໖. ກາຬີສຸຕ຺ຕວຓ຺ຓນາ

໒໖. ຉຏ຺ເຐ ກຸມາຣິປຎ຺ເຫສູຕິ ກຸມາຣີນໍ ມາຣຘີຕານໍ ປຸຈ຺ຉາສຸ. ອຕ຺ຖສ຺ສ ປຕ຺ຕິໍ ຫທຍສ຺ສ ສນ຺ຕິນ຺ຕິ ທ຺ວີຫິປິ ປເທຫິ ອຣຫຕ຺ຕເມວ ກຖິຕໍ. ເສນນ຺ຕິ ຣາຄາທິກິເລສເສນໍ. ປິຍສາຕຣູປນ຺ຕິ ປິຍຊາຕິເກສຸ ຈ ສາຕຊາຕິເກສຸ ຈ ວຕ຺ຖູສຸ ອຸປ຺ປຊ຺ຊນໂຕ ເອວໍລທ຺ຘນາມໍ. ເອໂກຫໍ ຌາຍໍ ສຸຂມນຸໂພຘິນ຺ຕິ ເອວໍ ກິເລສເສນໍ ຊິນິຕ຺ວາ ອຫໍ ເອກໂກວ ຌາຍນ຺ໂຕ ສຸຂໍ ອນຸພຸຊ຺ຌິໍ ສຈ຺ຉິອກາສິໍ. ສກ຺ຂິນ຺ຕິ ສກ຺ຂິຠາວປ຺ປຕ຺ຕໍ ຘມ຺ມສກ຺ຂິໍ. ນ ສມ຺ປຊ຺ຊຕິ ເກນຈິ ເມຕິ ມຍ຺ຫໍ ເກນຈິ ສທ຺ຘິໍ ມິຕ຺ຕຘມ຺ໂມ ນາມ ນຕ຺ຖິ. ປຖວີກສິຓສມາປຕ຺ຕິປຣມາ ໂຂ, ຠຄິນິ, ເອເກ ສມຓພ຺ຣາຫ຺ມຓາ ອຕ຺ໂຖຕິ ອຠິນິພ຺ພຕ຺ເຕສຸນ຺ຕິ ປຖວີກສິຓສມາປຕ຺ຕິປຣໂມ ອຸຕ຺ຕໂມ ອຕ຺ໂຖຕິ ຄເຫຕ຺ວາ ອຠິນິພ຺ພຕ຺ເຕສຸໍ. ຍາວຕາ ໂຂ, ຠຄິນິ, ປຖວີກສິຓສມາປຕ຺ຕິປຣມຕາຕິ ຍຕ຺ຕກາ ປຖວີກສິຓສມາປຕ຺ຕິຍາ ອຸຕ຺ຕມໂກຏິ. ຕທຠິຎ຺ຎາສິ ຠຄວາຕິ ຕໍ ຠຄວາ ອຠິຎ຺ຎາປຎ຺ຎາຍ ອຠິຎ຺ຎາສິ. ອສ຺ສາທມທ຺ທສາຕິ ສມຸທຍສຈ຺ຈໍ ອທ຺ທສ. ອາທີນວມທ຺ທສາຕິ ທຸກ຺ຂສຈ຺ຈໍ ອທ຺ທສ. ນິສ຺ສຣຓມທ຺ທສາຕິ ນິໂຣຘສຈ຺ຈໍ ອທ຺ທສ. ມຄ຺ຄາມຄ຺ຄຎາຓທສ຺ສນມທ຺ທສາຕິ ມຄ຺ຄສຈ຺ຈໍ ອທ຺ທສ. ອຕ຺ຖສ຺ສ ປຕ຺ຕີຕິ ເອເຕສໍ ຈຕຸນ຺ນໍ ສຈ຺ຈານໍ ທິຏ຺ຐຕ຺ຕາ ອຣຫຕ຺ຕສງ຺ຂາຕສ຺ສ ອຕ຺ຖສ຺ສ ປຕ຺ຕິ, ສພ຺ພທຣຖປຣິຬາຫວູປສນ຺ຕຕາຍ ຫທຍສ຺ສ ສນ຺ຕີຕິ.