໑໗. ປສາທກຣຘມ຺ມວຄ຺ຄວຓ຺ຓນາ

໓໖໖. ອທ຺ຘມິທນ຺ຕິອາທີສຸ ອທ຺ຘນ຺ຕິ ເອກໍສາຘິວຈນເມຕໍ, ອທ຺ຘາ ອິທໍ ລາຠານໍ, ເອກໍໂສ ເອສ ລາຠານນ຺ຕິ ວຸຕ຺ຕໍ ໂຫຕິ. ຍທິທໍ ອາຣຎ຺ຎິກຕ຺ຕນ຺ຕິ ໂຍ ເອສ ອາຣຎ຺ຎິກຠາໂວ. ອິທໍ ວຸຕ຺ຕໍ ໂຫຕິ – ອາຣຎ຺ຎິກຠາໂວ ນາມ ລາຠານໍ ເອກໍໂສ ອວສ຺ສຠາວິຕາ ນ ສກ຺ກາ ອາຣຎ຺ຎິເກນ ລາຠໍ ນ ລຠິຕຸນ຺ຕິ. ອາຣຎ຺ຎິໂກ ຫິ ຠິກ຺ຂຸ ‘‘ອຕ຺ຕໂນ ອຣຎ຺ຎວາສສ຺ສ ອນຸຈ຺ຉວິກໍ ກຣິສ຺ສາມີ’’ຕິ ປາປກໍ ນາມ ນ ກໂຣຕິ, ອຖສ຺ສ ‘‘ອາຣຎ຺ຎິໂກ ອຍໍ ຠິກ຺ຂູ’’ຕິ ສຎ຺ຊາຕຄາຣໂວ ມຫາຊໂນ ຈຕຸປຈ຺ຈເຍນ ປູຊໍ ກໂຣຕິ. ເຕນ ວຸຕ຺ຕໍ – ‘‘ອທ຺ຘມິທໍ, ຠິກ຺ຂເວ, ລາຠານໍ ຍທິທໍ ອາຣຎ຺ຎິກຕ຺ຕ’’ນ຺ຕິ. ເສສປເທສຸປິ ເອເສວ ນໂຍ. ເອຕ຺ຖ ປນ ພາຫຸສຈ຺ຈນ຺ຕິ ພຫຸສ຺ສຸຕຠາໂວ. ຖາວເຣຍ຺ຍນ຺ຕິ ຈິຣປພ຺ພຊິຕຕ຺ຕາ ຖາວຣປ຺ປຕ຺ຕຠາໂວ. ອາກປ຺ປສມ຺ປທາຕິ ຈີວຣຄ຺ຄຫຓາທິໂນ ອາກປ຺ປສ຺ສ ສມ຺ປຕ຺ຕິ. ປຣິວາຣສມ຺ປທາຕິ ສຸຈິປຣິວາຣຕາ. ໂກລປຸຕ຺ຕີຕິ ກຸລປຸຕ຺ຕຠາໂວ. ວຓ຺ຓໂປກ຺ຂຣຕາຕິ ສມ຺ປນ຺ນຣູປຕາ. ກລ຺ຍາຓວາກ຺ກຣຓຕາຕິ ວຈນກິຣິຍາຍ ມຘຸຣຠາໂວ. ອປ຺ປາພາຘຕາຕິ ອາໂຣຄ຺ຍສມ຺ປຕ຺ຕິ. ອໂຣໂຄ ຫິ ຠິກ຺ຂຸ ອຕ຺ຕໂນ ສຣີຣກລ຺ຍາຓຕາຍ ວິປສ຺ສນາຘຸເຣ ຈ ຄນ຺ຖຘຸເຣ ຈ ປຣິປູຣກາຣີ ໂຫຕິ, ເຕນສ຺ສ ລາໂຠ ອຸປ຺ປຊ຺ຊຕີຕິ.

ໂສຬສ ປສາທກຣຘມ຺ມາ ນິຏ຺ຐິຕາ.