໑. ວຊ຺ຊສຸຕ຺ຕວຓ຺ຓນາ

໑. ທຸກນິປາຕສ຺ສ ປຐເມ ວຊ຺ຊານີຕິ ໂທສາ ອປຣາຘາ. ທິຏ຺ຐຘມ຺ມິກນ຺ຕິ ທິຏ຺ເຐວ ຘມ຺ເມ ອິມສ຺ມິໍເຍວ ອຕ຺ຕຠາເວ ອຸປ຺ປນ຺ນຜລໍ. ສມ຺ປຣາຍິກນ຺ຕິ ສມ຺ປຣາເຍ ອນາຄເຕ ອຕ຺ຕຠາເວ ອຸປ຺ປນ຺ນຜລໍ. ອາຄຸຈາຣິນ຺ຕິ ປາປກາຣິໍ ອປຣາຘກາຣກໍ. ຣາຊາໂນ ຄເຫຕ຺ວາ ວິວິຘາ ກມ຺ມກາຣຓາ ກາເຣນ຺ເຕຕິ ໂຈຣໍ ຄເຫຕ຺ວາ ວິວິຘາ ກມ຺ມກາຣຓາ ຣາຊປຸຣິສາ ກໂຣນ຺ຕິ, ຣາຊາໂນ ປນ ຕາ ກາເຣນ຺ຕິ ນາມ. ຕໍ ໂຈຣໍ ເອວໍ ກມ຺ມກາຣຓາ ກາຣິຍມານໍ ເອສ ປສ຺ສຕິ. ເຕນ ວຸຕ຺ຕໍ – ‘‘ປສ຺ສຕິ ໂຈຣໍ ອາຄຸຈາຣິໍ ຣາຊາໂນ ຄເຫຕ຺ວາ ວິວິຘາ ກມ຺ມກາຣຓາ ກາເຣນ຺ເຕ’’ຕິ. ອທ຺ຘທຓ຺ຑເກຫີຕິ ມຸຄ຺ຄເຣຫິ, ປຫາຣສາຘນຕ຺ຖໍ ວາ ຈຕຸຫຕ຺ຖທຓ຺ຑໍ ທ຺ເວຘາ ເຉຕ຺ວາ ຄຫິຕທຓ຺ຑເກຫິ. ພິລງ຺ຄຖາລິກນ຺ຕິ ກຎ຺ຊິຍອຸກ຺ຂລິກກມ຺ມກາຣຓໍ. ຕໍ ກໂຣນ຺ຕາ ສີສກຏາຫໍ ອຸປ຺ປາເຏຕ຺ວາ ຕຕ຺ຕໍ ອໂຍຄຸຬໍ ສຓ຺ຑາເສນ ຄເຫຕ຺ວາ ຕຕ຺ຖ ປກ຺ຂິປນ຺ຕິ, ເຕນ ມຕ຺ຖລຸງ຺ຄໍ ປກ຺ກຸຖິຕ຺ວາ ອຸຕ຺ຕຣຕິ. ສງ຺ຂມຸຓ຺ຑິກນ຺ຕິ ສງ຺ຂມຸຓ຺ຑກມ຺ມກາຣຓໍ. ຕໍ ກໂຣນ຺ຕາ ອຸຕ຺ຕໂຣຏ຺ຐອຸຠໂຕກຓ຺ຓຈູຬິກຄລວາຏກປຣິຈ຺ເຉເທນ ຈມ຺ມໍ ຉິນ຺ທິຕ຺ວາ ສພ຺ພເກເສ ເອກໂຕ ຄຓ຺ຐິໍ ກຕ຺ວາ ທຓ຺ຑເກນ ເວເຐຕ຺ວາ ອຸປ຺ປາເຏນ຺ຕິ, ສຫ ເກເສຫິ ຈມ຺ມໍ ອຸຏ຺ຐຫຕິ. ຕໂຕ ສີສກຏາຫໍ ຖູລສກ຺ຂຣາຫິ ຆໍສິຕ຺ວາ ໂຘວນ຺ຕາ ສງ຺ຂວຓ຺ຓໍ ກໂຣນ຺ຕິ. ຣາຫຸມຸຂນ຺ຕິ ຣາຫຸມຸຂກມ຺ມກາຣຓໍ. ຕໍ ກໂຣນ຺ຕາ ສງ຺ກຸນາ ມຸຂໍ ວິວຣິຕ຺ວາ ອນ຺ໂຕມຸເຂ ທີປໍ ຊາເລນ຺ຕິ, ກຓ຺ຓຈູຬິກາຫິ ວາ ປຏ຺ຐາຍ ມຸຂໍ ນິຂາທເນນ ຂນນ຺ຕິ, ໂລຫິຕໍ ປຄ຺ຆຣິຕ຺ວາ ມຸຂໍ ປູເຣຕິ.

