ມຫາກຈ຺ຈານຕ຺ເຖຣວຕ຺ຖຸ

໑໙໗. ທສເມ ສໍຂິຕ຺ເຕນ ຠາສິຕສ຺ສາຕິ ສໍຂິຕ຺ເຕນ ກຖິຕຘມ຺ມສ຺ສ. ວິຕ຺ຖາເຣນ ອຕ຺ຖໍ ວິຠຊນ຺ຕານນ຺ຕິ ຕໍ ເທສນໍ ວິຕ຺ຖາເຣຕ຺ວາ ອຕ຺ຖໍ ວິຠຊມານານໍ. ອຎ຺ເຎ ກິຣ ຕຖາຄຕສ຺ສ ສງ຺ເຂປວຈນໍ ອຕ຺ຖວເສນ ວາ ປູເຣຕຸໍ ສກ຺ໂກນ຺ຕິ ພ຺ຍຎ຺ຊນວເສນ ວາ, ອຍໍ ປນ ເຖໂຣ ອຸຠຍວເສນປິ ສກ຺ໂກຕິ. ຕສ຺ມາ ອຄ຺ໂຄຕິ ວຸຕ຺ໂຕ. ປຸພ຺ພປຕ຺ຖນາປິ ຈສ຺ສ ເອວຣູປາວ.

ອຍໍ ປນສ຺ສ ປຎ຺ຫກມ຺ເມ ອນຸປຸພ຺ພິກຖາ – ອຍໍ ກິຣ ປທຸມຸຕ຺ຕຣສມ຺ມາສມ຺ພຸທ຺ຘກາເລ ຄຫປຕິມຫາສາລກຸເລ ນິພ຺ພຕ຺ຕິຕ຺ວາ ວຸທ຺ຘິປ຺ປຕ຺ໂຕ ເອກທິວສໍ ວຸຕ຺ຕນເຍເນວ ວິຫາຣໍ ຄນ຺ຕ຺ວາ ປຣິສປຣິຍນ຺ເຕ ຐິໂຕ ຘມ຺ມໍ ສຸຓນ຺ໂຕ ສຕ຺ຖາຣໍ ອຕ຺ຕນາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ວິຠຊນ຺ຕານໍ ອຄ຺ຄຏ຺ຐາເນ ຐເປນ຺ຕໍ ເອກໍ ຠິກ຺ຂຸໍ ທິສ຺ວາ ‘‘ມຫນ຺ໂຕ ວຕາຍໍ ຠິກ຺ຂຸ, ຍໍ ສຕ຺ຖາ ເອວໍ ວຓ຺ເຓຕິ, ມຍາປິ ອນາຄເຕ ເອກສ຺ສ ພຸທ຺ຘສ຺ສ ສາສເນ ເອວຣູເປນ ຠວິຕຸໍ ວຏ຺ຏຕີ’’ຕິ ສຕ຺ຖາຣໍ ນິມນ຺ເຕຕ຺ວາ ວຸຕ຺ຕນເຍເນວ ສຕ຺ຕາຫໍ ມຫາທານໍ ທຕ຺ວາ, ‘‘ຠນ຺ເຕ, ອຫໍ ອິມສ຺ສ ສກ຺ກາຣສ຺ສ ຜເລນ ນ ອຎ຺ຎໍ ສມ຺ປຕ຺ຕິໍ ປຕ຺ເຖມິ, ອນາຄເຕ ປນ ເອກສ຺ສ ພຸທ຺ຘສ຺ສ ສາສເນ ອິໂຕ ສຕ຺ຕທິວສມຕ຺ຖເກ ຕຸມ຺ເຫຫິ ຐານນ຺ຕເຣ ຐປິຕຠິກ຺ຂຸ ວິຍ ອຫມ຺ປິ ຕໍ ຐານນ຺ຕຣໍ ລເຠຍ຺ຍ’’ນ຺ຕິ ປຕ຺ຖນໍ ກຕ຺ວາ ປາທມູເລ ນິປຊ຺ຊິ. ສຕ຺ຖາ ອນາຄຕໍ ໂອໂລເກນ຺ໂຕ ‘‘ສມິຊ຺ຌິສ຺ສຕິ ອິມສ຺ສ ກຸລປຸຕ຺ຕສ຺ສ ປຕ຺ຖນາ’’ຕິ ທິສ຺ວາ ‘‘ອມ຺ໂຠ, ກຸລປຸຕ຺ຕ, ອນາຄເຕ ກປ຺ປສຕສຫສ຺ສາວສາເນ ໂຄຕໂມ ນາມ ພຸທ຺ໂຘ ອຸປ຺ປຊ຺ຊິສ຺ສຕິ, ຕ຺ວໍ ຕສ຺ສ ສາສເນ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ວິຠຊນ຺ຕານໍ ອຄ຺ໂຄ ຠວິສ຺ສສີ’’ຕິ ພ຺ຍາກຣິຕ຺ວາ ອນຸໂມທນໍ ກຕ຺ວາ ປກ຺ກາມິ.

ໂສປິ ກຸລປຸຕ຺ໂຕ ຍາວຊີວໍ ກຸສລໍ ກຕ຺ວາ ກປ຺ປສຕສຫສ຺ສໍ ເທວມນຸສ຺ເສສຸ ສໍສຣິຕ຺ວາ ກສ຺ສປພຸທ຺ຘກາເລ ພາຣາຓສິຍໍ ກຸລເຄເຫ ປຏິສນ຺ຘິໍ ຄເຫຕ຺ວາ ສຕ຺ຖຣິ ປຣິນິພ຺ພຸເຕ ສຸວຓ຺ຓເຈຕິຍກຣຓຏ຺ຐານໍ ຄນ຺ຕ຺ວາ ສຕສຫສ຺ສຄ຺ຆນິກາຍ ສຸວຓ຺ຓິຏ຺ຐກາຍ ປູຊໍ ກຕ຺ວາ ‘‘ຠຄວາ ມຍ຺ຫໍ ນິພ຺ພຕ຺ຕນິພ຺ພຕ຺ຕຏ຺ຐາເນ ສຣີຣໍ ສຸວຓ຺ຓວຓ຺ຓໍ ໂຫຕູ’’ຕິ ປຕ຺ຖນໍ ອກາສິ. ຕໂຕ ຍາວຊີວໍ ກຸສລກມ຺ມໍ ກຕ຺ວາ ເອກໍ ພຸທ຺ຘນ຺ຕຣໍ ເທວມນຸສ຺ເສສຸ ສໍສຣິຕ຺ວາ ອມ຺ຫາກໍ ທສພລສ຺ສ ອຸປ຺ປຕ຺ຕິກາເລ ອຸຊ຺ເຊນິນຄເຣ ປຸໂຣຫິຕສ຺ສ ເຄເຫ ນິພ຺ພຕ຺ຕິ. ຕສ຺ສ ນາມຄ຺ຄຫຓທິວເສ ‘‘ມຍ຺ຫໍ ປຸຕ຺ໂຕ ສຸວຓ຺ຓວຓ຺ຓສຣີໂຣ ອຕ຺ຕນາວ ອຕ຺ຕໂນ ນາມໍ ຄເຫຕ຺ວາ ອາຄໂຕ’’ຕິ ກຎ຺ຈນມາຓໂວເຕວສ຺ສ ນາມໍ ອກໍສຸ. ໂສ ວຸທ຺ຘິມນ຺ວາຍ ຕໂຍ ເວເທ ອຸຄ຺ຄຓ຺ຫິຕ຺ວາ ປິຕຸ ອຈ຺ຈເຍນ ປຸໂຣຫິຕຏ຺ຐານໍ ລຠິ. ໂສ ໂຄຕ຺ຕວເສນ ກຈ຺ຈາໂນ ນາມ ຊາໂຕ.

