ມນ຺ຕາຓິປຸຕ຺ຕປຸຓ຺ຓຕ຺ເຖຣວຕ຺ຖຸ

໑໙໖. ນວເມ ປຸຓ຺ໂຓ ມນ຺ຕາຓິປຸຕ຺ໂຕຕິ ນາເມນ ປຸຓ຺ໂຓ, ມນ຺ຕາຓິພ຺ຣາຫ຺ມຓິຍາ ປນ ໂສ ປຸຕ຺ໂຕຕິ ມນ຺ຕາຓິປຸຕ຺ໂຕ. ຕສ຺ສ ປຎ຺ຫກມ຺ເມ ອຍມນຸປຸພ຺ພິກຖາ – ອຍໍ ກິຣ ປທຸມຸຕ຺ຕຣທສພລສ຺ສ ອຸປ຺ປຕ຺ຕິໂຕ ປຸເຣຕຣເມວ ຫໍສວຕີນຄເຣ ພ຺ຣາຫ຺ມຓມຫາສາລກຸເລ ນິພ຺ພຕ຺ຕິ. ຕສ຺ສ ນາມຄ຺ຄຫຓທິວເສ ໂຄຕໂມຕິ ນາມໍ ອກໍສຸ. ໂສ ວຍປ຺ປຕ຺ໂຕ ຕໂຍ ເວເທ ອຸຄ຺ຄຓ຺ຫິຕ຺ວາ ສພ຺ພສິປ຺ເປສຸ ໂກວິໂທ ຫຸຕ຺ວາ ປຎ຺ຈມາຓວກສຕປຣິວາໂຣ ວິຈຣນ຺ໂຕ ຕໂຍປິ ເວເທ ໂອໂລເກຕ຺ວາ ໂມກ຺ຂຘມ຺ມໍ ອທິສ຺ວາ ‘‘ອິທໍ ເວທຕ຺ຕຍໍ ນາມ ກທລິກ຺ຂນ຺ໂຘ ວິຍ ພຫິ ມຏ຺ຐໍ ອນ຺ໂຕ ນິສ຺ສາຣໍ, ອິມໍ ຄເຫຕ຺ວາ ວິຈຣຓໍ ຖຸສໂກຏ຺ຏນສທິສໍ ໂຫຕິ. ກິໍ ເມ ອິມິນາ’’ຕິ ອິສິປພ຺ພຊ຺ຊໍ ປພ຺ພຊິຕ຺ວາ ພ຺ຣຫ຺ມວິຫາເຣ ນິພ຺ພຕ຺ເຕຕ຺ວາ ‘‘ອປຣິຫີນຊ຺ຌາໂນ ພ຺ຣຫ຺ມໂລໂກກູປປນ຺ໂນ ຠວິສ຺ສາມີ’’ຕິ ປຎ຺ຈຫິ ມາຓວກສເຕຫິ ສທ຺ຘິໍ ປພ຺ພຕປາທໍ ຄນ຺ຕ຺ວາ ອິສິປພ຺ພຊ຺ຊໍ ປພ຺ພຊິ. ຕສ຺ສ ປຣິວາຣານິ ອຏ຺ຐາຣສ຺ສ ຊຏິລສຫສ຺ສານິ ອເຫສຸໍ. ໂສ ປຎ຺ຈ ອຠິຎ຺ຎາ ອຏ຺ຐ ສມາປຕ຺ຕິໂຍ ນິພ຺ພຕ຺ເຕຕ຺ວາ ເຕສມ຺ປິ ກສິຓປຣິກມ຺ມໍ ອາຈິກ຺ຂິ. ເຕ ຕສ຺ສ ໂອວາເທ ຐຕ຺ວາ ສພ຺ເພປິ ປຎ຺ຈ ອຠິຎ຺ຎາ ອຏ຺ຐ ສມາປຕ຺ຕິໂຍ ນິພ຺ພຕ຺ເຕສຸໍ.