ໂຊຕິມາລິກນ຺ຕິ ສກລສຣີຣໍ ເຕລປິໂລຕິກາຍ ເວເຐຕ຺ວາ ອາລິມ຺ເປນ຺ຕິ. ຫຕ຺ຖປຊ຺ໂຊຕິກນ຺ຕິ ຫຕ຺ເຖ ເຕລປິໂລຕິກາຍ ເວເຐຕ຺ວາ ທີປໍ ວິຍ ປຊ຺ຊາເລນ຺ຕິ. ເອຣກວຕ຺ຕິກນ຺ຕິ ເອຣກວຕ຺ຕກມ຺ມກາຣຓໍ. ຕໍ ກໂຣນ຺ຕາ ເຫຏ຺ຐາຄີວໂຕ ປຏ຺ຐາຍ ຈມ຺ມວຏ຺ເຏ ກນ຺ຕິຕ຺ວາ ໂຄປ຺ຜເກ ຐເປນ຺ຕິ, ອຖ ນໍ ໂຍຕ຺ເຕຫິ ພນ຺ຘິຕ຺ວາ ກຑ຺ຒນ຺ຕິ. ໂສ ອຕ຺ຕໂນ ຈມ຺ມວຏ຺ເຏ ອກ຺ກມິຕ຺ວາ ອກ຺ກມິຕ຺ວາ ປຕຕິ. ຈີຣກວາສິກນ຺ຕິ ຈີຣກວາສິກກມ຺ມກາຣຓໍ. ຕໍ ກໂຣນ຺ຕາ ຕເຖວ ຈມ຺ມວຏ຺ເຏ ກນ຺ຕິຕ຺ວາ ກຏິຍໍ ຐເປນ຺ຕິ, ກຏິໂຕ ປຏ຺ຐາຍ ກນ຺ຕິຕ຺ວາ ໂຄປ຺ຜເກສຸ ຐເປນ຺ຕິ, ອຸປຣິເມຫິ ເຫຏ຺ຐິມສຣີຣໍ ຈີຣກນິວາສນນິວຕ຺ຖໍ ວິຍ ໂຫຕິ. ເອເຓຍ຺ຍກນ຺ຕິ ເອເຓຍ຺ຍກກມ຺ມກາຣຓໍ. ຕໍ ກໂຣນ຺ຕາ ອຸໂຠສຸ ກປ຺ປເຣສຸ ຈ ອຸໂຠສຸ ຊາຓຸເກສຸ ຈ ອຍວລຍານິ ທຕ຺ວາ ອຍສູລານິ ໂກຏ຺ເຏນ຺ຕິ. ໂສ ຈຕູຫິ ອຍສູເລຫິ ຠູມິຍໍ ປຕິຏ຺ຐຫຕິ. ອຖ ນໍ ປຣິວາເຣຕ຺ວາ ອຄ຺ຄິໍ ກໂຣນ຺ຕິ. ‘‘ເອເຓຍ຺ຍໂກ ໂຊຕິປຣິຄ຺ຄໂຫ ຍຖາ’’ຕິ ອາຄຕຏ຺ຐາເນປິ ອິທເມວ ວຸຕ຺ຕໍ. ຕໍ ກາເລນ ກາລໍ ສູລານິ ອປເນຕ຺ວາ ຈຕູຫິ ອຏ຺ຐິໂກຏີຫິເຍວ ຐເປນ຺ຕິ. ເອວຣູປາ ກມ຺ມກາຣຓາ ນາມ ນຕ຺ຖິ.

ພຬິສມໍສິກນ຺ຕິ ອຸຠໂຕມຸເຂຫິ ພຬິເສຫິ ປຫຣິຕ຺ວາ ຈມ຺ມມໍສນ຺ຫາຣູນິ ອຸປ຺ປາເຏນ຺ຕິ. ກຫາປຓິກນ຺ຕິ ສກລສຣີຣໍ ຕິຓ຺ຫາຫິ ວາສີຫິ ໂກຏິໂຕ ປຏ຺ຐາຍ ກຫາປຓມຕ຺ຕໍ, ກຫາປຓມຕ຺ຕໍ ປາເຕນ຺ຕາ ໂກຏ຺ເຏນ຺ຕິ. ຂາຣາປຕຈ຺ຉິກນ຺ຕິ ສຣີຣໍ ຕຕ຺ຖ ຕຕ຺ຖ ອາວຸເຘຫິ ປຫຣິຕ຺ວາ ໂກຈ຺ເຉຫິ ຂາຣໍ ຆໍສນ຺ຕິ, ຈມ຺ມມໍສນ຺ຫາຣູນິ ປຄ຺ຆຣິຕ຺ວາ ອຏ຺ຐິກສງ຺ຂລິກາວ ຕິຏ຺ຐຕິ. ປລິຆປຣິວຕ຺ຕິກນ຺ຕິ ເອເກນ ປສ຺ເສນ ນິປຊ຺ຊາເປຕ຺ວາ ກຓ຺ຓຈ຺ຉິທ຺ເທນ ອຍສູລໍ ໂກຏ຺ເຏຕ຺ວາ ປຖວິຍາ ເອກາພທ຺ຘໍ ກໂຣນ຺ຕິ. ອຖ ນໍ ປາເທ ຄເຫຕ຺ວາ ອາວິຎ຺ຉນ຺ຕິ. ປລາລປີຐກນ຺ຕິ ເຉໂກ ກາຣຓິໂກ ຉວິຈມ຺ມໍ ອຈ຺ຉິນ຺ທິຕ຺ວາ ນິສທໂປເຕຫິ ອຏ຺ຐີນິ ຠິນ຺ທິຕ຺ວາ ເກເສສຸ ຄເຫຕ຺ວາ ອຸກ຺ຂິປຕິ, ມໍສຣາສິເຍວ ໂຫຕິ. ອຖ ນໍ ເກເສເຫວ ປຣິໂຍນນ຺ຘິຕ຺ວາ ຄຓ຺ຫນ຺ຕິ, ປລາລວຏ຺ຏິໍ ວິຍ ກຕ຺ວາ ປຸນ ເວເຐນ຺ຕິ. ສຸນເຂຫິປີຕິ ກຕິປຍານິ ທິວສານິ ອາຫາຣໍ ອທຕ຺ວາ ຉາຕກສຸນເຂຫິ ຂາທາເປນ຺ຕິ. ເຕ ມຸຫຸຕ຺ເຕນ ອຏ຺ຐິກສງ຺ຂລິກເມວ ກໂຣນ຺ຕິ. ສູເລ ອຸຕ຺ຕາເສນ຺ເຕຕິ ສູເລ ອາໂຣເປນ຺ເຕ.

ນ ປເຣສໍ ປາຠຕໍ ວິລຸມ຺ປນ຺ໂຕ ຈຣຕີຕິ ປເຣສໍ ສນ຺ຕກໍ ຠຓ຺ຑໍ ປຣມ຺ມຸຂໍ ອາຠຕໍ ອນ຺ຕມໂສ ອນ຺ຕຣວີຖິຍໍ ປຕິຕໍ ສຫສ຺ສຠຓ຺ຑິກມ຺ປິ ທິສ຺ວາ ‘‘ອິມິນາ ຊີວິສ຺ສາມີ’’ຕິ ວິລຸມ຺ປນ຺ໂຕ ນ ວິຈຣຕິ, ໂກ ອິມິນາ ອຕ຺ໂຖຕິ ປິຏ຺ຐິປາເທນ ວາ ປວຏ຺ເຏຕ຺ວາ ຄຈ຺ຉຕິ.

