໕. ປຣິສວຄ຺ຄວຓ຺ຓນາ

໔໓. ປຎ຺ຈມສ຺ສ ປຐເມ ອຸຕ຺ຕານາຕິ ປາກຏາ ອປ຺ປຏິຈ຺ຉນ຺ນາ. ຄມ຺ຠີຣາຕິ ຄຸຬ຺ຫາ ປຏິຈ຺ຉນ຺ນາ. ອຸທ຺ຘຕາຕິ ອຸທ຺ຘຈ຺ເຈນ ສມນ຺ນາຄຕາ. ອຸນ຺ນຬາຕິ ອຸຄ຺ຄຕນຬາ, ອຸຏ຺ຐິຕຕຸຈ຺ຉມານາຕິ ວຸຕ຺ຕໍ ໂຫຕິ. ຈປລາຕິ ປຕ຺ຕຈີວຣມຓ຺ຑນາທິນາ ຈາປລ຺ເລນ ຍຸຕ຺ຕາ. ມຸຂຣາຕິ ມຸຂຂຣາ ຂຣວຈນາ. ວິກິຓ຺ຓວາຈາຕິ ອສໍຍຕວຈນາ ທິວສມ຺ປິ ນິຣຕ຺ຖກວຈນປລາປິໂນ. ມຸຏ຺ຐສ຺ສຕີຕິ ວິສ຺ສຏ຺ຐສຕິໂນ. ອສມ຺ປຊານາຕິ ນິປ຺ປຎ຺ຎາ. ອສມາຫິຕາຕິ ຈິຕ຺ເຕກຄ຺ຄຕາມຕ຺ຕສ຺ສາປິ ອລາຠິໂນ. ປາກຕິນ຺ທ຺ຣິຍາຕິ ປກຕິຍາ ຐິເຕຫິ ວິວເຏຫິ ອຣກ຺ຂິເຕຫິ ອິນ຺ທ຺ຣິເຍຫິ ສມນ຺ນາຄຕາ. ສຸກ຺ກປກ຺ໂຂ ວຸຕ຺ຕວິປລ຺ລາເສນ ເວທິຕພ຺ໂພ.

໔໔. ທຸຕິເຍ ຠຓ຺ຑນຊາຕາຕິ ຠຓ຺ຑນໍ ວຸຈ຺ຈຕິ ກລຫສ຺ສ ປຸພ຺ພຠາໂຄ, ຕໍ ເຕສໍ ຊາຕນ຺ຕິ ຠຓ຺ຑນຊາຕາ. ຕຖາ ‘‘ມຍໍ ຕຸມ຺ເຫ ທຓ຺ຑາເປສ຺ສາມ ພນ຺ຘາເປສ຺ສາມາ’’ຕິອາທິວຈນປ຺ປວຕ຺ຕິຍາ ສຎ຺ຊາຕກລຫາ. ອຍໍ ຕາວ ຄິຫີສຸ ນໂຍ. ປພ຺ພຊິຕາ ປນ ອາປຕ຺ຕິວີຕິກ຺ກມວາຈໍ ວທນ຺ຕາ ກລຫຊາຕາ ນາມ. ວິວາທາປນ຺ນາຕິ ວິຣຸທ຺ຘວາທໍ ອາປນ຺ນາ. ມຸຂສຕ຺ຕີຫິ ວິຕຸທນ຺ຕາຕິ ຄຸຓານໍ ຉິນ຺ທນຏ຺ເຐນ ທຸພ຺ຠາສິຕາ ວາຈາ ມຸຂສຕ຺ຕິໂຍຕິ ວຸຈ຺ຈນ຺ຕິ, ຕາຫິ ວິຕຸທນ຺ຕາ ວິຊ຺ຌນ຺ຕາ. ສມຄ຺ຄາຕິ ເອກກມ຺ມໍ ເອກຸທ຺ເທໂສ ສມສິກ຺ຂຕາຕິ ເອເຕສໍ ກຣເຓນ ສມຄ຺ຄຕາຍ ສຫິຕາ. ປິຍຈກ຺ຂູຫີຕິ ເມຕ຺ຕາຈກ຺ຂູຫິ.

