໓. ອຣູປຘາຕຸ

໑໐໐໓. ປຎ຺ຈນ຺ນໍ ຂນ຺ຘານໍ ກຕິ ອຣູປຘາຕຸປຣິຍາປນ຺ນາ, ກຕິ ນ ອຣູປຘາຕຸປຣິຍາປນ຺ນາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ອຣູປຘາຕຸປຣິຍາປນ຺ນາ, ກຕິ ນ ອຣູປຘາຕຸປຣິຍາປນ຺ນາ?

໑໐໐໔. ຣູປກ຺ຂນ຺ໂຘ ນ ອຣູປຘາຕຸປຣິຍາປນ຺ໂນ; ຈຕ຺ຕາໂຣ ຂນ຺ຘາ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.

ທສາຍຕນາ ນ ອຣູປຘາຕຸປຣິຍາປນ຺ນາ; ທ຺ເວ ອາຍຕນາ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.

ໂສຬສ ຘາຕຸໂຍ ນ ອຣູປຘາຕຸປຣິຍາປນ຺ນາ; ທ຺ເວ ຘາຕຸໂຍ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.

ຕີຓິ ສຈ຺ຈານິ ນ ອຣູປຘາຕຸປຣິຍາປນ຺ນານິ.

ທຸກ຺ຂສຈ຺ຈໍ ສິຍາ ອຣູປຘາຕຸປຣິຍາປນ຺ນໍ, ສິຍາ ນ ອຣູປຘາຕຸປຣິຍາປນ຺ນໍ.

ຈຸທ຺ທສິນ຺ທ຺ຣິຍາ ນ ອຣູປຘາຕຸປຣິຍາປນ຺ນາ; ອຏ຺ຐິນ຺ທ຺ຣິຍາ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.

ຕໂຍ ອກຸສລເຫຕູ ນ ອຣູປຘາຕຸປຣິຍາປນ຺ນາ; ຉ ເຫຕູ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.

ກພຬີກາໂຣ ອາຫາໂຣ ນ ອຣູປຘາຕຸປຣິຍາປນ຺ໂນ; ຕໂຍ ອາຫາຣາ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.

ຉ ຜສ຺ສາ ນ ອຣູປຘາຕຸປຣິຍາປນ຺ນາ; ມໂນວິຎ຺ຎາຓຘາຕຸສມ຺ຜສ຺ໂສ ສິຍາ ອຣູປຘາຕຸປຣິຍາປນ຺ໂນ, ສິຍາ ນ ອຣູປຘາຕຸປຣິຍາປນ຺ໂນ.

ຉ ເວທນາ…ເປ… ຉ ສຎ຺ຎາ … ຉ ເຈຕນາ… ຉ ຈິຕ຺ຕາ ນ ອຣູປຘາຕຸປຣິຍາປນ຺ນາ; ມໂນວິຎ຺ຎາຓຘາຕຸ ສິຍາ ອຣູປຘາຕຸປຣິຍາປນ຺ນາ, ສິຍາ ນ ອຣູປຘາຕຸປຣິຍາປນ຺ນາ.