ຈຓ຺ຑປຊ຺ໂຊຕຣາຊາ ອມຈ຺ເຈ ສນ຺ນິປາເຕຕ຺ວາ ອາຫ – ‘‘ພຸທ຺ໂຘ ໂລເກ ນິພ຺ພຕ຺ໂຕ, ຕໍ ອາເນຕຸໍ ສມຕ຺ຖາ ຄນ຺ຕ຺ວາ ອາເນຖ ຕາຕາ’’ຕິ. ເທວ, ອຎ຺ໂຎ ທສພລໍ ອາເນຕຸໍ ສມຕ຺ໂຖ ນາມ ນຕ຺ຖິ, ອາຈຣິໂຍ ກຈ຺ຈານພ຺ຣາຫ຺ມໂຓວ ສມຕ຺ໂຖ, ຕໍ ປຫິຓຖາຕິ. ຣາຊາ ຕໍ ປກ຺ໂກສາເປຕ຺ວາ, ‘‘ຕາຕ, ທສພລສ຺ສ ສນ຺ຕິກໍ ຄຈ຺ຉາຫີ’’ຕິ ອາຫ. ຄນ຺ຕ຺ວາ ປພ຺ພຊິຕຸໍ ລຠນ຺ໂຕ ຄມິສ຺ສາມິ, ມຫາຣາຊາຕິ. ຍໍກິຎ຺ຈິ ກຕ຺ວາ ຕຖາຄຕໍ ອາເນຫິ, ຕາຕາຕິ. ໂສ ‘‘ພຸທ຺ຘານໍ ສນ຺ຕິກໍ ຄຈ຺ຉນ຺ຕສ຺ສ ມຫາປຣິສາຍ ກມ຺ມໍ ນຕ຺ຖີ’’ຕິ ອຕ຺ຕຏ຺ຐໂມ ອຄມາສິ. ອຖສ຺ສ ສຕ຺ຖາ ຘມ຺ມໍ ເທເສສິ. ເທສນາປຣິໂຍສາເນ ສທ຺ຘິໍ ສຕ຺ຕຫິ ຊເນຫິ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ສຕ຺ຖາ ‘‘ເອຖ ຠິກ຺ຂໂວ’’ຕິ ຫຕ຺ຖໍ ປສາເຣສິ. ຕໍຂຓໍເຍວ ສພ຺ເພວ ອນ຺ຕຣຫິຕເກສມສ຺ສູ ອິທ຺ຘິມຍປຕ຺ຕຈີວຣຘຣາ ວສ຺ສສຏ຺ຐິກຕ຺ເຖຣາ ວິຍ ຊາຕາ.

ເຖໂຣ ອຕ຺ຕໂນ ກິຈ຺ເຈ ມຕ຺ຖກໍ ປຕ຺ເຕ ຕຸຓ຺ຫີຠາເວນ ອນິສີທິຕ຺ວາ ກາຬຸທາຍິຕ຺ເຖໂຣ ວິຍ ສຕ຺ຖຸ ອຸຊ຺ເຊນິຄມນຕ຺ຖາຍ ຄມນວຓ຺ຓໍ ກເຖສິ. ສຕ຺ຖາ ຕສ຺ສ ວຈນໍ ສຸຕ຺ວາ ‘‘ກຈ຺ຈາໂນ ອຕ຺ຕໂນ ຊາຕິຠູມິຍໍ ມມ ຄມນໍ ປຈ຺ຈາສີສຕີ’’ຕິ ອຎ຺ຎາສິ. ພຸທ຺ຘາ ຈ ນາມ ເອກໍ ກາຣຓໍ ປຏິຈ຺ຈ ຄນ຺ຕຸໍ ອຍຸຕ຺ຕຏ຺ຐານໍ ນ ຄຈ຺ຉນ຺ຕິ. ຕສ຺ມາ ເຖຣໍ ອາຫ – ‘‘ຕ຺ວໍເຍວ ຠິກ຺ຂຸ ຄຈ຺ຉ, ຕຍິ ຄເຕປິ ຣາຊາ ປສີທິສ຺ສຕີ’’ຕິ. ເຖໂຣ ‘‘ພຸທ຺ຘານໍ ທ຺ເວ ກຖາ ນາມ ນຕ຺ຖີ’’ຕິ ຕຖາຄຕໍ ວນ຺ທິຕ຺ວາ ອຕ຺ຕນາ ສທ຺ຘິໍ ອາຄເຕຫິ ສຕ຺ຕຫິ ຠິກ຺ຂູຫິ ສທ຺ຘິໍ ອຸຊ຺ເຊນິໍ ຄຈ຺ຉນ຺ໂຕ ອນ຺ຕຣາມຄ຺ເຄ ເຕລປນາຬິ ນາມ ນິຄໂມ, ຕຕ຺ຖ ປິຓ຺ຑາຍ ຈຣິ. ຕສ຺ມິໍ ຈ ນິຄເມ ທ຺ເວ ເສຏ຺ຐິຘີຕໂຣ. ຕາສຸ ເອກາ ປຣິຊິຓ຺ຓກຸເລ ນິພ຺ພຕ຺ຕາ ທຸຄ຺ຄຕາ ມາຕາປິຕູນໍ ອຈ຺ຈເຍນ ຘາຕິໍ ນິສ຺ສາຍ ຊີວຕິ. ອຕ຺ຕຠາໂວ ປນສ຺ສາ ສມິທ຺ໂຘ, ເກສາ ອຎ຺ຎາຫິ ອຕິວິຍ ທີຆາ. ຕສ຺ມິໍເຍວ ນິຄເມ ອຎ຺ຎາ ອິສ຺ສຣເສຏ຺ຐິກຸລສ຺ສ ຘີຕາ ນິກ຺ເກສິກາ. ສາ ຕໂຕ ປຸພ຺ເພ ຕສ຺ສາ ສມີປໍ ເປເສຕ຺ວາ ‘‘ສຕໍ ວາ ສຫສ຺ສໍ ວາ ທສ຺ສາມີ’’ຕິ ວຕ຺ວາປິ ເກເສ ອາຫຣາເປຕຸໍ ນາສກ຺ຂິ.

ຕສ຺ມິໍ ປນ ທິວເສ ສາ ເສຏ຺ຐິຘີຕາ ມຫາກຈ຺ຈານຕ຺ເຖຣໍ ສຕ຺ຕຫິ ຠິກ຺ຂູຫິ ປຣິວຸຕໍ ຕຸຈ຺ຉປຕ຺ຕໍ ອາຄຈ຺ຉນ຺ຕໍ ທິສ຺ວາ ‘‘ອຍໍ ສຸວຓ຺ຓວຓ຺ໂຓ ເອໂກ ພ຺ຣຫ຺ມພນ຺ຘຸຠິກ຺ຂຸ ຍຖາໂຘເຕເນວ ປຕ຺ເຕນ ອາຄຈ຺ຉຕິ, ມຍ຺ຫຎ຺ຈ ອຎ຺ຎໍ ຘນໍ ນຕ຺ຖິ. ອສຸກເສຏ຺ຐິຘີຕາ ປນ ອິເມສໍ ເກສານໍ ອຕ຺ຖາຍ ເປເສສິ. ອິທານິ ອິໂຕ ລທ຺ຘອຸປ຺ປາເທນ ສກ຺ກາ ເຖຣສ຺ສ ເທຍ຺ຍຘມ຺ມໍ ທາຕຸ’’ນ຺ຕິ ຘາຕິໍ ເປເສຕ຺ວາ ເຖເຣ ນິມນ຺ເຕຕ຺ວາ ອນ຺ໂຕເຄເຫ ນິສີທາເປສິ. ເຖຣານໍ ນິສິນ຺ນກາເລ ຄພ຺ຠໍ ປວິສິຕ຺ວາ ຘາຕິຍາ ອຕ຺ຕໂນ ເກເສ ກປ຺ປາເປຕ຺ວາ, ‘‘ອມ຺ມ, ອິເມ ເກເສ ອສຸກາຍ ນາມ ເສຏ຺ຐິຘີຕາຍ ທຕ຺ວາ ຍໍ ສາ ເທຕິ, ຕໍ ອາຫຣ, ອຍ຺ຍານໍ ປິຓ຺ຑປາຕໍ ທສ຺ສາມາ’’ຕິ. ຘາຕິ ປິຏ຺ຐິຫຕ຺ເຖນ ອສ຺ສູນິ ປຸຎ຺ຉິຕ຺ວາ ເອເກນ ຫຕ຺ເຖນ ຫທຍມໍສໍ ສນ຺ຘາເຣຕ຺ວາ ເຖຣານໍ ສນ຺ຕິເກ ປຏິຈ຺ຉາເທຕ຺ວາ ເຕ ເກເສ ອາທາຍ ຕສ຺ສາ ເສຏ຺ຐິຘີຕາຍ ສນ຺ຕິກໍ ຄຕາ.

