໔. ຘມ຺ມທສ຺ສນວາໂຣ

໑. ກາມຘາຕຸ

໑໐໐໗. ກາມຘາຕຸຍາ ອຸປປຕ຺ຕິກ຺ຂເຓ ກຕິ ຂນ຺ຘາ ປາຕຸຠວນ຺ຕິ…ເປ… ກຕິ ຈິຕ຺ຕານິ ປາຕຸຠວນ຺ຕິ?

ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ປຎ຺ຈກ຺ຂນ຺ຘາ ປາຕຸຠວນ຺ຕິ; ກສ຺ສຈິ ເອກາທສາຍຕນານິ ປາຕຸຠວນ຺ຕິ; ກສ຺ສຈິ ທສາຍຕນານິ ປາຕຸຠວນ຺ຕິ; ກສ຺ສຈິ ອປຣານິ ທສາຍຕນານິ ປາຕຸຠວນ຺ຕິ; ກສ຺ສຈິ ນວາຍຕນານິ ປາຕຸຠວນ຺ຕິ; ກສ຺ສຈິ ສຕ຺ຕາຍຕນານິ ປາຕຸຠວນ຺ຕິ; ກສ຺ສຈິ ເອກາທສ ຘາຕຸໂຍ ປາຕຸຠວນ຺ຕິ; ກສ຺ສຈິ ທສ ຘາຕຸໂຍ ປາຕຸຠວນ຺ຕິ; ກສ຺ສຈິ ອປຣາ ທສ ຘາຕຸໂຍ ປາຕຸຠວນ຺ຕິ; ກສ຺ສຈິ ນວ ຘາຕຸໂຍ ປາຕຸຠວນ຺ຕິ; ກສ຺ສຈິ ສຕ຺ຕ ຘາຕຸໂຍ ປາຕຸຠວນ຺ຕິ; ສພ຺ເພສໍ ເອກໍ ສຈ຺ຈໍ ປາຕຸຠວຕິ; ກສ຺ສຈິ ຈຸທ຺ທສິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ເຕຣສິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ອປຣານິ ເຕຣສິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ທ຺ວາທສິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ທສິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ນວິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ອປຣານິ ນວິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ອປຣານິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ສຕ຺ຕິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ປຎ຺ຈິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ຈຕ຺ຕາຣິນ຺ທ຺ຣິຍານິ ປາຕຸຠວນ຺ຕິ; ກສ຺ສຈິ ຕໂຍ ເຫຕູ ປາຕຸຠວນ຺ຕິ; ກສ຺ສຈິ ທ຺ເວ ເຫຕູ ປາຕຸຠວນ຺ຕິ; ກສ຺ສຈິ [ເກຈິ (ສ຺ຍາ.)] ອເຫຕຸກາ ປາຕຸຠວນ຺ຕິ; ສພ຺ເພສໍ ຈຕ຺ຕາໂຣ ອາຫາຣາ ປາຕຸຠວນ຺ຕິ; ສພ຺ເພສໍ ເອໂກ ຜສ຺ໂສ ປາຕຸຠວຕິ; ສພ຺ເພສໍ ເອກາ ເວທນາ… ເອກາ ສຎ຺ຎາ… ເອກາ ເຈຕນາ… ເອກໍ ຈິຕ຺ຕໍ ປາຕຸຠວຕິ.

໑໐໐໘. ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ກຕເມ ປຎ຺ຈກ຺ຂນ຺ຘາ ປາຕຸຠວນ຺ຕິ? ຣູປກ຺ຂນ຺ໂຘ…ເປ… ວິຎ຺ຎາຓກ຺ຂນ຺ໂຘ – ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ອິເມ ປຎ຺ຈກ຺ຂນ຺ຘາ ປາຕຸຠວນ຺ຕິ.

