໕. ອຸປຎ຺ຎາຕສຸຕ຺ຕວຓ຺ຓນາ

໕. ປຎ຺ຈເມ ທ຺ວິນ຺ນາຫນ຺ຕິ ທ຺ວິນ຺ນໍ ອຫໍ. ອຸປຎ຺ຎາສິນ຺ຕິ ອຸປຄນ຺ຕ຺ວາ ຄຸຓໍ ອຎ຺ຎາສິໍ, ຊານິໍ ປຏິວິຊ຺ຌິນ຺ຕິ ອຕ຺ໂຖ. ອິທານິ ເຕ ຘມ຺ເມ ທສ຺ເສນ຺ໂຕ ຍາ ຈ ອສນ຺ຕຸຏ຺ຐິຕາຕິອາທິມາຫ. ອິມຎ຺ຫິ ຘມ຺ມທ຺ວຍໍ ນິສ຺ສາຍ ສຕ຺ຖາ ສພ຺ພຎ຺ຎຸຕໍ ປຕ຺ໂຕ, ຕສ຺ມາ ຕສ຺ສານຸຠາວໍ ທສ຺ເສນ຺ໂຕ ເອວມາຫ. ຕຕ຺ຖ ອສນ຺ຕຸຏ຺ຐິຕາ ກຸສເລສຸ ຘມ຺ເມສູຕິ ອິມິນາ ອິມໍ ທີເປຕິ – ‘‘ອຫໍ ຌານມຕ຺ຕເກນ ວາ ໂອຠາສນິມິຕ຺ຕມຕ຺ຕເກນ ວາ ອສນ຺ຕຸຏ຺ໂຐ ຫຸຕ຺ວາ ອຣຫຕ຺ຕມຄ຺ຄເມວ ອຸປ຺ປາເທສິໍ. ຍາວ ໂສ ນ ອຸປ຺ປຊ຺ຊິ, ນ ຕາວາຫໍ ສນ຺ຕຸຏ຺ໂຐ ອໂຫສິໍ. ປຘານສ຺ມິໍ ຈ ອນຸກ຺ກຓ຺ຐິໂຕ ຫຸຕ຺ວາ ອໂນສກ຺ກນາຍ ຐຕ຺ວາເຍວ ປຘານກິຣິຍໍ ອກາສິ’’ນ຺ຕິ ອິມມຕ຺ຖໍ ທສ຺ເສນ຺ໂຕ ຍາ ຈ ອປ຺ປຏິວານິຕາຕິອາທິມາຫ. ຕຕ຺ຖ ອປ຺ປຏິວານິຕາຕິ ອປ຺ປຏິກ຺ກມນາ ອໂນສກ຺ກນາ. ອປ຺ປຏິວານີ ສຸທາຫໍ, ຠິກ຺ຂເວ, ປທຫາມີຕິ ເອຕ຺ຖ ສຸທນ຺ຕິ ນິປາຕມຕ຺ຕໍ. ອຫໍ, ຠິກ຺ຂເວ, ອໂນສກ຺ກນາຍໍ ຐິໂຕ ໂພຘິສຕ຺ຕກາເລ ສພ຺ພຎ຺ຎຸຕໍ ປຕ຺ເຖນ຺ໂຕ ປຘານມກາສິນ຺ຕິ ອຍເມຕ຺ຖ ອຕ຺ໂຖ.

ອິທານິ ຍຖາ ເຕນ ຕໍ ປຘານໍ ກຕໍ, ຕໍ ທສ຺ເສນ຺ໂຕ ກາມໍ ຕໂຈ ຈາຕິອາທິມາຫ. ຕຕ຺ຖ ປຕ຺ຕພ຺ພນ຺ຕິ ອິມິນາ ປຕ຺ຕພ຺ພໍ ຄຸຓຊາຕໍ ທສ຺ເສຕິ. ປຸຣິສຖາເມນາຕິອາທິນາ ປຸຣິສສ຺ສ ຎາຓຖາໂມ ຎາຓວີຣິຍໍ ຎາຓປຣກ຺ກໂມ ຈ ກຖິໂຕ. ສຓ຺ຐານນ຺ຕິ ຐປນາ ອປ຺ປວຕ຺ຕນາ ໂອສກ຺ກນາ, ປຏິປ຺ປສ຺ສທ຺ຘີຕິ ອຕ຺ໂຖ. ເອຕ຺ຕາວຕາ ເຕນ ຈຕຸຣງ຺ຄສມນ຺ນາຄຕໍ ວີຣິຍາຘິຏ຺ຐານໍ ນາມ ກຖິຕໍ. ເອຕ຺ຖ ຫິ ກາມໍ ຕໂຈ ຈາຕິ ເອກໍ ອງ຺ຄໍ, ນ຺ຫາຣຸ ຈາຕິ ເອກໍ, ອຏ຺ຐິ ຈາຕິ ເອກໍ, ມໍສໂລຫິຕນ຺ຕິ ເອກໍ, ອິມານິ ຈຕ຺ຕາຣິ ອງ຺ຄານິ. ປຸຣິສຖາເມນາຕິອາທີນິ ອຘິມຕ຺ຕວີຣິຍາຘິວຈນານິ. ອິຕິ ປຸຣິເມຫິ ຈຕູຫິ ອງ຺ເຄຫິ ສມນ຺ນາຄເຕນ ຫຸຕ຺ວາ ເອວໍ ອຘິຏ຺ຐິຕໍ ວີຣິຍໍ ຈຕຸຣງ຺ຄສມນ຺ນາຄຕໍ ວີຣິຍາຘິຏ຺ຐານໍ ນາມາຕິ ເວທິຕພ຺ພໍ. ເອຕ຺ຕາວຕາ ເຕນ ໂພຘິປລ຺ລງ຺ເກ ອຕ຺ຕໂນ ອາຄມນີຍປຏິປທາ ກຖິຕາ.

