(໒) ໂລກິຍທຸກໍ

໑໐໔໔. ປຎ຺ຈນ຺ນໍ ຂນ຺ຘານໍ ກຕິ ໂລກິຍາ, ກຕິ ໂລກຸຕ຺ຕຣາ? ທ຺ວາທສນ຺ນໍ ອາຍຕນານໍ ກຕິ ໂລກິຍາ, ກຕິ ໂລກຸຕ຺ຕຣາ? ອຏ຺ຐາຣສນ຺ນໍ ຘາຕູນໍ ກຕິ ໂລກິຍາ, ກຕິ ໂລກຸຕ຺ຕຣາ? ຈຕຸນ຺ນໍ ສຈ຺ຈານໍ ກຕິ ໂລກິຍາ, ກຕິ ໂລກຸຕ຺ຕຣາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ໂລກິຍາ, ກຕິ ໂລກຸຕ຺ຕຣາ?

ຣູປກ຺ຂນ຺ໂຘ ໂລກິໂຍ. ຈຕ຺ຕາໂຣ ຂນ຺ຘາ ສິຍາ ໂລກິຍາ, ສິຍາ ໂລກຸຕ຺ຕຣາ. ທສາຍຕນາ ໂລກິຍາ. ທ຺ເວ ອາຍຕນາ ສິຍາ ໂລກິຍາ, ສິຍາ ໂລກຸຕ຺ຕຣາ. ໂສຬສ ຘາຕຸໂຍ ໂລກິຍາ. ທ຺ເວ ຘາຕຸໂຍ ສິຍາ ໂລກິຍາ, ສິຍາ ໂລກຸຕ຺ຕຣາ. ທ຺ເວ ສຈ຺ຈາ ໂລກິຍາ. ທ຺ເວ ສຈ຺ຈາ ໂລກຸຕ຺ຕຣາ.

ທສິນ຺ທ຺ຣິຍາ ໂລກິຍາ. ຕີຓິນ຺ທ຺ຣິຍາ ໂລກຸຕ຺ຕຣາ. ນວິນ຺ທ຺ຣິຍາ ສິຍາ ໂລກິຍາ, ສິຍາ ໂລກຸຕ຺ຕຣາ. ຕໂຍ ອກຸສລເຫຕູ ໂລກິຍາ. ຉ ເຫຕູ ສິຍາ ໂລກິຍາ, ສິຍາ ໂລກຸຕ຺ຕຣາ. ກພຬີກາໂຣ ອາຫາໂຣ ໂລກິໂຍ. ຕໂຍ ອາຫາຣາ ສິຍາ ໂລກິຍາ, ສິຍາ ໂລກຸຕ຺ຕຣາ. ຉ ຜສ຺ສາ ໂລກິຍາ. ມໂນວິຎ຺ຎາຓຘາຕຸສມ຺ຜສ຺ໂສ ສິຍາ ໂລກິໂຍ, ສິຍາ ໂລກຸຕ຺ຕໂຣ. ຉ ເວທນາ ໂລກິຍາ. ມໂນວິຎ຺ຎາຓຘາຕຸສມ຺ຜສ຺ສຊາ ເວທນາ ສິຍາ ໂລກິຍາ, ສິຍາ ໂລກຸຕ຺ຕຣາ. ຉ ສຎ຺ຎາ ໂລກິຍາ. ມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ ສິຍາ ໂລກິຍາ, ສິຍາ ໂລກຸຕ຺ຕຣາ. ຉ ເຈຕນາ ໂລກິຍາ. ມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ ສິຍາ ໂລກິຍາ, ສິຍາ ໂລກຸຕ຺ຕຣາ. ຉ ຈິຕ຺ຕາ ໂລກິຍາ. ມໂນວິຎ຺ຎາຓຘາຕຸ ສິຍາ ໂລກິຍາ, ສິຍາ ໂລກຸຕ຺ຕຣາຕິ.

ອຠິຎ຺ຎາ ທ຺ເວ ສາຣມ຺ມຓາ, ທິຏ຺ຐາ ກຸສລເວທນາ;

ວິປາກາ ຈ ອຸປາທິນ຺ນາ, ວິຕກ຺ກໍ ຣູປໂລກິຍາຕິ.

ຘມ຺ມຫທຍວິຠງ຺ໂຄ ນິຏ຺ຐິໂຕ.

ວິຠງ຺ຄປກຣຓໍ ນິຏ຺ຐິຕໍ.