໑໐໐໙. ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ເອກາທສາຍຕນານິ ປາຕຸຠວນ຺ຕິ? ກາມາວຈຣານໍ ເທວານໍ, ປຐມກປ຺ປິການໍ ມນຸສ຺ສານໍ, ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ, ເນຣຍິການໍ ປຣິປຸຓ຺ຓາຍຕນານໍ ອຸປປຕ຺ຕິກ຺ຂເຓ ເອກາທສາຍຕນານິ ປາຕຸຠວນ຺ຕິ – ຈກ຺ຂາຍຕນໍ, ຣູປາຍຕນໍ, ໂສຕາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ເອກາທສາຍຕນານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ທສາຍຕນານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈນ຺ຘານໍ ອຸປປຕ຺ຕິກ຺ຂເຓ ທສາຍຕນານິ ປາຕຸຠວນ຺ຕິ – ຣູປາຍຕນໍ, ໂສຕາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ທສາຍຕນານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ອປຣານິ ທສາຍຕນານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈພຘິຣານໍ ອຸປປຕ຺ຕິກ຺ຂເຓ ທສາຍຕນານິ ປາຕຸຠວນ຺ຕິ – ຈກ຺ຂາຍຕນໍ, ຣູປາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ທສາຍຕນານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ນວາຍຕນານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈນ຺ຘພຘິຣານໍ ອຸປປຕ຺ຕິກ຺ຂເຓ ນວາຍຕນານິ ປາຕຸຠວນ຺ຕິ – ຣູປາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ນວາຍຕນານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ສຕ຺ຕາຍຕນານິ ປາຕຸຠວນ຺ຕິ? ຄພ຺ຠເສຍ຺ຍການໍ ສຕ຺ຕານໍ ອຸປປຕ຺ຕິກ຺ຂເຓ ສຕ຺ຕາຍຕນານິ ປາຕຸຠວນ຺ຕິ – ຣູປາຍຕນໍ, ຄນ຺ຘາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ສຕ຺ຕາຍຕນານິ ປາຕຸຠວນ຺ຕິ.

໑໐໑໐. ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ເອກາທສ ຘາຕຸໂຍ ປາຕຸຠວນ຺ຕິ? ກາມາວຈຣານໍ ເທວານໍ, ປຐມກປ຺ປິການໍ ມນຸສ຺ສານໍ, ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ ປຣິປຸຓ຺ຓາຍຕນານໍ ອຸປປຕ຺ຕິກ຺ຂເຓ ເອກາທສ ຘາຕຸໂຍ ປາຕຸຠວນ຺ຕິ – ຈກ຺ຂຸຘາຕຸ, ຣູປຘາຕຸ, ໂສຕຘາຕຸ, ຆານຘາຕຸ, ຄນ຺ຘຘາຕຸ, ຊິວ຺ຫາຘາຕຸ, ຣສຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ມໂນວິຎ຺ຎາຓຘາຕຸ, ຘມ຺ມຘາຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມາ ເອກາທສ ຘາຕຸໂຍ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ທສ ຘາຕຸໂຍ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈນ຺ຘານໍ ອຸປປຕ຺ຕິກ຺ຂເຓ ທສ ຘາຕຸໂຍ ປາຕຸຠວນ຺ຕິ – ຣູປຘາຕຸ, ໂສຕຘາຕຸ, ຆານຘາຕຸ, ຄນ຺ຘຘາຕຸ, ຊິວ຺ຫາຘາຕຸ, ຣສຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ມໂນວິຎ຺ຎາຓຘາຕຸ, ຘມ຺ມຘາຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມາ ທສ ຘາຕຸໂຍ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ອປຣາ ທສ ຘາຕຸໂຍ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈພຘິຣານໍ ອຸປປຕ຺ຕິກ຺ຂເຓ ທສ ຘາຕຸໂຍ ປາຕຸຠວນ຺ຕິ – ຈກ຺ຂຸຘາຕຸ, ຣູປຘາຕຸ, ຆານຘາຕຸ, ຄນ຺ຘຘາຕຸ, ຊິວ຺ຫາຘາຕຸ, ຣສຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ມໂນວິຎ຺ຎາຓຘາຕຸ, ຘມ຺ມຘາຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມາ ທສ ຘາຕຸໂຍ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ນວ ຘາຕຸໂຍ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈນ຺ຘພຘິຣານໍ ອຸປປຕ຺ຕິກ຺ຂເຓ ນວ ຘາຕຸໂຍ ປາຕຸຠວນ຺ຕິ – ຣູປຘາຕຸ, ຆານຘາຕຸ, ຄນ຺ຘຘາຕຸ, ຊິວ຺ຫາຘາຕຸ, ຣສຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ມໂນວິຎ຺ຎາຓຘາຕຸ, ຘມ຺ມຘາຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມາ ນວ ຘາຕຸໂຍ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ສຕ຺ຕ ຘາຕຸໂຍ ປາຕຸຠວນ຺ຕິ? ຄພ຺ຠເສຍ຺ຍການໍ ສຕ຺ຕານໍ ອຸປປຕ຺ຕິກ຺ຂເຓ ສຕ຺ຕ ຘາຕຸໂຍ ປາຕຸຠວນ຺ຕິ – ຣູປຘາຕຸ, ຄນ຺ຘຘາຕຸ, ຣສຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ມໂນວິຎ຺ຎາຓຘາຕຸ, ຘມ຺ມຘາຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມາ ສຕ຺ຕ ຘາຕຸໂຍ ປາຕຸຠວນ຺ຕິ.

໑໐໑໑. ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ກຕມໍ ເອກໍ ສຈ຺ຈໍ ປາຕຸຠວຕິ? ທຸກ຺ຂສຈ຺ຈໍ – ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ອິທໍ ເອກໍ ສຈ຺ຈໍ ປາຕຸຠວຕິ.

໑໐໑໒. ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ຈຸທ຺ທສິນ຺ທ຺ຣິຍານິ ປາຕຸຠວນ຺ຕິ? ກາມາວຈຣານໍ ເທວານໍ, ສເຫຕຸການໍ ຎາຓສມ຺ປຍຸຕ຺ຕານໍ ອຸປປຕ຺ຕິກ຺ຂເຓ ຈຸທ຺ທສິນ຺ທ຺ຣິຍານິ ປາຕຸຠວນ຺ຕິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ຈຸທ຺ທສິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ເຕຣສິນ຺ທ຺ຣິຍານິ ປາຕຸຠວນ຺ຕິ? ກາມາວຈຣານໍ ເທວານໍ ສເຫຕຸການໍ ຎາຓວິປ຺ປຍຸຕ຺ຕານໍ ອຸປປຕ຺ຕິກ຺ຂເຓ ເຕຣສິນ຺ທ຺ຣິຍານິ ປາຕຸຠວນ຺ຕິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ເຕຣສິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ອປຣານິ ເຕຣສິນ຺ທ຺ຣິຍານິ ປາຕຸຠວນ຺ຕິ? ປຐມກປ຺ປິການໍ ມນຸສ຺ສານໍ ສເຫຕຸການໍ ຎາຓສມ຺ປຍຸຕ຺ຕານໍ ອຸປປຕ຺ຕິກ຺ຂເຓ ເຕຣສິນ຺ທ຺ຣິຍານິ ປາຕຸຠວນ຺ຕິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ເຕຣສິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ທ຺ວາທສິນ຺ທ຺ຣິຍານິ ປາຕຸຠວນ຺ຕິ? ປຐມກປ຺ປິການໍ ມນຸສ຺ສານໍ ສເຫຕຸການໍ ຎາຓວິປ຺ປຍຸຕ຺ຕານໍ ອຸປປຕ຺ຕິກ຺ຂເຓ ທ຺ວາທສິນ຺ທ຺ຣິຍານິ ປາຕຸຠວນ຺ຕິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ທ຺ວາທສິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ທສິນ຺ທ຺ຣິຍານິ ປາຕຸຠວນ຺ຕິ? ຄພ຺ຠເສຍ຺ຍການໍ ສຕ຺ຕານໍ ສເຫຕຸການໍ ຎາຓສມ຺ປຍຸຕ຺ຕານໍ ອຸປປຕ຺ຕິກ຺ຂເຓ ທສິນ຺ທ຺ຣິຍານິ ປາຕຸຠວນ຺ຕິ – ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ທສິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ນວິນ຺ທ຺ຣິຍານິ ປາຕຸຠວນ຺ຕິ? ຄພ຺ຠເສຍ຺ຍການໍ ສຕ຺ຕານໍ ສເຫຕຸການໍ ຎາຓວິປ຺ປຍຸຕ຺ຕານໍ ອຸປປຕ຺ຕິກ຺ຂເຓ ນວິນ຺ທ຺ຣິຍານິ ປາຕຸຠວນ຺ຕິ – ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ນວິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ອປຣານິ ນວິນ຺ທ຺ຣິຍານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ ປຣິປຸຓ຺ຓາຍຕນານໍ ອຸປປຕ຺ຕິກ຺ຂເຓ ນວິນ຺ທ຺ຣິຍານິ ປາຕຸຠວນ຺ຕິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ນວິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ອຏ຺ຐິນ຺ທ຺ຣິຍານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈນ຺ຘານໍ ອຸປປຕ຺ຕິກ຺ຂເຓ ອຏ຺ຐິນ຺ທ຺ຣິຍານິ ປາຕຸຠວນ຺ຕິ – ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ອປຣານິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈພຘິຣານໍ ອຸປປຕ຺ຕິກ຺ຂເຓ ອຏ຺ຐິນ຺ທ຺ຣິຍານິ ປາຕຸຠວນ຺ຕິ – ຈກ຺ຂຸນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ສຕ຺ຕິນ຺ທ຺ຣິຍານິ ປາຕຸຠວນ຺ຕິ? ໂອປປາຕິການໍ ເປຕານໍ, ໂອປປາຕິການໍ ອສຸຣານໍ, ໂອປປາຕິການໍ ຕິຣຈ຺ຉານຄຕານໍ ເນຣຍິການໍ, ຊຈ຺ຈນ຺ຘພຘິຣານໍ ອຸປປຕ຺ຕິກ຺ຂເຓ ສຕ຺ຕິນ຺ທ຺ຣິຍານິ ປາຕຸຠວນ຺ຕິ – ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ສຕ຺ຕິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ປຎ຺ຈິນ຺ທ຺ຣິຍານິ ປາຕຸຠວນ຺ຕິ? ຄພ຺ຠເສຍ຺ຍການໍ ສຕ຺ຕານໍ ອເຫຕຸການໍ, ຐເປຕ຺ວາ ນປຸໍສການໍ, ອຸປປຕ຺ຕິກ຺ຂເຓ ປຎ຺ຈິນ຺ທ຺ຣິຍານິ ປາຕຸຠວນ຺ຕິ – ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ ວາ ປຸຣິສິນ຺ທ຺ຣິຍໍ ວາ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ປຎ຺ຈິນ຺ທ຺ຣິຍານິ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ຈຕ຺ຕາຣິນ຺ທ຺ຣິຍານິ ປາຕຸຠວນ຺ຕິ? ຄພ຺ຠເສຍ຺ຍການໍ ສຕ຺ຕານໍ ອເຫຕຸການໍ, ນປຸໍສການໍ ອຸປປຕ຺ຕິກ຺ຂເຓ ຈຕ຺ຕາຣິນ຺ທ຺ຣິຍານິ ປາຕຸຠວນ຺ຕິ – ກາຍິນ຺ທ຺ຣິຍໍ, ມນິນ຺ທ຺ຣິຍໍ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິມານິ ຈຕ຺ຕາຣິນ຺ທ຺ຣິຍານິ ປາຕຸຠວນ຺ຕິ.

໑໐໑໓. ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ຕໂຍ ເຫຕູ ປາຕຸຠວນ຺ຕິ? ກາມາວຈຣານໍ ເທວານໍ, ປຐມກປ຺ປິການໍ ມນຸສ຺ສານໍ, ຄພ຺ຠເສຍ຺ຍການໍ ສຕ຺ຕານໍ ສເຫຕຸການໍ ຎາຓສມ຺ປຍຸຕ຺ຕານໍ ອຸປປຕ຺ຕິກ຺ຂເຓ ຕໂຍ ເຫຕູ ປາຕຸຠວນ຺ຕິ – ອໂລໂຠ ວິປາກເຫຕຸ, ອໂທໂສ ວິປາກເຫຕຸ, ອໂມໂຫ ວິປາກເຫຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິເມ ຕໂຍ ເຫຕູ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ກສ຺ສ ທ຺ເວ ເຫຕູ ປາຕຸຠວນ຺ຕິ? ກາມາວຈຣານໍ ເທວານໍ, ປຐມກປ຺ປິການໍ ມນຸສ຺ສານໍ, ຄພ຺ຠເສຍ຺ຍການໍ ສຕ຺ຕານໍ ສເຫຕຸການໍ ຎາຓວິປ຺ປຍຸຕ຺ຕານໍ ອຸປປຕ຺ຕິກ຺ຂເຓ ທ຺ເວ ເຫຕູ ປາຕຸຠວນ຺ຕິ – ອໂລໂຠ ວິປາກເຫຕຸ, ອໂທໂສ ວິປາກເຫຕຸ. ກາມຘາຕຸຍາ ອຸປປຕ຺ຕິກ຺ຂເຓ ເອເຕສໍ ອິເມ ທ຺ເວ ເຫຕູ ປາຕຸຠວນ຺ຕິ. ອວເສສານໍ ສຕ຺ຕານໍ [ອວເສສາ ສຕ຺ຕາ (?)] ອເຫຕຸກາ ປາຕຸຠວນ຺ຕິ.

໑໐໑໔. ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ກຕເມ ຈຕ຺ຕາໂຣ ອາຫາຣາ ປາຕຸຠວນ຺ຕິ. ກພຬີກາໂຣ ອາຫາໂຣ, ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ອິເມ ຈຕ຺ຕາໂຣ ອາຫາຣາ ປາຕຸຠວນ຺ຕິ.

ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ກຕໂມ ເອໂກ ຜສ຺ໂສ ປາຕຸຠວຕິ? ມໂນວິຎ຺ຎາຓຘາຕຸສມ຺ຜສ຺ໂສ – ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ອຍໍ ເອໂກ ຜສ຺ໂສ ປາຕຸຠວຕິ.

ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ກຕມາ ເອກາ ເວທນາ … ເອກາ ສຎ຺ຎາ… ເອກາ ເຈຕນາ… ເອກໍ ຈິຕ຺ຕໍ ປາຕຸຠວຕິ? ມໂນວິຎ຺ຎາຓຘາຕຸ – ກາມຘາຕຸຍາ ອຸປປຕ຺ຕິກ຺ຂເຓ ສພ຺ເພສໍ ອິທໍ ເອກໍ ຈິຕ຺ຕໍ ປາຕຸຠວຕິ.

໒. ຣູປຘາຕຸ

໑໐໑໕. ຣູປຘາຕຸຍາ ອຸປປຕ຺ຕິກ຺ຂເຓ ກຕິ ຂນ຺ຘາ ປາຕຸຠວນ຺ຕິ…ເປ… ກຕິ ຈິຕ຺ຕານິ ປາຕຸຠວນ຺ຕິ?

ຣູປຘາຕຸຍາ ອຸປປຕ຺ຕິກ຺ຂເຓ, ຐເປຕ຺ວາ ອສຎ຺ຎສຕ຺ຕານໍ ເທວານໍ, ປຎ຺ຈກ຺ຂນ຺ຘາ ປາຕຸຠວນ຺ຕິ, ປຎ຺ຈາຍຕນານິ ປາຕຸຠວນ຺ຕິ, ປຎ຺ຈ ຘາຕຸໂຍ ປາຕຸຠວນ຺ຕິ, ເອກໍ ສຈ຺ຈໍ ປາຕຸຠວຕິ, ທສິນ຺ທ຺ຣິຍານິ ປາຕຸຠວນ຺ຕິ, ຕໂຍ ເຫຕູ ປາຕຸຠວນ຺ຕິ, ຕໂຍ ອາຫາຣາ ປາຕຸຠວນ຺ຕິ, ເອໂກ ຜສ຺ໂສ ປາຕຸຠວຕິ, ເອກາ ເວທນາ… ເອກາ ສຎ຺ຎາ… ເອກາ ເຈຕນາ… ເອກໍ ຈິຕ຺ຕໍ ປາຕຸຠວຕິ.

