໓. ວິປາກຕ຺ຕິກໍ

໑໐໔໐. ປຎ຺ຈນ຺ນໍ ຂນ຺ຘານໍ ກຕິ ວິປາກາ, ກຕິ ວິປາກຘມ຺ມຘມ຺ມາ, ກຕິ ເນວວິປາກນວິປາກຘມ຺ມຘມ຺ມາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ວິປາກາ, ກຕິ ວິປາກຘມ຺ມຘມ຺ມາ, ກຕິ ເນວວິປາກນວິປາກຘມ຺ມຘມ຺ມາ?

ຣູປກ຺ຂນ຺ໂຘ ເນວວິປາກນວິປາກຘມ຺ມຘມ຺ໂມ. ຈຕ຺ຕາໂຣ ຂນ຺ຘາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.

ທສາຍຕນາ ເນວວິປາກນວິປາກຘມ຺ມຘມ຺ມາ. ທ຺ວາຍຕນາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.

ທສ ຘາຕຸໂຍ ເນວວິປາກນວິປາກຘມ຺ມຘມ຺ມາ. ປຎ຺ຈ ຘາຕຸໂຍ ວິປາກາ. ມໂນຘາຕຸ ສິຍາ ວິປາກາ, ສິຍາ ເນວວິປາກນວິປາກຘມ຺ມຘມ຺ມາ. ທ຺ເວ ຘາຕຸໂຍ ສິຍາ ວິປາກາ ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.

ທ຺ເວ ສຈ຺ຈາ ວິປາກຘມ຺ມຘມ຺ມາ. ນິໂຣຘສຈ຺ຈໍ ເນວວິປາກນວິປາກຘມ຺ມຘມ຺ມໍ. ທຸກ຺ຂສຈ຺ຈໍ ສິຍາ ວິປາກໍ, ສິຍາ ວິປາກຘມ຺ມຘມ຺ມໍ, ສິຍາ ເນວວິປາກນວິປາກຘມ຺ມຘມ຺ມໍ.

ສຕ຺ຕິນ຺ທ຺ຣິຍາ ເນວວິປາກນວິປາກຘມ຺ມຘມ຺ມາ. ຕີຓິນ຺ທ຺ຣິຍາ ວິປາກາ. ທ຺ວິນ຺ທ຺ຣິຍາ ວິປາກຘມ຺ມຘມ຺ມາ. ອຎ຺ຎິນ຺ທ຺ຣິຍໍ ສິຍາ ວິປາກໍ, ສິຍາ ວິປາກຘມ຺ມຘມ຺ມໍ. ນວິນ຺ທ຺ຣິຍາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.

ຉ ເຫຕູ ວິປາກຘມ຺ມຘມ຺ມາ. ຕໂຍ ອພ຺ຍາກຕເຫຕູ ສິຍາ ວິປາກາ, ສິຍາ ເນວວິປາກນວິປາກຘມ຺ມຘມ຺ມາ.

ກພຬີກາໂຣ ອາຫາໂຣ ເນວວິປາກນວິປາກຘມ຺ມຘມ຺ໂມ. ຕໂຍ ອາຫາຣາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ. ປຎ຺ຈ ຜສ຺ສາ ວິປາກາ. ມໂນຘາຕຸສມ຺ຜສ຺ໂສ ສິຍາ ວິປາໂກ, ສິຍາ ເນວວິປາກນວິປາກຘມ຺ມຘມ຺ໂມ. ມໂນວິຎ຺ຎາຓຘາຕຸສມ຺ຜສ຺ໂສ ສິຍາ ວິປາໂກ, ສິຍາ ວິປາກຘມ຺ມຘມ຺ໂມ, ສິຍາ ເນວວິປາກນວິປາກຘມ຺ມຘມ຺ໂມ. ປຎ຺ຈ ເວທນາ… ປຎ຺ຈ ສຎ຺ຎາ… ປຎ຺ຈ ເຈຕນາ… ປຎ຺ຈ ຈິຕ຺ຕາ ວິປາກາ. ມໂນຘາຕຸ ສິຍາ ວິປາກາ, ສິຍາ ເນວວິປາກນວິປາກຘມ຺ມຘມ຺ມາ. ມໂນວິຎ຺ຎາຓຘາຕຸ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.