ປຓິຍໍ ນາມ ສາຣວນ຺ຕມ຺ປິ ສຍໍ ອຸປນີຕໍ ຄາຣວໍ ນ ຊເນຕິ, ຕສ຺ມາ ສາ ເສຏ຺ຐິຘີຕາ ຈິນ຺ເຕສິ – ‘‘ອຫໍ ປຸພ຺ເພ ພຫຸນາປິ ຘເນນ ອິເມ ເກເສ ອາຫຣາເປຕຸໍ ນາສກ຺ຂິໍ, ອິທານິ ປນ ຉິນ຺ນກາລໂຕ ປຏ຺ຐາຍ ນ ຍຖາມູລເມວ ລຠິສ຺ສຕີ’’ຕິ. ຘາຕິໍ ອາຫ – ‘‘ອຫໍ ປຸພ຺ເພ ຕວ ສາມິນິໍ ພຫຸນາປິ ຘເນນ ເກເສ ອາຫຣາເປຕຸໍ ນາສກ຺ຂິໍ, ຍຕ຺ຖ ກຕ຺ຖຈິ ວິນິປາຕາ ປນ ນິຊ຺ຊີວເກສາ ນາມ ອຏ຺ຐ ກຫາປເຓ ອຄ຺ຆນ຺ຕີ’’ຕິ ອຏ຺ເຐວ ກຫາປເຓ ອທາສິ. ຘາຕິ ກຫາປເຓ ອາຫຣິຕ຺ວາ ເສຏ຺ຐິຘີຕາຍ ອທາສິ. ເສຏ຺ຐິຘີຕາ ເອເກກໍ ປິຓ຺ຑປາຕໍ ເອເກກກຫາປຓຄ຺ຆນກໍ ກຕ຺ວາ ເຖຣານໍ ທາເປສິ. ເຖໂຣ ອາວຊ຺ຊິຕ຺ວາ ເສຏ຺ຐິຘີຕາຍ ອຸປນິສ຺ສຍໍ ທິສ຺ວາ ‘‘ກຫໍ ເສຏ຺ຐິຘີຕາ’’ຕິ ປຸຈ຺ຉິ. ຄພ຺ເຠ, ອຍ຺ຍາຕິ. ປກ຺ໂກສຖ ນນ຺ຕິ. ສາ ຈ ເຖເຣສຸ ຄາຣເວນ ເອກວຈເນເນວ ອາຄນ຺ຕ຺ວາ ເຖເຣ ວນ຺ທິຕ຺ວາ ພລວສທ຺ຘໍ ອຸປ຺ປາເທສິ. ສຸເຂຕ຺ເຕ ປຕິຏ຺ຐິຕປິຓ຺ຑປາໂຕ ທິຏ຺ເຐວ ຘມ຺ເມ ວິປາກໍ ເທຕີຕິ ສຫ ເຖຣານໍ ວນ຺ທເນນ ເກສາ ປກຕິຠາເວເຍວ ອຏ຺ຐໍສຸ. ເຖຣາປິ ຕໍ ປິຓ຺ຑປາຕໍ ຄເຫຕ຺ວາ ປສ຺ສນ຺ຕິຍາເຍວ ເສຏ຺ຐິຘີຕາຍ ເວຫາສໍ ອພ຺ຠຸຄ຺ຄນ຺ຕ຺ວາ ກຎ຺ຈນວນຸຍ຺ຍາເນ ໂອຕຣິໍສຸ.