ອທ຺ຘາເນ ອຕິກ຺ກນ຺ເຕ ຕສ຺ສ ໂຄຕມຕາປສສ຺ສ ມຫລ຺ລກກາເລ ປທຸມຸຕ຺ຕຣທສພໂລ ປຐມາຠິສມ຺ໂພຘິໍ ປຕ຺ວາ ປວຕ຺ຕິຕວຣຘມ຺ມຈກ຺ໂກ ຠິກ຺ຂຸສຕສຫສ຺ສປຣິວາໂຣ ຫໍສວຕີນຄຣໍ ອຸປນິສ຺ສາຍ ວິຫາສິ. ໂສ ເອກທິວສໍ ປຈ຺ຈູສສມເຍ ໂລກໍ ໂອໂລເກນ຺ໂຕ ໂຄຕມຕາປສສ຺ສ ປຣິສາຍ ອຣຫຕ຺ຕູປນິສ຺ສຍໍ ໂຄຕມຕາປສສ຺ສ ຈ ‘‘ອຫໍ ອນາຄເຕ ອຸປ຺ປຊ຺ຊມານກພຸທ຺ຘສ຺ສ ສາສເນ ຘມ຺ມກຖິກຠິກ຺ຂູນໍ ອຄ຺ໂຄ ຠເວຍ຺ຍ’’ນ຺ຕິ ປຕ຺ຖນຠາວຎ຺ຈ ທິສ຺ວາ ປາໂຕວ ສຣີຣປຏິຊຄ຺ຄນໍ ກຕ຺ວາ ອຕ຺ຕໂນ ປຕ຺ຕຈີວຣໍ ສຍເມວ ຄເຫຕ຺ວາ ອຎ຺ຎາຕກເວເສນ ໂຄຕມຕາປສສ຺ສ ອນ຺ເຕວາສິເກສຸ ວນມູລຜລາຜລຕ຺ຖາຍ ຄເຕສຸ ຄນ຺ຕ຺ວາ ໂຄຕມສ຺ສ ປຓ຺ຓສາລາທ຺ວາເຣ ອຏ຺ຐາສິ. ໂຄຕໂມ ພຸທ຺ຘານໍ ອຸປ຺ປນ຺ນຠາວໍ ອຊານນ຺ໂຕປິ ທູຣໂຕວ ທສພລໍ ທິສ຺ວາ ‘‘ອຍໍ ປຸຣິໂສ ໂລກໂຕ ມຸຕ຺ໂຕ ຫຸຕ຺ວາ ປຎ຺ຎາຍຕິ, ຍຖາ ອສ຺ສ ສຣີຣນິປ຺ຜຕ຺ຕິ ເຍຫິ ຈ ລກ຺ຂເຓຫິ ສມນ຺ນາຄໂຕ ອຄາຣມຊ຺ເຌ ວາ ຕິຏ຺ຐນ຺ໂຕ ຈກ຺ກວຕ຺ຕີ ຣາຊາ ໂຫຕິ, ປພ຺ພຊນ຺ໂຕ ວາ ວິວຏ຺ຏຈ຺ຉໂທ ສພ຺ພຎ຺ຎຸພຸທ຺ໂຘ ໂຫຕີ’’ຕິ ຎຕ຺ວາ ປຐມທສ຺ສເນເນວ ທສພລໍ ອຠິວາເທຕ຺ວາ ‘‘ອິໂຕ ເອຖ ຠຄວາ’’ຕິ ພຸທ຺ຘາສນໍ ປຎ຺ຎາເປຕ຺ວາ ອທາສິ. ຕຖາຄໂຕ ຕາປສສ຺ສ ຘມ຺ມໍ ເທສຍມາໂນ ນິສີທິ.