໔໕. ຕຕິເຍ ອຄ຺ຄວຕີຕິ ອຸຕ຺ຕມປຸຄ຺ຄລວຕີ, ອຄ຺ຄາຍ ວາ ອຸຕ຺ຕມາຍ ປຏິປຕ຺ຕິຍາ ສມນ຺ນາຄຕາ. ຕໂຕ ວິປຣີຕາ ອນຄ຺ຄວຕີ. ພາຫຸລິກາຕິ ຈີວຣາທິພາຫຸລ຺ລາຍ ປຏິປນ຺ນາ. ສາສນໍ ສິຖິລໍ ຄຓ຺ຫນ຺ຕີຕິ ສາຖລິກາ. ໂອກ຺ກມເນ ປຸພ຺ພງ຺ຄມາຕິ ເອຕ຺ຖ ໂອກ຺ກມນໍ ວຸຈ຺ຈຕິ ອວຄມນຏ຺ເຐນ ປຎ຺ຈ ນີວຣຓານິ, ເຕນ ປຎ຺ຈນີວຣຓປູຣເຓ ປຸພ຺ພງ຺ຄມາຕິ ວຸຕ຺ຕໍ ໂຫຕິ. ປວິເວເກຕິ ອຸປຘິວິເວເກ ນິພ຺ພາເນ. ນິກ຺ຂິຕ຺ຕຘຸຣາຕິ ຕິວິເຘປິ ວິເວເກ ໂອໂຣປິຕຘຸຣາ. ນ ວີຣິຍໍ ອາຣຠນ຺ຕີຕິ ທຸວິຘມ຺ປິ ວີຣິຍໍ ນ ກໂຣນ຺ຕິ. ອປ຺ປຕ຺ຕສ຺ສ ປຕ຺ຕິຍາຕິ ປຸພ຺ເພ ອປ຺ປຕ຺ຕສ຺ສ ຌານວິປສ຺ສນາມຄ຺ຄຜລວິເສສສ຺ສ ປຕ຺ຕິອຕ຺ຖາຍ. ອິຕຣໍ ປທທ຺ວຍໍ ຕສ຺ເສວ ເວວຈນໍ. ປຈ຺ຉິມາ ຊນຕາຕິ ສທ຺ຘິວິຫາຣິກອນ຺ເຕວາສິກຊໂນ. ທິຏ຺ຐານຸຄຕິໍ ອາປຊ຺ຊຕີຕິ ອາຈຣິຍຸປຊ຺ຌາເຍຫິ ກຕໍ ອນຸກໂຣນ຺ໂຕ ທິຏ຺ຐສ຺ສ ເຕສໍ ອາຈາຣສ຺ສ ອນຸຄຕິໍ ອາປຊ຺ຊຕິ ນາມ. ເສສໍ ວຸຕ຺ຕປຏິປກ຺ຂນເຍນ ເວທິຕພ຺ພໍ.

໔໖. ຈຕຸຕ຺ເຖ ອຣິຍາຕິ ອຣິຍສາວກປຣິສາ. ອນຣິຍາຕິ ປຸຖຸຊ຺ຊນປຣິສາ. ‘‘ອິທໍ ທຸກ຺ຂ’’ນ຺ຕິ ຍຖາຠູຕໍ ນປ຺ປຊານນ຺ຕີຕິ ຐເປຕ຺ວາ ຕຓ຺ຫໍ ເຕຠູມກາ ປຎ຺ຈກ຺ຂນ຺ຘາ ທຸກ຺ຂສຈ຺ຈໍ ນາມ, ເອຕ຺ຕກເມວ ທຸກ຺ຂໍ, ອິໂຕ ອຸທ຺ຘໍ ທຸກ຺ຂໍ ນຕ຺ຖີຕິ ຍຖາສຠາວໂຕ ນປ຺ປຊານນ຺ຕິ. ເອສ ນໂຍ ສພ຺ພຕ຺ຖ. ເສສປເທສຸ ປນ ຕສ຺ສ ທຸກ຺ຂສ຺ສ ສມຸຏ຺ຐາປິກາ ປຸຣິມຕຓ຺ຫາ ສມຸທໂຍ ນາມ, ຕສ຺ສາເຍວ ຕຓ຺ຫາຍ, ທ຺ວິນ຺ນມ຺ປິ ວາ ເຕສໍ ສຈ຺ຈານໍ ອຈ຺ຈນ຺ຕກ຺ຂໂຍ ອສມຸປ຺ປຕ຺ຕິ ທຸກ຺ຂນິໂຣໂຘ ນາມ, ອຏ຺ຐງ຺ຄິໂກ ອຣິຍມຄ຺ໂຄ ທຸກ຺ຂນິໂຣຘຄາມິນີ ປຏິປທາ ນາມາຕິ ເອວໍ ອິມສ຺ມິໍ ສຸຕ຺ເຕ ຈຕູຫິ ສຈ຺ເຈຫິ ຈຕ຺ຕາໂຣ ມຄ຺ຄາ ຈ ຈຕ຺ຕາຣິ ຈ ຜລານິ ກຖິຕານິ.

໔໗. ປຎ຺ຈເມ ປຣິສາກສໂຏຕິ ກສຏປຣິສາ ກຈວຣປຣິສາ ປລາປປຣິສາຕິ ອຕ຺ໂຖ. ປຣິສາມຓ຺ໂຑຕິ ປສນ຺ນປຣິສາ ສາຣປຣິສາຕິ ອຕ຺ໂຖ. ຉນ຺ທາຄຕິໍ ຄຈ຺ຉນ຺ຕີຕິ ຉນ຺ເທນ ອຄຕິໍ ຄຈ຺ຉນ຺ຕິ, ອກຕ຺ຕພ຺ພໍ ກໂຣນ຺ຕີຕິ ອຕ຺ໂຖ. ເສສປເທສຸປິ ເອເສວ ນໂຍ. ອິມານິ ປນ ຈຕ຺ຕາຣິ ອຄຕິຄມນານິ ຠຓ຺ຑຠາຊນີເຍ ຈ ວິນິຈ຺ຉຍຏ຺ຐາເນ ຈ ລພ຺ຠນ຺ຕິ. ຕຕ຺ຖ ຠຓ຺ຑຠາຊນີເຍ ຕາວ ອຕ຺ຕໂນ ຠາຣຠູຕານໍ ຠິກ຺ຂູນໍ ອມນາເປ ຠຓ຺ຑເກ ປຕ຺ເຕ ຕໍ ປຣິວຕ຺ເຕຕ຺ວາ ມນາປໍ ເທນ຺ໂຕ ຉນ຺ທາຄຕິໍ ຄຈ຺ຉຕິ ນາມ. ອຕ຺ຕໂນ ປນ ອຠາຣຠູຕານໍ ມນາເປ ຠຓ຺ຑເກ ປຕ຺ເຕ ຕໍ ປຣິວຕ຺ເຕຕ຺ວາ ອມນາປໍ ເທນ຺ໂຕ ໂທສາຄຕິໍ ຄຈ຺ຉຕິ ນາມ. ຠຓ຺ຑກຠາຊນີຍວຕ຺ຖຸຎ຺ຈ ຐິຕິກຎ຺ຈ ອຊານນ຺ໂຕ ໂມຫາຄຕິໍ ຄຈ຺ຉຕິ ນາມ. ມຸຂຣານໍ ວາ ຣາຊາທິນິສ຺ສິຕານໍ ວາ ‘‘ອິເມ ເມ ອມນາເປ ຠຓ຺ຑເກ ທິນ຺ເນ ອນຕ຺ຖມ຺ປິ ກເຣຍ຺ຍຸ’’ນ຺ຕິ ຠເຍນ ປຣິວຕ຺ເຕຕ຺ວາ ມນາປໍ ເທນ຺ໂຕ ຠຍາຄຕິໍ ຄຈ຺ຉຕິ ນາມ. ໂຍ ປນ ເອວໍ ນ ຄຈ຺ຉຕິ, ສພ຺ເພສໍ ຕຸລາຠູໂຕ ປມາຓຠູໂຕ ມຊ຺ຌຕ຺ໂຕ ຫຸຕ຺ວາ ຍໍ ຍສ຺ສ ປາປຸຓາຕິ, ຕຎ຺ເຎວ ຕສ຺ສ ເທຕິ, ອຍໍ ຈຕຸພ຺ພິຘມ຺ປິ ອຄຕິຄມນໍ ນ ຄຈ຺ຉຕິ ນາມ. ວິນິຈ຺ຉຍຏ຺ຐາເນ ປນ ອຕ຺ຕໂນ ຠາຣຠູຕສ຺ສ ຄຣຸກາປຕ຺ຕິໍ ລຫຸກາປຕ຺ຕີຕິ ກຕ຺ວາ ກເຖນ຺ໂຕ ຉນ຺ທາຄຕິໍ ຄຈ຺ຉຕິ ນາມ. ອິຕຣສ຺ສ ລຫຸກາປຕ຺ຕິໍ ຄຣຸກາປຕ຺ຕີຕິ ກຕ຺ວາ ກເຖນ຺ໂຕ ໂທສາຄຕິໍ ຄຈ຺ຉຕິ ນາມ. ອາປຕ຺ຕິວຸຏ຺ຐານໍ ປນ ສມຸຈ຺ຈຍກ຺ຂນ຺ຘກຎ຺ຈ ອຊານນ຺ໂຕ ໂມຫາຄຕິໍ ຄຈ຺ຉຕິ ນາມ. ມຸຂຣສ຺ສ ວາ ຣາຊປູຊິຕສ຺ສ ວາ ‘‘ອຍໍ ເມ ຄຣຸກໍ ກຕ຺ວາ ອາປຕ຺ຕິໍ ກເຖນ຺ຕສ຺ສ ອນຕ຺ຖມ຺ປິ ກເຣຍ຺ຍາ’’ຕິ ຄຣຸກເມວ ລຫຸກາຕິ ກຕ຺ວາ ກເຖນ຺ໂຕ ຠຍາຄຕິໍ ຄຈ຺ຉຕິ ນາມ. ໂຍ ປນ ສພ຺ເພສໍ ຍຖາຠູຕເມວ ກເຖຕິ, ອຍໍ ຈຕຸພ຺ພິຘມ຺ປິ ອຄຕິຄມນໍ ນ ຄຈ຺ຉຕິ ນາມ.

໔໘. ຉຏ຺ເຐ ໂອກ຺ກາຈິຕວິນີຕາຕິ ທຸພ຺ພິນີຕາ. ໂນ ປຏິປຸຈ຺ຉາວິນີຕາຕິ ນ ປຸຈ຺ຉິຕ຺ວາ ວິນີຕາ. ຄມ຺ຠີຣາຕິ ປາຬິວເສນ ຄມ຺ຠີຣາ ສລ຺ລສຸຕ຺ຕສທິສາ. ຄມ຺ຠີຣຕ຺ຖາຕິ ອຕ຺ຖວເສນ ຄມ຺ຠີຣາ ມຫາເວທລ຺ລສຸຕ຺ຕສທິສາ. ໂລກຸຕ຺ຕຣາຕິ ໂລກຸຕ຺ຕຣອຕ຺ຖທີປກາ. ສຸຎ຺ຎຕາປຏິສໍຍຸຕ຺ຕາຕິ ສຕ຺ຕສຸຎ຺ຎໍ ຘມ຺ມມຕ຺ຕເມວ ປກາສກາ ອສງ຺ຂຕສໍຍຸຕ຺ຕສທິສາ. ນ ອຎ຺ຎາ ຈິຕ຺ຕໍ ອຸປຏ຺ຐເປນ຺ຕີຕິ ວິຊານນຕ຺ຖາຍ ຈິຕ຺ຕໍ ນ ອຸປຏ຺ຐເປນ຺ຕິ, ນິທ຺ທາຍນ຺ຕິ ວາ ອຎ຺ຎວິຫິຕາ ວາ ໂຫນ຺ຕິ. ອຸຄ຺ຄເຫຕພ຺ພໍ ປຣິຍາປຸຓິຕພ຺ພນ຺ຕິ ອຸຄ຺ຄເຫຕພ຺ເພ ຈ ປຣິຍາປຸຓິຕພ຺ເພ ຈ. ກວິຕາຕິ ກວີຫິ ກຕາ. ອິຕຣໍ ຕສ຺ເສວ ເວວຈນໍ. ຈິຕ຺ຕກ຺ຂຣາຕິ ວິຈິຕ຺ຣອກ຺ຂຣາ. ອິຕຣໍ ຕສ຺ເສວ ເວວຈນໍ. ພາຫິຣກາຕິ ສາສນໂຕ ພຫິຠູຕາ. ສາວກຠາສິຕາຕິ ເຕສໍ ເຕສໍ ສາວເກຫິ ຠາສິຕາ. ສຸສ຺ສູສນ຺ຕີຕິ ອກ຺ຂຣຈິຕ຺ຕຕາຍ ເຈວ ສຣສມ຺ປຕ຺ຕິຍາ ຈ ອຕ຺ຕມນາ ຫຸຕ຺ວາ ສຸຓນ຺ຕິ. ນ ເຈວ ອຎ຺ຎມຎ຺ຎໍ ປຏິປຸຈ຺ຉນ຺ຕີຕິ ອຎ຺ຎມຎ຺ຎໍ ອຕ຺ຖໍ ວາ ອນຸສນ຺ຘິໍ ວາ ປຸພ຺ພາປຣໍ ວາ ນ ປຸຈ຺ຉນ຺ຕິ. ນ ຈ ປຏິວິຈຣນ຺ຕີຕິ ປຸຈ຺ຉນຕ຺ຖາຍ ຈາຣິກໍ ນ ວິຈຣນ຺ຕິ. ອິທໍ ກຖນ຺ຕິ ອິທໍ ພ຺ຍຎ຺ຊນໍ ກຖໍ ໂຣເປຕພ຺ພໍ ກິນ຺ຕິ ໂຣເປຕພ຺ພໍ? ອິມສ຺ສ ໂກ ອຕ຺ໂຖຕິ ອິມສ຺ສ ຠາສິຕສ຺ສ ໂກ ອຕ຺ໂຖ, ກາ ອນຸສນ຺ຘິ, ກິໍ ປຸພ຺ພາປຣໍ? ອວິວຏນ຺ຕິ ປຏິຈ຺ຉນ຺ນໍ. ນ ວິວຣນ຺ຕີຕິ ນ ອຸຄ຺ຆາເຏນ຺ຕິ. ອນຸຕ຺ຕານີກຕນ຺ຕິ ອປາກຏໍ ກຕໍ. ນ ອຸຕ຺ຕານິໍ ກໂຣນ຺ຕີຕິ ປາກຏໍ ນ ກໂຣນ຺ຕິ. ກງ຺ຂາຐານິເຍສູຕິ ກງ຺ຂາຍ ກາຣຓຠູເຕສຸ. ສຸກ຺ກປກ຺ໂຂ ວຸຕ຺ຕວິປລ຺ລາເສນ ເວທິຕພ຺ໂພ.

