຄປາລກເສຏ຺ຐິປຸຕ຺ໂຕ ວິຍ ຈ ຕຖາຄຕສາວເກ.

໑໓໙. ນວເມ ສຈິຕ຺ຕໂວທານນ຺ຕິ ສກຈິຕ຺ຕສ຺ສ ໂວທານໍ, ອຏ຺ຐນ຺ນໍ ສມາປຕ຺ຕີນໍ ເອຕໍ ນາມໍ. ນ ຈ ກິຎ຺ຈິ ໂລເກ ອຸປາທິຍຕີຕິ ໂລເກ ຈ ຣູປາທີສຸ ຘມ຺ເມສຸ ກິຎ຺ຈິ ເອກໍ ຘມ຺ມມ຺ປິ ນ ຄຓ຺ຫາຕິ ນ ປຣາມສຕິ. ເອວເມຕ຺ຖ ອນຸປາທານໍ ນາມ ທຸຕິໂຍ ຘມ຺ໂມ ໂຫຕິ. ທສເມກາທສມານິ ອຸຕ຺ຕານຕ຺ຖາເນວາຕິ.

ອາຍາຈນວຄ຺ໂຄ ທຸຕິໂຍ.

(໑໓) ໓. ທານວຄ຺ຄວຓ຺ຓນາ

໑໔໒. ຕຕິຍສ຺ສ ປຐເມ ທານານີຕິ ທິຍ຺ຍນກວເສນ ທານານິ, ເທຍ຺ຍຘມ຺ມສ຺ເສຕໍ ນາມໍ. ສວຕ຺ຖຸກາ ວາ ເຈຕນາ ທານໍ, ສມ຺ປຕ຺ຕິປຣິຈ຺ຈາຄສ຺ເສຕໍ ນາມໍ. ອາມິສທານນ຺ຕິ ຈຕ຺ຕາໂຣ ປຈ຺ຈຍາ ທິຍ຺ຍນກວເສນ ອາມິສທານໍ ນາມ. ຘມ຺ມທານນ຺ຕິ ອິເຘກຈ຺ໂຈ ອມຕປຕ຺ຕິປຏິປທໍ ກເຖຕ຺ວາ ເທຕິ, ອິທໍ ຘມ຺ມທານໍ ນາມ.

໑໔໓. ທຸຕິເຍ ຈຕ຺ຕາໂຣ ປຈ຺ຈຍາ ຍຊນກວເສນ ຍາໂຄ ນາມ ຘມ຺ໂມປິ ຍຊນກວເສນ ຍາໂຄຕິ ເວທິຕພ຺ໂພ.

໑໔໔. ຕຕິເຍ ອາມິສສ຺ສ ຈຊນໍ ອາມິສຈາໂຄ, ຘມ຺ມສ຺ສ ຈຊນໍ ຘມ຺ມຈາໂຄ. ຈຕຸຕ຺ເຖ ອຸປສຄ຺ຄມຕ຺ຕໍ ວິເສໂສ.

໑໔໖. ປຎ຺ຈເມ ຈຕຸນ຺ນໍ ປຈ຺ຈຍານໍ ຠຸຎ຺ຊນໍ ອາມິສໂຠໂຄ, ຘມ຺ມສ຺ສ ຠຸຎ຺ຊນໍ ຘມ຺ມໂຠໂຄ. ຉຏ຺ເຐ ອຸປສຄ຺ຄມຕ຺ຕໍ ວິເສໂສ.

໑໔໘. ສຕ຺ຕເມ ຈຕຸນ຺ນໍ ປຈ຺ຈຍານໍ ສໍວິຠຊນໍ ອາມິສສໍວິຠາໂຄ, ຘມ຺ມສ຺ສ ສໍວິຠຊນໍ ຘມ຺ມສໍວິຠາໂຄ.

