໖. ປຏິຈ຺ຈສມຸປ຺ປາທວິຠງ຺ໂຄ

໑. ສຸຕ຺ຕນ຺ຕຠາຊນີຍໍ

໒໒໕. ອວິຊ຺ຊາປຈ຺ຈຍາ ສງ຺ຂາຣາ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ສຬາຍຕນໍ, ສຬາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໒໖. ຕຕ຺ຖ ກຕມາ ອວິຊ຺ຊາ? ທຸກ຺ເຂ ອຎ຺ຎາຓໍ, ທຸກ຺ຂສມຸທເຍ ອຎ຺ຎາຓໍ, ທຸກ຺ຂນິໂຣເຘ ອຎ຺ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ອຎ຺ຎາຓໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕເມ ອວິຊ຺ຊາປຈ຺ຈຍາ ສງ຺ຂາຣາ? ປຸຎ຺ຎາຠິສງ຺ຂາໂຣ, ອປຸຎ຺ຎາຠິສງ຺ຂາໂຣ, ອາເນຎ຺ຊາຠິສງ຺ຂາໂຣ, ກາຍສງ຺ຂາໂຣ, ວຈີສງ຺ຂາໂຣ, ຈິຕ຺ຕສງ຺ຂາໂຣ.

ຕຕ຺ຖ ກຕໂມ ປຸຎ຺ຎາຠິສງ຺ຂາໂຣ? ກຸສລາ ເຈຕນາ ກາມາວຈຣາ ຣູປາວຈຣາ ທານມຍາ ສີລມຍາ ຠາວນາມຍາ – ອຍໍ ວຸຈ຺ຈຕິ ‘‘ປຸຎ຺ຎາຠິສງ຺ຂາໂຣ’’.

ຕຕ຺ຖ ກຕໂມ ອປຸຎ຺ຎາຠິສງ຺ຂາໂຣ? ອກຸສລາ ເຈຕນາ ກາມາວຈຣາ – ອຍໍ ວຸຈ຺ຈຕິ ‘‘ອປຸຎ຺ຎາຠິສງ຺ຂາໂຣ’’.

ຕຕ຺ຖ ກຕໂມ ອາເນຎ຺ຊາຠິສງ຺ຂາໂຣ? ກຸສລາ ເຈຕນາ ອຣູປາວຈຣາ – ອຍໍ ວຸຈ຺ຈຕິ ‘‘ອາເນຎ຺ຊາຠິສງ຺ຂາໂຣ’’.

ຕຕ຺ຖ ກຕໂມ ກາຍສງ຺ຂາໂຣ? ກາຍສຎ຺ເຈຕນາ ກາຍສງ຺ຂາໂຣ, ວຈີສຎ຺ເຈຕນາ ວຈີສງ຺ຂາໂຣ, ມໂນສຎ຺ເຈຕນາ ຈິຕ຺ຕສງ຺ຂາໂຣ. ອິເມ ວຸຈ຺ຈນ຺ຕິ ‘‘ອວິຊ຺ຊາປຈ຺ຈຍາ ສງ຺ຂາຣາ’’.

໒໒໗. ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ, ມໂນວິຎ຺ຎາຓໍ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

໒໒໘. ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈຕ຺ຕາໂຣ ມຫາຠູຕາ, ຈຕຸນ຺ນຎ຺ຈ ມຫາຠູຕານໍ ອຸປາທາຍ ຣູປໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ’’.

໒໒໙. ຕຕ຺ຖ ກຕມໍ ນາມຣູປປຈ຺ຈຍາ ສຬາຍຕນໍ? ຈກ຺ຂາຍຕນໍ, ໂສຕາຍຕນໍ, ຆານາຍຕນໍ, ຊິວ຺ຫາຍຕນໍ, ກາຍາຍຕນໍ, ມນາຍຕນໍ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ສຬາຍຕນໍ’’.

