(໑໖) ໔. ເອກຘມ຺ມປາຬິ-ຈຕຸຕ຺ຖວຄ຺ຄວຓ຺ຓນາ

໓໒໒. ຈຕຸຕ຺ຖວຄ຺ຄສ຺ສ ປຐເມ ຊມ຺ພຸທີເປຕິ ຊມ຺ພຸຍາ ປຎ຺ຎາໂຕ ປາກໂຏ ທີໂປຕິ ຊມ຺ພຸທີໂປ. ອິມສ຺ສ ກິຣ ທີປສ຺ສ ສຎ຺ຎາຓຠູຕາ ໂຍຊນສຕຸພ຺ເພຘາ ປຓ຺ຓາສໂຍຊນສາຂາ ປຎ຺ຈທສໂຍຊນາວຏ຺ຏກ຺ຂນ຺ຘາ ຫິມວນ຺ຕປພ຺ພເຕ ຊາຕາ ກປ຺ປຏ຺ຐາຍິນີ ມຫາຊມ຺ພູ ນາມ ອຕ຺ຖິ, ຕາຍ ອຍໍ ທີໂປ ຊມ຺ພຸທີໂປຕິ ວຸຈ຺ຈຕິ. ຍຖາ ຈ ອິມສ຺ມິໍ ທີເປ ຊມ຺ພຸຣຸກ຺ໂຂ ກປ຺ປຏ຺ຐາຍີ, ຕຖາ ອປຣໂຄຍາເນ ກທມ຺ພຣຸກ຺ໂຂ, ອຸຕ຺ຕຣກຸຣູສຸ ກປ຺ປຣຸກ຺ໂຂ, ປຸພ຺ພວິເທເຫ ສິຣີສຣຸກ຺ໂຂ, ອສຸຣານໍ ຈິຕ຺ຕປາຏລິຣຸກ຺ໂຂ, ສຸປຓ຺ຓານໍ ສິມ຺ພລິຣຸກ຺ໂຂ, ເທວານໍ ປາຣິຈ຺ຉຕ຺ຕໂກຕິ ອິເມປິ ກປ຺ປຏ຺ຐາຍິໂນວ.

‘‘ປາຏລີ ສິມ຺ພລີ ຊມ຺ພູ, ເທວານໍ ປາຣິຈ຺ຉຕ຺ຕໂກ;

ກທມ຺ໂພ ກປ຺ປຣຸກ຺ໂຂ ຈ, ສິຣີໂສ ຠວຕິ ສຕ຺ຕໂມ’’ຕິ.

ອາຣາມຣາມເຓຍ຺ຍກນ຺ຕິ ປຸປ຺ຜາຣາມຜລາຣາມານໍ ຣາມເຓຍ຺ຍກໍ ເວຬຸວນ-ຊີວກມ຺ພວນ-ເຊຕວນປຸພ຺ພາຣາມສທິສໍ. ຕໍ ອິມສ຺ມິໍ ຊມ຺ພຸທີເປ ອປ຺ປມຕ຺ຕກໍ ປຣິຕ຺ຕກໍ, ນ ພຫຸກນ຺ຕິ ອຕ຺ໂຖ. ເສສປເທສຸປິ ເອເສວ ນໂຍ. ເອຕ຺ຖ ວນຣາມເຓຍ຺ຍກນ຺ຕິ ນາຄວນສາລວນຈມ຺ປກວນາທິສທິສໍ ວງ຺ກປພ຺ພຕຫິມວນ຺ຕປພ຺ພຕປເທສາທີສຸ ອຣຎ຺ຎວນໍ ເວທິຕພ຺ພໍ. ຠູມິຣາມເຓຍ຺ຍກນ຺ຕິ ເຊຕວນວິຫາຣມຄຘກ຺ເຂຕ຺ຕາທິສທິສໍ ສມໍ ຠູມິຏ຺ຐານໍ. ໂປກ຺ຂຣຓິຣາມເຓຍ຺ຍກນ຺ຕິ ເຊຕວນໂປກ຺ຂຣຓິຄຄ຺ຄຣາໂປກ຺ຂຣຓິສທິສານໍ ວຏ຺ຏຈຕຸຣສ຺ສທີຆວງ຺ກາທິສຓ຺ຐານານໍ ໂປກ຺ຂຣຓີນໍ ສນ຺ນິເວສນຏ຺ຐານໍ. ອຸກ຺ກູລວິກູລນ຺ຕິ ອຸກ຺ກູລຎ຺ຈ ວິກູລຎ຺ຈ. ຕຕ຺ຖ ອຸກ຺ກູລໍ ອຸນ຺ນຕຏ຺ຐານໍ, ວິກູລໍ ນິນ຺ນຏ຺ຐານໍ. ນທີວິທຸຄ຺ຄນ຺ຕິ ນທີນໍ ຠິນ຺ນຏ຺ຐານໍ ຕໍ ທຸຄ຺ຄມຕ຺ຕາ ນທີວິທຸຄ຺ຄນ຺ຕິ ວຸຈ຺ຈຕິ. ຂາຓຸກຓ຺ຏກຏ຺ຐານນ຺ຕິ ຕຕ຺ຖຊາຕການຎ຺ເຈວ ອາຫຣິຍມານານຎ຺ຈ ຂາຓຸກຓ຺ຏກາທີນໍ ປຕິຏ຺ຐານຏ຺ຐານໍ. ປພ຺ພຕວິສມນ຺ຕິ ຄິຣິວິສມໍ. ເຍ ໂອທກາຕິ ເຍ ຈ ອຸທເກ ຊາຍນ຺ຕິ, ເຕເຍວ ພຫຸຕຣາ. ອິໂຕ ກິຣ ສຸວຓ຺ຓຠູມິ ສຕ຺ຕມຕ຺ຕານິ ໂຍຊນສຕານິ ໂຫຕິ, ເອເກນ ວາເຕນ ຄຈ຺ຉນ຺ຕີ ນາວາ ສຕ຺ຕຫິ ອໂຫຣຕ຺ເຕຫິ ຄຈ຺ຉຕິ. ອເຖກສ຺ມິໍ ສມເຍ ເອວໍ ຄຈ຺ຉນ຺ຕີ ນາວາ ສຕ຺ຕາຫມ຺ປິ ນນ຺ທິຍາວຏ຺ຏມຈ຺ຉປິຏ຺ເຐເນວ ຄຕາ. ເອວໍ ໂອທການໍ ສຕ຺ຕານໍ ພຫຸຠາໂວ ເວທິຕພ຺ໂພ.

ອປິຈ ຖລຏ຺ຐານສ຺ສ ປຣິຕ຺ຕຠາເວນ ອຸທກສ຺ສ ຈ ພຫຸຠາເວນາປິ ອຍມຕ຺ໂຖ ເວທິຕພ຺ໂພ. ຍຖາ ຫິ ມຫາຕຬາເກ ເອໂກວ ອຸປ຺ປລຄຈ຺ໂຉ ອສ຺ສ, ຕສ຺ສ ຈຕ຺ຕາຣິ ຈ ປຓ຺ຓານິ, ມຊ຺ເຌ ຈ ເອກໍ ອຸປ຺ປລມກຸລໍ ອສ຺ສ. ເອວເມວໍ ຈຕ຺ຕາຣິ ປຓ຺ຓານິ ວິຍ ຈຕ຺ຕາໂຣ ທີປາ, ມຊ຺ເຌ ອຸປ຺ປລມກຸລໍ ວິຍ ສິເນຣຸປພ຺ພໂຕ, ເສສໍ ອຸທກໍ ວິຍ ອຸທກປຣິກ຺ຂິຕ຺ໂຕ ໂອກາໂສ. ຕສ຺ສ ມຫນ຺ຕຠາໂວ ອິທ຺ຘິມນ຺ຕານໍ ປາກໂຏ ໂຫຕິ. ເຕສຎ຺ຫິ ອາກາເສນ ຄຈ຺ຉນ຺ຕານໍ ຈຕ຺ຕາໂຣ ມຫາທີປາ ຈຕ຺ຕາຣິ ປຓ຺ຓານິ ວິຍ ອຸປຏ຺ຐຫນ຺ຕິ, ສິເນຣຸປພ຺ພໂຕ ມຊ຺ເຌ ອຸປ຺ປລມກຸລໍ ວິຍ, ເສສໍ ອຸທກໍ ວິຍ ອຸທກປຣິກ຺ຂິຕ຺ໂຕ ໂອກາໂສ. ເອວໍ ມຫນ຺ເຕ ອຸທເກ ຊາຕຕ຺ຕາ ໂອທກາວ ພຫຸຕຣາ ເວທິຕພ຺ພາ.

໓໒໓. ທຸຕິຍາທີສຸ ອຎ຺ຎຕ຺ຣ ມນຸສ຺ເສຫີຕິ ອິຘ ຈຕ຺ຕາໂຣ ອປາຍາ ອຎ຺ຎຕ຺ຣ ມນຸສ຺ເສຫີຕິ ອຘິປ຺ເປຕາ.

ມຊ຺ຌິເມສຸ ຊນປເທສູຕິ ‘‘ປຸຣຕ຺ຖິມາຍ ທິສາຍ ຄຊງ຺ຄລໍ ນາມ ນິຄໂມ, ຕສ຺ສ ປເຣນ ມຫາສາລາ, ຕໂຕ ປຣາ ປຈ຺ຈນ຺ຕິມາ ຊນປທາ, ໂອຣໂຕ ມຊ຺ເຌ. ປຸຣຕ຺ຖິມທກ຺ຂິຓາຍ ທິສາຍ ສລ຺ລວຕີ ນາມ ນທີ, ຕໂຕ ປຣາ ປຈ຺ຈນ຺ຕິມາ ຊນປທາ, ໂອຣໂຕ ມຊ຺ເຌ. ທກ຺ຂິຓາຍ ທິສາຍ ເສຕກຓ຺ຓິກໍ ນາມ ນິຄໂມ, ຕໂຕ ປຣາ ປຈ຺ຈນ຺ຕິມາ ຊນປທາ, ໂອຣໂຕ ມຊ຺ເຌ. ປຈ຺ຉິມາຍ ທິສາຍ ຖູຓໍ ນາມ ພ຺ຣາຫ຺ມຓຄາໂມ, ຕໂຕ ປຣາ ປຈ຺ຈນ຺ຕິມາ ຊນປທາ, ໂອຣໂຕ ມຊ຺ເຌ. ອຸຕ຺ຕຣາຍ ທິສາຍ ອຸສີຣທ຺ຘໂຊ ນາມ ປພ຺ພໂຕ, ຕໂຕ ປຣາ ປຈ຺ຈນ຺ຕິມາ ຊນປທາ, ໂອຣໂຕ ມຊ຺ເຌ’’ຕິ (ມຫາວ. ໒໕໙) ເອວໍ ປຣິຈ຺ຉິນ຺ເນ ຊນປເທຕິ ອຕ຺ໂຖ. ອຍຎ຺ຫິ ຊນປໂທ ມຸທິງ຺ຄສຓ຺ຐາໂນ ອຸຊຸເກນ ກຕ຺ຖຈິ ອສີຕິໂຍຊໂນ ໂຫຕິ, ກຕ຺ຖຈິ ໂຍຊນສຕິໂກ, ກຕ຺ຖຈິ ທ຺ວິໂຍຊນສຕິໂກ, ມຊ຺ເຌນ ປນ ຕິໂຍຊນສຕິໂກ, ປຣິຍນ຺ຕປຣິກ຺ເຂເປນ ນວມຕ຺ຕໂຍຊນສຕິໂກ ໂຫຕິ. ເອຕ຺ຕເກ ຐາເນ ພຸທ຺ຘປຈ຺ເຈກພຸທ຺ຘາ ມຫາສາວກາ ພຸທ຺ຘຸປຏ຺ຐາກາ ພຸທ຺ຘສາວກາ ພຸທ຺ຘມາຕາ ພຸທ຺ຘປິຕາ ຈກ຺ກວຕ຺ຕີ ຣາຊາຕິ ອິເມ ສຕ຺ຕາ ນິພ຺ພຕ຺ຕນ຺ຕິ. ອປິຈ ອຸປາທາຍຸປາທາຍາປິ ມຊ຺ຌິມປເທໂສ ລພ຺ຠຕິ. ສກໂລປິ ຫິ ຊມ຺ພຸທີໂປ ມຊ຺ຌິມປເທໂສ ນາມ, ເສສທີປາ ປຈ຺ຈນ຺ຕິມາ ຊນປທາ. ຕມ຺ພປຓ຺ຓິທີເປ ອນຸຣາຘປຸຣໍ ມຊ຺ຌິມປເທໂສ ນາມ, ເສໂສ ປຈ຺ຈນ຺ໂຕຕິ ເອວໍ ນໂຍ ເວທິຕພ຺ໂພ.

໓໒໔. ປຎ຺ຎວນ຺ໂຕ ອຊຬາ ອເນຬມູຄາຕິ ເອຕ຺ຖ ກມ຺ມສ຺ສກຕປຎ຺ຎາ, ຌານປຎ຺ຎາ ວິປສ຺ສນາປຎ຺ຎາ, ມຄ຺ຄປຎ຺ຎາ, ຜລປຎ຺ຎາຕິ ເອຕາຫິ ສມນ຺ນາຄຕາ ປຎ຺ຎວນ຺ໂຕ ນາມ, ອມູຬ຺ຫາ ອຊຬາ ນາມ. ເຍສໍ ເອຬາ ມຸຂໂຕ ນ ຄລຕິ, ເຕ ອເນຬມູຄາ ນາມ, ອເນຬມຸຂາ ນິທ຺ໂທສມຸຂາຕິ ອຕ຺ໂຖ. ປຏິພລາຕິ ສມຕ຺ຖາ, ກາຍພເລນ ເຈວ ຎາຓພເລນ ຈ ສມນ຺ນາຄຕາ. ອຕ຺ຖມຎ຺ຎາຕຸນ຺ຕິ ອຕ຺ຖານຕ຺ຖໍ ກາຣຓາກາຣຓໍ ຊານິຕຸໍ. ທຸປ຺ປຎ຺ຎາຕິ ອປ຺ປຎ຺ຎາ ນິປ຺ປຎ຺ຎາ. ຊຬາຕິ ມນ຺ທາ ໂມມູຫາ.

໓໒໕. ອຣິເຍນ ປຎ຺ຎາຈກ຺ຂຸນາຕິ ສຫວິປສ຺ສເນນ ມຄ຺ເຄນ. ອວິຊ຺ຊາຄຕາຕິ ອວິຊ຺ຊນ຺ຘກາເຣນ ສມນ຺ນາຄຕາ.

໓໒໖. ເຍ ລຠນ຺ຕິ ຕຖາຄຕໍ ທສ຺ສນາຍາຕິ ເຍ ຕຖາຄຕສ຺ສ ຄຸເຓ ຊານິຕ຺ວາ ຕຖາຄຕໍ ຈກ຺ຂຸວິຎ຺ຎາເຓນ ປສ຺ສິຕຸໍ ລຠນ຺ຕິ.

໓໒໗. ຕຖາຄຕປ຺ປເວທິຕນ຺ຕິ ຕຖາຄເຕນ ປເວທິຕໍ ປກາເສຕ຺ວາ ກຖິຕໍ. ສວນາຍາຕິ ໂສຕວິຎ຺ຎາເຓນ ໂສຕຸໍ.

໓໒໘. ຘາເຣນ຺ຕີຕິ ນ ປມ຺ມຸສ຺ສນ຺ຕິ.

໓໒໙. ຘາຕານໍ ຘມ຺ມານໍ ອຕ຺ຖໍ ອຸປປຣິກ຺ຂນ຺ຕີຕິ ປຄຸຓາຍ ປາຬິຍາ ອຕ຺ຖານຕ຺ຖໍ ອຸປປຣິກ຺ຂນ຺ຕິ.

໓໓໐. ອຕ຺ຖມຎ຺ຎາຍ ຘມ຺ມມຎ຺ຎາຍາຕິ ອຏ຺ຐກຖຎ຺ຈ ປາຬິຎ຺ຈ ຊານິຕ຺ວາ. ຘມ຺ມານຸຘມ຺ມໍ ປຏິປຊ຺ຊນ຺ຕີຕິ ອນຸໂລມປຏິປທໍ ປູເຣນ຺ຕິ.

໓໓໑. ສໍເວຊນີເຍສຸ ຐາເນສູຕິ ສໍເວຄຊນເກສຸ ກາຣເຓສຸ. ສໍວິຊ຺ຊນ຺ຕີຕິ ສໍເວຄໍ ອາປຊ຺ຊນ຺ຕິ.

໓໓໒. ໂຍນິໂສ ປທຫນ຺ຕີຕິ ອຸປາເຍນ ປຘານວີຣິຍໍ ກໂຣນ຺ຕິ.

