໗. ສມ຺ປຍຸຕ຺ຕຈຕຸກ຺ກໍ

ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ, ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໕. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ’’.

ຕຕ຺ຖ ກຕມໍ ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ’’.

ຕຕ຺ຖ ກຕມາ ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ’’.

ຕຕ຺ຖ ກຕມໍ ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ? ຍາ ທິຏ຺ຐິ ທິຏ຺ຐິຄຕໍ…ເປ… ຕິຕ຺ຖາຍຕນໍ ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ’’ …ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໖໖. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ, ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໗. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ’’.

ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕຕິ. ຕຕ຺ຖ ກຕມໍ ນາມໍ? ຐເປຕ຺ວາ ຜສ຺ສໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’.

ຕຕ຺ຖ ກຕໂມ ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໖໘. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ, ນາມຣູປປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໙. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ …ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ’’.

ນາມຣູປປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຍໍ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໗໐. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ, ນາມຣູປປຈ຺ຈຍາ ສຬາຍຕນໍ ນາມສມ຺ປຍຸຕ຺ຕໍ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໗໑. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ’’.

ນາມຣູປປຈ຺ຈຍາ ສຬາຍຕນໍ ນາມສມ຺ປຍຸຕ຺ຕໍ ຉຏ຺ຐາຍຕນນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈຕ຺ຕາໂຣ ຈ ມຫາຠູຕາ, ຍຎ຺ຈ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ສຬາຍຕນໍ ນາມສມ຺ປຍຸຕ຺ຕໍ ຉຏ຺ຐາຍຕນໍ? ຈກ຺ຂາຍຕນໍ, ໂສຕາຍຕນໍ, ຆານາຍຕນໍ, ຊິວ຺ຫາຍຕນໍ, ກາຍາຍຕນໍ, ມນາຍຕນໍ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ສຬາຍຕນໍ ນາມສມ຺ປຍຸຕ຺ຕໍ ຉຏ຺ຐາຍຕນໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

ສມ຺ປຍຸຕ຺ຕຈຕຸກ຺ກໍ.