໔໙. ສຕ຺ຕເມ ອາມິສຄຣູຕິ ຈຕຸປຈ຺ຈຍຄຣຸກາ ໂລກຸຕ຺ຕຣຘມ຺ມໍ ລາມກໂຕ ຄເຫຕ຺ວາ ຐິຕປຣິສາ. ສທ຺ຘມ຺ມຄຣູຕິ ນວ ໂລກຸຕ຺ຕຣຘມ຺ເມ ຄຣຸເກ ກຕ຺ວາ ຈຕ຺ຕາໂຣ ປຈ຺ຈເຍ ລາມກໂຕ ຄເຫຕ຺ວາ ຐິຕປຣິສາ. ອຸຠໂຕຠາຄວິມຸຕ຺ໂຕຕິ ທ຺ວີຫິ ຠາເຄຫິ ວິມຸຕ຺ໂຕ. ປຎ຺ຎາວິມຸຕ຺ໂຕຕິ ປຎ຺ຎາຍ ວິມຸຕ຺ໂຕ ສຸກ຺ຂວິປສ຺ສກຂີຓາສໂວ. ກາຍສກ຺ຂີຕິ ກາເຍນ ຌານຜສ຺ສໍ ຜຸສິຕ຺ວາ ປຈ຺ຉາ ນິໂຣຘໍ ນິພ຺ພານໍ ສຈ຺ຉິກຕ຺ວາ ຐິໂຕ. ທິຏ຺ຐິປ຺ປຕ຺ໂຕຕິ ທິຏ຺ຐນ຺ຕໍ ປຕ຺ໂຕ. ອິເມ ທ຺ເວປິ ຉສຸ ຐາເນສຸ ລພ຺ຠນ຺ຕິ. ສທ຺ຘາວິມຸຕ຺ໂຕຕິ ສທ຺ທຫນ຺ໂຕ ວິມຸຕ຺ໂຕ. ອຍມ຺ປິ ຉສຸ ຐາເນສຸ ລພ຺ຠຕິ. ຘມ຺ມໍ ອນຸສ຺ສຣຕີຕິ ຘມ຺ມານຸສາຣີ. ສທ຺ຘໍ ອນຸສ຺ສຣຕີຕິ ສທ຺ຘານຸສາຣີ. ອິເມ ທ຺ເວປິ ປຐມມຄ຺ຄສມງ຺ຄິໂນ. ກລ຺ຍາຓຘມ຺ໂມຕິ ສຸນ຺ທຣຘມ຺ໂມ. ທຸສ຺ສີໂລ ປາປຘມ຺ໂມຕິ ນິສ຺ສີໂລ ລາມກຘມ຺ໂມ. ອິມໍ ກສ຺ມາ ຄຓ຺ຫນ຺ຕິ? ສພ຺ເພສຸ ຫິ ເອກສທິເສສຸ ຊາເຕສຸ ສີລວນ຺ເຕສຸ ພລວຄາຣວໍ ນ ໂຫຕິ, ເອກຈ຺ເຈສຸ ປນ ທຸສ຺ສີເລສຸ ສຕິ ສີລວນ຺ຕານໍ ອຸປຣິ ພລວຄາຣວໍ ໂຫຕີຕິ ມຎ຺ຎນ຺ຕາ ຄຓ຺ຫນ຺ຕິ. ເຕ ເຕນ ລາຠໍ ລຠນ຺ຕີຕິ ເຕ ຠິກ຺ຂູ ເອກຈ຺ຈານໍ ວຓ຺ຓໍ ເອກຈ຺ຈານໍ ອວຓ຺ຓໍ ກເຖຕ຺ວາ ຈຕ຺ຕາໂຣ ປຈ຺ຈເຍ ລຠນ຺ຕິ. ຄຖິຕາຕິ ຕຓ຺ຫາຍ ຄນ຺ຖິຕາ. ມຸຈ຺ຉິຕາຕິ ຕຓ຺ຫາວເສເນວ ມຸຈ຺ຉິຕາ. ອຊ຺ໂຌປນ຺ນາຕິ ອຊ຺ໂຌສາຍ ຄິລິຕ຺ວາ ປຣິນິຏ຺ຐເປຕ຺ວາ ຐິຕາ. ອນາທີນວທສ຺ສາວິໂນຕິ ອປຈ຺ຈເວກ຺ຂິຕປຣິໂຠເຄ ອາທີນວໍ ອປສ຺ສນ຺ຕາ. ອນິສ຺ສຣຓປຎ຺ຎາຕິ ຈຕູສຸ ປຈ຺ຈເຍສຸ ຉນ຺ທຣາຄອປກຑ຺ຒນາຍ ນິສ຺ສຣຓປຎ຺ຎາຍ ວິຣຫິຕາ ອິທມຕ຺ຖໍ ເອຕນ຺ຕິ ອຊານນ຺ຕາ. ປຣິຠຸຎ຺ຊນ຺ຕີຕິ ສຈ຺ຉນ຺ທຣາຄາ ຫຸຕ຺ວາ ປຣິຠຸຎ຺ຊນ຺ຕິ.