ອຸຍ຺ຍານປາໂລ ເຖຣໍ ທິສ຺ວາ ຣຎ຺ໂຎ ສນ຺ຕິກໍ ຄນ຺ຕ຺ວາ ‘‘ເທວ, ເມ ອຍ຺ໂຍ ປຸໂຣຫິໂຕ ກຈ຺ຈາໂນ ປພ຺ພຊິຕ຺ວາ ອຸຍ຺ຍານມາຄໂຕ’’ຕິ ອາຫ. ຣາຊາ ຈຓ຺ຑປຊ຺ໂຊໂຕ ອຸຍ຺ຍານໍ ຄນ຺ຕ຺ວາ ກຕຠຕ຺ຕກິຈ຺ຈໍ ເຖຣໍ ປຎ຺ຈປຕິຏ຺ຐິເຕນ ວນ຺ທິຕ຺ວາ ເອກມນ຺ຕໍ ນິສິນ຺ໂນ ‘‘ກຫໍ, ຠນ຺ເຕ, ຠຄວາ’’ຕິ ປຸຈ຺ຉິ. ສຕ຺ຖາ ສຍໍ ອນາຄນ຺ຕ຺ວາ ມໍ ເປເສສິ ມຫາຣາຊາຕິ. ກຫໍ, ຠນ຺ເຕ, ອຊ຺ຊ ຠິກ຺ຂໍ ອລຕ຺ຖາຕິ? ເຖໂຣ ຣຎ຺ໂຎ ປຸຈ຺ຉາສຠາເຄນ ສພ຺ພໍ ເສຏ຺ຐິຘີຕາຍ ກຕໍ ທຸກ຺ກຣໍ ອາໂຣເຈສິ. ຣາຊາ ເຖຣສ຺ສ ວສນຏ຺ຐານໍ ປຏິຍາເທຕ຺ວາ ເຖຣໍ ນິມນ຺ເຕຕ຺ວາ ນິເວສນໍ ຄນ຺ຕ຺ວາ ເສຏ຺ຐິຘີຕຣໍ ອາຓາເປຕ຺ວາ ອຄ຺ຄມເຫສິຏ຺ຐາເນ ຐເປສິ. ອິມິສ຺ສາ ອິຕ຺ຖິຍາ ທິຏ຺ຐຘມ຺ມິໂກວ ຍສປຏິລາໂຠ ອໂຫສິ.

ຕໂຕ ປຏ຺ຐາຍ ຣາຊາ ເຖຣສ຺ສ ມຫາສກ຺ກາຣໍ ກໂຣຕິ. ເຖຣສ຺ສ ຘມ຺ມກຖາຍ ປສີທິຕ຺ວາ ມຫາຊໂນ ເຖຣສ຺ສ ສນ຺ຕິເກ ປພ຺ພຊິ. ຕໂຕ ປຏ຺ຐາຍ ສກລນຄຣໍ ເອກກາສາວປຊ຺ໂຊຕໍ ອິສິວາຕປຏິວາຕໍ ອໂຫສິ. ສາປິ ເທວີ ຄພ຺ຠໍ ລຠິຕ຺ວາ ທສມາສຈ຺ຈເຍນ ປຸຕ຺ຕໍ ວິຊາຍິ. ຕສ຺ສ ນາມຄ຺ຄຫຓທິວເສ ໂຄປາລກຸມາໂຣຕິ ມາຕາມຫເສຏ຺ຐິໂນ ນາມໍ ອກໍສຸ. ສາ ປຸຕ຺ຕສ຺ສ ນາມວເສນ ໂຄປາລມາຕາ ນາມ ເທວີ ຊາຕາ. ສາ ເທວີ ເຖເຣ ອຕິວິຍ ປສີທິຕ຺ວາ ຣາຊານໍ ສມ຺ປຏິຈ຺ຉາເປຕ຺ວາ ກຎ຺ຈນວນຸຍ຺ຍາເນ ເຖຣສ຺ສ ວິຫາຣໍ ກາເຣສິ. ເຖໂຣ ອຸຊ຺ເຊນິນຄຣໍ ປສາເທຕ຺ວາ ປຸນ ສຕ຺ຖຸ ສນ຺ຕິກໍ ຄໂຕ. ອຖ ສຕ຺ຖາ ອປຣຠາເຄ ເຊຕວເນ ວິຫຣນ຺ໂຕ ມຘຸປິຓ຺ຑິກສຸຕ຺ຕໍ (ມ. ນິ. ໑.໑໙໙ ອາທໂຍ) ກຈ຺ຈານເປຍ຺ຍາລໍ (ມ. ນິ. ໓.໒໗໙ ອາທໂຍ) ປາຣາຍນສຸຕ຺ຕນ຺ຕິ ອິເມ ຕໂຍ ສຸຕ຺ຕນ຺ເຕ ອຏ຺ຐຸປ຺ປຕ຺ຕິໍ ກຕ຺ວາ ເຖຣໍ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ວິຠຊນ຺ຕານໍ ອຄ຺ຄຏ຺ຐາເນ ຐເປສີຕິ.

ປຐມວຄ຺ຄວຓ຺ຓນາ.