໓໓໓. ວວສ຺ສຄ຺ຄາຣມ຺ມຓນ຺ຕິ ວວສ຺ສຄ຺ໂຄ ວຸຈ຺ຈຕິ ນິພ຺ພານໍ, ຕໍ ອາຣມ຺ມຓໍ ກຣິຕ຺ວາຕິ ອຕ຺ໂຖ. ລຠນ຺ຕິ ສມາຘິນ຺ຕິ ມຄ຺ຄສມາຘິຎ຺ຈ ຜລສມາຘິຎ຺ຈ ປາປຸຓນ຺ຕິ.

໓໓໔. ອນ຺ນຄ຺ຄຣສຄ຺ຄານນ຺ຕິ ອຸຕ຺ຕມນ຺ນານຎ຺ຈ ອຸຕ຺ຕມຣສານຎ຺ຈ. ອຸຎ຺ເຉນ ກປາລາຠເຕນ ຍາເປນ຺ຕີຕິ ອຸຎ຺ຉາຈາເຣນ ວນມູລຜລາຜເລນ ວາ ກປາເລນ ອາຠຕຠຕ຺ເຕນ ວາ ຍາເປນ຺ຕິ. ເອຕ຺ຖ ຈ ໂຍ ກສ຺ສຈິເທວ ຂາທນີຍສ຺ສ ໂຠຊນີຍສ຺ສ ອຕ຺ຖາຍ ຈິຕ຺ເຕ ອຸປ຺ປນ຺ເນ ຕໍຂຓໍເຍວ ນ ຕໍ ລຠຕິ, ອຍໍ ອນ຺ນຄ຺ຄຣສຄ຺ຄານໍ ນ ລາຠີ ນາມ. ຍສ຺ສປິ ຕໍຂຓໍເຍວ ລຠິຕ຺ວາ ໂອໂລເກນ຺ຕສ຺ສ ວຓ຺ຓຄນ຺ຘຣສາ ອມນາປາ ໂຫນ຺ຕິ, ອຍມ຺ປິ ອນ຺ນຄ຺ຄຣສຄ຺ຄານໍ ນ ລາຠີ ນາມ. ຍສ຺ສ ປນ ວຓ຺ຓຄນ຺ຘຣສາ ປຏິລຠນ຺ຕິ, ມນາປາ ໂຫນ຺ຕິ, ອຍໍ ອນ຺ນຄ຺ຄຣສຄ຺ຄານໍ ລາຠີ ນາມ. ໂສ ອຸຕ຺ຕມໂກຏິຍາ ຈກ຺ກວຕ຺ຕີ ຣາຊາ, ເຫຏ຺ຐິມໂກຏິຍາ ຘມ຺ມາໂສໂກ ເວທິຕພ຺ໂພ. ສງ຺ເຂປໂຕ ຫິ ຍສ຺ສ ຠຕ຺ຕສ຺ສ ເອກປາຕິ ສຕສຫສ຺ສໍ ອຄ຺ຆຕິ, ອິທໍ ອນ຺ນຄ຺ຄຣສຄ຺ຄໍ ນາມ. ຍໍ ປນ ຠິກ຺ຂຸສງ຺ຆໍ ປິຓ຺ຑາຍ ຈຣນ຺ຕໍ ທິສ຺ວາ ມນຸສ຺ສາ ອຸຕ຺ຕມປຓີຕໍ ຠຕ຺ຕໍ ເທນ຺ຕິ, ອິທໍ ກິໍ ນາມາຕິ? ອິທໍ ອຸຎ຺ເຉນ ກປາລາຠເຕນ ຍາເປນ຺ເຕ ອຸປາທາຍ ອນ຺ນຄ຺ຄຣສຄ຺ຄໍ ນາມ ວຸຈ຺ຈຕີຕິ.

໓໓໕. ອຕ຺ຖຣສສ຺ສາຕິອາທີສຸ ອຕ຺ຖຣໂສ ນາມ ຈຕ຺ຕາຣິ ສາມຎ຺ຎຜລານິ, ຘມ຺ມຣໂສ ນາມ ຈຕ຺ຕາໂຣ ມຄ຺ຄາ, ວິມຸຕ຺ຕິຣໂສ ນາມ ອມຕນິພ຺ພານໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຈຕຸຕ຺ຖວຄ຺ຄວຓ຺ຓນາ.

ຊມ຺ພຸທີປເປຍ຺ຍາໂລ ນິຏ຺ຐິໂຕ.