ສຸກ຺ກປກ຺ເຂ ອຸຠໂຕຠາຄວິມຸຕ຺ໂຕຕິອາທີສຸ ອຍໍ ສຕ຺ຕນ຺ນມ຺ປິ ອຣິຍປຸຄ຺ຄລານໍ ສງ຺ເຂປປກາສນາ – ເອໂກ ຠິກ຺ຂຸ ປຎ຺ຎາຘຸເຣນ ອຠິນິວິຏ຺ໂຐ ອຏ຺ຐ ສມາປຕ຺ຕິໂຍ ນິພ຺ພຕ຺ເຕຕ຺ວາ ໂສຕາປຕ຺ຕິມຄ຺ຄໍ ປາປຸຓາຕິ. ໂສ ຕສ຺ມິໍ ຂເຓ ຘມ຺ມານຸສາຣີ ນາມ ໂຫຕິ, ໂສຕາປຕ຺ຕິຜລາທີສຸ ຉສຸ ຐາເນສຸ ກາຍສກ຺ຂິ ນາມ, ອຣຫຕ຺ຕຜລກ຺ຂເຓ ອຸຠໂຕຠາຄວິມຸຕ຺ໂຕ ນາມ. ສມາປຕ຺ຕີຫິ ວິກ຺ຂມ຺ຠນວິມຸຕ຺ຕິຍາ ມຄ຺ເຄນ ສມຸຈ຺ເຉທວິມຸຕ຺ຕິຍາຕິ ທ຺ວິກ຺ຂຕ຺ຕຸໍ ວາ ທ຺ວີຫິ ວາ ຠາເຄຫິ ວິມຸຕ຺ໂຕຕິ ອຕ຺ໂຖ. ອປໂຣ ປຎ຺ຎາຘຸເຣນ ອຠິນິວິຏ຺ໂຐ ສມາປຕ຺ຕິໂຍ ນິພ຺ພຕ຺ເຕຕຸໍ ອສກ຺ໂກນ຺ໂຕ ສຸກ຺ຂວິປສ຺ສໂກວ ຫຸຕ຺ວາ ໂສຕາປຕ຺ຕິມຄ຺ຄໍ ປາປຸຓາຕິ. ໂສ ຕສ຺ມິໍ ຂເຓ ຘມ຺ມານຸສາຣີ ນາມ ໂຫຕິ, ໂສຕາປຕ຺ຕິຜລາທີສຸ ຉສຸ ຐາເນສຸ ທິຏ຺ຐິປ຺ປຕ຺ໂຕ ນາມ, ອຣຫຕ຺ຕຜລກ຺ຂເຓ ປຎ຺ຎາວິມຸຕ຺ໂຕ ນາມ. ອປໂຣ ສທ຺ຘາຘຸເຣນ ອຠິນິວິຏ຺ໂຐ ອຏ຺ຐ ສມາປຕ຺ຕິໂຍ ນິພ຺ພຕ຺ເຕຕ຺ວາ ໂສຕາປຕ຺ຕິມຄ຺ຄໍ ປາປຸຓາຕິ. ໂສ ຕສ຺ມິໍ ຂເຓ ສທ຺ຘານຸສາຣີ ນາມ ໂຫຕິ, ໂສຕາປຕ຺ຕິຜລາທີສຸ ຉສຸ ຐາເນສຸ ກາຍສກ຺ຂິ ນາມ, ອຣຫຕ຺ຕຜລກ຺ຂເຓ ອຸຠໂຕຠາຄວິມຸຕ຺ໂຕ ນາມ. ອປໂຣ ສທ຺ຘາຘຸເຣນ ອຠິນິວິຏ຺ໂຐ ສມາປຕ຺ຕິໂຍ ນິພ຺ພຕ຺ເຕຕຸໍ ອສກ຺ໂກນ຺ໂຕ ສຸກ຺ຂວິປສ຺ສໂກວ ຫຸຕ຺ວາ ໂສຕາປຕ຺ຕິມຄ຺ຄໍ ປາປຸຓາຕິ. ໂສ ຕສ຺ມິໍ ຂເຓ ສທ຺ຘານຸສາຣີ ນາມ ໂຫຕິ, ໂສຕາປຕ຺ຕິຜລາທີສຸ ຉສຸ ຐາເນສຸ ສທ຺ຘາວິມຸຕ຺ໂຕ ນາມ, ອຣຫຕ຺ຕຜລກ຺ຂເຓ ປຎ຺ຎາວິມຸຕ຺ໂຕ ນາມ.