ຕສ຺ມິໍ ສມເຍ ເຕ ຊຏິລາ ‘‘ປຓີຕປຓີຕໍ ວນມູລຜລາຜລໍ ອາຈຣິຍສ຺ສ ທຕ຺ວາ ເສສກໍ ປຣິຠຸຎ຺ຊິສ຺ສາມາ’’ຕິ ອາຄຈ຺ຉນ຺ຕາ ທສພລໍ ອຸຈ຺ຈາສເນ, ອາຈຣິຍໍ ປນ ນີຈາສເນ ນິສິນ຺ນໍ ທິສ຺ວາ ‘‘ປສ຺ສຖ, ມຍໍ ‘ອິມສ຺ມິໍ ໂລເກ ອມ຺ຫາກໍ ອາຈຣິເຍນ ອຸຕ຺ຕຣິຕໂຣ ນຕ຺ຖີ’ຕິ ວິຈຣາມ. ອິທານິ ປນ ໂນ ອາຈຣິຍໍ ນີຈາສເນ ນິສີທາເປຕ຺ວາ ອຸຈ຺ຈາສເນ ນິສິນ຺ນໂກ ເອໂກ ປຎ຺ຎາຍຕິ, ມຫນ຺ໂຕ ວຕາຍໍ ປຸຣິໂສ ຠວິສ຺ສຕີ’’ຕິ ປິຏການິ ຄເຫຕ຺ວາ ອາຄຈ຺ຉນ຺ຕິ. ໂຄຕມຕາປໂສ ‘‘ອິເມ ມໍ ທສພລສ຺ສ ສນ຺ຕິເກ ວນ຺ເທຍ຺ຍຸ’’ນ຺ຕິ ຠີໂຕ ທູຣໂຕ ອາຫ – ‘‘ຕາຕາ, ມາ ມໍ ວນ຺ທິຕ຺ຖ, ສເທວເກ ໂລເກ ອຄ຺ຄປຸຄ຺ຄໂລ ສພ຺ເພສໍ ວນ຺ທນາຣໂຫ ປຸຣິໂສ ອິຘ ນິສິນ຺ໂນ, ເອຕໍ ວນ຺ທຖາ’’ຕິ. ຕາປສາ ‘‘ນ ອຊານິຕ຺ວາ ອາຈຣິໂຍ ກເຖສ຺ສຕີ’’ຕິ ສພ຺ເພວ ຕຖາຄຕສ຺ສ ປາເທ ວນ຺ທິໍສຸ. ‘‘ຕາຕາ, ອມ຺ຫາກໍ ອຎ຺ຎໍ ທສພລສ຺ສ ທາຕພ຺ພຍຸຕ຺ຕກໍ ໂຠຊນໍ ນຕ຺ຖິ, ອິມໍ ວນມູລຜລາຜລໍ ທສ຺ສາມາ’’ຕິ ປຓີຕປຓີຕໍ ພຸທ຺ຘານໍ ປຕ຺ເຕ ປຕິຏ຺ຐາເປສິ. ສຕ຺ຖາ ວນມູລຜລາຜລໍ ປຣິຠຸຎ຺ຊິ. ຕທນນ຺ຕຣໍ ຕາປໂສປິ ສທ຺ຘິໍ ອນ຺ເຕວາສິເກຫິ ປຣິຠຸຎ຺ຊິ. ສຕ຺ຖາ ຠຕ຺ຕກິຈ຺ຈໍ ກຕ຺ວາ ‘‘ທ຺ເວ ອຄ຺ຄສາວກາ ຠິກ຺ຂຸສຕສຫສ຺ສໍ ຄເຫຕ຺ວາ ອາຄຈ຺ຉນ຺ຕູ’’ຕິ ຈິນ຺ເຕສິ. ຕສ຺ມິໍ ຂເຓ ອຄ຺ຄສາວໂກ ມຫາເທວລຕ຺ເຖໂຣ ‘‘ກຫໍ ນຸ ໂຂ ສຕ຺ຖາ ຄໂຕ’’ຕິ ອາວຊ຺ເຊນ຺ໂຕ ‘‘ສຕ຺ຖາ ອມ຺ຫາກໍ ອາຄມນໍ ປຈ຺ຈາສີສຕີ’’ຕິ ຠິກ຺ຂຸສຕສຫສ຺ສໍ ຄເຫຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ນມສ຺ສມາໂນ ອຏ຺ຐາສິ.

ໂຄຕໂມ ອນ຺ເຕວາສິເກ ອາຫ – ‘‘ຕາຕາ, ອມ຺ຫາກໍ ອຎ຺ໂຎ ສກ຺ກາໂຣ ນຕ຺ຖິ, ຠິກ຺ຂຸສງ຺ໂຆ ທຸກ຺ເຂນ ຐິໂຕ. ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ປຸປ຺ຜາສນໍ ປຎ຺ຎາເປສ຺ສາມ, ຊລຊຖລຊປຸປ຺ຜານິ ອາຫຣຖາ’’ຕິ. ເຕ ຕາວເທວ ປພ຺ພຕປາທໂຕ ວຓ຺ຓຄນ຺ຘສມ຺ປນ຺ນານິ ປຸປ຺ຜານິ ອິທ຺ຘິຍາ ອາຫຣິຕ຺ວາ ສາຣິປຸຕ຺ຕຕ຺ເຖຣສ຺ສ ວຕ຺ຖຸມ຺ຫິ ວຸຕ຺ຕນເຍເນວ ອາສນານິ ປຎ຺ຎາປຍິໍສຸ. ນິໂຣຘສມາປຕ຺ຕິສມາປຊ຺ຊນມ຺ປິ ຉຕ຺ຕຘາຣຓມ຺ປິ ສພ຺ພໍ ວຸຕ຺ຕນເຍເນວ ເວທິຕພ຺ພໍ.