ອິທານິ ຕາຍ ປຏິປທາຍ ປຏິລທ຺ຘຄຸຓໍ ກເຖຕຸໍ ຕສ຺ສ ມຍ຺ຫໍ, ຠິກ຺ຂເວຕິອາທິມາຫ. ຕຕ຺ຖ ອປ຺ປມາທາຘິຄຕາຕິ ສຕິອວິປ຺ປວາສສງ຺ຂາເຕນ ອປ຺ປມາເທນ ອຘິຄຕາ, ນ ສຸຕ຺ຕປ຺ປມຕ຺ເຕນ ລທ຺ຘາ. ສມ຺ໂພຘີຕິ ຈຕຸມຄ຺ຄຎາຓຎ຺ເຈວ ສພ຺ພຎ຺ຎຸຕຎ຺ຎາຓຎ຺ຈ. ນ ຫິ ສກ຺ກາ ເອຕໍ ສຸຕ຺ຕປ຺ປມຕ຺ເຕນ ອຘິຄນ຺ຕຸນ຺ຕິ. ເຕນາຫ – ‘‘ອປ຺ປມາທາຘິຄຕາ ສມ຺ໂພຘີ’’ຕິ. ອນຸຕ຺ຕໂຣ ໂຍຄກ຺ເຂໂມຕິ ນ ເກວລໍ ໂພຘິເຍວ, ອຣຫຕ຺ຕຜລນິພ຺ພານສງ຺ຂາໂຕ ອນຸຕ຺ຕໂຣ ໂຍຄກ຺ເຂໂມປິ ອປ຺ປມາທາຘິຄໂຕວ.

ອິທານິ ອຕ຺ຕນາ ປຏິລທ຺ຘຄຸເຓສຸ ຠິກ຺ຂຸສງ຺ຆໍ ສມາທເປນ຺ໂຕ ຕຸມ຺ເຫ ເຈປິ ຠິກ຺ຂເວຕິອາທິມາຫ. ຕຕ຺ຖ ຍສ຺ສຕ຺ຖາຍາຕິ ຍສ຺ສ ອຕ຺ຖາຍ, ຍໍ ອຸປສມ຺ປຊ຺ຊ ວິຫຣິຕຸກາມາ ຫຸຕ຺ວາຕິ ອຕ຺ໂຖ. ຕທນຸຕ຺ຕຣນ຺ຕິ ຕໍ ອນຸຕ຺ຕຣໍ. ພ຺ຣຫ຺ມຈຣິຍປຣິໂຍສານນ຺ຕິ ມຄ຺ຄພ຺ຣຫ຺ມຈຣິຍສ຺ສ ປຣິໂຍສານຠູຕໍ ອຣິຍຜລໍ. ອຠິຎ຺ຎາ ສຈ຺ຉິກຕ຺ວາຕິ ອຠິຎ຺ຎາຍ ອຸຕ຺ຕມປຎ຺ຎາຍ ປຈ຺ຈກ຺ຂໍ ກຕ຺ວາ. ອຸປສມ຺ປຊ຺ຊ ວິຫຣິສ຺ສຖາຕິ ປຏິລຠິຕ຺ວາ ປາປຸຓິຕ຺ວາ ວິຫຣິສ຺ສຖ. ຕສ຺ມາຕິ ຍສ຺ມາ ອປ຺ປຏິວານປຘານໍ ນາເມຕໍ ພຫູປກາຣໍ ອຸຕ຺ຕມຕ຺ຖສາຘກໍ, ຕສ຺ມາ. ປຎ຺ຈມໍ.