໕໐. ອຏ຺ຐເມ ວິສມາຕິ ສປກ຺ຂລນຏ຺ເຐນ ວິສມາ. ສມາຕິ ນິປກ຺ຂລນຏ຺ເຐນ ສມາ. ອຘມ຺ມກມ຺ມານີຕິ ອຸທ຺ຘມ຺ມານິ ກມ຺ມານິ. ອວິນຍກມ຺ມານີຕິ ອຸພ຺ພິນຍານິ ກມ຺ມານິ.

໕໑. ນວເມ ອຘມ຺ມິກາຕິ ນິທ຺ຘມ຺ມາ. ຘມ຺ມິກາຕິ ຘມ຺ມຍຸຕ຺ຕາ.

໕໒. ທສເມ ອຘິກຣຓນ຺ຕິ ວິວາທາຘິກຣຓາທິຈຕຸພ຺ພິຘໍ ອຘິກຣຓໍ. ອາທິຍນ຺ຕີຕິ ຄຓ຺ຫນ຺ຕິ. ສຎ຺ຎາເປນ຺ຕີຕິ ຊານາເປນ຺ຕິ. ນ ຈ ສຎ຺ຎຕ຺ຕິໍ ອຸປຄຈ຺ຉນ຺ຕີຕິ ສຎ຺ຎາປນຕ຺ຖໍ ນ ສນ຺ນິປຕນ຺ຕິ. ນ ຈ ນິຊ຺ຌາເປນ຺ຕີຕິ ນ ເປກ຺ຂາເປນ຺ຕິ. ນ ຈ ນິຊ຺ຌຕ຺ຕິໍ ອຸປຄຈ຺ຉນ຺ຕີຕິ ອຎ຺ຎມຎ຺ຎໍ ນິຊ຺ຌາປນຕ຺ຖາຍ ນ ສນ຺ນິປຕນ຺ຕິ. ອສຎ຺ຎຕ຺ຕິພລາຕິ ອສຎ຺ຎຕ຺ຕິເຍວ ພລໍ ເອເຕສນ຺ຕິ ອສຎ຺ຎຕ຺ຕິພລາ. ອປ຺ປຏິນິສ຺ສຄ຺ຄມນ຺ຕິໂນຕິ ເຍສໍ ຫິ ເອວໍ ໂຫຕິ – ‘‘ສເຈ ອມ຺ເຫຫິ ຄຫິຕໍ ອຘິກຣຓໍ ຘມ຺ມິກໍ ຠວິສ຺ສຕິ, ຄຓ຺ຫິສ຺ສາມ. ສເຈ ອຘມ຺ມິກໍ, ວິສ຺ສຊ຺ເຊສ຺ສາມາ’’ຕິ, ເຕ ປຏິນິສ຺ສຄ຺ຄມນ຺ຕິໂນ ນາມ ໂຫນ຺ຕິ. ອິເມ ປນ ນ ຕຖາ ມນ຺ເຕນ຺ຕີຕິ ອປ຺ປຏິນິສ຺ສຄ຺ຄມນ຺ຕິໂນ. ຖາມສາ ປຣາມາສາ ອຠິນິວິສ຺ສາຕິ ທິຏ຺ຐິຖາເມນ ຈ ທິຏ຺ຐິປຣາມາເສນ ຈ ອຠິນິວິສິຕ຺ວາ. ອິທເມວ ສຈ຺ຈນ຺ຕິ ອິທໍ ອມ຺ຫາກໍ ວຈນເມວ ສຈ຺ຈໍ. ໂມຆມຎ຺ຎນ຺ຕິ ອວເສສານໍ ວຈນໍ ໂມຆໍ ຕຸຈ຺ຉໍ. ສຸກ຺ກປກ຺ໂຂ ອຸຕ຺ຕານຕ຺ໂຖເຍວາຕິ.

ປຣິສວຄ຺ໂຄ ປຎ຺ຈໂມ.