໑໔໙. ອຏ຺ຐເມ ຈຕູຫິ ປຈ຺ຈເຍຫິ ສງ຺ຄໂຫ ອາມິສສງ຺ຄໂຫ, ຘມ຺ເມນ ສງ຺ຄໂຫ ຘມ຺ມສງ຺ຄໂຫ.

໑໕໐. ນວເມ ຈຕູຫິ ປຈ຺ຈເຍຫິ ອນຸຄ຺ຄຓ຺ຫນໍ ອາມິສານຸຄ຺ຄໂຫ, ຘມ຺ເມນ ອນຸຄ຺ຄຓ຺ຫນໍ ຘມ຺ມານຸຄ຺ຄໂຫ.

໑໕໑. ທສເມ ຈຕູຫິ ປຈ຺ຈເຍຫິ ອນຸກມ຺ປນໍ ອາມິສານຸກມ຺ປາ, ຘມ຺ເມນ ອນຸກມ຺ປນໍ ຘມ຺ມານຸກມ຺ປາຕິ.

ທານວຄ຺ໂຄ ຕຕິໂຍ.

(໑໔) ໔. ສນ຺ຖາຣວຄ຺ຄວຓ຺ຓນາ

໑໕໒. ຈຕຸຕ຺ຖສ຺ສ ປຐເມ ຈຕູຫິ ປຈ຺ຈເຍຫິ ອຕ຺ຕໂນ ຈ ປຣສ຺ສ ຈ ອນ຺ຕຣປຏິຈ຺ຉາທນວເສນ ສນ຺ຖຣຓໍ ອາມິສສນ຺ຖາໂຣ, ຘມ຺ເມນ ສນ຺ຖຣຓໍ ຘມ຺ມສນ຺ຖາໂຣ. ທຸຕິເຍ ອຸປສຄ຺ຄມຕ຺ຕໍ ວິເສໂສ.

໑໕໔. ຕຕິເຍ ວຸຕ຺ຕປ຺ປກາຣສ຺ສ ອາມິສສ຺ສ ເອສນາ ອາມິເສສນາ, ຘມ຺ມສ຺ສ ເອສນາ ຘມ຺ເມສນາ. ຈຕຸຕ຺ເຖ ອຸປສຄ຺ຄມຕ຺ຕເມວ ວິເສໂສ.

໑໕໖. ປຎ຺ຈເມ ມຕ຺ຖກປ຺ປຕ຺ຕາ ອາມິສປຣິເຍສນາ ອາມິສປຣິເຍຏ຺ຐິ, ມຕ຺ຖກປ຺ປຕ຺ຕາວ ຘມ຺ມປຣິເຍສນາ ຘມ຺ມປຣິເຍຏ຺ຐີຕິ ວຸຕ຺ຕາ.

໑໕໗. ຉຏ຺ເຐ ອາມິເສນ ປູຊນໍ ອາມິສປູຊາ, ຘມ຺ເມນ ປູຊນໍ ຘມ຺ມປູຊາ.

໑໕໘. ສຕ຺ຕເມ ອາຕິເຖຍ຺ຍານີຕິ ອາຄນ຺ຕຸກທານານິ. ອຕິເຖຍ຺ຍານີຕິປິ ປາໂຐ.

໑໕໙. ອຏ຺ຐເມ ອາມິສໍ ອິຊ຺ຌນກສມິຊ຺ຌນກວເສນ ອາມິສິທ຺ຘິ, ຘມ຺ໂມປິ ອິຊ຺ຌນກສມິຊ຺ຌນກວເສນ ຘມ຺ມິທ຺ຘິ.

໑໖໐. ນວເມ ອາມິເສນ ວຑ຺ຒນໍ ອາມິສວຸທ຺ຘິ, ຘມ຺ເມນ ວຑ຺ຒນໍ ຘມ຺ມວຸທ຺ຘິ.

໑໖໑. ທສເມ ຣຕິກຣຓຏ຺ເຐນ ອາມິສໍ ອາມິສຣຕນໍ, ຘມ຺ໂມ ຘມ຺ມຣຕນໍ.