໑໐໑໖. ຣູປຘາຕຸຍາ ອຸປປຕ຺ຕິກ຺ຂເຓ ກຕເມ ປຎ຺ຈກ຺ຂນ຺ຘາ ປາຕຸຠວນ຺ຕິ? ຣູປກ຺ຂນ຺ໂຘ, ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ຣູປຘາຕຸຍາ ອຸປປຕ຺ຕິກ຺ຂເຓ ອິເມ ປຎ຺ຈກ຺ຂນ຺ຘາ ປາຕຸຠວນ຺ຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕມານິ ປຎ຺ຈາຍຕນານິ ປາຕຸຠວນ຺ຕິ? ຈກ຺ຂາຍຕນໍ, ຣູປາຍຕນໍ, ໂສຕາຍຕນໍ, ມນາຍຕນໍ, ຘມ຺ມາຍຕນໍ – ຣູປຘາຕຸຍາ ອຸປປຕ຺ຕິກ຺ຂເຓ ອິມານິ ປຎ຺ຈາຍຕນານິ ປາຕຸຠວນ຺ຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕມາ ປຎ຺ຈ ຘາຕຸໂຍ ປາຕຸຠວນ຺ຕິ? ຈກ຺ຂຸຘາຕຸ, ຣູປຘາຕຸ, ໂສຕຘາຕຸ, ມໂນວິຎ຺ຎາຓຘາຕຸ, ຘມ຺ມຘາຕຸ – ຣູປຘາຕຸຍາ ອຸປປຕ຺ຕິກ຺ຂເຓ ອິມາ ປຎ຺ຈ ຘາຕຸໂຍ ປາຕຸຠວນ຺ຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕມໍ ເອກໍ ສຈ຺ຈໍ ປາຕຸຠວຕິ? ທຸກ຺ຂສຈ຺ຈໍ – ຣູປຘາຕຸຍາ ອຸປປຕ຺ຕິກ຺ຂເຓ ອິທໍ ເອກໍ ສຈ຺ຈໍ ປາຕຸຠວຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕມານິ ທສິນ຺ທ຺ຣິຍານິ ປາຕຸຠວນ຺ຕິ? ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ມນິນ຺ທ຺ຣິຍໍ, ຊີວິຕິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ ວາ ອຸເປກ຺ຂິນ຺ທ຺ຣິຍໍ ວາ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ – ຣູປຘາຕຸຍາ ອຸປປຕ຺ຕິກ຺ຂເຓ ອິມານິ ທສິນ຺ທ຺ຣິຍານິ ປາຕຸຠວນ຺ຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕເມ ຕໂຍ ເຫຕູ ປາຕຸຠວນ຺ຕິ? ອໂລໂຠ ວິປາກເຫຕຸ, ອໂທໂສ ວິປາກເຫຕຸ, ອໂມໂຫ ວິປາກເຫຕຸ – ຣູປຘາຕຸຍາ ອຸປປຕ຺ຕິກ຺ຂເຓ ອິເມ ຕໂຍ ເຫຕູ ປາຕຸຠວນ຺ຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕເມ ຕໂຍ ອາຫາຣາ ປາຕຸຠວນ຺ຕິ? ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ຣູປຘາຕຸຍາ ອຸປປຕ຺ຕິກ຺ຂເຓ ອິເມ ຕໂຍ ອາຫາຣາ ປາຕຸຠວນ຺ຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕໂມ ເອໂກ ຜສ຺ໂສ ປາຕຸຠວຕິ? ມໂນວິຎ຺ຎາຓຘາຕຸສມ຺ຜສ຺ໂສ – ຣູປຘາຕຸຍາ ອຸປປຕ຺ຕິກ຺ຂເຓ ອຍໍ ເອໂກ ຜສ຺ໂສ ປາຕຸຠວຕິ.

ຣູປຘາຕຸຍາ ອຸປປຕ຺ຕິກ຺ຂເຓ ກຕມາ ເອກາ ເວທນາ… ເອກາ ສຎ຺ຎາ… ເອກາ ເຈຕນາ… ເອກໍ ຈິຕ຺ຕໍ ປາຕຸຠວຕິ? ມໂນວິຎ຺ຎາຓຘາຕຸ – ຣູປຘາຕຸຍາ ອຸປປຕ຺ຕິກ຺ຂເຓ ອິທໍ ເອກໍ ຈິຕ຺ຕໍ ປາຕຸຠວຕິ.

໓. ອສຎ຺ຎສຕ຺ຕາ

໑໐໑໗. ອສຎ຺ຎສຕ຺ຕານໍ ເທວານໍ ອຸປປຕ຺ຕິກ຺ຂເຓ ກຕິ ຂນ຺ຘາ ປາຕຸຠວນ຺ຕິ…ເປ… ກຕິ ຈິຕ຺ຕານິ ປາຕຸຠວນ຺ຕິ?

ອສຎ຺ຎສຕ຺ຕານໍ ເທວານໍ ອຸປປຕ຺ຕິກ຺ຂເຓ ເອໂກ ຂນ຺ໂຘ ປາຕຸຠວຕິ – ຣູປກ຺ຂນ຺ໂຘ; ທ຺ເວ ອາຍຕນານິ ປາຕຸຠວນ຺ຕິ – ຣູປາຍຕນໍ, ຘມ຺ມາຍຕນໍ; ທ຺ເວ ຘາຕຸໂຍ ປາຕຸຠວນ຺ຕິ – ຣູປຘາຕຸ, ຘມ຺ມຘາຕຸ; ເອກໍ ສຈ຺ຈໍ ປາຕຸຠວຕິ – ທຸກ຺ຂສຈ຺ຈໍ; ເອກິນ຺ທ຺ຣິຍໍ ປາຕຸຠວຕິ – ຣູປຊີວິຕິນ຺ທ຺ຣິຍໍ. ອສຎ຺ຎສຕ຺ຕາ ເທວາ ອເຫຕຸກາ ອນາຫາຣາ ອຜສ຺ສກາ ອເວທນກາ ອສຎ຺ຎກາ ອເຈຕນກາ ອຈິຕ຺ຕກາ ປາຕຸຠວນ຺ຕິ.

໔. ອຣູປຘາຕຸ

໑໐໑໘. ອຣູປຘາຕຸຍາ ອຸປປຕ຺ຕິກ຺ຂເຓ ກຕິ ຂນ຺ຘາ ປາຕຸຠວນ຺ຕິ…ເປ… ກຕິ ຈິຕ຺ຕານິ ປາຕຸຠວນ຺ຕິ?

ອຣູປຘາຕຸຍາ ອຸປປຕ຺ຕິກ຺ຂເຓ ຈຕ຺ຕາໂຣ ຂນ຺ຘາ ປາຕຸຠວນ຺ຕິ, ທ຺ເວ ອາຍຕນານິ ປາຕຸຠວນ຺ຕິ, ທ຺ເວ ຘາຕຸໂຍ ປາຕຸຠວນ຺ຕິ, ເອກໍ ສຈ຺ຈໍ ປາຕຸຠວຕິ, ອຏ຺ຐິນ຺ທ຺ຣິຍານິ ປາຕຸຠວນ຺ຕິ, ຕໂຍ ເຫຕູ ປາຕຸຠວນ຺ຕິ, ຕໂຍ ອາຫາຣາ ປາຕຸຠວນ຺ຕິ, ເອໂກ ຜສ຺ໂສ ປາຕຸຠວຕິ, ເອກາ ເວທນາ… ເອກາ ສຎ຺ຎາ… ເອກາ ເຈຕນາ… ເອກໍ ຈິຕ຺ຕໍ ປາຕຸຠວຕິ.

໑໐໑໙. ອຣູປຘາຕຸຍາ ອຸປປຕ຺ຕິກ຺ຂເຓ ກຕເມ ຈຕ຺ຕາໂຣ ຂນ຺ຘາ ປາຕຸຠວນ຺ຕິ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອຣູປຘາຕຸຍາ ອຸປປຕ຺ຕິກ຺ຂເຓ ອິເມ ຈຕ຺ຕາໂຣ ຂນ຺ຘາ ປາຕຸຠວນ຺ຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕມານິ ທ຺ເວ ອາຍຕນານິ ປາຕຸຠວນ຺ຕິ? ມນາຍຕນໍ, ຘມ຺ມາຍຕນໍ – ອຣູປຘາຕຸຍາ ອຸປປຕ຺ຕິກ຺ຂເຓ ອິມານິ ທ຺ເວ ອາຍຕນານິ ປາຕຸຠວນ຺ຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕມາ ທ຺ເວ ຘາຕຸໂຍ ປາຕຸຠວນ຺ຕິ? ມໂນວິຎ຺ຎາຓຘາຕຸ, ຘມ຺ມຘາຕຸ – ອຣູປຘາຕຸຍາ ອຸປປຕ຺ຕິກ຺ຂເຓ ອິມາ ທ຺ເວ ຘາຕຸໂຍ ປາຕຸຠວນ຺ຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕມໍ ເອກໍ ສຈ຺ຈໍ ປາຕຸຠວຕິ? ທຸກ຺ຂສຈ຺ຈໍ – ອຣູປຘາຕຸຍາ ອຸປປຕ຺ຕິກ຺ຂເຓ ອິທໍ ເອກໍ ສຈ຺ຈໍ ປາຕຸຠວຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕມານິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ? ມນິນ຺ທ຺ຣິຍໍ, ຊີວິຕິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ – ອຣູປຘາຕຸຍາ ອຸປປຕ຺ຕິກ຺ຂເຓ ອິມານິ ອຏ຺ຐິນ຺ທ຺ຣິຍານິ ປາຕຸຠວນ຺ຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕເມ ຕໂຍ ເຫຕູ ປາຕຸຠວນ຺ຕິ? ອໂລໂຠ ວິປາກເຫຕຸ, ອໂທໂສ ວິປາກເຫຕຸ, ອໂມໂຫ ວິປາກເຫຕຸ – ອຣູປຘາຕຸຍາ ອຸປປຕ຺ຕິກ຺ຂເຓ ອິເມ ຕໂຍ ເຫຕູ ປາຕຸຠວນ຺ຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕເມ ຕໂຍ ອາຫາຣາ ປາຕຸຠວນ຺ຕິ? ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ອຣູປຘາຕຸຍາ ອຸປປຕ຺ຕິກ຺ຂເຓ ອິເມ ຕໂຍ ອາຫາຣາ ປາຕຸຠວນ຺ຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕໂມ ເອໂກ ຜສ຺ໂສ ປາຕຸຠວຕິ? ມໂນວິຎ຺ຎາຓຘາຕຸສມ຺ຜສ຺ໂສ – ອຣູປຘາຕຸຍາ ອຸປປຕ຺ຕິກ຺ຂເຓ ອຍໍ ເອໂກ ຜສ຺ໂສ ປາຕຸຠວຕິ.

ອຣູປຘາຕຸຍາ ອຸປປຕ຺ຕິກ຺ຂເຓ ກຕມາ ເອກາ ເວທນາ…ເປ… ເອກາ ສຎ຺ຎາ… ເອກາ ເຈຕນາ… ເອກໍ ຈິຕ຺ຕໍ ປາຕຸຠວຕິ? ມໂນວິຎ຺ຎາຓຘາຕຸ – ອຣູປຘາຕຸຍາ ອຸປປຕ຺ຕິກ຺ຂເຓ ອິທໍ ເອກໍ ຈິຕ຺ຕໍ ປາຕຸຠວຕິ.