໒໓໐. ຕຕ຺ຖ ກຕໂມ ສຬາຍຕນປຈ຺ຈຍາ ຜສ຺ໂສ? ຈກ຺ຂຸສມ຺ຜສ຺ໂສ ໂສຕສມ຺ຜສ຺ໂສ ຆານສມ຺ຜສ຺ໂສ ຊິວ຺ຫາສມ຺ຜສ຺ໂສ ກາຍສມ຺ຜສ຺ໂສ ມໂນສມ຺ຜສ຺ໂສ – ອຍໍ ວຸຈ຺ຈຕິ ‘‘ສຬາຍຕນປຈ຺ຈຍາ ຜສ຺ໂສ’’.

໒໓໑. ຕຕ຺ຖ ກຕມາ ຜສ຺ສປຈ຺ຈຍາ ເວທນາ? ຈກ຺ຂຸສມ຺ຜສ຺ສຊາ ເວທນາ, ໂສຕສມ຺ຜສ຺ສຊາ ເວທນາ, ຆານສມ຺ຜສ຺ສຊາ ເວທນາ, ຊິວ຺ຫາສມ຺ຜສ຺ສຊາ ເວທນາ, ກາຍສມ຺ຜສ຺ສຊາ ເວທນາ, ມໂນສມ຺ຜສ຺ສຊາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ’’.

໒໓໒. ຕຕ຺ຖ ກຕມາ ເວທນາປຈ຺ຈຍາ ຕຓ຺ຫາ? ຣູປຕຓ຺ຫາ, ສທ຺ທຕຓ຺ຫາ, ຄນ຺ຘຕຓ຺ຫາ, ຣສຕຓ຺ຫາ, ໂຜຏ຺ຐພ຺ພຕຓ຺ຫາ, ຘມ຺ມຕຓ຺ຫາ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ຕຓ຺ຫາ’’.

໒໓໓. ຕຕ຺ຖ ກຕມໍ ຕຓ຺ຫາປຈ຺ຈຍາ ອຸປາທານໍ? ກາມຸປາທານໍ, ທິຏ຺ຐຸປາທານໍ, ສີລພ຺ພຕຸປາທານໍ, ອຕ຺ຕວາທຸປາທານໍ – ອິທໍ ວຸຈ຺ຈຕິ ‘‘ຕຓ຺ຫາປຈ຺ຈຍາ ອຸປາທານໍ’’.

໒໓໔. ຕຕ຺ຖ ກຕໂມ ອຸປາທານປຈ຺ຈຍາ ຠໂວ? ຠໂວ ທຸວິເຘນ – ອຕ຺ຖິ ກມ຺ມຠໂວ, ອຕ຺ຖິ ອຸປປຕ຺ຕິຠໂວ. ຕຕ຺ຖ ກຕໂມ ກມ຺ມຠໂວ? ປຸຎ຺ຎາຠິສງ຺ຂາໂຣ, ອປຸຎ຺ຎາຠິສງ຺ຂາໂຣ, ອາເນຎ຺ຊາຠິສງ຺ຂາໂຣ – ອຍໍ ວຸຈ຺ຈຕິ ‘‘ກມ຺ມຠໂວ’’. ສພ຺ພມ຺ປິ ຠວຄາມິກມ຺ມໍ ກມ຺ມຠໂວ.

ຕຕ຺ຖ ກຕໂມ ອຸປປຕ຺ຕິຠໂວ? ກາມຠໂວ, ຣູປຠໂວ, ອຣູປຠໂວ, ສຎ຺ຎາຠໂວ, ອສຎ຺ຎາຠໂວ, ເນວສຎ຺ຎານາສຎ຺ຎາຠໂວ, ເອກໂວກາຣຠໂວ, ຈຕຸໂວກາຣຠໂວ, ປຎ຺ຈໂວກາຣຠໂວ – ອຍໍ ວຸຈ຺ຈຕິ ‘‘ອຸປປຕ຺ຕິຠໂວ’’. ອິຕິ ອຍຎ຺ຈ ກມ຺ມຠໂວ, ອຍຎ຺ຈ ອຸປປຕ຺ຕິຠໂວ. ອຍໍ ວຸຈ຺ຈຕິ ‘‘ອຸປາທານປຈ຺ຈຍາ ຠໂວ’’.

໒໓໕. ຕຕ຺ຖ ກຕມາ ຠວປຈ຺ຈຍາ ຊາຕິ? ຍາ ເຕສໍ ເຕສໍ ສຕ຺ຕານໍ ຕມ຺ຫິ ຕມ຺ຫິ ສຕ຺ຕນິກາເຍ ຊາຕິ ສຎ຺ຊາຕິ ໂອກ຺ກນ຺ຕິ ອຠິນິພ຺ພຕ຺ຕິ, ຂນ຺ຘານໍ ປາຕຸຠາໂວ, ອາຍຕນານໍ ປຏິລາໂຠ – ອຍໍ ວຸຈ຺ຈຕິ ‘‘ຠວປຈ຺ຈຍາ ຊາຕິ’’.

໒໓໖. ຕຕ຺ຖ ກຕມໍ ຊາຕິປຈ຺ຈຍາ ຊຣາມຣຓໍ? ອຕ຺ຖິ ຊຣາ, ອຕ຺ຖິ ມຣຓໍ. ຕຕ຺ຖ ກຕມາ ຊຣາ? ຍາ ເຕສໍ ເຕສໍ ສຕ຺ຕານໍ ຕມ຺ຫິ ຕມ຺ຫິ ສຕ຺ຕນິກາເຍ ຊຣາ ຊີຣຓຕາ ຂຓ຺ຑິຈ຺ຈໍ ປາລິຈ຺ຈໍ ວລິຕ຺ຕຈຕາ ອາຍຸໂນ ສໍຫານິ ອິນ຺ທ຺ຣິຍານໍ ປຣິປາໂກ – ອຍໍ ວຸຈ຺ຈຕິ ‘‘ຊຣາ’’.

ຕຕ຺ຖ ກຕມໍ ມຣຓໍ? ຍາ ເຕສໍ ເຕສໍ ສຕ຺ຕານໍ ຕມ຺ຫາ ຕມ຺ຫາ ສຕ຺ຕນິກາຍາ ຈຸຕິ ຈວນຕາ ເຠໂທ ອນ຺ຕຣຘານໍ ມຈ຺ຈຸ ມຣຓໍ ກາລກິຣິຍາ [ກາລໍກິຣິຍາ (ກ.)] ຂນ຺ຘານໍ ເຠໂທ ກເຬວຣສ຺ສ ນິກ຺ເຂໂປ ຊີວິຕິນ຺ທ຺ຣິຍສ຺ສຸປຈ຺ເຉໂທ – ອິທໍ ວຸຈ຺ຈຕິ ‘‘ມຣຓໍ’’. ອິຕິ ອຍຎ຺ຈ ຊຣາ, ອິທຎ຺ຈ ມຣຓໍ. ອິທໍ ວຸຈ຺ຈຕິ ‘‘ຊາຕິປຈ຺ຈຍາ ຊຣາມຣຓໍ’’.

໒໓໗. ຕຕ຺ຖ ກຕໂມ ໂສໂກ? ຎາຕິພ຺ຍສເນນ ວາ ຜຸຏ຺ຐສ຺ສ, ໂຠຄພ຺ຍສເນນ ວາ ຜຸຏ຺ຐສ຺ສ, ໂຣຄພ຺ຍສເນນ ວາ ຜຸຏ຺ຐສ຺ສ, ສີລພ຺ຍສເນນ ວາ ຜຸຏ຺ຐສ຺ສ, ທິຏ຺ຐິພ຺ຍສເນນ ວາ ຜຸຏ຺ຐສ຺ສ, ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ, ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ໂສໂກ ໂສຈນາ ໂສຈິຕຕ຺ຕໍ ອນ຺ໂຕໂສໂກ ອນ຺ໂຕປຣິໂສໂກ ເຈຕໂສ ປຣິຊ຺ຌາຍນາ ໂທມນສ຺ສໍ ໂສກສລ຺ລໍ – ອຍໍ ວຸຈ຺ຈຕິ ‘‘ໂສໂກ’’.

໒໓໘. ຕຕ຺ຖ ກຕໂມ ປຣິເທໂວ? ຎາຕິພ຺ຍສເນນ ວາ ຜຸຏ຺ຐສ຺ສ, ໂຠຄພ຺ຍສເນນ ວາ ຜຸຏ຺ຐສ຺ສ, ໂຣຄພ຺ຍສເນນ ວາ ຜຸຏ຺ຐສ຺ສ, ສີລພ຺ຍສເນນ ວາ ຜຸຏ຺ຐສ຺ສ, ທິຏ຺ຐິພ຺ຍສເນນ ວາ ຜຸຏ຺ຐສ຺ສ, ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ, ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ອາເທໂວ ປຣິເທໂວ ອາເທວນາ ປຣິເທວນາ ອາເທວິຕຕ຺ຕໍ ປຣິເທວິຕຕ຺ຕໍ ວາຈາ ປລາໂປ ວິປ຺ປລາໂປ ລາລປ຺ໂປ ລາລປ຺ປນາ ລາລປ຺ປິຕຕ຺ຕໍ – ອຍໍ ວຸຈ຺ຈຕິ ປຣິເທໂວ’’.

໒໓໙. ຕຕ຺ຖ ກຕມໍ ທຸກ຺ຂໍ? ຍໍ ກາຍິກໍ ອສາຕໍ ກາຍິກໍ ທຸກ຺ຂໍ ກາຍສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ກາຍສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ທຸກ຺ຂໍ’’.

໒໔໐. ຕຕ຺ຖ ກຕມໍ ໂທມນສ຺ສໍ? ຍໍ ເຈຕສິກໍ ອສາຕໍ, ເຈຕສິກໍ ທຸກ຺ຂໍ, ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ, ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສໍ’’.

໒໔໑. ຕຕ຺ຖ ກຕໂມ ອຸປາຍາໂສ? ຎາຕິພ຺ຍສເນນ ວາ ຜຸຏ຺ຐສ຺ສ, ໂຠຄພ຺ຍສເນນ ວາ ຜຸຏ຺ຐສ຺ສ, ໂຣຄພ຺ຍສເນນ ວາ ຜຸຏ຺ຐສ຺ສ, ສີລພ຺ຍສເນນ ວາ ຜຸຏ຺ຐສ຺ສ, ທິຏ຺ຐິພ຺ຍສເນນ ວາ ຜຸຏ຺ຐສ຺ສ, ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ, ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ອາຍາໂສ ອຸປາຍາໂສ ອາຍາສິຕຕ຺ຕໍ ອຸປາຍາສິຕຕ຺ຕໍ – ອຍໍ ວຸຈ຺ຈຕິ ‘‘ອຸປາຍາໂສ’’.

໒໔໒. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີຕິ, ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສງ຺ຄຕິ ໂຫຕິ, ສມາຄໂມ ໂຫຕິ, ສໂມຘານໍ ໂຫຕິ, ປາຕຸຠາໂວ ໂຫຕິ. ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

ສຸຕ຺ຕນ຺ຕຠາຊນີຍໍ.

໒. ອຠິຘມ຺ມຠາຊນີຍໍ

໑. ປຈ຺ຈຍຈຕຸກ຺ກໍ

໒໔໓. ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ສຬາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ປຈ຺ຈຍຈຕຸກ຺ກໍ.