໑໖໒. ເອກາທສເມ ອາມິສສ຺ສ ຈິນນໍ ວຑ຺ຒນໍ ອາມິສສນ຺ນິຈໂຍ, ຘມ຺ມສ຺ສ ຈິນນໍ ວຑ຺ຒນໍ ຘມ຺ມສນ຺ນິຈໂຍ.

໑໖໓. ທ຺ວາທສເມ ອາມິສສ຺ສ ວິປຸລຠາໂວ ອາມິສເວປຸລ຺ລໍ, ຘມ຺ມສ຺ສ ວິປຸລຠາໂວ ຘມ຺ມເວປຸລ຺ລນ຺ຕິ.

ສນ຺ຖາຣວຄ຺ໂຄ ຈຕຸຕ຺ໂຖ.

(໑໕) ໕. ສມາປຕ຺ຕິວຄ຺ຄວຓ຺ຓນາ

໑໖໔. ປຎ຺ຈມສ຺ສ ປຐເມ ສມາປຕ຺ຕິກຸສລຕາຕິ ອາຫາຣສປ຺ປາຍໍ ອຸຕຸສປ຺ປາຍໍ ປຣິຄ຺ຄຓ຺ຫິຕ຺ວາ ສມາປຕ຺ຕິສມາປຊ຺ຊເນ ເຉກຕາ. ສມາປຕ຺ຕິວຸຏ຺ຐານກຸສລຕາຕິ ຍຖາປຣິຈ຺ເຉເທນ ຄເຕ ກາເລ ວິຍຕ຺ໂຕ ຫຸຕ຺ວາ ອຸຏ຺ຐຫນ຺ໂຕ ວຸຏ຺ຐານກຸສໂລ ນາມ ໂຫຕິ, ເອວໍ ກຸສລຕາ.

໑໖໕. ທຸຕິເຍ ອຊ຺ຊວນ຺ຕິ ອຸຊຸຠາໂວ. ມທ຺ທວນ຺ຕິ ມຸທຸຠາໂວ.

໑໖໖. ຕຕິເຍ ຂນ຺ຕີຕິ ອຘິວາສນຂນ຺ຕິ. ໂສຣຈ຺ຈນ຺ຕິ ສຸສີລ຺ຍຠາເວນ ສຸຣຕຠາໂວ.

໑໖໗. ຈຕຸຕ຺ເຖ ສາຂລ຺ຍນ຺ຕິ ສຓ຺ຫວາຈາວເສນ ສມ຺ໂມທມານຠາໂວ. ປຏິສນ຺ຖາໂຣຕິ ອາມິເສນ ວາ ຘມ຺ເມນ ວາ ປຏິສນ຺ຖຣຓໍ.

໑໖໘. ປຎ຺ຈເມ ອວິຫິໍສາຕິ ກຣຸຓາປຸພ຺ພຠາໂຄ. ໂສເຈຍ຺ຍນ຺ຕິ ສີລວເສນ ສຸຈິຠາໂວ. ຉຏ຺ຐສຕ຺ຕມານິ ອຸຕ຺ຕານຕ຺ຖາເນວ.

໑໗໑. ອຏ຺ຐເມ ປຏິສງ຺ຂານພລນ຺ຕິ ປຈ຺ຈເວກ຺ຂຓພລໍ.

໑໗໒. ນວເມ ມຸຏ຺ຐສ຺ສຈ຺ເຈ ອກມ຺ປເນນ ສຕິເຍວ ສຕິພລໍ. ອຸທ຺ຘຈ຺ເຈ ອກມ຺ປເນນ ສມາຘິເຍວ ສມາຘິພລໍ.

໑໗໓. ທສເມ ສມໂຖຕິ ຈິຕ຺ເຕກຄ຺ຄຕາ. ວິປສ຺ສນາຕິ ສງ຺ຂາຣປຣິຄ຺ຄາຫກຎ຺ຎາຓໍ.

