໘. ສາຣມ຺ມຓານາຣມ຺ມຓວາໂຣ

໑໐໓໒. ປຎ຺ຈນ຺ນໍ ຂນ຺ຘານໍ ກຕິ ສາຣມ຺ມຓາ, ກຕິ ອນາຣມ຺ມຓາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ສາຣມ຺ມຓາ, ກຕິ ອນາຣມ຺ມຓາ?

໑໐໓໓. ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສາຣມ຺ມຓາ.

ທສາຍຕນາ ອນາຣມ຺ມຓາ. ມນາຍຕນໍ ສາຣມ຺ມຓໍ. ຘມ຺ມາຍຕນໍ ສິຍາ ສາຣມ຺ມຓໍ, ສິຍາ ອນາຣມ຺ມຓໍ.

ທສ ຘາຕຸໂຍ ອນາຣມ຺ມຓາ. ສຕ຺ຕ ຘາຕຸໂຍ ສາຣມ຺ມຓາ. ຘມ຺ມຘາຕຸ ສິຍາ ສາຣມ຺ມຓາ, ສິຍາ ອນາຣມ຺ມຓາ.

ທ຺ເວ ສຈ຺ຈາ ສາຣມ຺ມຓາ. ນິໂຣຘສຈ຺ຈໍ ອນາຣມ຺ມຓໍ. ທຸກ຺ຂສຈ຺ຈໍ ສິຍາ ສາຣມ຺ມຓໍ, ສິຍາ ອນາຣມ຺ມຓໍ.

ສຕ຺ຕິນ຺ທ຺ຣິຍາ ອນາຣມ຺ມຓາ. ຈຸທ຺ທສິນ຺ທ຺ຣິຍາ ສາຣມ຺ມຓາ. ຊີວິຕິນ຺ທ຺ຣິຍໍ ສິຍາ ສາຣມ຺ມຓໍ, ສິຍາ ອນາຣມ຺ມຓໍ. ນວ ເຫຕູ ສາຣມ຺ມຓາ. ກພຬີກາໂຣ ອາຫາໂຣ ອນາຣມ຺ມໂຓ. ຕໂຍ ອາຫາຣາ ສາຣມ຺ມຓາ. ສຕ຺ຕ ຜສ຺ສາ… ສຕ຺ຕ ເວທນາ… ສຕ຺ຕ ສຎ຺ຎາ… ສຕ຺ຕ ເຈຕນາ… ສຕ຺ຕ ຈິຕ຺ຕາ ສາຣມ຺ມຓາ.

໑໐໓໔. ປຎ຺ຈນ຺ນໍ ຂນ຺ຘານໍ ກຕິ ສາຣມ຺ມຓາຣມ຺ມຓາ, ກຕິ ອນາຣມ຺ມຓາຣມ຺ມຓາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ສາຣມ຺ມຓາຣມ຺ມຓາ, ກຕິ ອນາຣມ຺ມຓາຣມ຺ມຓາ?

໑໐໓໕. ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ.

ທສາຍຕນາ ອນາຣມ຺ມຓາ. ມນາຍຕນໍ ສິຍາ ສາຣມ຺ມຓາຣມ຺ມຓໍ, ສິຍາ ອນາຣມ຺ມຓາຣມ຺ມຓໍ. ຘມ຺ມາຍຕນໍ ສິຍາ ສາຣມ຺ມຓາຣມ຺ມຓໍ, ສິຍາ ອນາຣມ຺ມຓາຣມ຺ມຓໍ, ສິຍາ ອນາຣມ຺ມຓໍ.

ທສ ຘາຕຸໂຍ ອນາຣມ຺ມຓາ. ຉ ຘາຕຸໂຍ ອນາຣມ຺ມຓາຣມ຺ມຓາ. ມໂນວິຎ຺ຎາຓຘາຕຸ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ. ຘມ຺ມຘາຕຸ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ, ສິຍາ ອນາຣມ຺ມຓາ.

ນິໂຣຘສຈ຺ຈໍ ອນາຣມ຺ມຓໍ. ມຄ຺ຄສຈ຺ຈໍ ອນາຣມ຺ມຓາຣມ຺ມຓໍ. ສມຸທຍສຈ຺ຈໍ ສິຍາ ສາຣມ຺ມຓາຣມ຺ມຓໍ, ສິຍາ ອນາຣມ຺ມຓາຣມ຺ມຓໍ. ທຸກ຺ຂສຈ຺ຈໍ ສິຍາ ສາຣມ຺ມຓາຣມ຺ມຓໍ, ສິຍາ ອນາຣມ຺ມຓາຣມ຺ມຓໍ, ສິຍາ ອນາຣມ຺ມຓໍ.

ສຕ຺ຕິນ຺ທ຺ຣິຍາ ອນາຣມ຺ມຓາ. ປຎ຺ຈິນ຺ທ຺ຣິຍາ ອນາຣມ຺ມຓາຣມ຺ມຓາ. ນວິນ຺ທ຺ຣິຍາ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ. ຊີວິຕິນ຺ທ຺ຣິຍໍ ສິຍາ ສາຣມ຺ມຓາຣມ຺ມຓໍ, ສິຍາ ອນາຣມ຺ມຓາຣມ຺ມຓໍ, ສິຍາ ອນາຣມ຺ມຓໍ.

ນວ ເຫຕູ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ. ກພຬີກາໂຣ ອາຫາໂຣ ອນາຣມ຺ມໂຓ. ຕໂຍ ອາຫາຣາ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ. ຉ ຜສ຺ສາ ອນາຣມ຺ມຓາຣມ຺ມຓາ. ມໂນວິຎ຺ຎາຓຘາຕຸສມ຺ຜສ຺ໂສ ສິຍາ ສາຣມ຺ມຓາຣມ຺ມໂຓ ສິຍາ ອນາຣມ຺ມຓາຣມ຺ມໂຓ. ຉ ເວທນາ… ຉ ສຎ຺ຎາ… ຉ ເຈຕນາ… ຉ ຈິຕ຺ຕາ ອນາຣມ຺ມຓາຣມ຺ມຓາ. ມໂນວິຎ຺ຎາຓຘາຕຸ ສິຍາ ສາຣມ຺ມຓາຣມ຺ມຓາ, ສິຍາ ອນາຣມ຺ມຓາຣມ຺ມຓາ.