໑. ກຸສລຕ຺ຕິກໍ

໑໐໓໘. ປຎ຺ຈນ຺ນໍ ຂນ຺ຘານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ?

ຣູປກ຺ຂນ຺ໂຘ ອພ຺ຍາກໂຕ. ຈຕ຺ຕາໂຣ ຂນ຺ຘາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ທສາຍຕນາ ອພ຺ຍາກຕາ. ທ຺ວາຍຕນາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ໂສຬສ ຘາຕຸໂຍ ອພ຺ຍາກຕາ. ທ຺ເວ ຘາຕຸໂຍ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ສມຸທຍສຈ຺ຈໍ ອກຸສລໍ. ມຄ຺ຄສຈ຺ຈໍ ກຸສລໍ. ນິໂຣຘສຈ຺ຈໍ ອພ຺ຍາກຕໍ. ທຸກ຺ຂສຈ຺ຈໍ ສິຍາ ກຸສລໍ, ສິຍາ ອກຸສລໍ, ສິຍາ ອພ຺ຍາກຕໍ.

ທສິນ຺ທ຺ຣິຍາ ອພ຺ຍາກຕາ. ໂທມນສ຺ສິນ຺ທ຺ຣິຍໍ ອກຸສລໍ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ກຸສລໍ. ຈຕ຺ຕາຣິນ຺ທ຺ຣິຍາ ສິຍາ ກຸສລາ, ສິຍາ ອພ຺ຍາກຕາ. ຉ ອິນ຺ທ຺ຣິຍາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ.

ຕໂຍ ກຸສລເຫຕູ ກຸສລາ. ຕໂຍ ອກຸສລເຫຕູ ອກຸສລາ. ຕໂຍ ອພ຺ຍາກຕເຫຕູ ອພ຺ຍາກຕາ. ກພຬີກາໂຣ ອາຫາໂຣ ອພ຺ຍາກໂຕ. ຕໂຍ ອາຫາຣາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ຉ ຜສ຺ສາ ອພ຺ຍາກຕາ. ມໂນວິຎ຺ຎາຓຘາຕຸສມ຺ຜສ຺ໂສ ສິຍາ ກຸສໂລ, ສິຍາ ອກຸສໂລ, ສິຍາ ອພ຺ຍາກໂຕ. ຉ ເວທນາ… ຉ ສຎ຺ຎາ… ຉ ເຈຕນາ… ຉ ຈິຕ຺ຕາ ອພ຺ຍາກຕາ. ມໂນວິຎ຺ຎາຓຘາຕຸ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ.