໕-໗. ປຐມສຸຂສຸຕ຺ຕາທິວຓ຺ຓນາ

໖໕-໖໗. ປຎ຺ຈເມ ວຏ຺ຏມູລກໍ ສຸຂທຸກ຺ຂໍ ປຸຈ຺ຉິຕໍ, ຉຏ຺ເຐ ສາສນມູລກໍ. ສຕ຺ຕເມ ນຬກປານນ຺ຕິ ອຕີເຕ ໂພຘິສຕ຺ຕສ຺ສ ໂອວາເທ ຐຕ຺ວາ ວານຣຍູເຖນ ນເຬຫິ ອຸທກສ຺ສ ປີຕຏ຺ຐາເນ ມາປິຕຕ຺ຕາ ເອວໍລທ຺ຘນາໂມ ນິຄໂມ. ຕຸຓ຺ຫີຠູຕໍ ຕຸຓ຺ຫີຠູຕນ຺ຕິ ຍໍ ຍໍ ທິສໍ ອນຸວິໂລເກຕິ, ຕຕ຺ຖ ຕຕ຺ຖ ຕຸຓ຺ຫີຠູຕເມວ. ອນຸວິໂລເກຕ຺ວາຕິ ຕໂຕ ຕໂຕ ວິໂລເກຕ຺ວາ. ປິຏ຺ຐິ ເມ ອາຄິລາຍຕີຕິ ກສ຺ມາ ອາຄິລາຍຕິ? ຠຄວໂຕ ຫິ ຉ ວສ຺ສານິ ມຫາປຘານໍ ປທຫນ຺ຕສ຺ສ ມຫນ຺ຕໍ ກາຍທຸກ຺ຂໍ ອໂຫສິ, ອຖສ຺ສ ອປຣຠາເຄ ມຫລ຺ລກກາເລ ປິຏ຺ຐິວາໂຕ ອຸປ຺ປຊ຺ຊິ. ອຸປາທິນ຺ນກສຣີຣສ຺ສ ຐານນິສຊ຺ຊາທີຫິ ອປ຺ປມຕ຺ຕເກນ ອາພາເຘນ ນ ສກ຺ກາ ເກນຈິ ຠວິຕຸໍ. ຕໍ ຄເຫຕ຺ວາປິ ເຖຣສ຺ສ ໂອກາສກຣຓຕ຺ຖໍ ເອວມາຫ. ສງ຺ຆາຏິໍ ປຎ຺ຎາເປຕ຺ວາ ເອກມນ຺ເຕ ປຕິຣູປຏ຺ຐາເນ ປຎ຺ຎຕ຺ຕສ຺ສ ກປ຺ປິຍມຎ຺ຈສ຺ສ ອຸປຣິ ອຕ຺ຖຣິຕ຺ວາ.