ສຕ຺ຖາ ສຕ຺ຕເມ ທິວເສ ນິໂຣຘໂຕ ວຸຏ຺ຐາຍ ປຣິວາເຣຕ຺ວາ ຐິເຕ ຕາປເສ ທິສ຺ວາ ຘມ຺ມກຖິກຠາເວ ເອຕທຄ຺ຄປ຺ປຕ຺ຕໍ ສາວກໍ ອາມນ຺ເຕສິ – ‘‘ອິມິນາ ຠິກ຺ຂຸ ອິສິຄເຓນ ມຫາສກ຺ກາໂຣ ກໂຕ, ເອເຕສໍ ປຸປ຺ຜາສນານຸໂມທນໍ ກໂຣຫີ’’ຕິ. ໂສ ສຕ຺ຖຸ ວຈນໍ ສມ຺ປຏິຈ຺ຉິຕ຺ວາ ຕີຓິ ປິຏການິ ສມ຺ມສິຕ຺ວາ ອນຸໂມທນໍ ອກາສິ. ຕສ຺ສ ເທສນາປຣິໂຍສາເນ ສຕ຺ຖາ ສຍໍ ພ຺ຣຫ຺ມໂຆສໍ ນິຈ຺ຉາເຣຕ຺ວາ ຘມ຺ມໍ ເທເສສິ. ເທສນາປຣິໂຍສາເນ ຐເປຕ຺ວາ ໂຄຕມຕາປສໍ ເສສາ ອຏ຺ຐາຣສ ສຫສ຺ສຊຏິລາ ອຣຫຕ຺ຕໍ ປາປຸຓິໍສຸ.

ໂຄຕໂມ ປນ ເຕນຕ຺ຕຠາເວນ ປຏິເວຘໍ ກາຕຸໍ ອສກ຺ໂກນ຺ໂຕ ຠຄວນ຺ຕໍ ອາຫ – ‘‘ຠຄວາ ເຍນ ຠິກ຺ຂຸນາ ປຐມໍ ຘມ຺ໂມ ເທສິໂຕ, ໂກ ນາມ ອຍໍ ຕຸມ຺ຫາກໍ ສາສເນ’’ຕິ? ອຍໍ ໂຄຕມ ມຍ຺ຫໍ ສາສເນ ຘມ຺ມກຖິການໍ ອຄ຺ໂຄຕິ. ‘‘ອຫມ຺ປິ, ຠນ຺ເຕ, ອິມສ຺ສ ສຕ຺ຕ ທິວສານິ ກຕສ຺ສ ອຘິກາຣສ຺ສ ຜເລນ ອຍໍ ຠິກ຺ຂຸ ວິຍ ອນາຄເຕ ເອກສ຺ສ ພຸທ຺ຘສ຺ສ ສາສເນ ຘມ຺ມກຖິການໍ ອຄ຺ໂຄ ຠເວຍ຺ຍ’’ນ຺ຕິ ປຕ຺ຖນໍ ກຕ຺ວາ ປາທມູເລ ນິປຊ຺ຊິ.