ປາປໂກຕິ ລາມໂກ. ທຸກ຺ໂຂຕິ ອນິຏ຺ໂຐ. ກິຎ຺ຈ ຕນ຺ຕິ ກິໍ ນາມ ຕໍ ກາຣຓໍ ຠເວຍ຺ຍ. ຍາຫນ຺ຕິ ເຍນ ອຫໍ. ກາຍທຸຈ຺ຈຣິຕນ຺ຕິ ປາຓາຕິປາຕາທິ ຕິວິຘໍ ອກຸສລໍ ກາຍກມ຺ມໍ. ກາຍສຸຈຣິຕນ຺ຕິ ຕສ຺ສ ປຏິປກ຺ຂຠູຕໍ ຕິວິຘໍ ກຸສລກມ຺ມໍ. ວຈີທຸຈ຺ຈຣິຕນ຺ຕິ ມຸສາວາທາທິ ຈຕຸພ຺ພິຘໍ ອກຸສລໍ ວຈີກມ຺ມໍ. ວຈີສຸຈຣິຕນ຺ຕິ ຕສ຺ສ ປຏິປກ຺ຂຠູຕໍ ຈຕຸພ຺ພິຘໍ ກຸສລກມ຺ມໍ. ມໂນທຸຈ຺ຈຣິຕນ຺ຕິ ອຠິຊ຺ຌາທິ ຕິວິຘໍ ອກຸສລກມ຺ມໍ. ມໂນສຸຈຣິຕນ຺ຕິ ຕສ຺ສ ປຏິປກ຺ຂຠູຕໍ ຕິວິຘໍ ກຸສລກມ຺ມໍ. ສຸທ຺ຘໍ ອຕ຺ຕານໍ ປຣິຫຣຕີຕິ ເອຕ຺ຖ ທຸວິຘາ ສຸທ຺ຘິ – ປຣິຍາຍໂຕ ຈ ນິປ຺ປຣິຍາຍໂຕ ຈ. ສຣຓຄມເນນ ຫິ ປຣິຍາເຍນ ສຸທ຺ຘໍ ອຕ຺ຕານໍ ປຣິຫຣຕິ ນາມ. ຕຖາ ປຎ຺ຈຫິ ສີເລຫິ, ທສຫິ ສີເລຫິ – ຈຕຸປາຣິສຸທ຺ຘິສີເລນ, ປຐມຊ຺ຌາເນນ…ເປ… ເນວສຎ຺ຎານາສຎ຺ຎາຍຕເນນ, ໂສຕາປຕ຺ຕິມຄ຺ເຄນ, ໂສຕາປຕ຺ຕິຜເລນ…ເປ… ອຣຫຕ຺ຕມຄ຺ເຄນ ປຣິຍາເຍນ ສຸທ຺ຘໍ ອຕ຺ຕານໍ ປຣິຫຣຕິ ນາມ. ອຣຫຕ຺ຕຜເລ ປຕິຏ຺ຐິໂຕ ປນ ຂີຓາສໂວ ຉິນ຺ນມູລເກ ປຎ຺ຈກ຺ຂນ຺ເຘ ນ຺ຫາເປນ຺ໂຕປິ ຂາທາເປນ຺ໂຕປິ ຠຸຎ຺ຊາເປນ຺ໂຕປິ ນິສີທາເປນ຺ໂຕປິ ນິປຊ຺ຊາເປນ຺ໂຕປິ ນິປ຺ປຣິຍາເຍເນວ ສຸທ຺ຘໍ ນິມ຺ມລໍ ອຕ຺ຕານໍ ປຣິຫຣຕິ ປຏິຊຄ຺ຄຕີຕິ ເວທິຕພ຺ໂພ.

ຕສ຺ມາຕິ ຍສ຺ມາ ອິມານິ ທ຺ເວ ວຊ຺ຊາເນວ, ໂນ ນ ວຊ຺ຊານິ, ຕສ຺ມາ. ວຊ຺ຊຠີຣຸໂນຕິ ວຊ຺ຊຠີຣຸກາ. ວຊ຺ຊຠຍທສ຺ສາວິໂນຕິ ວຊ຺ຊານິ ຠຍໂຕ ທສ຺ສນສີລາ. ເອຕໍ ປາຏິກງ຺ຂນ຺ຕິ ເອຕໍ ອິຈ຺ຉິຕພ຺ພໍ, ເອຕໍ ອວສ຺ສໍຠາວີຕິ ອຕ຺ໂຖ. ຍນ຺ຕິ ນິປາຕມຕ຺ຕໍ, ກາຣຓວຈນໍ ວາ ເຍນ ກາຣເຓນ ປຣິມຸຈ຺ຈິສ຺ສຕິ ສພ຺ພວຊ຺ເຊຫິ. ເກນ ປນ ກາຣເຓນ ປຣິມຸຈ຺ຈິສ຺ສຕີຕິ? ຈຕຸຕ຺ຖມຄ຺ເຄນ ເຈວ ຈຕຸຕ຺ຖຜເລນ ຈ. ມຄ຺ເຄນ ຫິ ປຣິມຸຈ຺ຈຕິ ນາມ, ຜລໍ ປຕ຺ໂຕ ປຣິມຸຕ຺ໂຕ ນາມ ໂຫຕີຕິ. ກິໍ ປນ ຂີຓາສວສ຺ສ ອກຸສລໍ ນ ວິປຈ຺ຈຕີຕິ? ວິປຈ຺ຈຕິ, ຕໍ ປນ ຂີຓາສວຠາວໂຕ ປຸພ຺ເພ ກຕໍ. ຕຎ຺ຈ ໂຂ ອິມສ຺ມິໍເຍວ ອຕ຺ຕຠາເວ, ສມ຺ປຣາເຍ ປນສ຺ສ ກມ຺ມຜລໍ ນາມ ນຕ຺ຖີຕິ. ປຐມໍ.