໒. ເຫຕຸຈຕຸກ຺ກໍ

໒໔໔. ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓເຫຕຸກໍ, ນາມປຈ຺ຈຍາ ຉຏ຺ຐາຍຕນໍ ນາມເຫຕຸກໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓເຫຕຸກໍ, ນາມປຈ຺ຈຍາ ຜສ຺ໂສ ນາມເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓເຫຕຸກໍ, ນາມຣູປປຈ຺ຈຍາ ຉຏ຺ຐາຍຕນໍ ນາມຣູປເຫຕຸກໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓເຫຕຸກໍ, ນາມຣູປປຈ຺ຈຍາ ສຬາຍຕນໍ ນາມຣູປເຫຕຸກໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ເຫຕຸຈຕຸກ຺ກໍ.

໓. ສມ຺ປຍຸຕ຺ຕຈຕຸກ຺ກໍ

໒໔໕. ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ, ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ, ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ, ນາມຣູປປຈ຺ຈຍາ ຉຏ຺ຐາຍຕນໍ ນາມຣູປສມ຺ປຍຸຕ຺ຕໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓສມ຺ປຍຸຕ຺ຕໍ ນາມໍ, ນາມຣູປປຈ຺ຈຍາ ສຬາຍຕນໍ ນາມສມ຺ປຍຸຕ຺ຕໍ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ອຸປາທານສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ສມ຺ປຍຸຕ຺ຕຈຕຸກ຺ກໍ.

໔. ອຎ຺ຎມຎ຺ຎຈຕຸກ຺ກໍ

໒໔໖. ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາປິ ວິຎ຺ຎາຓໍ; ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາປິ ນາມໍ; ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ຉຏ຺ຐາຍຕນໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາປິ ວິຎ຺ຎາຓໍ; ນາມປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ນາມໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາປິ ວິຎ຺ຎາຓໍ; ນາມຣູປປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາປິ ນາມຣູປໍ; ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ຉຏ຺ຐາຍຕນໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາປິ ວິຎ຺ຎາຓໍ; ນາມຣູປປຈ຺ຈຍາ ສຬາຍຕນໍ, ຉຏ຺ຐາຍຕນປຈ຺ຈຍາປິ ນາມຣູປໍ; ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ຉຏ຺ຐາຍຕນໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ອຎ຺ຎມຎ຺ຎຈຕຸກ຺ກໍ.

ມາຕິກາ

໒໔໗. ສງ຺ຂາຣປຈ຺ຈຍາ ອວິຊ຺ຊາ…ເປ… ວິຎ຺ຎາຓປຈ຺ຈຍາ ອວິຊ຺ຊາ…ເປ… ນາມປຈ຺ຈຍາ ອວິຊ຺ຊາ…ເປ… ຉຏ຺ຐາຍຕນປຈ຺ຈຍາ ອວິຊ຺ຊາ…ເປ… ຜສ຺ສປຈ຺ຈຍາ ອວິຊ຺ຊາ…ເປ… ເວທນາປຈ຺ຈຍາ ອວິຊ຺ຊາ…ເປ… ຕຓ຺ຫາປຈ຺ຈຍາ ອວິຊ຺ຊາ…ເປ… ອຸປາທານປຈ຺ຈຍາ ອວິຊ຺ຊາ…ເປ… ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

ມາຕິກາ.

໕. ປຈ຺ຈຍຈຕຸກ຺ກໍ

໒໔໘. ກຕເມ ຘມ຺ມາ ອກຸສລາ? ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ທິຏ຺ຐິຄຕສມ຺ປຍຸຕ຺ຕໍ ຣູປາຣມ຺ມຓໍ ວາ ສທ຺ທາຣມ຺ມຓໍ ວາ ຄນ຺ຘາຣມ຺ມຓໍ ວາ ຣສາຣມ຺ມຓໍ ວາ ໂຜຏ຺ຐພ຺ພາຣມ຺ມຓໍ ວາ ຘມ຺ມາຣມ຺ມຓໍ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໔໙. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ [ເຈຕຍິຕຕ຺ຕໍ (ສີ. ກ.)] – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ’’.

ຕຕ຺ຖ ກຕມໍ ນາມປຈ຺ຈຍາ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາ ຉຏ຺ຐາຍຕນໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ’’.

ຕຕ຺ຖ ກຕມາ ເວທນາປຈ຺ຈຍາ ຕຓ຺ຫາ? ໂຍ ຣາໂຄ ສາຣາໂຄ ອນຸນໂຍ ອນຸໂຣໂຘ ນນ຺ທີ ນນ຺ທິຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ຕຓ຺ຫາ’’.

ຕຕ຺ຖ ກຕມໍ ຕຓ຺ຫາປຈ຺ຈຍາ ອຸປາທານໍ? ຍາ ທິຏ຺ຐິ ທິຏ຺ຐິຄຕໍ ທິຏ຺ຐິຄຫນໍ ທິຏ຺ຐິກນ຺ຕາໂຣ ທິຏ຺ຐິວິສູກາຍິກໍ ທິຏ຺ຐິວິປ຺ຜນ຺ທິຕໍ ທິຏ຺ຐິສໍໂຍຊນໍ ຄາໂຫ ປຕິຏ຺ຐາໂຫ ອຠິນິເວໂສ ປຣາມາໂສ ກຸມ຺ມຄ຺ໂຄ ມິຈ຺ຉາປໂຖ ມິຈ຺ຉຕ຺ຕໍ ຕິຕ຺ຖາຍຕນໍ ວິປຣິຍາສຄ຺ຄາໂຫ [ວິປຣິເຍສຄ຺ຄາໂຫ (ພຫູສຸ)] – ອິທໍ ວຸຈ຺ຈຕິ ‘‘ຕຓ຺ຫາປຈ຺ຈຍາ ອຸປາທານໍ’’.

ຕຕ຺ຖ ກຕໂມ ອຸປາທານປຈ຺ຈຍາ ຠໂວ? ຐເປຕ຺ວາ ອຸປາທານໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອຍໍ ວຸຈ຺ຈຕິ ‘‘ອຸປາທານປຈ຺ຈຍາ ຠໂວ’’.

ຕຕ຺ຖ ກຕມາ ຠວປຈ຺ຈຍາ ຊາຕິ? ຍາ ເຕສໍ ເຕສໍ ຘມ຺ມານໍ ຊາຕິ ສຎ຺ຊາຕິ ນິພ຺ພຕ຺ຕິ ອຠິນິພ຺ພຕ຺ຕິ ປາຕຸຠາໂວ – ອຍໍ ວຸຈ຺ຈຕິ ‘‘ຠວປຈ຺ຈຍາ ຊາຕິ’’.

ຕຕ຺ຖ ກຕມໍ ຊາຕິປຈ຺ຈຍາ ຊຣາມຣຓໍ? ອຕ຺ຖິ ຊຣາ, ອຕ຺ຖິ ມຣຓໍ. ຕຕ຺ຖ ກຕມາ ຊຣາ? ຍາ ເຕສໍ ເຕສໍ ຘມ຺ມານໍ ຊຣາ ຊີຣຓຕາ ອາຍຸໂນ ສໍຫານິ – ອຍໍ ວຸຈ຺ຈຕິ ‘‘ຊຣາ’’. ຕຕ຺ຖ ກຕມໍ ມຣຓໍ? ໂຍ ເຕສໍ ເຕສໍ ຘມ຺ມານໍ ຂໂຍ ວໂຍ ເຠໂທ ປຣິເຠໂທ ອນິຈ຺ຈຕາ ອນ຺ຕຣຘານໍ – ອິທໍ ວຸຈ຺ຈຕິ ‘‘ມຣຓໍ’’. ອິຕິ ອຍຎ຺ຈ ຊຣາ, ອິທຎ຺ຈ ມຣຓໍ. ອິທໍ ວຸຈ຺ຈຕິ ‘‘ຊາຕິປຈ຺ຈຍາ ຊຣາມຣຓໍ’’.

ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສງ຺ຄຕິ ໂຫຕິ, ສມາຄໂມ ໂຫຕິ, ສໂມຘານໍ ໂຫຕິ, ປາຕຸຠາໂວ ໂຫຕິ. ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໕໐. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໕໑. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

ນາມປຈ຺ຈຍາ ຜສ຺ໂສຕິ. ຕຕ຺ຖ ກຕມໍ ນາມໍ? ຐເປຕ຺ວາ ຜສ຺ສໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’.

ຕຕ຺ຖ ກຕໂມ ນາມປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ນາມປຈ຺ຈຍາ ຜສ຺ໂສ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໕໓. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ’’.

ນາມຣູປປຈ຺ຈຍາ ຉຏ຺ຐາຍຕນນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຍໍ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ຉຏ຺ຐາຍຕນໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໕໔. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ສຬາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໕໕. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ນາມຣູປປຈ຺ຈຍາ ສຬາຍຕນນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈຕ຺ຕາໂຣ ຈ ມຫາຠູຕາ, ຍຎ຺ຈ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ສຬາຍຕນໍ? ຈກ຺ຂາຍຕນໍ, ໂສຕາຍຕນໍ, ຆານາຍຕນໍ, ຊິວ຺ຫາຍຕນໍ, ກາຍາຍຕນໍ, ມນາຍຕນໍ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ສຬາຍຕນໍ’’.

ປຈ຺ຈຍຈຕຸກ຺ກໍ.

໖. ເຫຕຸຈຕຸກ຺ກໍ

໒໕໖. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓເຫຕຸກໍ, ນາມປຈ຺ຈຍາ ຉຏ຺ຐາຍຕນໍ ນາມເຫຕຸກໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໕໗. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ ວິຎ຺ຎາຓເຫຕຸກໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ ວິຎ຺ຎາຓເຫຕຸກໍ’’.

ຕຕ຺ຖ ກຕມໍ ນາມປຈ຺ຈຍາ ຉຏ຺ຐາຍຕນໍ ນາມເຫຕຸກໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາ ຉຏ຺ຐາຍຕນໍ ນາມເຫຕຸກໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ ຜສ຺ສເຫຕຸກາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ ຜສ຺ສເຫຕຸກາ’’.

ຕຕ຺ຖ ກຕມາ ເວທນາປຈ຺ຈຍາ ຕຓ຺ຫາ ເວທນາເຫຕຸກາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ຕຓ຺ຫາ ເວທນາເຫຕຸກາ’’.

ຕຕ຺ຖ ກຕມໍ ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ? ຍາ ທິຏ຺ຐິ ທິຏ຺ຐິຄຕໍ…ເປ… ຕິຕ຺ຖາຍຕນໍ ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ’’ຕິ.

໒໕໘. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓເຫຕຸກໍ, ນາມປຈ຺ຈຍາ ຜສ຺ໂສ ນາມເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໕໙. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ.

ນາມປຈ຺ຈຍາ ຜສ຺ໂສ ນາມເຫຕຸໂກຕິ. ຕຕ຺ຖ ກຕມໍ ນາມໍ? ຐເປຕ຺ວາ ຜສ຺ສໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’.

ຕຕ຺ຖ ກຕໂມ ນາມປຈ຺ຈຍາ ຜສ຺ໂສ ນາມເຫຕຸໂກ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ນາມປຈ຺ຈຍາ ຜສ຺ໂສ ນາມເຫຕຸໂກ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໖໐. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ, ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓເຫຕຸກໍ, ນາມຣູປປຈ຺ຈຍາ ຉຏ຺ຐາຍຕນໍ ນາມຣູປເຫຕຸກໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໑. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓເຫຕຸກໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓເຫຕຸກໍ’’.