໑໗໔. ເອກາທສເມ ສີລວິປຕ຺ຕີຕິ ທຸສ຺ສີລ຺ຍໍ. ທິຏ຺ຐິວິປຕ຺ຕີຕິ ມິຈ຺ຉາທິຏ຺ຐິ.

໑໗໕. ທ຺ວາທສເມ ສີລສມ຺ປທາຕິ ປຣິປຸຓ຺ຓສີລຕາ. ທິຏ຺ຐິສມ຺ປທາຕິ ສມ຺ມາທິຏ຺ຐິກຠາໂວ. ເຕນ ກມ຺ມສ຺ສກຕສມ຺ມາທິຏ຺ຐິ, ຌານສມ຺ມາທິຏ຺ຐິ, ວິປສ຺ສນາສມ຺ມາທິຏ຺ຐິ, ມຄ຺ຄສມ຺ມາທິຏ຺ຐິ, ຜລສມ຺ມາທິຏ຺ຐີຕິ ສພ຺ພາປິ ປຎ຺ຈວິຘາ ສມ຺ມາທິຏ຺ຐິ ສງ຺ຄຫິຕາ ໂຫຕິ.

໑໗໖. ເຕຣສເມ ສີລວິສຸທ຺ຘີຕິ ວິສຸທ຺ຘິສມ຺ປາປກໍ ສີລໍ. ທິຏ຺ຐິວິສຸທ຺ຘີຕິ ວິສຸທ຺ຘິສມ຺ປາປິກາ ຈຕຸມຄ຺ຄສມ຺ມາທິຏ຺ຐິ, ປຎ຺ຈວິຘາປິ ວາ ສມ຺ມາທິຏ຺ຐິ.

໑໗໗. ຈຸທ຺ທສເມ ທິຏ຺ຐິວິສຸທ຺ຘີຕິ ວິສຸທ຺ຘິສມ຺ປາປິກາ ສມ຺ມາທິຏ຺ຐິເຍວ. ຍຖາທິຏ຺ຐິສ຺ສ ຈ ປຘານນ຺ຕິ ເຫຏ຺ຐິມມຄ຺ຄສມ຺ປຍຸຕ຺ຕໍ ວີຣິຍໍ. ຕຎ຺ຫິ ຕສ຺ສາ ທິຏ຺ຐິຍາ ອນຸຣູປຕ຺ຕາ ‘‘ຍຖາທິຏ຺ຐິສ຺ສ ຈ ປຘານ’’ນ຺ຕິ ວຸຕ຺ຕໍ.

໑໗໘. ປນ຺ນຣສເມ ອສນ຺ຕຸຏ຺ຐິຕາ ຈ ກຸສເລສຸ ຘມ຺ເມສູຕິ ອຎ຺ຎຕ຺ຣ ອຣຫຕ຺ຕມຄ຺ຄາ ກຸສເລສຸ ຘມ຺ເມສຸ ອສນ຺ຕຸຏ຺ຐິຠາໂວ.

໑໗໙. ໂສຬສເມ ມຸຏ຺ຐສ຺ສຈ຺ຈນ຺ຕິ ມຸຏ຺ຐສ຺ສຕິຠາໂວ. ອສມ຺ປຊຎ຺ຎນ຺ຕິ ອຎ຺ຎາຓຠາໂວ.

໑໘໐. ສຕ຺ຕຣສເມ ອປິລາປນລກ຺ຂຓາ ສຕິ. ສມ຺ມາ ປຊານນລກ຺ຂຓໍ ສມ຺ປຊຎ຺ຎນ຺ຕິ.

ສມາປຕ຺ຕິວຄ຺ໂຄ ປຎ຺ຈໂມ. ຕຕິຍປຓ຺ຓາສກໍ ນິຏ຺ຐິຕໍ.