໒. ອາຍຸປ຺ປມາຓໍ

໑໐໒໒. ມນຸສ຺ສານໍ ກິຕ຺ຕກໍ ອາຍຸປ຺ປມາຓໍ? ວສ຺ສສຕໍ, ອປ຺ປໍ ວາ ຠິຍ຺ໂຍ [ອປ຺ປໍ ວາ ຠິຍ຺ໂຍ ວາ (ສ຺ຍາ. ກ.) ທີ. ນິ. ໒.໗].

໑໐໒໓. ຈາຕຸມຫາຣາຊິການໍ ເທວານໍ ກິຕ຺ຕກໍ ອາຍຸປ຺ປມາຓໍ? ຍານິ ມານຸສການິ ປຎ຺ຎາສ ວສ຺ສານິ, ຈາຕຸມ຺ມຫາຣາຊິການໍ ເທວານໍ ເອໂສ ເອໂກ ຣຕ຺ຕິນ຺ທິໂວ [ຣຕ຺ຕິທິໂວ (ກ.) ອ. ນິ. ໓.໗໑]. ຕາຍ ຣຕ຺ຕິຍາ ຕິໍສ ຣຕ຺ຕິໂຍ ມາໂສ. ເຕນ ມາເສນ ທ຺ວາທສມາສິໂຍ ສໍວຈ຺ຉໂຣ. ເຕນ ສໍວຈ຺ຉເຣນ ທິພ຺ພານິ ປຎ຺ຈ ວສ຺ສສຕານິ ຈາຕຸມ຺ມຫາຣາຊິການໍ ເທວານໍ ອາຍຸປ຺ປມາຓໍ. ມນຸສ຺ສານໍ ຄຓນາຍ ກິຕ຺ຕກໍ ໂຫຕິ? ນວຸຕິ ວສ຺ສສຕສຫສ຺ສານິ.

ຕາວຕິໍສານໍ ເທວານໍ ກິຕ຺ຕກໍ ອາຍຸປ຺ປມາຓໍ? ຍໍ ມານຸສກໍ ວສ຺ສສຕໍ, ຕາວຕິໍສານໍ ເທວານໍ ເອໂສ ເອໂກ ຣຕ຺ຕິນ຺ທິໂວ. ຕາຍ ຣຕ຺ຕິຍາ ຕິໍສ ຣຕ຺ຕິໂຍ ມາໂສ. ເຕນ ມາເສນ ທ຺ວາທສມາສິໂຍ ສໍວຈ຺ຉໂຣ. ເຕນ ສໍວຈ຺ຉເຣນ ທິພ຺ພໍ ວສ຺ສສຫສ຺ສໍ ຕາວຕິໍສານໍ ເທວານໍ ອາຍຸປ຺ປມາຓໍ. ມນຸສ຺ສານໍ ຄຓນາຍ ກິຕ຺ຕກໍ ໂຫຕິ? ຕິສ຺ໂສ ຈ ວສ຺ສໂກຏິໂຍ ສຏ຺ຐິ ຈ ວສ຺ສສຕສຫສ຺ສານິ.

ຍາມານໍ ເທວານໍ ກິຕ຺ຕກໍ ອາຍຸປ຺ປມາຓໍ? ຍານິ ມານຸສການິ ທ຺ເວ ວສ຺ສສຕານິ, ຍາມານໍ ເທວານໍ ເອໂສ ເອໂກ ຣຕ຺ຕິນ຺ທິໂວ. ຕາຍ ຣຕ຺ຕິຍາ ຕິໍສຣຕ຺ຕິໂຍ ມາໂສ. ເຕນ ມາເສນ ທ຺ວາທສມາສິໂຍ ສໍວຈ຺ຉໂຣ. ເຕນ ສໍວຈ຺ຉເຣນ ທິພ຺ພານິ ທ຺ເວ ວສ຺ສສຫສ຺ສານິ ຍາມານໍ ເທວານໍ ອາຍຸປ຺ປມາຓໍ. ມນຸສ຺ສານໍ ຄຓນາຍ ກິຕ຺ຕກໍ ໂຫຕິ? ຈຸທ຺ທສຎ຺ຈ ວສ຺ສໂກຏິໂຍ ຈຕ຺ຕາຣີສຎ຺ຈ ວສ຺ສສຕສຫສ຺ສານິ.

ຕຸສິຕານໍ ເທວານໍ ກິຕ຺ຕກໍ ອາຍຸປ຺ປມາຓໍ? ຍານິ ມານຸສການິ ຈຕ຺ຕາຣິ ວສ຺ສສຕານິ, ຕຸສິຕານໍ ເທວານໍ ເອໂສ ເອໂກ ຣຕ຺ຕິນ຺ທິໂວ. ຕາຍ ຣຕ຺ຕິຍາ ຕິໍສຣຕ຺ຕິໂຍ ມາໂສ. ເຕນ ມາເສນ ທ຺ວາທສມາສິໂຍ ສໍວຈ຺ຉໂຣ. ເຕນ ສໍວຈ຺ຉເຣນ ທິພ຺ພານິ ຈຕ຺ຕາຣິ ວສ຺ສສຫສ຺ສານິ ຕຸສິຕານໍ ເທວານໍ ອາຍຸປ຺ປມາຓໍ. ມນຸສ຺ສານໍ ຄຓນາຍ ກິຕ຺ຕກໍ ໂຫຕິ? ສຕ຺ຕປຎ຺ຎາສ ວສ຺ສໂກຏິໂຍ ສຏ຺ຐິ ຈ ວສ຺ສສຕສຫສ຺ສານິ.

ນິມ຺ມານຣຕີນໍ ເທວານໍ ກິຕ຺ຕກໍ ອາຍຸປ຺ປມາຓໍ? ຍານິ ມານຸສການິ ອຏ຺ຐ ວສ຺ສສຕານິ, ນິມ຺ມານຣຕີນໍ ເທວານໍ ເອໂສ ເອໂກ ຣຕ຺ຕິນ຺ທິໂວ. ຕາຍ ຣຕ຺ຕິຍາ ຕິໍສຣຕ຺ຕິໂຍ ມາໂສ. ເຕນ ມາເສນ ທ຺ວາທສມາສິໂຍ ສໍວຈ຺ຉໂຣ. ເຕນ ສໍວຈ຺ຉເຣນ ທິພ຺ພານິ ອຏ຺ຐ ວສ຺ສສຫສ຺ສານິ ນິມ຺ມານຣຕີນໍ ເທວານໍ ອາຍຸປ຺ປມາຓໍ. ມນຸສ຺ສານໍ ຄຓນາຍ ກິຕ຺ຕກໍ ໂຫຕິ? ທ຺ເວ ວສ຺ສໂກຏິສຕານິ ຕິໍສຎ຺ຈ ວສ຺ສໂກຏິໂຍ ຈຕ຺ຕາຣີສຎ຺ຈ ວສ຺ສສຕສຫສ຺ສານິ.

ປຣນິມ຺ມິຕວສວຕ຺ຕີນໍ ເທວານໍ ກິຕ຺ຕກໍ ອາຍຸປ຺ປມາຓໍ? ຍານິ ມານຸສການິ ໂສຬສ ວສ຺ສສຕານິ, ປຣນິມ຺ມິຕວສວຕ຺ຕີນໍ ເທວານໍ ເອໂສ ເອໂກ ຣຕ຺ຕິນ຺ທິໂວ. ຕາຍ ຣຕ຺ຕິຍາ ຕິໍສຣຕ຺ຕິໂຍ ມາໂສ. ເຕນ ມາເສນ ທ຺ວາທສມາສິໂຍ ສໍວຈ຺ຉໂຣ. ເຕນ ສໍວຈ຺ຉເຣນ ທິພ຺ພານິ ໂສຬສ ວສ຺ສສຫສ຺ສານິ ປຣນິມ຺ມິຕວສວຕ຺ຕີນໍ ເທວານໍ ອາຍຸປ຺ປມາຓໍ. ມນຸສ຺ສານໍ ຄຓນາຍ ກິຕ຺ຕກໍ ໂຫຕິ? ນວ ຈ ວສ຺ສໂກຏິສຕານິ ເອກວີສຎ຺ຈ ວສ຺ສໂກຏິໂຍ ສຏ຺ຐິ ຈ ວສ຺ສສຕສຫສ຺ສານີຕິ.

ຉ ເອເຕ [ຉປິ ເຕ (ສ຺ຍາ.)] ກາມາວຈຣາ, ສພ຺ພກາມສມິທ຺ຘິໂນ;

ສພ຺ເພສໍ ເອກສງ຺ຂາໂຕ, ອາຍຸ ຠວຕິ ກິຕ຺ຕໂກ.

ທ຺ວາທສ ໂກຏິສຕໍ ເຕສໍ, ອຏ຺ຐວີສຎ຺ຈ ໂກຏິໂຍ;

ປຎ຺ຎາສ ສຕສຫສ຺ສານິ, ວສ຺ສຄ຺ເຄນ ປກາສິຕາຕິ.

໑໐໒໔. ປຐມໍ ຌານໍ ປຣິຕ຺ຕໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ປຐມໍ ຌານໍ ປຣິຕ຺ຕໍ ຠາເວຕ຺ວາ ພ຺ຣຫ຺ມປາຣິສຊ຺ຊານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ກປ຺ປສ຺ສ ຕຕິໂຍ ຠາໂຄ.

ປຐມໍ ຌານໍ ມຊ຺ຌິມໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ປຐມໍ ຌານໍ ມຊ຺ຌິມໍ ຠາເວຕ຺ວາ ພ຺ຣຫ຺ມປຸໂຣຫິຕານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ອຸປຑ຺ຒກປ຺ໂປ.

ປຐມໍ ຌານໍ ປຓີຕໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ປຐມໍ ຌານໍ ປຓີຕໍ ຠາເວຕ຺ວາ ມຫາພ຺ຣຫ຺ມານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ກປ຺ໂປ [ເອໂກ ກປ຺ໂປ (ສ຺ຍາ.)].

໑໐໒໕. ທຸຕິຍໍ ຌານໍ ປຣິຕ຺ຕໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ທຸຕິຍໍ ຌານໍ ປຣິຕ຺ຕໍ ຠາເວຕ຺ວາ ປຣິຕ຺ຕາຠານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ທ຺ເວ ກປ຺ປາ.

ທຸຕິຍໍ ຌານໍ ມຊ຺ຌິມໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ທຸຕິຍໍ ຌານໍ ມຊ຺ຌິມໍ ຠາເວຕ຺ວາ ອປ຺ປມາຓາຠານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ຈຕ຺ຕາໂຣ ກປ຺ປາ.

ທຸຕິຍໍ ຌານໍ ປຓີຕໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ທຸຕິຍໍ ຌານໍ ປຓີຕໍ ຠາເວຕ຺ວາ ອາຠສ຺ສຣານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ອຏ຺ຐ ກປ຺ປາ.

໑໐໒໖. ຕຕິຍໍ ຌານໍ ປຣິຕ຺ຕໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ຕຕິຍໍ ຌານໍ ປຣິຕ຺ຕໍ ຠາເວຕ຺ວາ ປຣິຕ຺ຕສຸຠານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ໂສຬສ ກປ຺ປາ.

ຕຕິຍໍ ຌານໍ ມຊ຺ຌິມໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ຕຕິຍໍ ຌານໍ ມຊ຺ຌິມໍ ຠາເວຕ຺ວາ ອປ຺ປມາຓສຸຠານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ພາຕ຺ຕິໍສ ກປ຺ປາ.

ຕຕິຍໍ ຌານໍ ປຓີຕໍ ຠາເວຕ຺ວາ ກຕ຺ຖ ອຸປປຊ຺ຊນ຺ຕິ? ຕຕິຍໍ ຌານໍ ປຓີຕໍ ຠາເວຕ຺ວາ ສຸຠກິຓ຺ຫານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ. ເຕສໍ ກິຕ຺ຕກໍ ອາຍຸປ຺ປມາຓໍ? ຈຕຸສຏ຺ຐິ ກປ຺ປາ.

໑໐໒໗. ຈຕຸຕ຺ຖໍ ຌານໍ ຠາເວຕ຺ວາ ອາຣມ຺ມຓນານຕ຺ຕຕາ ມນສິກາຣນານຕ຺ຕຕາ ຉນ຺ທນານຕ຺ຕຕາ ປຓິຘິນານຕ຺ຕຕາ ອຘິໂມກ຺ຂນານຕ຺ຕຕາ ອຠິນີຫາຣນານຕ຺ຕຕາ ປຎ຺ຎານານຕ຺ຕຕາ ອປ຺ເປກຈ຺ເຈ ອສຎ຺ຎສຕ຺ຕານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ເວຫປ຺ຜລານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ອວິຫານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ອຕປ຺ປານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ສຸທສ຺ສານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ສຸທສ຺ສີນໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ອກນິຏ຺ຐານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ອາກາສານຎ຺ຈາຍຕນູປຄານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ວິຎ຺ຎາຓຎ຺ຈາຍຕນູປຄານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ອາກິຎ຺ຈຎ຺ຎາຍຕນູປຄານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ, ອປ຺ເປກຈ຺ເຈ ເນວສຎ຺ຎານາສຎ຺ຎາຍຕນູປຄານໍ ເທວານໍ ສຫພ຺ຍຕໍ ອຸປປຊ຺ຊນ຺ຕິ.

ອສຎ຺ຎສຕ຺ຕານຎ຺ຈ ເວຫປ຺ຜລານຎ຺ຈ ເທວານໍ ກິຕ຺ຕກໍ ອາຍຸປ຺ປມາຓໍ? ປຎ຺ຈກປ຺ປສຕານິ.

ອວິຫານໍ ເທວານໍ ກິຕ຺ຕກໍ ອາຍຸປ຺ປມາຓໍ? ກປ຺ປສຫສ຺ສໍ.

ອຕປ຺ປານໍ ເທວານໍ ກິຕ຺ຕກໍ ອາຍຸປ຺ປມາຓໍ? ທ຺ເວ ກປ຺ປສຫສ຺ສານິ.

ສຸທສ຺ສານໍ ເທວານໍ ກິຕ຺ຕກໍ ອາຍຸປ຺ປມາຓໍ? ຈຕ຺ຕາຣິ ກປ຺ປສຫສ຺ສານິ.

ສຸທສ຺ສີນໍ ເທວານໍ ກິຕ຺ຕກໍ ອາຍຸປ຺ປມາຓໍ? ອຏ຺ຐ ກປ຺ປສຫສ຺ສານິ.

ອກນິຏ຺ຐານໍ ເທວານໍ ກິຕ຺ຕກໍ ອາຍຸປ຺ປມາຓໍ? ໂສຬສ ກປ຺ປສຫສ຺ສານິ.

໑໐໒໘. ອາກາສານຎ຺ຈາຍຕນູປຄານໍ ເທວານໍ ກິຕ຺ຕກໍ ອາຍຸປ຺ປມາຓໍ? ວີສຕິ ກປ຺ປສຫສ຺ສານິ.

ວິຎ຺ຎາຓຎ຺ຈາຍຕນູປຄານໍ ເທວານໍ ກິຕ຺ຕກໍ ອາຍຸປ຺ປມາຓໍ? ຈຕ຺ຕາຣີສ ກປ຺ປສຫສ຺ສານິ.

ອາກິຎ຺ຈຎ຺ຎາຍຕນູປຄານໍ ເທວານໍ ກິຕ຺ຕກໍ ອາຍຸປ຺ປມາຓໍ? ສຏ຺ຐິ ກປ຺ປສຫສ຺ສານິ.

ເນວສຎ຺ຎານາສຎ຺ຎາຍຕນູປຄານໍ ເທວານໍ ກິຕ຺ຕກໍ ອາຍຸປ຺ປມາຓໍ? ຈຕຸຣາສີຕິ ກປ຺ປສຫສ຺ສານີຕິ.

໑໐໒໙. ອຸກ຺ຂິຕ຺ຕາ ປຸຎ຺ຎເຕເຊນ, ກາມຣູປຄຕິໍ ຄຕາ.

ຠວຄ຺ຄຕມ຺ປິ [ຠວຄ຺ຄໍ ວາປິ (ສ຺ຍາ.)] ສມ຺ປຕ຺ຕາ, ປຸນາຄຈ຺ຉນ຺ຕິ [ປຸນ ຄຈ຺ຉນ຺ຕິ (ສ຺ຍາ.)] ທຸຄ຺ຄຕິໍ.

ຕາວ ທີຆາຍຸກາ ສຕ຺ຕາ, ຈວນ຺ຕິ ອາຍຸສງ຺ຂຍາ;

ນຕ຺ຖິ ໂກຈິ ຠໂວ ນິຈ຺ໂຈ, ອິຕິ ວຸຕ຺ຕໍ ມເຫສິນາ.

ຕສ຺ມາ ຫິ ຘີຣາ ນິປກາ, ນິປຸຓາ ອຕ຺ຖຈິນ຺ຕກາ;

ຊຣາມຣຓໂມກ຺ຂາຍ, ຠາເວນ຺ຕິ ມຄ຺ຄມຸຕ຺ຕມໍ.

ຠາວຍິຕ຺ວາ ສຸຈິໍ ມຄ຺ຄໍ, ນິພ຺ພາໂນຄຘຄາມິນໍ;

ສພ຺ພາສເວ ປຣິຎ຺ຎາຍ, ປຣິນິພ຺ພນ຺ຕິ ອນາສວາຕິ.