໘. ອຎ຺ຎມຎ຺ຎຈຕຸກ຺ກໍ

໒໗໒. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາປິ ວິຎ຺ຎາຓໍ; ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາປິ ນາມໍ; ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ຉຏ຺ຐາຍຕນໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໗໓. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ’’.

ຕຕ຺ຖ ກຕມາ ສງ຺ຂາຣປຈ຺ຈຍາປິ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ສງ຺ຂາຣປຈ຺ຈຍາປິ ອວິຊ຺ຊາ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ສງ຺ຂາຣປຈ຺ຈຍາ ວິຎ຺ຎາຓໍ.

ຕຕ຺ຖ ກຕໂມ ວິຎ຺ຎາຓປຈ຺ຈຍາປິ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາປິ ສງ຺ຂາໂຣ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ’’.

ຕຕ຺ຖ ກຕມໍ ນາມປຈ຺ຈຍາປິ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາປິ ວິຎ຺ຎາຓໍ’’.

ຕຕ຺ຖ ກຕມໍ ນາມປຈ຺ຈຍາ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາ ຉຏ຺ຐາຍຕນໍ’’.

ຕຕ຺ຖ ກຕມໍ ຉຏ຺ຐາຍຕນປຈ຺ຈຍາປິ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາປິ ນາມໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ’’.

ຕຕ຺ຖ ກຕມໍ ຜສ຺ສປຈ຺ຈຍາປິ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຜສ຺ສປຈ຺ຈຍາປິ ຉຏ຺ຐາຍຕນໍ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ’’.

ຕຕ຺ຖ ກຕໂມ ເວທນາປຈ຺ຈຍາປິ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ເວທນາປຈ຺ຈຍາປິ ຜສ຺ໂສ’’.

ຕຕ຺ຖ ກຕມາ ເວທນາປຈ຺ຈຍາ ຕຓ຺ຫາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ຕຓ຺ຫາ’’.

ຕຕ຺ຖ ກຕມາ ຕຓ຺ຫາປຈ຺ຈຍາປິ ເວທນາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຕຓ຺ຫາປຈ຺ຈຍາປິ ເວທນາ’’.

ຕຕ຺ຖ ກຕມໍ ຕຓ຺ຫາປຈ຺ຈຍາ ອຸປາທານໍ? ຍາ ທິຏ຺ຐິ ທິຏ຺ຐິຄຕໍ…ເປ… ຕິຕ຺ຖາຍຕນໍ ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ຕຓ຺ຫາປຈ຺ຈຍາ ອຸປາທານໍ’’.

ຕຕ຺ຖ ກຕມາ ອຸປາທານປຈ຺ຈຍາປິ ຕຓ຺ຫາ? ໂຍ ຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຸປາທານປຈ຺ຈຍາປິ ຕຓ຺ຫາ’’.

ຕຕ຺ຖ ກຕໂມ ອຸປາທານປຈ຺ຈຍາ ຠໂວ? ຐເປຕ຺ວາ ອຸປາທານໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອຍໍ ວຸຈ຺ຈຕິ ‘‘ອຸປາທານປຈ຺ຈຍາ ຠໂວ’’.

ຕຕ຺ຖ ກຕມາ ຠວປຈ຺ຈຍາ ຊາຕິ? ຍາ ເຕສໍ ເຕສໍ ຘມ຺ມານໍ ຊາຕິ ສຎ຺ຊາຕິ ນິພ຺ພຕ຺ຕິ ອຠິນິພ຺ພຕິ ປາຕຸຠາໂວ – ອຍໍ ວຸຈ຺ຈຕິ ‘‘ຠວປຈ຺ຈຍາ ຊາຕິ’’.

ຕຕ຺ຖ ກຕມໍ ຊາຕິປຈ຺ຈຍາ ຊຣາມຣຓໍ? ອຕ຺ຖິ ຊຣາ, ອຕ຺ຖິ ມຣຓໍ. ຕຕ຺ຖ ກຕມາ ຊຣາ? ຍາ ເຕສໍ ເຕສໍ ຘມ຺ມານໍ ຊຣາ ຊີຣຓຕາ ອາຍຸໂນ ສໍຫານິ – ອຍໍ ວຸຈ຺ຈຕິ ‘‘ຊຣາ’’. ຕຕ຺ຖ ກຕມໍ ມຣຓໍ? ໂຍ ເຕສໍ ເຕສໍ ຘມ຺ມານໍ ຂໂຍ ວໂຍ ເຠໂທ ປຣິເຠໂທ ອນິຈ຺ຈຕາ ອນ຺ຕຣຘານໍ – ອິທໍ ວຸຈ຺ຈຕິ ‘‘ມຣຓໍ’’. ອິຕິ ອຍຎ຺ຈ ຊຣາ, ອິທຎ຺ຈ ມຣຓໍ. ອິທໍ ວຸຈ຺ຈຕິ ‘‘ຊາຕິປຈ຺ຈຍາ ຊຣາມຣຓໍ’’.

ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສງ຺ຄຕິ ໂຫຕິ, ສມາຄໂມ ໂຫຕິ, ສໂມຘານໍ ໂຫຕິ, ປາຕຸຠາໂວ ໂຫຕິ. ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໗໔. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາປິ ວິຎ຺ຎາຓໍ; ນາມປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ນາມໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໗໕. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ’’.

ຕຕ຺ຖ ກຕມາ ສງ຺ຂາຣປຈ຺ຈຍາປິ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ສງ຺ຂາຣປຈ຺ຈຍາປິ ອວິຊ຺ຊາ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

ຕຕ຺ຖ ກຕໂມ ວິຎ຺ຎາຓປຈ຺ຈຍາປິ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາປິ ສງ຺ຂາໂຣ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ’’.

ຕຕ຺ຖ ກຕມໍ ນາມປຈ຺ຈຍາປິ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາປິ ວິຎ຺ຎາຓໍ’’.

ນາມປຈ຺ຈຍາ ຜສ຺ໂສຕິ. ຕຕ຺ຖ ກຕມໍ ນາມໍ? ຐເປຕ຺ວາ ຜສ຺ສໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’.

ຕຕ຺ຖ ກຕໂມ ນາມປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ນາມປຈ຺ຈຍາ ຜສ຺ໂສ’’.

ຕຕ຺ຖ ກຕມໍ ຜສ຺ສປຈ຺ຈຍາປິ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິທໍ ວຸຈ຺ຈຕິ ‘‘ຜສ຺ສປຈ຺ຈຍາປິ ນາມໍ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໗໖. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາປິ ວິຎ຺ຎາຓໍ; ນາມຣູປປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາປິ ນາມຣູປໍ; ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ຉຏ຺ຐາຍຕນໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໗໗. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ.

ຕຕ຺ຖ ກຕມາ ສງ຺ຂາຣປຈ຺ຈຍາປິ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ສງ຺ຂາຣປຈ຺ຈຍາປິ ອວິຊ຺ຊາ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

ຕຕ຺ຖ ກຕໂມ ວິຎ຺ຎາຓປຈ຺ຈຍາປິ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາປິ ສງ຺ຂາໂຣ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ’’.

ນາມຣູປປຈ຺ຈຍາປິ ວິຎ຺ຎາຓນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຍໍ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາປິ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາປິ ວິຎ຺ຎາຓໍ’’.

ນາມຣູປປຈ຺ຈຍາ ຉຏ຺ຐາຍຕນນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຍໍ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ຉຏ຺ຐາຍຕນໍ’’.

ຕຕ຺ຖ ກຕມໍ ຉຏ຺ຐາຍຕນປຈ຺ຈຍາປິ ນາມຣູປໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາປິ ນາມຣູປໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ’’.

ຕຕ຺ຖ ກຕມໍ ຜສ຺ສປຈ຺ຈຍາປິ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຜສ຺ສປຈ຺ຈຍາປິ ຉຏ຺ຐາຍຕນໍ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໒໗໘. ຕສ຺ມິໍ ສມເຍ ອວິຊ຺ຊາປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາປິ ອວິຊ຺ຊາ; ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາປິ ສງ຺ຂາໂຣ; ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາປິ ວິຎ຺ຎາຓໍ; ນາມຣູປປຈ຺ຈຍາ ສຬາຍຕນໍ, ຉຏ຺ຐາຍຕນປຈ຺ຈຍາປິ ນາມຣູປໍ; ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາປິ ຉຏ຺ຐາຍຕນໍ; ຜສ຺ສປຈ຺ຈຍາ ເວທນາ, ເວທນາປຈ຺ຈຍາປິ ຜສ຺ໂສ; ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາປິ ເວທນາ; ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາປິ ຕຓ຺ຫາ; ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໒໗໙. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.

ຕຕ຺ຖ ກຕໂມ ອວິຊ຺ຊາປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອວິຊ຺ຊາປຈ຺ຈຍາ ສງ຺ຂາໂຣ’’.

ຕຕ຺ຖ ກຕມາ ສງ຺ຂາຣປຈ຺ຈຍາປິ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ສງ຺ຂາຣປຈ຺ຈຍາປິ ອວິຊ຺ຊາ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

ຕຕ຺ຖ ກຕໂມ ວິຎ຺ຎາຓປຈ຺ຈຍາປິ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາປິ ສງ຺ຂາໂຣ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມຣູປໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ນາມໍ. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມຣູປໍ’’.

ນາມຣູປປຈ຺ຈຍາປິ ວິຎ຺ຎາຓນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຍໍ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາປິ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາປິ ວິຎ຺ຎາຓໍ’’.

ນາມຣູປປຈ຺ຈຍາ ສຬາຍຕນນ຺ຕິ. ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈຕ຺ຕາໂຣ ຈ ມຫາຠູຕາ, ຍຎ຺ຈ ຣູປໍ ນິສ຺ສາຍ ມໂນວິຎ຺ຎາຓຘາຕຸ ວຕ຺ຕຕິ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ນາມຣູປໍ’’.

ຕຕ຺ຖ ກຕມໍ ນາມຣູປປຈ຺ຈຍາ ສຬາຍຕນໍ? ຈກ຺ຂາຍຕນໍ, ໂສຕາຍຕນໍ, ຆານາຍຕນໍ, ຊິວ຺ຫາຍຕນໍ, ກາຍາຍຕນໍ, ມນາຍຕນໍ – ອິທໍ ວຸຈ຺ຈຕິ ‘‘ນາມຣູປປຈ຺ຈຍາ ສຬາຍຕນໍ’’.

ຕຕ຺ຖ ກຕມໍ ຉຏ຺ຐາຍຕນປຈ຺ຈຍາປິ ນາມຣູປໍ? ອຕ຺ຖິ ນາມໍ, ອຕ຺ຖິ ຣູປໍ. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ນາມໍ’’. ຕຕ຺ຖ ກຕມໍ ຣູປໍ? ຈກ຺ຂາຍຕນສ຺ສ ອຸປຈໂຍ, ໂສຕາຍຕນສ຺ສ ອຸປຈໂຍ, ຆານາຍຕນສ຺ສ ອຸປຈໂຍ, ຊິວ຺ຫາຍຕນສ຺ສ ອຸປຈໂຍ, ກາຍາຍຕນສ຺ສ ອຸປຈໂຍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈິຕ຺ຕຊໍ ຈິຕ຺ຕເຫຕຸກໍ ຈິຕ຺ຕສມຸຏ຺ຐານໍ – ອິທໍ ວຸຈ຺ຈຕິ ‘‘ຣູປໍ’’. ອິຕິ ອິທຎ຺ຈ ນາມໍ, ອິທຎ຺ຈ ຣູປໍ. ອິທໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາປິ ນາມຣູປໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ’’.

ຕຕ຺ຖ ກຕມໍ ຜສ຺ສປຈ຺ຈຍາປິ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຜສ຺ສປຈ຺ຈຍາປິ ຉຏ຺ຐາຍຕນໍ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

ອຎ຺ຎມຎ຺ຎຈຕຸກ຺ກໍ.