ສຕ຺ຖາ ອນາຄຕໍ ໂອໂລເກຕ຺ວາ ອນນ຺ຕຣາເຍນສ຺ສ ປຕ຺ຖນາຍ ສມິຊ຺ຌນຠາວໍ ຎຕ຺ວາ ‘‘ອນາຄເຕ ກປ຺ປສຕສຫສ຺ສາວສາເນ ໂຄຕໂມ ນາມ ພຸທ຺ໂຘ ອຸປ຺ປຊ຺ຊິສ຺ສຕິ, ຕ຺ວໍ ຕສ຺ສ ສາສເນ ຘມ຺ມກຖິການໍ ອຄ຺ໂຄ ຠວິສ຺ສສີ’’ຕິ ພ຺ຍາກຣິຕ຺ວາ ເຕ ອຣຫຕ຺ຕປ຺ປຕ຺ເຕ ຕາປເສ ‘‘ເອຖ ຠິກ຺ຂໂວ’’ຕິ ອາຫ. ສພ຺ເພ ອນ຺ຕຣຫິຕເກສມສ຺ສູ ອິທ຺ຘິມຍປຕ຺ຕຈີວຣຘຣາ ວສ຺ສສຏ຺ຐິກຕ຺ເຖຣສທິສາ ອເຫສຸໍ. ສຕ຺ຖາ ຠິກ຺ຂຸສງ຺ຆມາທາຍ ວິຫາຣໍ ຄໂຕ.

ໂຄຕໂມປິ ຍາວຊີວໍ ຕຖາຄຕໍ ປຣິຈຣິຕ຺ວາ ຍຖາພລໍ ກລ຺ຍາຓກມ຺ມໍ ກຕ຺ວາ ກປ຺ປສຕສຫສ຺ສໍ ເທເວສຸ ຈ ມນຸສ຺ເສສຸ ຈ ສໍສຣິຕ຺ວາ ອມ຺ຫາກໍ ຠຄວໂຕ ກາເລ ກປິລວຕ຺ຖຸນຄຣສ຺ສ ອວິທູເຣ ໂທຓວຕ຺ຖຸພ຺ຣາຫ຺ມຓຄາເມ ພ຺ຣາຫ຺ມຓມຫາສາລກຸເລ ນິພ຺ພຕ຺ຕິ. ຕສ຺ສ ນາມຄ຺ຄຫຓທິວເສ ປຸຓ຺ຓມາຓໂວຕິ ນາມໍ ອກໍສຸ. ສຕ຺ຖຣິ ອຠິສມ຺ໂພຘິໍ ປຕ຺ວາ ປວຕ຺ຕິຕວຣຘມ຺ມຈກ຺ເກ ອນຸປຸພ຺ເພນ ອາຄນ຺ຕ຺ວາ ຣາຊຄຫໍ ອຸປນິສ຺ສາຍ ວິຫຣນ຺ເຕ ອຎ຺ຎາສິໂກຓ຺ຑຎ຺ຎຕ຺ເຖໂຣ ກປິລວຕ຺ຖຸໍ ຄນ຺ຕ຺ວາ ອຕ຺ຕໂນ ຠາຄິເນຍ຺ຍໍ ປຸຓ຺ຓມາຓວໍ ປພ຺ພາເຊຕ຺ວາ ປຸນທິວເສ ທສພລສ຺ສ ສນ຺ຕິກໍ ອາຄນ຺ຕ຺ວາ ຠຄວນ຺ຕໍ ວນ຺ທິຕ຺ວາ ອາປຸຈ຺ຉິຕ຺ວາ ນິວາສຕ຺ຖາຍ ຉທ຺ທນ຺ຕທຫໍ ຄໂຕ. ປຸຓ຺ໂຓປິ ມນ຺ຕາຓິປຸຕ຺ໂຕ ມາຕຸເລນ ອຎ຺ຎາສິໂກຓ຺ຑຎ຺ຎຕ຺ເຖເຣນ ສທ຺ຘິໍ ທສພລສ຺ສ ສນ຺ຕິກໍ ອຄນ຺ຕ຺ວາ ‘‘ມຍ຺ຫໍ ປພ຺ພຊິຕກິຈ຺ຈໍ ມຕ຺ຖກໍ ປາເປຕ຺ວາວ ທສພລສ຺ສ ສນ຺ຕິກໍ ຄມິສ຺ສາມີ’’ຕິ ກປິລວຕ຺ຖຸສ຺ມິໍເຍວ ໂອຫີໂນ ໂຍນິໂສມນສິກາເຣ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ຕສ຺ສ ສນ຺ຕິເກ ປພ຺ພຊິຕກຸລປຸຕ຺ຕາປິ ປຎ຺ຈສຕາ ອເຫສຸໍ. ເຖໂຣ ສຍໍ ທສກຖາວຕ຺ຖຸລາຠິຕາຍ ເຕປິ ທສຫິ ກຖາວຕ຺ຖູຫິ ໂອວທຕິ. ເຕ ຕສ຺ສ ໂອວາເທ ຐຕ຺ວາ ສພ຺ເພວ ອຣຫຕ຺ຕໍ ປຕ຺ຕາ.

