໙. ທິຏ຺ຐສຸຕາທິທສ຺ສນວາໂຣ

໑໐໓໖. ປຎ຺ຈນ຺ນໍ ຂນ຺ຘານໍ ກຕິ ທິຏ຺ຐາ, ກຕິ ສຸຕາ, ກຕິ ມຸຕາ, ກຕິ ວິຎ຺ຎາຕາ, ກຕິ ນ ທິຏ຺ຐາ ນ ສຸຕາ ນ ມຸຕາ ນ ວິຎ຺ຎາຕາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ທິຏ຺ຐາ, ກຕິ ສຸຕາ, ກຕິ ມຸຕາ, ກຕິ ວິຎ຺ຎາຕາ, ກຕິ ນ ທິຏ຺ຐາ ນ ສຸຕາ ນ ມຸຕາ ນ ວິຎ຺ຎາຕາ?

໑໐໓໗. ຣູປກ຺ຂນ຺ໂຘ ສິຍາ ທິຏ຺ໂຐ, ສິຍາ ສຸໂຕ, ສິຍາ ມຸໂຕ, ສິຍາ ວິຎ຺ຎາໂຕ, ສິຍາ ນ ທິຏ຺ໂຐ ນ ສຸໂຕ ນ ມຸໂຕ, ວິຎ຺ຎາໂຕ. ຈຕ຺ຕາໂຣ ຂນ຺ຘາ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ.

ຣູປາຍຕນໍ ທິຏ຺ຐໍ, ນ ສຸຕໍ ນ ມຸຕໍ, ວິຎ຺ຎາຕໍ. ສທ຺ທາຍຕນໍ ນ ທິຏ຺ຐໍ, ສຸຕໍ, ນ ມຸຕໍ, ວິຎ຺ຎາຕໍ. ຄນ຺ຘາຍຕນໍ… ຣສາຍຕນໍ… ໂຜຏ຺ຐພ຺ພາຍຕນໍ ນ ທິຏ຺ຐໍ ນ ສຸຕໍ, ມຸຕໍ, ວິຎ຺ຎາຕໍ. ສຕ຺ຕາຍຕນາ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ.

ຣູປຘາຕຸ ທິຏ຺ຐາ, ນ ສຸຕາ ນ ມຸຕາ, ວິຎ຺ຎາຕາ. ສທ຺ທຘາຕຸ ນ ທິຏ຺ຐາ, ສຸຕາ, ນ ມຸຕາ, ວິຎ຺ຎາຕາ. ຄນ຺ຘຘາຕຸ… ຣສຘາຕຸ… ໂຜຏ຺ຐພ຺ພຘາຕຸ ນ ທິຏ຺ຐາ ນ ສຸຕາ, ມຸຕາ, ວິຎ຺ຎາຕາ. ເຕຣສ ຘາຕຸໂຍ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ.

ຕີຓິ ສຈ຺ຈານິ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ. ທຸກ຺ຂສຈ຺ຈໍ ສິຍາ ທິຏ຺ຐໍ, ສິຍາ ສຸຕໍ, ສິຍາ ມຸຕໍ, ສິຍາ ວິຎ຺ຎາຕໍ, ສິຍາ ນ ທິຏ຺ຐໍ ນ ສຸຕໍ ນ ມຸຕໍ, ວິຎ຺ຎາຕໍ.

ພາວີສຕິນ຺ທ຺ຣິຍາ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ. ນວ ເຫຕູ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ. ຈຕ຺ຕາໂຣ ອາຫາຣາ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ. ສຕ຺ຕ ຜສ຺ສາ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ. ສຕ຺ຕ ເວທນາ… ສຕ຺ຕ ສຎ຺ຎາ… ສຕ຺ຕ ເຈຕນາ… ສຕ຺ຕ ຈິຕ຺ຕາ ນ ທິຏ຺ຐາ ນ ສຸຕາ ນ ມຸຕາ, ວິຎ຺ຎາຕາ.