໙. ປຐມໂກສລສຸຕ຺ຕວຓ຺ຓນາ

໒໙. ນວເມ ຍາວຕາຕິ ຍຕ຺ຕກາ. ກາສິໂກສລາຕິ ກາສິໂກສລຊນປທາ. ອຕ຺ເຖວ ອຎ຺ຎຖຕ຺ຕນ຺ຕິ ຐິຕສ຺ສ ອຎ຺ຎຖຕ຺ຕໍ ອຕ຺ຖິເຍວ. ອຕ຺ຖິ ວິປຣິຓາໂມຕິ ມຣຓມ຺ປິ ອຕ຺ຖິເຍວ. ຕສ຺ມິມ຺ປິ ນິພ຺ພິນ຺ທຕີຕິ ຕສ຺ມິມ຺ປິ ສມ຺ປຕ຺ຕິຊາເຕ ອຸກ຺ກຓ຺ຐຕິ. ອຄ຺ເຄ ວິຣຊ຺ຊຕີຕິ ສມ຺ປຕ຺ຕິຍາ ອຄ຺ເຄ ໂກສລຣາຊຠາເວ ວິຣຊ຺ຊຕິ. ປເຄວ ຫີນສ຺ມິນ຺ຕິ ປຐມຕຣໍເຍວ ຫີເນ ອິຕ຺ຕຣມນຸສ຺ສານໍ ປຎ຺ຈ ກາມຄຸຓຊາເຕ.

ມໂນມຍາຕິ ຌານມເນນ ນິພ຺ພຕ຺ຕາ. ພາຣາຓເສຍ຺ຍກນ຺ຕິ ພາຣາຓສິຍໍ ອຸປ຺ປນ຺ນໍ. ຕຕ຺ຖ ກິຣ ກປ຺ປາໂສປິ ມຸທຸ, ສຸຕ຺ຕກນ຺ຕິກາໂຍປິ ຕນ຺ຕວາຍາປິ ເຉກາ, ອຸທກມ຺ປິ ສຸຈິ ສິນິທ຺ຘໍ. ອຸຠໂຕຠາຄວິມຏ຺ຐນ຺ຕິ ທ຺ວີສຸປິ ປສ຺ເສສຸ ມຏ຺ຐໍ ມຸທຸ ສິນິທ຺ຘໍ ຂາຍຕິ. ຈຕສ຺ໂສ ປຏິປທາ ໂລກິຍໂລກຸຕ຺ຕຣມິສ຺ສິກາ ກຖິຕາ. ສຎ຺ຎາສຸ ປຐມາ ກາມາວຈຣສຎ຺ຎາ, ທຸຕິຍາ ຣູປາວຈຣສຎ຺ຎາ, ຕຕິຍາ ໂລກຸຕ຺ຕຣສຎ຺ຎາ, ຈຕຸຕ຺ຖາ ອາກິຎ຺ຈຎ຺ຎາຍຕນສຎ຺ຎາ. ຍສ຺ມາ ປນ ສາ ສຎ຺ຎາ ອຄ຺ຄາຕິ ອາຄຕາ, ຕໂຕ ປຣໍ ສຎ຺ຎາປຎ຺ຎຕ຺ຕິ ນາມ ນຕ຺ຖິ, ຕສ຺ມາ ອຄ຺ຄນ຺ຕິ ວຸຕ຺ຕາ.

ພາຫິຣການນ຺ຕິ ສາສນໂຕ ພຫິທ຺ຘາ ປວຕ຺ຕານໍ. ໂນ ຈສ຺ສໍ ໂນ ຈ ເມ ສິຍາຕິ ສເຈ ອຫໍ ອຕີເຕ ນ ຠວິສ຺ສໍ, ເອຕຣຫິປິ ເມ ອຍໍ ອຕ຺ຕຠາໂວ ນ ສິຍາ. ນ ຠວິສ຺ສາມິ ນ ເມ ຠວິສ຺ສຕີຕິ ສເຈປິ ອນາຄເຕ ນ ຠວິສ຺ສາມິ, ນ ຈ ເມ ກິຎ຺ຈິ ປລິໂພຘຊາຕໍ ຠວິສ຺ສຕິ. ອຄ຺ເຄ ວິຣຊ຺ຊຕີຕິ ອຸຈ຺ເຉທທິຏ຺ຐິຍໍ ວິຣຊ຺ຊຕິ. ອຸຈ຺ເຉທທິຏ຺ຐິ ຫິ ອິຘ ນິພ຺ພານສ຺ສ ສນ຺ຕຕາຍ ອຄ຺ຄນ຺ຕິ ຊາຕາ.

ປຣມຕ຺ຖວິສຸທ຺ຘິນ຺ຕິ ອຸຕ຺ຕມຕ຺ຖວິສຸທ຺ຘິໍ. ເນວສຎ຺ຎານາສຎ຺ຎາຍຕນສມາປຕ຺ຕິຍາ ເອຕໍ ອຘິວຈນໍ. ອາກິຎ຺ຈຎ຺ຎາຍຕນຎ຺ຫິ ວິປສ຺ສນາປທຏ຺ຐານຕ຺ຕາ ອຄ຺ຄໍ ນາມ ຊາຕໍ, ເນວສຎ຺ຎານາສຎ຺ຎາຍຕນໍ ທີຆາຍຸກຕ຺ຕາ. ປຣມທິຏ຺ຐຘມ຺ມນິພ຺ພານນ຺ຕິ ອິມສ຺ມິຎ຺ເຎວ ອຕ຺ຕຠາເວ ປຣມນິພ຺ພານໍ. ອນຸປາທາ ວິໂມກ຺ໂຂຕິ ຈຕູຫິ ອຸປາທາເນຫິ ອຄ຺ຄເຫຕ຺ວາ ຈິຕ຺ຕສ຺ສ ວິໂມກ຺ໂຂ. ອຣຫຕ຺ຕສ຺ເສຕໍ ນາມໍ. ປຣິຎ຺ຎນ຺ຕິ ສມຕິກ຺ກມໍ. ຕຕ຺ຖ ຠຄວາ ປຐມຊ຺ຌາເນນ ກາມານໍ ປຣິຎ຺ຎໍ ປຎ຺ຎາເປຕິ, ອຣູປາວຈເຣຫິ ຣູປານໍ ປຣິຎ຺ຎໍ ປຎ຺ຎາເປຕິ, ອນຸປາທານິພ຺ພາເນນ ເວທນານໍ ປຣິຎ຺ຎໍ ປຎ຺ຎາເປຕິ. ນິພ຺ພານຎ຺ຫິ ສພ຺ພເວທຍິຕປ຺ປຫານຕ຺ຕາ ເວທນານໍ ປຣິຎ຺ຎາ ນາມ. ອນຸປາທາປຣິນິພ຺ພານນ຺ຕິ ອປຈ຺ຈຍປຣິນິພ຺ພານໍ. ອິທໍ ປນ ສຸຕ຺ຕໍ ກເຖນ຺ໂຕ ຠຄວາ ອນຠິຣຕິປີຬິຕານິ ປຎ຺ຈ ຠິກ຺ຂຸສຕານິ ທິສ຺ວາ ເຕສໍ ອນຠິຣຕິວິໂນທນຕ຺ຖໍ ກເຖສິ. ເຕປິ ອນຠິຣຕິໍ ວິໂນເທຕ຺ວາ ເທສນານຸສາເຣນ ຎາຓໍ ເປເສຕ຺ວາ ໂສຕາປນ຺ນາ ຫຸຕ຺ວາ ອປຣຠາເຄ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິໍສູຕິ.