໕. ຠູມນ຺ຕຣທສ຺ສນວາໂຣ
໑໐໒໐. ກາມາວຈຣາ ຘມ຺ມາ, ນ ກາມາວຈຣາ ຘມ຺ມາ, ຣູປາວຈຣາ ຘມ຺ມາ, ນ ຣູປາວຈຣາ ຘມ຺ມາ, ອຣູປາວຈຣາ ຘມ຺ມາ, ນ ອຣູປາວຈຣາ ຘມ຺ມາ, ປຣິຍາປນ຺ນາ ຘມ຺ມາ, ອປຣິຍາປນ຺ນາ ຘມ຺ມາ.
ກຕເມ ຘມ຺ມາ ກາມາວຈຣາ? ເຫຏ຺ຐໂຕ ອວີຈິນິຣຍໍ ປຣິຍນ຺ຕໍ ກຣິຕ຺ວາ, ອຸປຣິໂຕ ປຣນິມ຺ມິຕວສວຕ຺ຕີ ເທເວ ອນ຺ໂຕກຣິຕ຺ວາ, ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ; ຣູປໍ, ເວທນາ, ສຎ຺ຎາ, ສງ຺ຂາຣາ, ວິຎ຺ຎາຓໍ – ອິເມ ຘມ຺ມາ ກາມາວຈຣາ.
ກຕເມ ຘມ຺ມາ ນ ກາມາວຈຣາ? ຣູປາວຈຣາ, ອຣູປາວຈຣາ, ອປຣິຍາປນ຺ນາ – ອິເມ ຘມ຺ມາ ນ ກາມາວຈຣາ.
ກຕເມ ຘມ຺ມາ ຣູປາວຈຣາ? ເຫຏ຺ຐໂຕ ພ຺ຣຫ຺ມໂລກໍ ປຣິຍນ຺ຕໍ ກຣິຕ຺ວາ, ອຸປຣິໂຕ ອກນິຏ຺ເຐ ເທເວ ອນ຺ໂຕກຣິຕ຺ວາ, ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ສມາປນ຺ນສ຺ສ ວາ ອຸປປນ຺ນສ຺ສ ວາ ທິຏ຺ຐຘມ຺ມສຸຂວິຫາຣິສ຺ສ ວາ ຈິຕ຺ຕເຈຕສິກາ ຘມ຺ມາ – ອິເມ ຘມ຺ມາ ຣູປາວຈຣາ.
ກຕເມ ຘມ຺ມາ ນ ຣູປາວຈຣາ? ກາມາວຈຣາ, ອຣູປາວຈຣາ, ອປຣິຍາປນ຺ນາ – ອິເມ ຘມ຺ມາ ນ ຣູປາວຈຣາ.
ກຕເມ ຘມ຺ມາ ອຣູປາວຈຣາ? ເຫຏ຺ຐໂຕ ອາກາສານຎ຺ຈາຍຕນູປເຄ ເທເວ ປຣິຍນ຺ຕໍ ກຣິຕ຺ວາ, ອຸປຣິໂຕ ເນວສຎ຺ຎານາສຎ຺ຎາຍຕນູປເຄ ເທເວ ອນ຺ໂຕກຣິຕ຺ວາ, ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ສມາປນ຺ນສ຺ສ ວາ ອຸປປນ຺ນສ຺ສ ວາ ທິຏ຺ຐຘມ຺ມສຸຂວິຫາຣິສ຺ສ ວາ ຈິຕ຺ຕເຈຕສິກາ ຘມ຺ມາ – ອິເມ ຘມ຺ມາ ອຣູປາວຈຣາ.
ກຕເມ ຘມ຺ມາ ນ ອຣູປາວຈຣາ? ກາມາວຈຣາ, ຣູປາວຈຣາ, ອປຣິຍາປນ຺ນາ – ອິເມ ຘມ຺ມາ ນ ອຣູປາວຈຣາ.
ກຕເມ ຘມ຺ມາ ປຣິຍາປນ຺ນາ? ສາສວາ ກຸສລາກຸສລພ຺ຍາກຕາ ຘມ຺ມາ ກາມາວຈຣາ, ຣູປາວຈຣາ, ອຣູປາວຈຣາ, ຣູປກ຺ຂນ຺ໂຘ, ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ຘມ຺ມາ ປຣິຍາປນ຺ນາ.
ກຕເມ ຘມ຺ມາ ອປຣິຍາປນ຺ນາ? ມຄ຺ຄາ ຈ, ມຄ຺ຄຜລານິ ຈ, ອສງ຺ຂຕາ ຈ ຘາຕຸ – ອິເມ ຘມ຺ມາ ອປຣິຍາປນ຺ນາ.