ເຕ ອຕ຺ຕໂນ ປພ຺ພຊິຕກິຈ຺ຈໍ ມຕ຺ຖກໍ ປຕ຺ຕໍ ຎຕ຺ວາ ອຸປຊ຺ຌາຍໍ ອຸປສງ຺ກມິຕ຺ວາ ອາຫໍສຸ – ‘‘ຠນ຺ເຕ, ອມ຺ຫາກໍ ກິຈ຺ຈໍ ມຕ຺ຖກໍ ປຕ຺ຕໍ, ທສນ຺ນຎ຺ຈ ມຫາກຖາວຕ຺ຖູນໍ ລາຠິໂນ, ສມໂຍ ໂນ ທສພລໍ ປສ຺ສິຕຸ’’ນ຺ຕິ. ເຖໂຣ ເຕສໍ ກຖໍ ສຸຕ຺ວາ ຈິນ຺ເຕສິ – ‘‘ມມ ທສກຖາວຕ຺ຖຸລາຠິຕໍ ສຕ຺ຖາ ຊານາຕິ, ອຫໍ ຘມ຺ມໍ ເທເສນ຺ໂຕ ທສ ກຖາວຕ຺ຖູນິ ອມຸຎ຺ຈນ຺ໂຕວ ເທເສມິ. ມຍິ ຄຈ຺ຉນ຺ເຕ ສພ຺ເພປິເມ ຠິກ຺ຂູ ປຣິວາເຣຕ຺ວາ ຄຈ຺ຉິສ຺ສນ຺ຕິ, ເອວໍ ຄຓສງ຺ຄຓິກາຍ ຄນ຺ຕ຺ວາ ປນ ອຍຸຕ຺ຕໍ ມຍ຺ຫໍ ທສພລໍ ປສ຺ສິຕຸໍ, ອິເມ ຕາວ ຄນ຺ຕ຺ວາ ປສ຺ສນ຺ຕູ’’ຕິ ເຕ ຠິກ຺ຂູ ອາຫ – ‘‘ອາວຸໂສ, ຕຸມ຺ເຫ ປຸຣໂຕ ຄນ຺ຕ຺ວາ ຕຖາຄຕໍ ປສ຺ສຖ, ມມ ວຈເນນ ທສພລສ຺ສ ປາເທ ວນ຺ທຖ, ອຫມ຺ປິ ຕຸມ຺ຫາກໍ ຄຕມຄ຺ເຄນ ຄມິສ຺ສາມີ’’ຕິ.

ເຕ ເຖຣາ ສພ຺ເພປິ ທສພລສ຺ສ ຊາຕິຠູມິຣຏ຺ຐວາສິໂນ ສພ຺ເພ ຂີຓາສວາ ສພ຺ເພ ທສກຖາວຕ຺ຖຸລາຠິໂນ ອຕ຺ຕໂນ ອຸປຊ຺ຌາຍສ຺ສ ໂອວາທໍ ອຠິນ຺ທິຕ຺ວາ ອນຸປຸພ຺ເພນ ຈາຣິກໍ ຈຣນ຺ຕາ ສຏ຺ຐິໂຍຊນມຄ຺ຄໍ ອຕິກ຺ກມ຺ມ ຣາຊຄເຫ ເວຬຸວນມຫາວິຫາຣໍ ຄນ຺ຕ຺ວາ ທສພລສ຺ສ ປາເທ ວນ຺ທິຕ຺ວາ ເອກມນ຺ຕໍ ນິສີທິໍສຸ. ອາຈິຓ຺ຓໍ ໂຂ ປເນຕໍ ພຸທ຺ຘານໍ ຠຄວນ຺ຕານໍ ອາຄນ຺ຕຸເກຫິ ຠິກ຺ຂູຫິ ສທ຺ຘິໍ ປຏິສມ຺ໂມທິຕຸນ຺ຕິ ຠຄວາ ເຕຫິ ສທ຺ຘິໍ ‘‘ກຈ຺ຈິ, ຠິກ຺ຂເວ, ຂມນີຍ’’ນ຺ຕິອາທິນາ ນເຍນ ມຘຸຣປຏິສນ຺ຖາຣໍ ກຕ຺ວາ ‘‘ກຸໂຕ ຈ ຕຸມ຺ເຫ, ຠິກ຺ຂເວ, ອາຄຈ຺ຉຖາ’’ຕິ ປຸຈ຺ຉິ. ເຕຫິ ‘‘ຊາຕິຠູມິໂຕ’’ຕິ ວຸຕ຺ເຕ ‘‘ໂກ ນຸ ໂຂ, ຠິກ຺ຂເວ, ຊາຕິຠູມິຍໍ ຊາຕິຠູມການໍ ຠິກ຺ຂູນໍ ສພ຺ຣຫ຺ມຈາຣີຫິ ເອວໍ ສມ຺ຠາວິໂຕ ອຕ຺ຕນາ ຈ ອປ຺ປິຈ຺ໂຉ ອປ຺ປິຈ຺ຉກຖຎ຺ຈ ຠິກ຺ຂູນໍ ກຕ຺ຕາ’’ຕິ ທສກຖາວຕ຺ຖຸລາຠິໍ ຠິກ຺ຂຸໍ ປຸຈ຺ຉິ. ເຕປິ ‘‘ປຸຓ຺ໂຓ ນາມ, ຠນ຺ເຕ, ອາຍສ຺ມາ ມນ຺ຕາຓິປຸຕ຺ໂຕ’’ຕິ ອາໂຣຈຍິໍສຸ. ຕໍ ກຖໍ ສຸຕ຺ວາ ອາຍສ຺ມາ ສາຣິປຸຕ຺ໂຕ ເຖຣສ຺ສ ທສ຺ສນກາໂມ ອໂຫສິ.

ອຖ ສຕ຺ຖາ ຣາຊຄຫໂຕ ສາວຕ຺ຖິໍ ອຄມາສິ. ປຸຓ຺ຓຕ຺ເຖໂຣ ທສພລສ຺ສ ຕຕ຺ຖ ອາຄຕຠາວໍ ສຸຕ຺ວາ ‘‘ສຕ຺ຖາຣໍ ປສ຺ສິສ຺ສາມີ’’ຕິ ຄນ຺ຕ຺ວາ ອນ຺ໂຕຄນ຺ຘກຸຏິຍໍເຍວ ຕຖາຄຕໍ ສມ຺ປາປຸຓິ. ສຕ຺ຖາ ຕສ຺ສ ຘມ຺ມໍ ເທເສສິ. ເຖໂຣ ຘມ຺ມໍ ສຸຕ຺ວາ ທສພລໍ ວນ຺ທິຕ຺ວາ ປຏິສລ຺ລານຕ຺ຖາຍ ອນ຺ຘວນໍ ຄນ຺ຕ຺ວາ ອຎ຺ຎຕຣສ຺ມິໍ ຣຸກ຺ຂມູເລ ທິວາວິຫາຣໍ ນິສີທິ. ສາຣິປຸຕ຺ຕຕ຺ເຖໂຣປິ ຕສ຺ສ ຄມນໍ ສຸຕ຺ວາ ສີສານຸໂລກິໂກ ຄນ຺ຕ຺ວາ ໂອກາສໍ ສລ຺ລກ຺ເຂຕ຺ວາ ຕໍ ຣຸກ຺ຂມູລໍ ອຸປສງ຺ກມິຕ຺ວາ ເຖເຣນ ສທ຺ຘິໍ ສມ຺ໂມທິຕ຺ວາ ສຕ຺ຕວິສຸທ຺ຘິກ຺ກມໍ ປຸຈ຺ຉິ. ເຖໂຣປິສ຺ສ ປຸຈ຺ຉິຕໍ ປຸຈ຺ຉິຕໍ ພ຺ຍາກາສິ. ເຕ ອຎ຺ຎມຎ຺ຎສ຺ສ ສຸຠາສິຕໍ ສມນຸໂມທິໍສຸ. ອຖ ສຕ຺ຖາ ອປຣຠາເຄ ຠິກ຺ຂຸສງ຺ຆມຊ຺ເຌ ນິສິນ຺ໂນ ເຖຣໍ ຘມ຺ມກຖິການໍ ອຄ຺ຄຏ຺ຐາເນ ຐເປສີຕິ.