ລກຸຓ຺ຑກຠທ຺ທິຍຕ຺ເຖຣວຕ຺ຖຸ

໑໙໔. ສຕ຺ຕເມ ມຎ຺ຊຸສ຺ສຣານນ຺ຕິ ມຘຸຣສ຺ສຣານໍ. ລກຸຓ຺ຑກຠທ຺ທິໂຍຕິ ອຸພ຺ເພເຘນ ຣສ຺ໂສ, ນາເມນ ຠທ຺ທິໂຍ. ຕສ຺ສາປິ ປຎ຺ຫກມ຺ເມ ອຍມນຸປຸພ຺ພິກຖາ – ອຍມ຺ປິ ຫິ ປທຸມຸຕ຺ຕຣພຸທ຺ຘກາເລ ຫໍສວຕີນຄເຣ ມຫາໂຠຄກຸເລ ນິພ຺ພຕ຺ໂຕ ວຸຕ຺ຕນເຍເນວ ຘມ຺ມສ຺ສວນຕ຺ຖາຍ ວິຫາຣໍ ຄໂຕ. ຕສ຺ມິໍ ສມເຍ ສຕ຺ຖາຣໍ ເອກໍ ມຎ຺ຊຸສ຺ສຣໍ ຠິກ຺ຂຸໍ ເອຕທຄ຺ເຄ ຐເປນ຺ຕໍ ທິສ຺ວາ ‘‘ອໂຫ ວຕາຫມ຺ປິ ອນາຄເຕ ອຍໍ ຠິກ຺ຂຸ ວິຍ ເອກສ຺ສ ພຸທ຺ຘສ຺ສ ສາສເນ ມຎ຺ຊຸສ຺ສຣານໍ ຠິກ຺ຂູນໍ ອຄ຺ໂຄ ຠເວຍ຺ຍ’’ນ຺ຕິ ຈິຕ຺ຕໍ ອຸປ຺ປາເທຕ຺ວາ ສຕ຺ຖາຣໍ ນິມນ຺ເຕຕ຺ວາ ສຕ຺ຕ ທິວສານິ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ມຫາທານໍ ທຕ຺ວາ, ‘‘ຠນ຺ເຕ, ອຫໍ ອິມສ຺ສ ທານສ຺ສ ຜເລນ ນ ອຎ຺ຎໍ ສມ຺ປຕ຺ຕິໍ ອາກງ຺ຂາມິ, ອນາຄເຕ ປນ ເອກສ຺ສ ພຸທ຺ຘສ຺ສ ສາສເນ ມຎ຺ຊຸສ຺ສຣານໍ ຠິກ຺ຂູນໍ ອຄ຺ໂຄ ຠເວຍ຺ຍ’’ນ຺ຕິ ປຕ຺ຖຍິຕ຺ວາ ສຕ຺ຖຸປາທມູເລ ນິປຊ຺ຊິ. ສຕ຺ຖາ ອນາຄຕໍ ໂອໂລເກນ຺ໂຕ ສມິຊ຺ຌນຠາວໍ ທິສ຺ວາ ‘‘ສມິຊ຺ຌິສ຺ສຕິ ເຕ ອິທໍ ກມ຺ມໍ, ອິໂຕ ກປ຺ປສຕສຫສ຺ສາວສາເນ ໂຄຕໂມ ນາມ ພຸທ຺ໂຘ ອຸປ຺ປຊ຺ຊິສ຺ສຕິ, ຕ຺ວໍ ຕສ຺ສ ສາສເນ ມຎ຺ຊຸສ຺ສຣານໍ ຠິກ຺ຂູນໍ ອຄ຺ໂຄ ຠວິສ຺ສສີ’’ຕິ ພ຺ຍາກຣິຕ຺ວາ ວິຫາຣໍ ອຄມາສິ.

ໂສປິ ຕໍ ພ຺ຍາກຣຓໍ ລຠິຕ຺ວາ ຍາວຊີວໍ ກລ຺ຍາຓກມ຺ມໍ ກຕ຺ວາ ຕໂຕ ກາລກໂຕ ເທເວສຸ ຈ ມນຸສ຺ເສສຸ ຈ ສໍສຣນ຺ໂຕ ວິປສ຺ສີສມ຺ມາສມ຺ພຸທ຺ຘກາເລ ຈິຕ຺ຕປຕ຺ຕໂກກິໂລ ນາມ ຫຸຕ຺ວາ ເຂເມ ມິຄທາເຍ ວສນ຺ໂຕ ເອກທິວສໍ ຫິມວນ຺ຕໍ ຄນ຺ຕ຺ວາ ມຘຸຣໍ ອມ຺ພຜລໍ ຕຸຓ຺ເຑນ ຄເຫຕ຺ວາ ອາຄຈ຺ຉນ຺ໂຕ ຠິກ຺ຂຸສງ຺ຆປຣິວຸຕໍ ສຕ຺ຖາຣໍ ທິສ຺ວາ ຈິນ຺ເຕສິ – ‘‘ອຫໍ ອຎ຺ເຎສຸ ທິວເສສຸ ຣິຕ຺ຕໂກ ຕຖາຄຕໍ ປສ຺ສາມິ, ອຊ຺ຊ ປນ ເມ ອິມໍ ອມ຺ພປກ຺ກໍ ປຸຕ຺ຕການໍ ອຕ຺ຖາຍ ອາຄຕໍ. ເຕສໍ ອຎ຺ຎມ຺ປິ ອາຫຣິຕ຺ວາ ທສ຺ສາມິ, ອິມໍ ປນ ທສພລສ຺ສ ທາຕຸໍ ວຏ຺ຏຕີ’’ຕິ ໂອຕຣິຕ຺ວາ ອາກາເສ ຈຣຕິ. ສຕ຺ຖາ ຕສ຺ສ ຈິຕ຺ຕໍ ຎຕ຺ວາ ອໂສກຕ຺ເຖຣໍ ນາມ ອຸປຏ຺ຐາກໍ ໂອໂລເກສິ. ໂສ ປຕ຺ຕໍ ນີຫຣິຕ຺ວາ ສຕ຺ຖຸ ຫຕ຺ເຖ ຐເປສິ. ໂສ ໂກກິໂລ ທສພລສ຺ສ ປຕ຺ເຕ ອມ຺ພປກ຺ກໍ ປຕິຏ຺ຐາເປສິ. ສຕ຺ຖາ ຕຕ຺ເຖວ ນິສີທິຕ຺ວາ ຕໍ ປຣິຠຸຎ຺ຊິ. ໂກກິໂລ ປສນ຺ນຈິຕ຺ໂຕ ປຸນປ຺ປຸນໍ ທສພລສ຺ສ ຄຸເຓ ອາວຊ຺ເຊຕ຺ວາ ທສພລໍ ວນ຺ທິຕ຺ວາ ອຕ຺ຕໂນ ກຸລາວກໍ ຄນ຺ຕ຺ວາ ສຕ຺ຕາຫໍ ປີຕິສຸເຂນ ວີຕິນາເມສິ. ເອຕ຺ຕກໍ ຕສ຺ມິໍ ອຕ຺ຕຠາເວ ກລ຺ຍາຓກມ຺ມໍ, ອິມິນາສ຺ສ ກມ຺ເມນ ສໂຣ ມຘຸໂຣ ອໂຫສິ.

ກສ຺ສປສມ຺ມາສມ຺ພຸທ຺ຘກາເລ ປນ ເຈຕິເຍ ອາຣທ຺ເຘ ‘‘ກິໍປມາຓໍ ກໂຣມ? ສຕ຺ຕໂຍຊນປ຺ປມາຓໍ. ອຕິມຫນ຺ຕໍ ເອຕໍ, ຉໂຍຊນໍ ກໂຣມ. ອິທມ຺ປິ ອຕິມຫນ຺ຕໍ, ປຎ຺ຈໂຍຊນໍ ກໂຣມ, ຈຕຸໂຍຊນໍ, ຕິໂຍຊນໍ, ທ຺ວິໂຍຊນ’’ນ຺ຕິ ວຸຕ຺ເຕ ອຍໍ ຕທາ ເຊຏ຺ຐວຑ຺ຒກີ ຫຸຕ຺ວາ ‘‘ເອຖ, ໂຠ, ອນາຄເຕ ສຸຂປຏິຊຄ຺ຄິຍໍ ກາຕຸໍ ວຏ຺ຏຕີ’’ຕິ ວຕ຺ວາ ຣຊ຺ຊຸໍ ອາທາຍ ປຣິກ຺ຂິປນ຺ໂຕ ຄາວຸຕມຕ຺ຕເກ ຐຕ຺ວາ ‘‘ເອເກກໍ ມຸຂໍ ຄາວຸຕໍ ຄາວຸຕໍ ໂຫຕຸ, ເຈຕິຍໍ ໂຍຊນາວຏ຺ຏໍ ໂຍຊນຸພ຺ເພຘໍ ຠວິສ຺ສຕີ’’ຕິ ອາຫ. ເຕ ຕສ຺ສ ວຈເນ ອຏ຺ຐໍສຸ. ອິຕິ ອປ຺ປມາຓສ຺ສ ພຸທ຺ຘສ຺ສ ປມາຓໍ ອກາສີຕິ. ເຕນ ກມ຺ເມນ ນິພ຺ພຕ຺ຕນິພ຺ພຕ຺ຕຏ຺ຐາເນ ອຎ຺ເຎຫິ ຫີນຕຣປ຺ປມາໂຓ ອໂຫສິ. ໂສ ອມ຺ຫາກໍ ສຕ຺ຖຸ ກາເລ ສາວຕ຺ຖິຍໍ ມຫາໂຠຄກຸເລ ນິພ຺ພຕ຺ຕິ. ‘‘ຠທ຺ທິໂຍ’’ຕິສ຺ສ ນາມໍ ອກໍສຸ. ໂສ ວຍປ຺ປຕ຺ໂຕ ສຕ຺ຖຣິ ເຊຕວນມຫາວິຫາເຣ ປຏິວສນ຺ເຕ ວິຫາຣໍ ຄນ຺ຕ຺ວາ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ອຣຫຕ຺ຕໍ ປາປຸຓິ. ອຖ ນໍ ສຕ຺ຖາ ອປຣຠາເຄ ອຣິຍວຣຄຓມຊ຺ເຌ ນິສິນ຺ໂນ ມຎ຺ຊຸສ຺ສຣານໍ ຠິກ຺ຂູນໍ ອຄ຺ຄຏ຺ຐາເນ ຐເປສິ.