ນາມຣູປປຈ຺ຈຍາ ຉຏ຺ຐາຍຕນໍ ນາມຣູປເຫຕຸກນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຍໍ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ຉຏ຺ຐາຍຕນໍ ນາມຣູປເຫຕຸກໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ຉຏ຺ຐາຍຕນໍ ນາມຣູປເຫຕຸກໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໖໒. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາເຫຕຸໂກ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣເຫຕຸກໍ ວິຎ຺ຎາຓປຈ຺ຈຍາ ນາມຣູປໍ ວິຎ຺ຎາຓເຫຕຸກໍ, ນາມຣູປປຈ຺ຈຍາ ສຬາຍຕນໍ ນາມຣູປເຫຕຸກໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນເຫຕຸໂກ, ຜສ຺ສປຈ຺ຈຍາ ເວທນາ ຜສ຺ສເຫຕຸກາ, ເວທນາປຈ຺ຈຍາ ຕຓ຺ຫາ ເວທນາເຫຕຸກາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາເຫຕຸກໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໓. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ນາມຣູປປຈ຺ຈຍາ ສຬາຍຕນໍ ນາມຣູປເຫຕຸກນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈຕ຺ຕາໂຣ ຈ ມຫາຠູຕາ, ຍຎ຺ຈ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ສຬາຍຕນໍ ນາມຣູປເຫຕຸກໍ? ຈກ຺ຂາຍຕນໍ, ໂສຕາຍຕນໍ, ຆານາຍຕນໍ, ຊິວ຺ຫາຍຕນໍ, ກາຍາຍຕນໍ, ມນາຍຕນໍ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ສຬາຍຕນໍ ນາມຣູປເຫຕຸກໍ’’.

ເຫຕຸຈຕຸກ຺ກໍ.

໗. ສມ຺ປຍຸຕ຺ຕຈຕຸກ຺ກໍ

ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ, ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ, ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໕. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ’’.

ຕຕ຺ຖ ກຕມໍ ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາ ຉຏ຺ຐາຍຕນໍ ນາມສມ຺ປຍຸຕ຺ຕໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ ຉຏ຺ຐາຍຕນສມ຺ປຍຸຕ຺ໂຕ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ’’.

ຕຕ຺ຖ ກຕມາ ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ’’.

ຕຕ຺ຖ ກຕມໍ ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ? ຍາ ທິຏ຺ຐິ ທິຏ຺ຐິຄຕໍ…ເປ… ຕິຕ຺ຖາຍຕນໍ ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ’’ …ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໖໖. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ ອວິຊ຺ຊາສມ຺ປຍຸຕ຺ໂຕ, ສງ຺ຂາຣປຈ຺ຈຍາ ວິຎ຺ຎາຓໍ ສງ຺ຂາຣສມ຺ປຍຸຕ຺ຕໍ, ວິຎ຺ຎາຓປຈ຺ຈຍາ ນາມໍ ວິຎ຺ຎາຓສມ຺ປຍຸຕ຺ຕໍ, ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕ, ຜສ຺ສປຈ຺ຈຍາ ເວທນາ ຜສ຺ສສມ຺ປຍຸຕ຺ຕາ, ເວທນາປຈ຺ຈຍາ ຕຓ຺ຫາ ເວທນາສມ຺ປຍຸຕ຺ຕາ, ຕຓ຺ຫາປຈ຺ຈຍາ ອຸປາທານໍ ຕຓ຺ຫາສມ຺ປຍຸຕ຺ຕໍ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໖໗. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ນາມປຈ຺ຈຍາ ຜສ຺ໂສ ນາມສມ຺ປຍຸຕ຺ໂຕຕິ. ຕຕ຺ຖ ກຕມໍ ນາມໍ? ຐເປຕ຺ວາ ຜສ຺ສໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’.