໑. ອຸປ຺ປາທກກມ຺ມໍ

໑໐໒໑. ເທວາຕິ. ຕໂຍ ເທວາ – ສມ຺ມຸຕິເທວາ [ສມ຺ມຕິເທວາ (ສ຺ຍາ.)], ອຸປປຕ຺ຕິເທວາ, ວິສຸທ຺ຘິເທວາ.

ສມ຺ມຸຕິເທວາ ນາມ – ຣາຊາໂນ, ເທວິໂຍ, ກຸມາຣາ.

ອຸປປຕ຺ຕິເທວາ ນາມ – ຈາຕຸມຫາຣາຊິເກ [ຈາຕຸມ຺ມຫາຣາຊິເກ (ສີ. ສ຺ຍາ.)] ເທເວ ອຸປາທາຍ ຕທຸປຣິ ເທວາ.

ວິສຸທ຺ຘິເທວາ ນາມ – ອຣຫນ຺ໂຕ ວຸຈ຺ຈນ຺ຕິ.

ທານໍ ທຕ຺ວາ, ສີລໍ ສມາທິຍິຕ຺ວາ, ອຸໂປສຖກມ຺ມໍ ກຕ຺ວາ ກຕ຺ຖ ອຸປປຊ຺ຊນ຺ຕິ? ທານໍ ທຕ຺ວາ, ສີລໍ ສມາທິຍິຕ຺ວາ, ອຸໂປສຖກມ຺ມໍ ກຕ຺ວາ ອປ຺ເປກຈ຺ເຈ ຂຕ຺ຕິຍມຫາສາລານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ພ຺ຣາຫ຺ມຓມຫາສາລານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ຄຫປຕິມຫາສາລານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ຈາຕຸມຫາຣາຊິການໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ຕາວຕິໍສານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ຍາມານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ຕຸສິຕານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ນິມ຺ມານຣຕີນໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ປຣນິມ຺ມິຕວສວຕ຺ຕີນໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ.